25 يناير ... موعد المصريين ( 12)

[اغابي]

طيب يا بشمهندس تيمور ....طالما تم اعتقال بعض من الحركه امس ...حضرتك قولت ان ده حال دون تنفي مهمتهم و هى التوجه الى قصر العروبه

طيب لو كانت الثوره منظمه و محسوبه بدقه من قبلكم فأين باقى النشطاء لماذا لم يتوجهوا هم اقصد الباقى ممن لم يتم اعتقالهم

لماذا تحكم فرد من افراد المجموعه بتغيير الخطه ...اين الباقى لو كان لديهم هدف قوى و عزيمه اقوى؟؟؟!!!

او انهم خافوا مثلا ..لماذا جعلوا اعتقال فرد يؤجل و يهد حلمهم الذين يبغوه

اليس هذا نجاح للقيادات فى البلد على السيطره عليهم و بالتالى فأن القياده هى الاقوى حاليا و يتحكموا و الكوره فى ملعبهم..؟؟!!

هذا ايضا استفسار و ليس تقليل من شأنكم

ماهو نص الاستفسارات دي انا جاوبتها يا هندسه قبل كده ؟؟

انتي ماخدتيش بالك منها ؟؟

طيب حرد عليها تاني

1 - انا ماقلتش ان الاعتقال حال دون تنفيذ المخطط خالص انا قلت انه تم بعد صلاة العصر اخبار كل المتظاهرين بالمخطط لكن حصل انقسام ما بين موافق ومعارض وتم سحب الاقتراح فورا دراءا لاي فتنه على ان يتم التحضير له بشكل اوسع لاحقا

2- مافيش مزايده لا على قوة العزم ولا نبل الهدف والقاده مش خايفين لانهم متعودين لكن العقل يقول ان القائد يكون حر لكي يتمكن من التخطيط والتوجيه وارسال فكره الى كل النشطاء مش كده ؟؟

3 - يعني حتى لو ده حصل وهو غير صحيح فين الوطنيه ان اللي يغلب بقى ظالم او فاسد يبقى احنا معاه ؟؟ ده كلام ؟

الموضوع جد يا هندسه وفيه ناس مستقبلها مهدد لكي ياتوا للبلد بافضل مستقبل ممكن

اتمنى احترام تضحيات الثوره واحترام دماء الشهداء ,,

الله المستعان ,,,

طيب يا بشمهندس ده يؤكد كلامى ان الحركه غير منظمه و غير محسوبه العواقب....هى القرارات يا فندم بتطلع فجأه كده فى موقع المعركه؟؟؟!!!

طيب طلعت فجأه علشان سريه المهمه.....فين حلولهم البديله و الخطط البديله ؟؟؟!!!يعنى هما مش عارفين ان هيبقى فيه مؤيد و معارض؟؟؟!!!

فعلا يا مهندسة برافووووووووووووو عليكي

bv:-

ولسة - لان العملا هيشترو كل المظاهرة - فى احزاب اللى هيدفع اكتر هيشيل الليلة كلها

مهندستى

[م تيمور المراغي]

فعلا يا مهندسة برافووووووووووووو عليكي

bv:-

ولسة - لان العملا هيشترو كل المظاهرة - فى احزاب اللى هيدفع اكتر هيشيل الليلة كلها

مهندستى

حيشتروا 2 مليون متظاهر ازاي بس يا اغابي ههههه :happy:

ما تتفرجيش كتر على تلفزيون مصر بتاع بوجي وطمطم ده :happy:

[أحمد سيف]

خمستاشر وهم: ليه مبارك مش لازم يتنحى الآن

1.بابا حسني مبارك:أنا عندي هنا في أرض الجمعية في إمبابة نائب حزب وطني من ساعة ما وعيت على الدنيا وهو بيكسب في انتخابات مجلس الشعب, يعني على الأقل من حوالي 27 ساعة, هل المفروض لما أرض الجمعية يثوروا عليه و يطلبوا خروجه فورا من البرلمان أقول لهم و أنا متأثّر خالص: يا جماعة عيب..فين الأخلاق...بابا النائب يا جماعة..الناس الكويسين ميعملوش كده..ده طلع في الخطاب عمل عيشة و قال أنا آسف...يالا نسامحه يا جماعة!, ده خطاب تاريخي والله...يالا نعيط زي منى الشاذلي, لكل أصحاب نظرية احترام الكبير و زي أبوكو, السياسة و مصاير البلاد مفيهاش بابا و عمو, حرام عليكم, دلوقتي بقى زي أبونا بعد ما كان ظالمنا و ذاللنا و سايب علينا كلابه ينهبوا البلد, ..

2.تسليم و تسلم السلطة بياخد ملايين السنين الضوئية:

مبدئياً هو فيه حد لسه فاكر إن مبارك فعلاً واعي و مركّز و بيتابع كل شئون الدولة؟, يعني إيه الفرق لما مبارك يتنحى و عمر سليمان يعمل نفس اللي بيعمله مبارك دلوقتي, اللي هو بالمناسبة لاشيء, وأمنياً, وجود حسني من عدمه مش فارق, عمر سليمان هو اللي جاب وزير الداخلية الحالي, مش شغال فري لانس مع مبارك, و يقولك: هو إزاي يعني يمشي فوراً, هو بيسلّم كشك, طيب عشان هو فعلا مش بيسلم كشك ومش هنقعد نحسب معاه الإيراد و لا حيسلم عمر سليمان دفاتر المخزن و المرتجع, لازم مبارك يتنحى فوراً, تسليم و تسلم الدولة مش إن مبارك يقعد مع عمر سليمان يفتح معاه دفتر وزارة وزارة و شوف ياعم و خد عندك و إحسب معايا و إديني الإيراد و خلي بالك من دول و اعتقل دول!, هو كان يعني حسني مبارك كل يوم بيشوف أحوال البلد و متابعها و عارف كل حاجة فيها!, دي دولة منهارة محتاجة إنقاذ فوري, مش نقعد نسلّم في أمها شهور, لازم يتنحى فوراً, والمسئولين في كل مكان في مصر حيسلموا الأمور لعمر سليمان, متخافوش, وزير الري مش حياخد النيل و يرفض يسلمه لعمر سليمان, ولا مبارك حيروح شايله و هربان بيه.

3.ارحموا عزيز قوم ذل:

كان رحمك هو لما كنت بتتهان من أقل رتبة في الداخلية, كان رحم أختك من البهدلة في المواصلات و التحرش, كان رحم أبوك من سرقة رزقه لحساب أحمد عز و ابنه و مراته و أصدقائه, ليه بس حبيب العادلي هو اللي يتحاكم, مين اللي جابه للوزارة؟, مين المسئول الأول عن فساد مصر, هو كمان لازم يكون عبرة لكل ظالم بعده, وإلا الرؤساء تيجي تمص دم أبونا و بعدين لما نزنقهم يطلع لنا بتوع الأخلاق الجديدة يقولك: ياجماعة!..إرحمو أحمد عز قوم ذل...

4.ياجماعة ده كان بطل في أكتوبر:

إيه رأيك في زين العابدين بن علي؟ كلب؟ طاغية؟ ذلّ شعبه؟ طيب ما زين العابدين بن علي كان بطل من أبطال تحرير تونس هو و الطاغية اللي قبله الحبيب بورقيبة؟, كونه "كان" بطل في أكتوبر, ميديلوش الحق يذلّ شعبه و يهينه للدرجة اللي وصلتها مصر قبل 25 يناير, تدهور علمي و صحي و أخلاقي و سياسي و ثقافي و أمني!, كونه "كان" بطل مايعفيهوش من إنه تحول لطاغية و ظالم و مسئول أول عن الفساد و الظلم في مصر, مصر مليانة أبطال غيره أصلح, وأنا متأكد إنك لو فتشت في تاريخ العادلي حتلاقيه هو كمان كان بطل في كذا مناسبة أو حادث, لكن مفيش حد بياخد ضمان ثقة مدى الحياة و مهما عمل عشان في يوم من الأيام "كان" بطل.

5.تلاتين سنة أمان:

آه صح, أمان بالمناسبة إتجوزت و جابت حمادة و أشرف, أمان لما كان أصغر أمين شرطة يقدر يهين أكبر أستاذ في الجامعة في أي لجنة أو كمين, أمان لما كان أصغر ظابط شرطة أو أمن دولة وأحيانا جيش ليه الحق قبلك في ركنة العربية و حجز الشقة, ممكن يحول حياتك لجحيم لو طلب إيد أختك و رفضته, أو حصل بينك و بينه خلاف في العمارة, أمان لما كان البوليس ييجي الخناقات بعد فضّها, أمان لما كان كل مصري ممكن ينزل من بيته و ميرجعش عشان ظابط شرطة اشتبه فيه أو قرر يعتقله بموجب قانون الطواريء.

6. دول كام يوم و حيمشي خلاص نستحملهم :

يعني العالم كله شايف على التلفزيونات الناس في البلد اللي إنت بتحكمها متظاهرين, تبعت عليهم بلطجية بسيوف و مولوتوف!, ماشي, هو غرّ ساذج و بريالة و اللي حواليه بيلبسوه الطاسة و يعملوا اللي عايزينه, هو ده بقى النموذج اللي يقدر يحكم مصر في فترة حرجة زي دي؟ مغفل حواليه كلاب و زبانية؟, وإذا كان مش عارف يحمي شعبه دلوقتي, في الوقت اللي فيه الناس متكاتفة, فمش عارف فعلا خلال الـ 200 يوم اللي فاضلين لما الناس تنزل شغلها و تنسى شوية حكاية اللجان الشعبية, حيحصل فينا إيه؟ حيعمل إيه في معارضيه؟ إذا كان مش قادر يحمي الناس اللي العالم كلها باصة عليها إنهم معارضيه!

7.اللي في ميدان التحرير لسه قاعدين هناك ليه:

كل يوم بسبب الناس اللي في ميدان التحرير النظام الفاسد بيقدم تنازلات و يحاول يسحب ناعم و يعتذر و يقولك حنحاكم و يصادروا أموال و يعتقلوا كلاب, كل ده بسبب الضغط عليهم شعبيا و دوليا لعدم تنفيذ مطالب اللي في ميدان التحرير, الناس اللي بتقعد تشتمهم و تخوّنهم, و بعدين الصبح لما تعرف إن عمر سليمان عمل و سوّى و صادر و اعتقل و قال تفتخر أوي بنفسك و تقول والله إحنا شعب ياكل الزلط, يا اخي اختشي على دمك, يا ترحمهم من جهلك و سذاجتك و غسيل التلفزيون المصري لمخك, يا تنزل معاهم تحقق مطالبك.

8.حالنا واقف و مفيش شغل:

والله دي تسأل فيها حكومتك الرشيدة اللي عايزها تقعد معاك برئيسها 200 يوم كمان, ما تروح شغلك؟, مش كل مصر بتشتغل في ميدان التحرير , و المجمع قدامه فاضي و المتظاهرين سمعوا كلام الجيش و قاعدين خارج كامل ساحته عشان ميعطلوش أي حاجة, روح شغلك و اشتغل و متشتغلش بالك باللي في ميدان التحرير, هما من غيرك بيعملوا كتير, وجودك فعلا حيفرق معاهم بعد ما تخلص شغلك و تحب تشاركهم , بس إنت بتتحجج بيهم عشان تقعد في البيت تتفرج على التلفزيون, كمان لو شغلك حكومة واقف فده مش سببه المعتصمين في التحرير, حظر التجول ده بسبب الفوضى و غياب الداخلية, الناس اللي في التحرير لما تمشي حضرتك مش حيختلف شيء في الغياب الأمني في مصر اللي سببه الهروب الكبير للشرطة و فتح السجون.

9.حروح الشغل إزاي و مفيش أمان في الشوارع بسبب الناس اللي في ميدان التحرير:

طيب وهي الحكومة ليه مستنية الناس اللي في الميدان تروّح عشان تنشر الشرطة و الأمن في الشوارع؟ هل مثلا عشان هي عندها شوية صغيرة باقية من كلاب الشرطة و كلاب المباحث و مفيش غيرهم يأمنوا الشوارع عشان هما مشغولين اليومين دول بالهجوم على المتظاهرين في الميدان و تنظيم هجمات البلطجية؟ صحيح هما حيعملوا إيه ولا إيه, الكل عارف إن وزارة الداخلية دلوقتي قوتها الحقيقية 40 % تقريباً, و الباقيين رافضين الرجوع للعمل في الوزارة لأسباب متنوعة, الحكومة ليه مصرة تحشد الـ 40 % حوالين ميدان التحرير؟!

10.اللي في ميدان التحرير دول قابضين و خونة و مخربين و حرامية و موساد و عملاء للأمريكان و إخوان و شيعة و باكستانيين و أفغان و كائنات فضائية:

طيب إنت رحت شفتهم؟ ولا القنوات المصرية دلوقتي بقت مصدر موثوق فيه؟ اللي هناك دول هما أشجع و أنضف و أشرف ناس في مصر, و بالمناسبة للي بيقول عليهم شوية شباب متحمسين عايزين مبارك يمشي فوراً, هما كمان أذكى ناس في مصر سياسياً, عشان فاهمين النظام الفاسد ده كويس, لا بيقولوا عليه بابا ولا يا جماعة ده كان بطل ولا تسليم و تسلم الكشك بياخد وقت, وفاهمين كويس إيه اللي بيضغط على نظام فاسد زي ده, و إيه معنى التوقّف عن الضغط على نظام جبان و مليان كلاب زي ما العالم كله شاف.

11.الإخوان هما اللي في ميدان التحرير:

فيه إخوان مسلمين هناك فعلاً, وكل يوم الإخوان المسلمين بيثبتوا إنهم فعلا مصريين بجد, و أثبتوا فعلا إنهم جديرين بثقة الناس, وده بشهادة ناس كتير و مثقفين سياسيين واعيين جدا, هما كتير فعلا هناك, بس مفيش يافطة واحدة مرفوعة عليها شعار الإخوان, ولا فرضوا على الناس هتافات دينية, ولا حرموا أي حد هناك من إنه مثلا يقعد مع صديقة ليه أو يتكلم معاها , بالعكس, سابوا الميكروفون لحازم شاهين يغني و بيذيعوا أغاني وطنية و بيسمحوا لمداخلات من كل الأطياف الموجودة في الميدان, كونهم منظمين و فاهمين سياسة ده مش عيب, ولو خايف منهم فده لإنك جاهل سياسياً و خايف من بقية شعب مصر ينتخبهم, هما فعلا كتير, و ده كان ميزة مش عيب, من غيرهم كنا حنفقد عدد محترم في مظاهرات الجمعة و الثلاثاء, و كانوا موجودين في الدفاع عن المعتصمين في الميدان ضد البلطجية بكامل طاقتهم, أنا كنت في المستشفى الميداني و شفت إزاي كان المصابين منهم فعلا عايزين يستشهدوا قدام البلطجية دفاعا عن إخواتهم اللي في الميدان, دي مش شهادة للإخوان, دي رد حق ليهم عشان الكلام الفارغ اللي بسمعه كل يوم جوا و بره الميدان, شعب مصر بعد الكلب مبارك لو إنتخب الإخوان مش حزعل, لإن ده إختيار الشعب, و الشعب لامؤاخذة مش قاصر ولا من حق أي حد يحدد له إختياراته, و الإخوان زي ما حييجوا بالإنتخابات, لو منفذوش طلباتك و نفذوا سياسات تفيدك, في الإنتخابات اللي بعدها ما تنتخبهمش و الشعب اللي كسر الكلب مبارك و حكومة القمع الأمنى, في رأيي, تقدر تكسر أي نوع من الطغيان حيكون بعده.

12.خلينا نهدى شوية بس و نجرب الحكومة الحالية يمكن فعلا ينفذوا اللي قالوه:

نجربهم!..30 سنة ذل و نجربهم؟, بطلجية على المتظاهرين و نجربهم؟ هما لامؤاخذة احترموا نفسهم ليه, عشان ضغطنا عليهم, هل لو الدنيا هديت فعلا حينفذوا اللي قالوه؟, النظام الفاسد ده تجريبه معناه إنك تاخد على قفاك 7 مرات و تقول معلش قالولي مش حيضربوني على قفايا تاني.

13.الناس جعانة و مش معاها فلوس و حيموتوا بعض:

الناس لازم تعرف إن الحرية أغلي من العيش, وإن معلش نستحمل شوية مقابل حريتنا, و لوحد جاع حيلاقي كتير يأكلوه, ولو ضاقت بيه الدنيا ممكن يروح ميدان التحرير و حيلاقي هناك أكل و شرب و كل حاجة, الناس مش معاها فلوس عشان البنوك مقفولة عشان مفيش تأمين ليها, عشان الداخلية مش فاضية للأمن وفاضية للبلطجة على الشعب.

14.يا جماعة لازم يمشوا عشان المادة 82 و 84:

وهما بالمناسبة كالتالي:

المادة 82

إذا قام مانع مؤقت يحول دون مباشرة رئيس الجمهورية لاختصاصاته أناب عنه نائب رئيس الجمهورية أو رئيس مجلس الوزراء عند عدم وجود نائب لرئيس الجمهورية أو تعذر نيابته عنه. ولا يجوز لمن ينوب.عن رئيس الجمهورية طلب تعديل الدستور أو حل مجلس الشعب أو مجلس الشورى أو إقالة الوزارة.

و المادة 84

فـى حالة خلو منصب رئيس الجمهورية أو عجزه الدائم عن العمل يتولى الرئاسة مؤقتا رئيس مجلس الشعب، وإذا كان المجلس منحلا حل محله رئيس المحكمة الدستورية العليا، وذلك بشـرط ألا يرشـح أيهما للرئاسة، مع التقيد بالحظر المنصوص عليه فـى الفقـرة الثانية من المادة 82. ويعلن مجلس الشعب خلو منصب رئيس الجمهورية. ويتم اختيار رئيس الجمهورية خلال مدة لا تجاوز ستين يوما من تاريخ خلو منصب الرئاسة.

و الخلاصة من الوهم أعلاه هي إن وجود مبارك ضمان لتغيير الدستور الفاسد و الوزارة الحالية, وإلا بموجب الدستور الفاسد مش حنعرف نعيش في ديمقراطية و اللي حييجي حيقعد 30 سنة هو كمان!

أصل إحنا لما مبارك يتنحى و ييجي واحد بعده ومايغيرش مواد الدستور الباطلة لا هو ولا الوزارة حنقول: لازم نحترم الدستور الفاسد المرسّخ للاستبداد السياسي عشان ده الدستور و الحكومة كمان..مينفعش يا جماعة...فين الأخلاق, بالظبط زي بابا مبارك كده ما هو فاسد و مقصّر بس احترام الكبير يا جماعة عيب مينفعش.

طبعاً طبعاً لما مبارك يغور بكل بساطة ممكن الحكومة الانتقالية المؤقتة تقعد أقل من الـ 200 يوم بتوعه دول بنص المادة 84 و يتم اختيار رئيس "مؤقت" لتحقيق مطالب الشعب و حيكون مفروض عليه تغيير الدستور سواء رفض أو قبل وإلا الناس اللي نزلت لمبارك حتنفخه هو كمان, لحين عقد انتخابات رئاسية يختار فيها الشعب المصري رئيسه, ثم أكيد كل القضاة الموجودين بالإضافة لكل المثقفين السياسيين الموجودين مش فاهمين هذا المأزق الدستوري العظيم اللي اكشتفه عمر سليمان و أحمد شفيق و بصوا لبعض و شهقوا و قالوا: يا خرابي, ده مبارك طلع مهم !

15. يا جماعة طيب نسيبه حقنا للدماء, إحنا تعبنا كفاية

محدش قال إن الحرية مش غالية و مش مقابل دماء كمان, فيه ناس تعبت نفسيا و ماديا و عصبيا, و بيقولوا كله بسبب المظاهرات اللي من طرف واحد فما بالك بمظاهرات من الطرفين, المظاهرات اللي تعبتكوا دي هي اللي جابتلكم كل المكاسب اللي اتحققت, واللي كان فيه قطاع كبير من الناس اللي تعبانة دلوقتي دي ضدها في البداية و بيهاجموها بكل شراسة و خوف و جبن أحياناً, إنتوا تعبتوا نفسيا من 10 أيام, و الناس في التحرير بتموت و بتتهاجم و بتصاب و بترجع تاني تدافع عن نفسها و عن حقها في تنفيذ مطالبها, فيه ناس لو روحت بيوتها أكيد تاني يوم حيتم ملاحقتها و اعتقالها, لو تعبت إفتكر إنك أصلا كنت تعبان, إتعب شوية كمان عشان تعيش عيشة محترمة.

[ابوهنا]

ممكن أقترح إنه خلال الأسبوع ،،،

ينتقلوا مرحلة مرحلة ،،

يعني بكره ينتقلوا من ميدان التحرير لغمرة

و بعدين العباسية يوم تاني ،،

لحد ما يوصلوا للقصر الجمهوري ،،، الجمعة القادم إن شاء الله

أو ما قبله

ايه الجنون ده

وهل يسمح الجيش به

الجيش وظيفته حماية الشرعية

وبكل المقاييس وبرغم مايشوب انتخاب الرئيس فى 2005 فهو رئيس منخب وهو شرعى

ولا اعتقد ان الجيش سوف يسمح به

لانه سوف تحدث مهازل هناك

لاتقول ان كل الموجودين فى ميدان التحرير ملائكه

فيهم مندسين وفيهم متعصبين وممكن يتجءأ احد منهم للدخول الى قصر الرئاسه

ساعتها لن يجد الجيش بد من اطلاق الرصاص

لانه لو لم يفعل كده فهى خيانه عظمى لانه لم يحمى الشرعيه

ارجوكم لنحقن دماء ابناءنا

[م تيمور المراغي]

مداخله جميله اوي للاستاذ عصام ابو الفتح وحبيت اعرضها عليكم هنا ليقرأها اكبر عدد ممكن

السلام عليكم ورحمة الله وبركاته

الحل الذى اقترحه يتكون من نقاط محددة متتالية وطبقا للدستور الحالى حتى يتم استبداله والخطوات كالتالى :

1- حل مجلس الشعب والشورى : لتجنب ان يتولى الرئاسة فتحى سرور طبقا للمادة 84 وهو ليس محل ثقة

2- اعلان من الرئيس مبارك انه غير قادر صحيا على مسئولية الرئاسة ويتم تسليم الرئاسة لرئيس المحكمة الدستورية العليا طبقا للمادة 84 من الدستور

3- يتولى رئيس المحكمة الدستورية منصب الرئيس المؤقت ويختار رئيساً للوزراء بالتشاور مع ممثلى الثورة ويكون شخص لا يختلف عليه اثنان فى مصر

4- يقوم رئيس الوزراء بتشكيل حكومة ( ليست انتقالية فلا داع لذلك ) تكون من افضل الكوادر فى مجالها وتترك له حرية الاختيار.

5- يقوم الرئيس المؤقت بتشكيل لجنة برئاسته من خبراء الدستور والقانون وممثلى الثورة والاحزاب لصياغة الدستور الجديد لمصر

6- بعد انجاز الدستور الجديد يتم عمل استفتاء شعبى عليه ويراعى حرية الترشح لمنصب الرئاسة

7- إجراء الانتخابات الرئاسية باشراف قضائى كامل واختيار رئيس الجمهورية

المدى الزمنى : النقاط الثلاث الاولى يمكن انجازهم فى يوم واحد والرابعة فى الاسبوع الاول ويحتاج الدستور ل 30 يوم من العمل المكثف والاستفتاء عليه اسبوع بعدها والانتخابات الرئاسية للاسبوعين الباقيين ، وبذلك تتم كل الاجراءات المطلوبة خلال ال 60 يوم التى نص عليها الدستور الحالى

اخيراً .. سعيد بالتواصل معكم فى المحاورات مجدداً

تحياتى

[مسافر]

بسم الله الرحمن الرحيم

الحمد لله وحده، وصلى الله وسلم وبارك على من لا نبي بعده، وبعد؛

فإن الأمة المصرية تمر اليوم بمرحلة بالغة الخطورة، تستوجب أن يقوم العلماء والدعاة وأصحاب الرأي والحكماء بواجبهم نحو مناصحة أمتهم.

والموقعون على هذا البيان يتوجهون إلى مختلف طوائف الأمة بما يلي:

أولاً:

إن المخرج الوحيد من هذه الأزمة هو الاعتصام بكتاب الله تعالى وسنة نبيه

صلى الله عليه وسلم، والتعاون على البر والتقوى، وترك التعاون على الإثم

والعدوان.

ثانيًا:

إن الأمة لن تسمح بالمساس بالمادة الدستورية التي تنص على أن الإسلام هو

دين الدولة، واحترام مرجعية الشريعة الإسلامية وأنها المصدر الرئيس

للتشريع، وذلك لأنها صمام الأمن والأمان والسلام لجميع أفراد الوطن مع

التأكيد على ضرورة إلغاء قانون الطوارئ وكل ما يشير إليه.

ثالثًا:

لقد اتجهت الأمة اليوم بكل طوائفها نحو التغيير والإصلاح بما لا يجوز

تعويقه، ولا الإبطاء في إنجازه، وإن إقامة العدل وتحقيق التنمية وإصلاح

الحكم ومؤسساته –هو اختيار الشعب الذي يمثل الاستقرار المنشود. وهذه

المطالبات السلمية المنضبطة لا تعد خروجًا على الشرعية، أو مخالفة للشريعة

الإسلامية.

رابعًا:

إن تحقيق الأمن والسلام والتكافل والتراحم بين فئات المجتمع مرهون بإجابة

مطالب الشباب المشروعة، وإعطاء الضمانات الكفيلة بتأمين جموع المتظاهرين،

واتخاذ الإجراءات التي تكشف عن صدق النوايا، والتي يمكن إعادة بناء جسر

الثقة والمصداقية الذي انهار بسبب ما وقع من أخطاء ونقض للعهود.

خامسًا:

تؤكد قوى المجتمع على حفظ مكتسباتها وتطالب بالوقوف خلف مطالب الشباب،

وإنجاز التغيير في الاتجاه الصحيح، دون انزلاق مع توجهات منحرفة، أو

شعارات مضللة، وتنبه إلى أن هذه المطالب تتفق مع جميع الشرائع السماوية

والمواثيق الدولية فضلاً عن إجماع الأمة.

سادسًا:

يناشد الجميع المسئولين عن البلاد بحقن الدماء وحفظ الأرواح وضبط الأمن،

وسرعة اتخاذ الإجراءات لمحاسبة الفاسدين دون إبطاء تحقيقًا لمصالح البلاد

والعباد.

سابعًا:

يحتسب الموقِّعون على هذا البيان المقتولين من أهل الإيمان بسبب الاعتداء

عليهم -شهداء عند الله تعالى، ويستحق أهلهم تعويضًا عما لحقهم من الخسائر

والأضرار في الأنفس والممتلكات.

ثامنًا:

على جموع المتظاهرين أن يعملوا على حفظ مطالباتهم بسلوك الطرق السلمية في

التعبير والمطالبة، والبعد عن كل ما يعرِّض هذا الجمع للأخطار، وكل ما

يؤدي إلى الإضرار بالوطن والمواطنين، ويوجد ذرائع البطش والتنكيل.

تاسعًا: يشيد الموقعون على هذا البيان بالموقف الوطني المشرف للجيش المصري ورسالته في حفظ أمن الوطن والمواطنين.

عاشرًا:

ندعو جموع الشعب المصري إلى إشاعة الرحمة والرفق، والعفو والصفح، عن كل من

أساء أو اعتدى بشرط تحقق المطالب، ونجاح المقاصد، قال -تعالى-: (وَجَزَاءُ سَيِّئَةٍ سَيِّئَةٌ مِثْلُهَا فَمَنْ عَفَا وَأَصْلَحَ فَأَجْرُهُ عَلَى الله إنَّهُ لَا يُحِبُّ الظَّالِمِين) (الشورى:40).

حفظ

الله مصرنا آمنة مطمئنة، وحمى شبابها ورجالها، وولّى عليها خيارها، وجعل

ولايتها فيمن خافه واتقاه واتبع رضاه، برحمته إنه أرحم الراحمين، وأكرم

الأكرمين، والحمد لله رب العالمين.

القاهرة، ليلة السبت الموافق: 2/3/1432هـ- 5/2/2011م.

www.anasalafy.com

موقع أنا السلفي

بيان من الهيئة الشرعية لحماية الحقوق والحريات

[se_ Elsyed]

إعترافات موثقة لأصحاب الأجندات الاجنبية ..

اعتقد إن الأيام ستكشف كثير مما حدث في ميدان التهرير

http://www.youtube.com/watch?v=KppVM2haCcY&feature=player_embedded

[aimen]

اعترافات مجرم من البلطجية

اتفرج على الخيبة

تم تعديل 5 فبراير 2011 بواسطة aimen

[fatfouta]

المساجين بيخرجوا من السجن ورجال الداخلية واقفين يتفرجوا يبقى مين اللى خرجهم بقى؟؟؟

http://www.youtube.com/watch?v=yhVSfd6qrzA&feature=player_embedded#

[se_ Elsyed]

طيب خد الحته دى يا سى السيد

ضباط القسم هم من اخرجوا المساجين

http://www.youtube.com/watch?v=yhVSfd6qrzA

شوفته وياريتني ما شوفته

حسبي الله ونعم الوكيل

[aimen]

معنى ان تكون طبيبا فى ميدان التحرير

http://shayunbiqalbi.blogspot.com/2011/02/blog-post_05.html?spref=tw

[fatfouta]

معلش يا ايمن ماخدتش بالى انك حطيته قبلى

[Alattar]

معنى ان تكون طبيبا فى ميدان التحرير

..............

الله أكبر

أهو أي واحد من دول لو بقي وزير صحة بإذن الله تعالي

أنا متأكد انه هيغير كتير أوي في النظام الصحي

الناس اللي فعلا بتخدم حبا في بلدها و أبناء بلدها و بلا أي مقابل

[pink rose]

معنى ان تكون طبيبا فى ميدان التحرير

http://shayunbiqalbi.blogspot.com/2011/02/blog-post_05.html?spref=tw

اد ايه الشعب دا بطل

[جويرية]

طيب و اخرة الوقفة في الميدان دي ايه ، الناس تعبت

انا شايفة ان خلاص يا ياخدوا قرار

يا يعملوا خيام و يقيموا في الميدان زي الصوماليين لما كانوا في ميدان جامعة الدول

[طبيبة بالخارج]

لسه بسمع كلام احمد شفيق دلوقتي بيتكلم ان الناس المتظاهرين نسبة قليلة جدا بالنسبة للمصريين

فقال له المذيع: طب ليه انصاعت الحكومة لمطالب القلة دي؟

رد: لأ هو الحكومة نفذت المطالب اللي رأينا ان اغلبية الشعب عايزها فعلا

المذيع: ما هي المطالب التي لا تسير مع اغلبية الشعب؟

رد: بعض المطالب القليلة مثل طلب تنحي الرئيس فورا. أصل ده مش من طبيعة المصريين

بدون تعليق (دمي اتحرق فوق ما هو محروق)

[se_ Elsyed]

يا يعملوا خيام و يقيموا في الميدان زي الصوماليين لما كانوا في ميدان جامعة الدول

ما هو يا ريتهم كانوا صوماليين

دول كانوا من جنوب السودان يا جوجو :closedeyes:

[se_ Elsyed]

إلعبي يا إنعام ؟

وهات يابني كام أجندة من فوق الرف

إحباط محاولة لتدمير نفق الأزهر واحتراق سيارتين فقط

السبت، 5 فبراير 2011 - 14:16

تمكن أفراد الأمن بنفقى الأزهر من إحباط محاولة اقتحام بعض العناصر المجهولة لغرف الصيانة الخاصة بتشغيل النفقين، وأسفر الحادث عن احتراق سيارتين داخل النفق.

أكد الدكتور عبد العظيم وزير، محافظ القاهرة، تعرض نفق الأزهر لعملية اقتحام على يد عناصر مجهولة، مشيرا بأن الحادث لم يسفر عن أى خسائر بالنفق سوى احتراق سيارتين داخله.

وأضاف "وزير" أن رجال الأمن المسئولين عن تأمين النفق، تمكنوا من إحباط الحادث، مؤكدا أنه تم التعامل مع السيارات المتهالكة نتيجة الحادث وتم رفعها لتسير الحركة المرورية داخل النفق.

لما هما أحبطوها ... السيارتين دول أنفجروا إزاي عدم اللامؤخذه ؟

سين سين .. تاجر أجندات وأمسكيات رمضان

[طبيبة بالخارج]

كلام الفريق احمد شفيق ملخصه : كنت حاقولها الأول

بقى مطالب الثوار كنتوا نفسكم تعملوها؟ طب ليه لم تنفذ من زمان؟ ده حتى دستور انتخابات الرئاسة النظام هو اللي عملها و غصب عن عين الشعب . دلوقتي عايزين تغيروه كأن اللي عمله كان الملك فاروق

[se_ Elsyed]

كل ما بأسمع أحمد شفيق دلوقت .. اقول " ليته سكت "

راجل فعلاً ميح في السياسة ..

بيسألوه امس على قناة العربية : وماذا عن الشهداء ؟

أجاب : لو أثبتنا إنهم قُتلوا - اه والله - هانعمل إيه يعني .. هانرجعهم تاني ؟ لأ طبعاً .. هانشوف مين غلطان ونعوضهم ونحاكم اللي إتسبب في كده .. بالظبط زي عربية لما تخبط واحد .. صاحب العربية بيتسجن واللي مات بيتعوض مادياً

كلامه ده بالنص سمعته النهاردة