من أجل ذلك نريد تغيير النظام " كُللللللللللللللللله "

[se_ Elsyed]

طبعاً وسط زخم الاخبار المتركزة على ميدان التحرير الذي أصبح هو رمز الخلاص من الطغيان ... نسينا ما يحدث في بورسعيد والوادي الجديد أمس وأول أمس ..

هانتناول هنا ما حدث في بورسعيد .. وهو يُمثل قمة الإحتقار لهذا الشعب وتهميش مشاكلة من القيادة السياسية الظالمة .. والتي هي مسئولة عن تعيين طُغاة وجبارين مثلها لكيونوا مسئولين عن المحافظات المختلفة في مصر .......

وأول ما بتيجي كلمة محافظة بنفتكر على طول إن المحافظ " لواء " يا شرطة يا جيش

المهم ... من سنوات بأتابع قضية في بورسعيد إسمها " عشوائيات زرزاة "

شيء يا جماعة بشع ولا يصدقة عقل ...

الاف من الناس عايشة في عشش كرتون وصفيح وظروف ولا الحيوانات تقدر تعيش فيها

لان الحيوانات بنعمل لهم مكان مجهز مخصص عشان ما يموتوش

أما دول فلا صرف صحي ولا مياه ولا كهربا ولا مسكن أساساً

كل ده وعلى بُعد 50 متر منهم مئات من مساكن المحافظة مغلقة وتنتظر أصحاب النصيب من المحظوظين اللي معاهم واسطه

واللي حصل إن في الغياب الأمني كثير من هؤلاء المهمشين إقتحموا تلك المساكن المغلقة وأحتلوها ... ولما رجع البيه المحافظ امر الشرطة بإخلاء تلك المساكن عشان ينظموا توزيعها ... وعشان يهدي الناس راح قال لهم قدموا طلبات وهانبت فيها بسرعة ونحل مشاكلكم ...

ما فيش يومين تلاته وبالصدفة .. اكتشف الناس إن جميع طلباتهم .. أصبحت موجودة في صندوق زبالة كبيرررررررررررررررر مقابل مبنى المحافظة

ولكم أن تتخيلوا ماحدث من رد فعل طبيعي ...

وبصراحة المحافظ نفسه اللي كان المفروض يشيلوه ويرموه في صندوق الزبالة لإن ده مكانه الطبيعي

آلاف مواطن بورسعيدى يحرقون سيارة المحافظ ويحطمون واجهة مبنى المحافظة

كتب حمدى جمعة وجمال نوفل ١٠/ ٢/ ٢٠١١

تصوير - محمد راشد

سيارة محافظ بورسعيد تشتعل أمام ،مقر المحافظة

أحرق نحو ٣ آلاف مواطن من سكان عشش وعشوائيات «زرزارة» فى بورسعيد سيارة المحافظ اللواء مصطفى عبداللطيف، إثر عثورهم على الطلبات التى قدموها للحصول على شقق ملقاة فى برميل قمامة أمام ديوان المحافظة.

كان المواطنون الغاضبون قد توجهوا إلى مبنى ديوان المحافظة صباح أمس، للتظاهر والمطالبة بحقهم فى السكن وعند مبنى المحافظة وجدوا أوراق طلبات الإسكان والشكاوى التى قدموها فى مظاهرة، أمس الأول، ملقاة فى برميل قمامة أمام المحافظة، وعلى الفور قاموا بقذف واجهة مبنى المحافظة، وهو من الزجاج بعرض نحو ٥٠ مترا وارتفاع ١٥ مترا.

كان المحافظ اللواء مصطفى عبداللطيف أعد الواجهة خلال آخر زيارة للرئيس مبارك لبورسعيد فى سبتمبر ٢٠١٠، وقام المواطنون بإخراج ما سموه «صالونات حسنى مبارك» إلى الشارع ووضعوا معها موتوسيكلين يخصان شرطة المرافق وسيارة المحافظ المرسيدس وأشعلوا فيها النيران، وأصيب موظفو ديوان عام المحافظة ومجمع الخدمات ومديرية الأمن بالهلع واندفعوا خارج المبانى، بينما احتل المتظاهرون واجهة المبنى وأقام بعضهم عششاً من الأخشاب والبلاستيك فى عرض شارع ٢٣ يوليو المواجه للمحافظة، وآخرون أقاموا فى حديقة ميدان الشهداء، فى الوقت الذى اختفى فيه المحافظ داخل استراحته والمتظاهرون يعلنون اعتصامهم وإقامتهم فى الأماكن التى وصفوها بـ«الخمس نجوم»، مقارنة بـ«زرزارة» ومستنقعاتها وحشراتها وقوارضها.

كان المئات من سكان زرزارة قد اقتحموا المساكن الحكومية فى مشروعات الرحاب والسيدة نفيسة منذ مساء السبت ٢٩ يناير عقب انسحاب الشرطة واستقروا فيها، ويوم الأحد الماضى أعلن المحافظ أنه كلف شرطة المرافق بإخلاء الشقق المقتحمة، الأمر الذى أغضب سكان زرزارة ودفعهم للتظاهر والاعتصام أمام المحافظة.

[م تيمور المراغي]

بس بيني وبينك يا س مش معنى ان الثوره قامت ان اي مجموعه من المواطنين المصريين تروح تحتل مباني معينه وتسكنها بوضع اليد

الموضوع برضوا محتاج تنظيم

والا ايه رايك ؟

[الغريب]

أنا فاكر كويس المنطقة دي لما جبها عمرو الليثي في "واحد من الناس" ، بصراحة هي مكنتش منطقة سكنية، هي كانت منطقة فئران وكلاب وبعد كدة الناس راحت سكنت فيها تقريبا

وفاكر كمان ساعتها أن المحافظ قال أن هيوفرلهم سكن جديد وآدمي، بس معرفش أنه غدر بيهم بالشكل ده

.. لا أقول إلا حسبي الله ونعم الوكيل ،،

[se_ Elsyed]

بس بيني وبينك يا س مش معنى ان الثوره قامت ان اي مجموعه من المواطنين المصريين تروح تحتل مباني معينه وتسكنها بوضع اليد

الموضوع برضوا محتاج تنظيم

والا ايه رايك ؟

لأ طبعاً أنا ضد الفوضى

لكن ضد الظلم تماماً

لما أجوع واحد لمدة سنة يا تيمور وأضع أمامه مائدة عامرة بالأكل وافضل أحنسه وأذله لشهور طويلة واقول له هاتاكل بس بنظام .. النظام يا أخواننا .. متوقع إيه ؟

لما أبقى متاكد إن الناس دي عايشة تحت الأرض وهي شايفه مئات العماير خاوية على عروشها وقربت تقع عشان ما حدش ساكن فيها والمحافظة قفلاها وخلاص عند وغباء ووعود في وعود في وعود ... يبقى متوقع إيه ؟

لما كل طلباتهم تترمي أمام أعينهم في الزبالة .. متوقع إيه ؟

بعد ذلك كله .. ما هي وجهة النظر في تفسير كلمة " تنظيم " ؟

[ذهبية]

بالرغم انى ضد خال يوسف وافلامة

لكن اعتقد انة تنبا باللى يحصل دة فى كل افلامة

و العشوائيات ووضعها و ادى انذار كتيرررر للحكومة بالتصرف

الناس دى يا جماعة مينفعش تتطلب منها لحظة نظام او انتظار

الناس دى معندهاش حاجة تبكى عليها

الناس دى اللى بيطلع منهاالحرامية و النصابين و القاتلين

لانهم بيقولوا هيحصل لينا اية

ما احنا عايشين ميتين

الشمكلة يا جماعة فى كل اللى حصلنا دة

عدم وجود العدالة

[م تيمور المراغي]

فكرتي هي الصبر حتى نجاحا الثوره عشان الحكومه ما تروحش للناس تقول لهم شوفتوا حيحصل لكم زي ما حصل كده

اللي شاري شقه وقافلها حيرجع من السفر يلاقي ناس ساكنه فيها وبتقول له بالسلامه

انا كنت ححبهم اكتر لو نزلوا شاركوا في المظاهرات ما قعدوش في الشقق وركبوا الموجه

بعدين المرحله الجايه لما يتم مصادرة وتاميم اموال سارقي الشعب ثروة واحد منهم فقط تسكن كل شباب مصر والله اعلم

حبقى اعمل دراسة لتكلفة وحدة سكنيه اقتصاديه بالجنيه المصري نحسب ال 70 مليار دولار يبنوا كام شقه اسكان متوسط

دي كفيله بحل مشكلة السكن في مصر ان شاء الله

[Guest freestyler]

المحافظ نفسه اللي كان المفروض يشيلوه ويرموه في صندوق الزبالة لإن ده مكانه الطبيعي