بتحلم بإيه لمصـــــــــــــــــر

[se_ Elsyed]

أنا عندي احلام كتير قوي

لكن ياريت نبلور كل أحلامنا دي في أفكار إيجابية تنفع بلدنا كلنا

هاخد نفسي وأضرب طبق الحلويات الشامية اللي غرقنا الشركة بها .. وأرجع لكم

[the consultant]

ناس أكثر وعيا و خوف على البلد عشان خلاص بأت بلدنادي أهم حاجة نفسي فيها دلوقتي و بعدين باقي الحاجات التعليم و الصحة و ............................

[hOuSsAm]

اننا كمغتربين نشارك فى الحياة السياسية ويبقى لينا نصوت لحد منرجع مصر ونشارك فى النهضة

كل مصرى يلتزم بالقوانين

نرجع الفلوس المنهوبة والاراضى واملاك الدولة اللى ضعاف النفوس تعدوا عليها فى عز الازمة

ولى رجعة فى بقيت الافكار والاحلام

[se_ Elsyed]

أنا مش هاتكلم كلام فلسفي أو أمنيات عاطفية

نفسي في :

1- دستور محترم يسأل رئيس الجمهورية لو أخطأ ... يسأل الحكومة لو أخطئت .... مافيش حاجه إسمها حصانة يختبيء المجرمين وراءها تحت غسم " نائب مجلس شعب " .... يساووي بين كل المصريين ولا تمييز على أساس ديني أو غيره .

2- أحلم بوزير داخلية مدني ... ويتحول هذا الجهاز المتعسف إلى جهاز خدمي مثله مثل أي جهاز أخر .. له إحترامة وتقديرة منا .... لكن ليس له سلطة طواريء أو تعسف أو سُلطة مطلقة تُنكل بالناس وترعبهم بدلاً من حمايتهم .

3- احلم بمناهج تعليمية محترمة تُخاطب العقل وتُنشأ جيل واعي .. فاهم مش حافظ .... أحلم بشخصية مرموقة زي زويل او البرادعي أو مصطفى السيد تتولى وزارة التعليم فتجتذب لنا كل الجامعات العالمية للتعاون معنا في مجالات البحث العلمي .. أحلم بتعليم يجعل الطالب يذهب إلى مدرستة أو جامعته بحب وإقبال ...

4- أحلم بوزارة صحة تعمل ثورة في العلاج وتعامل الناس على إنهم " بني أدمين " ... نفسي الواحد يدخل المستشفى يخف بس من منظرها المحترم زي مستشفى 57 كده ..

5- نفسي في القضاء على العشوائيات وتطهيرها من البؤر الإجرامية ونحتوي الناس اللي هناك لأنهم بشر زينا ونحولهم كلهم لطاقة منتجة بدل ما يبقى مهمش ومهمل ويخرجوا مجرمين وحاقدين على المجتمع

يُتبع

[Dreamwithme]

باحلم لمصر بحاجات كتيييييييييييييييييييييير جدا

بس أهم حاجة بأحلم بها دلوقتي إن كل واحد فينا يقعد مع نفسه ويبدأ بداية جديدة

يبدأ بداية يبقي عارف أنه مسئول عن البلد دي وإن في شباب زي الورد وأحلي من الورد ماتوا عشان اليوم اللي أحنا بنعيشه

كان نفسي يكونوا معانا ويحلموا معانا بس ربنا أراد أنهم يكونوا شهداء ودمهم يروي الحلم وحلمهم تحقق

نفسي بجد إن حلم كل واحد فينا يكون أنا هأعمل أيه بكرة للبلد دي أيه

[لماضة مصرية جدا]

السلام عليكم و رحمة الله و بركاته

صباح الحلم

لا ده علم

بحلم بايه لمصر

لا مبحلمشي

لانه مبقاشي حلم خلاص

بقي كل حاجة افكر فيها بقي جوايا يقين انها مش محتاجة اكتر من تشمير الايدين و انزل اغرسها في الارض الطيبة...العفية...و هقعد ابص عليه و هو بيكبر قدام عيني خطوة خطوة....يمكن مكونشي هنا في اول قطفة بس اللي متأكدة منه ان ولادي هيدوقوا شهد الارض الطيبة دي

هشمر دراعاتي و انزل....و ابص في الوشوش المصرية اوي اللي كنت بقابلها اول ما رجلي تخطي المطار و احس انها شايلة هموم الدنيا كلها و ع الرغم من كده...كانت دايما تقولي آخرررررر نكتة

بحلم ان الشعب تطلع من قلبه ضحكة مش مسروقة.....ضحكة مش شايلة هم بكرة هياكل ايه و هيجيب مصاريف المدرسة منين

بحلم ان محدش مصري يشيل هم علاج...و يكون فيه منظومة تأمين صحي....مش هو اسمه تامين....يبقي لازم يبقي فيه امان

امان اني في لحظة المرض..عافانا الله جميعا....اتعامل اني بني آدم....احس بكرامتي الي ممكن يهزها المرض و بتكسرها العوزة و الحاجة الف مرة

بحلم اني لما اروح الجامعة اقدر احكي في كل حاجة....اعمل الاسرة اللي انا عايزاها و محدش يقف في وشي و يقولي يا بنت انتي روحي هاتي تصريح من الحرس الجامعي

عايزة نقعد علي الارض في الجامعة و نرسم دواير كتير فيها احلامنا...فيها جنوننا...فيها حدودالسما اللي خلينها تنزل و تيجي حدنا للارض

عايزة لما احضر محاضرة احس ان حد بيكلم عقلي....و بيحترمني كبني آدم...و من حقي اني ارفع ايدي و اقول لاستاذي انا مختلفة معاك...من غير ما انطرد بره المدرج

عايزة....اشمر دراعاتي.....و الون الحيطان عندي في الشارع بوشوش مصرية....بعبارات فيها صمود و قوة....عشان الناس لما تفتح عينيها الصبح تعرف ان معركة الصمود لسه مخلصتشي و ان احنا في رباط لغاية يوم الدين.....و البلد دي بتاعتنا مش بتاعت حد تاني

عايزة...انزل السوبر ماركت....و افضل ادور علي اي حاجة عليها علم مصر.....حتي لو بره مصر....عايزة احس ان مصر هي نمرة واحد عندي....عشان انا نمرة واحد عندها

و متضحكشي عليا بقي....انا عايزة اشتري لاخواتي الاولاد الفانلات القطن بتاعت المحلة الكبري.....اه بحبها....و بحس فيها انها متفصلة مقاس مصري صرف....و بحب اشيلها معايا منين ما بكون...فيها ريحة مصر

عايزة لما ابقي قاعدة مع اصحابي و بيحكولي عن الباسبور الكندي....اطلع الباسبور الاخضر...و اقولهم احتاج لايه....بكرة كندا راح تجري ورايا

عايزة اسمع موسيقي عمر خيرت في كل حتة.....و اسمع اشعار فؤاد نجم و جمال بخيت في كل حرف....عايزة احس ان كل مصر بقت لوحة جمال....حتي في ملامحنا....يرجع ليها الضي و النور

عايزة.....انزل مصر و احس انها بتاعتي.....مش عايزة حد يتذاكي عليا...و لا يستنصح عليا....يمكن انا بعيد....بس عايزة ارجع لروحي هناك....و عايزة لما ارجع محسش اني غريبة في بيتي

عايزة الناس...لما تيجي تتكلم محدش يقول...انا.....محدش يقول طب....و المسيحين عايزين ايه....طب المسلمين فين....عايزة لما نتكلم تبقي عينينا متشعلقة علي 3 حروف و بس.....هي مصر رايحة فين

عايزة محدش يعدي الشارع الا لما تبقي الاشارة بتقولي اني ينفع دلوقتي اقطع الشارع.....من غير ما يبقي فيه عسكري....و من غير ما تكون فيه كاميرات مراقبة....انا عايزة احس اني مراقبة نفسي جوه نفسي...انا بقيت عين علي نفسي

و مش عايزة اقف في الاشارة في التاكسي و اشوف السواق بيمد ايده بره الشباك و يطبق خمسين قرش و يديها لعسكري المرور اللي منقوح في الشمس.....و افضل اسال نفسي يا تري هي المشكلة في الخمسين قرش انها بترجعنا خمسين سنة لورا....و لا الراجل الغلبان اللي واقف يتسول بشكل مستتر....مش عايزة ارجع لحوار المراجيح ده جوايا.....حوار ياخدني من اقصي اليمين لاقصي اليسار و بعدين يوقعني علي ارض احس فيها ان مافيش فايدة

خلاص يا ربي فيه فايدة

الارض مش راح تخذلني

الفلاحين.....كلنا....هننزل هنشمر دراعتنا و ننزل نعزق و نحرث و نرويكي....باحلامنا....و مش راح تكون احلام....هتبقي بذرة....وولادي هيقطفوها...مش زعلانة....لا عندي اغلي منهم.... و لا عندي ارض اغلي منها ازرع فيها

هرجع تاني......مش عايزة ابطل احلم.....مع اني مش محتاجة اني اغمض عيني عشان احلم...هفتحها....و هفتح معاها بيبان الروح و القلب علي كل خير و جمال و يقين ان اللي جاي احسن باذن الله

صباح حضرتك حلم بيتغزل بعيون مفتوحة....و بروح مشتاقة تبقي هناك...في مصر

[لماضة مصرية جدا]

اننا كمغتربين نشارك فى الحياة السياسية ويبقى لينا نصوت لحد منرجع مصر ونشارك فى النهضة

كل مصرى يلتزم بالقوانين

نرجع الفلوس المنهوبة والاراضى واملاك الدولة اللى ضعاف النفوس تعدوا عليها فى عز الازمة

ولى رجعة فى بقيت الافكار والاحلام

السلام عليكم و رحمة الله و بركاته

صباح الورد استاذ حسام

بضم صوتي لصوت حضرتك....و يا ريت حد من اساتذتنا في المنتدي يقولنا هنعمل ايه بالظبط....عشان ناخد الخطوات من دلوقتي..مش هنستني لما تبتدي الانتخابات و احنا قاعدين متكومين..(سور في اللفظ)...هنا.....خلاص مبقاش عندي صبر اني اشوف مصر بتتغير و انا مش ترس في العجلة دي

مستنية بفاااارغ الصبر

[سكر]

نفسى فى برلمان قوى به شرفاء بيحبوا مصر

هو وحدة قادر على زبط صموايل البلد فى الفترة القادمة

يتبع

[se_ Elsyed]

- بأحلم كمان في رجال أعمال شرفاء .. يكسبوا زي ما هم عاوزين ... لكن في إطار قانوني يفيد البلد

- باحلم بقانون مسائلة للوزراء .. مين إين لك هذا ؟ حاشا لله إننا نضعهم في دائرة الإتهام .. لكن لازم يتحاسبوا في حالة حدوث إنحراف .

على فكرة .. أنا مش باحلم بيوتوبيا أو المدينة الفاضلة

لكن كل حلمي مقتبسة من الأية الكريمة " ولقد كرمنا بني أدم "

يعني إيه معنى التكريم ؟

التكريم إن إنت تبقى بني ادم محترم ونقي وما فيش حاجه بتلوثك وتنتهك ادميتك مثلما كان يحدث في العهد البائد

[se_ Elsyed]

- بأحلم بتغيير كل المدارس والجامعات ومحظات المترو اللي كانت متسمية بإسم مبارك وعائلته ... إلى أسماء الشهداء اللي راحوا ضحية ثورة مصر ..

[se_ Elsyed]

- باحلم بكل الوزرا .. والله حتى الرئيس .. يبقوا ماشيين بيننا كده وعايشين عادي الاقيه معايا بياكل في مطعم أو في سوبر ماركت و و و .. مش يبقى في برج عاجي وعايش باشا

[se_ Elsyed]

- بأحلم بوزارة خارجية قوية تقف جنب أي مغترب وتجيب له حقه أينما كان

[se_ Elsyed]

الإغتراب عمره ما كان عيب ولا غلط .. بل ده شي مخلوق من بداية الخلق إلى نهاية الدنيا

لكن

- باحلم بوزراة عمل محترمة تضع حد أدنى للمرتبات وإن شالله عن حد ما أتغرب حتى لو كان اللي عاوز يسافر موافق ... لإن لازم هما اللي حيمونا من نفسنا حتى .

[moory]

حلمي بسيط جدا

ان الناس يكون عندها وعي و ادراك لحقوقها و واجبتها

لأن هيا دي العقلية الي ممكن تغير اي شئ و تتحكم في اي شئ

و ده هيكون أساسه في التعليم

[se_ Elsyed]

- باحلم بتعلم الدرس وعدم تأليه أي حاكم بعد ذلك ... ولبندأ بنزع صور مبارك من جميع الدوائر الحكومية .. ودورات المياه العمومية و و و و .. كفاية بقى .. لإننا فعلاً من ساهم في خلق الفرعون وتأليهه لدرجة إن واحد قذر زي صفوت الشريف يطلع يقول إنه : لا ينطق عن الهوا

[fatfouta]

مش عارفة اكتب ايه لانكم تقريبا كتبتوا كل معظلم احلامى

بس بحلم بشوارع نضيييييييفة ومصر بتبرق كده ومبانى جميلة

وبحلم بحاجة بسيطة جداااا اننا نهتم بالكناس اللى بينضف الشارع مش عارفة الراجل ده بالذات بحس انه مهم قووووووى واننا لازم نديله اكبر مرتب فى الدوله

هرجعلكم تانى

[se_ Elsyed]

نفسي في كده

url=http://www.0zz0.com]

[رضوي]

صباح الجمال

صباح الحرية

انا بحلم بمصر

بحلم بالمصريين ................. بحلم بينا احنا نتغير من جوانا ........... خلاص بقي مافيش ولا خوف ولاسلبية

بحلم لما نشوف حاجة غلط في الشوارع مانقولش هما هيجوا يصلحوها امتى ؟؟؟

بحلم بالقضاء علي الفساد الاداري

بحلم بالسياحة المزدهرة جوة بلادي من تاني

بحلم لما اروح الحسين وخان الخليلي أحس بعبق المكان قبل التاريخ ............

بحلم ماالاقيش اي طفل من اطفال الشوارع ......... ولا اي شحات في الشارع ولا اي بنت بتبيع مناديل وفل ( مع انها ظاهرة عالمية بس برده نفسي تختفي في بلدي )

بحلم بجهاز شرطة خالي من الفاسدين ......... بحلم بادارة كلها اكفاء

بحلم بنسف كلمة كلنا بنكرهها ( واسطة ) والكفاْة تكون هي المعيار الاول والاساسي

بحلم بأولاد بلدي كلهم مثقفين وواعيين وواثقين من بلدهم وشعبهم وامكانياتهم ........... خلاص بقي ماينفعش يبقي في اعلان عن وظيفة او منحة وكل الناس تبقي مقتنعة ان اللي معاهم واسطة هما المقبولين

بحلم بالقضاء علي الفساد الاداري في كل قطاع من قطاعات الدولة

بحلم بينا احنا كلنا ......... لو كل واحد فينا شاف حاجة غلط ادامه وماسكتش وقال خلييني اعيش وواجه الفساد اكيد مش هيبقي فيه فساد

انا بحلم بالمصرييين

احنا اللي غيرنا الحكم والحاكمين ........... واحنا اللي هنغير اوضاع البلد ونقضي علي الفساد ........ لأنه اجبن من انه يقف ادامنا

بحلم بشبرا والسيدة زينب والازهر والحسين ....... بحلم بالامن والامان بجدعنة ولاد البلد ..... وشهامة المصريين

ومازال الحلم مستمراً ........ ولا حدود للاحلام

[سكر]

من باب الديمقراطيه

موضوع ان الحد الادنى 1200 جنيه من خلال دراستى هيدر الاقتصاد المصرى مش هيفيدة

لان المال قوته فى القدرة الشرائيه

يعنى لو اقل مرتب بقى 10000 جنيه هيكون كيلو اللحمة 1000 جنيه فورا بدون اى احتكار او تدخل من الدوله نتيجة العرض والطلب

ودة نتيجة زيادة السيوله فى السوق

كل المصانع اللى حتلاقى نفسها بتدفع 1200 لعامل انتاجه ميزيدش عن 600 جنيه تعمل ايه؟ ببساطة ترفع اسعار السلعة وتخليك انت تدفع مرتب العامل

ورفع الاسعار يعنى تضخم وانخفاض فى الصادرات ودايرة مهببه

ودة هيخلى المصانع تستورد عمال من الصين وبنجلاديش...ومع السلامة للعامل 1200 جنيه

[se_ Elsyed]

- بحلم بتغيير جذري في المناهج التعليمية المقرفة الموجودة حالياص

باحلم بمادة تعلم الوطنية وحقوق الناس وواجباتهم .. بمواد تُنمي الإنتماء وتدرس لنا تاريخ الناس اللي ضحوا علشان إحنا نعيش من قديم الأزل ... بمناهج خفيفة لكن مُركزة ونافعة مش حشو ... باحلم بالقضاء على شيء قذر خلقناه وعبدناه إسمه الدروس الخصوصية .. والثانوية العامة والإنتحار والبكاء والاهالي اللي بتموت من حسرتها .. وبالقاضء على النظرة الدونية للمؤهلات المتوسطة والصنايع والناس اللي ممكن تنهض بالبلد وتعلينا فوق لإن دي الإيد الشغالة .. باحلم بمعامل في المدارس والجامعات ... بكمبيوتر حقيقي لكل مواطن مش يشترية بالتقسيط عشان يبيعه ... بمدرسة محترمة تتساوى فيها مدارس الريف مع المدن .

- باحلم بتعمير هائل في سيناء ونقل 10 مليون بني أدم هناك يزرعوا ويعمروا ويبنوا مجتمع موازي أخر ...

- باحلم بإعادة النظر في الهبل اللي في توشكى وفلوس البلد اللي راحت في الزبالة هناك

- باحلم بفاروق الباز ييجي يعمل ممر التعمير اللي هايخلينا ولا أمريكا في قوتها وأكتفاءها ...

- باحلم بوزير إقتصاد محترم مش موظف حكومه كل همه تقليب الناس .

- باحلم بوزير إسكان عرف الطريق وعرف إن الصحرا هي الامل ونخلي الشباب يبني براحته وما فيش تسقيع ولا مضاربة ولا كلام فاضي من ده

- باحلم بعقليات زي مهاتير محمد ومحمد بن راشد والوليد إبن طلال ... عقليات حُره بتفكر في بلدها وما فيش مانع تسفيد هي كمان .

- باحلم بكل خريجي الزراعة نجيبهم يزرعوا لنا قمح ... بجد مش باهرج .. فيها إيه لو عشنا 5 سنين من غير جوافه ولا كنتالوب ولا فراولة ولا كلام من ده .. يا عم نستوردها لو بنحبهم قوي .. لكن نزرع قمح عشان ما حدش يذلنا وعشان ما فيش مواطن يقف من الفجر قدام كشك العيش عشان 10 أرغفة ...

- باحلم أنزل بلدنا الزقازيق الاقي القطن منور زي زمان ... أقسم بالله ذُهلت لما مالقتش حتة قطن واحده من سنين وقالوا لي : نزرع قطن لمين إذا كانت الحكومة بتخسرنا وبتشتريه منننا بأبخس الاثمان ؟ لا يا عم أنا هازرع كوسه وخيار وخليهم يشربوا هما .... عندهم حق بصراحة .

- باحلم بتكريم خريجي كلية الزراعة وتقديم تسهيلات لهم عشان يعملوا نهضة في الإنتاج الحيواني بدل ما في ناس كتير بقت تسمع عن اللحمة سمع .

- باحلم بمحليات محترمة .. وشركات نظافة حقيقية تستفيد من المليارات اللي الحكومة بتلمها وتنضف شوارع مصر كلها مش روكسي بس حوالين بيت المجحوم ....

- باحلم ببيوت شكلها حلو مش قبيحة ومنظرها يسد النفس

- باحلم في تسهيلات بالبنا ... لكن محاسبة لكل من يخطأ

- باحلم بتكريم الفلاح وإعلاء قيمته