رساله من محمد علاء مبارك الى أمه و أبوه و جده حسنى مبارك

[زهرة الجبل]

ازيك يامامي وحشتيني قوي انتي وبابي واخويا الصغير وجدو وتيتة وعمو جمال وكل اصحابي

مصر كلها وحشتني يامامي

يوم 25 يناير صحابي في الجنة نادولي وقالولي تعالي بسرعة يامحمد في ناس من بلدك دخلو الجنة .. قولتلهم مصريين؟ قالو ايوة دول شهداء كمان يامحمد

جريت بسرعه معاهم اشوف الشهداء اللي من بلدي واسلم عليهم وافتخر بيهم وكل يوم بيجي شهداء تانيين

ولما كثرو قوي يامامي وذادوا ووصلوا اكتر من 300 شهيد

قلت لصحابي وانا فرحان عارفين.. !! دا اكيد جدو بيقود مصر في حرب تانية علي اسرائيل او اعدء تانيين

روحت يامامي وقعدت معاهم علشان يحكولي عن جدو القائد واللي بيعملة واسمع بطولاتهم ولما سألتهم هي مصر بتحارب مين وانتو استشهدتواازاي وفين ؟؟؟؟ وجدو كرمكم قبل ماتيجوا الجنة ؟

بصوا لبعض ومحدش رد عليا خالص

سألتهم تاني ردوا عليا مين قتلكوا ؟؟؟؟؟

واتقتلتوا برصاص اسرائيل ولا مين ؟؟؟؟؟

وجدو عمل اية في اللي قتلكوا؟

ولما بكيت لاول مرة لان الجنة مافيهاش حزين قالولي لا مش اسرائيل دة رصاص مصري يامحمد حراس جدك يامحمد هما اللي قتلونا

لقتني مش فاهم حاجة .. صرخت وقلت مش عاوز اسمع حاجة وجريت ورحت قعدت لوحدي

لكن الشهداء جم وقالولي متبكيش يامحمد انت ملكش ذنب وأخدوني في حضنهم وطبطبوا عليا

حسيت بدفا حضنك يامامي وهما بيضموني في صدرهم

رفعت راسي وقلتلهم انتو طيبين قوي.... قالولي مش احنا بس اللي طيبين دة كل المصرين طيبين

يامامي انا مش هاسأل حصل اية ولا عاوز اسمع حاجة لكن قولي لجدو انا مش اغلي من اي واحد منهم عند ممتو

وزي ماحسيتي يوم ما انا مت اوصفيلة كل ام حاسة بأية دلوقت

وقوليلة انتي لاني انا مخاصمة....

ازاي هان علية كل الناس دي ومعملش حاجة لللي قتلهم ؟

قوليلة لازم يبرد قلوب الامهات والابهات دا الابن غالي وانتي عارفة يامامي ويابابي

قولو لجدو انة خلاص مبقاش ينفع يبقي رئيسها بعد اللي حصل

جدو لازم يرتاح في بيتة ويسيب مصر لولادها هما اولي بيها وانا هادعيلة ربنا يغفرله

وقبل ما اخلص كلام يامامي اهم حاجة والكلام ده لبابي وعمو جمال وجدو قبل ماتسبوها لولادها يديروها اوعوا يكون في مالك يا بابا انت وعمو جمال وجدو حق لمصر وللمصرين

اوعو يابابي.... انا بحبكو ومقدرش اشوفكوا شايلين ذنب زي دة

اوعوا يابابي مال الشعب الطيب الغلبان الشقيان تاخدوه معاكوا تصرفوا وتعيشوا منة بقية حياتكوا

اوعي يابابي اخويا الصغير ياكل ويعيش ويتربي بمال مش من حقة وفية مصرين كتير مش لاقيين

ساعتها تبقي كتبت عليا افارق اخويا دنيا واخرة لانة لازم يتربي بمال حلال عشان اقابلة يوم في الجنة

و تبقى حكمت عليا انا و انتم ما نتقابلش تاني و انتم وحشتوني جدا و أنا عارف إني وحشتكم و نفسي أقابلكم في الجنه

وقولي لجدو وتيتة وعمو جمال وطنط خديجة ان الجنة حلوة قوي قوي يا ماما

احلي من اي حاجة ولا اي مليارات مش حلال تستاهل يضحوا بالجنة عشانها

و بعدين دا ربنا بيسأل عن كل جنية كسبتة ازاي وصرفتة في ايه .. طيب هتقولوا له ايه بقى وقتها ؟

والسلام عليكم ياعيلتي اللي بحبها

والسلام تحية اهل الجنة

منقول من الفيس بوك