شاهد هنا الفيلم الجديد ( حتـــى لا ننـــــسى ) بطولة شعب نرويها للتاريخ

[الســـاري]

السلام عليكم ورحمة الله وبركاته

اخواني واخواتي الافاضل ... كل حرية وانتم بخير ... و تكللت ايامكم ولياليكم بالافراح ..

للتاريخ شهادات تروى واحداث توثق ... واجمل تلك الاحداث .. التي نعيشها وعشناها وصممنا تفاصيلها بانفسنا

صفحات الايام الماصية .. لن تختفي .. ستكون ايام حية .. يشهد عليها التاريخ .. ويسجل انها كانت قصة شعب كريم اراد الحياة فاستجاب القدر

وفي خضم كل المفارقات والاحداث والتي تنهال في كل لحظة وفي كل حين ... تبقى بعض الاحداث والافلام والصور مختلفة ..

تبقى اهم الفيديوهات .. بما تحويه .. وما تدل عليه

وهذه محاولة بسيطة مني لضم بعض تلك الاحداث ..

و الثورة اكبر من ان تحصرها افلام او فيديوهات او حتى قنوات .. لكن نحاول .. ان نقدمها .. بنكهة محاورات المصريين

لاجل هذا كله ..

ما تيجوا نشووووف ؟؟

http://www.youtube.com/watch?v=WIVxtpi5was

و في كل نصر .. عاشت مصر

[Simba]

انا مش هاقول نثبت الموضوع

لان ده بايد الادارة

اللي هنقوم بثورة فحقلي ونغيرها قريب

بس شير يا جماعة علي الفيس اقل تقدير لاخونا الساري

تسلم ايديك يا بطل

[لماضة مصرية جدا]

السلام عليكم و رحمة الله و بركاته

مش عارفة اقولك ايه

بس انا ببكي دلوقتي

لأني حاسة اني رجعت لورا كل الايام اللي عدت و قلبنا فيها كان بيرتجف

افتكرت كل مشاهد الصمود....

كل الوشوش اللي وقفت في وش الظلم

صوت عبد الرحمن يوسف

و صوت الست المصرية اوي....اللي زعلانة علي مصر اوي

كلمات اسماء محفوظ

صور الورد اللي فتح في الجناين

انت خليت عمر بحاله......في 14 دقيقة

مش عارفة اقولك ايه

بس ربنا يسعد قلبك

و يديلك عين تقدر تتابع و تسجل و تحط جزء منك في كل عمل تقوم بيه

استاذ سمبا....فكرة جميلة....فكرة مصرية....فكرة سمباوية حقيقية اوي

شكرا ساري

و شكرا استاذي سمبا

عجبتني الموسيقي جدا يا ساري......توووووووووووحفة

ع هامش البيانو بقي

هتدرس دوكيمنتري امتي؟؟؟

انا نويت باذن الله......و هبتدي اعمل خطوات فعلية...و اتمنالك انك تاخد الموضوع بجد؟

عجبتني العبارة

عاش النصر في قلب مصر

حلوة مررررررة....(حتة سعودي اهو ياعم عشان تنبسط)

مساكم.....تاريخ....هنفضل شايلينه وسط الضلوع...و هنكيله لولادنا...وولاد ولادنا

[رضوي]

ا/ الساري

لاشيء يكتب بعد ماقدمت

ابدعت ووقف الابداع حائراً امام روعة ماأبدعت

سالت دموعونا رغماً عنا ....... أبكاها ماصوًرت

لا الشكر يكفيك حقك ولا يكفي المجهود الذي بذلت

تحياتي

[ozoozo]

شكرا ياساري علي مجهودك

وعايز اسألك سؤال

ليه سعوديين كتير فاكرين ان احنا مش مبسوطين ان مبارك مشي

ناس كتير بحس انها عايزه تباركلي وخايفه احرجها لغايه مااشجعهم واقولهم ان احنا فعلا مبسوطين وماحدش زعلان

[fatfouta]

النت بطئئئئئئئ وساعة وانا بشوف الفيويو (وش واحدة بتنهج)

بصراحة يا سارى بصراحة.... يعنى يا خويا انا مش عارفة اقول والله

اقولك مبدع ولا اقولك خلتنى اعيط ولا اشكرك

سلمت يمناك....هما ليه بيقولوا يمناك يا سارى هو مافيش عندكوا يسار ولا ايه؟؟؟

بجد يا سارى تسلم ايدك يارب

ونبارك يارب وانت عريس :P

:clappingrose:

اه صحيح نسيت سمبا

مش هقدر اقولك يا سمبا بقى نبارك لك وانت عريس طبعا

تسلم افكارك الجميلة يا سمبا

تم تعديل 14 فبراير 2011 بواسطة fatfouta

[م تيمور المراغي]

روعه بجد يا ساري انت وسيمبا

حدوته حريه مصريه من ارق واجمل مايكون

لكن عتاب رقيق يا سيبما وانت كمان يا ساري

مكانش العشم تنسوا اركتيكت بالشكل ده ,,

[مصري أصيل]

الف الف شكر يا استاذ الساري علي التألق و علي المجهود

فقط عنوان الموضوع الذى أتمني أن تغيره الي ( ملحمة شعب ) و ليس حتى لا ننسى لاننا لن نستطيع أن ننسي أفضل لحظات مرة علينا في العقود الأخيره منذ حرب 73 .. لحظات مجد لشعب انتصر علي الطغيان و الفساد و الظلم

الف شكر مره تانيه و تقبل تحياتي

[عبير يونس]

يا هلا والله

ابساري زينة شباب المملكة

مشكور يا بويا و ما قصرت

و ترى مو بغريب عليك

اينت صرت واحد من ديرتنا

صراحة إلى الآن ما شيفت الفيديو

بس متأكيدة انو راح يكون فَلّة

داحينة بأسوي له داوين لود

و بس يخليص

راح اعطيك تقييم ايجابي

أبشر

[عبير يونس]

انا مش هاقول نثبت الموضوع

لان ده بايد الادارة

اللي هنقوم بثورة فحقلي ونغيرها قريب

بس شير يا جماعة علي الفيس اقل تقدير لاخونا الساري

تسلم ايديك يا بطل

خطاب عدم التنحي:P

بقى كده يا سمبا

نسيت تاريخ المحاورات

و ان الادارة شاركت في حرب 73 و جابتلكوا النصر

نسيتوا الانذارات و الايقافات و الحذف

اللي عملناهم عشانكم

عشان شعب المحاورات

على فكرة احنا عارفين إنك من القلة المندسة و معاك أجندة الشمرلي و بالامارة لونها كحلي

و لقينا آثار فراخ على الاي بي ادريس يُرجح انها من كنتاكي زينجر و سبايسي كمان

عموما نحن لا نقبل املاء و لا تعبير و لا قراءة من حد

و حنطلع مظاهرات مؤيدة للادارة

بس ياريت ذوي الخبرة يراسلوني ع الخاص عشان نتفق على البلطجية لأن معندناش في المحاورات :wub:

و إيمانا منا بالديموكراسي

حننزل كلنا كإدارة معاكم في المظاهرات المناوئة للادارة

الله

الوطن

المحاورات

[شرف الدين]

الأخوان الفاضلان

سيمبا و الساري

أقل كلمة تقال لكما على هذا الفيديو الرائع والعظيم

شكرا

[لونا]

أ/ ساري

أ/ سمبا

شكرًا ..

لمستم قلبي

و جعلتوني أبكي.....

:hi:

[akramgroup]

تسلم ايدك ياسارى بجد حاجه تفرح وياريت كمان لوتعملنا واحد تانى بس يكون اطول من كده وبالتفاصيل كلها

عشان يكون حاجه للتاريخ

فعلا ياسارى انت من الشخصيات المحترمه جدا

لك كل التقدير يا صديقى

الله ينور عليك ياسمبا وعلى افكارك

لكم منى كل المحبة

:clappingrose: :clappingrose:

[اغابي]

شكرا يا سمبا فكرة رائعة جدا

شكرا يا سارى - مجهود يستحق الامتنان

خلتونى اعيط

[المهندسه]

شكرا يا سارى ده مش جديد عليك

اعترفلك بحاجه...انا كنت بسىء الظن فيك الايام الفاتت و قعدت اقول هو فين سارى بأفلامه ؟؟؟معملش ليه فيلم للثوره؟؟؟ و كنت هبعتلك رساله عتاب ...لكن ماخيبتش ظننا فيك ابدا ...ونشكرك كثيرا على مجهودك الرائع و نشكر كمان شاعرنا الكبير سمبا ...

ونفسنا نستضيفك فى مصر يا سارى انت و الاسره الكريمه و تزور بنفسك ميدان التحرير و تقرأ الفاتحه لشهداء الحريه..

اشكرك كثيرا على حبك لمصر

[Simba]

سميا ايه بس الفيديو بالكامل اللي عمله بطلنا الساري .... الا اذا كنتم بتشكروني علي فكرة الثورة الفحقلي .... الشكر كل الشكر للساري ... هو صاحب الفكرة ولإعداد والإخراج هو عمله بدون اي مساعدة علاوة علي اني ماليش في برامج الميديا .....

[م تيمور المراغي]

سميا ايه بس الفيديو بالكامل اللي عمله بطلنا الساري .... الا اذا كنتم بتشكروني علي فكرة الثورة الفحقلي .... الشكر كل الشكر للساري ... هو صاحب الفكرة ولإعداد والإخراج هو عمله بدون اي مساعدة علاوة علي اني ماليش في برامج الميديا .....

لك التقدير والله يا سيمبا على عدم نسب ماليس لك ,,, لك

تحيتي لحضرتك ,, وتعالالي انت بقى يا ساريفيتش Your night is egg & your morning is black هههههههه :happy:

[الســـاري]

الافاضل الكرام ..

سمبا ..

لماضة مصرية جداً ..

رضوي ..

ozoozo ..

fatfouta ..

architect ..

مصري اصيل ..

مصرية متغربة ..

شرف الدين ..

لونا ..

akramgroup ..

اغابي ..

المهندسة ..

=========================

اشكركم جزيل الشكر على التعليقات الجميلة واحمد الله ان العمل لاقى استحسانكم ..

كما اشكر كل من قيم العمل ..

=========================

سمبا ... هو صاحب الفكرة .. والواقع اني كنت اريد عمل فيلم للثورة يكون مختلفا عن كل ما يملأ اليوتيوب والقنوات .. فاتتني فكرة دمج اهم الفيديوهات وتوثيقها من الباشا سمبا ..

ومن المفارقات العجيبة في هذا العمل اني انهيته تماما في نفس لحظة الاعلان عن تخلي مبارك عن السلطة .. وقد كنت كتبت في احد الردود للفاضل اركتيكت ان العمل سينتهي خلال ساعتين بإذن الله .. لكن مالذي حصل خلال الساعتين ..؟ حقا ان تواريخ عظيمة قد تكتب في لحظة

هكذا اضطريت الى تغيير بعض الكادرات في النهاية .. كنت قد كتبت سيشرق الفجر قريبا بإذن الله .. فجعلتها : لقد اشرق الفجر .. كنت قد كتبت : كونوا يدا واحدة .. فجعلتها كنتم فعلا يدا واحدة ..

ثم وجدت ان الاجواء احتفالية فقررت تاجيله حتى لا نعكر الفرحة ..

يعني لو كنتم صبرتم شوية على الراجل كان زمان الفيلم اتعرض قبل كدا .. بس نقول ايه ..

:P

شكرا جزيلا من جديد لكم جميعا

smk:

[الســـاري]

شكرا ياساري علي مجهودك

وعايز اسألك سؤال

ليه سعوديين كتير فاكرين ان احنا مش مبسوطين ان مبارك مشي

ناس كتير بحس انها عايزه تباركلي وخايفه احرجها لغايه مااشجعهم واقولهم ان احنا فعلا مبسوطين وماحدش زعلان

انت فكرتني بموقف حصل لي مع مدير مصري لشركة كنا بنمضي عقد معاه في العمل باول ايام الثورة ..

قلت له انا بكل ثقة بعد ما خلصنا التوقيع وصار يبارك لنا .. عقبال ما تنجحوا بإذن الله ويروح اللي بالي بالك .. فجأة .. الاقي وش الراجل تغير .. وسكت شوية .. وبعدين قال .. يارب ما يروح ويفضل قاعد

انا بالنسبة ليا كانت المرة الاولى اللي اسمع فيها واحد مصري يقول كلام زي ده .. وشوية دخلني بتفاصيل كتير بعد ما ناقشته وصار يقول كلام كتير من نوع : ده شبع خلاص ولو روح حيجي واحد تاني يسرق .. وصار يتكلم عن الفوضى وانعدام الامن وكلام كتير من ده

زميلي بالعمل اللي كان معايا صار يبص لي بصات من نوع ( ياعمي انت مالك يا عم .. اهو فتحت علينا موضوع ) .. انا بقى كبرت بدماغي والحت الحاحا .. وصرت افهمه وهو بدأ يرد ردود عصبية شوية

لغاية ما قررت ان الجدل مش حيجيب نتيجة .. خاصة بعد ما قال بالاخير وبمنتهى الثقة .. حتكشف لك الايام ان اللي ورا الحكاية دي ايران وحماس واسرائيل .. ومش عارف هو جمع الثالوث ده ازاي .. بس انا عذرته بالنهاية لان الوقت كان عصيب .. ومش اي حد بيحب ان يناقش واحد اجنبي معاه مسألة داخلية بحتة بالشكل ده ..

اعتقد ده ممكن يجيب عن سؤالك يا اوزاوز .. وانا عندي بالعمل زملاء مصريين كل يوم خناقات .. الاغلبية مع المتظاهرين واتنين بس ضد الثورة واعتقد النموذجين دول موجودين بكل حتة

ده غير طبعا ان اللي شايفينك يمكن افتكروك من بلطجية النظام السابق فعشان كده ممكن كانوا خايفين شوية .. بس واجب عليك تبين لهم الحقيقة انك تبت خلاص وبقيت من الجلادين الاحرار

:P

تحياتي اوز اوز

[الســـاري]

سلمت يمناك....هما ليه بيقولوا يمناك يا سارى هو مافيش عندكوا يسار ولا ايه؟؟؟

بجد يا سارى تسلم ايدك يارب

ونبارك يارب وانت عريس :P

:clappingrose:

الله يبارك فيك فتفوتة هانم .. ومبسوط اوي ان الفيلم عجبك .. وسامحيني انتي وباقي الاخوات على العياط

وبالنسبة لسؤالك .. يا ستي تسلم يسارك ويمينك .. ويارب يجعلنا من اهل اليمين جميعا

اللي بيقولوا تسلم يمينك اكتر هما اهل الرياض ,, احنا بالغربية هنا كلامنا يختلف كتير عنهم

وميرسي جدا لحضرتك

=========================