سؤال مستفز لمغتربي مصر .... كنت فين يا كوكو !!!

[Simba]

ممكن لو معندكش مانع تنشررسالتى دى فى البيدج عندك عشان نفسى صوتى يوصل لمصر كلها

بصوا بقى ياجماعةعشان انا دمى اتحرق

دى رسالة الى كل شاب(عمره مادخل مظاهرة ولا فكر)او(عايش برة وطول عمره بيشتم فى البلد) وعامل فيها سبع رجالة فى بعض وقاعد طول النهار على الفيس بوك عمال بس يقول فلان خائن وفلان باع القضية وفلان جبان كل واحد بينطبق عليه الحاجات دى يسمع منى الرسالة دى انت دلوقتى عمال تقول على اللى بيهدى الناس ده جبان طب ماشى وانت بقى اسم النبى حارسك اللى شجاع أوى ده انت كنت من عشر ايام بس لو كان حد سألك ايه رأيك فى نظام حسنى مبارك كنت بتقوله يا عم خلينا ماشيين جمب الحيط الحيطان ليها ودان وكل الكلام اللى احنا عارفينه وكنت بتبقى مرعوب لو كتبت اى حاجة على الفيس بوك فيها اساءة للنظام ولولا الشباب اللى قاموا بالثورة كان زمانك لسة اخرس لحد دلوقتى

كنت فين يا كوكو لما كانت البلد بتغرق ومليانة فسادوانت كل اللى بتعمله انك بتتفرج عليها وتشتم فيها وكل همك انك تهج وتسيبها وتشوف حياتك فى بلد تانية فى الخليج ولا فى اوروبا ولا عمرك فكرت تحاول تصلحها ولا عمرك فكرت تحارب الفساد وكل اللى يهمك مصلحتك الشخصية

فجأة كدة سبحان الله لسانك طلع ومش بس طلع بالخير لا ده انت بتشعلل الناس وبتزود الفتنة فى وقت خطير جدا مينفعش فيه غير التهدئة وده مش كلامى ده كلام الرسول عليه الصلاة والسلام

عن عبدالله بن عمرو بن العاص:"بينما نحن حول رسول الله صلى الله عليه وسلم، إذ ذكر .الفتنة

فقال : إذا رأيتم الناس قد مرجت عهودهم ، وخفت أماناتهم وكانوا هكذا . وشبك بين أصابعه ، قال : فقمت إليه فقلت : كيف أفعل عند ذلك ! جعلني الله فداك ؟

قال : الزم بيتك ، واملك عليك لسانك ، وخذ بما تعرف ودع ما تنكر ، وعليك بأمر خاصة نفسك ، ودع عنك أمر العام

يعنى لما يبقى فيه فتنة لازم كل واحد يلزم بيته ولا يهتم بالامر العام

وده دليل قوى جدا ان الفتنة أخطر شىء ممكن يصيب بلد واخماد نار الفتنة أهم شىء فى المرحلة اللى احنا فيها أهم كمان من القضية اللى بنحارب عشانها لأن ببساطة شديدة الفتنة دى لو استمرت البلد هتولع بينا كلنا ومش هتبقى أسقطت النظام ده انت هتبقى أسقطت (دولة) ومش أى دولة دى دولة كبيرة وعظيمة ومطمع لجهات كتيييييرة مستنية لحظة وقوعها وكمان بتحاول انها توقعها فى أسرع وقت ممكن

(عفوا أنت لست جدير بانتقاد الناس ومحاولة التأثير عليهم والمساهمة فى تحديد مصير شعب)

واستطرادا لكلامى

اكتر ناس بقى غايظانى وحارقين دمى الناس اللى قاعدين برة مصر من فترة وسايبين البلد وخلاص أقلموا نفسهم على الحياة برة وكانوا دايما بيشتموا البلد ويقولوا عمرنا ما هنرجع فجأة كدة سبحان الله بقوا همهم على مصلحة الشعب وبقوا كلهم مفكرين ومحللين سياسيين وعمالين يهندسوا على الناس الغلبانة اللى شافت المر فى البلد دى ويقولولهم يعملوا ايه وميعملوش ايه..يا صلاة النبى...بامارة ايه بتحتجوا وبتقولوا على اللى بيدعو للتهدئة انه جبان انتو مين انتو عشان تتدخلوا فى شئون البلد انتوا تعرفوا ايه عن مصر عشان تتكلموا عنها

حد فيكو عايش على معاش ضئيل ومش عارف يقبضه ولا عارف يتحرك من بيته فى ظل الظروف اللى احنا فيها دى

حد فيكو عامل شغال باليومية وبيته اتخرب فى الايام دى ومبقاش قادر يأكل عياله

حد فيكوا له ابن مات فى وسط الاشتباكات اللى حصلت بين المؤيدين والمعارضين

بلاش كل ده حد فيكوا هتفرق معاه البلد لو انهارت واقتصادها اتدمر وبقت خرابة او بقت تحت ايد دولة زى امريكا

اقصى حاجة هتعملوها هنزعلوا شوية وبعدين تكملوا حياتكم فى البلاد اللى قاعدين فيها عادى ..واللى هيضيع ويروح فى الرجلين الشعب الغلبان اللى كان ضحية لانتشار الفتنة والفوضى واعطاء الفرصة لكل من هب ودب سواء جهات داخلية او خارجية انه يخرب ويدمر البلد ويتحكم فى مصيرنا ونبقى تحت رحمته نتيجة لاشعال الفتنة المستمر اللى انتوا وأمثالكوا بيمارسوه بمنتهى الغباء

كل واحد بيشعل الفتنة يفكر كويس ويوزن الامور بعقله وميمشيش ورا كلام أى حد

مصر فوق الجميع

في بداية الاحداث

ومع عودة الانترنت

ومع الخطاب العاطفي لسيادة الرئيس السابق

طلع علينا فلاسفة ومحللين وادباء

وبقدرة قادر اتهام صريح لجموع المغتربين باشعال الفتنة وكان فعلا الناس اللي كانت التحرير معاها الجهاز ابو تفاحة

انا قريت الكلام ده ساعة الاحداث وما رضيتش اعلق بس كان جوايا كم غضب يكفي اني انفجر في صاحب المقال بمنتهي الديمقراطية

هاسيب تعليقي مؤقت

لحد ما اشوف رأي حضراتكم

بس مع تنويه بسيط ان كوكو اللي بيقصده ده فيها عقليات بتدير شركات ومؤسسات والنماذج اللي بره كتير

تم تعديل 14 فبراير 2011 بواسطة سمبا

[pink rose]

كل اللي كان بيوصل من مصر وقتها على نفس الشاكلة دي

و اظن كان دعاء كل المغتربين في الوقت دا

ياااااااااااااااارب النت يرجع يتقطع تاني في مصر

[طبيبة بالخارج]

و طبعا لو كان المغتربين ضد الثورة كان العكس حصل برضه

لو الواحد حط في باله رضاء كل الناس عما يفعله لم يكن احد تحرك انش واحد للأمام

و لو كلامه صحيح و المغتربين باعوا القضية كانوا ليه اهتموا بتشجيع الثورة من الأساس(بالرغم ان اغلب ايام الثورة كنا كمغتربين بنكلم نفسنا لانقطاع النت بمصر)

و بعدين اغلب المغتربين لا يضمن بقائه في بلد الغربة لما لا نهاية كلنا عارفين اننا راجعين راجعين الا من كان مهاجر مثلا

حديثه عن العمال و الغلابة في مصر الثورة احبطته بدليل خروج هؤلاء الناس مع الثوار للمطالبة بحقوقهم لأنهم تشجعوا بهم و كسروا حاجز الخوف

أمثال هذا الشخص للأسف ليست قليلة و هم نتيجة القمع لعشرات السنين

فكرة خليك جنب الحيط و استحمل و اللي حيجي مش حيكون احسن من الحالي و مفيش فايدة

أظن انتصار الثورة احسن رد عليهم و ان شاء الله مصر تصبح احسن و وقتها سيحمد ربنا على قيام الثورة

تم تعديل 14 فبراير 2011 بواسطة طبيبة بالخارج

[doha]

بعيدا عن الحزازيات وبعيدا عن التعصب وبعيدا عن القياسات الشخصية .. بذمتك مش الراجل بتاع كوكو ده بيقول شيء كثير من الحقيقة ؟

الشجاعه مش اني انحاز لفئة من الناس شايف انها بقت الاغلبية ـ واعني بكده الناس المؤيده للي حصل ـ وافضل انفخ واهتف واقول تمام انا معاكم كملوا .. الشجاعه اني كنت انضم للناس دي من بدري اوي ايام ماكانوا اقلية وملهمش صوت او على الاقل يكون لي صوتي المستقل واهتف بيه لوحدي بلي مؤمن بيه ..

الشجاعه مش اني معرفش العب ومع ذلك اصر على النزول للمشاركه في مباراه مبفهمش حتى قوانينها .. الشجاعه اني اعترف لنفسي بامكانياتها والاهم اقدر حجمي فمتوهمش عكس حقيقته بما يضللني في قراراتي الي باخذها والي ممكن جدا تضيع ناس تانيه تمشي ورايا فيها ..

الشجاعه مش اني اهتف لفريقي وسط جمهوره وانما اني وحتى لو كنت في مدرج الفريق المنافس وحتى لو مكانش في غيري فمخجلش اني اصرح بحقيقة انتمائي وميهمنيش واقول كلمة ممكن تفرق في النتيجه ..

وبالتاكيد الشجاعه اني اكون واقعيه واعترف ( باللعبه الحلوة ) وحتى لو فاز الفريق المنافس احييه بروح رياضية ..

بقيت نقطة اخيره وجب التنويه عنها .. على فكره ياجماعه مايطلق عليه ثورة 25 يناير لسه معداش عليها شهر ومن قصر النظر واستباق الامور اننا نحكم دلوقت ونقول الي حصل كان صح ولا غلط .. ندمان يافلان انك كنت معانا ولا يابختك لما كنت علينا .. كل ده سابق لاوانه ويشبه بالظبط الاخذ بنتيجه مباراه بعد اول جون في الربع ساعة الاولى فيها .. مينفعش ..

[شرف الدين]

الشجاعه مش اني انحاز لفئة من الناس شايف انها بقت الاغلبية ـ واعني بكده الناس المؤيده للي حصل ـ وافضل انفخ واهتف واقول تمام انا معاكم كملوا .. الشجاعه اني كنت انضم للناس دي من بدري اوي ايام ماكانوا اقلية وملهمش صوت او على الاقل يكون لي صوتي المستقل واهتف بيه لوحدي بلي مؤمن بيه ..

بقيت نقطة اخيره وجب التنويه عنها .. على فكره ياجماعه مايطلق عليه ثورة 25 يناير لسه معداش عليها شهر ومن قصر النظر واستباق الامور اننا نحكم دلوقت ونقول الي حصل كان صح ولا غلط .. ندمان يافلان انك كنت معانا ولا يابختك لما كنت علينا .. كل ده سابق لاوانه ويشبه بالظبط الاخذ بنتيجه مباراه بعد اول جون في الربع ساعة الاولى فيها .. مينفعش ..

حقا يا ضحا

الشجاعة الحقة هي في الثبات على المواقف سواء قبل 25 يناير أو بعدها.

والنفاق والتلون هو محاولة تغيير الجلود مجاراة لتغير الوقائع.

أما نتائج الثورة

فأنا كلي يقين بأن مصر ستعيش على صدى هذه الثورة 10 سنوات قادمة على الأقل.

بمعنى أن التأثير الإيجابي لهذه الثورة سيمتد 10 سنوات قادمة على الأقل

[أحمد سيف]

الشجاعه مش اني انحاز لفئة من الناس شايف انها بقت الاغلبية ـ واعني بكده الناس المؤيده للي حصل ـ وافضل انفخ واهتف واقول تمام انا معاكم كملوا .. الشجاعه اني كنت انضم للناس دي من بدري اوي ايام ماكانوا اقلية وملهمش صوت او على الاقل يكون لي صوتي المستقل واهتف بيه لوحدي بلي مؤمن بيه ..

أعتقد أن الأغلبية في هذا المنتدى - بل وأغلبية الشعب المصري - كان لديهم موقف واضح من نظام الحكم في مصر قبل الثورة ... والجميع يعرف من الذي تبدّل وتلون مع الأحداث ومن ثبت على موقفه ودافع عنه منذ البداية للنهاية

أنا الأخ بتاع كوكو فأعتقد أنه كتب مداخلته بعد خطاب مبارك لأن هذه اللهجة هي التي كانت سائدة في مصر حينها من ضعاف النفوس والعزيمة وقصار النظر ... والحمد لله أثبتت الأيام صحة الرأي القائل بضرورة استكمال الثورة الى نهايتها بعد أن ظهرت سوء نية النظام مرات عدة ... واليوم نحن نعيش أولى ثمار هذه الثورة المباركة من محاكمات للفاسدين وتغير في لغة الإعلام وإلغاء للبرلمان المزور وغيرها من الأمور الايجابية ... والبقية تأتي في الطريق بإصرارنا وثباتنا على الحق

[the consultant]

للامانة ما كنت أشعر به في فترة الأحداث هو ما يقوله هذا الشخص بالظبط . فاكرين الفيديو الشهير بتاع الشاب اللي واقف أدام عربية المطافي ما لفت إنتباهي كان صوت اللي بيصوروا من فوق في البلكونة و للاسف فيهم رجالة عمالين يقولو ( راجل ياد برافو إثبت ) و كان التعليق على هذا الفيديو تاني يوم في اليوتيوب ( ياريت الشباب اللي بتتفرج من البلكونات تنزل و عيب على الرجولة ) للاسف هذا هو نفس الشعور الذي كان ينتابني كلما كنت أحاول المشاركة بتعليق مؤيد للثورة على الفيس بوك أو حتى هنا على المحاورات و هو طالما أنني خارج أرض المعركة فلا يجوز أن أشارك بإشعالها ( يعني من الاخر يا تشارك بجسدك يا تسكت لا تقف في البلكونة) حاولت أنزل بس خفت اسيب مراتي و ولادي هنا خصوصا اننا جداد على السعودية و على الغربة عموماو مفيش علاقات كثيرة ولو حصل حاجة هناك مش هتعرف تتصرف في فيزة الخروج و العودة و ارف إجراءات السعودية لوحدها .

بغض النظر عن نية تعليق الشخص بتاع كوكو إلا انني اتفق مع ضحى أنه في شئ من الصحة. و إن جهاد الكيبورد لا أعتقد إنه كافي وقت الخطر الواقعي .

[tarek hassan]

بما أن الثورة كانت :

تظاهرات سلمية في الوطن وخارجه

تضحيات بالوقت والنفس والمال والسهر للحفاظ على الثورة

فكر داعم للثورة ومخطط لها ومرشدها ومثبت لها ودحض دعاوي التفريق لها وثني أهلها عن التمادي فيها

لجان شعبية لحفظ الجبهة الداخلية وغير ذلك

كان للمغتربين دور داعم وأحيانا ضاغط في أنحاء العالم وهم هنا أكثر المتحاورين ولهم فكرهم الراقي وغيرتهم الشديدة على الوطن التي لا ينكرها أحد

وبما أنهم مصريون

فليس كل مغترب ذلك الكوكو

وليس كل مقيم هو ذاك الثورجي

كل واحد يعرف دوره وما أسهم به ولابد وأن تكون له الثقة في نفسه ولا يطلب جزاء عمله إلا من الله

مطلوب من المغتربين الآن أن يتوحدوا ويكون لهم دور فاعل في أي قضية مثل قضية الإفراج عن الرائد : أحمد شومان وزملائه الذين انضموا للثورة

أو يكون لهم دور في المطالبة بالأفراج الفوري عن المعتقلين السياسيين ومن قدموا من قبل لمحاكمات عسكرية

تم تعديل 15 فبراير 2011 بواسطة tarek hassan

[عبير يونس]

تعرف يا أستاذ سمبا

هو ده هدف اللي كتب الكلام تماما

أن يجد من يوصل كلامه لمن يريد استفزازه

عندما شاركنا جميعا في الجهاد الكيبوردي

كان ذلك بسبب حبنا في مصر

و اسماءنا مستعارة

و لا أحد يعرف شخصياتنا الحقيقية

فلم نطلب شهرة

أو أن يتم تمجيدنا مع صانعي الثورة

و يضعوا صورنا في الوثائقيات في قنوات الفضائيات

كان مشاركة بالمشاعر الطيبة فقط

و كل واحد كان بيعبر عن اللي جواه بطريقته

عن نفسي

عارفة ان مكانش حد بيشوف كلامي

غير المغتربين اللي زيي

و اللي متلوعين على أهاليهم في مصر

و اللي نفسهم الثورة تنجح

و مصر ترجع

على أمل انهاء كابوس الغربة والعودة

أو على الأقل العيش في الغربة بكرامة

و تتوقف النظرة الدونية التي نعاني منها هنا

نقدر نقول كنا بنصبر بعض

و نفضفض مع بعض

و نحاول نزيل القلق من بعض

لا بنقول شاركنا في ثورة

و لا حاجة

شكرا جزيلا

يا كاتب المقال

بالتأكيد كانت طلباتي موجهة إلى ربي فقط

و هو الناصر الحقيقي

نعم المولى و نعم النصير

والذي تم تجاهله جل و علا

و تم نسبة الفضل للعباد

كعادة الانسان في الجحود و النكران

{وَإِذَا مَسَّكُمُ الْضُّرُّ فِي الْبَحْرِ ضَلَّ مَن تَدْعُونَ إِلاَّ إِيَّاهُ فَلَمَّا نَجَّاكُمْ إِلَى الْبَرِّ أَعْرَضْتُمْ وَكَانَ الإِنْسَانُ كَفُوراً }الإسراء67

و بما أن الله تعالى قد حقق خالص دعاءنا

فهذا حقا كل ما يهم في الأمر

اللهم اتم علينا فرحتنا

و انصرنا و سدد خطانا

و اكرمنا بحياة طيبة في الحياة الدنيا

و احسن ختامنا و ارزقنا بالفردوس الأعلى

و آخر دعوانا أن الحمد لله رب العالمين

آمين

[عنبو]

طبعاً الكلام ده كان سايد بعد خطاب الرئيس المخلوع

وخصوصا لما اقال انا عاوز اموت فى مصر وكان ناقص

يعمل المروحه وانه من ابطال حرب اكتوبر اللى الفريق

الشاذلى الله يرحمه كشف حقائق تخلى الواحد يعيد تفكير

فى كل حاجه

كنت بتكلم مع واحد صاحبى وكان من اشد المعارضين للثوره وهو طبيب يعنى المفروض عنده كميه كبيره من الوعى ولقيته بيسب فى

الثوار وان احنا اللى بره مش حاسين بحاجه واننا مش فى دماغنا وانا ارد عليه واقول له يابنى لم يكن اسوء مما كان

وعندنا مشاكل كذا وكذا وكل المشاكل دى قنابل موقته كده او كده هتنفجر يعنى البلد بالثوره او بغير الثوره كانت ضايعه

وهو كل كلامه انت مش حاسس بحاجه انت بره وكأن انا ماليش فى مصر امى واخواتى واخويا وعيلتى ومافيش الا انا بس اللى بره

وطبعاً بعد كلام كتير بس لقيته انه مش مقتنع او بمعنى اصح مش عاوز يقتنع عاوز بس عاوز يخلص من الكابوس اللى

التلفيزيون المصرى رسمه لهم ان البلد هتضيع وان الناس دول عملاء

كان فيه اصحاب تانين فى ميدان التحرير وكنت بتصل بيهم يومياً وكانوا فى منتهى الحماس ومنتهى الاصرار

المهم صاحبى الطبيب ده لقيته بيكلمنى امبارح وبيقولى انا كنت غلطان وكنت خايف على البلد قولته ياعم انا عازرك

عادى يعنى وقالى انه فخحور بالثوره وانه بدأ فعلا يعمل حملات توعيه للناس ان دى بلادهم ومش لازم يخافوا وكلام كبير قوى وزى الفل

صاحبى ده كان بين الكلام اتهمنى انى صاحب اجنده وان اول لما انزل مصر هيتعمل فيا

دى حاجه فيه بقى حاجه تانيه

انا لو فى مصر وكنا فريق عمل يعنى وخُيرت بين انى انزل ميدان التحرير او اقعد على النت اكتب واشجع الناس وادافع عن الثوره

كنت لا اتردد انى انزل ميدان التحرير فانا فى ميدان التحرير هبقى فرد بين ملايين

يعنى صعب التعرف عليا وصعب التوصل الى يعنى لو فشلت الثوره فهروح مع الناس مهو مش معقول النظام عنده سجون تكفى 2 مليون

انما اللى بيكتب على النت ده فهو معروف للنظام يعنى لو فشلت الثوره

الناس دى كانت اقل تهمه تتوجه ليهم هى الخيانه وتنفيذ اجندات خارجيه لانقلاب على الحكم ودى عقوبتها تقريبا الاعدام او المؤبد

المغتربين قاموا بدور كبير قوى وخصوصا الناس بتوع اوربا وكندا وامريكا دول وصولوا صوت الناس للعالم كله

الناس اللى كتبت وايدت الثوره دى كانت بتكتب وهى بتعرض نفسها للخطر

اللى كتب كلام مؤيد للثوره لو كانت الثوره فشلت كان مستقبله كله هيقى فى خطر يعنى بيضحى بالوظيفه المحترمه اللى اى حد يحلم

وبالعربيه اخر موديل وبكم الرفاهيه دى وفضل انه يقول كلمة حق ويناصر اخواته اللى كان نفسه يبقى معاهم بس لولا الظروف هى

اللى مانعته مكان ممكن يقول وانا مالى انا عندى شغلى اللى باخد منه مرتب مافيش حد يحلم به فى مصر وعندى عربيتى احدث موديل

وحياتى المرفه انا ايه اللى يخلنى اضحى بكل ده علشان اؤيد ثوره ممكن تنجح وممكن لاء

مكنت ممكن اعمل زى ناس والتزم الصمت واهو لو نجحت الثوره اكيد هستفاد منها ولو فشلت ابقى فى السليم ؟

للرد على اللى بيشكك فى دور المغتربين هى كلمه واحده بس ماذا لو فشلت الثوره ؟

تحياتى

عنبو

[se_ Elsyed]

كلام إنهزامي ويدعو إلى النوم العمممممممممممممممممممميق

ونرجع بقى لأكل العيش .... وكنت فين وأنا فين والكلام من ده ... ولوي الحقائق والأحاديث القرأنية على حسب الهوا عملاً بأجتزاز الأية الكريمة " لا تقربوا الصلاة "

وتخيلوا لو إعتبرنا الجهاد هو نوع من أنواع الفتنة وكل واحد قال " إلزم بيتك يابا وإن شالله تولع " ؟

تخيلوا معايا كده

والحمد لله مازلت اعتقد إن ما حدث كان من أفضل و اعظم أنواع الجهاد

وده مش كلامي ده كلام الرسول الكريم الذي قال " أفضل الجهاد ... كلمة حق امام سلطان جائر "

ومبارك لم يكن جائراً فقط ... بل هو لص وديكتاتور وسفاح ومُخرب ...

أما عن مجاهدي الكيبوردات ... فالغربة لم تكن يوماً هروباً أو ضعفاً أو أو أو .... والمغترب اللي كان بيقول كلمة الحق من سنين طويلة لانه لا يملك إلا ذلك .. أفضل ممن جلس في الفسحه ولابس طرحه وبيقول أمشي جنب الحيط وأربي العيال على حاضر ونعم واللي تشوفه حضرتك وألزم بيتك يابني أحسن تموت في مظاهرة ولا حاجه .... والمغترب اللي بيقدر يساعد بلده مادياً أو حتى يكفل يتيم .. أفضل من اللي فاكر نفسه إنه طلع القمر لمجرد إنه موجود في بلده وبيتعب في المواصلات وطالع عينه .. فقط لا غير ...

برضوا دعونا نتخيل إن الشباب اللي رفعوا راسنا كانوا ألتزموا بيوتهم بعد أول يومين ... كان حالنا هايبقى إيه دلوقت ؟

أما النظر إلى نصف الكوب الفارغ والإغراق في التشاؤم من باب " بكره نقعد عالحيطة ونسمع الزيطة " أو كما قال البعض " بكره تندموا على ايام مبارك وتقولوا يا ريتها تعود " ... فهؤلاء نقول لهم " إلزم بيتك " وخليك في أكل العيش أبو 5 ساغ ... وسيب اللي يشتغل يشتغل بطريقته ....

[se_ Elsyed]

كلمة أخيرة

من يقرأ بين السطور ويعرف كيف بدأت تلك الثورة التي اعادت لنا الكثير من كرامتنا خارجياً وداخلياً .. يعرف إنها بدأت من كثير من المغتربين وكثير من مجاهدي الكيبوردات ...

ومن يقرا في التاريخ السايبري ( الإنترنت يعني ) ... يعرف إن كيان صغير جداً على النت من ضمن مئات بل آلاف الكيانات إسمه " محاورات المصريين " بدأ يمكن قبل 2003 كان أول كيان على النت عارض التوريث اللي كان أول سطوره بتتكب في هذا التوقت .. وإن صوت الجميع هنا وصل لأعلى المستويات .. وإن كثير من الصحف وقتها وبعدها نقلت مقالات وأراء لأعضاء كثيرين حول هذا الموضوع . وإن الموضوع أفزع النظام الأمني في مصر وتم إستدعاء البعض لمناقشة هذا الموضوع ومحاولة التهدئة ....

تخيلوا لو كنا ألتزمنا بيتنا في هذا الوقت .... كان زمان الثورة دي إتعملت ضد جمال نفسه مش أبوه ...

أسف للإطالة ... سمعت الفنان هاني رمزي بالأمس في برنامج الحياة اليوم يتحدث عن صديق له مصري لسه راجع من أمريكا عشان يعيش الأحداث دي ... وهو في المطار هناك ضابط الجوازات أول ما شاف إنه مصري مسك الجواز ورفعه عالياً وهتف لمصر .. فصفق جميع من في المطار إحتراماً لمصر ..

وحتى على مستوى الكرة ... لما أشوف مباراة لفريق برشلونة من يومين .. المذيع الداخلي يقول : لنقف جميعاً دقيقة حداد على شهداء الثورة المصرية ...

ولما أقرأ تصريحات لنجوم فن وكره عالميين أصبحوا لا يتابعوا إلا أخبار مصر بشغف ....

يبقى برضوا كنت هاقول : أه لو كنا ألتزمنا بيوتنا وأتغطينا من البرد !!!!

[tarek hassan]

يا كاتب المقال

بالتأكيد كانت طلباتي موجهة إلى ربي فقط

و هو الناصر الحقيقي

نعم المولى و نعم النصير

والذي تم تجاهله جل وعلا

و تم نسبة الفضل للعباد

كعادة الإنسان في الجحود و النكران

معاك حق 100%

وهذا ما يشغلني الآن وأنا أتابع كلام الناس

والله إن الله أراد ولم يكن أحد ليحقق شيئا إلا بفضل الله

إرادة الله وليست إرادة أحد

اعترف بأنك قرأتي الصورة منذ البداية بأحس مما قرأتها أنا على الأقل

لا بغضب أحد من الكبار

إذا كان الله سبحانه لم يذكر

وكأن النصر ليس من عنده

سبحانك يا ألله

لم تؤاخذنا بما نفعل وبما نقول

استغفر الله العظيم

[doha]

للرد على اللى بيشكك فى دور المغتربين هى كلمه واحده بس ماذا لو فشلت الثوره ؟

ومين قال اصلا انها نجحت عشان نحط سؤال ( افتراضي ) ماذا لو فشلت ؟

سؤالك سيدي الفاضل امر واقع سأله لنفسه كتير من الي عارضوا "الثورة" في بدايتها او لنقل قبل خروج مبارك من المشهد كله .. نقطه الخلاف الي كانت ( بينا ) وبين من تحمس لها بجنون اننا سألناه لذواتنا ولغيرنا بينما ( هم ) محطوش الخيار ده في ذهنهم نهائيا .. كل الي كان في بالهم وقتها ان ايه يعني آخرتها هننحبس ولا نتقتل يعني مش مشكلة قصاد الهدف العظيم الي ممكن يتحقق فيما لو ( نجحنا ) .. محدش منهم وقف سأل نفسه ماذا لو تم فعلا ازاحه رأس النظام وكلنا كدعاة للخروج محصلناش حاجه شخصية ومحدش مسنا بسوء لكن وبعد ماخطط الدهاة ونفذ الشجعان جاء دور الجبناء لحصد الثمار ؟؟

ياسيدي الفاضل لنكن منصفين .. احداث 25 يناير نجحت وبجداره في اصباغ الشرعية على ازاحه حسني مبارك عن رأس السلطه في مصر .. انا شخصية منبهرة بما حدث وسعيده الى اقصى درجه بكثير من النتائج الي ترتبت على ذلك من محاسبة لاناس كانت حتى وقت قريب جدا فوق اي مسائلة .. بترحم على ارواح الشهداء الي راحوا وكلي يقين ان لولاهم مكانتش المكاسب دي تحققت ابدا .. بس في ذات الوقت مبعتبرش ان الموضوع انتهى وكثير جدا من المخاوف او السيناريوهات السيئة مازالت مطروحه على الساحه وبقوة ايضا ..

لو توقفنا عند المرحلة دي واعتبرنا ان الموضوع انتهى وان خلاص "الثورة " حققت اهدافها ونجحت يبقى فعلا احنا مش عارفين الي حصل ده كان ايه ولا ابعاده ايه .. يبقى احنا كنا بنشجع ماتش اهلي وزمالك والحمد لله واحد منهم اخذ الدوري ومطلوب بقى من مشجعي الفريق الي فاز يزلوا انفاس تعيسي الحظ الي جاهروا بتشجيع الفريق المنهزم ..

احنا بنتكلم عن ( دولة ) قائمه بكافة مؤسساتها وقوانينها وتشريعاتها وبيعيش فيها فوق الثمانين مليون نفس مرتبطه مصائرهم بشكل كلي بمصير هذه الدولة الي بيعاد تشكيلها الآن من جديد ومن الصفر .. من قصر النظر الشديد اننا نقف لنصفق ونقول كله تمام وكده احنا ماشيين صح واحنا لسه في مرحلة الحفر لوضع الاساس .. لاشفنا عواميد ولا شفنا صب كل الي شفناه المقاول وحواليه العمال الي اعلنوا استعدادهم لبدأ البناء .. من التسرع وتعجل الامور اننا نبدأ نختلف دلوقت على لون الدهانات الي هنعملها في المدخل واحنا حتى لسه مرتفعناش قالب طوب واحد على وش الارض ..

[se_ Elsyed]

ومين قال اصلا انها نجحت عشان نحط سؤال ( افتراضي ) ماذا لو فشلت ؟

دي مشكلة الذي لا يرى الشمس الساطعة في السماء .. وليس مشكلة الشمس الساطعة نفسها

وهي أيضاً مُشكلة من يحن إلى الضرب بالكرباج ... ونفسه ايام الكرباج ترجع له تاني عشان يستمتع بذلك

الثورة نجحت مليون في المية في تحقيق اهدافها حتى الأن ...

وبإذن الله سيتم البناء على هذه الأهداف ... لإن لا بناء يتم بدون أرضية صلبة

والأرضية الصلبة تمثلت في وجود شباب لم يوجد لهم مثيل في العالم كله وأبهروا الكون كله بما فعلوه من وطنية وتحضُر وشجاعة ....

الأرضية الصلبة تمثلت في إزاحة نظام ديكتاتوري راسخ لمدة 30 سنة أستطاع ان يزرع الجُبن في نفوس الضعفاء بالذات ...

الأرض الصلبة تمثلت في تكوين جيل لن يقبل بعد ذلك بالذُل ولا بالاهانة ولا بالديكتاتورية

الأرض الصلبة هي إعادة إكتشاف الشخصية المصرية التي تمرض ولا تموت ...

[tarek hassan]

<BR>للأسف الشديد نتائج الثورة لم تأت على رأي الأخت الكريمة الذي كان مناهضا لها متوقعا فشلها ومتأكدا من الخراب والدمار وجهنم وبئس المصير لها مما دعاها أثناء الثورة أن تقول لنا كما قال الأنبياء والمرسلون والشهداء لأقوامهم ( ياليت قومي يعلمون ) <BR><BR>وبما أننا علمنا بحمد الله ورأينا رأي العين ورأى العالم كله ولكن البعض مازال ينتظر موقف هنا أو هناك ليجد فيه ضآلته المنشودة حتى لا يعترف بأنه لم صائبا <BR><BR>هل يمكن أن نتمنى الخراب والدمار يحدث لمجرد أن نقول للناس : مش قلت لكم <BR><BR>عموما الثورة نجحت وهناك مكاسب لا تحصى لم تتحقق في مئات السنيين تحققت ومن يقول الآن أنها لم تنجح هو كمن يرى صورة الشمس في الماء ولا يرى حقيقتها في السماء العالية <BR><BR>وإذا كان مقصد الأخت الفاضلة أنها قالت رأيها وهي ثابتة عليه لا تنافق فهذا موقف محترم وأحسن منه الاعتراف بالخطأ في تقدير الموقف

تم تعديل 15 فبراير 2011 بواسطة tarek hassan

[doha]

للأسف الشديد نتائج الثورة لم تأت على رأي الأخت الكريمة الذي كان مناهضا لها متوقعا فشلها ومتأكدا من الخراب والدمار وجهنم وبئس المصير لها مما دعاها أثناء الثورة أن تقول لنا كما قال الأنبياء والمرسلون لأقوامهم والشهداء ( ياليت قومي يعلمون )

وبما أننا علمنا بحمد الله ورأينا رأي العين ورأى العالم كله ولكن البعض مازال ينتظر موقف هنا أو هناك ليجد فيه ضآلته المنشودة حتى لا يعترف بأنه لم صائبا

هل يمكن أن نتمنى الخراب يحدث لمجرد أن نقول للناس : مش قلت لكم

عموما الثورة نجحت وهناك مكاسب لا تحصى لم تتحقق في مئات السنيين تحققت

وإذا كان مقصد الأخت الفاضلة أنها قالت رأيها وهي ثابتة عليه لا تنافق فهذا موقف محترم وأحسنم منه الاعتراف بالخط

من جهة اني توقعت فشلها فلا انكر ذلك ولكن من جهة اخرى فتوقعي ده مش لاني غير معترفه بامكانية حدوث تغيير وانما لاني كنت معتقده ان لسه الأوان لم يحن .. مشاركاتي مازالت موجوده واهمها رأيي في ماحدث في تونس ومين الي حرك الاحداث هناك فعلا ..

واتمنى حضرتك تجيب اقتباس واحد من كلامي كنت ( بؤكد ) فيه على حدوث الدمار والخراب .. قلت ومازلت اقول بان ( احتمال ) الفشل وارد وان النتائج هتكون كارثية في حالة زي دي .. وكنت حضرتك ومازلت وكثيريون غيرك تفرحون بالمكسب القريب ويلهيكم الفتات عن رؤية المشهد الكامل الي حتى هذه اللحظة لم تتضح ملامحه ومفيش مخلوق يقدر يقول بثقة انه مطمئن الى ماحدث تمام الاطمئنان ..

اما عن تمني الخراب لمجرد ان اقول قلت لكم فمعتقدش ان دي من اخلاقي او صفاتي وكنت اظن ان ده واضح لكل ذي بصيرة فالي يخاف على بلده ويجاهر بخوفه ده وسط طوفان المهرولين مظنش هيكون فيه نفس او صوت يتكلم بيه لو لاقدر الله تحققت مخاوفه وحصل لبلده شيء ..

واخيرا فرأيك ان " الثورة " نجحت هو راي شخصي بيك مبني على قناعاتك وطريقتك في التعامل مع الامور مش هجادلك فيه تماما كرأيي ان لسه بدري على مانحكم على شيء وان كانت الامور حتى الآن جيده وده في حد ذاته يبشر بالخير وهو برضه مجرد رأي خاص بي مبني على قناعاتي وطريقة تفكيري الي بتخليني مستغربش صدور بعض الاراء وردود الافعال من اشخاص بعينهم فدي برضه طريقة تفكيرهم وفهمهم للامور ..

ومعليش اعذرني سيدي الفاضل ان كنت حتى هذه اللحظة بستغرب حماسكم ( الكروي ) الي بيخليكم تحكموا على الامور بسرعه لا تتناسب ابدا مع ضخامة الحدث ..

يجوز الكلمه ضايقتك بس فعليا مش لاقية ابلغ منها في وصف مواقف البعض .. بكل اسف مش قادره اقول غيرها .. فمع احترامي التام للجميع .. " الا ليت قومي يعلمون "..

[Simba]

اولا

اتحفظ عي استخدام لقب كوكو من صاحب مقال الحرب النفسية التي وصلت منتهاها علي الانترنت

والتي ولله الحمد لم يكن لها اي تأثير علي روح الشباب الثائر

كما ان دعم المغتربين المعنوي لم يكن له ايضا اي تأثير

فببساطة شديدة الثورة في الشارع يبقيها مشتعلة دم الشهداء لا تهتم كثيرا بعالم الانترنت وان كانت خرجت منه

ثانيا

ليست جموع المغتربين هي المسؤلة عن غرق الشباب واحلامه حين حاول الفرار من نظام بائس متجها الي ايطاليا

ليست جموع المغتربين هي المسؤلة عن انتشار البلطجة في السنوات الاخيرة

ليست المسؤلة عن عشوائيات كثيرة وشعب ينام في عشش صحفيح

ليست كاعلام مضلل يلوث سمعة العلماء كما حدث مع البرادعي وان كنت اتحفظ علي شخصيته كقائد لكن كل الشهادات والوثائق لا تدينه في اي شئ وليس هو من اقنع قوات التحالف بغزو العراق وبنفسي شاهد علي تقرير جاء في التلفزيون المصري قبل غزو العراق بيوم واحد من لجنة كان يرأسها يؤكد فيها خلو العراق من الاسلحة النووية ووفقط هو صاروخ واحد طلبت الوكالة من العراق تفككيه وبالفل قامت بتفككيه وقامت التحالف بالفتك بهم

ومتأكد انه لو كان زويل من سنوات اعلن نيته في ترشيح نفسه لكان طاله من طاله من اتهام بالعمالة والخيانة

لسنا نحن كمغتربين من وضعنا صور الرئيس في كل مؤسسة حكومية وكل مدرسة واطلقنا اسمه علي مشاريع علي عديدة ولسنا من اختصرنا الحرب كلها في ضربة جوية لسنا نحن من ساعد في تأليه الحاكم

ملفات الفساد التي تفتح كل يوم وبلاغات للنائب العام يكشف كم المصيبة وكأن مصر فتاة نهش المسعورون في عرضها حتي باتت تحتاج الي كثير من جلسات التأهيل

لم نكن معهم

لكننا لم نخوض حرب لاحباطهم

نعم كنا نهلل فخرا وفرحا

لكن بنصرهم والمكاسب التي كانت تتحقق يوما بعد يوما

نحن لما ندفعهم للخروج والمواجهة حتي مؤسس جروب كلنا خالد سعيد كان معهم هناك علي خط المواجهة وهو كان ايضا من اصحاب دعوة الانتفاضة

وماذا لو كانت كل ثروات مصر المنهوبة وماذا لو كان هناك جهات تتبني العقول من 30 سنة مضت هل كنا بحاجة للغربة

ولمن لا يعرف

هل يعرف ان هناك من يعمل في الخليج حارس امن وسائق تاكسي وويتر وهو مؤهل جامعي

وهل يعلم صاحب المقال ان الكثيرين من المغتربين يعانون من الضغط النفسي نتيجة ابتعاده عن اسرته

ولا يملك الا خيارين كلاهما مر

نعم كنا نؤيد وبشدة ما يفعله الثوار

لكن لم يعرف ابدا الثوار الا بعد نصرهم ومشاركتهم الفرحة في كل دول العالم

الآن يكفي

كفي تشكيك بقدراتهم

كفي تآليه الحاكم

كفي اعلام مضلل

كفي اقلام محبطة

[جويرية]

مش لازم الواحد يعطل شغله و يسافر عشان الثورة

ما هوه المتظاهرين عددهم مش قليل دول ملايين و مش عايزين عدد اكتر من كدة

الدعم المالي للثورة ده شئ أهم من السفر

شفت احد المغتربين في قناة العربية كان بيتكلم عن جمع اموال للمتضررين في احداث الثورة

[Falcon Crest]

هل يعرف ان هناك من يعمل في الخليج حارس امن وسائق تاكسي وويتر وهو مؤهل جامعي

معلش علي جنب كده من غير تغيير الموضوع

هل كل خريج جامعي في مصر موءهل لسوق العمل في مصر و خارجها

بتخصصه؟

يارييت بس نفكر قبل الاجابه