رؤية حيادية متزنة ( إن الله لا يغير ما بقوم حتى يغيروا ما بأنفسهم )

[Simba]

اتعودت دايما انى أكتب اللى حاسه بيه .. و إنى أقول كل اللى جوايه .. بس توقفت كتير الفترة اللى فاتت لأسباب لست فى مجال ذكرها الآن

لكن خلينى أدخل فى الموضوع و قبل ما تقروا اى كلمة عايزاكم تكونوا حياديين و تفكروا فى كل كلمة بعقل و بعيدا عن العاطفة و التحيز

مش عايزة حد يأيد و لا يرفض

كل اللى عايزاه ان كل واحد فينا يفكر

فى يوم من الأيام إتظلمنا قوى .. و سكتنا و اتحملنا .. تقبلنا الظلم و عيشنا فيه 30 سنه

سمعنا وعود كتير .. و متنفذتش .. و قابلنا وشوش كتير كنا فاكرينها ملايكة و بعد ما اتفتحت الملفات انكشف كل واحد على حقيقته

المنافق و اللى ماشى مع الموجه .. الحرامى و الشريف .. اللى عايز المصلحة العامة و اللى بيدور على مصلحة شخصيه و اللى بيستخبى ورا ستار المصلحة العامة و هو عايز ينتقم لحادث فردى اتعرضله

و فتحت الثورة الباب لكل الناس عشان يتحدوا على هدف واحد و بس

و لكن الهدف الواحد ده كان لكل واحد مننا مبرراته

صحيح الهدف كان واحد بس الدافع مختلف

و اتحقق الهدف و بدأت الوشوش تظهر و الأقنعه تسقط مع سقوط النظام

و مع سقوط الأقنعه فقدنا الثقه فى كل شىء و فى كل الناس

اللى كان معانا لقيناه ضدنا و اللى كنا فاكرينه موسى طلع فرعون

مصدقناش اى حد و مبقاش عندنا إستعداد نصدق اى حد

و مشينا فى طريقنا و احنا فاقدين الثقه حتى فى الناس اللى وقفت جنبنا

مش هدخل فى سرد لتفاصيل او أذكر اى مواقف لكن هقول على نتايج حصلتلنا فعلا

1- أى رمز بيظهر و أى طوق نجاة دايما نلاقى مجموعه من الناس طلعت تشكك فى نواياه و تحاول تفبرك القصص عشان تقول انه خاين و انه عميل ( على فكرة إختلاف رأى الآخر عنى مش معناه انه خاين و لا انه مأجور لكن كل ما فى القصه له رأى مختلف)

2- ترسخت فى أذهان ناس كتير قوى ان اللى مش معايه يبقى ضدى (مع ان ممكن يكون هدفنا احنا الإتنين واحد بس طريقه تفكيرنا لحل الأمور مختلفة )

3- كل واحد بيعتقد ان رأيه هو الصح و رأى غيره هو الخطأ ( و نسينا القاعده اللى بتقول رأيى صواب يحتمل الخطأ و رأى غيرى خطأ يحتمل الصواب )

4- طالبنا بالديمقراطية لكن بمنتهى الديكتاتوريه (بدليل عدم تقبل اى شخص لرأى أى شخص مخالف له و حتى لو كان الكلام بالعقل و المنطق)

5- قفلنا عقلنا و بطلنا نفكر فى اى شىء و اى تحليل لأى موقف ( بقى فلان كويس يبقى كل حاجة يقولها كويسه و فلان وحش يبقى كل حاجة يقولها وحشه و نسينا انه ليس هناك على الأرض ملائكة و لا شياطين )

6- الإختلاف فى الرأى دايما كان بيفسد للود ألف قضيه ( و أذكر ان هناك مشادات عنيفه و ربما قطيعه بين أصدقاء نتيجة إختلاف الرأى )

7- المسئول المصرى أصبح دوما مدان و حرامى و له فضائح لم يتم إكتشافها بعد و ده طبعا بلا دليل حتى يثبت العكس( ده حتى الجيش اللى وقف جنبنا بلا أى مصالح شخصيه فيه ناس طلعت خونته و قالت انه فيه مؤامرة حتى الآن لم يتم اكتشافها )

8- بدأ موسم اللخبطة و التوهان و الإشاعات و كل مسئول هتلاقيله مش أقل من صفحتين على الفيس بوك واحده بتنادى انه يترشح لرئاسة الجمهوريه و واحده بتطالب بقتله لإنه خاين و عميل ( و الشعب الغلبان كلمة توديه و كلمة تجيبه و مبقاش عارف يصدق مين و يكذب مين )

9- كل واحد حط نفسه فى موقع المسئول و اتكلم بلهجة العالم ببواطن الأمور و الفاهم بأمر الله ( و أقسم بالله معظم المقالات فيها أخطاء فادحه و دليل على ان صاحبها لا يفقه اى شىء فى السياسه بس اهو موسم الفتى و كله بيفتى على كله )

10 - نادينا بالوحده و إحنا فى واقع الأمر إنقسمنا احزاب كتير كل واحد عايز حاجة معينه و عايز يوصلها بغض النظر عن اى حد ( لحد دلوقتى فيه ناس لسه فى التحرير حتى بعد التنحى لتحقيق مطالب فئويه زى زيادة المرتبات و تثبيت العماله مع وجود تنبيهات مستمرة من الجيش إن ده يضر بمصلحة الوطن لكن مشوا على مبدأ أنا و من بعدى الطوفات و يولع الوطن باللى فيه )

11- نسينا أمر الرسول عليه الصلاة و السلام بطاعه الحاكم ( و طبعا مقصدش الحاكم الظالم عشان انا عارفه ان فيه ناس هتسيب المقال كله و تمسك فى الكلمة دى أقصد طبعا طاعه الجيش اللى هم اختاروه بنفسهم عشان يقود المرحلة الإنتقاليه و بقينا عمالين نعدل على كل حاجة يعملوها مرة نقول لا حكومة شفيق دى حزب وطنى عايزين حكومة تكنوقراط و مرة هم ليه لحد دلوقتى محققوش المطالب بتاعه الناس على أساس انهم سحره عايزينهم يعملوا كل حاجة فى ثوانى )

12- انتهى موسم الصبر و بدأنا موسم العجلة ( مع اننا ادينا الحرامية فرصه 30 سنه مش عايزين ندى فرصه للناس الشرفاء حتى 30 يوم و بقينا عايزين كل حاجة دلوقتى حالا )

ناس كتير اتضايقت من تصريح السيد عمر سليمان بإن الشعب المصرى غير ناضح ديمقراطيا بشكل كافى مع ان دى حقيقه و الدليل الحالة اللى وصلنالها دلوقتى من لخبطة

كل الكلام ده بقوله ليه ؟؟

بقوله لإننا دلوقتى فى مرحله الخطر

كل اللى فات كان جميل و كل اللى وصلناله مكسب رائع بس ممكن كل ده يضيع عن جهل مننا

يضيع بسبب الإختلاف

يضيع بسبب التفكير فى مصالح شخصيه

يضيع بسبب عدم التفكير و الإنسياق ورا اى حد بدون إعمال العقل

يضيع لو فكرنا ان فيه شخص واحد دايما صح و كإنه موحى إليه

يضيع لو مساعدناش ان البلد دى تتبنى من تانى

يضيع لو فضلنا نخون كل شخص حتى المشهود لهم بالنزاهه

طيب و ايه المطلوب بعد كل ده

1- من فضلك انسى مصلحتك الشخصية دلوقتى و الإحتجاجات و الوقفات لإن فيه هدف اكبر دلوقتى و ياريت كلنا نركز عليه و هو اننا نبنى البلد دى و صدقنى لما تتحسن كل المشاكل هتتحل لوحدها

2- من فضلك متحاولش تنشر اى حاجة عن اى شخص من غير دليل لإنك كده بتساعد على نشر البلبلة و اتقى الله لإنك كده بتشهر بشخص ممكن يكون برىء

3- الفيس بوك كان سلاح فى وقت من الأوقات بس ده مش وقت الحرب الإلكترونيه ده وقت الحرب على أرض الواقع لو عندك دليل على فساد شخص خليك إيجابى و بدل ما تعمل صفحة فضائح فلان و تنشرها و تخلى الناس تشترك فيها اتقدم ببلاغ للنائب العام و خليه يشوف شغله و بلاش إلقاء التهم جزافا

4- متصدقش اى حاجة إلا لما تشغل عقلك و تقتنع بها و خليك فاهم ان ده موسم الإشاعات

5- الناس اللى احنا اختارناهم عشان يديروا المرحلة الإنتقاليه هم الجيش فرجاءا ثقوا فى قراراتهم و اطيعوا امرهم مينفعش ابدا أروح لدكتور و انا مش واثقه فيه و الله حتى لو كان عبقرى عمرى ما هأخف أبدا الثقه اول مراحل العلاج و مش معنى اننا شوفنا ظلم كتير اننا نظلم ناس شرفاء

6- قبل ما تحاول تصلح الناس اصلح من نفسك و ابدأ اتقى الله فى شغلك اعمل اللى عليك حافظ على النظام احترم آراء الآخرين

لو فعلا عملنا كده يبقى احنا اخيرا نقدر نقول ان الثورة نجحت و عدينا بر الأمان

إن الله لا يغير ما بقوم حتى يغيروا ما بأنفسهم

منقول

[wsadani]

فعلا احنا محتاجين هذا الوقت إلى ثقافة الإختلاف وتعلم الديمقراطية الحقة اتفق تماما مع ان هذا الوقت أصعب بكثير من الثلاث أسابيع المنصرمين فنحن الأن اما ان نتجة الى الفوضى او الى بناء دولة جديدة

[حوريةعين]

عظمه على عظمه يا ست ( مش عارفة مين اللي كتبه الكلام ده )

بس بجد كلام رائع

شكرا يا سمبا

ويارب الكلام ده يوصل لكل مصري ويقتنع بيه حفاظا على مصرنا الحبيبية

:clappingrose:

:egyflag: :egyflag: :egyflag:

[gazera]

كلامك حقيقى الفكرة ان الكل بيشوه صورة منافسه لأن خلاص الطريق اتفتح للرئاسة و كله بيتسابق بس للأسف لسه مش عارفيين نتنافس بشرف مع بعض تهمة خاين و عميل خلت الشعب كله خاين و عميل لو كان الكلام ده حقيقى اسرائيل كان زمانها عايشة فى جنة جمبنا اما كلنا عملاء ليها

[جويرية]

أى رمز بيظهر و أى طوق نجاة دايما نلاقى مجموعه من الناس طلعت تشكك فى نواياه و تحاول تفبرك القصص عشان تقول انه خاين و انه عميل ( على فكرة إختلاف رأى الآخر عنى مش معناه انه خاين و لا انه مأجور لكن كل ما فى القصه له رأى مختلف

نعم انا أشك في كل الناس حتي يثبت العكس

لأنه ليس لدينا قناة أعلامية واحدة ، غير مشكوك في اتجاهاتها

ليس لدينا قناة واحدة تعمل لصالح الشعب و تنقل الحقيقة

و لذلك أنظر للشخص الذي ظهر علي هذه القناة او تلك و قامت بتقديمه علي انه شخص وطني و ابحث عن تاريخه الحقيقى لتأكد من هذا الشخص ما هي توجههاته

الشرفاء المخلصون أضعاف أضعاف الخونة و العملاء ، و لكن لا يسلط عليهم الضوء لنعلم اين هم