قناة الجزيرة ما لها وما عليها

[Simba]

مع بداية الثورة كثر الجدل حول قناة الجزيرة ما بين معجب بشدة بادائها الاعلامي وما بين من يتهمها بالتأمر علي زعزعة الأمن العام في مصر وظهرت وثيقة ويكليكس والذي ايضا فندتها بعض المواقع

وبحياد

ما مصلحة قناة الجزيرة في تسليط الاضواء علي الاحداث في مصر حتي ان قناة الجزيرة مباشر لم تبرح ميدان التحرير من اول يوم الاعتصام والذي قال بعض الناشطون علي الفيس بوك لولا تواجد كاميرات الجزيرة ولولا تواصل بعض النشطاء معهم كانت قوات الامن ستبيدهم تمام في جمعة الرحيل !!!

هل تعمل الجزيرة لمصلحة جهة ما

هل بالغت الجزيرة

هل يجب ان ننكر دعمها للثورة ام ان دعمها هو محل شك

[ComingSoon]

ما مصلحة قناة الجزيرة في تسليط الاضواء علي الاحداث في مصر

الجزيرة يسيطر عليها الاخوان والقوميين

وضاح خنفر مدير القناة هو من الاخوان وكان جزء من حركة حماس وكذلك احمد منصور وغيرهم

القوميين العرب ايضاً لهم تواجد قوي فيها مثل فيصل القاسم وماوراء الكواليس اكثر

الطرفين لايكرهون شئ اكثر من حسني مبارك فهو بمثابة الشيطان الاكبر بالنسية لهم وايضاً يكرهون النظام السعودي لكن بدرجة اقل

امير قطر ايضاً يدعم هذه التوجهات لمصلحتة لأنه يريد ان يكون زعيم ويري ان هذه التيارات لها شعبية في العالم العربي

هل يجب ان ننكر دعمها للثورة ام ان دعمها هو محل شك

بدون قناة الجزيرة لكان النظام المصري فتك بالمتظاهرين بدون ان يخرج لهم صوت

فهو نظام يخاف مايختشيش

تم تعديل 16 فبراير 2011 بواسطة ComingSoon

[لونا]

الجزيرة غطت الأحداث في مصر بحرفية عالية جدًا

على المستوى الإعلامي يأخذوا 10 على 10

و لكن بانحياز شديد و غير مهني .. طبعًا إنحياز ضد النظام المصري

سؤال مهم:

أين الكاميرات المثبتة 24 ساعة في ميادين صنعاء و بني غازي و المنامة و الجزائر ؟؟؟؟؟

تم تعديل 16 فبراير 2011 بواسطة لونا

[wsadani]

كان نفسى فعلا الموضوع ده يتفتح

على الرغم من التغطية الكبيرة والقوية للجزيرة الا انها فعلا واضح انها ضد النظام فى مصر وأتذكر جيدا فى أيام الثورة عندما لا يجدون شيئا يذيعونة يذيعوا السيارة التى تدهس الناس وأشياء اخرى لاستثارتهم الجزيرة لم يكن يهمها بأى حال من الأحوال مصلحة الشعب المصرى أكثر من تدمير النظام مهما كلف ذلك واتذكر كلمة المستشار أحمد مكى لهم عندما اتصلوا به عندما ناشدهم بعدم التسخين (هذ كان فى الايام الأخيرة التى بدا ان النظام سقط فيها )

خلاصة الكلام لا أعتبر الجزيرة قناة صديقة على الاطلاق

[م تيمور المراغي]

توبيكاتك في الفتره الاخيره جامده وروعه يا سيمبو ,,

اللي يهمني في علاقتي باي طرف او جهه خارجيه مدى استفادتي انا الشخصية منهم ,, وعدم تاثري باي سلبيات موجهه تصدر منهم الي ,,

اما النوايا ,, والخلفيات الايدلوجيه ,, والتعامل مع اطراف اخرى مشبوهه ,, فهو في دنيا السياسه لا قيمة له ,, يعني المنفعه المباشره ليا انا هيا الاساس

يبقى السؤال هو :

هل قناة الجزيره دعمت ثورة 25 يناير في مصر ,,

الاجابه نعم ,, وبالتاكيد ,,

ان لم تكن سببا رئيسيا في انجاحها كمان ,,

[ComingSoon]

اللي يهمني في علاقتي باي طرف او جهه خارجيه مدى استفادتي انا الشخصية منهم ,, وعدم تاثري باي سلبيات موجهه تصدر منهم الي ,,

اما النوايا ,, والخلفيات الايدلوجيه ,, والتعامل مع اطراف اخرى مشبوهه ,, فهو في دنيا السياسه لا قيمة له ,, يعني المنفعه المباشره ليا انا هيا الاساس

الكلام ده خلاصة الخلاصة

[مغتربة]

قناه الجزيره من ناحيه المهنيه تاخد امتياز

لكن من ناحيه النوايا هترسب بجداره

[Ahmed Anwer]

معلهشي يا جماعة ،،،

زي ما أنتم عارفين انا كنت في فرنسا في بداية الأحداث

و مفيش قناة أخبارية و أي نشرة أخبار من اي قناة إلا و كانت أحداث مصر أول خبر فيها ،،

و دي قنوات موجهه لأوروبا و الغرب

مع العلم كان في البداية في خبر هام جدا و عالمي التأثير اللي هوا مرض نيلسون مانديلا أو شئ من هذا القبيل

و أحداث مصر غطت عليه تماما

إحنا جامدين أووي و الله و بلدنا ذات قيمة كبيرة

ده البورصات وقعت في العالم و البترول سعره ارتفع

الجزيرة مادتشي أحداث مصر أكبر من حجمها ،،، أديتها الاهتمام الطبيعي

لبلد في حجم مصر و لقناة متحدثة باللغة العربية

إحنا بس اللي مركزين معاها أووي

[ذهبية]

لا اختلاف ان قناة الجزيرة تمتاز مش بس بالمهنية و التقنية العالية

الملحوظ جدا ان لديها ميزانية مفتوحة بلا حدود

لية هى عملت كدة مع مصر

انا شايفة انة مش علشان النوايا السيئة

لكن من حجم مصر يا جماعة

مصر بجد مش قليلة

و اللى عايز يخلى اى حد يتابع اى قناة يتكلم عن الكبير و مصر كبيرة بشعبها و تاريخها

اى دولة عربية مهما كبرت عمرها ما هتوصل لمصر

يا جماعة الجزيرة عمرها ما هترصد اماكانيتها دى مع اى دولة عربية زى مصر

[Ahmed Anwer]

السبب الحقيقى وراء ايقاف بث قناة الجزيرة على النايل سات ثم اعادة بثها مرة اخرى

قامت الحكومة المصرية فى مساء 29 يناير 2011 بايقاف بث قنوات الجزيرة الاخبارية واعتقال وتعقب مسئوليها فى مصر وعلل الاعلام ذلك بانها تثير الفتنة وتدعو لهدم مصر وما إلى ذلك من اتهامات لم يكن اياً منها جديداً

فكلنا يعلم الخلافات بين حكومة قطر والنظام المصرى والحروب الاعلامية الدائمة بين اعلام النظامين

لكن يبقى السؤال لماذا تم ايقاف بث الجزيرة فى مابعد 29 يناير ولماذا عاد مرة اخرى بعد كل هذه الاتهامات ضد القناة

واليكم الإجابة

مذبحة مدينة السلام

هى واحدة من المذابح التى قام بها سفاحى النظام السابق حيث قام بعض افراد الشرطة ممن تواجدو فى القسم ليله 28 يناير (جمعة الغضب) باطلاق النيران عشوائياً على كل من يمكنهم اصابته ليسقط فى ساعات قليلة قرابه الخمسين مصاباً 15

وبينما كانت التعليمات واضحة لكل القنوات الاخرى بداية من يوم 29 صباح السبت بعدم نشر اى شىء اياً كان يشير لما حدث من مذابح وجرائم فى يوم الجمعة والتزمت بهذه التعليمات كل القنوات المحلية بالطبع حتى الخاصة منها

الا ان الجزيرة كانت قد تسربت اليها بالفعل عدة اخبار متواترة عن المذبحة ومذابح اخرى راح ضحيتها مايزيد عن عشرة اشخاص فى كل مكان فارسلت احد مراسليها لقلب الحدث (مشرحة مستشفى مدينة السلام) ليفاجىء فى اليوم التالى بوجود قرابه 15 جثه متكدسه فى الثلاجات وخارجها لا مكان لاحتوائها او تغسيلها

حيث قامت ادارة المستشفى باستخراج اوامر الدفن من النيابة العسكرية سريعاً وتسليم الجثث لاقربائهم حتى بدون تسغيل وتحت حراسات مشددة شملت الجنائز ايضاً لضمان عدم تسرب الاخبار او تسجيلها او ان يقود الغضب الاهالى لاى اعمال انتقامية

واليكم الفيديو

اولاً التقرير الاصلى والذى تم اذاعته بالفعل على قناة الجزيرة الانجليزية وكان سيعاد بثه على القنوات الاخرى العربيه

http://www.youtube.com/watch?v=NnZmVAoqAz0&feature=player_embedded

تضمن التقرير ايضاً الاشارة الى عشرات من الشهداء فى الاسكندرية (23) و (15) فى السويس وبينهم اطفال دون العاشره من العمر !!

طبعاً الحقيقة ديه لو كانت اتعرفت فى ساعتها كان الوضع اختلف لكن النظام وحاشيته كانو حريصين تماماً على اخفائها خاصة بعد ان ظنو ان حيلة الخطاب الثانى لمبارك ستنطلى على المصريين الطيبين ويتعاطفو مع النظام وتخلص الازمة وتتكتم الاصوات للابد

اما وقد فضح امر ما حدث فى ليله 28 يناير واخذت كل القنوات تتداول الاخبار الخاصة بذلك لم يعد هناك سبباً لايقاف القناة المتهمة بالاسائه والتأمر على مصر !!

لذا فقد اصدرت إدارة النايل سات قرارها باعادة بث قنوات الجزيرة الاخبارية على نفس تردادتها فى صباح الاربعاء 9 فبراير

_______________________________________________________________________________________________________

منقول عن صديق عزيز ،، أثق في مصداقيته

و قالي إنه يومها كلم الجزيرة و البي بي سي و أون تي في

و اللي اهتمت و بعتت مراسل للمشرحة الجزيرة

بيفسر ده إن بقية القنوات كان عندها تعليمات مشددة بعدم عرض مشاهد القتل و جثث الشهداء و صراخ و بكاء أهلهم

طبعا لما يكون الموضوع مجرد رقم ،،، كام شهيد أو كام مصاب غير لما يكون صوت و صورة و أهل و أصدقاء

[Ahmed Anwer]

بقية الفيديوهات لمذبحة السلام من تصوير صديقي شخصيا ،،

باقى الفيديوهات التى تصور لحظات تسليم الجثث للاهالى

http://www.youtube.com/watch?v=NoYdxA06tK4&feature=player_embedded

http://www.youtube.com/watch?v=Lw5kTxlwnVg&feature=player_embedded

[Ahmed Anwer]

http://www.youtube.com/watch?v=7QJp7USiePg&feature=player_embedded

http://www.youtube.com/watch?v=UJIXnQywmKY&feature=player_embedded

[Ahmed Anwer]

http://www.youtube.com/watch?v=icAi5fL8ojc&feature=player_embedded

http://www.youtube.com/watch?v=qwyvNZ8ExKE&feature=player_embedded

[شرف الدين]

بخصوص قناة الجزيرة وتغطيتها لأحداث الثورة

من ناحية المصداقية والمهنية فقناة الجزيرة تاخد 10 من 10

فاكرين كلنا عمار الشريعي لما اتصل بمنى الشاذلي وقال لها إن التلفزيون المصري هو اللي أجبرنا اننا نتجه لقناة الجزيرة

من ناحية الإمكانيات العلمية والتقنية والقدرة على النقل فقناة الجزيرة تاخد عشرة على عشرة

وكلنا شفنا ازاي إدارة النايل سات حاولت كتير جدا توقف بثها وكل مرة كانت الجزيرة بتقدر تتغلب على وقف البث وتعيد البث على تردد آخر

أما بخصوص قناة الجزيرة وأحداث ثورة يناير

اتفق تماما مع كل اللي بيقول إنها كانت بتسخن

ولا أحد ينسى فيديو العربيات اللي بتدهس الناس وكانت الجزيرة بتعيده ليل نهار

لكن هل الجزيرة فبركت الفيديو ده

العيب مش على الجزيرة إنها نقلت فيديو حقيقي وفضلت تعيده كتير وكتير

العيب على النظام اللي تسبب في وجود فيديو زي ده أصلا

قناة الجزيرة قامت بالواجب وزيادة في ثورة يناير

وكفاية إنها كانت القناة الوحيدة الموجودة في ميدان التحرير ليل نهار

وكانت فاتحة خط مفتوح مع الثوار في ميدان التحرير ليل نهار

تقريبا القناة الوحيدة اللي كنا نقدر من خلالها نعرف أخبار ميدان التحرير أول بأول

ولن أنسى مكالمة نوارة نجم مع القناة وهي بتعيط تاني ليلة هجوم البلطجية

لذا فالواجب على كل منصف أن يشكر هذه القناة التي فضحت نظام قمعي وحشي ليس له مثيل ربما في العالم كله

وساعدت شعب مقهور في التغلب على هذا النظام

من ناحية أخرى بخصوص ارتباط قناة الجزيرة بقطر

قناة الجزيرة جزء من دولة قطر وهي مسخرة لخدمة سياسات دولة قطر وهي بحق نموذج للقناة التي تصنع دولة

هقولكم على حاجة بسيطة تثبت أد ايه نظامنا السابق ده كان وصل لدرجة كبيرة من البلاهة والسذاجة لدرجة إن أي حد كان يقدر يضحك عليه

فاكرين لما قطر فازت بتنظيم بملف كاس العالم

قبلها مبارك زار قطر ... وكانت دي أول زيارة لمبارك لدولة قطر من مدة طويلة جدا

وساعتها اتكلم مع حاكم قطر ( بن حمد تقريبا والله نسيت اسمه ) .. وحتى قاله إنه ( أي مبارك يعني ) هيكون حريص على إنه يحضر حفل الافتتاح ( اللي ميعاده مفروض سنة 22 أي بعد 12 سنة من الآن ) بنفسه ( وسبحان من يغير ولا يتغير ).

وأنا فاكر أخونا العزيز سين سين فضل يضحك على الجملة دي قوي

وسمعنا عن زيارة حاكم قطر لأسرة المدرس المصري للتعزية

وأصبحت صحف الحزب الوطني تشيد بحاكم قطر وأنا فاكر الأهرام تقريبا كتبت ( لفتة إنسانية كريمة من أمير قطر )

وتفننت أقلام كتير محسوبة على النظام في الإشادة بكيفية فوز قطر بكاس العالم

حتى إن مذيع الحزب الوطني تامر أمين فضل يمكن نص ساعة كاملة في برنامج مصر النهاردة يشيد بحكومة قطر وكيف تغلبت على كل الصعوبات

ساعتها قيل إنها كانت دي صفقة بين قطر ومصر

قطر ممثلة في قناة الجزيرة لن تقوم بتغطية انتخابات مجلس الشعب ( الانتخابات الفاضحة ) تغطية كافية

مقابل إن مصر ممثلة في هاني أبو ريدة تقوم بمساندة قطر في التنظيم

وساعتها أن فاكر إن هاني أبو ريدة أعلن في الصحف إنه بناء على توجيهات الرئيس مبارك أعطى صوته لقطر.

وبعد ما حققت قطر اللي هيا عايزاه

رجعت قلبت على مبارك تاني خلال تغطية أحداث الثورة

[شرف الدين]

فيديوهاتك في الجون يا أحمد

[Rock]

انا عايز اسأل سؤال يا جماعة ,هو لية كل من العربية و الجزيرة لما بيجوا يحطوا خريطة مصر علي الشاشة ,بيحطوها مع تعديل علي الحدود الجنوبية و هو ان الجزء الشرقي من شريط الحدود الجنوبية يتم رسمة الي اعلي و هو علي عكس المعروف و هو الي يتم رسمة شريط مستقيم لا يميل لاعلي او اسفل .....هل دة معناة انهم تبرعوا من عندهم بحلايب و شلاتين للسودان و دي المشكلة الدائمة بينا و بين السودان..ارجوا يكون في رد من الحكومة المقبلة علي دة