قابل يا عم وهات كراسي للباشوات ... حبس مجموعة جديدة من عيال الشرطة

[se_ Elsyed]

لسه باتكلم امبارح عن إسماعيل الشاعر .. أهو شرف في العمبوكة جنب إخواته هو والمجرم عدلي فايد والولا بتاع الامن المركزي اللي قال لهم إنسحبوا وورنا الجيش هايعمل إيه

إوعى وشك والجاز

حبس "الشاعر" و"فايد" و"رمزى" على خلفية تحقيقات "25 يناير"

الجمعة، 18 فبراير 2011 - 18:21

أمر النائب العام المستشار الدكتور عبد المجيد محمود بحبس كل من اللواء إسماعيل الشاعر مدير أمن القاهرة السابق، واللواء عدلى فايد مدير مصلحة الأمن العام، واللواء أحمد رمزى مساعد وزير الداخلية لقوات الأمن المركزى، 15 يوماً على ذمة التحقيقات التى تجريها نيابة أمن الدولة برئاسة المستشار هشام بدوى المحامى العام الأول، فى الأحداث التى شهدتها البلاد فى 25 يناير الماضى.

وجهت النيابة للقيادات الأمنية السابق ذكرها، تهم القتل العمد لعدد من المتظاهرين بالرصاص الحى، وانسحاب جميع أجهزة الشرطة ليلة 28 يناير، مما تسبب فى حالة فوضى تامة فى البلاد، بالإضافة إلى التورط فى تهريب عدد كبير من المسجونين والمسجلين خطر والبلطجة واستخدامهم لإرهاب المتظاهرين والمواطنين.

[Simba]

حد من العضوات تزغرد .... علي ما يفكوا امن الدولة هو كمان يارب

[عنبو]

ربنا يتممها على خير

ده لسه فيه بلاوى المشكله ان مصر فيها كمية فساد غريبه

من اول اعلى منصب لحد الغفير

ياربى بس احنا نخلص من الناس الكبيره وهناخدها واحده واحده لحد لما نوصل للراجل اللى كان بياخد2 جنيه على كل فيش

[لونا]

حد من العضوات تزغرد .... علي ما يفكوا امن الدولة هو كمان يارب

:110: :110: :110:

عقبال كل الباقيين ..يا رب

[se_ Elsyed]

الناس دي يا جماعة كان أثرياء ثراء فاحش من النهب والسلب وكان مرتب الواحد فيهم بيوصل ملايين من الإتاوات والمحسوبيات

يارب كل فلوسهم ترجع لنا أحسن خلاص أنا بكيت أشك في نفسي بجد

[fatfouta]

الخبر جميل وعقبال باقى الشلة الفاسدة

الغير شريف والغير سرور والغير مفيد وزكريا وكلهم

بس هو يعنى هما دول بس اللى اطلقوا النار على المتظاهرين وانسحبوا من نفسهم كده؟؟

فين العادلى ومبارك من الاتهامات دى ولا هيلبسوها لدول وخلاص

تم تعديل 18 فبراير 2011 بواسطة fatfouta

[raouf]

فاكرين قبل الثورة بشهر تقريبا وكنا بنتكلم عن الفساد قلت جملة وهاعيدها هنا الجملة بتقول

ان كان نيلك يا مصر صلصة مش هايكفى الكوسة والسرقة اللى فيكى

مهما اكتشفنا من فاسدين للاسف مش هييجوا قطرة لما فى مصر من فساد بناه النظام السابق تحت سمعه وبصره

انا نفسى فى خطوة وهى

مراجعة كل عقود بيع الاراضى والقطاع العام فى ال30 سنة الاخيرة والغاء عقود كل ما يثبت بخس سعره او وجود شبهة تلاعب او عدم التزام بالعقود والقوانين

[se_ Elsyed]

أجمل خبر برضوا قرأته إن مصر للطيران تحفظت على أسطول الطائرات الخاصة برجال الاعمال المقبوض عليهم أو الممنوعين من السفر

عز ورشيد وأبو العينين وجرانه والمغربي وأبو العينين وحسين سالم و و و و و و و و

يا نهار أبيض كمية طيارات مهولة ؟

نفسي بقى الشعب الغلبان يبرد ناره وكل واحد ياخد لفه بالطيارات دي من مطار القاهرة لحد العتبة ..... وممكن نعملها بتكلفة رمزية .. ولتكن نص جنيه للفة مثلاً ..

[الغريب]

الموضوع بدأ يسخن والأمور هتحلوا أن شاء الله

النائب العام راجل محترم لأبعد الحدود

ربنا يرزقنا وزارة جديدة من المحترمين تساعدوا على كشف ملفات الفساد

ولا يزال الشعب المصري بإنتظار فتح بلاعة أمن الدولة وتطهيرها

[arkan]

أيوة كدة ربنا يفتحها بوشك ياسيادة النائب العام

عقبال الباقي

[Rock]

علي ال CNBC

يا جماعة فيةاخبار عن لعبكة كدة حوالين خالد سري صيام مدير البورصة ابن سري صيام و دة غالبا رئيس محكمة

المهم انهم بيقولوا انة فية مية و خمسين مليار جريوا برة مصر من بدري في اشارة انة في تسريبات و تعليمات وصلتلة..

يا رب يدوروا وراة و نتأكد , لانة كدة يبقي بيسلموا القط مفتاح الكرار

[hakeem]

ايوة كده ادى الاخبار اللى تفرح..بس كان نفسى ميكنش حبس على ذمة تحقيق..عايز الخبر الجاى يكونوا وصلوا ايد عشماوى..بس طبعا يرجعوا الفلوس الاول..ده احنا كان عندنا شويه حرمية انما ايه عجب..

[Handasah]

سبحان المعز المزل

[tarek hassan]

يا مراحب

هاتي الشاي يا مديحة

[Simba]

مظاهرات حاشدة ف الاسكندرية بتطالب إقالة اللواء مدير امن الدولة

[fatfouta]

عالحياة مكتوب كده بالنص

حسن..مانشر من حبس الشاعر ورمزى وعدلى غير صحيح

مين حسن؟؟؟ حسن عبد الرحمن رئيس امن الدول يعنى؟؟؟

[se_ Elsyed]

عالحياة مكتوب كده بالنص

حسن..مانشر من حبس الشاعر ورمزى وعدلى غير صحيح

مين حسن؟؟؟ حسن عبد الرحمن رئيس امن الدول يعنى؟؟؟

أيوه هو بتاع امن الدولة ..

بس الخبر نُشر على اليوم السابع ولسه موجود

[fatfouta]

عالحياة مكتوب كده بالنص

حسن..مانشر من حبس الشاعر ورمزى وعدلى غير صحيح

مين حسن؟؟؟ حسن عبد الرحمن رئيس امن الدول يعنى؟؟؟

أيوه هو بتاع امن الدولة ..

بس الخبر نُشر على اليوم السابع ولسه موجود

ايوه فعلا انا شوفت الخبر عاليوم السابع...مش قصدى اشكك فى الخبر

بس انا استغربت لما لقيت حسن عبد الرحمن بيقول كده

مع ان المفروض الشخص ده اول واحد يتم حبسه معاهم والله

تم تعديل 18 فبراير 2011 بواسطة fatfouta

[Simba]

يعني ايه حد يترجم

العادلي محبوس ولا مش محبوس

[arkan]

الحياة

الافراج عن 239 سياسي معتقل من 7/2/2011

تم تعديل 18 فبراير 2011 بواسطة arkan