نوارة .. إسراء .. أسماء

[Om Zayd]

السلام عليكم و رحمة الله و بركاته

تعليق سمعته عن بنات مصر في الثورة و دفعني للتفكير

بدأ الموضوع بملاحظة عبقرية انهن غير متزوجات

ثم تساؤل لِم لم يقم الأمن بتزويجهن؟ و ساعتها كان هيرتاح من وجع الدماغ اللي عاملينه!!!!!؟

لم الربط بين دور المرأة في المجتمع و بين الفراغ؟

هل الزواج يعني ألا تنشغل بالشأن العام و ان تكون فاعلة و مؤثرة فيه؟؟

على الجانب الآخر.. فاكرين العروسين اللي عقدوا قرانهم في التحرير وسط الثورة؟

طانوا جايبين لقاء معاهم

هما الاثنين كان معد عقد القران محدد من قبل

و جت الثورة

و اشتركوا فيها سوا

و أقنعها يشهروا عقد القران هناك عشان يدوا رسالة لأي حد بيراهن اننا هنزهق ونمشي .. انه لأ .. قاعدين .. مش هنمشي .. هما يمشي

ناويين يسموا أول مولود لو ولد .. معتصم

لو بنت .. تحرير "بس هيا لسة مزمزقة في اسم البنت

:closedeyes:

ما رأيكم .. دام فضلكم

تم تعديل 19 فبراير 2011 بواسطة Om Zayd

[م تيمور المراغي]

وضيفي يا ام زيد معاهم الآنسه انجي حمدي ,,بنوته مصريه لكن ب 100 راجل

وفي نفس الوقت المسئولة الاعلامية لحركة شباب 6 ابريل ,,

كانت في عز ما ملايين الرجال خافت واختفت

وتم اعتقال المناضل نور حمدي مسئول الاتصال في الحركة ليلة 30 يناير من الشرطة العسكرية

وابرزت اجهزة الامن كلها الانياب للنشطاء من مخابرات عامه ومباحث امن الدوله وشرطه عسكريه

هي و كل بناتك الاحرار يا مصر شرفوكي ونزلوا ورقابيهم على كفوفهم والله ماخافوا ولا اتهزت لهم شعره

انحني واحترم كل شاب وبنت نقي

لم يتلوث

لم يتلون

من شبابك يا مصر ’’

[م تيمور المراغي]

6 ابريل لوكالة (آكي) الإيطالية: دور المراة لا يقل عن دور الرجل فى الثورة,,

قال محمد عادل، المتحدث الإعلامي باسم شباب 6 أبريل (إحدى الحركات الرائدة في إشعال المظاهرات) :إن "فتيات الحركة كان لهن دورا قياديا في التخطيط للمظاهرات وجمع المساعدات وإرسالها للمتظاهرين" وفق قوله

وأضاف عادل في مقابلة أجرتها معه وكالة (آكي) الإيطالية للأنباء عن دور المرأة المصرية في الثورة بمناسبة اليوم العالمي للمرأة أن "بنات الحركة اضطلعن بأكثر من دور، فقد كن يتحدثن باسمها ويرسلن الأخبار للصحافيين ووسائل الإعلام"، علاوة على "وجودهن في غرفة العمليات وقيامهن بالمتابعة،والتخطيط والتوجيه ,, وفي ميدان التحرير قدمن الدعم ميدانيا في التظاهر والالتحام والاعتصام ولجان التفتيش بالاضافة الى خدمات طبية في المستشفي الميداني"، وقد "كانت هناك متطوعات لتقديم خدمات للمتظاهرين مثل الطعام والمياه وغيره " حسب تعبيره

ولفت الناشط السياسي إلى أن "دور المرأة كان أكبر في الخطوط الخلفية بهدف حمايتهن"، لكن الكثير منهن تقدم ونزل للميدان"، وتابع "بعد نجاح الثورة بداء عدد من الفتيات بالنزول إلى الشارع لشن حملات توعية للمواطنين عن الدور الذي ينبغي القيام به في الفترة المقبلة، والتوعية بالانتخابات والتعديلات الدستورية لان قدرتهن على الإقناع أكبر"، فضلا عن "تولي بعض الفتيات مواقع قيادية في التنظيم والإدارة والعمل الإعلامي"

واختتم عادل بالقول إن "المرأة المصرية كان لها دورا مهما في الثورة لا يقل أهمية عن دور الرجال" وفق تعبيره

تم تعديل 13 مارس 2011 بواسطة architect

[Simba]

التلاتة دول بحس ان عندهم فراغ عاطفي

حبوا انهم يملوه بالسياسي

وحاسس ان قريب هيخرجوا من اللعبة لا حصلوا سياسي ولا حصلوا عاطفي

[pink rose]

وضيفي يا ام زيد معاهم الآنسه انجي حمدي ,,بنوته مصريه لكن ب 100 راجل

وفي نفس الوقت المسئولة الاعلامية لحركة شباب 6 ابريل ,,

كانت في عز ما ملايين الرجال خافت واختفت

وتم اعتقال المناضل نور حمدي مسئول الاتصال في الحركة ليلة 30 يناير من الشرطة العسكرية

وابرزت اجهزة الامن كلها الانياب للنشطاء من مخابرات عامه ومباحث امن الدوله وشرطه عسكريه

هي و كل بناتك الاحرار يا مصر شرفوكي ونزلوا ورقابيهم على كفوفهم والله ماخافوا ولا اتهزت لهم شعره

انحني واحترم كل شاب وبنت نقي

لم يتلوث

لم يتلون

من شبابك يا مصر ’’

امممممممممممم هي دي بقى انجى حمدي

:closedeyes: و انا اقول برضو الباشمهندس متحيز للثورة بقلب جامد كده ليه

ههههههههههههههههههههههههه

الصراحة موزة موزة

دا هزار على فكرة

[Simba]

هو اي حد عايز يبقي ثورجي يلبس الغترة الفلسطيني دي

:blink:

[ComingSoon]

اسراء عبد الفتاح اكتر واحدة بيعجبني كلامها

عندها روح ثورية في الكلام وجرأة في الحق

البعض قد يعتبرها وقاحة لكن صاحب الحق دائماً يكون عنده اصرار وتحدي

[عبير يونس]

أنا شايفة إن الكلام ده قلة أدب بصراحة

يعني المتزوجة ملخومة ومش فايقة يعني

و الا يقصدوا أنهم عشان ماتجوزوش فطلعوا همهم في الأمن

سفالة غير مستغربة

أحيي هؤلاء البنات اللي الواحدة فيهم بألف رجل من اللي قعدوا في البيوت أو في اتفرجوا على الثورة من البلكونات

و رأيي إن البنات دول حتى لو متزوجات و عندهم دستة عيال كانوا برضه حينزلوا و بعيالهم كمان

زي كتير سيدات نزلوا بأطفالهن و في حوامل كمان كانوا في المظاهرات و كانوا معتصمات في ميدان التحرير

الشجاعة و اليقين و الثبات صفات لا تعرف جنس ولا لون و لا عمر

تحية لكل بنت و لكل شاب

لكل سيدة ولكل رجل

لكل طفل و لكل مسن

شاركوا في الثورة ليعيدوا لنا مصر حرة أبية

و ليجعلونا ننعم بالكرامة بعد عقود من الذل و الهوان

[Diab]

دور المرأة رائد ومحاولة طمسه إستخاف بالعقول

حد ينسي دور أسماء بنت يزيد رضي الله عنها

قتلت تسعة من الروم بعمود خيمتها

حضرت أسماء غزوة خيبر مع النبي صلى الله عليه وسلم، وكانت كعادتها تخطب في الجميع، وتنادي بأعلى صوتها، وبكلمات تشق طريقها إلى العقول والقلوب: ان قاتلوا في سبيل الله، وانصروا رسول الله وارفعوا راية الإسلام.

حكاية أن الست لما تتجوز تنسي ان لها دور في قيادة الأمة نحو الخير ده حق أصيل كفله الله لها

بس المشكلة أن جراءة اسماء ونوارة امها صافيناز كاظم بيعتبرها البعض بجاحة وقلة أدب

يمكن لانه معروف عن المرأة الحياء

بس ده في الحياة العادية مش ضد الظلم

[جسار]

تجاذبت الحديث مع سائق التاكسى الملتحى أثناء رحلة ذهابى للعمل فى الصباح وكنا نعيش أحلى أيام حياتنا

بعد زوال مبارك ، ومن أول دقيقة كنا متفقين على أنها ثورة شعبية ومباركة ، وعن مايحدث فى ميدان التحرير

حول اخلاقيات الشعب المصرى العظيمة والمتحضرة بالفعل ، وقلت له بالرغم من الزحام الشديد ووجود نساء كثيرات

الأ أنه لم تسجل حالات تحرش جنسى فى الميدان ، ووافقنى نافيا أن يحدث ذلك وان الجميع كانوا قلبا واحدا

ولكنه أردف بأنه ومع اعجابه بنشاط السيدات الا انه يفضل وجودهن فى بيوتهن ، فقلت له لماذا ؟

النساء فى الأسلام كن يخرجن مع الرجال فى الحروب والغزوات يجمعن الحطب لطهى الطعام ويسقين الرجال

ويداوين الجرحى ويدقوا على الدفوف ويصرخن لاثارة الحماسة و أستنهاض همم المحاربين أثناء الحرب

فكان رده بالايجاب ولكن بشرط ان يكون معها محرم ، فرددت متعجبا ولو اتاها جريح غير محرمها الا تقوم

بتضميد جراحه !!

أن الظلم الذى وقع علينا فى فترة حكم مبارك لم تختص الرجال وحدهم بل لحقت بهم وبالنساء والاطفال

وحتى الحجر نفسه قد أن من ظلمه وظلامه ، وحكاية أن يتحول المجتمع كله الى مجتمع رجالى يناقضها

المنطق والعقل و أيضا ممارسات و أفعال من ينتمون الى المذاهب السلفية وغالبيتهم ينحدرون من الأصول

الريفية ، أفيجسر أحدهم بان ينادى فى قريته بتحريم نزول المراة للعمل فى حقول الأرز وزرع الشتلات

والذى يستلزم رفع الملابس حتى الخاصرة لأن منسوب مياه الرى فى حقل الأرز يكون مرتفعا !!!

أيجرئ أحدهم ان يمنع والدته او أمه من النزول للمدينة لبيع الخضر والفواكه وذلك لتوفير الطعام له

ولغيره !! ، أيقدر أيامنهم من أبناء الاحياء الفقيرة والمهمشة أن يمنع والدته أو أخته أو حتى زوجته

من الذهاب للعمل وركوب المواصلات المزدحمة والتعرض للمضايقات أثنائها !!

أن النظام الحاكم فى مصر أطبق على الجميع بانيابه الحادة ولم يجعل للمرء من خلاص سوى البحث بأى الطرق

عن فرصة عمل شريفة يتقوت منها هو و أبناؤه ، طال الهم والفقر معظم افراد الأسر المصرية فى تلك الفترة

ومازال وخرجت المراة المصرية الفقيرة تكافح فتجدها تارة تقف فى بوفيه المصالح الحكومية وتارة اخرى تقف

على ناصية شارع تبيع الطعمية والبطاطس المقلية للزبائن معرضة نفسها لخطر زبانية شرطة المرافق

هل سعى احدا من هؤلاء الذين يمتهنون عمل المراة لمساعدتها ومد الايدى لرفع الظلم والمهانة عن كاهلها

لم يحدث ولن يحدث ... مجرد كلام ظاهره الشرع وباطنه الانانية .

[ذهبية]

استحالة تفصل اى انثى سواء متزوجة او غير متزوجة عن الوطن باكل ابعادة و تغيراتة و ثوراتة

انا لا ارى اى دخل لزواج المراءة بانتمائها لوطنها و احساسها بكل نبض فى الامة

هى يعنى البنت اللى ليها احساس و الزوجة لا

انا ارى عكس هذا تماما

بالعكس الزوجة اللى حتى لم تخرج بنفسها مش هى دى الىل قاعدة شايلة مسئولية الراجل و الست فى البيت فى غياب جوزها و هو فى التحرير او اى مكان تانى

مش هى دى الست اللى اترملت بدرى و هى شابة و جوزها ساب لها حمل تقيل قوىىىىى لوحدها تربى عيالها و تقول لهم ابوكم مات شهيد

مش هى دى الست اللى مات ابنها ربت و كبرت و تعبت لما جة وقت الحصاد راح منها ابنها فى غمضة عين قدمها

مش هى دى الست اللى كانت بتحلم يكون ابنها اللى يوصلها و يكون عكاز لها هى اللى بتوصلة و تبكى و تبتسم فى نفس الوقت ان ابنها مات شهيد

لااااا واالف الف لا

الست و البنت و الام و الزوجة كلهن مضحيات بالعزيز و الغالى من اجل الوطن

لا يفرق فيها بين رجل و امراءة

كلهن سواء

و الكل بيدفع ضريبة الحرية

والكل فرح والكل حزن و الكل شارك

الكل دة اسمة شعب مصر

الكل دة اسمة وطن

[fatfouta]

التلاتة دول بحس ان عندهم فراغ عاطفي

حبوا انهم يملوه بالسياسي

وحاسس ان قريب هيخرجوا من اللعبة لا حصلوا سياسي ولا حصلوا عاطفي

يعنى كده بقى يا سمبا اى شاب مش متزوج يبقى نزل ووقف المظاهرات عشان عنده فراغ عاطفى برضو؟؟

يبقى ليها حق بقى المراة لما تعمل مظاهرة مليونية تطالب بحقوقها

يعنى الثورة قامت ومافيش فايدة برضو نظرتنا للبنت اللى مش متزوجة انها عانس ودماغها فاضية وعاوزة اى حاجة تشغلها وخلاص

كانوا بيتكلموا على المطالب الفئوية فى احدى البرام التليفزيونية وواحدة اتصلت قالت انا ليا مطلب فئوى مع انى متزوجة يعنى بس معلش اسمعونى

قالت انا نفسى بعد الثورة الناس تغير نظرتها للبنت العانس والست المطلقة....رد عليها المذيع وقالها عندك كل الحق

معنى كده ان الست المتزوجة بقى مالهاش فى السياسة ومش وطنية ومالهاش غير فى الطبيخ والغسيل وبس وخليها بقى فى المطبخ احسن

اتغيروا بقى دى الثورة قامت وانتوا لسه دماغكم اللى فيها فيها

وانت يا سى تيمور يا اللى كل شوية استنوا لما اكلم انجى اسألها...ماتعملناش حجة يا سيدى :closedeyes:

تم تعديل 13 مارس 2011 بواسطة fatfouta

[م تيمور المراغي]

س

ك

ر

:happy:

[عصام أبوالفتح]

ثم تساؤل لِم لم يقم الأمن بتزويجهن؟ و ساعتها كان هيرتاح من وجع الدماغ اللي عاملينه!!!!!؟

التساؤل مرفوض وقلة أدب أصلاً زى ما قالت مصرية مغتربة .. واهانة للبنات دول وغيرهم ممن شاركوا بالثورة .. هما معيز عشان الامن يزوجهم ؟

[Ahmed Anwer]

هو اي حد عايز يبقي ثورجي يلبس الغترة الفلسطيني دي

:blink:

عارف يا افندم لو قولتلك سبب لبس الثوار للبس غتره أو كوفية ايه ؟

هتزعل اووي علي حالنا قبل الثورة

الغتره أو الكوفية للحماية أثناء الضرب علي القفا ،، و لا مؤاخذه ،،

زي الجواكت التقيلة للحماية من الضرب بالعصا علي الظهر ،،

بخصوص الفتيات الغير متزوجات

ما الشهيدة سالي زهران كانت متجوزة و عندها ابن كمان

و حسب كلام شفته علي الجزيرة إنها ماتت من الضرب بالشوم ،، و إنهم لموا اجزاء جسدها المكسر

نافيين راوية والدتها

[لماضة مصرية جدا]

السلام عليكم و رحمة الله و بركاته

قريت التوبيك ده النهاردة أول مرة....و فوجئت من الربط الامني البوليسي بموضوع الزواج

وجهة نظري الخاصة التي لا الزم بها احد

انها الرغبة المحمومة في تشويه كل ما هو جميل

عندي قناعة ان ما كان ينقصنا في مصر هو ثقافة الجمال.....مش بس شوارع نضيفة و مباني جميلة.....لا ازاي عقلنا يحلل كل الامور بمنطق بيحث يري فيه شيء جميل

للاسف....الفكرة اللي ربطت بين عدم زواج البنات و حالة الفراغ.....هي جزء من منظومة القبح اللي غرقانين فيها

جزء من السلسلة الجاهزة اللي بيتحط فيها الولد قبل البنت...و بتبتدي بكلمة ذاكر....خش كلية (هندسة او طب).....اتخرج....اتجوز

و اي اختلال في اي حلقة من حلقات السلسة اللي معرفشي مين فرضها قالب جاهز ع البشرية يعني....زلازم اللي يفلت منها لازم تطوله نظرية القبح دي

نظرية القبح تعالي اسمعيها.....مقترنة بعبارة..."يا عيني"

لو البنت جميلة......يا عيني.....ما هي حلوة اهه

لو البنت راقية....يا عيني......ما هي مش لاقية حد كويس

لو البنت سعيدة و راضية بحياتها.......يا عيني اصلها بتداري

لو البنت اشتغلت في عمل تطوعي عشان هي اتربت علي ده......يا عيني اكيد بتدور علي عريس بس بطريقة جديدو

لو البنت انخرطت في اي عمل سياسي.......يا عيني اصلها عندها فراغ و عايزة تملاه....(و بعدين فراغ ايه اللي يتملي عن وجود كائن انساني....بحالة عشق للوطن)

لو البنت كتبت شعر....يا عيني......أصلها عايشة حالة......يالا مش هنفرح قريب....(طب مش يمكن هي كده فرحانة)...او يجي اي بني آدم انسانيا هش يتخيل انها صيدة سهلة

لو البنت معملتشي و لا حاجة من اللي فوق دولم و رضيت انها تموت اكلينيكيا......و عقليا و روحا......يا عيني....احنا عارفين انتي بختك قليل كده ليه

اهي نظرية..."يا عيني" ....جك قلع عينك ياللي بتقول كده...(و آسفة في اللفظ).....هي تجسيد حي لكل مفردات القبح اللي عايشين فيها

و بلاش ننسبها للثروة....هي الثورة هتعمل ايه و لا ايه

الثورة زي ما بتفجر ملفات الفساد.....كمان بتعري حالة "القبح في الافكار"

الثورة مش بس ميدان تحرير...لو متغيرناش من جوانا و اتغيرت مفردات القبح اللي فعلا..."يا عيني" عمت عينينا ان احنانفتكر ان

عشق الوطن...حالة استثنائية غير حالة عشق الرجل...فيه رجل ممكن يكون وطن....بس مش ممكن كل الوطن نختصره في "رجل"

ايماني بمبدأ اني لازم انزل السفارة دلوقتي......و من ورا اهلي.....و لما روحت ملقتشي غير احمد.....محاط ب 3 بنات زيي

ساعتها مبصتشي ان "احمد"....ده منتهي الرجولة.....و لا البنات.....اللي كان متواجدين منتهي الانوثة

ساعتها مبصتشي انت في البطاقة مكتوب ايه...متجوز و تعول و لا مستني و لا محبط...و لا متنيل علي عينك

ساعتها مفكرتش احنا مين و لا فين....ساعتها كلنا كنا بنقول

"ياعيني "....

بس مش علينا......

مش علي ريهام.....

و لا علي احمد..

.و لا علي بسنت..

.و لا علي اروي

يا عيني علي مصر اللي كنا خايفين تضيع مننا و احنا في قارة تانية...و حسينا ان الغربة خلاص موتتنا ببطء

و احساس الغربة خنقنا و نزلنا الشارع....

يمكن معملناش حاجة.....و زي ما روحنا زي ما جينا

بس كنا واقفين في كتف بعض

و ماخدناش بالنا ان اللي ف كتفي ده ولد.....و انا "يا عيني" بنت

الثورة اللي عرت الفساد.....اهي بتعري القبح

و زي ما احنا كرهنا الفساد.....و هنحاربه

هحارب القبح

مؤمنة بثقافة الجمال.....مؤمنة ان الفكر لازم يكون جميل

و غير كده

يبقي معنديش غير اقول....."يا عيني" مصحوبة بمصمصة شفايف

تحياتي

[aimen]

انا اسف بس

الموضوع دا كل ما اشوفه احس ان المفروض ينقل

الى موضوعات خفيفة :closedeyes:

تقبلوا تحياتى

[لماضة مصرية جدا]

التلاتة دول بحس ان عندهم فراغ عاطفي

حبوا انهم يملوه بالسياسي

وحاسس ان قريب هيخرجوا من اللعبة لا حصلوا سياسي ولا حصلوا عاطفي

السلام عليكم و رحمة الله و بركاته

استاذي الفاضل

ممكن سؤال لو سمحت

هو حضرتك عرفت منين ان عندهم فراغ عاطفي......يعني حضرتك تعرفهم...."عاطفيا" قبل كده بشكل يدعو افتراض ان عندهم فراغ او امتلاء عاطفي

و هو حضرتك تعرف انهن كانوا رايحين التحرير عشان حبة سياسة و معاها حبة عواطف و ضربوهم في الخلاط و كتروا الدقة علي الوش

و بكده هما روحوا بالانتصار السياسي بس يا حرام لسه فيه حالة خواء عاطفي.....و طبعا جالهم حرقان من موضوع الدقة

معترضة علي فكرة حضرتك

حكمنا علي شخص منعرفوش......و افترضنا كمان انه خسر و لا كسب...بمعيار مين....و بمنطق مين

"احساس" حضرتك مش في محله

و ليك مني كل التحية

[لماضة مصرية جدا]

انا اسف بس

الموضوع دا كل ما اشوفه احس ان المفروض ينقل

الى موضوعات خفيفة :closedeyes:

تقبلوا تحياتى

السلام عليكم و رحمة الله و بركاته

ليه موضوع خفيف يا استاذ ايمن؟؟؟

انا وجهة نظري ان ده نوع من الثورة

الثورة في الافكار اللي لازم تتغير

مش ع البنت بس

ع الولد كمان

خلاص مبقاش نستحمل اي قالب حديد جاهز نتصب فيه و نخش الفرن نطلع كيكة

الارض خصبة دلوقتي.....و عفية و لازم نبتدي نزرع فيها زرع نضيف...مش نجيب الدمامل الفكرية و نبتها و نستني بشرة الوطن تطلع صافية بعد 5 سنين قدام

الوقت اللي روحنا فيه بتتطهر لازم نرسم طريقنا بنفسنا....لازم نؤمن بنفسنا لاكتر.....لازم نصدق ان احنا مش حد تاني هيدير حياتنا

مش الثورة...قالت الشعب يريد

كمان احنا في بيوتنا....لازم نتعلم ده

الولد يريد

البنت تريد

البني آدم لما يريد...محدش يقف في وش ارادته و محدش يحكم عليه ان عنده اجندة مستخبية....و محدش يفتكر انه ناصح و فاهم اللي قدامه لمجرد انه عرف عنه معلومات هشة و تفضل مشكورا بني عليها حكم اكثر هشاشة

في الزراعة بيقولك احنا لازم ...."نهوي" الارض

و بيفضل يجيب اللي تحت فوق و اللي فوق تحت عشان الارض تتنفس

مصر كده دلوقتي

عقولنا كده دلوقتي

لو ما "هويناش".....الارض صح

هيفضل فيه ديدان تحتيها و اي زرعة هتطلع مشوهة

و كفاية كده

خلينا نزرع بجد

عشان الارض.....برجالها ببناتها بكل ما فيها عفية و هتدي بجد

تحياتي

[aimen]

مافهمتينى يا انسة ريهام

موضوع خفيف نضحك عليه لمدة ثوانى وينتهى لأنه السؤال نفسه غير عقلانى فى رأيى ...وبيختصر ما حدث فى حاجه صغيرة جدا

بقى نوارة واسماء واسراء عندهم فراغ عاطفى وكان المفروض اننا نجوزهم علشان يهمدوا وما يهيجوش الناس ويعملوا ثورة

طيب

والمستشارة نهى الزينى

وبثينة كامل

وجميلة اسماعيل

ونوال السعداوى ( مع اختلافى مع افكارها )

وجيجى ابراهيم

وزنوبيا ( مصدرى الأفضل والأول للتحليلات السياسية على الانترنت )

وكريمة الحفناوى

وغيرهم كثير ممن لم يظهروا على الشاشة

كل دول عندهم فراغ عاطفى

انا شايف اننا احنا اللى كان عندنا فراغ عاطفى وتبلد اخلاقى

احنا اللى كنا وصلنا لمرحلة اليأس العاطفى

اما هم

فأوجه لهم الف تحية وتحية

واقول جميلكم على رأسى من فوق

كسرتم كل الأفكار النمطية عن الشباب

واححيتم الأمل فينا وحسستونا باهميتنا

شكرا لكم سيدات مصر