إخواني المغتربين..بعد ما حدث..متي العودة؟؟

[Alattar]

بسم الله الرحمن الرحيم

عزيزي المغترب .. عزيزتي المغتربة - (شغل اعلانات فاشلة)

أولا : ..كان فيه موضوع قديم في باب المغتربين يحمل اسما مشابها

و الآن قررت أن أفتح نفس الموضوع و لكن بعد الأحداث الماضية..و بعد الثورة التي بدأت في تطهير البلاد من

آثار الفساد الذي كان أكبر سبب في مغادرة معظمنا لبلادنا الجبيبة مصر

و الخروج من البلد من أصعب الأشياء علي الانسان..و ربنا سبحانه و تعالي يقول في سورة النساء

"ولو أنا كتبنا عليهم أن اقتلوا أنفسكم أو اخرجوا من دياركم ما فعلوه الا قليل منكم"

قال أحد العلماء في تفسير هذه الآية..جعل الله الخروج من الدار مثل قتل النفس لما فيه من المشقة

و يعلم الله سبحانه و تعالي أننا ما كنا لنترك بلادنا الا بعد ما رأينا فيها ما رأينا

ثانيا : أنا كتبت الموضوع ده في باب موضوعات جادة متعمدا و ليس في باب المغتربين لأن قسم المغتربين

ممكن ما يدخلوش ولا بيهتم بيه غالبا الا المغتربين .. لكن هنا ممكن أي حد يدخل و ممكن واحد يكون ناوي

علي السفر أو الهجرة مثلا..و يدخل هنا يستفيد برأي ما..

المهم..الآن..و بعد ما حدث من أحداث..متي تنوي العودة؟؟

و ما هي المعايير التي تقيس عليها الظروف في مصر حتي تستطيع أن تقرر متي العودة؟؟

يعني بالبلدي كده..ايه هي الحاجات اللي انت بتقول في نفسك..لو حصل كذا كذا..أنا هنزل ان شاء الله في أقرب فرصه؟؟

و الناس اللي كانت ناوية تهاجر و ما ترجعش تاني..ياتري لسه برضه عندكم نفس الفكر..ولا في احتمال انه يتغير؟؟

أنا عن نفسي..قدامي ان شاء الله مش قبل سنة لظروف شخصية..و برضه فيه ان شاء الله كورس بخطط اني آخده في خلال الست شهور

القادمة..و بعد كده و بناءا علي الأحداث في مصر..نقدر نقرر بإذن الله

وفق الله الجميع لما يحبه و يرضاه

[Alattar]

الموضوع ده كنت كتبته يوم 19 فبراير..بعد التنحي ب 8 أيام

كنت متخيل وقتها..زي كتير غيري ان البلد خلاص نضفت و ننا هنبدأ مرحلة جديدة..لكن واضح اني اتسرعت شوية في التفكير ده..

طبعا أنا ما نزلتش مصر من ساعتها عشان أحكم بنفسي..لكن طبعا من الأخبار اللي بنقرأها كل يوم..و من أراء بعض الأخوة اللي راحوا مصر الفترة اللي فاتت..نقدر نقول..ان لسه شوية كتير علي ما نفكر في موضوع زي ده

ياخسارة..والله كان عندي أمل اني أرجع بسرعه..لكن..الحمد لله علي كل شيئ..وما حدش يعرف الخير فين

[ViralMind]

شوف.. الاخبار فيها مبالغة كبيرة.. و القرائة من عالنت غير كافية لفهم الوضع فى مصر.

الوضع اتغير حاجة بسيطة.. مش التغيير اللى احنا فعلا عايزينه و نقبل بيه..

دلوقتى مفيش ظابط يجرؤ انه يقل ادبه على مواطن.. يبقى شىء نادر جدا لو حصل..

مفيش موظف يجرؤ يلمح برشوة... حصلت معايا مرة و بستفته و مسحت بيه البلاط قام اتكسف و حس و قلب الموضوع هزار.

بصفتى ههاجر بعد كام شهر ان شاء الله.. انا شخصيا قررت انى مش هرجع مصر تانى و ده قرار نهائى.. و كمان احتمال كبير انى هقطع الباسبور بمجرد ما استلم كارت الاقامة فى ايدى, و ارجو ان محدش يزعل من الكلام ده.

القرار ده قديم و فضلت مستنى حوالى سنتين على ما تأشيرة الهجرة وصلت.. بس تأكيدى عالقرار ده بيزيد يوم بعد اليوم.

مصر مش هتتغير.. لان احنا مش محتاجين نسقط نظام.. احنا محتاجين نسقط شعب.

[نورالعين]

يؤسفنى ان اقرا هنا قمة الانانية

ان كنتم تهربون من مصر في ازمتها فلا تبحثوا عنها يوما

لانها ستتغيرحتما وخاصة عندما يغادرها من لا يحترمها

[ViralMind]

يؤسفنى ان اقرا هنا قمة الانانية

ان كنتم تهربون من مصر في ازمتها فلا تبحثوا عنها يوما

لانها ستتغيرحتما وخاصة عندما يغادرها من لا يحترمها

ما هو الكارثة يا افندم انها مش هتتغير...

هجومنا على مصر لا يعنى الكراهية او قلة الاحترام.. العكس تماما.. ده من غيرة الواحد على بلده و ضيقه انها تكون بالشكل ده.. اما لو كانت زى اى بلد تانى, ولا يفرق معايا اللى يحصل فيه.. و انا احرق دمى ليه؟

هى مش انانية.. و لكن من حقنا بقى نرتاح شوية..

فيه ناس تقدر تعيش فى مصر.. و فيه ناس ماتقدرش.. مش كل الناس عندهم نفس القدرات.

بالنسبة لموضوع انها تبقى احسن و منرجعش.. هههههه ماشى لو دى التضحية اللى انا هعملها, معنديش مانع بس مقابل انها تبقى احسن فعلا :closedeyes:

كلام حضرتك بيفكرنى بمناقشة موجودة هنا عن فوايد الباسبور الكندى.. و كنا خايفين احسن مصر تبقى احسن و الحال ينقلب و كندا تبقى وحشة :lol: و المفارقة ان الكلام ده كان قبل الثورة.

تم تعديل 14 سبتمبر 2011 بواسطة ViralMind

[ahmos1]

http://youtu.be/e47UA_O3gA0

كلامكم قاسى جدااااااااااااااا اقطع الباسبور استحاااااااااااااله

[عماد حمدي]

ViralMind

عايز أقولك أني كنت بكره البلد دي كره لا تتخيلة و لا تتصورة ..

طبعاً كرهي للبلد أقصد بيه ( النظام نفسة ) مش مصر كأرض و وطن عشت و اتربيت و اتعلمت فيه ..

كرهت فيها حاجات كتير الواسطة و الرشوه و قله فرص العمل و عدم تقدير الكفاءات و أعطي الحق لمن لا يستحق و المحسوبيات وووو .. الخ من السلبيات ..

من كتر السلبيات دي للأسف إتعميت و مبقتش شايف أي حاجة إيجابية في البلد ..

كرهتها أوي لذلك أول فرصة سفر جاتلي مفكرتش سافرت ع طول بالرغم من ان الناس حذروني أيامها ان فرصة السفر دي مش كويسة و هتخسر ..

إلا أنه كرهي للبلد كان عامل دفع و مؤثر جداً علي قراري لتركها ..

أقسم بالله العلي العظيم من أول يوم غربة برة مصر ، حسيت بقيمة التراب اللي كنت بمشي عليه

حسيت بقيمه و طعم اللمّه وقت الفرح و وقت الحزن ..

شوفت في البلد اللي مكنتش قبل كدة شايفة شفت كل الإيجابيات اللي كانت موجوده فيها ..

و عارف المفاجأه ؟ إنها طلعت أكتر بكتييييييييير جداً من السلبيات اللي كنت شايفها قبل كدا ..

كقيمة مش عدد ..

و قت الثورة أنا كنت هنا بالإمارات بقيلي كدة سنة و نص منزلتش مصر ..

لما كنت بتفرج ع التليفزيون و بتابع اللي بيحصل .. كنت أموت و أنزل أشارك ..

كل اللي كانوا معايا أقسملك بالله العظيم بيبكوا نفسهم يشاركوا نفسهم يعملوا حاجة ..

ظهر جوانا كلنا حالة غريبة عكس الكره اللي كان ظاهر لينا للبلد ، ظهر قد اية البلد دي جميلة قد اية اننا بنحبها فعلاً قد اية فينا انتماء

لاننا مصريين ..

موضوع رجوعي لمصر ..

حالياً بحسبها بالعقل موضوع تفكيري اني استقر في مصر و لا لا ..

العقل بيقول لأ العاطفة بتقول نعم ..

قرار صعب بس الأرجح هحكم عقلي .

الحالة الوحيدة اللي هفكر فعلاً فيها أني أنزل مصر ..

لما أحس فعلاً ان البلد استقرت و ان الناس و أنا أولهم إتغيرنا من جوانا ..

صدقني ساعتها هنزل و لو هشتغل ب 1000 جنيه هيكفوني و يفيضوا كمان لان ساعتها هكون راضي و مبسوط ..

طولت عليكم ،،

أرق تحيــــاتي ..

[AbkaReno]

قدامي لا يقل عن 10 سنين غربه وهرجع ان شاء الله

يعني هكمل ال 28 سنة بالمملكه مغترب

اهديكم الرابط ده

http://www.youtube.com/watch?v=FAB7JvJMPd4

[ViralMind]

حتى لو هتشتغل بألف جنيه؟ هههههههه والله انتا زى العسل يا عمدة

ما هو انا قلت لك يا باشا ان الموضوع قدرات.. بتختلف من شخص لاخر.

انا بقى مبطيقش جو اللمة اصلا..

الحاجة الوحيدة الايجابية فى مصر هى انها بلدنا.. و لو كانت الايجابيات فعلا اكتر زى ما بتقول, كنت انت اول واحد رجعت.

العقل و المنطق و العاطفة كمان بيحدفونى بعيد قوى عن مصر.. كإن ماليش فيها حد...

بستغرب لما حد يكون رايح كندا و يعمل خطة بديلة انه هيرجع مصر.. طيب هترجع ليه اساسا؟!!

انا رايح ابدأ حياة جديدة يا عم.. اردم بقى على كل اللى فات.. كفاية قوى لحد كده اللى شفناه فى مصر.

انا عايز اوصل الاربعينات و انا سليم صحيا و نفسيا... يا راجل يا طيب ده تلات تربع الشعب اللى سنهم فوق الاربعين عندهم ضغط و سكر و قلب..

انا مؤمن انى استحق حياة كريمة, و مش هضيع ثانية واحدة فى مصر.. و لو عليا كنت سافرت امبارح قبل النهاردة..

[نورالعين]

فايرال مايند

كنت غاضبة مما كتبت ولكن بعد ما قرات لك المزيد اصبحت حزينة من اجلك

اريدك ان تعلم شيئا

ليس كل من يقدر ان يعيش على ارض مصر يقبل بذلك لانه يقبل الهوان الذل

هناك الكثير بل قل الاغلبية من الاغنياء وميسوري الحال ممن حقق ثروته بكفاحه الشريف ونجح

هؤلاء يفرقون عن غيرهم في امتلاكهم لقدرات التحدى والمصابرة والتفاؤل الى جانب العلم

كون هناك من لم يستطع النجاح هنا فهذه ليست الا مشكلته

البعض يقول هذا نصيبي وانا راض به او حتى غير راض ولكن ليس باليد حيلة

والبعض يطلب السفر والهجرة ليتغلب على مشاكله وهو حل ايضا

صحيح انا لا انكر ان الفساد موجود وهناك من استغله لتكوين ثروات

ولكن عددهم قليل وهم من يتمنون رجوع مبارك

بدليل قلة عدد اسفين يا ريس

وكثرة الثوار والمطالبيين بمحاكمة الفاسدين واستئصالهم من مصر

طريق الهجرة ليس ممهدا بالورود كما تظن

ستجد نفسك مطالبا بكل القدرات التى تعلمتها ولم تتعلمها لتنجح هناك

ولو تدري لو كنت حاولت فقط ان تبرزها داخلك وانت هنا كنت تعديت المرحلة الصعبة في الحياة

كان الله في عونك

[ViralMind]

لا يا افندم.. القضية ليست قضية نجاح او فشل.

القضية قضية حقوق انسان.. جو فاسد لا يطاق.. كرامة تنتهك.. و عدالة قرأنا عنها فى الكتب و لم نرها فى حياتنا قط!

لو عالنجاح و الفلوس.. موجودين و الحمدلله.

بالنسبة للنجاح فى مشوار الهجرة.. فمجرد الخروج من مصر هو قمة النجاح.

[شرف الدين]

شوف يا عطار...

مصر كانت ولا زالت وستظل هكذا ....

مش هتتغير صدقني ... يمكن بعض الناس يعتبرني متشائم أو بعضهم يعتبرني ضد الثورة .. لكن هي دي الحقيقة ... مصر لن تتغير لأن هي دي تركيبة شعبها.

( أنا مش عايز أقولك على أمثلة كتير جدا جدا عشان مطولش عليك ).

في سلبيات كتير ... لكن في ايجابيات كمان ...

الفارق بين السلبيات والإيجابيات ... هو إن الإيجابيات هي أشياء غير محسوسة .. لا تشعر بها إلا عند فقدها..

يعني أنا هقولك على حاجة ... العيد الصغير اللي فات ده كان أول عيد أقضيه في مصر من 9 سنين ...........

فعلا رجعت افتكر معناها ايه كلمة عيد .. بعد ما كان العيد بالنسبة ليا هنا في المملكة يوم زيه زي أي يوم..

مصر اجتماعيات يا عطار ... اجتماعيات لا يمكن تلاقيها في أي بلد تانية وبالذات في الخليج.

من ناحية الموارد المالية والدخل والحياة النظيفة ... لا يمكن مقارنة مصر مع أي دولة بالخليج .. أي مقارنة ... مصر تخسر..

لكن من ناحية الحياة كحياة .. كناس تكلمهم ويكلموك .. ناس تسأل عنهم ويسألوا عنك .. أصحاب تزورهم ويزوروك ... مصر تكسب من أول جولة ...

وأنا زمان قريت كتاب لمؤلفة أجنبية عن حالة العاملين الأسيويين في المملكة .. كان فيه جملة معبرة جدا ...

( إنهم على قيد الحياة لكنهم لا يعيشون ).

عشان كده يا عطار .. حط في دماغك .. أنك لازم تنسى الخليج لو عايز ترجع مصر .. وصدقني والله الحياة في مصر مش صعبة قوي زي ما ناس كتير متخيلة.

يعني في عز البلاوي اللي في مصر بعد الثورة دي إلا إن الناس عايشة حياتها تالت ومتلت.. ومفيش أي مشكلة .. لكن كل ما هنالك إنهم اتعودوا على الحياة في مصر.

والغربة في النهاية رحلة قصيرة مهما طالت.

[سميرة ابو السعود]

في تعليقات هنا استفزتني جدا وكانت سبب دخولي للتعليق

انا احب اقول للناس اللي بتقول (مصر مش حتتغير )ما تنسوش انه الفساد اللي اتزرع في مصر اتزرع من ايام الاستعمار يعني احنا الفساد فينا بأه له 100 سنة علي الاقل ولتغيير الفساد وتوابعه والعادات السيئة التي تجذرت في المجتمع محتاجين سنين طويلة علشان نشعر بتغيير حقيقي في الشعب

وانا متأكده ان كل المغتربين اللي بره مصر او علي الاقل اغلبهم حيرجعوا مصر تاني لان احنا شعب مش من طبيعته الخروج والهجرة من بلدنا زي شعوب تانية احترفت ده من زمان زي اخوانا الشوام مثلا (السوريين واللبنانيين والفلسطينيين) اللي الهجرة من بلدهم في اتجاه اقصي بقاع الارض امر عادي عندهم

احنا كمصريين زي السمك وهجرتنا من مصر كانت لظروف اضطرارية وان تغيرت هذه الظروف او ظهرت بوادر لتغيرها ستتوقف الهجرة من مصر وسيعود غالبية المغتربين بكل خبراتهم وكفائتهم من الخارج لبناء الوطن

اتفائلوا خير وياريت يكون عندنا ثقة في النفس اكتر من كده انا متأكده انه مستقبل مصر القادم حيكون كويس إن شاء الله تعالي

[طارق مصرى]

الحقيقة أنا مشتت جدا عين فى الجنة و عين فى النار , بحب جو مصر المشى فى الشوارع ولمه اهلى واصحابى و بالذات فى رمضان و الاعياد اللى طبعا مش لاقى ذرة منها هنا ..

بس لو رجعت اشتغل بكام ؟!! انا عندى اسرة ... عموما لو ربنا وفقنى بشغلانة معقولة الدخل احتمال كبير اقفل هنا فى المملكة

بالنسبة لحال مصر انا عاوز اكون متفائل الحقيقة بس مش عارف ازاى :sad:

[عماد حمدي]

الحقيقة أنا مشتت جدا عين فى الجنة و عين فى النار , بحب جو مصر المشى فى الشوارع ولمه اهلى واصحابى و بالذات فى رمضان و الاعياد اللى طبعا مش لاقى ذرة منها هنا ..

بس لو رجعت اشتغل بكام ؟!! انا عندى اسرة ... عموما لو ربنا وفقنى بشغلانة معقولة الدخل احتمال كبير اقفل هنا فى المملكة

بالنسبة لحال مصر انا عاوز اكون متفائل الحقيقة بس مش عارف ازاى :sad:

تفاءلوا بالخير تجدوه

أنا عند حسن ظن عبدي بي, فليظن بي ما شاء

أنا متفائل

[تقى الله]

موضوع حساس ومكنش ينفع ماعلقش عليه:

اولا فرق شاسع بين مصر والخليج طبعا الناس كلها اتلكمت عن الفرق ده ...ناس غلبت مستوى المعيشه والنضافه والحياه المرتاحه...وناس غلبت الحياه الاجتماعيه الصحيه السليمه وحب الوطن فوق كل شىء

بالنسبه بقا لمصر بعد الثوره :انا شايف ان الحاجه الوحيده اللى اتحققت من اهداف الثوره اننا لاغينا-والحمد لله-التوقيت الصيفى

على فكره مصر محتاجه اكتر من ثوره عشان تتغير ...بس بما انى رئيس جمهوريه المتفائلين انا عايز اوضح ان اللى خلا الناس اللى كنا فاكرينهم ماتوا وعفنوا من تلاتين سنه انتفضوا وشالوا الطاغيه ممكن جدا يعملوا ايه حاجه تانيه.

اللى صعبان عليا بجد ان الناس مبقتش لاقيه الزعيم الملهم القائد اللى يلمهم حوليه...واضح ان مصر اتفرغت من النوابغ الفتره اللى فاتت...وكل اللى فضلوا اتلطوا ومبقش حد نافع خلاص.فى حين ان مصر طول عمرها بتطلع القاده العظام دول من ايام احمد عرابى لحد عبد الناصر باعتباره اخر قائد شعبى فى تقديرى

ساعات اقعد افكر ...مصر دى عشان تتعدل محتاجه ايه؟وافضل الف الف ومعرفش ارد على نفسى...

مطلوب زعيم يحمي الحقوق

يعدل ما بين الناس تمام زي الفاروق

و يكون حنين علي الفقير و علي الفاسد يفتري يهدم علي دماغه الشقوق

و يعلقوا علي المشنقة او يرفعه علي رأس خازوق

مطلوب زعيم ميقلش علي الخواف حكيم

و يكون كمان سمعه سليم يسمع لنبضة قلبنا

و يكون مكانه في وسطنا

ميعش ابداً في القصور و البعض منا للاسف سكانين قبور

يشرب و يأكل اكلنا و يعيش كواحد مننا

يسمع لنا و يشور و يأخذ رأينا

وقت الخطر نتلم حوليه كلنا

و نضحي وياه بعمرنا

مطلوب زعيم علي المسئولية يكون امين

و يكون جرئ و يكون شجاع مش امعة و حتة بتاع

تم تعديل 15 سبتمبر 2011 بواسطة Salwa

[ابو محمود]

من يريد ان يحيا بداخل مصر اهلآ وسهلآ ومن يريد ان يتركها الباب يفوت جمل مصر تحتاج الى ابناءها شيء واجب مصر ترفض الاحسان والتعالى من ابناءها شيء اكيد

هنا من ضحى داخل البلاد ولم يتركها دة اكيد هنا من استغل اهلها وبرطع فى الفساد دة اكيد هنا من يتوق الى الخروج منها دة اكيد هنا من يلعن يوم ولد فيها دة الاكيد

رزقنا الله نعمة التذوق والاحساس والأنتماء لكن هذة النعم مختلفة نسبتها عند الجميع

مصر غنية بابنائها من يسهرون لحمياتها ويضحون من اجلها مصر اكبر من اختزلها فى موضوع مصر كبيرة جدآ واللي يعرف قيمتها من يعشقها والعشق درجات

مصر كانت تعانى وتصرخ فلم يسمع انينها الا من احبها فمنهم من غضب وهجرها حبآ ومنهم من مات كمدآ ومنهم من صبر لقد نالت مصر منا الكثير من الالم فهل تحنو عليها ولا تضعوها فى ميزان مصلحتكم مصر اكبر منا انها مصر من لا يعرف قيمتها قلبة قاسى ومن يقتلها او يؤذيها فهو من لا قلب لة مصر تحتاج الى ابنائها الاحرار الذين يمنحوها ارواحهم ولا يبخلون عليها فى اي ميدان ان الرحلة قصيرة مهما طالت فأحذرو ان يفوتكم تضحية لمصر

مصر الان تخطو الى الامام مصر تنفض غبار سنين عجاف فمن كان يريد الارتماء بحضنها سيجدها الحنونة وارض المحبة مصر فى حالة مخاض عسير يكسو وجهها الجميل الام مخاضها انظرو اليها بعد ان تفيق قيموها كما شأتم لكنها المعشوقة الحانية يقتلونها فلا تحرمهم من حبها انها الام الحنونة

فكفى طعنات انها لا تستحق ان مصر ستشفى باذن الله وعندما تقوم من الام المخاض لن تكون الا مصر المتسامحة التى انعم الله عليها فكانت ارض سلام للجميع حاضنة للجميع من يكرهها ومن يموت حبآ فى ترابها

[طارق مصرى]

الحاجة الوحيدة الايجابية فى مصر هى انها بلدنا.. و لو كانت الايجابيات فعلا اكتر زى ما بتقول, كنت انت اول واحد رجعت.

العقل و المنطق و العاطفة كمان بيحدفونى بعيد قوى عن مصر.. كإن ماليش فيها حد...

بستغرب لما حد يكون رايح كندا و يعمل خطة بديلة انه هيرجع مصر.. طيب هترجع ليه اساسا؟!!

انا رايح ابدأ حياة جديدة يا عم.. اردم بقى على كل اللى فات.. كفاية قوى لحد كده اللى شفناه فى مصر.

انا عايز اوصل الاربعينات و انا سليم صحيا و نفسيا... يا راجل يا طيب ده تلات تربع الشعب اللى سنهم فوق الاربعين عندهم ضغط و سكر و قلب..

انا مؤمن انى استحق حياة كريمة, و مش هضيع ثانية واحدة فى مصر.. و لو عليا كنت سافرت امبارح قبل النهاردة..

بص يا عم

انا مش حقولك مصر هى امى و مشربش من نيلها , لان مشاعرك دى ان مريت بيها فى فترة المراهقة , بس حبيت أقولك إن الحياه مش بس اكل وشرب جيدين و مواصلات مريحه و حكومة محترمة...الخ

طبعا دى حاجات فى غاية الاهمية لا خلاف عليها و لكن فى حاجات تعرفها للما تتغرب ,أحاسيس متتحكيش ربما متكنش واخد بالك منها دلوقتى

و بعدين خد بالك الحياه هناك مش جنة زى ما انت فاكر .. انا طبعا مرحتش كندا او دول غربية من قبل لكن قريت وسمعت , الشغل هناك يعنى شغل و اذا كنت متبحش اللمه فمؤكد إنك بتحب التراحم و الالفه و ستفتقدها هناك و لو كونت عيله ربنا يعينك و تربيهم على دينا و عادتنا .

و نصيحة اخيرة ..خد بالك من قرفك وكرهك للحياه فى بلدنا و حبك و تعلقك بالعيش بالخارج ربما يؤثر ذلك فى المستقبل على دينك و اخلاقك و قيمك زى ما أثر على اخرين.

[عنبو]

انا عاوز اتكلم على جزئيه بس دلوقتى وهى انك بتسمع الاخبار من القنوات الاخباريه او الانترنت والكلام ده خطر جدا وفيه مبالغه كبيره قووووووى انا لسه راجع من مصر مكملتش اسبوع وكل الى قعدتهم فى مصر تسع ايام قضيتهم فى الشارع مابين اسنكدريه والشرقيه وطول ما انا ماشى بالعربيه مستنى حد يطلع عليا علشان يقلبنى وياخد منى العربيه ملقتش حد مع انى كنت سايق بالليل قولت طيب ندخل بقى على الناس عادى الناس عاديه والحياه طبيعيه جدا بس الحاجه اليى انا حسيت بتغيرها بجد ان الناس مبقتش بتخاف ودى حاجه مهمه قوى وفيه امل عند الناس ان بكره احسن ان شاء الله

من الاخر الاعلام بيهول الحاجات بشكل مفزع يحسسك انك هتنزل مصر هتتخطف او تتسرق والله وانا جاى من المطار كل شويه اقول لزوج اختى هيه هنتسرق امتى يقول اصبر شويه مش دلوقتى لحد ما وصلنا البيت

اما بالنسبه للتغير اليى الناس بتتكلم عليه فمعتقدش انه هيحصل من يوم وليله ولكننا بدأنا الزحف نحو الطريق اليى التغير ممكن الزحف ده يطول او يقصر ولكن الاهم اننا بدانا فى التحرك نحو التغير

تحياتى

عنبو

[Alattar]

بصراحة ما كنتش متوقع ان الموضوع كبر للدرجة دي..وبصراحة الردود كتير بس أنا هحاول أقول اللي عندي

أنا أول مرة سافرت بره مصر كان من 2005 ..كنت رايح طرابلس أشتغل محاضر حاسب آلي و مواد برمجة..وكنت وقتها عندي 22 سنة..كنت قرفان جدا من كل حاجة في البلد..و ما كانش فيها حاجة عجباني..جلست في طرابلس حوالي سنة و 9 شهور..وبعدين جيت السعودية من حوالي 4 سنين..

تقريبا..كل أجازة كنت بنزلها مصر..كنت بنزلها مش بغرض الأجازة..لأ..بغرض اني نازل نهائي و مش راجع تاني..لا تتخيلوا كنت حاسس اني بحبها أد ايه و أنا بعيد..لدرجة اني كل مرة كنت بنزل..كنت بصفي حساباتي المالية هنا مع الشركة..و كنت بصفي الشقة بتاعتي و أبيع العفش..و أقرر اني نازل نهائي خلاص..

بس للأسف..بعد ما بنزل بشوية..و أحاول أسافر مثلا أي مكان..و أشوف اني ممكن مثلا أقف ثلاث ساعات مستني ميكروباص..أو أركب قطار و طبعا هفضل واقف طول الطريق..كنت بحس بإهانة..أنا ممكن أستحمل لو اني عارف ان دي أجازة و راجع تاني...لكن لما أتخيل ان دي هتبقي حياتي لو استقريت في مصر..واني كل يوم ممكن أقف أستني الميكروباص ساعتين..أو أركب القطار و أفضل واقف علي رجلي لمدة ساعة مثلا..ده طبعا كان بيخليني أصرف نظر تماما عن فكرة الاستقرار فيها

بجد الموضوع مش أنانية..بس أنا زي ما طارق قال..راجل عندي أسرة..و عليا التزامات..لو نزلت مصر عشان اللمة الحلوة و الاجتماعيات..ما أعتقدش اني هعرف أستمتع بالحاجات دي..لأني مش هكون موجود في البيت أساسا الا نادرا جدا..

أنا برضه عندي مشكلة خاصة شوية..وهي اني من بنها..ودي اللي فيها شقتي و فيها بيت والدي..و أهل زوجتي كمان..و طبعا الشركات كلها متركزة في القاهرة غالبا..عشان كده لازم يبقي فيه كل يوم سفر..وبهدلة..حسبتها بيني و بين نفسي..لقيت اني لازم أطلع من البيت الساعة 6.30 صباحا..علي ما ألاقي ميكروباص..و أسافر..يادوب أوصل الشغل الساعة 9 صباحا..

الشغل بينتهي الساعة 5 مثلا..يبقي تقريبا هوصل بيتي الساعة 8 أو 9 مساءا..و طبعا لازم أنام بدري عشان هصحي من الفجر...فحسيت اني مش هعرف أعمل أي حاجة في حياتي..

و الحياة كلها هتبقي يا إما في الشغل..أو في الشارع بين المواصلات..

كان الحل اني أحاول مثلا أشتري عربية..بس بصراحة ماجربتش قبل كده اني يكون عندي عربية في مصر عشان أعرف هل هتوفر عليا وقت ولا لأ..أول عربية جبتها كانت هنا في السعودية..

الموضوع معقد شوية..و بيحتاج تفكير عميق..ودراسة بالورقة و القلم..عشان نقدر نحكم

أنا عن نفسي..أقسم بالله..نفسي أنزل النهاردة قبل بكره..بس أنا مش لوحدي..أنا دلوقتي معايا أسرة..مش عاوز أبهدلهم معايا عشان عاطفة موجودة عندي مش عارف أسيطر عليها

بإنتظار بقية الأراء

تم تعديل 15 سبتمبر 2011 بواسطة Alattar