إخواني المغتربين..بعد ما حدث..متي العودة؟؟

[عبد الله غريب]

http://www.youtube.com/watch?v=JzQ9o5mL-aE

و انا متفـــــــائل

تم تعديل 17 سبتمبر 2011 بواسطة عبد الله غريب

[Alattar]

أعتذر عن إهمال الموضوع..و عدم الرد علي الأخوة الأفاضل الذين تفضلوا بوضع بعض الردود

شوف يا عطار...

مصر كانت ولا زالت وستظل هكذا ....

مش هتتغير صدقني ... يمكن بعض الناس يعتبرني متشائم أو بعضهم يعتبرني ضد الثورة .. لكن هي دي الحقيقة ... مصر لن تتغير لأن هي دي تركيبة شعبها.

( أنا مش عايز أقولك على أمثلة كتير جدا جدا عشان مطولش عليك ).

في سلبيات كتير ... لكن في ايجابيات كمان ...

الفارق بين السلبيات والإيجابيات ... هو إن الإيجابيات هي أشياء غير محسوسة .. لا تشعر بها إلا عند فقدها..

يعني أنا هقولك على حاجة ... العيد الصغير اللي فات ده كان أول عيد أقضيه في مصر من 9 سنين ...........

فعلا رجعت افتكر معناها ايه كلمة عيد .. بعد ما كان العيد بالنسبة ليا هنا في المملكة يوم زيه زي أي يوم..

مصر اجتماعيات يا عطار ... اجتماعيات لا يمكن تلاقيها في أي بلد تانية وبالذات في الخليج.

من ناحية الموارد المالية والدخل والحياة النظيفة ... لا يمكن مقارنة مصر مع أي دولة بالخليج .. أي مقارنة ... مصر تخسر..

لكن من ناحية الحياة كحياة .. كناس تكلمهم ويكلموك .. ناس تسأل عنهم ويسألوا عنك .. أصحاب تزورهم ويزوروك ... مصر تكسب من أول جولة ...

وأنا زمان قريت كتاب لمؤلفة أجنبية عن حالة العاملين الأسيويين في المملكة .. كان فيه جملة معبرة جدا ...

( إنهم على قيد الحياة لكنهم لا يعيشون ).

عشان كده يا عطار .. حط في دماغك .. أنك لازم تنسى الخليج لو عايز ترجع مصر .. وصدقني والله ا

لحياة في مصر مش صعبة قوي زي ما ناس كتير متخيلة.

يعني في عز البلاوي اللي في مصر بعد الثورة دي إلا إن الناس عايشة حياتها تالت ومتلت.. ومفيش أي مشكلة .. لكن كل ما هنالك إنهم اتعودوا على الحياة في مصر.

والغربة في النهاية رحلة قصيرة مهما طالت.

بصراحة يا عم شرف..أنا مش عارف أقوللك ايه..أنا عارف ان فيه سلبيات كتير زي ما انت قلت..لكن..أي مكان في الدنيا فيه السلبيات دي و أكتر..

و أنا عارف ان الناس في مصر عايشة رغم كل الأحداث الصعبة اللي بتحصل قبلب و بعد الثورة..و عارف كمان ان العيشة في مصر مش مستحيلة ولا حاجة زي ما أنا شخضيا كنت معتقد لفترة من الفترات..بس تعمل ايه بأه لما تلاقي الناس اللي في مصر نفسهم بيحذروك .. واوعي تنزل و الكلام ده..و انت في ايدك فرصة كويسة ما تضيعهاش و هترحع تندم و الكلام ده..

طبعا الكلام ده لما تسمعه من ناس جوه مصر..أكيد هتقلق..و هتبقي متردد جدا..و هيبقي القرار عامل زي عملية الولادة المتعسرة..

[Alattar]

الحقيقة أنا مشتت جدا عين فى الجنة و عين فى النار , بحب جو مصر المشى فى الشوارع ولمه اهلى واصحابى و بالذات فى رمضان و الاعياد اللى طبعا مش لاقى ذرة منها هنا ..

بس لو رجعت اشتغل بكام ؟!! انا عندى اسرة ... عموما لو ربنا وفقنى بشغلانة معقولة الدخل احتمال كبير اقفل هنا فى المملكة

بالنسبة لحال مصر انا عاوز اكون متفائل الحقيقة بس مش عارف ازاى :sad:

انت جيت علي الجرح يا طارق..نفس اللي أنا بحس بيه بالظبط..وزي ما قلت للأخ شرف الدين..قرار الرجوع ده حاجة مش سهلة أبدا..عامل زي العمليات المعقدة كده..

و احنا فعلا هنا مفتقدين الاجتماعيات و العادات اللي اتعودنا عليها في مصر..وكنا بنعتبرها عادية جدا..لكن لما لقينا ان الحاجات دي مش موجودة هنا..الواحد حس بفرق كبير..

يعني مثلا..أنا أهه هتجنن و ألاقي مكان أقضي فيه العيد هنا في السعودية..طبعا لو قضيته في الرياض..يبقي ممكن بدون مبالغة ما أخرجش من البيت طول العيد..

[Alattar]

انا عاوز اتكلم على جزئيه بس دلوقتى وهى انك بتسمع الاخبار من القنوات الاخباريه او الانترنت والكلام ده خطر جدا وفيه مبالغه كبيره قووووووى انا لسه راجع من مصر مكملتش اسبوع وكل الى قعدتهم فى مصر تسع ايام قضيتهم فى الشارع مابين اسنكدريه والشرقيه وطول ما انا ماشى بالعربيه مستنى حد يطلع عليا علشان يقلبنى وياخد منى العربيه ملقتش حد مع انى كنت سايق بالليل قولت طيب ندخل بقى على الناس عادى الناس عاديه والحياه طبيعيه جدا بس الحاجه اليى انا حسيت بتغيرها بجد ان الناس مبقتش بتخاف ودى حاجه مهمه قوى وفيه امل عند الناس ان بكره احسن ان شاء الله

من الاخر الاعلام بيهول الحاجات بشكل مفزع يحسسك انك هتنزل مصر هتتخطف او تتسرق والله وانا جاى من المطار كل شويه اقول لزوج اختى هيه هنتسرق امتى يقول اصبر شويه مش دلوقتى لحد ما وصلنا البيت

اما بالنسبه للتغير اليى الناس بتتكلم عليه فمعتقدش انه هيحصل من يوم وليله ولكننا بدأنا الزحف نحو الطريق اليى التغير ممكن الزحف ده يطول او يقصر ولكن الاهم اننا بدانا فى التحرك نحو التغير

تحياتى

عنبو

والله يا عنبو أنا نفسي ما أصدقش الأخبار اللي بشوفها كل يوم..بس المشكلة انا بنسمع أخبار تانية من أهالينا أحيانا لا تقل فظاعة عن اللي بنقرأه في الأخبار

و برضه هرجع و أقول..احنا طول عمرنا كنا عايشين في انفلات أمني..لأن اللي كان بيمارس البلطجة قبل كده هم بعض ظباط الشرطة..و أمناء الشرطة اللي نفسي أعرف فايدتهم ايه في الحياة

عشان كده..ممكن الموضوع ما يفرقش مع الناس كتير..لكن الواحد بيحس ان الموضوع صعب جدا..لأنك فعلا ربنا كرمك بفرصة أفضل..فموضوع انك تفكر تسيب الفرصة دي و ترجع في ظروف زي دي..الموضوع بيبقي صعب جدا جدا..وخصوصا زي ما قلت قبل كده..ان الواحد مسئول عن أسرة..و القرار مش بمزاجي..ومش هيخصني لوحدي

[ViralMind]

اوعى ترجع مصر دلوقتى بالذات :closedeyes:

خليك هنا خليك.. وبلاش تفارق. :)

[Alattar]

اوعى ترجع مصر دلوقتى بالذات :closedeyes:

خليك هنا خليك.. وبلاش تفارق. :)

طب ما تاخدني معاك كندا ينوبك فيا ثواب..التأشيرة جاتلك ولا لسه؟

[ViralMind]

اوعى ترجع مصر دلوقتى بالذات :closedeyes:

خليك هنا خليك.. وبلاش تفارق. :)

طب ما تاخدني معاك كندا ينوبك فيا ثواب..التأشيرة جاتلك ولا لسه؟

هههههههههههه جت يا باشا.. بس الخدمة العسكرية ماسكة فيا و مش هتسيبنى الا لما تجيب أجلى.. :closedeyes:

علشان كده مأجل السفر لآخر يناير ان شاء الله..

التقديم فيدرال دلوقتى بياخد سنة و نص تقريبا.. اعتقد ان حضرتك مبرمج.. و الوظيفة موجودة فى الليستة والله اعلم (مش عارف اتغيرت ولا لا)