انهم يسرقون ثورة الشعب

[hanzalah]

الافاضل

هناك سيناريو جهنمي قد بدأت ملامحة تتحدد بشكل اكثر وضوحا يوما بعد يوم

في البداية كانت مجرد تساؤلات وشكوك

لماذا لم ترحل حكومة شفيق مع رحيل الرئيس الذي شكلها

لماذا لم يتم حل الحزب الوطني المسؤول الاول عن الفساد في طول بلادنا وعرضها

لماذا لم يتم حل جهاز امن الدولة الذي كان يتجسس على الجبهة الداخلية ويصرب بعضها ببعض

يجند عناصر في الشرطة والاخوان والشيوعيون والجامعة والكنيسة والازهر واللاعلام وفي كل قطاع

ويستخدمهم وقت الحاجة .. وبالتأكيد نحن نمر بوقت احتياج شديد لخفافيش الظلام ان تعمل لاعادة الوضع الى ماكان عليه

الافاضل

لم نشاهد ثورة في التاريخ تنجح في ازاحة رئيس الدولة و رأس النظام ومع ذلك تستمر حكومته في العمل

وفي تسيير امور البلاد والعباد

وهي بالامس كانت ترى ان من اشعل الثورة قلة مندسة وشباب طائش وانها زوبعه وتعدي

احمد شفيق قال بنفسه عن معتصموا التحرير سنوزع عليهم بنبوني

وقال انه ابن الرئيس السابق وتلميذة

وقال انه تلقى منه اتصال هاتفي في الايام الاخيرة من شرم الشيخ

الف علامة لستفهام وتعجب

ماذا يفعل المخلوع في شرم الشيخ ياسادة

[hanzalah]

في هذا الرابط

http://feker.net/ar/2011/02/20/345-8/

سنجد ما اشير اليه من اهمية ان يذهب النظام الفاسد باركانه جميعا

فرعون يهذب .. وهامان يذهب .. وجنودهما ايضا

لايمكن ان تنجح ثورة ويظل هامان وجنود الفرعون يحاصرونها ويكيدون لها

كيف يكيدون لها

اليكم ملامح المخطط الجهنمي

محور أول يقول .. التسامح والعفو من شيم الكرام

بمعاني مختلفة

ستجد من يقول لك لايمكن ان يخرج كبيرنا ورمزنا بهذه الصورة المهينة

قل له : انه كان كبير نفسهو وغيه فقط ولم يرحم طفل من شرطانه ولا راحل خلف لقمة عيشة من غرقانه

ولامظلوم من سجنه وسجانه وعذابه وهوانه

هان على نفسه وهان على خالقة فهان على خلق الله من شعب مصر المطحون

وستجد من يقول لك انه عيان و عنده جلطه و اغشي عليه ورافض الدواء

قل له من ارسل مليارات الشعب يتمتع بها الفاسدون في رحلات ترفيه وعلاج على نفقة الدولة

اليس كبيرهم الذي علمهم السحر

فليذق كأسا هو ماليها ومنشيها

وستجد قصص حول دموع حبيب العادلي السفاح و قلقه على ابنه وحول انهيار احمد عز او جرانه او المغربي

في زنزانة مكيفة وبجانب سريرة ثلاجة صغيرة

شيء مقزز لاستدرار عطف الشعب العاطفي المسكين

ويخرج علينا من ركيزة عفا الله عما سلف من يقول لك

لابد ان نصالح جهاز الشرطة لتعود له هيبته التي انكسرت

والخبث في تلك المقولة الرهيبة هي

اين العدل الذي نبحث عنه والقصاص الذي نبتغيه ويريده كل عاقل قبل المصالحة

اين من ضربونا بالرصاص الحي في الرأس والصدر .. كان يضرب بغل دفين ..

كان يضرب ليقتل وليس لغرض الاصابة

اين من داس على الزناد

ومن حرض على القتل في الاعلام والصحافة والفضائيات

واين من اصدر الامر وصادق عليه وأمن عليه وباركه

اين محاكمة من ظلوا طوال 14 ساعة يتفرجون على اولادنا يذبحون في الميدان من بلطجية وسفاحي ووحوش النظام

في غزوة الجمال والبغال

كيف هدأ لهم بال وقر لهم جفن وشبابنا واطفالنا يبادون

الم تكن خطتهم ان نبيد تلك القلة المندسة وشاء الله ان تعيش لتحقق مشيئة رب الارباب

كيف لاتتم محاسبة هؤلاء

ان المحاسبة التي نراها هي مسرحية هزلية

بعض رموز النظام السابق الذي اختار المخلوع ان يضحي بهم

الفساد اكبر مما نتخيل

اليوم نسمع عن هروب نظيف وهروب سالم و من قبل كان هروب صاحب عبارة الموت الشهيرة بتعليمات من الفرعون نفسه

كيف لايتم محاسبة كل هؤلاء قبل المصالحة

كيف لا يتم محاسبة القاتل قبل ان اطلب من القتيل الصفح والغفران

بأي منطق يتم نقل سفاح الاسكندرية الملوثة يداه بدم الشاب خالد سعيد

ليصبح لواء محمد ابراهيم مدير امن بورسعيد بعد نقله من الاسكندرية

http://www.facebook.com/25janhezb?sk=wall#!/etla3.barra

كيف يستقيم هذا الوضع الشاذ بمكافأة القتل بدلا من تقديمه الى العداله للقصاص

تم تعديل 21 فبراير 2011 بواسطة hanzalah

[Simba]

انا بشوف دلوقتي قناة المحور

وجايبين حد من مستشفي سرطان الاطفال

وعمال يمجد ويعظم في سوزان

وجاييبن صورها مع الاطفال في المستشفي

:blink:

[أحمد سيف]

للأسف يا استاذ حنظلة ... رغم أن المؤشرات الدالة على محاولات النظام السابق للانقضاض على الثورة وتفريغها من محتواها وتقزيم مكاسبها هي واضحة وضوح الشمس في كبد السماء ... فإن هناك من لايزال يدافع عن أحمد شفيق تلميذ مبارك النجيب وعن المجلس العسكري برئاسة طنطاوي صديق مبارك الحميم ويسوق لهما الأعذار في تجاهله لمطلب الناس في التغيير الشامل والحقيقي ... إما بحسن نية وسذاجة مفرطة أو لأنهم يخشون على مصالح وامتيازات وأوضاع اكتسبوها في عهد النظام السابق.

يا جماعه نحن فقط أزلنا الصخرة العليا في هرم الفساد وما زال أمامنا طريق طويل حتى نهدم الهرم بأكمله ... الخطوة المنطقية بعد سقوط مبارك هي في سقوط الحكومة التي عيّنها قبل رحيله غير مأسوف عليه ... ثم ينتقل التطهير الى المستوى التالي بإزاحة جميع رؤساء المؤسسات الحكومية الموالين للنظام السابق من محافظين ومديري إذاعة وتلفزيون ورؤساء تحرير الصحف القومية ورؤساء جامعات ورؤساء مجالس مدن وقادة أمن ورؤساء بنوك وبورصة ومجالس إدارة الشركات المملوكة للدولة. بدون ذلك فقل على الثورة وإنجازاتها السلام لأن هؤلاء هم الهيكل الرئيسي لمنظومة الفساد.

[hanzalah]

انا بشوف دلوقتي قناة المحور

وجايبين حد من مستشفي سرطان الاطفال

وعمال يمجد ويعظم في سوزان

وجاييبن صورها مع الاطفال في المستشفي

:blink:

شيء غريب ان يشيد الضحية بالجلاد

البعض يقول انه مرض نفسي يدعى متلازمة استكهولم

وهو انه بعد طول التعذيب يصبح هناك علاقة الف واعتياد بين الجاني والضحية

لدرجة تجعل الضحية لايشعر بالامان في غياب الجلاد الجاني بل يشتاق اليه والى ايامه

وبالتالي فليس من المستغرب ان نجد من البسطاء من يشيد بزوجة الرئيس الذي جلب لنا المواد المسرطنة

بل يشيد بها في مكان تبرع به الشعب المكافح لعلاج هؤلاء الضحايا

[hanzalah]

للأسف يا استاذ حنظلة ... رغم أن المؤشرات الدالة على محاولات النظام السابق للانقضاض على الثورة وتفريغها من محتواها وتقزيم مكاسبها هي واضحة وضوح الشمس في كبد السماء ... فإن هناك من لايزال يدافع عن أحمد شفيق تلميذ مبارك النجيب وعن المجلس العسكري برئاسة طنطاوي صديق مبارك الحميم ويسوق لهما الأعذار في تجاهله لمطلب الناس في التغيير الشامل والحقيقي ... إما بحسن نية وسذاجة مفرطة أو لأنهم يخشون على مصالح وامتيازات وأوضاع اكتسبوها في عهد النظام السابق.

يا جماعه نحن فقط أزلنا الصخرة العليا في هرم الفساد وما زال أمامنا طريق طويل حتى نهدم الهرم بأكمله ... الخطوة المنطقية بعد سقوط مبارك هي في سقوط الحكومة التي عيّنها قبل رحيله غير مأسوف عليه ... ثم ينتقل التطهير الى المستوى التالي بإزاحة جميع رؤساء المؤسسات الحكومية الموالين للنظام السابق من محافظين ومديري إذاعة وتلفزيون ورؤساء تحرير الصحف القومية ورؤساء جامعات ورؤساء مجالس مدن وقادة أمن ورؤساء بنوك وبورصة ومجالس إدارة الشركات المملوكة للدولة. بدون ذلك فقل على الثورة وإنجازاتها السلام لأن هؤلاء هم الهيكل الرئيسي لمنظومة الفساد.

انا سعيد جدا بوجودك يا استاذ احمد ونحمد الله على سلامتك

تخيل حضرتك ان المرأة الحديدية (منى الشافعي) تسعى اليوم -حسب المنشور في جريدة العالم اليوم عدد اليوم - تسعى رثبات براءتها

بعدما قضت مدة عقوبتها بالكامل ثم اليوم تذهب لمحكمة النقض بنفسها لتكشف لنا عن الاسماء الحقيقية التي كانت تدعمها وتقف وراءها

وهي اسماء شديدة النفوذ داخل البلاد باحسب كلماتها هي

الفساد يفوق الوصف يا استاذ احمد

يفوق كوابيس البسطاء من امثالي ان يحيط بحجمه وشكله

قائمة سوداء طويلة يتم اخفاءها الان في الظلام ومحاولات مستميته لابعادها عن النور

والايام حبلى بكل مفجع وجديد

وفي جريدة الاهرام عدد اليوم سنجد في هذا الرابط ايماء الى خناقة بلدي تمت على مرأى ومسمع من ملايين المصريين في التلفزيون المصري

http://www.ahram.org.eg/450/2011/02/21/4/63750.aspx

حيث قام السيد أنس الفقي بنشر الغسيل للمذيع محمود سعد ثم اتصل بخيري رمضان ثم اكتشف المشاهد المغمور المسكين انه أمام مرتبات بالملايين وهو يمن عليه النظام بدعم رغيف عيش لايؤكل

شيء لايصدقه عقل

لكن واقع في بلدنا المحروسة

وهذا الرابط من نفس الجريدة لمخاوف ا.حسنين هيكل حول ما نحن بصدد نقاشه من مخاوف

http://www.ahram.org.eg/450/2011/02/21/12/63782.aspx

وقد يسأل سائل : اليوم وقد توفى فعلا زين العابدين بن علي .. هل تونس افضل حالا

أقول ليست افضل حالا لانها وقعت فيما نحذر منه الان

حياة او ممات الرئيس المخلوع ليست بيت القصيد

المطلوب ازالة نظام كامل من حياتنا بكل رموزه ومؤسساته وليس تغيير اسماء بدل من غيرها والجميع كان لاعب في الفريق الراحل ويحمل نفس التوجهات<BR style="mso-special-character: line-break"><BR style="mso-special-character: line-break">

[أحمد سيف]

منقول

الساده المجلس الموقر:تعنتكم فى بقاء شفيق و ابو الغيط وسرايا و القط و الدقاق و عبداللطيف و تصريحات وجدى امس لا يؤدى الا الى فقد الثقه كيف يمكن ان يكون أبو الغيط وزيرا للخارجية في هذه المرحلة ؟ هو يمثل مرحلة الذل التي كنا نتعامل بها مع دول العالم . نريد وزير يمثل الثورة. لا يوجد تفسير لهذا العند من السيد أحمد شفيق. كيف نطلب من رَجل كان ينحني امام ابن الريس المخلوع ان يرفع راسه امام رؤساء العالم؟

الفريق أحمد شفيق تلميذ نجيب للرئيس السابق ويبدو أن مرض الالتصاق بالكرسى شديد العدوى . وأعراض المرض متشابهة يراها الجميع إلا المريض نفسه . يسمع المريض أى صوت مهما كان خافتا يؤيد بقاءه على الكرسى ويضخم الصوت ويضاعفه ، في حين إنه يصاب بالصمم الكامل تجاه الأصوات العالية القريبة منها والبعيدة التى تصرخ مطالبة برحيله . يستخدم المريض أساليب متناقضة فى محاولة البقاء ( السخريه – الاعتذار ) ، (العجرفة والصلف – الانحناء )(الكذب والأهتمام بالتفاهات)

كلام وزير الداخلية

1-جهاز الشرطة أدى ما عليه من يوم 25 إلى 28 يناير رغم حدوث بعض الاحتكاكات

2-قد تكون الشرطة استخدمت رصاص حي ضد المتظاهرين نظرا لوجود عناصر استخدمت العنف.بعض العناصر اندست بين المتظاهرين واستخدمت السلاح

3-يوم موقعة الجمل كان هناك عناصر على أسطح العمارات مسلحين ويتكلمون لغات أجنبية هو سمعهم من فوق العمارات ازاى؟

4-لم يتورط أي من عناصر الشرطة والمخبرين وأمناء الشرطة في أحداث موقعة الجمل

5-جهاز أمن الدولة جهاز وطني ولا غنى عنه وهو موجود في العالم كله ده فى حالة انه يعمل لصالح الشهب والدولة مش لأثارة الفتن

6-لا يوجد لدينا أو لدى القوات المسلحة شباب محتجز أو معتقل

اكيد الناس المعتقله عند القذافى

ويكون هذا بعد يوم و احد من طلبهم لنا بالمكوث فى البيت و وعدهم بأنهم سيقومون بكل شئ(اليس هذا هو اسلوب الجميع ممن سبقهم)

لازم شفيق و ابوالغيط و وجدى يمشوا دلوقتى، دورهم الأنتقال من ماذا الى ماذا: الأعلام المصرى مازال على طريقته و هؤلاء الوزراء كذابين و معاقين ذهنيا و امن الدوله مازال يعبث بمقدرات البلد و يتعامل الجميع على انها كانت ثوره ناجحه للشباب و الحمدلله،

ولم يستوعب أحد انها ...مرحله انتهت بالكامل: اى جزء من كلمه بالكامل لا يفهمون

مازال للنظام القديم ثلاثه اذرع رئيسيه تعمل بنفس كفائتها و اسلوبها القديم الرجعى و المستفز و لم يمسها احد باى شىء حقيقى، الا و هى الداخليه و الحكومه و الأعلام

وسيتحول الموضوع فى النهايه بهذه الطريقه الى بعض اعضاء جدد فى المجلس و الشرطه تفسدهم و تحميهم ومجلس عسكرى مستقل و رئيس دميه جديده و يتبقى لنا فقط الأغانى الوطنيه و صور بعض الشهداء على الحائط،،،أسفين لن نسمح بهذا

[اغابي]

انا بشوف دلوقتي قناة المحور

وجايبين حد من مستشفي سرطان الاطفال

وعمال يمجد ويعظم في سوزان

وجاييبن صورها مع الاطفال في المستشفي

:blink:

قولهم حرام عليكم داه سوزان دى وحدها لها ملف اسود ومهبب فى تاريخ مصر - هى سبب كل البلاوى

هى المحرض الاول والاخير هى واخوها الفاسد

سوزان مبارك دى اللى كانت بتقود جمعيات صورية وديكور فقط كواجه ليها انها سيدة مصر وسيدة مجتمع وهى اصلا الفساد بعينه وكانت تخفى الحقائق وتتسلق باسم السلطة وليس لها وظيفة سوى النهب

ايه سوزان مبارك دى كمان وايه سلطتها فى مصر وايه هى تكون اساسا

هى خيال مأتة لس اكثر او اقل - كانت تقود مصر من الباطن

ربنا يسامحها على اللى عملته فينا

ولا كمان فاكرين بجد انها كانت بتمول مستشفى السرطان من جيبها

[أحمد سيف]

من مدونة نواره نجم ... كلام عشره على عشره

تحديث:

الضابط اللي قتل سواق الميكروباص ما ماتش، هو في المستشفى بس، واتقبض عليه، بس على فكرة يا وجدي.. حتمشي برضه

- مبارك قال: عليكم ان تختاروا بيني وبين الفوضى

- واحنا قلنا خلوا بالكم فيه ثورة مضادة

- الجيش قال مافيش ثورة مضادة بس طولوا بالكم

- تلات حوادث طائفية في يوم واحد

- اختلاق فوضى واختلاق ازمة في مسألة الدير

- محمود وجدي يبرئ ساحة الشرطة تماما من اي مسئولية فيما يخص موقعة الجمل

- امناء شرطة بيحرقوا مبنى تابع لوزارة الداخلية، مش فاكرة كان ايه

- ضابط شرطة يقتل سائق ميكروباص فالناس تتلم عليه وتقتله

الحل الوحيد ان المجلس الاعلى للقوات المسلحة يقيل حكومة شفيق، بما فيهم يحيى الجمل - او خصوصا يحيى الجمل - اللي المخلوع عينه في لجنة التعديلات الدستورية، ثم قبل انه يبقى نائب شفيق... روح بقى يا عم جون

لو ما كانش ظباط الداخلية فتحوا السجون - الظباط اللي برأهم محمود وجدي - ما كانش الدير اضطر يبني سور على ارض مخالفة لانه في وادي النطرون وجنبه سجن، ولو كان محمود وجدي قال كل ظابط فتح سجن للمعتقلين حيتحاسب ويتقدم للتحقيق بدل ما يبرأهم، ما كانش الدير وقف قدام الجيش وهو جاي يهد السور المخالف، لان كانوا حيبقوا مطمئنين

لو كان أمن الدولة اتحل، او تم دمجه في الجيش، ما كانش راح عمل في نفس اليوم تلات حوادث طائفية

لو ما كانش محمود وجدي برأ الشرطة من كل جرائمها ما كانتش الناس مسكت الظابط اللي قتل سائق الميكروباص وقتلته بايديها لانها عندها احساس ان حقها حيضيع

واساسا لو شفيق عمل لجنة عاجلة لتنقية جهاز الشرطة ما كانش ظابط قتل سائق ميكروباص في الشارع

ولو من الاصل اتسمع كلامنا وحكومة شفيق كلها اتحلت وجابوا حكومة كفاءات مالهاش علاقة بالنظام القديم

ولو من الاصل اتسمع كلامنا وتم الغاء العمل بالدستور القديم والتعديلات اللي اتعملت دي بقت دستور مؤقت

لو الحاجتين دول بس اتعملوا ما كانش اذناب النظام حيبقى عندهم الامل ده في الرجوع، ومن ثم كانوا حيحاولوا يتعايشوا مع الوضع الجديد ويلبسوا توب الثورة بدل ما يفضلوا يحاولوا يهدوا فيها لان لسه فيه ثغرة قانونية مدياهم امل انهم يرجعوا

انا مقدرة رد المجلس العسكري على الكلام ده:

1- مش عايزين نقيل حكومة شفيق دلوقت لان دول عارفين تفاصيل الوزارات ومع مراقبتهم حيبقوا اقدر على تسيير الاعمال

2- لو عملنا دستور مؤقت حيبقى فيه فراغ دستوري وحيضطر المجلس العسكري يطلع قرارات وكده حيبقى حكم عسكري واحنا مش عايزين حكم عسكري

ده كلام رائع... بس ده يتقال في مجتمع انبياء، مش مجتمع الفساد فيه متجذر بالطريقة دي

لان الحكومة دي عشان هي عارفة تفاصيل الادارات حتستغلها لصالح النظام البائد اللي هي على ولاء له

واذا كان المجلس العسكري مش عايز شبهة حكم عسكري، ادي اذناب النظام بيخلقوا فوضى عشان يجبروا المجلس العسكري انه يعمل حكم عسكري

اما عن حل امن الدولة، الجيش مش عايز يخلق منهم مافيا - على حسب كلامه - دي ناس مسلحة، ولها رجالة، وهم مش عايزين يحلوهم والا حيبقوا مافيا

كلام جميل.... بس هم مافيا بالفعل

وقلنا يتم دمجهم في الجيش والجيش اولى بميزانيتهم المهولة واللي مش بتتصرف على حاجة غير على الخراب

الجيش قال: لا... احنا بقى لو فتحنا الفاتوحة دي حيبقى حكم عسكري بجد.. ندمج كل مؤسسة فاسدة بقى معانا؟

لا.. ماحدش قال ندمج كل مؤسسة فاسدة.. امن الدولة بس.. امن الدولة بس

الجيش له اراضي، وله مشاريع، يشتغلوا فيها، ومن غير ذل ولا حاجة، اللي كان ظابط يشتغل شغلانة في المشاريع دي ما يوازي مقام الظابط واللي كان عسكري يشتغل مزارع ولا بنا ولا اي حاجة تنفع البشرية بدل ماهم عايشين يرازوا في مخاليق ربنا كده

الكلام ده قلناه قبل ما تحصل الكوارث دي وماحدش سمعنا

طيب... الشعب يريد حل امن الدولة

الشعب يريد اقالة حكومة شفيق ومحاسبتهم

الشعب يريد دستور مؤقت

والكلمة كلمة الشعب والشورة شورة الشعب... مش ممكن المناهدة دي في كل نقطة نطالب بيها

وائل خليل قال اللي بيطالب باننا نخلص الثورة عامل زي اللي واقف على باب اودة العمليات يقول للدكتور اللي بيشيل ورم: يالا خلصنا بقى يا دكتور، المهم يخلص مش المهم يشيل الورم؟

ماهو حيروح لوحده، لا مش حيروح لوحده، ما انت شلت نص الورم كفاية كده

هو ايه اللي كفاية؟ احنا بنفاصل في تلاتة كيلو اوطة؟

[الباشمهندس ياسر]

انا كنت جاي النهارده و ناوي اتكلم ف خبرين اوحش من بعش

و من شده المضايقة معرفتش اكتب غير باقتضاب

و اهي المقالة .. جهاز امن الدولة

جهاز امن الدولة

لا ادري هل وصل الي مسامعكم الكريمة هذه الاخبار السيئة

لقد حدث في مدينة أسيوط أن اعلنت الجماعة الاسلامية استيلائها علي مسجد الجمعية الشرعية بالمدينة و عودتها الي نشاطاتها السابقة .. و الجماعه الاسلامية لمن لا

يعرف هي المسؤولة عن قتل الرئيس السادات رحمه الله اة لتحري الدقة .. رجالاتها هم الذين قاموا بتنفيذ عملية اغتيال السادات رحمه الله

و قد تزامن حدث عودة الجماعة الي نشاطاتها مع مقتل احد القساوسة و هو ما اضطر الجموع هناك من ابنائنا المسيحين الي القيام بمظاهرات عنيفة

أيها السادة لن أتحدث في الامر كثيرا فقتل القس آلمني بشدة كما آلم كل جموع الشعب المصري من مسلمين و مسيحين .. و لكن هي كلمة واحدة اضيفها

ان جهاز امن الدولة هو المسؤول عن هكذا عمليات و تاريخهم اسود

لنقم الان بحل هذا الجهاز المشؤوم .. قبل ان يورطنااكثر

اللهم هل بلغت ... اللهم فأاااشهد

[اغابي]

طب والحل

لازم اقالة حكومة شفيق

وتفكيك امن الدولة

اللى موجود فقط علشان يخرب البلد

نعمل ايه والحل ايه ؟؟ نسيب كل تعب الثورة يروح كدا على مفيش ؟

نسيب كدا مصر كل يوم تتعرض لمشاكل بسيطة لكن ممكن انها تتحول لمشاكل كبيرة فى وقت صعب

زى اللى احنا فيه دلوقتى - لازم نحل الامور بشكل هادى

وما نسمحش لحد يسرق ثورة الشعب ويوظفها لحسابه الشخصي

يارب - احمى مصر

تم تعديل 24 فبراير 2011 بواسطة اغابي

[Om Zayd]

فاكرين المقال ده

حصل الدستور الأصلي على وثيقة سرية منسوبة لجهاز مباحث أمن الدولة فرع دمنهور تكشف عن تغلغل عملاء جهاز أمن الدولة في كافة أنظمة التيارات السياسية بداية من الإخوان المسلمين والجماعات الإسلامية بمختلف توجهاتها مرورا بالتنظيمات السياسية وإنتهاء بالمجالس المحلية والجامعات.

وكشفت الوثيقة التي نجت من حريق الفرع بدمنهور عن تجنيد 20 فردا من جماعة الإخوان المسلمين بالداخل والخارج لجمع المعلومات عنهم ونقل كافة الأنشطة المتعلقة باجتماعاتهم وخططهم لجهاز مباحث أمن الدولة.

وأشارت الوثيقة التي عنونت بمرفق رقم 5 بالأكواد الخاصة بعملاء أمن الدولة وأسماءهم ومجالات التعاون مع أمن الدولة ومهرت بشعار وزارة الداخلية وأشارت إلى تجنيد مباحث أمن الدولة لثمانية أعضاء من الكنيسة وثلاثة من الجماعات الإسلامية و20 عضوا من الإخوان واثنين من الجمعيات الإسلامية وثلاثة تحت اسم فلسطين وواحد باسم المشرق العربي وأربعة بمسمي شيوعي وحقوق إنسان و13 تحت اسم هيئات و16 تحت اسم أحزاب سياسية و8 عمال و6 طلبة و2 اقتصاد و4 فكر وإعلام وواحد باسم الأراضي المحتلة و15 تحت اسم نقابات وواحد باسم النشاط الخارجي و17 باسم مدعي السلفية وواحد باسم النشاط المباشر.

وأشارت الوثيقة إلى أسماء شهيرة داخل النقابات المهنية والأحزاب السياسية بالإضافة إلى أسماء تم تجميدها من داخل الحزب الوطني نفسه للتجسس على مسئوليه وأعضاءه.

[Om Zayd]

بالمناسبة .. ده ملخص لمقابلة مع المستشار البسطاويسي على لسان نوارة

في صدفة احسن من الف ميعاد حضرت شبه ندوة للمستشار هشام البسطويسي، الغريب اني يوميها الصبح كنت باقول، يا رب هشام البسطويسي يبقى الريس، وبعدين رحت التحرير، قابلت فاطمة ومالك، رحنا قهوة نتفرج على القذافي، مالك جاله تليفون قالوا له ده المستشار هشام البسطويسي قاعد في بينوس واحنا رايحين له، قمنا رحنا له

المهم

اهم النقاط اللي قالها سيادة المستشار كام حاجة:

1- الاطراف الموجودة في البلد ثلاثة: الثورة، الثورة المضادة المتمثلة في اتباع مبارك، ومبارك، وجمال مبارك، وامريكا واسرائيل، والطرف التالت هو الجيش

بالنسبة للثورة، انتصارها الحقيقي في وحدة الصف، وخلاصة كلامه عن كيفية توحيد الصف، اننا نخفض جناحنا لبعض، ما حدش يتربس على التاني (اه... يعني لما نقول مثلا نغير المكان عشان فيه ناس مش عايزة تروح التحرير يبقى نغيره، ما نتربسش، لما حد يتربس مايجيش حد تاني يطلع بيان مضاد ويقول احنا مش رايحين التحرير، دي هيافة من الطرفين، والطرفين كويسين، دول الناس اللي سبقوا ونزلوا يوم 25 او الناس اللي استجابوا في ساعة العسرة ونزلوا يوم 28 البشع، يبقى ليه كل انسان يحط راسه براس زميله؟ واحد قالك مش رايح التحرير، يا سيدي غير له المكان ما جراش حاجة، التاني قالك لا والله ما مغير المكان الاولاني ما يطلعش بيان كأن حربك مع زميلك مش مع النظام، نتواد يا شباب، نتواد، اخوك وكان حيموت معاك، وواكلين مع بعض عيش وملح في ميدان التحرير، وما نخليش حد يدخل بينا، كل واحد فينا يتنازل للتاني، والطرف اللي يتنازل لاخوه هو الطرف الاحسن، والاحرص على الثورة، والاعقل، والاصدق، نتنافس في الحفاظ على ثورتنا مش نتنافس مين اللي كلمته تمشي، ولو طلبوا منك مقابلة ما تنساش اخوك، ولو اخوك راح يعمل مقابلة ونسيك ادعي له يفتكر كل المطالب اللي انت عايزها، انت رايح تتصور؟ أم الطفل هي اللي ما ترضاش ابنها يتشق نصين بالسكينة، اللي بين قوسين ده كلامي، عملا بنصيحة المستشار هشام البسطويسي اللي قال لازم يبقى فيه نقد ذاتي من غير جلد ذات، احنا عملنا انجاز ومافيش داعي نجلد ذاتنا، وعايزين نحسن اداءنا ومحتاجين ننقد ذاتنا، وانا شخصيا، وبصدق وامانة، شايفة كل الاطراف مخلصة، وكل الاطراف لها وجهة نظر، بس لو كل طرف تنازل للتاني النتيجة حتبقى احسن، احنا عايزين نسترجع روح الحب اللزج اللي كانت موجودة في ميدان التحرير، عشان ثبت اننا ناس كويسين وجدعان، وادعي على الثائر واكره اللي يقول امين، ويرجع بينا المودة والتراحم تاني اللي كانت موجودة في خضم المعارك لان المعركة ما خلصتش، وما نفرجش علينا الناس، احنا قدام الناس لحمة واحدة، مهما نتناقش، وعلى رأي فاطمة عابد، حتى لو اختلفنا لازم نخلي اللي بيشوفنا واحنا بنختلف يقول: شوف الشباب المحترم لما يختلف بيبقى عامل ازاي؟).

وقال المستشار ان وحدة الصف بين الناس، لازم تبقى مصحوبة بالتقارب مع مزاج الشارع من غير ما يبقى فيه تفريط (كلامي: اصل فيه قطاع في الشارع يعني مش مفروض تلتفت له خالص، اللي قعد طول الثورة ياكل ويشرب زي الجاموسة واحنا عمالين نموت ويقول لنا خشوا البيوت، ودلوقت كل ما يشوف وشنا يقول لنا انتوا عايزين ايه بقى؟ ما خلاص، ده مش مهم خالص، المهم هم الناس اللي متعاطفة مع الثورة وكانت بتبعت اكل او تشاور لنا من البلكونة، دول لازم نحتفظ بيهم)

وقال برضه اننا لازم نتجاوز عن بعض، وما نشدش السلخ على بعض، وقعد كتير يقول في فكرة التراحم المتبادل دي، وقال نصا: مافيش داعي نلجأ للتخوين، اللي يغلط نصوبه وما نخونوش، ولو رجع نرحب بيه.

بالنسبة للثورة المضادة:

بيشتغلوا على قدم وساق، وبيعملوا على عدة محاور، هم هدفهم واضح، عايزين يرجعوا النظام، فيه عدة احتمالات لانهم يرجعوا النظام، انهم مثلا يعيدوا انتاج النظام بوجوه اخرى زي عمرو موسى او عمر سليمان، وقال ان فيه رغبة انهم يرجعوا عمر سليمان في الصورة تاني لان امريكا واسرائيل بيحبوه قوي، كمان مراكز القوى ورجال الاعمال مهتمين باعادة انتاج النظام، وبيقول ان مبارك مش صحيح انه مهمش، بدليل وجود ممدوح مرعي وده مالوش صاحب غير مبارك، وما حدش حيخليه غير مبارك

بيعملوا ايه عشان يحققوا الهدف ده؟

بيحاولوا يشقوا صف الثورة، دي احسن وسيلة لهم عشان يرجعوا تاني، وكل القضايا اللي ضدهم تتحفظ، الوسيلة اللي يرجعوا بيها، اننا ننقسم وقال باللفظ: يعني ناس تقول نازلين التلات وناس تقول مش نازلين، يقوم يبقى عددنا قليل، لو اتكررت الحكاية دي حيحصل شق للصفوف ونرجع تاني للميتين واحد وساعتها ممكن ينزل هو مظاهرة مليونية في مقابل الميتين واحد ويقولوا له ارجع ويرجع بناء على طلب الجماهير. الجملة الاخيرة هي نص كلامه. وهم بيراهنوا على ان الناس تتعب بعد شوية وتزهق، وهو شايف انه عشان كده مش لازم نستنزف نفسنا وفي نفس الوقت مش لازم ننام، وهو من وجهة نظره ان النزول يوم الجمعة كويس، وبيضغط، وفي نفس الوقت ما يخسركش الشارع، وما يستنزفش قوتك، وقال ان النزول يوم الثلاثاء كان غلط، بس ما جراش حاجة، نصحح نفسنا، وقال ان اذناب النظام بيحاولوا كمان يشتتوا اهدافنا بانهم يخلونا نهتم بالحاجات الصغيرة وهم عندهم هدف واحد اعادة انتاج النظام.

(كلامي: امن الدولة جمع نفسه ورجع يشتغل تاني وفي يوم واحد قسيس اتقتل وناس طلعت تتظاهر، والفين واحد اتظاهروا عشان يهدوا كنيسة، وبيوت بهائيين اتحرقت، وسبحان الله... كلها مصادفات يا اخي، طيب ايه الرد اللي مفروض نعمله؟ الرد الوحيد على اي حوادث طائفية، مظاهرات برضه، بس لحل امن الدولة، اي حد يتظاهر تظاهرات طائفية، نعرف على طول انه من بلطجية الحزب الوطني زي بتوع معركة الجمل، ويتعمل معاهم اللي اتعمل مع بتوع معركة الجمل، وعلى فكرة بلطجي امن الدولة حمار، لان احنا كنا في ميدان التحرير اي حد بيصاب بيلاقي اللي يدافع عنه ويعالجه، انما بلطجية الحزب الوطني اللي كانوا بيهجموا علينا كانوا بيتعوروا ويتسابوا في الشارع ماحدش بيلحقهم، ما تساويش يعني الميتين جنيه اللي اخدتهم يا حمار، يبقى اي مجابهة لاي حادث طائفي او مظاهرة طائفية، هي المطالبة بحل امن الدولة فورا، او دمجه في الجيش بقى، ياخدوهم يربوهم ويخلوهم يقطعوا حجر في الجبل وياخدوا ميزانيتهم يصرفوها في حاجة مفيدة، وتبقى المظاهرة قدام مديرية الامن، سلمية برضه).

يبقى مافيش حل لمواجهة الثورة المضادة غير اننا نوحد الصف ونتجاوز اي نقاط خلافية، زي مثلا ما المستشار تجاوز نقطة المادة الرابعة في مشروع الدستور بتاعه لما الاخوان اعترضوا، وقال شيلوا المادة دي خالص مدام حتخلق خلاف، والحل التاني اننا نطارد اذناب النظام ونجتثهم من جذورهم وعلى رأسهم امن الدولة، (كلامي: اظن انتوا شفتوا محمود وجدي بيقول ان الشرطة ما عملتش حاجة وان كان فيه مندسين مسلحين بين المتظاهرين.... لا ده يمشي، ده يمشي، ده يمشي فورا فورا فورا، وجهاز امن الدولة يتحل او يدمج في الجيش، والجيش اولى بالميزانية المهولة اللي بتتصرف على امن الدولة، واننا نوحد هدفنا).

الجيش:

المستشار هشام البسطويسي بيقول ان الجيش متعاطف معانا، وعايز يعمل لنا اللي احنا عايزينه، بس زي ما هو بيحاول يتفهمنا، احنا كمان لازم نحاول نتفهم طبيعة المؤسسة العسكرية، هو فيه ناس بتحاول تمارس عليه ضغوط، من اطراف الثورة المضادة، من امريكا واسرائيل واذناب مبارك ورجال الاعمال الخ، واحنا بدورنا علينا اننا نساند الجيش باننا ما نشككش فيه وفي نفس الوقت نلح بمطالبنا بالاسلوب اللي يتناسب مع المؤسسة العسكرية، والمستشار قال اننا لازم نفهم ان دي مؤسسة عسكرية، يعني فيه اسلوب لمخاطبتها، وفيه اسلوب للتعامل معاها، ومش لازم نستعديها علينا، لازم نستمر زي ما كنا بنكسبها لصفنا لانها اصلا متعاطفة معانا (كلامي: سامعين ياللي عمالين تتعوجوا على الجيش؟ مش انا لوحدي اللي باقول كده، اهو المستشار هشام البسطويسي قال لكم وبلال فضل بعد ما اجتمع معاهم قال لي انا عمري ما شفت جيش في الدنيا كده دول ناس حريصة على الدولة المدنية اكتر منا، ماحدش عاد يتعوج على الجيش تاني، وماحدش عاد يتعوج على المشير طنطاوي تاني، ايه بقى حكاية كان مش بيصطدم مع مبارك دي؟ الحمد لله، مش فيه حاجة اسمها رجل مؤمن من آل فرعون يكتم ايمانه؟ مش ساعة الجد نفعنا؟ لو كان راجل صدامي كان اتشال واتحط مكانه واحد زي عمر سليمان، وتقولوا سامي عنان كان في امريكا؟ الحمد لله ان سامي عنان هو اللي بيعمل المقابلات الدورية لامريكا، مش احسن ما هو يرفض ويقوم بالمقابلات دي واحد الله اعلم بيه يبيعنا ويتفق معاهم علينا؟ تعامل الجيش المصري مع امريكا مش الجيش هو اللي عمله، السادات هو اللي فرضه على الجيش، اقروا وثائق ويكيليكس عشان تعرفوا ان الجيش المصري بيعمل البدع عشان يحافظ على وطنيته وفي نفس الوقت يلتزم بالالتزامات اللي فرضها عليه السادات، وايوة فيه اجنحة كتير في الجيش مش حابة فكرة ان مبارك يتبهدل من واقع انه كان القائد الاعلى للقوات المسلحة، بس احنا اللي عايزينه يتبهدل، يبقى احنا اللي نعمل الحكاية دي بمطالبتنا والحاحنا ونرفع عنهم الحرج، وانا لو عايزة اقابل الجيش اقدر اقابله، بس انا مش عايزة اقابل الجيش عشان افضل احبه حب عذري وكلامي ما يبقاش مجروح، اتعدلوا، باكرر تاني، اتعدلوا، انا شخصيا باحب الجيش من قبل الحكاية دي لاني قريت وثائق ويكيليكس وشفت قد ايه الجيش بيقاوم بقاله تلاتين سنة من ساعة توقيع اتفاقية كامب ديفيد عشان يفضل جيش مصر مش جيش النظام، وما يتمسخش زي ما كل مؤسسات النظام اتمسخت وبقت العوبة في ايد امريكا واسرائيل، وكمان عشان سيدنا محمد قال عليهم احسن ناس، يعني حاصدقكم واكدب سيدنا محمد؟ بس حتى من غير كده، الجيش واخد موقف لحد دلوقت رائع مع الوضع في الاعتبار ان الموضوع مش احنا وهم وخلاص، فيه جهات كتير بتحاول تمارس عليه ضغط، ومع ذلك هو بيرجح كفتنا على اي كفة ومنحاز لينا، يبقى نحترم نفسنا بقى واحنا بنتعامل مع الناس، زي ما هم بيحترمونا)

نعمل ايه احنا عشان نساند الجيش؟ رأي المستشار اننا نضغط بالاسلوب اللي يتناسب مع طبيعة المؤسسة العسكرية في مطالبنا، يقوم ينزل على طلباتنا لانه اصلا كل ما بنطلب منه حاجة بيعملها لنا، بس احنا نوحد هدفنا ونطلب بالاسلوب الصح. يعني مثلا ننزل الجمعة الجاية (كلامي: وزي ما احنا عارفين، لما ننزل الجمعة الجاية شغلتنا نأمن الجيش قبل ما نأمن نفسنا لأن اجهزة النظام القديم نشطت وابتدت تشعر بالخطر، انا وانت نموت ومافيش عسكري في الجيش يتخدش)، بلال بيقترح اننا نقول: احنا مطالبنا كانت كذا وكذا، اتحقق منها كذا وكذا، واحنا بنشكر الجيش على تحقيقها وعلى مساندته لينا وموقفه الوطني، بس لسه عندنا مطالب كذا وكذا، وتبقى مطالب واضحة كده، مش نهوبص ونتوههم معانا، هم عليهم من ده بايه؟

طيب

واحد حيقول نشيل شفيق عشان ده بتاع مبارك، وهو له حق

واحد حيقول نشيل محمود وجدي، وانا شخصيا نفسي يبات ليلة في القسم عشان يبقى يرجع يقول الشرطة بريئة تاني، ولنا حق

وواحد حيقول نشيل ابو الغيط ده ساب المصريين يتبهدلوا في ليبيا، وله حق

وواحد حيقول: فين صفوت الشريف وزكريا عزمي وعمر سليمان؟ دول كلهم متورطين في قضايا قد كده، وله حق وانا شخصيا باقولكم عمر سليمان متورط في جرائم ضد الانسانية، وطلب من اسرائيل انها تدخل سيناء عشان تطارد المتعاونين مع حماس، يعني خيانة عظمى

وواحد حيقول: انا حاسس ان مبارك بيحكم مصر من شرم الشيخ، وله حق يخاف

وواحد حيشكك في الجيش وده حنجز له لسانه من لغاليغه ونعين عليه لجان شعبية مخابرات عشان نكتشف انه من فلول الحزب الوطني.. احسن جيوش في الامم جيوشنا

احنا في مصر هنا مالناش بعد ربنا غير وحدتنا وجيشنا وقضائنا واي حد يعمل فورتينا في اللحمة دي يبقى عدونا

كلللللللللللل ده لخصه المستشار هشام البسطويسي في مطلب واحد يأمنا كلنا من كل المخاوف دي: الالحاح على المجلس العسكري بانه يعلن موت الدستور القديم وان التعديلات الدستورية اللي بتقوم بيها اللجنة واللي وصلت لاربعتاشر مادة دي مش تعديلات ده دستور مؤقت

باعلان المجلس العسكري ان التعديلات هي دستور مؤقت وان الدستور القديم تم الغاؤه ده يضمن لنا ان مبارك ونظامه انتهوا الى غير رجعة، ويضمن لنا ان مافيش حصانة لاي حد من اذناب النظام، ويشيل الشرعية عن شفيق وتوابعه، بل ويضمن لنا ان لو حصلت انتخابات مبكرة ونجح فيها بعض اذناب الحزب الوطني نظرا لانهم هم اللي بيوزعوا وجبات على العشوائيات دي تبقى حكومة مؤقتة

لان ممكن لو تعاملنا مع التعديلات على انها تعديلات واعدنا العمل بالدستور القديم تيجي حكومة تقول ماهو دستور اهو نبقى نعدل بعدين على مهلنا بقى، سنة اتنين عشرة الف.. كل سنة وانتوا طيبين

المستشار مش عاجبه الاعتصامات الفئوية وشايف انها تتحل بان الدستور برضه يبقى مؤقت توطئة لدستور يضمن العدالة الاجتماعية

بس مالك رد وقال ان ممكن تتحل مشكلة العمال مؤقتا بان الحد الادنى يبقى ستميت جنيه لحين حل كل المشاكل

اهم حاجة من وجهة نظر المستشار البسطويسي ان الدستور القديم يتلغي

ساعتها بقى مبارك يقعد في شرم الشيخ، يقعد في المنصورة، يقعد في الترعة البولاقية، ما تفرقش كتير، لكن طول ما الدستور اللي فات ما ماتش يبقى فيه خطورة من قعدته معانا

ليه؟

اولا: لاننا لسه بنصرف عليه كأننا مطلقينه وبندي له نفقة

ثانيا: لان ده معناه انه مش خايف مننا

ثالثا: معلش مع احترامي لكل الناس اللي بتقول مش معقول يرجع، خش جوة مخه واقنعه بحاجة زي دي، ولو احنا ضعفنا، له الف واحد مستفيد منه يقول له برقبتي يا ريس... كفاية ان شفيق بيقول عليه الرئيس مبارك

ده رأي المستشار البسطويسي، وهو بيقول ان لجنة تعديل الدستور تقدر هي نفسها تعلن موت الدستور اللي فات وتقول ان التعديلات دي بمثابة دستور مؤقت

وفي كل الاحوال، هو شايف اننا نوحد مطلبنا على المطلب ده، كويس ورخيص وابن ناس

وده اللي نقوله بكرة ان شاء الله...

اللي شايفاه ان كلام البسطويسي متوازن، هو مش حاطط في بطنه بطيخة صيفي زي ابراهيم عيسى وبلال، وهم لهم وجهة نظر ان فعلا الجيش اهل للثقة، وفي نفس الوقت مش عايز يخلق لنا بلبلة زي هيكل، وبرضه له وجهة نظر ان مبارك واذنابه مش حيسكتوا، البسطويسي شايف ان فيه شوية مشاكل، ولها حلول بسيطة، بس لو سكتنا عنها حتتفاقم وتبقى خطر علينا وعلى الجيش، ولو حليناها نقدر نحلها بشكل بسيط ونريح دماغنا

الا هل بلغت؟ اللهم فاشهد

انتهت خلاصة القعدة مع المستشار البسطويسي

ملحوظة: عايزة اوضح لكم ان الجيش مش عايز النظام القديم يرجع، لان النظام القديم عايز لو - لا قدر الله - رجع ينتقم من الجيش زي ما عايز ينتقم منا بالظبط، فيا ريت نساعد بعضينا يعني، عشان احنا في مركب واحدة

------------------------

******************

Posted by جبهة التهييس الشعبية at 17:56

Labels: 25 يناير, الثورة العربية

[hanzalah]

المصدر

مكتوب - عز الحريري

أبدى كثير من الشخصيات الإعلامية والعامة، أمس الجمعة، من ساحة ميدان التحرير، غضبهم من حكومة "تسيير الأعمال" المكلف بها شفيق، مطالبين بإسقاطها، وإعلان حكومة تكنوقراط، ومؤكدين أنهم ما زالوا في حالة الثورة، وأن الثورة لم تنته بعد، مرددين: "جيش مصر عليك تختار.. بين القتلة والثوار". كما أعلنوا مساندتهم للشعب الليبي، مؤكدين "إنما النصر صبر ساعة".

وقد قام الإعلامي حسين عبد الغني، المدير السابق لمكتب قناة "الجزيرة" بالقاهرة، التعريف بهم وتقديمهم للمتظاهرين.

فقد هتف الإعلامي البارز حمدي قنديل، منددًا بحكومة شفيق وأبو الغيط وممدوح مرعي، طالبًا منهم التنحي، فهم من أذيال النظام السابق، وهم أول من كانوا يهاجمون الشباب المعتصمين، واصفين إياهم بالعمالة والانسياق وراء القوى الخارجية. وأكد قنديل ضرورة الإتيان بحركة إيجابية سريعة من قبل النظام والقوات المسلحة، حتى لا يفقد الثوار ثقتهم الكاملة في حاميهم وداعمهم، الجيش المصري.

وقال جورج إسحاق: "إن مطالب الثورة أولها خلع وزارة شفيق، وتكوين حكومة تكنوقراط، تأتي بوزراء متخصصين، مهتمين بحل مشاكل مصر بشكل معلوماتي وعلى أساس علمي. كما طالب بمجلس رئاسي حتى يتسنى للمدنيين المشاركة في الحكم، كما طالب بالإفراح عن المعتقلين السياسيين وإلغاء قانون الطوارئ.

كما هتف د. حسن نافعة، أستاذ العلوم السياسية، الذي أشاد بثورة مصر وشبابها، مؤكدًا وجوب تغيير الحكومة.

وهتفت بثينة كامل الإعلامية: "أمن الدولة قاعد ليه.. حسني راجع ولا إيه"، و"الشعب يريد.. إقالة شفيق"، ثم نددت مرة أخرى بـ"ألعاب أمن الدولة" التي تمثلت في أغلب المتصلين الباكين في قنوات الإعلام المصري.

وقالت جميلة إسماعيل: "كما أسقطنا مبارك، سنسقط شفيق، وكما رحل مبارك، سيرحل شفيق وأعوانه، وكما هتفنا ضد العادلي، وأسقطناه.. اليوم نهتف بسقوط ممدوح مرعي، وكل فاسد ومزور".

والصحفية نور الهدى زكي، التي هتفت: "ثورة ثورة في كل مكان.. الثورة لسه في الميدان"، و"الشباب ويّا الكبار.. الإخوان ويّا اليسار"، و"لأجل بلدنا تشوف النور.. حاكموا عزمي.. حاكموا سرور"، و"ارحل ارحل يا شفيق.. إحنا عارفين الطريق".

وهتف المخرج خالد يوسف بإسقاط النظام، وأن الثورة مستمرة حتى سقوط ذيول النظام السابق، وتطبيق الحريات المدنية، مؤكدًا أن "الثورة بدأت ولم تنته بعد؛ فقوى التغيير المزعوم تواجدها في الحكومة الحالية لا تمثل القوى الحقيقية للشباب الساعي للتغيير الجذري لنظام مبارك السابق". وهتف قائلاً: "مصر يا أم.. ولادك أهم.. راح يفدوكي بالروح والدم".

وتجاوب المتظاهرون لهتافات الرياضي "نادر السيد"، والذي شدد على تجديد النية للمحافظة على الثورة، مؤكدًا أن النظام السابق لم يزل بعد، وأن الثورة لن تنتهي إلا بتحقيق مطالب الشباب. داعيًا إلى الاعتصام يوم الجمعة المقبلة.

وشارك في التظاهرات د. محمد أبو الغار، الذي بدأ بالمطالبة بحق دماء الشهداء، وأكد أن دماءهم لن تذهب سدى. وهتف ضد وزيري الخارجية، أبو الغيط، والعدل، ممدوح مرعي، واللذين نالا أغلب الهتافات المطالبة بالرحيل. كما قال إنه "يجب أن تكون الانتخابات ببطاقة الرقم القومي، وليس بالبطاقة الانتخابية، كما كان سلفًا".

كما شهدت "إذاعة الثورة" وجود أبو العز الحريري، والذي قال عنه، مقدمه حسين عبد الغني: "لقد لفق له النظام السابق التهم. واليوم، الحريري موجود، ومبارك رحل". وقد بدأ أبو العز كلامه بتمجيد كفاح الشعب المصري وشهداء الحرية، كما ندد بالنظام السابق، متهما إياه بإهدار المال العام المملوك للدولة، ووضعه في الحسابات الخارجية، في حساباتهم الشخصية. وقد ختم كلامه بتمجيد وحدة الشعب بأكمله، نافيًا الشائعات بوجود الانشقاق بين القوى السياسية.

وظهر بعض مؤسسي الأحزاب السياسية كـ"أبو العلا مهدي" مؤسس حزب الوسط، واللواء السابق "محمد ربيع الدويك"، والصحفي "جمال فهمي"، و"د. جمال زهران"، والذين بدءوا كلامهم بالمطالبة برحيل النائب العام، ومساندة الثورة الليبية، مرددين: "ثورة ثورة حتى النصر.. ثورة في ليبيا وثورة في مصر".

وشهدت المظاهرات، أمس الجمعة، دعوات مختلفة، منها من دعي إلى مسيرة رمزية تجاه شرم الشيخ، مطالبًا برحيل مبارك عن البلاد؛ مؤكدًا خطورة وجوده داخل مصر على الثورة.

كما شهدت التظاهرات دعوة صريحة من أغلب القوى السياسية للاعتصام أمام مجلس الوزارة، وأمام وزارة العدل، للمطالبة برحيل شفيق وأبو الغيط، ومرعي. وصرح أحد المستشارين عن عزمه القيام يوم الأحد المقبل هو و3000 مستشار آخر بالاعتصام أمام وزارة العدل، حتى يرحل مرعي؛ لأنه في نظرهم من تسبب في تزوير انتخابات مجلس الشعب 2005، وهو المسؤول المباشر عن أحداث "سحل القضاة".

كما ظهرت زوجات وأبناء بعض المعتقلين السياسيين، حاملين اللافتات المنددة بقانون الطوارئ، كعائلتي "نبيل محمد المغربي" المعتقل منذ عهد السادات، و"خيرت الشاطر".

واستمتع المتظاهرون بإلقاء شعري من الشاعر السكندري عبد الستار محمود، والذي كان معتصمًا في ميدان القائد إبراهيم بالإسكندرية، وألقى قصيدة بعنوان (نشيد الخلاص)، يقول فيها: "ملء صدرنا لهب.. ملء صدرنا حريق.. يا أخوة الغضب، فلنصنع الطريق.. والخوف للسكوت.. من ثار لا يموت".

كما غنى المغني علي شبانة بعض أغاني عبد الحليم حافظ الوطنية، كـ"صورة" و"أحلف بسماها وترابها".

واختتم المتظاهرون دائمًا هتافاتهم، مطالبين بإسقاط أمن الدولة. مرددين: "أمن الدولة يا أمن الدولة.. انتوا اللي خربتوا الدولة".

[أحمد سيف]

الجوقة الإعلامية الحكومية وشبه الحكومية عماله تعيد وتزيد في نفس الاسطوانه

الثورة حققت أهدافها

محاربة الفساد مستمر على قدم وساق (طبعا شوية الكروت المحروقة اللي ضحى بيهم النظام وعلى رأسهم مبارك)

الاقتصاد بينهار والاستثمار متوقف والبطالة بتزيد وقريب مش هنلاقي ناكل.

الأمن منهار ولازم الشرطة ترجع الشارع (مش مهم هترجع بأي فكر وسلوك المهم ترجع)

الخلاصه ... كفايه لحد كده

النتيجة ... يبقى الوضع على ما هو عليه واللي مش عاجبه وعايز يستكمل تحقيق مطالب الثورة يبقى خائن ومخرّب وفوضوي

واللي بينادي بإقالة شفيق يبقى مش عايز الخير للبلد

محاولة إنهاء الثورة التي قام بها الجيش منذ أيام بالقوة ولم تنجح ... يقوم بها الآن عن طريق الإعلام

علشان كده لن أملّ من تكرار أن إحدى الأخطاء الاستراتيجية للثورة هي أنها لم تستطع أن تسيطر على الإعلام حتى الآن وما زال بصورة أو بأخرى في يد النظام السابق

الإعلام كاد أن يجهض الثورة في مراحل حاسمة من مسيرتها والآن يكاد ينهيها بالفعل ... ليس بالأكاذيب الفجّة والهجوم المكشوف ... ولكن بالاحتواء والتخويف واللعب على مشاعر الناس وتشكيل رأي عام مضاد لاستمرار الثورة حتى تحقيق كافة المطالب

إذا لم تخرج وسائل الإعلام المختلفة من تحت سيطرة الحكومة والجيش فقل على الثورة السلام