ثـــورة اليـــمن....أخــر أخبــــار الثــورة اليمنيـــــة

[fatfouta]

سيناريو الثورات في الوطن العربي:

1- يصرح المسؤولون باستحالة تطبيق كتالوج تونس

2- التحذير من الفضائيات " المغرضة " علي حد تعبيرهم و قطع بثها او التشويش عليه

3- التهديد بالفوضي

4- حمام دم

5- الرحيل

[pink rose]

شكل بتاع القات هايحصل اخواته الاتنين

عقبال بتاع حبوب الهلوسة يا رب

بجد و الله كنت خايفة جدا من اليمنين الناس دي عندها سلاح اكتر من عيالها بس ما شاء الله عليهم ما حدش رفع سلاح في وش الامن زي ما كنت خايفة و مستحملين و صابرين

ربنا يوفقهم للخير

بس على فكرة يا ولاد بعد الواحد ما شاف و قارن بين الحكام العرب

طلع مبارك بيفهم يعني بعد 4 ايام شال الحكومة شوفوا الاخ بتاع القات لسا فاكر امبارح يقيل الحكومة

لا المصريين مخهم نِور برضو :closedeyes:

تم تعديل 21 مارس 2011 بواسطة remo

[ozoozo]

<>اليمن | عاجل: انباء تشير الى احتمال إعلان صالح تنحيه عن السلطة خلال الساعات القا...دمة #yemen تم تعديل 21 مارس 2011 بواسطة ozoozo

[ozoozo]

اليمن | عاجل جدا": مأرب برس: أنباء عن تخيير الجيش للرئيس بين الرحيل اليوم أو ستكون نهايته بيد شباب الثورة وأنباء عن إستعداد الصالح للرحيل

[مغتربة]

الاستقالات نازله ترف عليه من كل المناصب المهمه فى الدوله

لكن الاستقاله الى قصمت وسطه بجد هى استقاله اخوه

يالله باذن الله يبقى هو تالت اسم يشرف جنب اخينه الحلوين السابقين

[Alattar]

أعتقد ان الموضوع ان شاء الله في اليمن قرب أوي

فعلا الناس كلها استقالت .. بيفكرني باليوم اللي قبل مبارك ما يمشي..لما حصل ما يشبه العصيان المدني

الغريبة بأه..ان أنا متفائل جدا ان شاء الله ان الموضوع في اليمن هيخلص بسرعه

وجنبي في الشغل واحد مبرمج يمني..مش متفائل زيي كده..

[مغتربة]

من العربيه كلمه مرتقبه من وزاره الدفاع فى اليمن بعد قليل

يا ربى نفس السيناريو بالملى

يالله ربنا يسهل ان شاء الله هانت

[مغتربة]

العربيه : مجلس الدفاع الوطنى اليمنى بحث تداعيات الازمه الحاليه

يالله الخطوه الى بعدها

اكيد هتكون انهم يقولوا انهم فى حاله انعقاد مستمر

ادينى جبتهالكم من الكنترول اهو

[pink rose]

العربيه : مجلس الدفاع الوطنى اليمنى بحث تداعيات الازمه الحاليه

يالله الخطوه الى بعدها

اكيد هتكون انهم يقولوا انهم فى حاله انعقاد مستمر

ادينى جبتهالكم من الكنترول اهو

هو دا اللي حصل فعلا بس المجلس في انعقاد دائم برئاسة صالح

من على الجزيرة

[pink rose]

اهو الجيش طلع ضد الانقلاب على الدستورية

يعني كده الجيش مع صالح

ايه بقى اللي هايحصل دلوقتي؟

[ozoozo]

هما اغبياء كلهم كده

زي مايكونوا بيقروا من كتاب واحد

نفس السينريو اعتقد الجيش بيديلوا فرصه اخيره -راجع الثوره المصريه الخطاب الاخير بتاع بنو وطني وشهدائكم-

[مغتربة]

على العربيه هناك لواء فى الجيش اليمنى تحدث على ان ما قاله مجلس قاده الجيش كان تحت ضغط من عبدالله صالح لكن الجيش مازال عند موقفه و لم ينحاز للرئيس

[مغتربة]

و تتوالى الاستقالات او الانضمام للثوار حتى بعد كلمه زير الدفاع اليمنى

اصبحت مساله وقت يا عبدالله صالح

تم تعديل 21 مارس 2011 بواسطة مغتربة

[hOuSsAm]

الشعب اليمنى شعب طيب جدا وشطار اوى فى التجارة

ميستهلوش من حاكمهم كل ده

منه لله شردهم فى البلاد واللى اتبقى منهم خلاه يدمن شرب القات

ضيع ثروات البلد فى زراعة القات

حسبى الله ونعم الوكيل

----------------------

هو مش هيتنحى بقى

[se_ Elsyed]

الدكتور أحمد عكاشه الطبيب النفسي الشهير إقترح على الأمم المتحدة قبل كده إن لازم يبقى في إختبارات نفسية للحُكام من وقت لأخر

يعني كل فترة نجيب الريس من دول ونلبسه القميص بالعافية ونلعب في مخه شويه ونشوفه شغال ولا مهوي

لأ حقيقي .. أنا باتكلم جد

الموضوع بقى أوفر قوي خصوصاً عندنا في الوطن العربي

- بالأمس تقريباً كل الشعب اليمني بما فيهم المسئولين الحكوميين والسفراء في جميع دول العالم وضباط الجيش الكبار إنضموا للثوار .. بل إن فيهم ناس انشقوا ونزلوا بمدرعاتهم ودبابتهم في أرض التظاهر لحمايتها من فلول علي عبد الله صالح

ومع ذلك متنح فيها وما بقاش في إلا هو ووزير دفاعه اللي ما كانش عارف يتكلم كلمتين على بعض في الخطبة العصماء اللي وجهها للشعب اليمني وقال لهم إن دول عناصر مندسة - إنت تاني ؟ - وإن الجيش هايحمي الشرعية متمثلة في الرئيس

يخرب بيت كده

يابني بص حواليك .. ده أنتوا بقيتوا إتنين بس

- تخيلوا يا جماعة إن الشاويش علي عبد الله صالح وصل الشعب اليمني إلى إن نسبة الفقر بقت 70 % ؟

تخيلوا اليمن السعيد اللي كانت الزكاة المُحصلة منه بس بتكفي الإمبراطورية الإسلامية ؟

بقى هو ده اليمن السعيد اللي يخلص حرب يدخل في حرب وللأسف سوري يني بقوا الشحاتين فيه ماليين السعودية وحاجه تكسف من شدة الفقر .. وأنتشرت ظاهرة تهريب الأطفال الصغار من اليمن إلى السعودية لممارسة الشحاته والتسول ؟

[fatfouta]

على عبد الله صالح فى كلمة ليه بيحذر من اى انقلاب عسكرى

والانشقاقات شغاله على ودنه عليه فى الجيش

والحرس الجمهورى بيحاصر سلاح آخر منشق فى الحديدة

يا مسهل بقى

[الســـاري]

هما اغبياء كلهم كده

زي مايكونوا بيقروا من كتاب واحد

نفس السينريو اعتقد الجيش بيديلوا فرصه اخيره -راجع الثوره المصريه الخطاب الاخير بتاع بنو وطني وشهدائكم-

اعلن علي عبدالله صالح انه مستعد للتنحي بحلول نهاية العام في اطار نقل دستوري للسلطة

نفس الخطوات ... خطوة خطوة

صورة معبرة في احد المواقع اليمنية المتابعة للثورة

[Om Zayd]

يا رب النصر

و ما يمشيش في نفس سيناريو ليبيا

مش هيلاقوا حجة احسن من انه بيقتل المدنيين عشان يحطوا ايدهم فعليا على اليمن

يا رب انر بصائر الاخوة الاحرار في اليمن و انصرهم

[se_ Elsyed]

عاوز أشيد بموقف الشعب اليمني المحترم المتدين المعتدل المثقف

بامانة دي شهادة وإشادة بسلوكهم المحترم

لإننا جميعاً نعلم إن كل الشعب مُسلح من أول الكلاشنكوف مروراً بمضادات الطائرات إلى مدافع الهاون ... وكل ده بيتباع هناك في الأسواق بجوار الخضار والفاكهة....

ومع ذلك لم نسمع إن في طلقة طلعت من سلاح احد ضد أي احد

وحتى الفزاعات التي كان يستخدمها المجرم علي عبد الله صالح سواء الجنوبيين المطحونيين والمهضومة حقوقهم في البلد .. وكذلك الحوثيين الإنشقاقيين .. بالإضافة إلى جحافل تنظيم القاعدة اللي اليمن تعتبر أرض خصبة لها

كل هؤلاء لم نجد لهم أثر في الأزمة الحالية

مما يدل على إن معظم تلك المشاكل كانت من إختراع النظام الفاشل الفاشي

وبالامس وفي محاولة يائسة منه سمعناه يهرتل ويهذي ويقول " إن هؤلاء الثوار هم شباب مُضلل يُنفذ أجندة خارجية "

الله يخرب بيت الاجندات على اليوم اللي اخترعوه فيها

طب دول الشباب شايلين أجندات مكتوب فيها تعليمات بلغات اجنبية وبينفذوها

طب وقادة الجيش والدبلوماسيين حول العالم ومعظم اعضاء حزبك الظالم اللي انفضوا من حولك ؟

إيه ... معاهم أورجانيزور هما كمان وبينفذوها ؟؟؟؟؟

[ozoozo]

رصد |عاجل |معمر القذافي ينصح رئيس اليمن علي عبد الله صالح بالتنحي حقناً للدماء

انا قريت الخبر ده علي رصد بس مش عارف جد ولا هزار