واقعه تبين الاختلاف فى الاداء الامنى بين الشرطه و الجيش

[مغتربة]

قصه جميله اسمحولى انقلها من متدى تانى على لسان صاحبتها لكن فعلا مش عارفه اقولكم انا بجد فرحت بيها قد ايه و حسيت انه لازم احيى جيشنا الجميل عليها رغم انه مش مستغرب منها

القصه زى ما قولت لكم منقوله لكن صاحبتها بتقسم صحتها علشان كدا مش هقدر افتى كتير فى ملابستها لكن يهمنى منها جدا الموقف

على قد حنى على نفسى واللى حصلى على قد فرحتى باللى شوفته انهارده

اللى حصل ان كان جايلى شحنه من اخت فاضله هنا فى المنتدى انهارده كلمنى المندوب الصبح الساعه 7ونص علشان استلمها لبست ونزلت وبعد مااستلمتها واقفه مستنيه تاكسى علشان اروح لشغلى وقفت عربيه مكروباص قدامى والسواق قعد يعاكس زهقت منه قمت شاخطه فيه قام نازل من العربيه وحاول يركبنى العربيه بالعافيه

صرخت قام شادد الكيس اللى فى ايدى بتاع الشحنه وشنطه اللاب توب منى مسكت فى ايد الشنطه ومش عايزه اسيبها واصرخ قام جاى اتنين سواقين مكروباص قولت هينجدونى لقيتهم واقفين لصفه وقالوكلى لمى نفسك وامشى وسيبى الحاجه بدل ماهنتبلى عليكى وورينا هتعملى ايه وقفت قدام العربيه وماسكه فيها علشان متمشيش قاموا ماكسنى ضربنى والعربيه جرت بس الحمد لله كنت حفظت رقمها وبعدها الناس اتلمت السواقين اتبلوا عليا وقالوا انى شتمت وضربت السواق وهما خلصوه منى

وطبعا كانت ايديا باين علها اثار الضرب الكريك قمت جاريه على المرور ابلغ عن العربيه

ظابط المرور خد رقم العربيه وقالى هنشوفها فين او هاتى انتى السواق واحنا نتصرف معاه وبيتكلم بمنتهى البرود

حد ابن حلال قالى اطلعى على مجلس المدينه هتلاقى الحاكم العسكرى هناك احكيله

رحت فعلا ودخلت للحاكم وحكتله خد رقم العربيه وقالى اطلعى على المستشفى ومتشغليش بالك غير بايدك دلوقت وارجعيلى بعدها رحت المستشفى اتجبست ورجعتله لقيت ان فى قرار بالتحفظ على العربيه والسواق وبعت جاب التقرير الطبى اللى لقى انه يستلزم علاج اكتر من 21 يوم

قام صادر قرار فورا بمصادره العربيه واعدامها على مرئى من صاحبها علشان يتاكد من اعدام عربيته

وحبس السواق بتهمه التعدى على انثى فى الطريق العام وتحويله فورا لمحكاكمه عسكريه فى نيابه القاهره

ولقوا حاجتى فى العربيه واخدت حاجتى

قولت ده اى كلام معقول هيعدموا العربيه

لقيت فورا ونش جه سحب العربيه على المخرطه واتعدمت قدامى وقدامه

والراجل بعدها اتسحب على القاهره ولقيت تليفون جالى من ساعه بس ان صدر حكم عسكرى على السواق بالسجن 3 سنين بتهمه التعدى

حسيت انى بحلم

حكم واخد حقى فى اقل من 8 ساعات

معقول.....

اقسم بالله العظيم \ده اللى حصل بالنص ومعايا صوره لمحضر وفيه حكم باعدام العربيه واحاله المتهم للنيابه العسكريه واول مااجيب صوره الحكم على الراجل هوريهالكوا وهحط صوره لايدى كمان بالكسر والجبس لا تفتكروا انى بفتى

بصراحه انا فرحانه ببلدى واللى عملناه لبلدنا بثوره 25 يناير

واللى خايفين على البلد ادينى واحده من وسطكوا حقى جالى وباقصى عقوبه فى اقل من 12 ساعه بجد ربنا يحميكوا ياجيش بلدى ويرحمنا من الكلاب اللى ميمشوش غير بالكرباج ويسترها علينا جميعا

ادعولى بالشفاء العاجل وان ربنا يسترنى ويستركوا فى الدنيا ياااااااااااااااااارب

[pink rose]

و الله يا مغتربة حاسة اني عايشة في حلم جمييييييييييييييييل اوي

الكلام دا بجد فعلا

ارجوكي تابعي الموضوع و لما الست دي تحط الصور اللي قالت عليها تنزليها هنا كمان

[Alattar]

انتي بتتكلمي جد يا مغتربة؟؟

أنا حاسس اني بسمع قصة..زي اللي كنت بسمعها من أصدقاء في دول أوروبية

اللي الشرطة فعلا فيها في خدمة الشعب..مش في خدمة النظام..و أصحاب المصالح زي

ما كان عندنا

جزي الله هذا الظابط الشريف خير الجزاء..

و ربنا يهدي ضباط الشرطة و حد يبلغهم يا جماعة ان البلد اتغيرت و ان المصري خلاص بقت له قيمة مش زي زمان

تم تعديل 23 فبراير 2011 بواسطة Alattar

[مغتربة]

و الله يا جماعه انا نقلت الكلام من منتدى تانى لكن هى بتقسم انه دا الى حصل معاها

هى حطت صوره ليها و ايديها متجبسه لكن مرضيتش انقلها هنا من غير اذنها و انا مجرد مطلعه على المنتدى دا مش مشتركه فيه

لكن هتابع باذن الله الموضوع و لو حطت صور المحاضر هجبهالكم هنا