حكايتك إيه مع الثورة؟؟

[لماضة مصرية جدا]

هههههههه فكرتينى بايام الثوره و الحماسه الى كنت بتكلم مع جوزى عنها فيها و ازاى كان بيبص ليا بقلق كانه لسه بيتعرف عليا لاول مره و انا بحلف له على المصحف ان انا لو كنت فى مصر ساعتها كنت 100 % نزلت شاركت معاهم فى المظاهرات

السلام عليكم و رحمة الله و بركاته

منورة التوبيك يا مغتربة...الي هيزداد دفا بكلماتك

اجمل ما استوقفني في مداخلتك....هي العبارة اللي عملتها فونت كبير

احنا كنا بنبص لاقرب الناس لينا و كأننا نعيد اكتشافهم لاول مرة....و نعيد اكتشافنا معهم

وقت الفتنة علي وجه التحديد....خلاني اعيد النظر في كثير من علاقاتي بالناس....مش بحكم علي حد....بس متوقعتش اني كنت بقرا الناس بدماغي انا....و الحقيقة انهم ليسوا كذلك علي الاطلاق

و في نفس الوقت....الاحداث....خلتك تقربي من ناس تانية اوي و تختصري كل مساحات الحيرة...لان كان فيه نفطة بداية واضحة.....و هي عشق الوطن...فتلاقت الارواح

يا رب الروحدي تظل بوهجها

يا رب

مساااكي بطاقة هوية.....ليكي.....و لينا كلنا

دومتي....قريبة للقلب

[لماضة مصرية جدا]

دي مداخلة سابقة لي في الموضوع ده

مكاسب شخصية غير مباشرة من الثورة المصرية

لا مخاصماكي.....(هاتي صباع ايدك الصغير)

اهو دلوقتي مصرية متغربة و لا استاذنا س س....يجوا يقفلولي التوبيك....و لا يفتحوا الاوضتين علي بعض

و انا بقولها من دلوقتي....احتياطي برضه

:protest:

و اكيد استاذنا صاحب التوبيك مش راح يزعل يعني

انا عايزة التوبيك يبقي زي ما هو كده...ماشي...لو سمحت يعني

هات بقي صباع ايدك الكبير....عشان اصالحك

[pink rose]

الثورة؟

حلمت بيها من زمان اه و الله من يجي 5 سنين كده

كنت باقول لنفسي كل ما انزل مصر و ارجع البلد دي مش هاينعدل حالها الا اذا قامت فيها ثورة

لازم بركان يقوم يشيل كل اللي على الوش عشان يعمل تربة خصبة تاني نقدر نرزع فيها خير و تطرح خير

كنت باقول لنفسي يا ترى ممكن يحصل يا ترى المصري اللي عنده عزة نفس غير عادية يقدر يقوم تاني و يطلع من جوة القمم اللي اتحط فيه بالعافية

كنت باقعد اسأل نفسي دايما كنا نسمع عن نخوة المصري الجدع الشهم راحت فين الحاجات الجميلة دي ايه اللي خباها جوة كل واحد فينا

لا اكيد لازم يجي يوم و المعدن اللي جوانا يظهر و يبان بقى

صحيح الوقت طال و القهر اشتد علينا لكن لازم يحصل حاجه

عارفه يا ريهام انا من عشاق اسكندرية بجد مش هزار ريحة البحر بالنسبالي زي اكسير الحياة كده

كنت مؤمنة اني عاملة زي السمك لو طلعت من المايا اموت لما سافرت بعد ما اتجوزت كنت باعيط مش عشان بعيدة عن اهلي لا عشان ازاي اصحى من النوم كده ما اشوفش البحر قدامي زي ما انا متعودة

لما كنت بانزل اجازة كان بيبقى نفسي اوطي ابوس ارض المطار واول ما اقرب من بيتنا ريحة البحر كانها ردت فيا الروح

نزلت اسكندرية السنة اللي فاتت بعد ما خالد الله يرحمه ما اتقتل لقيت اسكندرية غير

اول مرة احس انها مطفية كده في عيني اول مرة احس اني ماشية فيها غريبة اول مرة احس بالرعب دا و انا نازلة لوحدي في الشارع

لما رجعت قعدت ادعي ربنا من قلبي اني ما احسش بالاحساس الكئيب دا تاني

لما حصلت الثورة في تونس و هرب علي افندي كعب الغزال حاجة اتحركت في قلبي قولت الله ما هو ممكن اهو

بيحصل قدامي اهو الظلم بيهرب اهو

كان في راجل بيجي على الجزيرة ماشي في الشارع بيتكلم في نص الليل كده بيكلم الشعب التونسي كتير من كلامه مش مفسر اوي الا من كلمة الشعب التونسي العظيم تونس حرة

كل ما كنت اشوفه اعيط و اقول يااااااا رب امشي كده في مصر و اقول بعلو صوتي مصر الحرة يا شعب مصر العظيم مصر حرة

بدأت الدعوات ليوم 25 فضلت ساكتة خايفة مترقبة لا اكيد مبارك مش هايسكت هاتكون مظاهرة زي بتوع كفاية او على اقل تقدير زي يوم 6 ابريل

عدى اليوم و انا قاعدة متسمرة قدام التليفزيون ايه دا العدد دا معقول باكلم نفسي ممكن يحصل ممكن اه ليه لأ

ما كنتش معاهم سواء في التحرير او عند القائد ابراهيم مكاني بما اني من اسكندرية لكن و الله و الله انا لا كنت بانام و لا باكل و اهملت في بنتي بشكل غير عادي

مش عارفه افكر غير فيها بس ربنا يحفظك و يحفظ ولادك يا مصر دا كل اللي كنت باقوله

كنت كل يوم معاهم قايمة نايمة معاهم كل ما حاجة حلوة تحصل افرح معاهم و كل ما كان يجرالهم شر من المجرمين اصوت بهيستريا

يوم الاربع المشؤم كنت باموت بجد مش هزار مش عارفه اعمل ايه غير اني اعيط و اقوم اصلي و ادعي و انا باعيط و اقول لنفسي دا هايساعدهم اكيد تضرعنا لله في الوقت دا هايقويهم اكيد و الحمدلله ربنا كان معاهم و كرمهم و كرمنا بيهم

الثورة دي كانت حلم حلمت بيه و يوم ما لقيته بيتحقق قدامي ما قدرتش غير اني اكون معاهم و لو بقلبي و دعائي

نفسي انزل اسكندرية بتاعتي انا اكيد هاترجع تبرق تاني في عيني

و حصل فعلا لما شوفت العلم مشدود بين الجامع و الكنيسة قعدت اعيط من الفرحة

ايوة هي دي مصر

ربنا يكملها على خير فرحتنا و يحفظ مصر باهلها

انا رغاية اوي انا عارفه بس استحملوني انتوا اخواتي و دا قدركم بقى

[Howayda Ismail]

الثورة ......؟

تلك الاسطورة او المعجزة التى اعادت الحياة لانفاس كادت تحتضر من عفن الفساد والاستبداد وقلوب كادت تتوقف عن النبض

خوفا من البطش والجبروت فى نظام ساده الظلم والاستعباد وجعلتنا جميعا نشتم نسيم الحرية بعد عقود عجاف من القهر

اليوم واليوم فقط يتكلم الجميع فى السياسة فلم تعد قاصرة على فئة المتعلمين والمثقفين فحسب بل يتكلم فيها العامة

من البسطاء الذين كبلهم النظام البائن بادنى حقوق كان من المفترض ان يوفرها لهم ولكنها الدوامة التى دارت بملايين

لتكميم افواهم والهاءهم بلقمة العيش حتى الميسورين منهم رافعين جميعا شعار خلينا ماشيين جنب الحيط

لم يتوقع النظام ولم نتوقع نحن ايضا ان الحيط ستسقط عليهم فى غفلة وعنجهية منهم

فالخوف الذى تقوقع داخلنا كبل احلامنا ان نجاهر ونرفع اصواتنا كما فعل جيل الشباب الذى وصمه الاعلام الموالى بشتى

صنوف الانحطاط من الادمان والتحرش والبلطجة فى افلام شوهته داخليا بيننا قبل ان تشوهه خارجيا وتحط من قدره وقيمته

فاصبح المصرى مهان داخليا بالذل والمهانة والقهر وخارجيا بالاهمال والاحتقار حتى من جنسيات اقل منا شأنا لان حكومتنا

المبجلة لم تصون كرامته هنا او هناك فكيف يحترمنا الاخرون

لكن الان فقد صنع لنا هؤلاء الشباب قواعد المجد من جديد وعاد لمصر شموخها وتاجها الذى سرقه نظام مبارك واعوانه

الان يتكلم الاطفال الصغار كانهم يمارسون سياسة من سنين فالجميع عاش الحدث من بينهم ابنى الصغير 10 سنوات

تخلى عن قنواته المفضلة ليستمع معنا باهتمام ولهفة لقنوات الاخبار الخارجية لمعرفة احداث الثورة لحظة بلحظة

خاصة بعد قطع النت والهواتف عنا وكان اول تعليقاته مع سماعه ارحل ارحل قال هو الراجل ده معندوش كرامة

كل الناس مش عوزاه ولسة قاعد ايه ده 30 سنة ومزهقش دا انا زهقت

وبعد الثورة قال مستهزءا ناس كانت مش عجبها الثورة وعمالة تشتم على اللى عاملين الثورة ودلوقت غيروا كلامهم

وكانهم هم اللى عملوها ناس باردة اوى

ورغم صغر سنه كان نفسه ينزل مع اخوه الى جامع ابراهيم وده كان نفسى اعمله انا وبنتى لكن اتحدد اقامتنا اجبارى

لكن ابنى الكبير اصر على النزول خصوصا بعد ماشفنا سقوط جرحى وشهداء ورغم انه مالوش فى السياسة نهائى الا انه

اتفاعل مع الاحداث بصورة عجيبة ونزل جمعة الغضب حكى انه وجد فرق كبير بين الناس اللى شافهم فى الثورة والناس

اللى شافهم من عدة شهور مجرد متفرجين فى خوف ورعب وهو واحد منهم على شاب من مؤيدى البرادعى يحمل توقيعات

بيتسحل فى اللاجتيه بالابراهيمية من اتنين مخبرين دون ان يجرؤ اى شخص على تخليصه حتى ولو بالكلام

قالى لاقيت نفسى مش خايف وكمان الناس بنهتف بنجرى وسط الرصاص وقنابل مسيلة ونشيل اللى بيقع نجرى به

ورجع متاخر يومها ومرديش ينام نزل مع الشباب يقف فى اللجان الشعبية يحرسوا و يفتشوا العربيات لما الجيش بلغهم

بهروب مساجين وظهور ناس بتضرب نار على المواطنين بسيارات مسروقة واستمر الوضع حوالى اربع او خمس ايام قلة

نوم وارهاق قلت نزولى كان ارحم من وقفتى دى ونزل اخر جمعة صلى بجامع ابراهيم ونزحوا على قصر راس التين

بيقولى كانوا حوالى 4 مليون لكن اللى ضايقه وخلاه يبكى الام اللى شايلة صورة بنتها 16 سنة ضابط ضربها بالنار

موتها وهى واقفة فى بلكونتها تصوره وهو بيضرب الشباب بالنار رصدها واتمكن من قتلها لكن والدتها رغم انهيارها

وحزنها نزلت هى واولادها عشان دم بنتها مايروحش هدر والحمد لله من يومين النيابة امرت بالقبض عليه بالاسم

وضابطين اخرين من قسم الرمل بعد ماثبت قتلهم عمد للشباب باصابات مباشرة فى الراس

لما ابوه كان عاوز يمنعه قاله انا مش احسن من اللى ماتوا وماينفعش ناس تموت وناس تقعد تتفرج عليهم لما كل واحد

حيخاف على ولاده عمر البلد دى ماحتتغير ونستاهل اللى حيحصلنا بعد كده حياخدوا عاطل مع باطل ومش حيرحموا حد

كنت عاوزة اقولك على رايهم فى الجيش لما تعامل معاهم بجد احترام فوق الوصف

[arkan]

الحمد لله الذي بنعمته تتم الصالحات

الحمد لله حمدا كثيرا كما ينبغي لجلال وجهه وعظيم سلطانه

بصي انا احيانا بكون ماشية واقول لنفسي هو صحيح الى حصل في مصر حقيقي

لما كنت قرايت في المنتدى عن دعوة لمظاهرات يوم 25 يناير نقلت الموضوع لصاحباتي وزوجي كمعلومة وظنيت انها محاولة جريئة ولكن لن تاخذ فرصتها وستكون مظاهرة كبيرة نسبيا ....بس النتيجة دى ....لأ بعيدة

من يوم الاثنين 24 يناير وانا باتابع بجدية وفؤجت بالاعداد اللى نزلت يوم 25يناير وطبعا بقينا والمصريين كهم نتابع باهتمام بالغ لدرجة كنت بزعق لمتا حد يقولى عايز اكل

فقط كنت غصب عني انسي الاحداث وانا في الشغل تحت تأثير الشغل زي تحت تأثير المخدر كده بس كانت اخلاقي احيانا عصبية واحيانا فخورة اننا لسه مستمرين ومش خايفين

يوم التخريب والفوضى لما طلع المساجين من السجون كنت في اقصى حالات الانهيار رغم كنت ابان متماسكة قدام ابني الصغير كنت خايفة تنهار الثورة..وكنت خايفة على اولادي في مصر جدا

انتى عارفة لما عرفنا ان النت هيفصل يوم الاربعاء بالليل ودعت اولادي بالتليفون وكان عندى قلق انى ممكن معرفش اكلمهم تاني وفعلا التليفونات كمان اتقطعت وحتى تليفون البيت الارضي ماكانش شغال فكنت هتجنن وكنت بتصل على ماما اطمن عليها وعليهم منها

احلى شعور بجد كان يوم جمعة الغضب انتابتني شعلة وطنية ووصلة بكاء وابني بيذلني انه هيقول لاخواته في مصر انى كنت بعيط لما بعد الصلاة الثوار شغلوا الاغاني الوطنية ووالده يقوله يابني امك وطنية من زمان

ابني بيسألني كنت هتروحي ياماما التحرير لو كنا في مصر؟ ....... كنت برد عليه كنا هنروح كلنا أكيد وكنت بستغرب لما الاقي في مصر بعض الاهل بيطمنى ماتخافيش احنا في البيت وكويسين احنا بعيد عن المظاهرات وكنت بفرح لما يقولوا لى عن حد من شباب العيلة خرج

بصحيح كنت خايفة على الاولاد في مصر بس ماتتصوروش فرحتى قد ايه لما استأذنوننا انهم هينزلوا التحرير

كنت فخورة بيهم قوى اهم طلبوا يروحوا طبعا شجعناهم بس محدش ينكر اني كنت قلقانه عليهم بشكل فظيع وكان شرطي يروحوا مع حد علشان لو جرالهم حاجة حد يتعرف عليهم .طبعا ماكنتش بصرح لهم بده

يالله ....

لحظات الانهيار بعد كل خطاب لسيادته كم من النكد يصيبني واقول هيصعد وهيضرب ولكن بعد البيان الأول للجيش تفاءلت وكنت مش فاهمة يعنى ايه هيفضل منعقد ومشوشة بس متفائلة لثقتي في اخلاق الجيش

المهم...أوعى تكونوا زهقتوا ما بختصر اهو

خطاب التنحي اصابني بكم من الزغاريد والهلوسة والبكاء الهستيري وبنتى كانت معاى على الشات مش هارفة تسكتني وفى خضم هذا قالت احنا نازلين التحرير ...كنت مبسوطه لهم قوي انهم هيفرحوا وتوالى نزولهم لتنظيف الميدان والكليات بتاعتهم (الله يرحم مش قادرثين ينضفوا اواضهم)

عارفين لما بقول هم الاجازة طولت وياريت كنتم جيتوا لنا بيقولوا ياماما لو كنا جينا عندكم مكناش حضرنا الاحداث دي في مصر

فعلا كل الشرف لما شارك وفي الثورة وكان شاهد على بعض احداثها

ياحبيبتي كل العيلة وكل مصري اتغير بقينا ايجابيين دخل حياتنا حاجة تفرحنا من زمااااااااااااااااااااان مفرحتش

كنت زعلانه قوى من مصر ولما خرجت منها كنت زعلانة وواخدة على خاطرى ولكل منا اسباب تخليه زعلان ومقهور وخارج منها زعلان بس بنحبها

دلوقتى نفسي انزل مصر بعد الايام علشان الاجازة تيجي

كفاية عليكم كدة متهيأ لى دي أطول مداخلة لي مش هتكرر

[م تيمور المراغي]

... وتوالى نزولهم لتنظيف الميدان والكليات بتاعتهم (الله يرحم مش قادرثين ينضفوا اواضهم)

[arkan]

... وتوالى نزولهم لتنظيف الميدان والكليات بتاعتهم (الله يرحم مش قادرثين ينضفوا اواضهم)

شكرا لحضرتك يابشمهندس وأنا عن نفسي مدينة لحضرتك بمعرفة الدعوة بس لو سألوني البعدا هقول على حضرتك على على طول

..خلاص راحت عليهم

[لونا]

دي مداخلة سابقة لي في الموضوع ده

مكاسب شخصية غير مباشرة من الثورة المصرية

لا مخاصماكي.....(هاتي صباع ايدك الصغير)

اهو دلوقتي مصرية متغربة و لا استاذنا س س....يجوا يقفلولي التوبيك....و لا يفتحوا الاوضتين علي بعض

و انا بقولها من دلوقتي....احتياطي برضه

:protest:

و اكيد استاذنا صاحب التوبيك مش راح يزعل يعني

انا عايزة التوبيك يبقي زي ما هو كده...ماشي...لو سمحت يعني

هات بقي صباع ايدك الكبير....عشان اصالحك

لا و الله يا لماضة إنت بالذات ما أقدرش على خصامك

خدي الصباع الكبير عشان نتصالح

( أنا عارفة الخصام بالصباع الصغير .. لكن أول مرة أعرف إن الصلح بالصباع الكبير :blush2: )

ها.. صافي يا لبن ؟

*******************************************

طيب أضيف حاجة صغيرة ؟

الثورة خلتني أتعلم الفيس بوك

كان عندي account من زمان و ما كنتش باحب أفتحه

و ما زلت لغاية دلوقتي مش مرتاحة للفيسبوك و حاسة إنه شبكة مخابراتية مش إجتماعية

لكنه مصدر مهم جدًا للمعلومات

مع إن المعلومات دي مش دايمًا موثقة

******************************************

هند و أركان .. bv:-

للأسف رصيدي خلص من النقاط الخضراء

تم تعديل 2 مارس 2011 بواسطة لونا