جمعة الخلاص والمحاكمة...لإسقاط شفيق وردا على الشرطة

[لونا]

نوارة نجم

نصائح لحشد الجماهير للنزول يوم الجمعة

لا وقت للاكتئاب، فيه حل ان شاء الله

by كتابات نوارة نجم on Tuesday, March 1, 2011 at 7:07pm

دلوقت قبل ما اقول الاقتراح اللي اتناقشت فيه مع الشباب على التويتر، لازم احنا نحل المشكلة عندنا ونرجع نتفق على حاجات موحدة بدل التشرذم ده

أولا: كلنا متفقين على يوم الجمعة

ثانيا: كلنا متفقين على التلات مطالب الاساسية: حل امن الدولة، اقالة شفيق وتشكيل حكومة كفاءات، محاكمة رؤوس الفساد وعلى رأسهم صفوت الشريف ومبارك واسرته

ثالثا: كلنا متفقين على ان الشارع المصري هو اللي صنع الثورة وهي ملكه بالاساس

بالعربي، اننا ندي ضهرنا للشارع ونبص للمجلس العسكري سواء بالخناق والاعتصام ابو الفين واحد او بالتفاوض دي قلة عقل، المجلس العسكري ماله ومالنا، هو علاقته بالشارع والشارع هو اللي بيقول هو عايز ايه ويتعمل له

وده اللي بيعمله الحزب الوطني دلوقت، حد سمع عن اعضاء الحزب الوطني بيعتصموا للمجلس العسكري ولا بيروحوا يتفاوضوا معاه؟ بتوع الحزب الوطني ماشيين في الشارع يكلموا الناس - على قد مخ اعضاء الحزب طبعا، يعني برضه كنتاكي وخمسين يورو والشباب والبنات بيعملوا قلة ادب مع بعض في الميدان وبتوع التحرير بيفتحوا مطاوي على بعض وحاجات كده يا عيني، معلش، طول عمرهم خيالهم فقير

يبقى بداية من النهاردة ولحد يوم الجمعة كل واحد يقرا البوست ده، خصيمه النبي يكلم كل يوم عشرة في الشارع

اكتر حاجة بتضايق المصري انه يحس ان فلوسه اتسرقت - ولو ان المصريين ما عندهمش مشكلة مع الفقر، بس عندهم مشكلة مع اللي ياكل حقهم - وانه يحس ان فيه حد بيذله، اللي هو امن الدولة

واظن كده الشارع افهم من كل السياسيين والنشطاء والنخب اللي بيغرقوا في التفاصيل والتنظير، لان هو ده لب الحكاية، مش هو: تغيير حرية عدالة اجتماعية؟ الشارع المصري مهتم بالعدالة الاجتماعية اكتر ما هو مهتم بالوفرة، يعيش فقير لو الفقر على كل الناس آه، يتسرق لا، لان ده ظلم، يحترم القانون ويسمع كلام القوات المسلحة عشان هو مؤدب اه، يتذل من امن الدولة ويتحاصر ويتراقب لأ.

وبدل التكبر على مخاليق ربنا، والمعايبة على الناس عشان شايلين طبلة، ولا عشان فيه بياعين بياكلوا عيش، هو ده شعبنا يعني، مش عاجبك شوف لك شعب تاني، والبلد دي بلدهم والثورة ثورتهم، وهم اللي اتعوروا وماتوا، وحضرتك عايش وسليم اهو

وبدل ما تزهق الناس في عيشتهم وتحسسهم انك معطل لهم السكة وهم مش فاهمين مالك؟ انت مجنون ولا ايه؟

الصح ان كل واحد يتكلم مع الناس، بداية من النهاردة، الشباب اللطيف اللي نزل يبيض ويكنس، الشباب اللطيف اللي قاعد في التحرير دلوقت، الشباب اللطيف اللي قاعد على النت، عشرات الالاف من كل المحافظات، من دلوقت ننزل كلنا الشارع ونتكلم من النهاردة لحد يوم الجمعة الناس، وتحسبها لنفسك، لازم كل يوم تسجل سكور عشر بني ادمين على الاقل، وما تدخلش في مهاترات تضيع وقتك، وما تدخلش في مناقشات بيزنطية:

ارمي الكلمة في بطن الضلمة تحبل سلمى وتولد نور

حنركب ميكروباصات

حنطلع في المترو

حنقف مع الناس في محطات الاوتوبيس

وحنتكلم معاهم بطريقة واضحة:

المسئولين ايام مبارك سارقين منا نص ترليون جنيه، يعني 500 مليار جنيه، انت عارف يعني ايه 500 مليار؟ يعني 200 مليار يوفروا مية ويخضروا الصحرا ويشغلوا سكان العشوائيات في استصلاح الاراضي، و100 مليار يعملوا شبكة الصرف الصحي والمية ماحدش يتقطع عنه المية ولا المجاري تطفح تاني، و100 مليار يعملوا مساكن للشباب وسكان المقابر، والباقي نحطه في البنك وناخد فوايده، يعني لو الفلوس دي رجعت لنا في خلال سنتين مصر حتبقى جنة

بس الحكومة الموجودة دي اصلها بتاعة مبارك، شفيق ده بيقول على مبارك الرئيس، وابو الغيط فضحنا فضيحة المطاهر ايام غزة، وناس كتير من اللي في الحكومة دي بتوع مبارك، عشان كده فيه ناس كتير من الفاسدين بقى عندهم فرصة انهم يحرقوا المستندات ويحطوها في المفرمة، تلات شهور لحكومة شفيق كتير، على ما التلات شهور يخلصوا حيكون هو واللي معاه لحقوا يوفروا فرصة للفسدة في المؤسسات يحرقوا كل المستندات اللي تجيب لنا فلوسنا تاني

ده غير بقى السبعين مليار دولار بتوع مبارك، يعني 350 مليار جنيه

ما المصريين احسن ناس، وعندنا كفاءات كتيرة في كل حاجة، ليه يعني لازم يجيبوا ناس من بتوع مبارك؟ ما عندنا علماء وعندنا كفاءات وييجوا يديروا البلد عشان يعرفوا يرجعوا لنا فلوسنا ويطلعوا المستندات اللي تجيب لنا حقنا

وبعدين الحكومة دي فيها محمود وجدي، مش عايز يحل امن الدولة، شفت مدير امن البحيرة؟ قال بيقولك نقله، ماهو نقله عشان اتفضح على النت، كل بتوع الامن بيفكروا كده، وامن الدولة ده ياما ذلنا وقتل ناس، وبياخدوا ميزانية قد دماغهم، طب مش الجيش اولى بالفلوس دي؟ بدل ما ناخد معونة نسلح بيها الجيش، ناخد فلوس امن الدولة نديها للجيش، وامن الدولة يشوفوا لهم شغلانات تانية، في الجيش بقى، ولا حتى في المشاريع الجديدة اللي حنعملها لما الفلوس ترجع

وبعدين امن الدولة ده لازم يتحل بسرعة، دول ابتدوا يهددوا ناس ويضربوا عليهم نار، وبعدين هم اللي فجروا كنيسة القديسين، والموضوع ده اتفضح واتعرف وهم بيحققوا مع العادلي وبعدين سكتوا عنه ما حدش جاب سيرته، عايزين يولعوا البلد ويعملوا لنا مسلم ومسيحي، واخرتها ياخدوا الشاب السني ده اللي اسمه سيد بلال ويموتوه من التعذيب عشان يلبسوها له وهم اللي عاملينها، وهي ايه شغلانة امن الدولة بالظبط؟ في كل حتة امن الدولة بيراقب الناس، في كل مكتب في قطاع عام او خاص واحد بيشتغل مع امن الدولة وبيكتب لهم تقارير، في كل جامع وفي كل كنيسة واحد مدسوس من امن الدولة وبيكتب لهم تقارير، دول لهم ناس في المدارس يا جدع، وبعدين ما وراهمش حاجة غير المرازية في خلق الله والضرب والاهانة والاتاوات، ويا الغلابة يشتغلوا مرشدين يا يموتوهم زي الواد بتاع اسكندرية، الداخلية بتاخد تلت الميزانية، مش احنا اولى بيها الفلوس دي، طب لو محمود وجدي ده نيته صافية كان حل امن الدولة وشغلهم بقى في المطافي ولا في المرور، انما هو مش صافي، ولسه مخه زي مخ العادلي بالظبط وزي مخ اي ظابط شرطة، عايزين يذلونا

الحل ان حكومة شفيق دي تمشي ويجيبوا لنا ناس بتعرف ربنا وكفاءة عشان يجيبوا لنا حقنا من الحرامية اللي سرقوا فلوسنا ومن امن الدولة، وامن الدولة ده يشوفوا له شغلانة شريفة

الناس رايحة يوم الجمعة التحرير، حتبقى مظاهرة كبيرة، اصل المجلس العسكري عليه ضغوط من كل ناحية وانتوا فاهمين بقى رجالة صفوت الشريف ورجال الاعمال، لكن لو احنا نزلنا يوم الجمعة مش حنبقى بنعطل البلد وفي نفس الوقت يقدر المجلس العسكري يتحجج بعددنا الكبير عشان يساعدنا، هو كويس وعايز يساعدنا، بس محتاج اننا نديله حجة عشان يقول للغيلان اللي كانوا واكلين البلد: ماليش دعوة بقى الناس هي اللي عايزة كده، امال هو بيسبنا ليه يوم الجمعة فكرك؟

--------------

ملحوظات: اول ما تغلط في المجلس العسكري اعرف انك خسرت رصيدك عند اللي بتكلمه

ما تيأسش الناس وتقول: احنا كده ما عملناش حاجة، لأن كده حيحبط ويقول مش نازل، قول له، ايوة احنا عملنا حاجة كويسة ومبارك مشي، بس انا رئيس عصابة، مشيتني، المفروض تمشي العصابة بتاعتي كلها

حتلاقي بتوع الحزب الوطني بيهللوا عليك

تعرفهم ازاي:

1- صوتهم عالي ومهللاتية، مش بياخدوا ويدوا في الكلام، حتلاقيه اتشنج كده وقعد يقول لك: حسبي الله ونعم الوكيل فيك.. خربتوا البلد يا بعدا.. خربتوا البلد

تجاهله وما تتكلمش معاه، وما تعليش صوتك عليه، حيبان قصاد الناس ان انت العاقل اللي بتقول كلام موزون وهو اللي عمال يتشنج

2- بيتكلموا كويس قوي على شفيق وابتدوا مؤخرا يتجرأوا ويتكلموا كويس على مبارك نفسه

3- بيروجوا اشاعات، وده المفتاح اللي تعرف بيه اذا كان مجرد شخص مختلف معاك في الرأي ولا هو حزب وطني فعلا، حتلاقيه بيقول: انا شفتهم بعيني بياخدوا فلوس، شفتهم بعيني قاعدين مع اجانب، شفت الشباب والبنات بعيني والبت قاعدة وراسها على كتف الواد ومنظر استغفر الله العظيم

ساعتها تقول له: فيه ناس ماتت واكيد اللي مات ما اخدش فلوس، وعشان بقى ما نسيبش البلد والشارع للناس الوحشة اللي انت شفتهم بعينك دول، لازم ننزل، والا هم كده اللي حياكلوا البلد، انت عارف المجلس العسكري بيسمع اللي الناس بتقوله في الميدان وبيتكلم معاهم، لو سيبنا الميدان للناس دي يبقى ممكن هم يضيعوا البلد

حاجة اخيرة: بعيدا عن ان اللي يغلط في الشعب يبقى ابن ستين كلب الشهادة لله، ويبقى ما يفرقش حاجة عن امن الدولة اللي بيعامل الناس كده لأنه بيحتقر الشعب... لازم وانت بتكلم الناس تديهم فخر وطني، تقولهم المصريين احسن ناس، وعملنا حاجة حلوة، وكل المشاكل اللي كنا فيها دي طلع ان سببها مبارك وعصابته، ولما اتلمينا على بعض في الميدان بان اننا ناس كويسة ومتحضرة، ولازم نحافظ على اللي عملناه وما نسيبش عصابة مبارك تحاول انها تسيطر على البلد، ولازم بقى نساند المجلس العسكري في مواجهتهم عشان يلاقي دعم، وهو مش معقول حيقول لنا انزلوا اتظاهروا، بس هو بيسيبنا الجمعة ولو فيها ضرر ما كانش سابنا، خصوصا انها اجازة ومش عطلة للبلد

دي افكاري الاولية

طبعا ممكن نطور موضوع التخاطب مع الشارع ده اكتر، زي ستيكرات او ورق او اي حاجة، بس احنا من هنا للجمعة ما عندناش وقت، ولازم نبتدي من دلوقت، من يوم السبت كان لازم نبتدي، بس الفكرة ما جاتش على بالي الا دلوقت

الله المستعان

[fatfouta]

شوفوا الباشا أحمد نظيف كان هيعمل كوبرى بين بيته وبين قرية سياحية....أكيد دى كمان قريته طبعا

وزير النقل يلغى تنفيذ كوبرى لربط فيلا نظيف بقرية سياحية

Tue, 01/03/2011 - 18

قرر المهندس عاطف عبدالحميد، وزير النقل، إلغاء تنفيذ كوبرى على طريق مصر - إسكندرية الصحراوى، بسبب وجود شبهات حول ربط الكوبرى بفيلا الدكتور أحمد نظيف، رئيس الوزراء السابق، بقرية وادى النخيل السياحية على الطريق.

وطلب الوزير إعادة النظر فى جميع المشروعات التى أضافها المهندس علاء فهمى، وزير النقل السابق، على طريق إسكندرية الصحراوى، الذى يتم تحويله حالياً إلى طريق حر.

قال المهندس محمود عزالدين، رئيس هيئة الطرق والكبارى، لـ«المصرى اليوم» إنه اتضح من خلال المسح أن الكوبرى يتوسط كوبريين، يبعد كل منهما عن الآخر 5 كيلومترات فقط، وأنه تمت إضافته العام الماضى ليربط منتجعات وادى النخيل بالطرق الخدمية. وأضاف أن التكلفة المبدئية للكوبرى 40 مليون جنيه، وأنه أصدر تعليمات لشركة المقاولون العرب، بإيقاف العمل فى المشروع، التى كانت قد بدأت فى دق خوازيق حديدية، وبلغت التكلفة الإنشائية له حتى الآن مليونا ونصف المليون جنيه، مؤكداً أن المقاول سيتحمل هذه التكلفة التى تم صرفها حتى الآن.

المصرى اليوم

[Simba]

شوفوا الباشا أحمد نظيف كان هيعمل كوبرى بين بيته وبين قرية سياحية....أكيد دى كمان قريته طبعا

وزير النقل يلغى تنفيذ كوبرى لربط فيلا نظيف بقرية سياحية

Tue, 01/03/2011 - 18

قرر المهندس عاطف عبدالحميد، وزير النقل، إلغاء تنفيذ كوبرى على طريق مصر - إسكندرية الصحراوى، بسبب وجود شبهات حول ربط الكوبرى بفيلا الدكتور أحمد نظيف، رئيس الوزراء السابق، بقرية وادى النخيل السياحية على الطريق.

وطلب الوزير إعادة النظر فى جميع المشروعات التى أضافها المهندس علاء فهمى، وزير النقل السابق، على طريق إسكندرية الصحراوى، الذى يتم تحويله حالياً إلى طريق حر.

قال المهندس محمود عزالدين، رئيس هيئة الطرق والكبارى، لـ«المصرى اليوم» إنه اتضح من خلال المسح أن الكوبرى يتوسط كوبريين، يبعد كل منهما عن الآخر 5 كيلومترات فقط، وأنه تمت إضافته العام الماضى ليربط منتجعات وادى النخيل بالطرق الخدمية. وأضاف أن التكلفة المبدئية للكوبرى 40 مليون جنيه، وأنه أصدر تعليمات لشركة المقاولون العرب، بإيقاف العمل فى المشروع، التى كانت قد بدأت فى دق خوازيق حديدية، وبلغت التكلفة الإنشائية له حتى الآن مليونا ونصف المليون جنيه، مؤكداً أن المقاول سيتحمل هذه التكلفة التى تم صرفها حتى الآن.

المصرى اليوم

اصلها كانت عزبة

هو احنا كنا عايشين في فيلم الارض ولا ايه

[fatfouta]

آخر احصائية لتحويلات المصريين فى الخارج هى 9 مليار دولار وهو تانى اكبر دخل لمصر بعد السياحة وقبل قناة السويس

طب مش حرام نتحرم من الانتخابات؟؟؟؟؟؟ واحنا قيمتنا كبيرة كده فى مصر....

بجد الاستهانة بينا حاجة محزنة جدا فى موضوع الانتخابات ده بالذات

[fatfouta]

RT @mshakour: يعنى ايه محمود وجدي؟ يعنى بقاله شهر ماسك و الآثار بتتسرق و الناس بتموت في بيتوها لحد النهاردة و يقولك الشرطة في خدمة الشعب. #Egypt #Jan25

[بركة]

بصي يا فتفوتة انا شايفة ان اللي بيحصل ده تمثيلية

والله أعلم

[fatfouta]

قسم شعب مصر....

http://www.youtube.com/watch?v=DPuY9iOk9uk&feature=youtu.be

[Simba]

اليوم السابع بتخوف الناس من مظاهرات الجمعة بشياكة

وبتظهر المعتصمين بالديكتاتورية برضه بشياكة

قال صفوت حجازى الداعية الإسلامية إن المتظاهرين سيغلقون ميدان التحرير يوم الجمعة القادم إذا لم يتم تنفيذ مطالب الثوار، وسيحاصرون مقر وزارة الطيران المدنى فى حال عقد الاجتماع الوزارى بها كما حدث من قبل، مؤكداً أن المتظاهرين سيحولون المظاهرة إلى اعتصام مفتوح ليس فى ميدان التحرير فقط إنما فى جميع الميادين الحيوية لحين تحقيق المطالب.

وقال حجازى فى مداخلة هاتفية لبرنامج الـ"القاهرة اليوم": "مطالبنا التى نطالب بها ليست جديدة بل هى من بداية الثورة".

يشار إلى أن الشباب المعتصمين بميدان التحرير وزعوا بياناً لهم باسم "بيان رقم 1" أوضحوا فيه مطالبهم التى إذا ما تحققت سيتم إخلاء الميدان، وجاء أبرزها اعتراف الجيش بشرعية الثورة الشعبية، حيث إنه لم يأتِ فى أى بيان من القوات المسلحة ما يؤكد شرعيتها، وتشكيل مجلس رئاسى من أربعة مدنين وشخصية عسكرية، وإسقاط الحكومة الحالية، وتشكيل حكومة إنقاذ وطنى من المستقلين المشهود لهم بالكفاءة.

وأضاف البيان أن تكون أولى المهام التى ينفذها المجلس الرئاسى مع حكومة الإنقاذ هى تشكيل لجنة تأسيسية لوضع دستور جديد للبلاد طبقاً لجدول زمنى محدد، وحل المجالس المحلية بالكامل، وإقالة جميع المحافظين ورؤساء مجالس إدارات الصحف القومية، وكذلك رؤساء البنوك والجامعات.

وأشار البيان إلى ضرورة إعادة هيكلة وزارة الداخلية تحت إشراف مدنى وقضائى، مع إلغاء جهاز مباحث أمن الدولة، والمحاكمة الفورية للمسئولين عن قتل شهداء الثورة والمسئولين عن موقعة الجمل، والإفراج الفورى عن جميع المعتقلين السياسيين قبل وبعد 25 يناير.

كما طالب البيان بحل الحزب الوطنى، وعودة جميع مقاره وحساباته إلى خزانة الدولة، والمحاكمة الفورية والعلنية للرئيس السابق حسنى مبارك ونظامه وأسرته، وتشكيل مجلس قضاء مستقل له سيادة مستقلة.

وأعلن البيان فى ختامه أنهم دخلوا فى اعتصام مفتوح وفاء لدم الشهداء، مؤكداً على أن الثورة بريئة من أى أحد يتحدث باسمها، حيث إنها تعد ملكاً للشعب كله

[Simba]

خليك ديمقراطي

وقيس الضغط بتاعك قبل ما تسمع الاغنية

http://www.youtube.com/watch?v=JCF7vy0Cye8

[aimen]

http://www.youtube.com/watch?v=5547CJzVrgg

مفرمة احد عز للمستندات

[aimen]

خليك ديمقراطي

وقيس الضغط بتاعك قبل ما تسمع الاغنية

http://www.youtube.c...h?v=JCF7vy0Cye8

اقترح على الأخت نهى وكرجل ديموكراسى

الذهاب الى ليبيا فورا أو اليمن كمان شوية

هناك نسختين من مبارك ممكن تلطم عليهم هناك وحتكون موضع ترحيب منهم ان شاء الله لكن محدش يعرف ايه اللى ممكن يحصل لها بعد ما يطيروا بإذن الله

[بركة]

ربنا يظهر كل اللي مستخبي

يارب اجعلهم عبرة لمن يعتبر

[م تيمور المراغي]

حدش يعرف عنوان نهى ؟؟

[capitshino]

خليك ديمقراطي

وقيس الضغط بتاعك قبل ما تسمع الاغنية

http://www.youtube.com/watch?v=JCF7vy0Cye8

مين الاخت ؟

[م تيمور المراغي]

كابيتشو !!

آميه !!

[ام سلمي]

كلنا خالد سعيد| الدعوة للجمعة وصلت لـ 200 ألف في أقل من 16 ساعة وأكد الحضور ليها 20 ألف ..يا ريت كلنا نبعت الدعوة لأصحابنا كلهم على الفيسبوك عايزين نوصل لمليون شخص توصله الدعوة وعايزين نكون بالملايين في التحرير لحد ما يحصل التغيير

http://www.facebook.com/event.php?eid=149010911827423

[ام سلمي]

R.N.N | شبكة رصد

احمد شفيق تعليقا على الثورة

http://www.youtube.com/watch?v=JkUDxyYP6H4&feature=player_embedded

[م تيمور المراغي]

الدنمارك تقدم مساعدة جديدة لمصر وتونس

كوبنهاغن (ا ف ب) - قررت الدنمارك تقديم مساعدة جديدة بقيمة 25 مليون كورون (3,35 مليون يورو) لدعم جهود ترسيخ الديموقراطية في مصر وتونس، حسب ما اعلن وزير التعاون الدولي سورين بيند في بيان.

وجاء في البيان "علينا واجب دعم هؤلاء الناس الشجعان الذين يتجرأون على مواجهة الموت باعينهم في المعركة من اجل الحرية وضد القمع".

واضاف "يتوجب على اوروبا مجتمعة وفي الوحدة التامة ان تقدم مساعدة كبيرة لعملية التغيير التي ولدت في شمال افريقيا (...) وان تعمل على ان تؤدي الى تغييرات ديموقراطية حقيقية".

وسينعكس هذا الدعم الدنماركي خلال الاسابيع المقبلة من خلال تشكيل وحدة لحقوق الانسان في تونس برعاية الشبكة الاوروبية المتوسطية لحقوق الانسان من اجل دعم انشاء منظمات ديموقراطية جديدة في المجتمع المدني.

كما ستعمل الدنمارك على انشاء وحدة لمراقبة التغطية الاعلامية والانتقال السياسي في تونس ومصر وكذلك دعم الاصلاحات الدستورية والانتخابية عبر المعهد من اجل الديموقراطية والمساعدة الانتخابية.

واوضح الوزير الدنماركي انه يتوقع مساعدة اضافية من اجل الاعداد لانتخابات برلمانية في هاتين الدولتين.

وبالنسبة للوضع الانساني في ليبيا، ينوي بيند ان يرسل قريبا مساعدة الى النازحين او الذين فروا من اعمال العنف في هذا البلد.

وستضاف هذه المساعدات الى المساعدة بقيمة عشرة ملايين كورون (1,34 مليون يورو) التي اعلنت عنها سابقا وزيرة الخارجية الدنماركية ليني اسبرسن من اجل الاصلاحات في مصر وتونس.

[fatfouta]

جابر القرموطى "بلوفر شفيق"

http://www.youtube.com/watch?v=lol-MEOn0NQ&feature=player_embedded

[fatfouta]