لو ناوي تشارك في الانتخابات الحق سجل اسمك في الجداول الانتخابية

[شرف الدين]

أنا عايز أفهم يا جماعة

مش الرقم القومي ده معناه

إني ليا رقم غير متماثل مع رقم أي واحد تاني على أرض مصر

وإن الرقم ده محفوظ في قاعدة بيانات مصلحة الأحوال المدنية ... وبمجرد ما نضرب على الكمبيوتر بالرقم ده نقدر نجيب كل بيانات الشخص ده

طب خلونا أولا في انتخابات الرياسة ... عشان دي حاجة مهمة

انتخابات الرياسة واحدة على مستوى الجمهورية

يعني كل المواطنين على مستوى الجمهورية بينتخبوا مرشح واحد من بين عدة مرشحين

طب انا رحت كده المركز الانتخابي في محافظة أسوان ... ولو حتى كنت من سكان اسكندرية اسكندرية

بضغطة واحدة على الكمبيوتر ( ولا عن طريق اسكانر يمسح الرقم القومي ويدخله الكمبيوتر اوتوماتيك وبسرعة عشان ميتعبوش نفسهم في التكتكة الكتير ) ... بياناتي هتظهر .. ويتأكد لهم إني مواطن بالغ له حق الانتخاب

ساعتها يقولولي اتفضل ادخل داخل اللجنة وانتخب.

وبعدين عن طريق التكنولوجي برضه ( أمال احنا عملنا قاعدة البيانات ليه ). يكون خلاص اسمي اتسجل إن فلان الفلاني انتخب مرة .. يبقى خلاص مينفعش ينتخب تاني

فمينفعش أخرج من اللجنة دي وأورح انتخب في لجنة تانية..

وبعدين مينفعش برضه إني أكون ميت وأروح انتخب ... زي ما بيحصل في كوارث البطاقات الانتخابية...

لأن أي شخص بيموت بيتسجل في قاعدة البيانات إنه توفي بمجرد ما تطلع له شهادة وفاة

فلو شخص خد بطاقة الرقم القومي لراجل ميت وراح ينتخب بيها.. لو عدى حتى من موضوع الصورة اللي على البطاقة ( وده صعب لأن الشبه صعب يتكرر )... بمجرد ما رقم البطاقة يدخل الكمبيوتر هتطلع بيانات صاحب البطاقة ... وإنه متوفي

وساعتها القاضي اللي مشرف على الصندوق يصدر قرار فوري بحبس المزور اللي جاي ينتخب ببطاقة الشخص الميت ده سنة عشان يكون عبرة...

بكده تبقى المسألة اتسهلت على الناس ... من أي مكان في الجمهورية يقدر ينتخب.

وفي نفس الوقت ... تزوير نو ... وفيات نو ... انتخاب مرتين نو

ده بالنسبة لانتخابات الرياسة.

طب انتخابات المجلس التشريعي... ده طبعا بيكون حسب دايرة كل مواطن .. يعني مينفعش أكون متسجل في البطاقة إني من سكان محافظة كذا ... وأروح انتخب مرشح في محافظة تانية

دي برضه حلها سهل عن طريق التكنولوجي

كل دايرة على مستوى الجمهورية معروف طبعا القرى أو المدن اللي هيا تبع الدايرة دي ... أو حتى الشوارع والأقسام اللي هيا تبعها...

عن طريق الرقم القومي برضه نقدر نجيب عنوان الشخص ده ... وبناء عليه نعرف هو تبع دايرة ايه بالتحديد.... وطبعا يكون معروف المرشحين اللي في الدايرة دي هما مين ...

لو فرضنا إني شغال في أسوان وأنا من دايرة قصر النيل في القاهرة ... ورحت داخل المركز الانتخابي في محافظة أسوان

رقمي دخل الكمبيوتر ... طلع إن فلان الفلاني عنوانه اللي في البطاقة تبع دايرة قصر النيل ...

يبقى بمنتهى السهولة القاضي المشرف على اللجنة .. يقدر يطبع ورقة انتخابية باسماء مرشحي دايرة قصر النيل ... أقدر ادخل اللجنة وأعلم فيها على اللي أنا عايز انتخبه ... وتتحط في صندوق مخصوص غير الصندوق بتاع الدايرة الأصلية.

وفي آخر الانتخابات الصندوق ده يتفرز والصندوق ده يتفرز ...

وبكده تكون العملية خلصت بمنتهى السهولة

من أي مكان في الجمهورية تقدر تنتخب

تزوير نو ... وفيات نو ... انتخاب مرتين نو .

-------------------------------------------------------------

ده لو احنا حكومتنا كانت اقتنعت فعلا بضرورة عمل انتخابات محترمة ...

لكن الواضح حتى الآن ....

إننا ادامنا كفاح طويل عشان نوصل لمصاف الدول اللي بتحترم إرادة المواطن.

--------------------------------------------

وبالمناسبة أنا من زمان كان ليا رأي في الانتخابات دي ... مش عارف هو ده مكانه المناسب ولا لأ

رأيي إنه مينفعش أي واحد ينتخب

حق الانتخاب ده لابد إنه يكون مقصور فقط على المتعلمين بحد أدنى الشهادة الثانوية أو ما يعادلها ( يرفع الله الذين آمنوا منكم واللذين أوتوا العلم درجات )

لأن الشخص المتعلم هيكون عنده قدرة أكبر على الاختيار الصحيح ...

يعني يقدر فعلا يفهم برامج المرشحين وايه أهدافهم ... وبكل تأكيد هو اللي هيكون عنده قدرة أكبر أنه يفهم ايه مجلس الشعب ده وفايدته ايه.

على عكس الشخص الغير متعلم اللي غالبا اختياره هيتوقف على روابط النسب أو العصبة القبلية والحاجات دي.

وبعدين بالمنطق مينفعش إن 2 أميين رأيهم يمشي على 1 متعلم

تم تعديل 2 مارس 2011 بواسطة شرف الدين

[doha]

انا بقول ياجماعه نقدم طلبات على صفحة المجلس الاعلى للقوات المسلحة نطالب بمده المهلة للتسجيل وكمان زياده الوقت المخصص لتلقي الطلبات بحيث يكون في فترة مسائية واكيد نطلب منهم يصدروا بيان رسمي ينبه الناس للحكاية دي ..

ياريت كمان الي عارف صفحات لاعلاميين بارزين زي منى الشاذلي او غيره يراسلهم برضه ويطلب منهم الاعلان عن ضرورة التسجيل واعتقد لو عندهم مصداقية مش هيترددوا في الاعلان ده ..

[tanash]

Posted 28 February 2011 - 09:22 PM

انا اسمي متسجل في الجداول ومعايا بطاقة انتخابية

سواء قالوا بالرقم القوي او بالبطاقة الانتخابية كده كده بانتخب

وياريت كل الناس تكون ايجابية وتروح تنتخب عشان الانتخابات القادمة انتخابات مصيرية

اما نكون دولة ديمقراطية او تعود الديكتاتورية من جديد

اعتقد ان احنا نرفض موضوع التسجيل في اقسام الشرطة ونصر علي ذلك ونخاطب المجلس العسكري باكترعدد نقدر عليه لانهم والله اعلم

عاوزين يرجعونا للكشوف واسمك موجود او غير موجود الرفض التام يكون هو الصح

واحنا عندنا حجة في الرفض ان الكشوف مالهاش اي لزمة ودي ممكن يكون فيها تلاعب

[aimen]

موقع وزارة الداخلية على الفيس بوك

http://www.facebook.com/MoiEgy

لا احتياج للذهاب لأى قسم شرطة للتسجيل لان الاستفتاءات والانتخابات القادمة سيكون التصويت عليها ببطاقة الرقم القومى ووفقا للكشوف الصادرة من مصلحة الاحوال المدنية ولن يتم استخدام البطاقات الانتخابية

الآلية الجديدة للتصويت تعتمد على استخدام بطاقة الرقم القومى فى الاستفتاءات والانتخابات القادمة

http://www.facebook.com/MoiEgy

[rewsha]

ده لو احنا حكومتنا كانت اقتنعت فعلا بضرورة عمل انتخابات محترمة ...

لكن الواضح حتى الآن ....

إننا ادامنا كفاح طويل عشان نوصل لمصاف الدول اللي بتحترم إرادة المواطن.

--------------------------------------------

وبالمناسبة أنا من زمان كان ليا رأي في الانتخابات دي ... مش عارف هو ده مكانه المناسب ولا لأ

رأيي إنه مينفعش أي واحد ينتخب

حق الانتخاب ده لابد إنه يكون مقصور فقط على المتعلمين بحد أدنى الشهادة الثانوية أو ما يعادلها ( يرفع الله الذين آمنوا منكم واللذين أوتوا العلم درجات )

لأن الشخص المتعلم هيكون عنده قدرة أكبر على الاختيار الصحيح ...

يعني يقدر فعلا يفهم برامج المرشحين وايه أهدافهم ... وبكل تأكيد هو اللي هيكون عنده قدرة أكبر أنه يفهم ايه مجلس الشعب ده وفايدته ايه.

على عكس الشخص الغير متعلم اللي غالبا اختياره هيتوقف على روابط النسب أو العصبة القبلية والحاجات دي.

وبعدين بالمنطق مينفعش إن 2 أميين رأيهم يمشي على 1 متعلم

والله حضرتك لخصت الموضوع كله في الكلام اللي بالاحمر فوق

اما الكلام اللي بالازرق .فوالله والله انا كنت لسه باقوله لزوجي امبارح وبانفس النص وكان راْيي هو شرط الناخب ان يكون معاه ثانويه عامه على الاقل

لان فعلا لا يستوى الشخص المتعلم مع الغير متعلم

[fatfouta]

عاجل | رصد | الانتخاب بالرقم القومى فقط دون التسجيل فى أقسام الشرطة

تم تعديل 2 مارس 2011 بواسطة fatfouta

[ام سلمي]

شبكة رصد | نفي إشاعة الذهاب لأقسام الشرطة لإستخراج بطاقة إنتخابية على الموقع الرسمي لوزارة الداخلية

[fatfouta]

شبكة رصد | نفي إشاعة الذهاب لأقسام الشرطة لإستخراج بطاقة إنتخابية على الموقع الرسمي لوزارة الداخلية

اهى فوق يا ام سلمى واظن ده بيان من مديرية امن حلوان يعنى من الداخلية نفسها مافيش قوائم ولا تسجيل اسماء خلينا نتحضر بقى

[شرف الدين]

وبالمناسبة أنا من زمان كان ليا رأي في الانتخابات دي ... مش عارف هو ده مكانه المناسب ولا لأ

رأيي إنه مينفعش أي واحد ينتخب

حق الانتخاب ده لابد إنه يكون مقصور فقط على المتعلمين بحد أدنى الشهادة الثانوية أو ما يعادلها ( يرفع الله الذين آمنوا منكم واللذين أوتوا العلم درجات )

لأن الشخص المتعلم هيكون عنده قدرة أكبر على الاختيار الصحيح ...

يعني يقدر فعلا يفهم برامج المرشحين وايه أهدافهم ... وبكل تأكيد هو اللي هيكون عنده قدرة أكبر أنه يفهم ايه مجلس الشعب ده وفايدته ايه.

على عكس الشخص الغير متعلم اللي غالبا اختياره هيتوقف على روابط النسب أو العصبة القبلية والحاجات دي.

وبعدين بالمنطق مينفعش إن 2 أميين رأيهم يمشي على 1 متعلم

اما الكلام اللي بالازرق .فوالله والله انا كنت لسه باقوله لزوجي امبارح وبانفس النص وكان راْيي هو شرط الناخب ان يكون معاه ثانويه عامه على الاقل

لان فعلا لا يستوى الشخص المتعلم مع الغير متعلم

والله يا روشة أنا أتمنى فعلا تحقيق ده

لأننا إذا كنا عايزين نبقى زي اوربا والدول المتقدمة

لازم نعرف إننا للأسف المجتمع بتاعنا مش زيهم

نسبة الأمية في مصر عالية جدا

وده بسبب أنظمة حكم متعاقبة كان هدفها كله منحصر في تأمين الكرسي وليس تطوير المجتمع المصري

نسبة الأمية في مصر في بعض الإحصائيات بتوصل 40%

مينفعش أبدا إن 40% من الكتلة التصويتية تكون من الأميين ( مع كامل احترامنا ليهم ولمصريتهم ولوطنيتهم ولكامل أهليتهم )

مينفعش .... وده لمصلحة البلد ومصلحتهم

أنا مش هنسى أبدا يوم انتخابات مجلس الشعب 2001 كنت في صيدلية في بلد أرياف

والستات خارجين رايحين على اللجنة يصوتوا ( تصويت مش صويت ... ولو انه ميفرقش كتير عن الصويت )... وماسكين طبلة وعمالين يسقفوا ويغنوا ( ولا راديو ولا ولاعة * احنا اخترنا رمز الساعة )... زي ما يكونوا رايحين يودوا عفش عروسة

دول مش هيختاروا المرشح اللي يقدر فعلا يحقق برنامجه الانتخابي لأنهم في الأساس أصلا ميعرفوش معناه ايه برنامج انتخابي

دول بيختاروا المرشح اللي من بلدهم ... أو من عيلتهم .. أو من قبيلتهم ... وهكذا.

كمان نسبة العمال والفلاحين دي لازم تتلغي

كان المجلس القديم القانون بتاعه ينص على إن المرشح لابد أن يجيد ( وخلي بالك من يجيد دي ) .... يجيد ايه بقى ( القراءة والكتابة ) ... يعني تكون معاه شهادة محو الأمية

يعني مرشح مجلس الشعب اللي بيحط القوانين اللي تنظم البلد وبيناقش أداء الحكومة وبيحاسبها كل مؤهلاته إنه يكون بيفك الخط.

أما القانون التاني كان بينص إن نص أعضاء مجلس الشعب ( وخدي بالك من دي كويس قوي - نص الكتلة في المجلس ) لابد أنهم يكونوا حاصلين على شهادة متوسطة بحد أقصى

يعني نص أعضاء المجلس فقط هما اللي حاصلين على شهادات عالية ...

أما النص الباقي فيكون معاه شهادة متوسطة - ابتدائية - اعدادية - شهادة محو أمية .... كله ماشي

وده كله اللي مخلي ناس كتير تقول إن فترة الست شهور دي مش نافعة ....

لأن في حاجات كتير لازم تتغير الأول قبل ما يبقى في انتخابات

تم تعديل 2 مارس 2011 بواسطة شرف الدين

[fatfouta]

جلال عامر

إذا لم تتم تنقية كشوف الانتخابات فسوف يشارك الموتى كالعادة فى اختيار الرئيس المقبل

[rewsha]

الحمد لله يبقى كده الخبر اتاْكد ان ما فيش قوائم انتخاب ومش لازم الواحد يسجل نفسه

طب السؤال المهم بقى

مين طلع الخبر ده ونشره وحب يعمل قلق وبلبله عند الناس

وهايستفاد ايه من انه يعمل كده؟

[se_ Elsyed]

طب ... بس أنا مش فاهم حاجه ( يمكن عشان نسيت النضارة في البيت وبأحسس عالكيبورد دلوقت ؟ )

يعني انا كده هاشيل بطاقتي على إيدي ..وادخل اي لجنة وأنتخب زي مانا عاوز ؟

ولا لجنتي هاتبقى في العلوان اللي موجود في بطاقتي ؟

ولا أدي بطاقتي لأي حد مقابل خمسة جيني واقعد في البيت وهو ينتخب لي وأريح نفسي ؟

[fatfouta]

كلنا خالد سعيد

خبر مؤكد: مفيش حاجة إسمها تسجيل في الأقسام لانتخابات البرلمان .. الانتخاب هيكون ببطاقة الرقم القومي حتى لو معندكش بطاقة انتخابية من غير ما تروح لأي قسم .. وأي ورق متعلق في أقسام ده نتيجة الطريقة القديمة في التسجيل للبطاقات الانتخابية

[شرف الدين]

طب ... بس أنا مش فاهم حاجه ( يمكن عشان نسيت النضارة في البيت وبأحسس عالكيبورد دلوقت ؟ )

يعني انا كده هاشيل بطاقتي على إيدي ..وادخل اي لجنة وأنتخب زي مانا عاوز ؟

ولا لجنتي هاتبقى في العلوان اللي موجود في بطاقتي ؟

ولا أدي بطاقتي لأي حد مقابل خمسة جيني واقعد في البيت وهو ينتخب لي وأريح نفسي ؟

أيوة يا سين سين

غالبا لجنتك هتبقى على العنوان المسجل في البطاقة الشخصية

[سكر]

هقولها وبقولها تانى

قبول المصريين التسجيل فى ما يسمى جداول الانتخابات هو قبول للفساد الالكترونى

يا ناس يا هو احنا عندنا كنز كبير اكبر من قناة السويس والله العظيم اسمه قاعدة بيانات الرقم القومى لو تم توظيفها

مش هتلاقى واحد فى مصر ماشى فى الشارع عشان يقضى خدمة حكومة

حرام حرام حرام فى حد يطلع من الحكومة يتكلم عن تسجيل جداول انتخابات

اللى يقول كدة لازم ينعدم فى ميدان التحرير الف مرة

[fatfouta]

خطة ماتخرش الميه ... لتزوير الانتخابات الجاية

قلت أروح القسم اتأكد بنفسى ما هما خلوا الواحد يشك فى نفسه. المهم رحت قسم النزهة اللى انا تبعه، أول حاجة لقيت فيه ناس كتير و سألت فى الاستعلامات فى القسم قاللى: آه لازم تسجل اسمك عشان تعرف تنتخب بالرقم القومى. بقولوا: ايه لزمته طيب مادام بالرقم القومى راح ابتسم ابتسامة بلهاء كده ( الظاهر عشان شعار الشرطة الجديد بتاع الشرطة تبتسم للشعب ده) و قاللى اطلع الدور الأول عند لجنة الجداول الانتخابية. طلعت لقيتهم حاطين على الحيطة الاجراءات كلها و طلع فعلاً لازم الناس تسجل أساميها فى الجداول عشان تقدر تنتخب حتى لو بالرقم القومى و اجراءات تسجيل الأسم هى اجراءات استخراج البطاقة الانتخابية. صورت الاجراءات من على الحيطة عشان كل الناس تعرف و تصدق و يا ريت تهتم.

بغض النظرعن ان اى حد مش ممكن يقتنع بسبب منطقى للكلام ده، سؤال بسيط جداّ؛ ايه لزمة الموضوع ده لو فعلا كانت النية حسنة ان الانتخابات الجاية كلها (دستور – تشريعية – رئاسية) تبقى محترمة لأول مرة فى تاريخنا؟؟؟ و عشان محدش يقول انى بفترى أو بزودها و ببالغ انا هتكلم عن نفسى و هاعتبر انى واحد من النظام النجس اللى لسه موجود و هفكر ادير الانتخابات الجاية ازاى؟ و هحاول استحضر كل الوساخة اللى جوايا يمكن اقدر اوصل لمستوى الناس دى.

أول خطوة: هعمل تعتيم اعلامى كامل عن الموضوع ده. يعنى لا هينزل فى جرايد و تليفزيون و لا أى حاجة. ده انا كمان كنت هسيب منى الشاذلى تقول ان الانتخابات بالرقم القومى بس عشان الناس تفضل مئنتخة كده لغاية يوم الانتخابات بعدين نقولوهم هارد لك. مارحتوش الأقسام ليه تتأكدوا يا وحشين؟؟ ده حتى لو مش عايزين حاجة مش كنتوا تروحوا تتفرجوا على شعار الشرطة الجديد (الشرطة فى "خدعة" الشعب).

ثانى خطوة: هاغتت قوى فى اجراءات التسجيل و دى هما اتفوّقوا عليا فيها. يعنى خلّوا مواعيد التقديم من 8:30 الصبح الى 3:00 العصر بس عشان الناس كلها تبقى فى شغلها. لازم تجيب أصل شهادة الميلاد مش عارف ليه أهو برضه زيادة فى الغتاتة. الجامدة بقى ان آخر معاد للتقديم 8 مارس!!! مع العلم ان فى ملايين عايزة تعمل الموضوع ده. يبقى انا عملت أول خطوة كده ضمنت ان فى حبة ناس مش هتلحق و حبة ناس كبار شوية فى السن و بطايقهم على مناطق بعيدة أو بلاد فا مش هيقدروا و حبة ناس تانية مش هتستحمل الزحمة و القرف فا هايكاسلوا و الاخرانيين دول هايبقوا نفعونى قوى. كده كوّمت حبه حلويين بعد كمان اللى كوّمتهم من أول خطوة.

ثالث خطوة: كان من ضمن شروط الانضمام للحزب النجس "الوطنى سابقاً" ، "القومى مستقبلاً" ان يكون عندك بطاقة انتخابية. يعنى انا بفراستى عارف و فائس ان كل اللى هيتقدموا اليومين الجايين للتسجيل دول تبع الثورة. يبقى الجداول اللى فيها الأسامى الجديدة دى كلها تتفلتر. يعنى نشيل منها 20-25% كده و مش اكتر لحسان الموضوع يتفئس. و لو واحد راح مالقاش اسمه هيلاقى ان اللى حواليه اساميهم موجودة يبقى المشكلة فيه هو. يمكن اسمه قبيح مثلاً، أو هو سكران مش دارى هو راح و لأ و يمكن يكون سمع مقر اللجنة غلط. أو دى ارادة ربنا بقى!!! يعترض؟؟؟ كده يبقى كوّمت حبه كمان حلويين.

رابع خطوة: هستقتل عشان وزير الداخلية و العدل يفضلوا موجودين لحد ما يظبتوا كل الكلام ده قبل الانتخابات و طبعا عشان نضمن ده لازم نسيب رئيس الوزرا برضه عشان نحدش يشيلهم. و بعد ما يدوا التمام نبقى ممكن نسيبهم يتشالوا بقى و مش مشكله ماهى كلها كام شهر و لو الخطة مشيت مظبوط كله هيرجع. هههه.

أظن انا كده عملت اللى عليا و الباقى بقى على باقى الأعضاء يكثفوا مجهودهم فى القرى و الأرياف بالذات لتجميع الناس معانا و شراهم بالفلوس و أهو البهايم كتير و الحمد لله قانون المقطورات لسه فا ممكن نلم كل مقطورات البلد نعبّى فيها الناس يوم الانتخابات.

أظن بعد الخطة دي انا مستنى يبعتولى دعوة جادة للانضمام للحزب القومى (الوطنى سابقاً).

ملحوظة: بحسبة بسيطة، لو كل قسم شرطة يتلقى طلبا لإصدار بطاقة انتخابية كل دقيقتين، والقسم يتلقى الطلبات لمدة ست ساعات يوميا، وهناك خمسمائة قسم في مصر، والمدة المتاحة للناس حتى 8 مارس هي عشرة أيام، فإن عدد البطاقات المصدرة في هذه الفترة سيكون تسعمائة ألف بطاقة فقط، وهو أقل من عدد حاملي البطاقات الانتخابية الحاليين من الحزب الوطني!! يا ترى ثورتنا رخيصة عندنا لدرجة التفريط فيها عن طريق السماح بتنفيذ هذا السيناريو؟؟ :copied: :copied:

[rewsha]

ياجماعه انا لسه متصله بمركز الشرطه اللي منطقتنا تابعه ليه

وسالتهم عن موضوع جداول الانتخاب

اكدوا لي صحة المعلومه

وقالوا لي تعالي سجلي نفسك

والمواعيد من الصبح لحد الساعه 4

انا هاروح دلوقتي واول ما ارجع هابلغكوا بالتفاصيل

[rewsha]

انا روحت وطلعت بطاقه انتخابيه خلاص

التفاصيل :

روحت مركز الشرطه اللي انا تابعه ليه

على البوابه اخدوا مني الموبايل

وسجلوا اسمي وانا داخله .واتطلعوا على البطاقه علشان يتاْكدوا من الاسم

علشان كان ليه بطاقه انتخابيه قبل كده .بس كانت ضايعه من ي راحوا طلعوا الكشوفات وعملوا لي واحده جديده علطول وانا واقفه وختمتها ومشيت.بس لازم طبعا بيشوفو بطاقتي بتاعت الرقم القومي

لكن

كان في واحده ست كبيره عندها 60 سنه بتطلع بطاقه انتخابيه لاول مره

طلبوا منها عدد 2 صوره لبطاقة الرقم القومي وكتبت استماره وهاتروح تستلم بعد كده بطاقة الانتخاب

ساْلتها من باب الفضول مين اللي قالك تطلعي بطاقه انتخاب

قالت لي ابونا في الكنيسه جمعنا وقال لنا لازم تروحوا تطلعوا بطاقات وتنتخبوا علشان كده انا جيت اطلع بطاقه

بس اخر ميعاد لتعبئة الاستمارات يوم 9/3/2011

وكان مكتوب المواعيد انها من يوم 8/12/2010 الى 9/3/2011

يا جماهع مش هانخسر حاجه لو روحنا عملنا اللي علينا وطلعنا بطاقات انتخاب

ارجواو عرفوا اللي ما يعرفش ان لازم يروح يسجل اسمه

بالمناسبه

امبارح في قناة اون تي في .ساويرس في وسط الكلام ذكر موضوع تسجيل الاسماء بتاع الانتخابات وان اخر ميعاد يوم 8/3 ...بس ماحدش من الضيوف علق على الموضوع ده

[aimen]

موقع وزارة الداخلية المصرية

[fatfouta]

موقع وزارة الداخلية المصرية

كده الكلام من وزارة الداخلية نفسها

انا مش فاهمة بقى ليه بيخلوا الناس تروح تسجل اسماءها!!!!!!!!