هل تؤيد علانية عقوبات البلطجة في هذه الفترة بالذات ؟

[se_ Elsyed]

كلنا طبعاً شايفين وحاسين باللعبة القذرة لجهاز الشرطة اللي بيحاول يلوي دراعنا كلنا كشعب وهو لسان حاله بيقول " إشربوا بقى عشان تعرفوا قيمتنا وتعرفوا إننا أسيادكم وورونا الجيش هايعمل لكم إيه "

وبالتالي الأغلبية منهم لم تعود إلى عملها

واللي عاد بيؤدي عمله بمنتهى الإهمال واللامبالاه .. بل بالعكس ده بيعملوا مظاهرات ضد الوزارة لطلبات خاصة بهم وبمرتباتهم .... وأدينا شايفين كم حوادث غريبة وأنفلات أمني واضح ، وفي حالات كثيرة الشرطة بتبقى واقفه زي خيال المآته ولا تُحرك ساكناً والجيش هو اللي بيتدخل

طيب ..في اليومين اللي فاتوا قام المتحدث الإعلامي بإسم المجلس العسكري بإعلان الكثير من الاحكام القضائية العسكرية الرادعة والسريعة ضد الكثير من البلطجية الذين روعوا الأمنين والذين خربوا منشآت البلد العامة والخاصة . .. لدرجة إنها وصلت بهم الحالة الإجرامية إلى سرقة كابلات الكهرباء للمترو ...

طيب حلو قوي ...

إحنا هنا بنغلط نفس الغلطة اللي الحكومة بتغلطها من عشرات السنين وهي ....

كله في المستخبي .... ومش مهم الرسالة توصل لمين .. أو إن القانون يبقى للعقوبة وليس للردع ..

بمعنى .. انا استنى لما تحصل الجريمة .. وبعد كده أعاقب المجرم ...

وليس العكس كما هو الهدف من القانون إنه بيحمي ويردع ويقوم مقام الدرع الواقي للناس قبل وقوع الجرائم والمخالفات ....

عشان ده تلاقي بلادنا متخلفة عن الحضارة .. وهاضرب مثل بسيط ... تلاقي عندنا إحنا بس رادار السرعة على الطرقات مستخبي ودافسينه في حته عشان ماحدش يعرفه ... أو سيارة الشرطة واخده ساتر ولابده في الدُرا ... مع إن في العالم المتحضر كله أماكن الرادارات بتبقى معروفة وعلى جميع برامج الجي بي إس وأماكن تواجد الشرطة بتبقى معروفة .. لإنها مش عملية جباية وسبوبة وعقاب وخلاص ...

ولو نرجع فترة طويلة كده للخلف ... أول ما ظهرت نوعية الجرائم الغريبة والمخيفة والمفزعة في مصر مثل إغتصاب فتاة العتبة ... وفتاة المعادي ... المجتمع كله إندهش وكتير تخوفوا من إنتشار تلك النوعية من الجرائم البشعة .. وقد كان ... فبدلاً من البت في تلك الجرائم بسرعة وحزم وقوة لردع كل من تسول له نفسه إنه يفكر في حاجه زي دي ... لا إزاي ... القضايا قعدت سنين وإستئناف ومعارضة ونقض و و و و .. لحد ما تقريباً كل المتهمين طلعوا براء . والناس نسيت ... والمجرمين تذوقوا حلاوة القانون اللي مليان ثغرات ... وهي ديتها إيه يعني في الأخر محامي بتلاتة تعريفة يدور على ثغرة في إجراءات القاء القبض ولا ثغرة إدارية وخلصت على كده .. لحد الجرايم دي ما بقت عادي كل يوم لدرجة إن يوصل بنا الحال في كفر الشيخ عن قيام 10 مجرمين معروفين للجميع وفي وضح النهار يقتحموا بيت أحد المواطنين هم على خلاف معه ويقوموا بإختطاف زوجته وإقتيادها وسط مشاهدة مئات من المتفرجين والجيران وأهل الحي .. ويختطفوها في سياراتهم ويتناوبوا الإعتداء عليها عادي جداً ....

إينعم إتحكم عليهم بالإعدام كلهم بعد فترة .. لكن ما الفائدة ؟

ما الفائدة إذا كانت الرسالة اللي المفروض اوصلها لكل مجرم أثم بيفكر يعمل كده أو يمشي في الطريق ده .. لا تصل له .. لإنه لا يشاهد برامج التوك شو .. ولا يتابع المنتديات على الإنترنت . ولا ولا ولا

وبالتالي إذا كنت باخاف على المجتمع وامنه وتركيبته ... يبقى لازم يكون هناك قضاء عادل وعاجل وحازم ويضرب بيد من حديد على رؤوس هؤلاء وبشكل علني .... وتكرس كل وسائل الإعلام برامجها للتشهير بهؤلاء وجعلهم عبرة لمن يعتبر ...

وساتحدث هنا بشكل خاص عن البلطجية اللي إتحكم عليهم من القضاء العسكري اليومين دول ....

فإذن كان إتقبض على حوالي 120 مجرم يوم موقعة الجمل الشهيرة وإتحكم عليهم من4 - 5 سنوات سجن ده عرفناه بالصدفة من يومين تلاته .... فأين التحقيقات التي أُجريت معهم ؟ واين إعترافاتهم " وأين أسماء من دفعوا لهم ودفعوهم إلى إرتكاب مثل تلك الجرائم .؟

شيء أخر ..... فرق كبير بين إن الواحد يبقى مجرم ويسرق وينهب عشان يعيش في أوقات عادية يعيشها المجتمع ... وبين إنه يستغل حالة عدم الأمن في البلد ويُفسد في الأرض ويسرق ويروع ويخرب .... فبالتالي ده جُرم مُركب ومقرون بالإفساد في الأرض

وإحنا عارفين إن عقوبة من ضمن عقوبات المحاكم العسكرية بتبقى الإعدام رمياً بالرصاص ... يبقى ليه ما أنفذش ده على الهواء في المجرمين الذين يستحقوا ذلك وأذيع ده على الناس كلها عشان في فترة قصيرة أرجع الامن والأمان للمجتمع

يا جماعة أول أمس قام مجهولون بذبح عضو مجلس إدارة نادي الأسماعيلي لكرة القدم في مكتبه في وضح النهار وفروا هاربين ...

وأمس قام لصوص بفصل رأس حارس عقار - بواب - عن جسده عادي جداً

و و و و و و

لإن هيبة الشرطة ضاعت وهما اللي ضيعوها بانفسهم لإن ليس لهم رصيد عند الشعب

والجيش مش هايبعت عسكري لكل حارة وكل شارع لإن دي مش وظيفته

وللإسف البلطجية أكتر من الهم على القلب .. بل تعدينا تلك الحالة وأنضم لهم الأساتذة الكبار اللي هربوا من السجون أثناء الإنفلات الأمني اللي حدث

يبقى لازم لجنة تتكون من الجيش والشرطة ووزارة العدل لوضع حد سريع ورادع لتلك المواضيع ..

وما ينفعش أطبق عليهم محاكمة عاجلة في الخباثة والخبر يمر مرو الكرام وسط كم الأخبار الأخرى ...

لإن بدون أمان وأمن لن يستطيع الواحد ان يعيش أو يتنفس حتى

[aimen]

محاكمات علنية وتشهير بالناس دى هو الحل

البلد فى حالة حرب مع سرطان الحزب الوطنى والمستفيدين منه من بلطجية وشرطة و رجال اعمال وغيرهم

[Alattar]

تلاقي عندنا إحنا بس رادار السرعة على الطرقات مستخبي وادفسينه في حته عشان ماحدش يعرفه ... أو سيارة الشرطة واخده ساتر ولابده في الدُرا ... مع إن في العالم المتحضر كله أماكن الرادارات بتبقى معروفة وعلى جميع برامج الجي بي إس وأماكن تواجد الشرطة بتبقى معروفة .. لإنها مش عملية جباية وسبوبة وعقاب وخلاص ...

هي العملية كده فعلا..هما عاوزين يوقعوك في الغلط عشان يلموا فلوس بعد كده..بالعكس..لو الناس كلها

مشيت مظبوط..هيدوروا علي طريقة تانية يلموا بيها فلوس من الناس...

فإذن كان إتقبض على حوالي 120 مجرم يوم موقعة الجمل الشهيرة وإتحكم عليهم من4 - 5 سنوات سجن ده عرفناه بالصدفة من يومين تلاته .... فأين التحقيقات التي أُجريت معهم ؟ واين إعترافاتهم " وأين أسماء من دفعوا لهم ودفعوهم إلى إرتكاب مثل تلك الجرائم .؟

أهي النقطة دي بالذات مهمة جدا..واحد بلطجي و عاطل..هيروح يضرب في المتظاهرين كده من دماغه..ولا

لما دخلوا المتحف..كانوا بيكسروا التماثيل..مش بيسرقوها..لو كانوا بيسرقوا كنا قلنا حرامي و مش

لاقي ياكل..لكن يكسر دي يبقي بديهي جدا انه يكون مخطط لعمل حالة فوضي و تخريب و خلاص..و زي ما انت

قلت في الأول يا س س .. الشرطة عاوزة تقول للناس اشربوا بأه..عشان تعرفوا قيمة أسيادكم

و بعدين هل فعلا فيه قوي في البلد أقوي من الجيش؟؟..أنا كنت شاكك في النقطة دي لحد ما اتأكدت منها

تماما..والا . فين فعلا التحقيقات اللي تمت مع الناس دي؟؟

والسؤال اللي سألته قبل كده..جهاز المخابرات بتاعنا اللي كل كام شهر يمسك جاسوس..و تيجي تقرأ

مسكوه ازاي..تحس انك بتتكلم عن عباقرة..و ناس مافيش حاجة تقف قصادها..

لو إن فعلا فيه قوي في البلد من الحزب الوطني أو غيره..و الجيش ده فعلا وطني 100% ما أعتقدش ان

دي حاجة هتكون صعبة عليه...

محاكمات علنية وتشهير بالناس دى هو الحل

فعلا يا أيمن...مافيش غير كده..يمكن الباقي يتعظ شوية