ضباط الشرطة يعلنون الإضراب العام عن العمل السبت المقبل

[pink rose]

مش عارفه حسيت من الخبر ان الاخوة الظباط فاكرينها بقالة او مصنع

و مش هاشتغل الا لما اتعوج على صاحب المصنع عشان يتعدل معايا

هما بيوروا الشعب العين الحمرا يعني و لا ايه

و هو من شهر فات كده كان في شرطة في البلد عشان يعملوا اضراب يوم السبت

هو شغل الشرطة دا مش امن قومي يا خوانا و لا انا فاهمة غلط

طب الاخوة الظباط اللي على الحدود منضمين للاضراب؟

يعني اليهود يدخلوا مصر كده عيني عينك عشان سعادة الباشا الظابط مضرب

جديدة دي و الله و قال ايه الشعب بيبصلنا بطريقة وحشة

كان في مقال الصبح كده بجد جميل عن النظرة الوحشة من الشعب للشرطة و الشرطة يا حبة عيني واخدة على خاطرها

لا دا فقع مرارة بجد بقى

[رضوي]

السلام عليكم ورحمة الله وبركاته

بصراحة .......... جهاز الشرطة في الفترة اللي فاتت دارت حوله علامات استفهام كتيرة جداً

الشرطة بعد نزولها الشارع كانت بتنزل بالنهار .......... بس بالليل بقي دة شيفت الحرامية والبلطجة ...... لدرجة ان عدد كبير جدا من الاحياء الراقية والمتوسطة استعانت بأفراد أمن مدنيين برواتب شهرية ليحافظوا علي أمن تلك الاحياء طول اليوم

النهاردة شوفت ظاهرة انتشرت ف الفترة الأخيرة ,,,,,,, بس كانت اووووووفر النهاردة

جميع أمناء الشرطة لابسين جواكت او سويترز فوق الزي الميري ( والله لو عملوا ايه برده بيتعرفوا انهم امناء شرطة )

الاغرب بقي ........ ان فيه منهم كانوا واقفين علي طرق سريعة داخل القاهرة ........منتظرين وسيلة مواصلات ( يظهر ان فيه عجز في عربات الشرطة ) بس مافيش ولا وسيلة مواصلات حكومية كانت او اهلية رضيت تقلهم !!!!!!!!!!!!!

صحيح جهاز الشرطة مليان فساد

ومعظم رجال الشرطة فاسدين

بس مش لدرجة انهم يستخبوا من الناس ؟؟؟؟؟؟؟؟ ليه يعني؟؟؟؟؟؟؟

قبل الثورة بفترة كبيرة كنت بتناقش مع احد اقاربي عن احوال البلد واحوال الشرطة والفساد اللي ماليها .......... وصلنا ان فساد الشرطة دة لازم علشان يغطي علي الفساد العام في البلد يعني لازم يبقي حاميها حراميها

ومعرف جداً ان اقذر فئة ف الشرطة هي أمناء الشرطة

وأفذر جهاز فهو أمن الدولة

فيه شرفاء في الشرطة ودة شيء ماحدش فينا يقدر ينكره ......... وماتنسوش ان عندنا شهداء في ثورة يناير من الشرطة

فيه بعض قادة الشرطة ..... جاتلهم اوامر بتسليم السلاح ومغادرة المواقع ......... ورفضوا .......... وسابوا مكاتبهم ونزلوا الشوارع في عز الفوضى .... ومن غير سلاح ولا أفراد عساكر ......... وقفوا في الشارع وحاولوا يحافظوا علي الأمن في مواقعهم ..... وكانوا سايبين اهلهم محبوسين ف البيوت خوفاً من البلطجة ........ وهما نفسهم اتحاصروا من البلطجية المسلحين

.... وحاربوهم ...... وفضلوا في مواقعهم ماروحوش بيوتهم الا لما جه الجيش وقالهم اتفضلوا انتوا ( مع اني استغربت جداً من موقف الجيش دة ) وف نفس اليوم نزلوا تاني ......

صحيح الفئة الشريفة دي مش كتيرة للاسف الشديد ............. بس موجودة ........ ليه مانستثمرش الشرفاء دول ؟؟؟؟؟؟؟؟...... والسؤال الاهم ..... ليه الاعلام بيغفل الناس دي ؟؟؟؟ ليه الصحف مابتجيبش سيرتهم ..... ليه كل الصحف بتأكد أن كل رجال الشرطة فاسدين ؟؟؟؟

مع ان كلنا عارفين ان فيه لسة شرفاء ؟؟؟

قبل الثورة ...... كان اللي يعرف أمين شرطة ..... بيقعد يتنطط علي خلق الله ويقولهم انتوا مش عارفين انا مييييييين ؟؟؟؟؟؟؟؟ وأنا اقدر اعمل واسوى ...........

لكن النهاردة الوضع اختلف ...... بقي اللي يقرب لأي شخص من جهاز الشرطة ,,,, بيستخبى من الناس

[fatfouta]

انا كمان حاسة ان دى اشتغالة او تخويفة جديدة

لانهم هيموتوا ويرجعوا شغلهم بس مرعوبين من اللى ممكن يحصلهم لو اى حد فيهم تطاول تانى على مواطن سواء بالشتيمة او الضرب او طبعا السلاح ذى ماحصل

لسه شايفة امبارح الضابط بتاع حادثة المعادى يعن معلشى يعن انت مضروب وقاعد فى المستشفى ولسه واخدلك علقة وبرضو بتكابر....بيقول ان الشرطة مظلومة وبيحلف انهم مظاليم وبيقول لازم بقى نرجع كرامة الشرطة لان احنا بجد اتظلمنا جامد

طيب انت مش حاسس ان انتوا كمان ظلمتونا بكل انواع الاهانة اللى حطت عالشعب؟؟؟؟؟؟؟

يعنى الفيديو اللى اهل الشرابية بيقطعوا الضابط والله بجد لو ا ضابط شافه واكيد هما شافوه.....أكيد هايترعبوا انهم يرجعوا لا كل واحد فيهم يحصلوا كده

ليه مايرجعوش يعتذروا ويقوله احنا هنغير اسلوبنا معاكم واحنا كنا غلطانين انا مش عارفة ليه الكِبر اللى مصريين عليه ده؟؟؟؟

ومع ذك انا مش بعمم...... لكن لازم يثبتوا انهم فعلا اتغيروا مش بس بالكلام

[Dreamwithme]

مش عارفة بصراحة أعلق علي الخبر بأي صورة ؟ mfb: هل ده باعتبار إنهم كانوا في أماكن أعمالهم الفترة الماضية و الأمن كان مستتب

الموضوع ده أرجع لي ذكريات أن الأطباء مش من حقهم يقوموا باعتصامات واضرابات عن العمل لأنه ضد القسم اللي أقسموه برعاية المرضي؟!!!

بغض النظر عن حساسية بعض المهن التي لا تجوز أن تقوم باعتصام واضراب عن العمل يعني مثلا مثلا ينفع الجيش يقرر أنه هيقوم باعتصام؟!

أه يا دماغي ياني bngn:: هو اللي حصل الفترة الماضية غير كافي بالنسبة للشرطة عشان تعرف أهميتها وأهمية دورها في المجتمع المصري

أعتقد أن الخبر ده لو صحيح في التوقيت ده بالذات لابد من محاكمة المنادي له بالخيانة العظمي

[أحمد سيف]

والله يا جماعه ساعات بحس فعلا إن الشرطة عايزه ترجع شغلها بس المشكله انهم مش عارفين هيتعاملوا ازاي مع الناس

يعني صعب جدا واحد اتعلم حاجات غلط وفضل لسنوات يمارس عمله بطريقة غلط وبعدين بين يوم وليله تيجي تقوله اشتغل صح ... ممكن فعلا يكون عايز يشتغل صح بس مش هيعرف لإنه ما اتعلمش

زي مثلا ما تجيب سواق ميكروباص ما اتعلمش قواعد مرور وبيسوق طول الوقت بالفهلوة والدراع وتخليه يسوق في دولة اوروبيه وتقوله هطبق القانون عليك

اللي زي دول لازم يعاد فرزهم وتأهيلهم من أول وجديد ... وطبعا أنا بتكلم عن الرتب الصغيره اللي ممكن تتعلم حاجات جديدة انما الرتب الكبيرة اللي ماشيه عشرات السنين في الاتجاه المعاكس صعب تعلمها من أول وجديد ... دول يلبسوا الجلابيه ويتصرف لهم معاش كويس ويقعدوا في البيت كافيين خيرهم شرهم

[raouf]

طيب ما هم كده كده مضربين لوحدهم ولا هم بيشتغلوا من شهر ؟

[Ahmed Anwer]

زي مثلا ما تجيب سواق ميكروباص ما اتعلمش قواعد مرور وبيسوق طول الوقت بالفهلوة والدراع وتخليه يسوق في دولة اوروبيه وتقوله هطبق القانون عليك

اللي زي دول لازم يعاد فرزهم وتأهيلهم من أول وجديد ...

لما تكلمهم وجها لوجه

بيكون مشكلتهم الفئات اللي بتتكلم عنها دي يا أ / أحمد ،،

يوقلك طب أنتا راجل محترم هتعاملني باحترام و أنا هأعاملك باحترام

المكشلة مش فيك ،، المشكلة في سواقين الميكروباصات و العربجية و قلالات الأدب من الشغب عامة

أنا بنقل وجهة نظرهم بس ،،، مش مقتنع بيها طبعا

[أحمد سيف]

زي مثلا ما تجيب سواق ميكروباص ما اتعلمش قواعد مرور وبيسوق طول الوقت بالفهلوة والدراع وتخليه يسوق في دولة اوروبيه وتقوله هطبق القانون عليك

اللي زي دول لازم يعاد فرزهم وتأهيلهم من أول وجديد ...

لما تكلمهم وجها لوجه

بيكون مشكلتهم الفئات اللي بتتكلم عنها دي يا أ / أحمد ،،

يوقلك طب أنتا راجل محترم هتعاملني باحترام و أنا هأعاملك باحترام

المكشلة مش فيك ،، المشكلة في سواقين الميكروباصات و العربجية و قلالات الأدب من الشغب عامة

أنا بنقل وجهة نظرهم بس ،،، مش مقتنع بيها طبعا

أنا لما ذكرت مثال سواقين الميكروباص لم أقصد مناقشة طريقة تعامل الشرطة معهم .. ولكني كنت أشبّه الشرطي اللي مش عارف شغله بسواق الميكروباص اللي ما بيعرفش يسوق لانه ما اتعلمش صح

ولكن عموما الردّ على ما يقوله هؤلاء الضباط أن المطلوب هو التعامل بالقانون مع الجميع سواء دكتور جامعة أو عربجي

الجميع سواء أمام القانون واللي يغلط يتحاسب

[أحمد سيف]

من مدونة نواره نجم (جبهة التهييس الشعبية)

تبقوا بلد مافيهاش شنب لو نزلتوا تجيبوا الشرطة وقبلتوا ابتزازهم

الشرطة بتلوي دراع الشعب، وبعد ما انسحبوا بشكل مفاجئ وارتكبوا خيانة عظمى في ظل احكام عرفية والمجلس الاعلى كافئهم على خيانتهم وزود لهم مرتباتهم مية في المية، عاملين اضراب من يوم السبت وعايزينا ننزل نجيبهم قال، نجيب لهم بوكيه ورد وشوكولا ونروح نصالحهم

يضربونا ويقتلونا ويذلونا ويخونونا وياخدوا فلوسنا وعلاوة مية في المية وعايزينا احنا اللي نروح نجيبهم

طب احنا نازلين بقى مظاهرة نطالب بتقديمهم كلهم لمحاكمات عسكرية بتهمة الخيانة العظمى

هو حد مشاهم عشان يرجعهم؟ مش هم اللي لموا شنطتهم وغضبوا عند امهم وخرجوا من غير اذن بعد ما كسروا لنا البيت؟

وكمان مش عايزين يرجعوا وبيلووا دراعنا؟

طب خليك عند امك يا شرطة خليها تنفعك.. انت طالق يا شرطة... ومالكيش نفقة كمان ومش حتشوفي العيال

يالا من هنا.. حنجيب ست ستك

وعلى راي منار الخولي قالت الناس اللي وزيرة الخدامات كانت عايزة تبعتهم خدامين يخشوا معهد ست شهور يطلعوا شرطة زي الفل

واهم ريحونا بدل ما احنا محتاسين فيهم وعايزين نعمل لهم اعادة تأهيل

في داهية

[Dreamwithme]

من صفحة ضباط ضد الفساد علي الفايسبوك

داء الى جميع الضباط الشرفاء نرفض اى دعوة لعمل اى اضراب عن العمل لاننا نعلم ا ن الشرفاء من رجال الشرطة تعرضوا للقهر والظلم على مدار السنوات الماضيه وإقصائهم بمعرفة القيادات الفاسدة ورعايتهم للفاسدين وبالفاسدين حدثت نكسة الشرطة فدوركم ايها الشرفاء هو العمل تحت الظروف النفسيه السيئه لبث الطمأنينه فى قلوب المواطنين الشرفاء ياضباط القاهرة الوقت الان للعمل فقط واى مطالبات اخرى تأكدوا ان الشعب سيساندكم فيها اذا تحسنت العلاقه بين الشرطة والشعب وقامت على الاحترام المتبادل للقانون .صوت العقل هو العمل العمل العمل دون انتظار كلمة شكر اصبروا وستنالوا كل الاحترام تحملوا نتيجة ما فعله السفهاء منا

تم تعديل 7 مارس 2011 بواسطة Dreamwithme

[fatfouta]

الشرطة بتلوي دراع الشعب، وبعد ما انسحبوا بشكل مفاجئ وارتكبوا خيانة عظمى في ظل احكام عرفية والمجلس الاعلى كافئهم على خيانتهم وزود لهم مرتباتهم مية في المية، عاملين اضراب من يوم السبت وعايزينا ننزل نجيبهم قال، نجيب لهم بوكيه ورد وشوكولا ونروح نصالحهم

يضربونا ويقتلونا ويذلونا ويخونونا وياخدوا فلوسنا وعلاوة مية في المية وعايزينا احنا اللي نروح نجيبهم

طب احنا نازلين بقى مظاهرة نطالب بتقديمهم كلهم لمحاكمات عسكرية بتهمة الخيانة العظمى

هو حد مشاهم عشان يرجعهم؟ مش هم اللي لموا شنطتهم وغضبوا عند امهم وخرجوا من غير اذن بعد ما كسروا لنا البيت؟

وكمان مش عايزين يرجعوا وبيلووا دراعنا؟

يالا من هنا.. حنجيب ست ستك

وعلى راي منار الخولي قالت الناس اللي وزيرة الخدامات كانت عايزة تبعتهم خدامين يخشوا معهد ست شهور يطلعوا شرطة زي الفل

واهم ريحونا بدل ما احنا محتاسين فيهم وعايزين نعمل لهم اعادة تأهيل

نوارة نجم

[spain]

بصوا بقه من الآخر حل مشكلة الشرطة اللي واخده علي خاطرها دي

كل فرد من الشعب يدفع عشرة جنية في الشهر

و نتفق مع اي شركة كير سرفيس تمسك البلد ،، و نلغي وزارة الداخلية و نستريح

حل رائع

تبقي مشكلة اوكار البلطجية اللي زلونا بيها

[samehmagdy]

للمره التانيه الشرطه بتقوم بخيانه عظمى ضد الشعب ورغم كده بكل كبر وتعالى بيطالبو الشعب بالاعتذار العلنى ليهم وكأن الشعب هو اللى خانهم ووراهم كافه اشكال القهر والذل

فلازم المره دى يكون العقاب رادع لكل خاين وفاسد فيهم

اولا لازم الجيش يعلن التعبئة العامه ويتولى هو مهام الشرطه كامله فى كل مكان فى مصر ويطبق الاحكام العرفيه بشكل صارررم جداا لردع كل البلطجيه والمستهترين بارواح واقدار الشعب

ويبدا التحضير لتولى المهام قبل نهايه الاسبوع الحالى

يتم تقديم كل من شارك فى الاضراب الى محاكمه عسكريه وتكون العقوبه على سبيل المثال

سحب اخر رتبه او ترقيه من كل مشارك فى الاضراب سواء كان ملازم او لواء

عقوبات رادعه بالسجن او الاعدام على قيادات الاضراب

العمل على اعاده بناء جهاز الشرطه من جديد بالاستعانه بالخريجين من كليات الحقوق وغيرها من الكليات ويتولى الشرفاء من الشرطه والجيش تدريبهم وتاهيلهم

[التونسى]

الحل هو الاعتذار من الشرطه المصريه((لمصلحتهم لا لمصلحتنا)) .. بل والندم على الماضى الأليم المكتنز بتجاوزاتهم وتجبرهم.. بل وجرائمهم .. وعلى فكره هذا ما حدث بالفعل من شرطة تونس بعد سقوط بن على .. اما تلك المكابرة و((الاستهبال)) فهى فى غير ((صالحهم)) هم مطلقا ...وليس نحن ..مع الاخذ فى الاعتبار ان قبولنا للاعتذار ((كشعب مصر)) هو تفضل عظيم منا .. يضاهى تماما فى عظمته ..عِظم خيانتهم للوطن

أقول هذا.. وانا واسرتى ... بل ومدينتى كلها .. لا يحمينا الا الله عز وجل برحمته .. وكذا قليل من ابناء الشرطه الشرفاء مع بعض اللجان الشعبيه .. برعاية خير اجناد الله فى الارض

[fatfouta]

لقيت امير كاتب نفس الرد اللى كنت لسه هجيبه من الصفحة الرسمية لحكومة عصام شرف عالفيس بوك

بس هو سبقنى بصراحة

بيان من ضباط الشرطة

.........................

نعلنها نحن ضباط الشرطة المصريين

عدم صحة الاشاعة التى انتشرت مؤخرا

بشأن قيام ضباط الشرطة بإضراب عام يوم السبت المقبل

...ونزلنا الى الشارع

ولن نغادره حتى يعود الامن مرة اخرى لبلادنا

...ونطلب من الاعلام مسادتنا ودعمنا فى عملنا

وليس العكس

نحن بحاجة لكم بجوارنا وليس ضدنا

كما نعلنها اننا فى امس الحاجة الى وقوف المواطنين انفسهم

بجوارنا على الاقل

فقط بالتزامهم بالقوانين

شكرا مقدما لتعاونكم

http://www.facebook.com/Essam.Sharaf.Government

[fatfouta]

ضابط لشبكة رصد

اليوم السابع طلعت اشاعه ان احنا عاملين اضراب معرفش لمصلحه مين انها توقع بينا,بس مفيش اضراب ولا حاجة,وحاولوا تتعاونوا معانا

طب ماقالش نتعاون معاهم اذاى يعنى؟؟؟

تم تعديل 8 مارس 2011 بواسطة fatfouta

[Diab]

اليوم السابع تؤكد كل يوم انها من أذرع النظام السابق

لا أحد ينسي مكالمة المدعو خالد صلاح مع ابن ممدوح اسماعيل

وعندما انتشرت المكالمة علي الانترنت

خرج بمقالة قائلا لقرائه

طز في حضرتك

غير اشاعات الفتنة الطائفية والتحامل علي الأخوان وتصوير مشاكل النوبة كانها بداية انفصال

بالاضافة لفضيحة الجريدة الشهيرة المسماة بسيفون سبورت ومن أين يستقي محررو الجريدة أخبارهم

[hOuSsAm]

خليهم يتسلوا,,,,,,, (كلمة الرئيس الراحل)

دول قلة مندسة,,,,,, (صفوت الاشريف)

لن يقدر احد على المساس بامن الوطن,,,,,,, (اللا عادلى)

----------------------------------------------------

قبل كدة هربتوا وسبتوا البلد وسلطتوا عليها البلطجية ,,,,, ونزلنا بنفسنا نحميها بايدينا وحافظنا عالامن والامان

ودلوقتى اعملوا ما يحلوا لكم,,,,,,,, فاصبحنا من القوة والفهم والحكمة لان نحافظ على ممتلكاتنا (كلمة الشعب المصرى)

انا شايف ان قدام الشرطة فرصة عظيمة لكى يمحى اسم الشرطة من على الوجود ويتحولوا لبلطجية ومساجين ومرتزقة

ومعاهم نفس الفرصة للتصالح مع الشعب ويرجعوا اماكنهم

فليختاروا مصائرهم....... والله المستعان

[محمد عبدالعزيز]

ضباط بمديرية أمن الإسكندرية يطلبون العودة إلى «العمل» وينسقون مع شباب الثورة.. ويطلبون محاكمة الفاسدين فى الشرطة

طالبت مجموعة من ضباط الشرطة بمديرية الإسكندرية بعودتهم إلى العمل مرة أخرى، وقدموا إلى مدير الأمن الجديد، اللواء أحمد عبدالباسط، اقتراحات ومطالب، حصلت «المصرى اليوم» على نسخة منها وتضمنت التنسيق مع شباب «٢٥ يناير» من أجل إزالة الاحتقان بين الشرطة والمواطنين وتحقيق الشفافية المطلوبة فى العمل من خلال وجود الشباب كشهود على سير العمل فى الشارع.

وكانت مديرية أمن الإسكندرية أقامت مؤتمراً جماهيرياً أمام مقر المديرية للتواصل مع الجمهور من أجل التعرف على احتياجاتهم وإزالة الاحتقان الموجود فى الشارع حاليا بين الشرطة والمواطنين إلا أن المؤتمر فشل فى تحقيق أهدافه لقيام أحد الضباط «المكروه جماهيريا» بالحديث للجمهور. مما دفع بمجموعة من الشباب الناشطين بالحديث إلى المقدم فادى التهامى، صاحب فكرة المؤتمر للحديث معه لفتح حوار مفتوح من خلال مجموعة من اللقاءات لبحث أفضل السبل لعودة رجال الشرطة إلى العمل مرة أخرى.

ونفى الرائد حامد محمد فايد تقدم المئات من الضباط باستقالات جماعية وقال : نحن نريد أن نعود إلى الشارع مرة أخرى ووضع قواعد للتعامل مع المواطنين من خلال مبادئ الثورة والعدالة الاجتماعية وتأمين أماكن حجز المتهمين وتوفير الرعاية لهم. مشيرا إلى أن ضباط الشرطة الآن يدفعون ثمن «فاتورة قديمة» مؤكدا أن الضباط عليهم النزول إلى الشارع مرة أخرى ومواجهة هذه الفاتورة لأن الجميع شارك فى الخطأ، فحتى الضباط الشرفاء أخطأوا بالامتناع عن الحديث عن الخطأ. من جانبه قال المقدم فادى التهامى «كنا نعمل من قبل لمصلحة فرد والمحيطين به، وهذا العصر انتهى ويجب أن تعلم جميع فئات الشعب أن الشرطة ليست فى خدمة الشعب فقط بل إنها تخدم وتحمى وتعتنى». مضيفا «ونعتذر رسميا لجميع أطياف الشعب عما بدر من أفعال آذت العديد من مواطنين.

وتضمنت الورقة التى قدمها الضباط إلى مدير الأمن ١٠ مطالب كان على رأسها «التنسيق مع مجموعة ثورة ٢٥ يناير إعلاميا وفعليا بتواجدهم مع القوات العاملة بالميدان كمراقب» و«تحديد حالات استخدام السلاح وتعلن للمواطنين وتعلن للجرائد والإعلام المرئى». و«تحديد الفاسدين بمديرية أمن الإسكندرية والعمل على استبعادهم من المديرية».

كلام جيد وننتظر تفعيله على أرض الواقع ومحاسبة المسئولين عن دماء الشهداء.

[mekkawy]

بعد القراءات و المشاهدات نقدر نقول لليوم الساقع زي ما قالوب للمواطن كتيييييير

طز في حضرتك :closedeyes: