الإعتصامات والمظاهرات الفئوية ... وخيانة الثورة الشعبية

[se_ Elsyed]

للاسف إن ما يحدث منذ أيام من إعتصامات فئوية لمطالب خاصة ... يعتبر خيانة للثورة

الثورة الشريفة التي قامت من أجل مصر كلها مش من أجل فئة خاصة ..

اعلم إن هناك فئات كثيرة وقع عليها ظلم عظيم طوال السنوات العجاف الماضية

لكن التهديد بالإضطرابات والتوقف عن العمل من فئات كثيرة في المجتمع للوي دراع البلد - زي ما بنقول في الفلاحين " يا تحلبي .. يا أكسر قرنك " ده مثل فلاحي . وفيه تهديد للبقرة إما الحلب وإدرار اللبن أو القتل ...

طب إشتغلوا الأول وإرجعوا دوروا عجلة الأنتاج وبعدين نتكلم .. عشان ما نندمش على اللي حصل في الثورة واللي ناس كتيرة خلالها شالت كفانها على إيدها عشاننا . ومنهم من أستشهد ودمه لسه ما بردش ...

وأعتبرها خيانة لإننا في حالة أشبه بحالة حرب . ومش معقول نستغل الأحداث عشان نفرض شروطنا

وللأسف هناك إستجابة فورية من المجلس العسكري الأعلى ومن الدكتور عصام شرف لبعض تلك الطلبات ... والتي لن تنتهي والتي ستخرب البلد وتدخلنا في حالة فوضى لا نهائية ولا يعلم مداها إلا الله

- بالأمس تقدم رئيس جامعة القاهرة بإستقالته هو وجميع عمداء الكليات وعلقوا عملهم حتى لإشعار أخر .. لإن في طلبة تظاهروا مطالبين بإستقالته وتنظيم إنتخابات حره لإختيار رئيس الجامعة والعمداء بالإنتخاب..

طب إصبروا شويه حرام كده .

أنا معكم إن إختيار هؤلاء كان بيتم من رئيس الجمهورية مع أمن الدولة مباشرةً وإن من ضمن المؤهلات والشروط الواجب توافرها في أصحاب تلك المناصب إنه لازم يكون عنده ولاء تام للسُلطة ...

لكن ننتهي من الأهم ثم المهم ..

- ومن يومين .. المجلس العسكري يستجيب للمطالب الطُلابية ويعزل رئيس جامعة الزقازيق ..

!!!!!!!!!!!!

مليون علامة تعجب ... إزاي وليه في الوقت ده وبالسرعة دي ؟

http://www.youtube.com/watch?v=TBioJT-N7WU&feature=player_embedded

[Alattar]

ما هو مش كل الناس يا سين سين هتفهم انهم كده بيعكوا الدنيا

فيه ناس كتير من اللي انت بتتكلم عنهم دول ما تفرقش معاهم أساسا حدوث ثورة من عدمه..و ممكن

يكونوا ما شاركوش فيها من الأساس..لكن دلوقتي حاسسين ان المسئولين كلهم بيحاولوا ينالوا ثقة الشعب

عشان كده عاوزين يركبوا الموجة و يتدلعوا و يطلبوا اللي هما عاوزينه براحتهم.

أنا شايف ان حل المهزلة دي ان مطالبهم ما تتحققش كلها مرة واحدة..و يتم التعامل معاهم بحزم شوية

و ان اللي مش هيشتغل و يعطل الدنيا بالطريقة دي يبقي بيعرض نفسه لمساءلة قانونية و ممكن اعتقال

كمان لو اقتضي الأمر

[Simba]

وللشعب ان يختار ما بين الاستقرار والفوضي !!!!

[أسد]

المسألة دي سببت لي إزعاج كبير

خصوصاً ما يحدث في المؤسسات التعليمية والجامعات

نحن في مارس .. والسنة الدراسية ضاع منها الكثير

الإستمرار في هذا العناد قد يضيع سنة ومن عمر الطلاب

اأعتقد أنه يجب فعلاً التريث في الإستجابة لتلك الطلبات

ويجب على الناس الوعي بأن ما يقومون بفعله يصب في غير مصلحتهم

[hOuSsAm]

للاسف اللى بيحصل ده انانية

وخسارة كبيرة للبلد

مطالب الثورة معظمها تحقق والمطالب الفئوية دى مش من مطالب الثورة

هما بيستغلوا نجاح الثورة لتحقيق اهداف شخصية

وللاسف البلد مش مستحملة

عايزين نبدا شغل بقى

لحد دلوقتى مش مستوعب الدراسة هتمشى ازاى والامتحانات هتبقى امتى

يا هيطسلوا لاما هيطسلوا

ارجو انه يكون فيه هناك حد حكيم يتكلم مع الناس ويهديهم

لان معتش حد عنده ثقة فى حد

وكله بيخون التانى وكل واحد ليه راى

للاسف مفيش قائد يشيل الليلة

كل واحد ماشى بدماغه

ادعو الله ان الامور تمشى تمام

[tarek hassan]

أنت تمشي الوقتي تلاقي البلد بتتعرض لعملية ابتزاز فجة والغريب الناس السلبية قبل كده هم الآن الأعلي صوتا والأكثر مطالبا في كل مكان الوقتي تلاقي ناس واقفة بلافتات وشعارات مع إن اللي عملوا الثورة واتعرضوا للخطر مطلبوش حاجه

وقدر لي أن أقف وجها لوجه مع أحد الاعتصامات التي تطالب بتعيين المتعاقدين وبحمد الله كان معي خبر تعيينهم وانفض أكثرهم إلى عملة راضيا ولكن البعض الآخر كانت له مطالب خاصة بالنقل وغيره ولم يشأ أن يقوم لعمله واضطريت استمع لرزالات كتيرة منذ الصباح وحتى الساعة الثالثة دون أقوم بعملي في التوجيه للغة العربية وطبيعي في هذه الظروف لا يمكن محاسبتهم على تضييعهم للعمل

[se_ Elsyed]

صباح لوي الدراع

حصل موقفين النهاردة بالصدفة .. والله لو مؤلف فيلم مش هايعرف يعمل الكومباريزون دي

- باتصل بأخويا في مصر النهاردة الساعة 10 بأطمن عليه .. فسمعت حواليه زحمه . قال لي ده أنا واخد كل الناس اللي شغالين معانا وكل أصحابنا وبأطلع لهم رخص سواقة .. قلت له إشمعنى هما بيفرقوا زيت وسمنه عالرخص ؟

قال لي إدارة المرور عاملة أوكازيون ولو عرفت تفتح باب العربية .. بيقول لك مبروك إنت أخدت الرُخصة والظباط بقوا في منتهى الوداعة ..

قلت أه يا ثورة .. حرام عليكم يا ظلمه إحنا ما كناش متفقين على كده

-----------

وبالصدفة ..

بعدها بساعتين أو أقل لقيت اختي بتتصل بي من الدنمارك وهاتك يا عياط أنا قلت في كارثة وقلبي وقع .. المهم هديت شويه ولقيتها بتقولي : أنا في مدرسة السواقة دلوقت وسقطت في الإمتحان عشان دوست عالخط ...بعد دراسة لمدة 6 شهور - ملحوظة معاها رخصة مصرية من 5 سنوات وعندها عربية أخر موديل -

طبعاً بعد ما شتمتها عشان كانت هاتموتني بالسكتة القلبية ... قلت لها في داهية الرخصة والعربيات كلها .... تقوم تقول لي : والنبي أمانة عليك تروح تعمل لي عُمره وتدعي لي في مكه عشان أنجح وأعدي أحسن أنا زهقت وحاسه إني هاموت ومش هاخد الرخصة في أم البلد دي ..

-----------

تفتكروا الدنمارك محتاجه ثورة هي كمان ؟

أو نصدر لهم شوية ثوار يعملوا " ثورة الزبدة " عشان الأمور تتسهل عندهم ؟

[أحمد سيف]

سيد حباره ورفاقة يسرقون ثورة الشعب المصري

[jasmin hamed]

انهارده كان فى ٤ مظاهرات قدام رئاسة الوزره واحده ناس عايزه شقق و ناس عايزه شغل و ناس عايزه وزير الطيرات يمشى و ناس سلفيه عايزين كامليا

رحمتك يا رب هو خلاص مافيش دم ده الواحد زمان لو حس ابوه مزنوق ماكنش بيطاب

المصروف مافيش اى احساس بحال البلد مراعاه للمصايب المتلتله

اففففففففف

[الغريب]

يا جماعة الله يكرمكم مفيش داعي للقلق المبالغ فيه

أحنا بس علشان مغتربين مزودينها كالعادة

تفائلوا بالخير تجدوه

الناس كانت عطشانة حرية وكله الوضع عنده زفت وقالوا نطالب بالمرة وهي البلد هتفتح حضنها لينا كل يوم

معلش خليكوا متفائلين بالله عليكم وبلاش حس اليأس ده

والله كل ما أدخل المحاورات أتغم

أنا عن نفسي مثلا لو شغال في هيئة السكك الحديد مثلا والراتب بتاعي زفت وطين ، ولاقيت البلد أنصلح حالها وجه وزير جديد يفترض أنه نزيه مفيش مشكلة لما أعملي مظاهرة لمدة يوم :lol: مش طمع بس علشان يعرف أن الناس اللي شغالة في المرفق ده ليهم مطالب ، وتاني يوم تلاقي الأمور أتظبطت والناس رجعت شغلها لأنهم عارفين أن الوزير عرف مطالبهم خلاص

الله يكرمكم لا داعي للقلق الزائد

هدي نفسك شوية أستاذة جاسمين وأنت يا عم س س

تفائلوا بالخير تجدوه

ومننساش ربنا هو اللي حررنا وهو اللي قادر يحفظ مصر من أي فوضى

فيينك يا مدام مصرية متغربة :)

تم تعديل 8 مارس 2011 بواسطة الغريب

[Om Zayd]

للاسف .. ناس معندهاش ضمير بتحاول تفرض اتاوات

و اللي يخنق بجد ان حزب الكنبة بيدفع لهم و بعدين يتدور يشتم في الثورة و التحرير

طب اعملوا منظر و ارفضوا .. هيموتوكم كلكم يعني؟؟

البلطجية دول جبنااااااااااااااااااااء جدا جدا

بس ازاااي ؟؟ الاسهل يدفعوا و بعدين يحملوا غيرهم المسئولية

ربنا يصلح الحال

[رضوي]

كل قطاع من قطاعات الدوله النهاردة فيه مظاهرات ومطالبات فئوية

مش بس الموظفين عايزين تحسين لأوضاعهم

ولا الطلبة عايزين اصلاح في الجامعات ( بالمناسبة في احدي أشهر الجامعات الخاصة بالقاهرة كان فيه مااشبه بالمظاهرة ........... كانوا بيطلبوا اقالة صاحب الجامعة ........ ايوة رجل الأعمال اللي بيمتلك الجامعة ...... مش العميد مثلاً ولا رئيس القسم ........ طيب دة يستقيل ازاي ؟؟ يبيع الجامعة مثلاً لحد تاني )

فيه كمان مظاهرات فئوية لناس طالبين شقق ( وكأنهم اطردوا من بيوتهم بعد الثورة ) ......... وللاسف لم يكتفوا بالتظاهر والاعتصام أمام مجلس الوزراء .......... لا..... طلعوا علي أحد الطرق الرئيسية ووقفوا الدنيا كلها ( هو دة اسلوب في التظاهر علشان ياخدوا حقهم ؟؟)

غير كل دة ........... ماهر الدمياطي بعد لما أعلن الجيش امبارح اقالته من جامعة الزقازيق ....... طلع النائب بتاعه النهاردة وكذب الخبر وقال ان الجيش مالوش سلطة علينا وماهر ابو المعاطي موجود في منصبه ....... الطلبة طبعاً ثاروا أكتر وبهدلوا الدنيا وشتموا الجيش وكانوا عايزين يتعدوا علي الجيش ؟؟؟؟؟؟؟؟؟؟

نعم ........... دة كلام ؟؟؟؟؟؟؟؟؟؟؟ ايه الاسلوب دة ؟؟؟؟؟؟

ماحدش انكر حقوق الناس دي ............. ولا حد قال اننا نهملهم .............. لأ ....... بس نشتغل وندي الحكومة فرصة ......... نشتغل وندور حركة التنمية ......... ولو المطالب دي مااتحققتش اعملوا مظاهرات واعتصامات زي ماانتوا عايزين

لكن نمشي في اي مكان نلاقي مظاهرة

يعني عند مجلس الوزراء كل يوم مظاهرة واعتصام والناس هناك قاعدين ببطاطين ونايمين هناك ............ اتمشي شوية لحد اي وزارة من الوزارات المجاورة تلاقي مظاهرة ........... طبعاً البحث العلمي مافيش قدامه حاجة لأنهم كلهم اتجمعوا عند التعليم هناك في سعد زغلول

حرام بجد

طيب فين الناس اللي بتشتغل ؟؟؟؟؟؟؟؟

محتاجين بس نشتغل لحد لما اوضاع البلد تستقر ونطلع كل الفاسدين ....... وبعد كدة كل حاجة ان شاء الله هتتحل

[سقراط المصري]

المسألة دي سببت لي إزعاج كبير

خصوصاً ما يحدث في المؤسسات التعليمية والجامعات

نحن في مارس .. والسنة الدراسية ضاع منها الكثير

الإستمرار في هذا العناد قد يضيع سنة ومن عمر الطلاب

اأعتقد أنه يجب فعلاً التريث في الإستجابة لتلك الطلبات

ويجب على الناس الوعي بأن ما يقومون بفعله يصب في غير مصلحتهم

أخي الحبيب أسد

لاتعلم مدى معزتك عندي وانا مقصر معاك كتير... واكيد انت فاهم... وربنا يزيد المحبة ويكتر من افكارك ومداخلاتك الجميلة

خدوا الشواهد دي من ارض الواقع ومن اخوكوا سقراط:

1- طبعاً أن ضد المطالب الفئوية ومظاهرات الجامعة لأجل الطلاب

2- معظم الأساتذة اللي مش أفاضل خالص واللي مضيعين وقتهم في الجامعة في كتابة المذاكرات ضد بعضهم والفئوية وانت معايا ولاضدي....... كلهم اشتروا طقم بدل جديد.... وتظبيط جواحب..... وشوية صبغة شعر..... وكل واحد بيجهز نفسة لانتخابات العمادة.

3- اسعد الدكاترة الان هما دكاترة الاخوان (مش ضدهم ولا معاهم)..... ودول مطالبهم لا أول لها ولا أخر ... لدرجة أني بحس ساعات ان هما مش عارفين هما عاوزين إيه بالظبط.

4- كل واحد عمال يتكلم وعامل فيها ابو عرام .... ونظام انا اللي هجيب لكم حقكم وحاجات مندي.

5- العمداء مش كلهم وحشين.... ولكن العاطل الان بتاخد مع الباطل

6- العمداء منزلين شوية قرارات مضحكة لارضاء المعيدين والمدرسين المساعدين..... طيب كان فين الكلام ده من زمان.

7- الاتجاه الان هو محاربة الدكاترة الشباب علشان عارفين ان العين عليهم وممكن لو العملية بالتعيين يختارو الشباب..... كل عبدة مشتاق بيدور في دفاتر وتاريخ زميلة عشان نشر الغسيل.

8- النظام القديم عاص او لوث كل اساتذة الحامعات..... الا من رحم ربي....

9- الطلاب عاوزين يشيلوا "س" من الدكاترة عشان مش عامل حواجبة ويجيبوا "ص" عشان بينجح.... دة كلام سمعته ولكن لم اراه بعيني.... لاني اعتقد ان الكلام ده نوع من انواع الشحن ضد الطلاب

10- معظم وغالبية الطلاب عاوزين يمشوا امورهم ويخلصوا الترم على خير.

11- على مسئوليتي الشخصية 90% من اساتذة الجامعات معلوماتهم توقفت عند ستينات القرن الماضي.... وهؤلاء فاضين فقط للشكوي والخناق

12- اقسم بالله الجامعات المصرية فيها نسبة 10% من الاساتذة على اعلى المستويات العلمية والكفاءة .... والجامعات قايمة فقط على هذه النسبة البسيطة اللي بيشتغلوا وحاسين ان التدريس امانة

13- اعضاء هيئة التدريس .... والتمس لهم العذر فيما يفعلوه........... يشحتون

[pink rose]

الناس دي اكيد مخابيل بجد

ايه الاحتفال العالمي للمرأة و شوية ستات لامين بعض و رايحين التحرير يعملوا مظاهرة و يهتفوا و يردوا على بعض

بيقولوا عاوزين حقوقنا عشان احنا شاركنا في الثورة

و واحدة بتقول عاوزين نحضر الاجتماعات اللي بتحصل مع المجلس الاعلى للقوات المسلحة لازم نتساوى بالرجال اللي بيحضروا

و واحدة بتقول عاوزين وزيرات ستات في كل الوزارات طب حد عاقل يفهمني الجملة الاخيرة دي بس

:blink: هو في ايه؟؟؟؟؟؟؟؟؟؟؟؟؟؟؟؟؟؟؟

[عنبو]

اينعم المطالب الفئويه مش وقتها خالص

ولكن مش كل الناس عندها وعى كافى علشان تعرف ان الكلام ده مش وقته خالص

ويمكن ده يكون راجع ان النظام القديم قتل عندهم الانتماء الى البلد وجعل

كل واحد نفسى نفسى ثم يموت الاخرين واستحاله تلاقى ناس من دول شاركوا فى الثوره

لان اللى شارك فى الثوره مكنش عنده مطالب شخصيه واكيد هيبقى فاهم ان الكلام ده مش وقته

ولكن علشان نحل الوضوع ده لازم يكون القرار حاسم وقاطع

يعنى نقعد مع الناس ونشوف مطالبهم هل هى مقبوله ام مبالغ فيها لو مقبوله يبقى تنفذ او نوعدهم بالتنفيذ فى وقت اقصا ... مثلا

لو مبالغ فيها يبقى نفهم ان ده كده مبالغ فيه وا شاء الله لما العمله تمشى وعجلة الانتاج تدور هنظر فيها تانى

وافقوا كان بها رفضوا يبقى مافيش غير اننا نسيبهم معتصمين وهما هيتعبوا لانهم مختلفين عن الثوار

واللى يعمل منهم شغب او تخريب يطبق عليه الاحكام اللى بتطبق على اى واحد فى الوقت ده

وبالنسبه لطلبة الجامعه ممكن استاذ جامعى محبوب الناس بتثق فيه وبتحبه زى مثلا الدكتور محمد مرسى فى جامعة الزقازيق

يقعد مع الطلبه ويفهمهم ان الكلام ده مش وقته واكيد طلبة الجامعه هتتجاوب معاه

تحياتى

عنبو

[شرف الدين]

يا جماعة

لعلنا نسأل أنفسنا ... هل هذه المظاهرات تشبه مظاهرات التحرير ...

يا سادة .. مظاهرات التحرير لم تقطع طريقا ولم تحرق مسجدا أو كنيسة أو بيت. ولم تتحرش بإمرأة ..

على عكس كل المظاهرات التي تحدث الآن ...

لماذا لم نسمع عن هذه المظاهرات أيام أحمد شفيق

أيام أحمد شفيق كانت توجد مظاهرات فئوية صحيح .. لكنها كانت مظاهرات بسيطة ولم تخرب أو تكسر شيئا ... ولم تكن أبدا بهذه الحدة.

وهذا يوضح تماما من يحرك هذه المظاهرات .. ومن يسوقها

بخصوص موضوع عميد جامعة الزقازيق

أنا أعرفه شخصيا ... وسبق وأن درس لي أيام الكلية.. بل وحدثت مواجهات شخصية بيني وبينه

هذا الرجل بالفعل لا يصلح أبدا لرئاسة الجامعة لأنه بالفعل من رجال الحزب الوطني المخلصين.

لكنه كفاءة علمية بالفعل.

ليس من المنطقي الآن إزالة كل القيادات .. يجب الصبر على قيادة الجيش ...

هي المشكلة أن البعض يرفع للأسف مقولة الأخ ( scorpion ) في أحد مواضيعه التي فتحها منذ فترة قريبة

البعض يرفع شعار الآن ودون تقسيط...

شعار ( دون تقسيط ) هذا سيؤدي إلى كارثة

[لماضة مصرية جدا]

للاسف إن ما يحدث منذ أيام من إعتصامات فئوية لمطالب خاصة ... يعتبر خيانة للثورة

الثورة الشريفة التي قامت من أجل مصر كلها مش من أجل فئة خاصة ..

اعلم إن هناك فئات كثيرة وقع عليها ظلم عظيم طوال السنوات العجاف الماضية

السلام عليكم و رحمة الله و بركاته

متفقة مع حضرتك جدا استاذي و اري ان عبارات حضرتك السابقة فوق تنطبق بشدة علي موضوع اضرابات الشرطة لو فرضنا انها صحيحة

اللافت للنظر ان كل المطالب دي مشروعة و مشروعة جدا

الناس كلها زي ما تون بتتعلم تمشي و بتتعلم تتكلم....زي الطفل الصغير...و بالتالي اول ما داس برجله علي الارض عايز يجري

رايي الشخصي

1- احترامي الشخصي لكل المظاهرات الفئوية....لانها بتفضح حجم كبير من الفساد اللي كنا عايشين فيه...و في نفس الوقت انا بعتبرها بنك افكار للحكومة الجديدة انها تشتغل عليها لو عايزة اصلاح حقيقي يرضي الشعب

2- ليه ميتمش الاعلان عن تشكيل لجان تستقبل التظلمات في اي مجال....و مهمتها ايضا تقصي الحقائق ما هو مش معقول برضه ان اي حد هيطلع يمسك خشبة و يعلق فيها ورقة يبقي هو علي حق....لازم يكون فيه تقصي قبل اتخاذ اي قرار

3- بلاش اي قرارات ترضية متسرعة....مع انها بتفرح الناس....بس بصراحة بتخوفني...لان ده معناه اني لو عايزة حاجة يبقي اعمل كده و اضغط و هاخدها....(سلوك طفولي اوي....بس واضح انه بيجيب نتيجة)

4- بدل ما احنا كل يوم عمالين نسمع خبر فساد لما الريحة عمت عينينا.....ليه ميكونشي فيه اخبار كتير من لجان التظلمات دي عشان الناس تحس انه فعلا فيه اهتمام بمطالبهم و رغبة حقيقية في الاستحابة بس بعد التثبت من احقيتهم

الثورة المفروض بتعلمنا.....يعني ايه نسلك القنوات الشرعية في التعبير.....و يعني ايه قنواتنا الشرعية لا تتعارض مع قيمنا و اخلاقنا و اولويات الوطن في المرحلة دي....

الناس لازم تتبني عندها ثقة....مش مع جهاز الشرطة زي ما احنا متخيلين.....لازم نثق ان فيه نظام قائم علي العدالة و رد المظالم....و ده المفروض من اولويات المرحلة الجاية....و يقترن بممارسات عملية مدروسة

تحياتي استاذي

[الســـاري]

سيد حباره ورفاقة يسرقون ثورة الشعب المصري

إنه (سيد حبارة).. الاسم وهمي طبعًا لكنك سوف تعرفه بالتأكيد .. تراه في كل مكان .. تعرفه من شاربه والنظرة الخبيثة على وجهه، والطاقية البيضاء التي لا ينزعها عن رأسه أبدًا لأنها (من الحجاز).. تعرفه من الدراجة التي يصر على أن يركبها عكس اتجاه المرور.. ينظر راكب السيارة لليسار، متحينًا بكل حواسه فرصة يخطفها كالقط وسط سيل السيارات المنهمر .. عندما تحين الفرصة يثب بالسيارة، ليفاجأ بسيد حبارة مندفعًا كالسهم على دراجته قادمًا من اليمين .. فليجرب أحد راكبي السيارات أن يلمس حبارة في هذه اللحظة، ولسوف تنهمر عليه قائمة فريدة من الشتائم تتعلق بنشاطات أمه الجنسية. إن حبارة يحمل حقدًا هائلاً نحو راكبي السيارات، وفي أول ثورة أو انتفاضة أو شغب سوف يحرق سيارتين أو ثلاثًا قبل أن يعرف سبب الشغب

سوف تعرف حبارة وهو يركب دراجته في الأيام المطيرة وقد أدخل سروال البذلة في الجورب حتى لا يتسخ، وهو يطلق على هذا لفظ (التقفيز) وقد تعلمه من أيام الجيش، ويحمل في يده عصا (غلية) لا تعرف الغرض منها لكنه مصر على حملها .. يلبس كل ثيابه ويلف حول عنقه كوفية صوفية كأنه في سيبيريا لأنه يؤمن أن البرد هو منبع كل الأمراض .. ولسبب ما يصر على أن يلبس بدلة كاملة في أيام المطر هذه .. سوف يتطاير عليه بعض الوحل من سيارة تمر بجواره، فيتوقف على الفور ويطلق سبة بذيئة ويلتقط قالب طوب من على الأرض ليقذفه في الزجاج الخلفي للسيارة .. من أهم مزايا (سيد حبارة) أنه لا يملك نفسه ساعة الغضب، ولا تهمه العواقب ما دام سيفش غله لحظيًا

ـ(حبارة) عامل في مصنع او موظف في إدارة حكومية ما ، وهو لا يمارس أي عمل تقريبًا سوى نقل القيل والقال وكيف إن (الملاحظ / المفتش / رئيس القلم) رجل مسخرة ديوث تلعب به زوجته كما تشاء .. يتبادل الدعابات الجنسية مع زملائه خاصة ما يتعلق منها بليلة الخميس والكوارع وضعف الرُكب والجمبري .. يرى جريدة مع واحد من رفاقه فينظر لها نظرة زائغة لا ترى ويقول: "بلد بايظة".. هكذا بلا أية تفسيرات، هنا يطلب منهم رئيسهم مهمة ما فيثور ويختلق مشكلة ويقف لساعات صائحًا: مش منفذ .. لو الوزير نفسه جه دلوقتي مش منفذ

تنتهي هذه الضوضاء عند أول شخطة حقيقية من (الملاحظ / المفتش / رئيس القلم)، فينفذ لكن حقده يتزايد، ومعه يؤلف المزيد من الحكايات البذيئة عن المفتش ذي الميول الشاذة جنسيًا أو الملحد

إنه مظلوم دائمًا في نظر نفسه .. غير قادر على الحياة لكنه غير قادر كذلك على الاحتجاج

ـ(سيد حبارة) قد أيد كل العصور في مصر لكنه يكره الحكام كراهية عمياء .. لا يوجد تناقض هنا .. إنه يكره عبد الناصر بشدة لسبب لا يذكره، لكنه يرى صورته في فيلم أو مسلسل فيصفق له بحماس .. كان يكره السادات ثم مر موكب السادات أمامه فوجد نفسه يصرخ هاتفًا: بالروح .. بالدم . نفديك يا سادات

منذ أعوام طويلة جاءت مذيعة تلفزيون تسأله عن الشيء الذي لا يروق له في برامج التلفزيون، فقال العبارة التي أعدها وحفظها وسمعها لنفسه عدة مرات: التلفزيون مش بيقدم وعي اشتراكي للناس .. عبارة لا يفهمها لكنه يحفظها ويشعر بأنها عميقة

بعد أعوام قابلته مذيعة أخرى وسألته عما لا يروق له فقال في حماس واللعاب يتطاير من فمه: التلفزيون ما قدمش حاجة تناسب 6 أكتوبر

منذ عام جاءت مذيعة أخرى تسأله عن رأيه فقال : التلفزيون بيقدم مناظر عريانة

برغم هذا هو لا يفوت منظرًا واحدًا من تلك المناظر على الفضائيات التي تأتيه بـ (الوصلة).. يتابع المنظر بعين جاحظة حمراء توشك على الخروج من محجرها .. وهذه الشهوة تتحول إلى حقد والحقد يتخذ طابع الورع المشمئز الغاضب .. هو يشتهي الفنانات جدًا إلى درجة المقت .. وهو يتمنى بالفعل أن يراهن يغتصبن ويمزقن .. وأسعد لحظة في حياته هي عندما يسمع عن القبض على واحدة منهن في قضية آداب .. "هؤلاء القوم يملكون الثروة والجمال والنفوذ لكنهم يفتقرون إلى الدين والأخلاق ويعيشون كالخنازير، ورجالهم يفتقرون إلى الدم الحامي والنخوة، لهذا نحن أفضل منهم"ـ

من الناحية الدينية (سيد حبارة) لا يمارس الشعائر بأنواعها، لكنه مستعد لأن يتحول إلى أسد مفترس ويمزق أي واحد لو سمع مثلاً أن أقراص لعبة (بوكيمون) تكتب عند حرقها عبارة (سيد لا .. كعبة لا) أو أن عبارة (كوكا كولا) لو رأيتها في المرآة تكتب شيئًا مماثلاً.. إنه متعصب بلا حدود باعتبار التعصب من شروط التدين الصحيح، وهو غير مستعد البتة لقبول الآخر .. مستعد لتصديق أي شيء يسمعه .. رسام الكاريكاتور الدانمركي الذي أهان الإسلام وجدوه ميتًا بصاعقة .. السبراي الذي يرسم شكل الصليب على ثياب المنقبات .. الخ .. تعصب بلا حدود من دون أن يفعل شيئًا واحدًا يثبت به أنه مسلم فعلاً كما أراد له الرسول (صلى الله عليه و سلم).. لهذا من السهل جدًا أن تحشد سيد حبارة في أية مظاهرة بشرط أن يكون لها سبب ديني

كنت أكلم صديقي عن مستقبل المفاعلات النووية في مصر، ثم توقفنا وقد أفزعتنا فكرة أن المفاعل سوف ينشئه المهندس الصيني (وانج هاو تشين) أو الألماني (فرانتس هوفمان) أو الروسي (ميخائيل سولوفيتش)، لكن إجراءات السلامة في النهاية سوف تقع على عاتق (سيد حبارة) !.. يمكنك تخيل منظر المفاعل الموشك على الانفجار، بينما (سيد حبارة) يؤكد أنه سلم العهدة وأن دفتر 118 ليس معه، وأن المفتاح مع النوبتجي المناوب، وأن الملاحظ خصم له ثلاثة أيام دون وجه حق .. الخ

في كل الاستفتاءات والانتخابات يعتبر سيد حبارة مخزونًا استراتيجيًا للحكومة ..حتى من دون تزوير أو تلاعب في أوراق التصويت، يصدر (الملاحظ / المفتش / رئيس القلم) أمرًا للعاملين بالتوجه إلى اللجان، ويتم شحن (حبارة) هو ورفاقه من (السيدات حبارة) في أتوبيسات إلى لجان الانتخاب وهم يهتفون مؤيدين شيئًا ما .. ثم ينزلون إلى اللجان ليصوتوا بـ (نعم) ويرفعوا عريضة مكتوبة بالدم – دم الدجاج غالبًا – تؤيد أي شيء حتى لو كان قانونًا لمنع التنفس أو منع دخول دورة المياه .. عند الظهيرة يطير فرحًا بذلك الكيس الورقي الذي يحوي علبة عصير و(شاندوتش) .. سيد حبارة لعب دورًا مهمًا في التصويت على التعديل الدستوري الأخير، ونحن نعرف ما سيحدث بالضبط يوم التصويت على التوريث القادم .. سوف تخرج عشرات الأتوبيسات تحمل لافتات التأييد والمبايعة والموافقة .. الكثير من الهتاف .. عريضة بالدم تبايع الابن على طريق الأب .. وهكذا تفيق لتجد أن أسوأ كوابيسك قد تحقق وأن هناك إجماعًا ساحقًا لدى الشعب المصري على التوريث ..لا يوجد تزوير هنا .. سيد حبارة هو من قال نعم

هذا ما يقدر على عمله (سيد حبارة) .. إنه بالتأكيد أكثر تأثيرًا وأعلى صوتًا مما يقدر على عمله عشرون أفنديًا بالنظارات يقفون هاتفين على سلالم نقابة الصحفيين، بينما تحيط بهم ثلاثون عربة بوكس خضراء

الآن أنت تعرف من هو (سيد حبارة).. (سيد حبارة) هو المصري العادي الذي يملأ الشوارع .. من قال إن الإنسان المصري ما زال كما كان ؟.. لقد تغير كثيرًا جدًا .. إنه نتيجة بائسة لسنوات من القهر والجهل والتخلف، لكنه برغم هذا قوي جدًا بحكم العدد ويمكنه بالتأكيد أن يحدد مصير هذا البلد لأعوام قادمة .. لقد صنعته حكومات متعاقبة وظروف اقتصادية وسياسية تفوق الوصف، لكن (سيد حبارة) هو من يفرز الحكومات لأن الشعب يستحق الحكومة التي تحكمه .. وهكذا .. دائرة شيطانية لا تنتهي .. المزيد من سيد حبارة .. المزيد من التأييد .. المزيد من الحكومات الفاسدة .. المزيد من سيد حبارة .. وهكذا

من يقدر على كسر هذه الدائرة ؟.. ليس أنا بالتأكيد .. لا تنس أنني مواطن مصري وبالتأكيد أحمل الكثير من (سيد حبارة) في أعماقي، إن لم أكن أنا هو فعلاً، حتى لو كنت لا أركب الدراجة ولا أضع طاقية بيضاء على رأسي

========================================

د. احمد خالد توفيق

[SoSo R]

صباح لوي الدراع

حصل موقفين النهاردة بالصدفة .. والله لو مؤلف فيلم مش هايعرف يعمل الكومباريزون دي

- باتصل بأخويا في مصر النهاردة الساعة 10 بأطمن عليه .. فسمعت حواليه زحمه . قال لي ده أنا واخد كل الناس اللي شغالين معانا وكل أصحابنا وبأطلع لهم رخص سواقة .. قلت له إشمعنى هما بيفرقوا زيت وسمنه عالرخص ؟

قال لي إدارة المرور عاملة أوكازيون ولو عرفت تفتح باب العربية .. بيقول لك مبروك إنت أخدت الرُخصة والظباط بقوا في منتهى الوداعة ..

قلت أه يا ثورة .. حرام عليكم يا ظلمه إحنا ما كناش متفقين على كده

-----------

وبالصدفة ..

بعدها بساعتين أو أقل لقيت اختي بتتصل بي من الدنمارك وهاتك يا عياط أنا قلت في كارثة وقلبي وقع .. المهم هديت شويه ولقيتها بتقولي : أنا في مدرسة السواقة دلوقت وسقطت في الإمتحان عشان دوست عالخط ...بعد دراسة لمدة 6 شهور - ملحوظة معاها رخصة مصرية من 5 سنوات وعندها عربية أخر موديل -

طبعاً بعد ما شتمتها عشان كانت هاتموتني بالسكتة القلبية ... قلت لها في داهية الرخصة والعربيات كلها .... تقوم تقول لي : والنبي أمانة عليك تروح تعمل لي عُمره وتدعي لي في مكه عشان أنجح وأعدي أحسن أنا زهقت وحاسه إني هاموت ومش هاخد الرخصة في أم البلد دي ..

-----------

تفتكروا الدنمارك محتاجه ثورة هي كمان ؟

أو نصدر لهم شوية ثوار يعملوا " ثورة الزبدة " عشان الأمور تتسهل عندهم ؟

عارف حضرتك لما قريت المداخلة دى..افتكرت موضوعك بتا نزيف الأسفلت...و قلت هما فرحانين بأوكازيون الرخص و بعدين لما تحصل حادثة مروعة يرجعوا يعيطوا و مش بعيد يطلبوا اقالة وزير المواصلات ساعتها و يعملوا اعتصام كمان...لأن فى عهده الناس كانت بتاخد رخص بسهولة!!!

بالذمة مش هم يبكى و هم يبكى...

هو إحنا ناقصين

ده الناس اللى معاها رخص و بتعرف تسوق فعلا نسيوا إزاى تكون قواعد السواقة الآمنة من تعاملهم مع الميكروباصات و التاسكيات و السباب الروش الفرفور...طيب ناقصين احنا ناس ما بتعرفش تسوق اساسا نغرق بيهم االشوارع..هيا مش دى برضه ارواح ناس بنعرضها للخطر

اومال اخلاقيات الثورة راحت فين؟؟؟

ماهو زى ما بنقول ماتدفعش رشوة و ما تطلبش إكرامية

المفروض ما تاخدش حاجة مش من حقك...لأنك مش لوحدك فى خطر

طيب على كدة كمان المهندسين بتوع الفحص الفنى لتجديد الترخيص او ترخيص اول مرة هيبقوا حنينين برضه و العربيات المفوتة تترخص برضه و نقول معلش اللى جايبانا ورا ....ومش مهم الجو يتلوث اكتر ماهو...

طيب و بعدين ...هيا دوامة و مش بتخلص و لا هتخلص؟!!!!

[Ahmed Anwer]

النهاردة في أعتصام جامعة القاهرة فى ناس دخلت بلافتات تحمل شعارات إخوانية، و لما واجههم طلبة الإخوان اكتشفوا أنهم ليسوا من اللإخوان أصلاً

منقووووووووول