دعوة للجميع للخروج لـ " جُمعة الوحدة والبناء "

[se_ Elsyed]

يارب يكون في وقت ودعوتنا تصل إلى كل مصري .. ونرج جميعاً يوم الجمعة - بعد يومين تحت شعار ( جُمعة الوحدة الوطنية والبناء )

وحدة وطنية عشان نؤكد للعالم كله إن مصر يسري في جسدها روح الثورة التي لم تفرق بين مسلم ومسيحي وكان الجميع يداً واحدة ضد النظام الفاسد .. وإن لأكثر من شهر كان الملايين في الشارع وبدون شرطة وأمن اللي أنسحبوا و خانوا الوطن .. ولم يحدث أن داس طرف على قدم الأخر حتى وكانت كنائسنا ومساجدنا وبيوتنا يحميها الله وحده ...

وحدة وطنية لنُثبت للجميع إن المسلم والمسيحي لديه عقل يُميز به بين الغث والسمين ... وإن حتى لو قيادة دينية معينة حرمت التظاهر أو قالت إلزموا بيتوكم ... فهو رأي غير مُلزم وكل واحد حر ما لم يضر وما لم يخرج عن تعاليم دينه ..

وبناء ... لإن ده وقت البناء . مش وقت المطالب الفئوية والمرتبات ونشيل رئيس جامعة أو مدير متضايقين منه في الشغل ...

ولنعلم جميعاً أيها العزاء أن الجسد القوي لا يُمكن للميكروبات والفيروسات أن تخترقه ...

وإن الإعتصام بحبل الله ومحبته بيجعلنا كالبناء القوي الذي لا يُمكن للرياح الخبيثة أن تؤثر فيه .. بل أنا تنحني أمامه وتنكسر تحته ...

[جويرية]

مفيش فايدة من الكلام ده

ما احنا بعد كل مشكلة مع المسيحيين ، بنتكلم و نقول احنا وطن واحد و المسيحيين و المسلمين اخوات ،

و التلفزيون المصري يذيع اغاني الوحدة الوطنية و الهلال و الصليب

طيب و بعدين و ماذا بعد تتجد المشاكل مرة اخري و حتبقي حرب لا قدر الله اذا فضلنا بنفس التجاهل لمشاكلنا

ادينا بنستأصل دعاة الفتنة من المسلمين أمن الدولة و فلول الحزب الوطني

ماذا عن الأخوة المسيحيين

ده دورهم ان هما يستأصلوا دعاة الفتنة من المسيحيين الموالين للنظام السابق

و يختاروا قيادات جديدة للكنائس ، يهمها مصالح و امن المواطن المسيحي

[عنبو]

المشكله فى غسيل المخ اللى بيتعمل للناس سواء للمسلمين او المسيحين

عندماتخلصت الناس من السيطره والهيمنه اللى فرضهابعض رجال الدين عليهم (( عملاء امن الدوله ))

رأينا المسلم والمسيحى يد واحده وراينا المنقبات والمسيحيات يداً واحده

ورأينا شباب الاخوان المسلمون والسلفين وهم يداً واحده مع اخوانهم الاقباط

رأينا مشاهد جميله جداً ولا تقول الا على شىء واحد اننا نسيج واحد منا المسلمين ومنا المسيحين فقط لا غير

ولكن عندما بدأت تهدأ الامور وبدأ يشعر بعض هؤلاء العملاء بسحب البساط من تحت اقدامهم

بدأو يعزفون على نفس الوتر

لذا الدعوه الى جمعة الوحده الوطنيه شىء مهم جداً ك اعطاء صوره ممتازه عن مصر

ولكن يبقى بعض الجهلاء الذين يسلمون دماغهم لغيرهم لذا يجب ان تقوم حملات توعيه للناس

من الفريقين يعنى المسلمين يقوموا بحملات توعيه للمسلمين والمسيحين يقومون بحملات توعيه

للمسيحين علشان نقدر نوصل لكل الناس

وممكن نستخدم وسائل الاعلام الحكوميه اللى المفروض هى ملكنا دلوقتى وزى لما كانوا بيعملوا برامج تحسين صورة بعض الفاسدين

ياريت يستخدموا هذه الموهبه لخدمة الوطن

تحياتى

عنبو

[أحمد سيف]

وممكن نستخدم وسائل الاعلام الحكوميه اللى المفروض هى ملكنا دلوقتى وزى لما كانوا بيعملوا برامج تحسين صورة بعض الفاسدين

للأسف يا باشمهدس هذا لم يتحقق بعد ... مازالت قيادات الإعلام الموالية للنظام السابق في أماكنها ... وتستخدم ما تحت يدها من أدوات في لعبة قذرة للتركيز على بعض الأحداث وتضخيمها وبث الذعر في نفوس الناس وتمرير بعض الأفكار الخبيثة لضرب الثورة

[أسد]

بالفعل ..

يجب أن ينجو المصريين بأنفسهم من فخ الإنشقاق والإنقسام والتحزب والطائفية

الثورة المصرية هي فرصة ذهبية لولادة مصر جديدة بمعنى الكلمة

يجب ألا نضيعها ..

أشعر بالغيظ الشديد .. والغضب العارم عندما أرى تلك الفلول .. كل يطالب بما يطالب به ..

ويريد تحقيقه .. دون النظر إلى الصورة الكاملة .. ومصلحة الوطن

نحتاج إلى عقلاء وحكماء .. يتحدثون إلى الناس كثيراً ..

كثيراً جداً ...

يجب أن يتحدث قادة الفكر ... بغض النظر عن إنتماءاتهم الأيدلوجية ..

يجب أن يتحدثوا إلى الناس .. كثيراً جداً جداً ....

وبإلحاج

يجب ألا نزهق أو نمل ..

يجب أن ينصلح حال مصر ..

وإلا سندخل كهف مظلم .. سيصعب الخروج منه بسلام

[أحمد سيف]

المطلوب الآن

أقصى درجات ضبط النفس مع المظاهرات الطائفية السلمية

مع تعامل صارم مع البلطجة والخروج على القانون

عدم تقديم تنازلات أو التفاوض مع قيادات دينية مع تنفيذ المطالب المشروعة في إطار القانون

حملة اعلامية مكثفة ومحاولات اقناع واستقطاب داخلية في كل فريق ... المسيحيون المؤيدون للثورة المفروض أن يتحركوا للتحدث مع المعتصمين المسيحيين والمسلمون يتحدثون مع المستنفرين من السلفيين ومن يؤيدهم

توجيه رسائل صارمة للقيادات الدينية بأنه لن يتم التهاون مع أي محاولات تحريض وأن الفوضى لن تكون في صالحهم

سرعة القبض على قيادات أمن الدولة والحزب الوطني والتحفظ عليهم وتقديم المفسدين منهم الى المحاكمات لمنهم من التأثير على مسار الأحداث

والأهم ابقاء جذوة الثورة متقدة والاستمرار في النزول الى الشارع يوم الجمعة من أجل الضغط لتنفيذ المطالب وضمان تحقيق الأهداف

[fatfouta]

ترنيمة بارك بلادى من ميدان التحرير قبل صلاة الجمعة يوم 6 فبراير

ياريت نرجع المشاهد دى تانى مرة اخرى عشان نتصدى للاشاعات ومثيرى الفتنة وبقايا الحزب الوطنى وبلطجيته منهم لله

http://www.youtube.com/watch?v=vc0a3Xe7hqM&feature=player_embedded

تم تعديل 9 مارس 2011 بواسطة fatfouta

[عنبو]

وممكن نستخدم وسائل الاعلام الحكوميه اللى المفروض هى ملكنا دلوقتى وزى لما كانوا بيعملوا برامج تحسين صورة بعض الفاسدين

للأسف يا باشمهدس هذا لم يتحقق بعد ... مازالت قيادات الإعلام الموالية للنظام السابق في أماكنها ... وتستخدم ما تحت يدها من أدوات في لعبة قذرة للتركيز على بعض الأحداث وتضخيمها وبث الذعر في نفوس الناس وتمرير بعض الأفكار الخبيثة لضرب الثورة

عارف يا دكتور احمد انا قابلت نوعيه من الناس غريبه قوى

الناس دى كانت بتكلم عن الفساد فى الدوله وتقعد تسب وتلعن ووشها يحمر وعروقها تطلع وتحس انهم فى حرب يعنى وطبعاً سياسية

الرئيس المخلوع السابق قولوا اللى انتوا عاوزينه وانا جمال نعمل اللى احنا عاوزينه

ولما قامت الثوره كانوا ضد الثوره والثوار وكنت بجد مستغرب منهم قوى ايه ياجماعه مش انتوا اللى كنتوا مش يومين بتعملوا

المروحه وتنعلوا فى ام النظام دلوقتى لما الناس عاوزه تعمل حاجه جايين تقولوا دول شوية العيال دول هم اللى هيجبوا الديب من

ديله يعنى وده العيال دى بتحلم ومش لاقين حد يلمهم ومش لاقين لا شغله ولا مشغله وكلام من هذا القبيل

ولما بدات الثوره تنجح وبدأت المطالب تتحقق واحده تلو الاخرى

بدا يشعر هؤلاء بالحقد على الثوار ليس خوفا على البلد ولكنهم لانهم لم يشاركوا فى هذا العمل من الاول

وبات كل همهم هو اسقاط هذا العمل العظيم لكى يثبتوا للناس انهم كانوا على حق عندما كانوا يهاجمون الثوره

وانهم يملكون البصيره التى تمكنهم من معرفة ان الوقت المناسب لم ياتى بعد

الناس اللى من النوع ده خطر جداً على الثوره

لاسف لانها تصور للناس انها تتحدث عن الصالح العام ولكنها فى الاساس تتحدث عن امجاد شخصيه

انسب علاج للناس دى هو ان يتم اسكاتها فى الوقت الحالى حتى تهدأ الامور ومن ثم يبقوا يطلعوا ويقولوا رايهم اللى هم عاوزينه

لكن البلد دلوقتى مافيش مجال للامجاد الشخصيه

تحياتى

عنبو

[fatfouta]

طالب ''تحالف ثوار مصر'' الأخوة المسيحيين بوقف مظاهراتهم بعيداً عن مقر إتحاد الإذاعة والتليفزيون لكي لا يتم استغلال ذلك من قبل جهات خارجية.

وأعلن التحالف، في بيان حصل ''مصراوي'' على نسخة منه، عن تضامنه مع الأخوة المسيحيين في مطالبهم المشروعة ببناء كنيستهم التي هُدمت بقرية ''صول'' بمركز أطفيح بمحافظة حلوان، مطالباً بتقديم كل من اعتدى على الكنيسة إلى مُحاكمة عاجلة لكي يأخذ العقاب الذي يستحقه.

وأكد التحالف أن مثل هذه المظاهرات تُعرض البلاد إلى الخطر والفوضى فضلا عن دورها في نشر الفتنة الطائفية وأضاف ''على جميع المصريين ضبط النفس واحترام مشاعر الغضب التي انتابت اخواننا المسيحيين نتيجة التعدي على مقدساتهم من قلة مندسة وغير واعية''.

[se_ Elsyed]

الحمد لله ...

ثقتنا في كل شباب مصر إن عندهم من الوطنية ما يُبهر العالم كله .. وما يمحي أي أثر لخفافيش الظلام اللي عاوزنا نغرق في الطائفية المقيتة

كلنا خالد سعيد

عايزين المشهد ده يتكرر يوم الجمعة اللي جاية بعد صلاة الجمعة في كل محافظات مصر .. يا ريت كلنا نكلم أصحابنا وننزل مع بعض في المناطق اللي فيها جوامع قصادها كنايس ونعلق علم مصر بينهم ونوعي الناس في المنطقة بإن كلنا نسيج واحد .. يللا ننشر الدعوة

كلنا خالد سعيد

يللا نعمل ثورة .. بس المرة دي ثورة على الطائفية .. ننزل كل المناطق الشعبية ونوصل علم مصر بين الجامع والكنيسة .. نكلم الناس ونوعيهم ونفهمهم إننا نسيج واحد ليه نفس الحقوق وعليه نفس الواجبات رغم اختلاف الأديان .. مسلم مسيحي إيد واحدة

R.N.N | شبكة رصد

شبكة رصد تتبنى أيضا هذه الحملة للقضاء على الطائفية .. ومن يتواجد بمنطقة فيها كنيسة ومسجد واجبه انه يربط علم مصر بينهم

[fatfouta]

جمعة المواطنة..المصريين ايد واحده

[ذهبية]

حلو جميل بس لية بالكلام و التجمعات و الخروج فى المظاهرات لية ميكنش بالتصرفات

انا شايفة المجهود اللى بيتعمل علشان تلم مظاهرة و تقعد تهتف و تحمل راية و تفضل طول النهار واقف على رجلك طيب ما يتعمل حاجة مفيدة عملى بقى

منبطل كلام و نشتغل بقى

لية ميروحش المسلمين يبنوا الكنسية مع المسحيين و العكس

لية كل مجموعة تقسم نفسها و تنظف شوارع مصر

لية كل مجموعة تدهن البيوت و تنظم المرور

لية ميتعملش يوم الجمعة دة يوم للعمل التطوعى نشوف مصر محتاجة و نفذة

[se_ Elsyed]

حلو جميل بس لية بالكلام و التجمعات و الخروج فى المظاهرات لية ميكنش بالتصرفات

انا شايفة المجهود اللى بيتعمل علشان تلم مظاهرة و تقعد تهتف و تحمل راية و تفضل طول النهار واقف على رجلك طيب ما يتعمل حاجة مفيدة عملى بقى

منبطل كلام و نشتغل بقى

لية ميروحش المسلمين يبنوا الكنسية مع المسحيين و العكس

لية كل مجموعة تقسم نفسها و تنظف شوارع مصر

لية كل مجموعة تدهن البيوت و تنظم المرور

لية ميتعملش يوم الجمعة دة يوم للعمل التطوعى نشوف مصر محتاجة و نفذة

كل ده إتعمل يا جولدن .. نظموا المرور ونظفوا الشوارع .. لكن للأسف .. في نفوس كتيرة محتاجه نظافة هي كمان لأنها سودا من جوه ونفسها تشوف الدنيا مولعة ومشعللة . ونفسها تقعد على تلها المخروب وتقول " شوفتوا أخرة لعب العيال والثورات ,,,,, عاش مبارك رجل البر والتقوى "

عشان كده تجمعنا مع بعض وإتحادنا بدون تمييز هايكون أبلغ رد على أمثال هؤلاء ...

والدور والباقي على الجيش اللي لازم لا يتهاون مع ايد حد يشاور علقله بس يعمل حاجه في الوطن ده ..

[Alattar]

أتعجب والله من الناس اللي كانوا لسه من كام يوم بيقولوا انهم اكتشفوا ان النظام القديم كان هو سبب الفتنة اللي كانت موجودة بين أطياف الوطن..و لاحظنا جميعا أنه أثناء الثورة و بعد انسحاب الأمن تماما من الشوارع..كيف كانت المساجد و الكنائس آمنة تماما..ولم يصبها أي سوء..

ازاي بعد ده كله يجروؤ مخلوق كائنا من كان أن يقول ان اللي بيحصل اليومين دول فتنة طائفية..ولم يأخذ في الاعتبار وجود فلول للنظام تحاول بطريقة أو بأخري زعزعة الوحدة و الاستقرار الذي نحاول حاليا الوصول اليه..بجد أنا مش قادر أتخيل ان هي دي الناس اللي كانت لسه بتقول من كام يوم اننا إيد واحدة ووطن واحد..وان أعوان النظام المخلوع هم السبب..

خلاص..يبقي ياريت فعلا مبارك يرجع تاني و نفضل في حالة استنفار و ثورة دائمة..طالما ان هي دي اللي بتحققلنا الأمن و بتخلي الناس فعلا ..إيد واحدة

الخروج يوم الجمعة أنا شايف ان شاء الله انه مهم لتوحيد الاتجاهات و تجديد العهد مرة أخري

والله المستعان

تم تعديل 9 مارس 2011 بواسطة Alattar

[Ahmed Anwer]

جُمعـــة الأخــوّة | ثورة 25 يناير السِلمية مستمرة

Friday, March 11 · 1:00pm - 8:00pm

http://www.facebook.com/event.php?eid=207336212610018

دي مبادرة لكل واحد يقدر ينزل يصلّي الجمعة في قرية "صول" بأطفيح, في حلون.. وبعد الصلاة كلنا نتجه لمكان كنيسة أطفيح ونساهم في بناءها.. هاننزل يا شباب ونقابل أخوتنا وأهلنا هناك ونتكلّم معاهم ونناقشهم في خطورة أى إستثارة مش محسوبة, وإن اللي بيجمعنا أكبر بكتير أوي من اللي بيفرّقنا, ده إحنا مصريين.. كل مكان في مصر هايكون المخرّبين عايزين يخلوه بؤرة نار, إحنا بمشيئة الله سبحانه وتعالى هانخليه نقطة حُب ونور.. أى مصري غلط لازم يتحاسب بالقانون والعدالة, لكن لا إعتداء على مسجد ولا كنيسة مقبول.. أخوك المسيحي حماك بإنجيله وإنت بتصلّي في التحرير, وإنت حميته بقرآنك وهو بيصلّي هناك.. كنا في التحرير, والنهاردة في أطفيح

[Dreamwithme]

أنا شخصيا أدعم بكل شكل من الأشكال أننا نسميها جمعة الوحدة لكن ياجماعة مش عن طريق تظاهرة في التحرير أو ماسبيرو

ولكن نروح أطفيح نروح القرية نفسها ونتجمع هناك ونساعد في بناء الكنيسة وعلماء الدين يقول كلماتهم اللي بالتأكيد تنور عقول الناس

وياجماعة في مشكلة تانية دلوقتي بسبب أحداث أمس الوضع فى مستشفى القديس سمعان خراز فى حى الزبالين سىء جدا وفى حاجة لمساعدات طبية ضرورى وبسرعة

ياريت اللي يقدر يروح ويساعد مايتأخرش

[شرف الدين]

للأسف الشديد ... دي نتيجة نظام استمر على مدى 30 يعمل ويفكر فقط في البقاء في السلطة .. ولم يعمل ويفكر يوما من أجل صالح مصر

منشية ناصر

معقل العشوائيات في مصر

وغيرها وغيرها مناطق كتير ... فيها ناس يبيعوا أرواحهم عشان الفلوس

مين مع مين مش مهم ... المهم إني اقبض

وناس تانية واخدها الحماس .. وبتطبق ثقافة القطيع تماما.

لو في جمعة بكرة .. يا ريت نسميها جمعة المصالحة

المصالحة مع كل طوائف المجتمع وأولهم الشرطة

ويا ريت ناس كتير تتوجه لقرية أطفيح من أجل وأد الثورة المضادة .. اللي ممكن تبدأ من هناك.

أنصار الثورة المضادة لديهم كروت كثيرة للعب بها ...

حاولوا أولا الوقيعة بين الشعب والجيش .. وفشلت الفكرة.

الآن يحاولون الوقيعة بين الشعب والشعب.

ما زلت أكرر ... أول إشكالية لابد أن نعالجها في مرحلة ما بعد الثورة .. هي إشكالية الشعب والشرطة.

بجد بجد مصر محروسة

مفيش بلد بالتعداد السكاني الهايل ده في المنطقة الضيقة دي حوالين النيل ... وتفضل طول المدة دي من غير شرطة .. وتفضل أمورها مستقرة إلى حد ما.

أدعو كل من سينزل أمس أن يرفع لافتة ( المصالحة مع الشرطة ).

ليس من قبيل الخضوع لابتزاز الشرطة .. وليس من قبيل الرضا بلوي الذراع .. ولكن من أجل تطمين رجال الشرطة. وطمأنتهم أننا تسامحنا مع الفترة الماضية بكل سلبياتها وأنهم دائما وأبدا سيبقون جزءا من نسيج هذا الشعب..

لا نريد أن يكون إحساس ضابط الشرطة إنه منبوذ. ومطارد لأنه استحالة هيعرف يقوم بشغله في ظل الإحساس ده.

يحيى الفخراني امبارح على العاشرة مساء قال تعبير جميل جدا

في الفترة القادمة مش عايزين يكون الشعار ( الشرطة في خدمة الشعب ). عايزين الشعار يكون ( الشرطة في حماية الشعب ).

عايزين ضابط الشرطة ينزل الشارع وميخافش من أي بلطجي .. ويعرف إننا هنقف جنبه ونساعده على حفظ الأمن.

عايزين دوريات الشرطة يكون فيها رجل شرطة ورجل جيش ورجل من المتطوعين من اللجان الشعبية.

عايزين يكون الشعار ( الجيش والشرطة والشعب .. ايد واحدة )

تم تعديل 9 مارس 2011 بواسطة شرف الدين