د. عمرو خالد ,, يعلن نيته انشاء حزب صناع الحياة

[Dreamwithme]

مقصدتش حاجة وحشة أننا مسحنا مصلح اجتماعي بأستيكة

لكن كان قصدي أن هنا هنبدأ نصف د/عمرو بالرجل السياسي ذو التوجه كذا أو كذا حسب توجه حزبه

لكن مينفعش (في رأيي) يكون الراجل ليدر في حاجتين مرة واحدة

يعني يا قائد في عملية الاصلاح الاجتماعي وممكن يكون له رأي سياسي ومشترك في حزب بس ميكونش رئيسه ولا يحمل علي عاتقه مهام سياسية

أو قائد لحزب سياسي وساعتها أي مشروع تنموي أو اصلاحي هيعمله للأسف سيقال أنه دعاية لسياسته أو لحزبه

شكرا جزيلا علي اهتمامك بالرد علي أسئلتي السخيفة

[م تيمور المراغي]

مقصدتش حاجة وحشة أننا مسحنا مصلح اجتماعي بأستيكة

لكن كان قصدي أن هنا هنبدأ نصف د/عمرو بالرجل السياسي ذو التوجه كذا أو كذا حسب توجه حزبه

لكن مينفعش (في رأيي) يكون الراجل ليدر في حاجتين مرة واحدة

يعني يا قائد في عملية الاصلاح الاجتماعي وممكن يكون له رأي سياسي ومشترك في حزب بس ميكونش رئيسه ولا يحمل علي عاتقه مهام سياسية

أو قائد لحزب سياسي وساعتها أي مشروع تنموي أو اصلاحي هيعمله للأسف سيقال أنه دعاية لسياسته أو لحزبه

شكرا جزيلا علي اهتمامك بالرد علي أسئلتي السخيفة

لا ابدا يا ستي مش سخيفة ولا حاجة ,,

لكن لا اتفق مع حضرتك لسبب بسيط

اننا لنا في رسول الله اسوة حسنة

وفي الصحابه والتابعين لهم باحسان ,,

لانهم كانوا رجال دولة و رجال دين في نفس الوقت

نسيتي مثلا عمر بن الخطاب رضي الله عنه ؟

مافيش تعارض يا استاذه على الاطلاق بين دور الدكتور كقائد دولة و كصاحب رسالة

لكي المودة والتقدير ,,

[ذهبية]

انا برضة مازالت مختلفة مع حضرتك

و سؤالى لية مش كل واحد متميز فى مجالة يفضل فى مجالة

احنا كلنا محتاجين بعض فى كل المجالات

من حقى احلم اة من حقى احقق حلمى ماشى لكن بالامكانيات اللى تليق عليا

عمرو خالد محدش مختلف علية فى مجالة

لكن عذرااا اختلف علية جداا لو غير مجالة

اللى يصلح رئيس بلد زى مصر لابد ان يكون فية اشياء كتيرة جداااا غير نشاطاتة الاجتماعية و الخدمية و الانسانية

وهذا راى

تختلف معى هذا حقك

اختلف معك هذا حقى

انا مازالت مؤمنة ان كل واحد كويس جدا فى مجالة لو حب يغير مسارة صدقنى ممكن يخسر كتير جدااا

و اعتقد ان راهنة على الشباب اللى معاة فى جميع مشروعات الخيرية هم ممكن يكونوا اول من يرفضونة رئيس

لية بقى المغامرة بتاريخك

واعمالك

عايز يبقى رئيس علشان يخدم بلدة ما تخدمها فى مجالك

لية لازم تكون على قمة الهرم علشان تاسس الهرم

ما كل طوبة فى الهرم لو اتشالت من مكانها الهرم هينهد

[م تيمور المراغي]

هو ما قالش انه حيترشح للرئاسة ;)

البداية زي ماحضرتك تفضلتي قد قام بها بالفعل ,,

لكن بعد 10 سنين من الآن

كل الموجودين مع احترامي حيكونوا تخطوا السن والقدرة والحماس

ويكون الكرسي هو من ينادي على صاحبه وقتها سواء كان الدكتور او اي مصري مخلص آخر ,,

واستغرب انك برغم تاريخك الليبرالي مدام ذهبية لكن بتحجري على انسان ما انه يحلم بعرش مصر ,,

كلنا من حقنا نحلم خصوصا لو كانت نيتنا ان نعطي لا ان نأخذ ,,

تقبلي المودة والتحية ,,

[لونا]

كتير أوي مننا بيحب عمرو خالد

و أثر في ناس كتير بطريقة إيجابية

و لذلك شعبيته كبيرة جدًا

و لكن شعبيته مرتبطة بالمجال اللي اتعرف فيه .. الدعوة

و لا نستطيع أن نجزم أنه إذا اتجه إلى السياسة .. ستتبعه جماهيره

ممكن آه و ممكن لأ

لماذا لا يجرب ؟

الفترة القادمة ستكون مختلفة تمامًا .. و متوقع أن يحدث فيها العديد من التغيرات

فهل كان يتوقع أحدنا أن يقوم المصريون من سباتهم ثم يتنحى مبارك و يحل مجلسي الشعب و الشورى و تتغير وزارتين

كل هذا يحدث في أقل من شهرين ؟

يعني ممكن جدًا يقوم عمرو خالد بإنشاء حزب و يضم وجوه محترمة

و نجد أن الحزب يقوم بدور مهم في الحياة السياسية

ويمكن وقتها أن نجده مرشحًا جيدًا للرئاسة

بالرغم من إني عجبني جدًا تشبيه ذهبية

عايز يبقى رئيس علشان يخدم بلدة ما تخدمها فى مجالك

لية لازم تكون على قمة الهرم علشان تاسس الهرم

ما كل طوبة فى الهرم لو اتشالت من مكانها الهرم هينهد

بس برضه نسيب له فرصة

[م تيمور المراغي]

...........

بالرغم من إني عجبني جدًا تشبيه ذهبية

عايز يبقى رئيس علشان يخدم بلدة ما تخدمها فى مجالك

لية لازم تكون على قمة الهرم علشان تاسس الهرم

ما كل طوبة فى الهرم لو اتشالت من مكانها الهرم هينهد

بس برضه نسيب له فرصة

احترامي الشديد لكما استاذة ذهبية واستاذة لونا

لكن التشبيه هنا غير موفق للاسف ,,

التشبيه الاصح هو الشجرة

اصلها ثابت وفرعها في السماء ,,

لو جذور الشجرة غير ثابته في الارض ,,

ماكان لفرعها ان يصمد ولا لاوراقها ان تنبت ولا لازهارها ان تتفتح ولا لثمارها ان تنضج ,,

مثل الهرم استاذة ذهبية يضرب لمن يريد ان يأخذ وياخذ فقط ,,

اما من اراد العطاء ,,

فالشجرة المثمرة هي مثله الصحيح ,,

لكما التقدير ,,

[ComingSoon]

مش عارف اهنيك ولا اعزيك يابشمهندس

الصراحة انا شايف عمرو خالد افضل يستمر في طريق الدعوه او الاصلاح

لكن السياسة شايفها صعبة وممكن ترفع ناس للسما وومكن تنزل به الارض

مش معني كده انا معارض

بالعكس عمرو خالد من حقة يكون حزب لأن له مؤيديين وسيدفع بمزيد من الشباب في الحياة السياسية وده لمصلحة مصر

انا خايف عليه مش خايف منه

[م تيمور المراغي]

مش عارف اهنيك ولا اعزيك يابشمهندس

الصراحة انا شايف عمرو خالد افضل يستمر في طريق الدعوه او الاصلاح

لكن السياسة شايفها صعبة وممكن ترفع ناس للسما وومكن تنزل به الارض

مش معني كده انا معارض

بالعكس عمرو خالد من حقة يكون حزب لأن له مؤيديين وسيدفع بمزيد من الشباب في الحياة السياسية وده لمصلحة مصر

انا خايف عليه مش خايف منه

تسلم يا سوون على مشاعرك الصادقه والجميله

انت عارف عمرو خالد ,, لما بيحط حاجة في دماغوا,,بيتنوا وراها بالسنين , :happy:

علينا الجهد ,, وعلى الله التكلان ,,

[mustafagamiel]

عرفت ياباشمهندس

ان بيلملم ناس من الحزب الواطني السابق ويكونوا معه في هذا الحزب

انا نفسي عمرو خالد يمسك اي وزارة ويكون فيها شباب

او يمكس وزارة زي وزارة التضامن الاجتماعي

فقط لاغير

ويبقى كتر الله خيره على كده

[م تيمور المراغي]

تحيتي مصطفى بك

لا هو مش بيلملم ناس من الحزب عشان يبقوا معاه

الخبر اللي حضرتك بتشير اليه كان بتاريخ 2 مارس من اسبوع وكان هذا نصه من موقع الدستور ا لاصلي

وعلم الدستور الأصلي أن خالد كان سيشارك أحد قيادات الحزب الوطني سابقا في تأسيس حزب سياسي إلا أن هناك خلاف حدث بين رؤية الأثنين حول توجهات الحزب وموقع عمرو خالد فيه فقرر الانفصال وتأسيس حزب خاص

وأضاف مدير أعمال خالد :أن عمرو خالد يعقد اجتماعات مكثفة بمنزله لاستقطاب شخصيات بارزة في المجتمع من رجال أعمال وشخصيات عامة للمساهمة في تأسيس الحزب.

ولو حضرتك شايف انه اهل يكون وزير للشباب او وزير للتضامن الاجتماعي الان

يبقى منطقي انه يكون اهل لما هو اكبر من ذلك بعد 10 سنوات ان شا الله ,,

تحيتي لحضرتك ,,

[Alshiekh]

ورداً على ذلك، أكد د.عمرو خالد: "قمنا مع مجموعة من الزملاء والمتخصصين بدراسة وكتابة مجموعة من الأفكار والبرامج الخاصة بفكرة إنشاء حزب، وهذه الأفكار والبرامج هي الآن محل دراسة من الشباب لأن هذا الحزب – إن وجد- سيكون لهم وبهم.

وقال عمرو: "نحن في انتظار مساهمات شبابنا في صياغة الفكرة وتحديد الشكل النهائي لها، فلا يمكن بدء خطوة بهذه الأهمية بدون مشاركتهم".

هذا اسمه نظام:

اللى تغلب به ..... العب به

هو يمكن شايف ان لعبة العياط باسم الدين والرحمة موسمها قارب على الغروب ، وأن انشاء احزاب جديدة نجمه بازغ ، ، ففكر ان يركب الموجة القادمة

[م تيمور المراغي]

انزهك ان تغتاب عمرو خالد بما ليس فيه

لم تطلع على قلبه حتى تتكلم عن نواياه

للاسف ده قدر الدكتور مع بعض البشر

التشكيك والتشكيك ولا شيئ غير التشكيك

بدون ادنى معرفة او دليل

لك الله يا عمرو خالد ,,

[doha]

بغض النظر عن بعض التحفظات لدي على عمرو خالد نفسه ففكرة انشاء حزب لصناع الحياه اجدها منطقية ومتماشية مع مبدأ اقامة جمعية صناع الحياه نفسها او ايا كان كيان هذا التجمع قبل ان يتحول لحزب ..

من جهة فمفيش مانع ابدا ان يكون في حزب ملوش توجهات سياسية .. هو مش في الغرب حزب اسمه حزب الخضر وكل نشاطه واهتمامه ينحصر في الحفاظ على البيئة والدفاع عن قضاياها ؟؟

بنفس المنطق فحزب صناع الحياه هتكون كل مهمته ـ على مايفترض ـ الدفاع عن قضايا تهم صناع الحياه يعني القضاء على الفقر والجهل والمرض والبطالة والتصدي لكل الامور المتعلقة بهذه القضايا ..

ده من جهة ..

ومن جهة ثانية فاجتماع صناع الحياه في حزب رسمي له احصائاته الرسمية يعني الكثير لاي قضية سيتصدى لها .. يعني هيبقوا عدد ضخم اكيد له صوت ويخشى منه ويعمل له حساب .. ممكن جدا الحزب ده باصواته دي يوصل البرلمان وساعتها يفترض بيه انه يدافع عن القضايا المؤمنين بيها شباب الحزب ..

العيب الوحيد الي ممكن يترتب على هذا الحزب هو ايصال عمرو خالد كشخص لمنصب كبير او تحقيق مكاسب شخصية له وده الي كان مزعل ناس كتير منه من البدايه حيث اعتبروا ان مايقوم به من اصلاحات هي في الاساس لغايه في نفس يعقوب مش اكتر ..

عموما الشباب مش ساذج واذا ثبت بعد فترة ان الحزب ملوش لازمه فمظنش هيستمروا فيه ومظنش عمرو خالد لو دي نيته هيلحق يقطف ثماره ..

لست ضد انشاء هذا الحزب نهائيا بس مظنش اني هكون عضوة فيه ..

[م تيمور المراغي]

احيي حضرتك ,,

مع اني كنت اتمنى تنضمي اليه بجد

زي ماتفضلتي المحك هو الشباب وبسطاء الناس بفطرتهم النقية الحكيمة التي تفرق بين ما هو مزيف وما هو اصيل ,,

ننشا الف حزب ايه المشكلة !!

والعبره في النهاية هو الصندوق

[م تيمور المراغي]

عمرو خالد يعود إلى الحصري بعد 9 سنوات,,

بعد غياب 9 سنوات كاملة، عاد د.عمرو خالد إلى مجمع مسجد الحصري بمحافظة 6 أكتوبر لمناقشة أوضاع مصر بعد ثورة 25 يناير الأخيرة، وذلك عقب فترة تضييق على الداعية المصري من حضور اللقاءات الجماهيرية خاصة في مسجد الحصري الذي اعتاد على إلقاء دروسه فيه.

وجاءت ندوة عمرو خالد تدشينا لفكرة "نبع الحصري الثقافي" الذي سيقدم شهريا مجموعة من الفعاليات والأنشطة لتدعيم المواهب وإيصال فكرة الفعاليات الثقافية على شاكلة "ساقية الصاوي" التي اعتادت أن تقدم أنشطة ثقافية وسياسية في عهد مبارك.

وأتت الندوة تحت عنوان "النهضة والتغيير" والتي حضرتها الحاجة ياسمين الحصري مديرة المجمع وسط آلاف الشباب الذين حرصوا على الحضور.

[م تيمور المراغي]

عمرو خالد يلقي خطبة الجمعة في اطفيح ,,

"اختبار مصر يبدأ من قرية (صول).. الفتنة لو تم إخمادها هنا، فستجعل من صول رمزاً يحتذى به في الوحدة الوطنية"..

تلك كانت أبرز ما قاله الداعية الإسلامي الدكتور عمرو خالد في خطبة الجمعة، التي ألقاها من على منبر مسجد علي بن أبي طالب بنزلة ترجم المتاخمة لقرية ''صول''، في أطفيح التابعة لمحافظة حلوان، حث خلالها على نبذ الفتنة وإفشاء السلام والوحدة بين كافة المصريين بمختلف انتماءهم.

وقال د.عمرو خالد، في خطبته التي حملت عنوان ''شكر النعمة''، ''إن الحرية فضل من الله وكذلك العطاء بيده.. ومن آثار رحمته على مصر أن الثورة كانت سلمية، وكان المسلمين والمسيحيين كانوا يداً واحدة عملت على انجاح الثورة"، مؤكداً أن الرسالة الذي جاء بها اليوم لقرية ''صول'' كمسلمين ومسيحيين هي أن المصريين جميعاً يرفضون الفتنة ويتصدون للفوضى ويرفعون شعار ''إما فوضي أو نهضة.. والجميع اختار النهضة لا الفوضى''.

وأضاف ''مصر في مفترق طرق إما النهضة التي تضمن التقدم وإما الفوضى التي ستأكل الأخضر واليابس''، محذراً من أن تكون ''صول'' قاعدة تنطلق منها الفتنة الطائفية لتأكل الأخضر واليابس وتأتي على مكتسبات الثورة.

وتابع خالد: ''إن أحدا لن يحمى الوحدة والتماسك بين أهالي قرية صول وكافة القرى والمدن المصرية الأخرى سوى المصريين أنفسهم، فالجميع جاء إلى هنا وسوف يغادر المكان سواء الجيش أو الوفود التي تأتى يوميا للقرية وسيبقى أهل القرية الذين يجب أن يحافظوا على وحدتهم بأنفسهم''.

وطالب عمرو خالد أهالي قرية صول، من الذين حضروا خطبته، مبايعته على عدم القبول بالفتنة، ووأدها، وإعادة بناء الكنيسة لحفظ الثورة ومكتسباتها من شر الفتنة الطائفية والانقسام.. وقَبِل الحضور المبايعة، وتوجهوا إلى الله بالدعاء وراء د.عمرو خالد.

وشدد عمرو خالد في خطبته على أن وأد الفتنة وإخمادها لو تم فيتكون قرية ''صول'' رمزاً يحتذى ومثلاً يؤخذ به في الوحدة الوطنية، وقال ''اختبار مصر يبدأ من صول؛ وهو أن الفتنة لو خمدت فستجعل صول رمزا يحتذى به في الوحدة الوطنية، وأنها من وأدت الفتنة في مصر؛ لأن عصر الفوضى والسلبية انتهى.. والجيش والعلماء مشكورون، ولكن أهالي صول هم من سيزيلون آثار الفتنة''.

وطالب خالد في نهاية خطبته أهالي صول بقبول الصلح والجلوس للتفاوض، حتى لا يكونوا سبباً في مزيد من الفوضى في أم الدنيا، رافعاً يده بالدعاء إلى الله ليحفظ مصر وأهلها.

[ام سلمي]

ده فيديو رد عمرو خالد عن موضوع الحزب مع عمرو اديب في القاهرة اليوم للأسف مش عارفة اجيبه يوتيوب بس لنك الفيديو اهه

http://protv.allourlife.com/6571

[م تيمور المراغي]

ده فيديو رد عمرو خالد عن موضوع الحزب مع عمرو اديب في القاهرة اليوم للأسف مش عارفة اجيبه يوتيوب بس لنك الفيديو اهه

http://protv.allourlife.com/6571

تسلم ايديكي ام سلمى ,,

http://www.youtube.com/watch?v=leJm34Vmglg

[abaomar]

السلام عليكم

الاخوه الكرام جزاكم الله خيرا

شخصيا اتوقع نجاح لهذا الحزب المزمع تكوينه نظرا لما يتمتع به عمرو خالد من مميزات

اهمها الخبره الكبيره التى اكتسبها من التعامل مع حزبيين أخرين مثل التى كانت فى الانتخابات الاخيره

المزوره فى مصر و اكتسحها الحزب الوطنى و كان لعمرو خالد نصيب فيها عندما قام بالدعايه لمرشح الحزب فى الاسكندريه

من خلال المحاضره التى القاها هناك تحت رعايه اللواء عبد السلام المحجوب

تم تعديل 14 مارس 2011 بواسطة abaomar

[لماضة مصرية جدا]

السلام عليكم و رحمة الله و بركاته

مع راي الافاضل اللي سبقوني ان عمرو خالد دينامو في توجيه طاقة الشباب و اعادة بناء افكارهم و خصوصا فيما يتعلق بالتنمية الايمانية اللي راقتني كثيرا لان بتحاول تصحي جوه الشاب الحاير فطرته السليمة للخير و الجمال و في نفس الوقت بتحاول توجه طاقتي للبناء و الابداع

عندي شوية تساؤلات

1- لو بنفس المنطق...كل واحد عمل فكر ابداعي يبقي يعمل حزب.....يبقي كل مصر هتبقي احزاب...يبقي ايه الفايدة؟؟

2- بشوف روح عمرو خالد تنفع مثلا في وزارة زي الشباب او الثقافة و لو ان برضه هيبقي عندي تحفظ ان عمرو خالد وجوده في مكان زي ده ممكن يتفهم انه رمز ديني و بالتالي ليه ميكونشي فيه رمز ديني مسيحي برضه....ليه لا؟؟

3- اللي انا فهمته ان اللي كان مانع عمرو الفترة اللي فاتت ان افكاره كانت بتغطي علي افكار الحزب الوطني....لكن دلوقتي متهيالي عنده فرصة ذهبية انه يشمر و يكمل كل مشروعاته التنموية

4- سؤال بقي ع الهامش.....حدش يفهمنا يعني ايه حزب؟؟؟ مش ده يعني توجه سياسي اصلاحي معين....و الفرضو يكون فيه شروط لتكوين الحزب و اللي اكيد لا تقتصر علي شعبية و جماهيرية فرد واحد و انما تعتمد علي توجه سياسي معين.

5- فكرة حزب اسمه "صناع الحياة".....مش عارفة حاساها فيها تحيز اوي و فيها تعبئة برضه من ناحية تانية

لان يعني هو مين هيقدر يعارض حزب اسمه "صناع الحياة"...اصل الفكرة في سطحها حلوة....طب عمقها ايه بقي؟؟؟؟

لما مصر تستقر ان شاء الله اكيد هنحتاج نسمع بعمق فكرة تكوين الاحزاب و ازاي تخدم مصر كلها

تحياتي

ا