من فضلك .. حافظ على شعوري

[se_ Elsyed]

أنا قلت نديها موضوع خفيف كده بدل التنشنة والأخبار السياسية المولعة والمتتالية واللي كترها ممكن يجيب للواحد هوسهوس ....

فضلت أفكر وأفكر وأهرش في دماغي عشان أعتر على فكرة موضوع ... وأثناء ما أنا بأهرش .. بأبص كده لقيت كام شعرايه طلعوا في إيدي والظاهر إني هرشت أزيد من اللازم ... وهنا .. طقت في دماغي فكرة الموضوع

قلت .. بس .. هاكتب موضوع عن الشعور ... الشعر يعني .... ومعليش الكار بيحكم ...

- وأنا عارف الفئة اللي مش هاتصدقني هما اللي الشعر لا يُمثل لديهم مشكلة .. مش قلاطه ولا كبرياء . لأ .. ولكن يرجع هذا إلى ظروف طبيعية ومناخية وأحياناً وراثية حرمتهم من نعمة الشعور ... عشان كده مش عاوز الموضوع ده يجرح مشاعهم .. لأ مشاعرهم إيه ... ده مافيش أساساً .. خلينا نقول يجرح أحاسيسهم ..

- تخيلوا بقى إني أخر مرة زورت فيها الحلاق كانت بتاريخ 6 يناير 2011 ؟ اه والله ... فاكر التاريخ كويس لأني كنت في مصر ... وأحم أحم .. من حكم في ماله فما ظلم .. فأنا وأخويا عندنا صالونين حلاقة ... وبأسخر العيال اللي هناك وبأحلق 3 مرات في اليوم ( إيييييييييييييييه ... بفلوسي ) ... ومن ساعة ما رجعت للرياض . نقول كسلت بقى .. أو إنشغلت في أحداث الثورة والثورة المضادة ... لحد أخيراً قررت أخد القرار الصعب واروح أحلق بقى وأجري على الله لأن عيب كده وشعري قرب يتضفر وهابقى عامل زي بتوع المولد اللي بيبقى شعرهم نازل لحد أكتافهم ..

جُمُلة إعتراضية خاصة بالشعور ( من فترة قصيرة كده .. ايام أو أسابيع قليلة لقيت مدام سين سين بتطلب مني أوصلها للكوافير اللي على أول الشارع هنا بس لازم تستغل أهلي ... عشان تروح تسأل هي وجارتنا على تكلفة فرد الشعر والحركات دي ... المهم وصلتها وفضلت ملطوع قدام الكوافير ألعب جيمز .. وبعد شوية لقيت الستتين طالعين مبلمين هما الإتنين وكأن على رؤوسهما الطير ... ولقيت زوجتي بتديني كوتيشن مكتوب في طلاسم غريبة ... المهم الخلاصة يعني عرفت إن صاحبة الكوافير اللبنانية قالت لها : لك تؤبريني .. عشان خاطرك جلسة فرد الشعر بالكيروسين ولا الكرياتين ولا زفت الطين ده بره بتتكلف 6500 ريال .. لكن عشان إحنا جيران هاعمل لكم أوكازيون هاخد من الواحده فيكم 3500 ريال ...

وسألتني إيه رأيك ؟

أه والله ... فقلت لها : أنا شايف إني أروح أتجوز واحده تاني أرخص لي واسهل لي وإن شالله تكون قرعه .... 3500 يا ظلمة ... يعني حسبة 5500 جنيه ياللي ما بتخافوش ربنا ... طب راعي مشاعري وهاتيها لي واحده واحده مش تطسيها في وشي كده ...

وطبعاً هددتها إني هابعتها عند أبوها وأقول له : بنتك جرحت مشاعري يا عمو ....

الله يرحم خالتي باتعه البلانة .. اللي كانت تنفض العروسة من دول شعر ودقن وغسيل ومكوه .. وكل ده بجوز جنيهات ...

- وفعلاً حمدت ربنا إني إتخلقت راجل .. لا حد يقول لي فرد شعر ولا جر شكل ولا يجرؤ إنه يزود عن 30 ريال ... وكمان بأبقى مطلعهم من من لحم الحي كل كام شهر .. وخلصت على كده ..

- انا الحمد لله من النوع اللي بيحافظ على اي حاجه خاصة به ... أنا فاكر كويس سنة 98 أشتريت ماكينة لتهذيب الدقن - حلوه تهذيب دي ... الدقن إصلاح وتهذيب وشوية حاجات تانية فوق بعض - ماركتها ناشونال قبل باناسونيك ما تشتريها .. كانت في حدود 200 ريال .. ما شاء الله لسه معايا وشغالة زي الفل ... لأني بأحلق دقني أو بأسويها بمعنى اصح مرتين تلاتة في الأسبوع زي الولا الرخم داهوت

- أما عن كريمات الشعر والحركات دي .. ففعلاً حاولت من زمان .. من ييجي 20 سنة بدون مبالغة أبدل أو أستخدم ولو لمره واحده فقط على سبيل التجرية كريم غير " بريل كريم " ما نفعش معايا .. وباحس إن أي كريم غيره بيعجن شعري وبيبقى عامل زي البسيسة كده ...

- وطبعاً ما بينفعش معايا لا جل ولا المنتجات والمشتقات بتاعته ....

- جربت بقى حوالي مرتين تلاته أجيبها زيرو .. مره بعد ما أديت أول عُمرة سنة 96 ... ومرتين في الحج 98 و 2001

- وعاللي جرا من مراسيلك عاللي جرا ... بدون مبالغة ... شعري لو جبته عالزيرو بيقعد 4 شهور كاملةً عشان يادوب ينبت كده ويبقى كإني دخلت الجيش ... مش عارف ليه ... لكن لما يكبر ويشد حيله بينطلق ويسترسل .... شغل بوصيلات وهرموناط على رأي حجاج عبد العظيم في فيلم سور الصين العظيم .

- من حوالي 5 سنوات وعشان العصبية الزيادة والحاجات دي .. إبتديت أقلب على صلاح قابيل .. يعني خُصل كامله بقت بيضا .. والباقي إسود فحم . وعلى رأي واحد صاحبي . ده موجود وده موجود وكله في السوق وعُمر إبني بيذلني بقى ويقول لي إنت خلاص عجزت يا بابا وبقيت جدو الكبير

----------------

عاوزين نسمع بقى تجارب شباب الثورة في عالم الحلاقة ...

وما عنديش مانع في تلقى رسائلكم واستفساراتكم على هاتف البرنامج زيرو زيرو زيرو ... بس بالتدريج

[لماضة مصرية جدا]

ترن....ترن......زرتررن....بيرن....(صوت بهجت الابصيري و هو بيعمل صوت التلافون)

السلام عليكم و رحمة الله و بركاته

ألو

برنامج

أريد شعرا

لو سمحت استاذ اسمة منير ممكن اشترك في البرنامج

صوت اسمة منير...م ع الناحية التانية من كوباية الزبادي.....اتفضلي

مش عارفة ليه يا استاذ اوسامة ....قصدي يا استاذي س س لما قريت الجملة دي

- وفعلاً حمدت ربنا إني إتخلقت راجل .. لا حد يقول لي فرد شعر ولا جر شكل ولا يجرؤ إنه يزود عن 30 ريال ... وكمان بأبقى مطلعهم من من لحم الحي كل كام شهر .. وخلصت على كده ..

جت في دماغي الصورة دي

طول عمري و انا بسال نفسي.....عن السيد عبد المعطي ناظر المدرسة....

اصل فيه سوء توزيع في الثروات خالص

تحس "تصحر" في مناطق مصر الوسطي....مع تكدس سكاني..."شعري" علي ضفتي النهر....قصدي علي جانبي الودن

حبيت بس ارفع من روحكم الشعرية....و خصوصا بعد صورة...."مهند" اللي نورت التوبيك دهون

الو

الو

الو

الخط قفل

انت بتقفل علي صباعي

مااااااااااااشي

مسا حضرتك.....شعور جميل جدا

بس سؤال علي هامش الشعور و كده

انتو بتضايقو ليه لما الستاية بتهتم بشعرها.....و بتهتموا انه يبقي طويل و مجرجر...و لما تحب تقص منه تنتوفة لازم بقرار داسطوري

تم تعديل 12 مارس 2011 بواسطة لماضة مصرية جدا

[لماضة مصرية جدا]

السلام عليكم و رحمة الله و بركاته

كلاكيت تااااااني مرة

فيلم..."امسك انفي من فضلك"

زمان....اييييييييييييييييه

في فترة من فترات الجنون....و لا زالت

كنت واخدة قرار غريب اوي

كنت عايزة اتأكد ان اللي هيتجوزني بيحبني لشخصي.....مش لاي حاجة تانية....(ودول بوقين بنقولهم عشان نتلكك و الجوازة متمشيش و هي مش ماشية اصلا)

ففكرت في فوكيرة صغيرة...ايه بقي

اني احلق شعري زيرو.......ايون

بس شافقة به يا رمضان كنت هخليله القوصة

يعني كنت مهيئة نفسي.....اني هيبقي عندي قوصة....و بعدين طرحة الزفاف و تحتيها فولة شمعة منورة

مش عارفة رد فعله هيكون ايه

بس كنت عايزة اتيقن.....بما لا يدع اي مجال للشك....انه بيحبني انا لسخصي يعني

و لاني دلوقتي بقيت اجبن....و المفروض اعقل.....فأجلت الفكرة دي.....لحين ميسرة ان شاء الله

و افتكرتها دلوقتي في الصالون هنا

تفتكر حضرتك احتفظ بيها....و لا اكفي ع الخبر ماجور...(وش اي واحدة بتمصمص شفايفها و بتعمل صوت شفط لمون او حاجة زي كده)

اييييييييييييييييييييييييه دونيا

سؤال علي هامش الذكريات

هو انا ايه جابني هنا

مش المحل هنا رجالي..... :blink: :blink:

طب فوتكم بعافية

[se_ Elsyed]

مع إن الصالون ده رجالي ... لكن قريباً بإذن الله هانفتح كوافير حريمي على ناصية التوبيك ( مع وجود قسم خاص للعرايس والمحجبات )

ده سؤال وردنا من أنسة رمزت لنفسها بـ " نوسه المُعذبة "

س :

انتو بتضايقو ليه لما الستاية بتهتم بشعرها.....و بتهتموا انه يبقي طويل و مجرجر...و لما تحب تقص منه تنتوفة لازم بقرار داسطوري

ج : مساء الخير ( صوت اسامة منير التبت وهو بيتكلم من بطنه ....) أختي نوسه ... مساءو الخير ( مرتين مساء الخير أوفر قوي بصراحة وحاجه تجيب المغص ) أنا بصفتي راجل ( واللي يقول غير كده أخزق عنيه ) .... الراجل من أيام ما بيكون شباب ورور صغير وهو دماغه بتتبرمج وبتتبلف بأغاني عاطشفية من أمثال ( الشعر الحرير على الجبين يهفهف ... ويرجع يطير يطير وبتلوموني ليه وكدهوت ) .. فبتتكون عنده عقده نفسية في اللاشعور الباطني . وبيرتبط جمال المرآه عنده بالشعر الطويل حتى لو كان عيره ... لكن لما نيجي للحياة العملية وخلاص اتدبس وإتجوز وتيجي مراته تقول له إيدك على 3500 ريال أعمل شعري ..فبينسى كل ده وبيطلع الشيطان الشرير الكامن في مكانين أعماقه ويقول لها وهو بيجعر : ده أنا عندي تجيبيه عالزيرو ولا اطلع 50 ريال عشان الفرد والكوي ...

----------------

وده سؤال تاني جالنا من الأنسة ( ريري ) بتقول فيه

تفتكر حضرتك احتفظ بيها....و لا اكفي ع الخبر ماجور

ج : مساء الخير يا ريري .. خليكي ناصحه يا ريري وكعبلي الزبون الأول وإن شالله بعد الجواز تعمليه كابوريا حته ... لكن شوفي الزبون بيحب إيه وريحيه ... كاريه موجود ... جرسون ما يضرش ... جدايل جدايل زي زينب العسكري كده - جُمله إعتراضية .. أه ياني ياما -

شغال برضوا

وهاقولك حكمه أخيره بتقول " الست مش بس بشعرها .. الست بأدبها وعلمها ... ) وأبقوا قابلوني لو نفعتو

[ozoozo]

عمو ثين ثين

حضرتك كنت حاطط ثورتك قبل كده في احدي التوبيكات وكنت مزنوق في سؤال بس نسيت

هو حضرتك هندي؟

اصل فعلا شكلك هندي خالص

طيب لو هندي ....فين الفيل

لا لا قصدي بتكلم ازاي عربي صديج؟

[لماضة مصرية جدا]

خليكي ناصحه يا ريري وكعبلي الزبون الأول وإن شالله بعد الجواز تعمليه كابوريا حته ...

لكن شوفي الزبون بيحب إيه وريحيه ... كاريه موجود ... جرسون ما يضرش ... جدايل جدايل زي زينب العسكري كده - جُمله إعتراضية .. أه ياني ياما -

شغال برضوا

وهاقولك حكمه أخيره بتقول " الست مش بس بشعرها .. الست بأدبها وعلمها ... ) وأبقوا قابلوني لو نفعتو

شوفي الزبون...عايز ايه و ريحيه

انا كتبتها علي ورقة اهوت و حطيتها في البوك بتاع الفلوس الفكة.....و هفضل اسمعها و انا ماشية لغاية ما اكعبله...او هو يتكعبل...او اي حيطتين يلبسوا في بعض و خلاص

شوفي الزبون عايز ايه....و ريحيه

شوفي ريحيه عايز ايه و ازبونيه

شوفي عايزة ايه ريحيه الزبون

عايز ايه شوفي.....ريحيه الزبون

ريحيه....عايز ايه....الزبون شوفي...

مش عارفة ليه حاسة كلمة ريحيه...دي معناها موتيه

خلصي عليه

جطعيه نساير نساير.....(وش فوزية في مسرحية سك ع بناتك)

ع هامش الاجرام و الرومانسية و كده

الصورة اللي حضرتك حاططها....دي لواحد حولة....و بتقدم اعلان عن فليت صراصير اسمه العسكري

و نهيب السادة المواطنين الشرفاء عدم ترويج مثل هذه المطبوعات حرصا علي سلامة الاسرة المصرية

حفظ الله شعوبنا و اسرنا المصرية من كل حول

حد ينزل بأغنية

حلاوة شمسنا يا جدعان

و نرجع نقول.....شجعوا المنتج المصري

فوتك بعافية

[Salwa]

مساء الخير..

ولو انه موضوع رجالى ...بس ممكن كلمتين على جنب ؟؟

ممكن؟؟؟

حذار وحذار وحذااااار ....من قصص التنعيم عن طريق الكرياتين ...ومهااااااااازل التنعيم بالطريقة البرازيلية اللى فعلا فعلا انتشرت فى مصر.....وطبعاااا ف الدول العربية .

اثبتوا ...ان فعلا فعلا الطريقة دى (( بعيد عن السامعين يعنى )) بتجيب كنسر..

وبتوقع الشعر .

وفعلا الاسعار غالية ..

يعنى يقولوا ان الشعر علشان يبقى ناعم محتاجة كل ثلاث شهور تعمل مرة ...

ولالالالابد...يكون الكرياتين مفيهوش فورمول (( الفورمالين )) لأن هو ده اللى بيؤدى للكنسر.

فيه بقى اللى منتشر قوى التنعيم اليابانى ..

ونتكلم شوية صغننين على الفرق تقريبا يعنى وعلى حسب معلوماتى ...

زمان كان فيه ف مصر حاجة لتنعيم الشعر اسمها ( جلات ) واظن ان لسا موجود...آهو التنعيم اليابانى اللى منتشر ف اوروبا بيشبه لكدة بس على مواد اقل ( أذية )) ..ده بيكون يعنى زى ما بيقولوا ...؛تة واحدة..يعنى ناعم جداا زى الشعر اليابانى .

ولكن التنعيم عن طريق الكرياتين ...هو بيكون عبارة عن مواد كتيرة قوى قوى مليانة زيوت تنعم الشعر وممكن يتسرح حسب ما تحب .

والصراحة ؟؟؟ واسمحوا برأى حريمى ..

كل ده مؤذى جدا جدا جدااااااااا........وف المستقبل يؤثلر على المرأ’ وافضل شئ لو واحدة محتاجة لتنعيم الشعر ...!!!!

ف اوروبا بيدوروا (( بشمعة )) على المواد الطبيعية ..

وجداتنا كانوا بيستعملوا حمام زيت مرة ف الاسبوع مكون من (( زيت زيتون او زيت جوز هند ...اصلى ...من اللى بيجيبوه من اسوان ))..وفيه حمام بيعملوه من الزبادى والعسل الأبيض ..

ده حقيقى ومش تهريج ..

وكلمة شرف ..انا لااكذب فى اى شئ وممكن تتأكدوا من كلامى عن طريق أى حد (( مش كوافير )) وعارف ....صيدلى مثلا او حتى يفهم ف التركيبات الكيميائية .

مساء الطبيعة الحلوة .. :give_rose: