الراجل ده هيجنني

[لماضة مصرية جدا]

السلام عليكم و رحمة الله و بركاته

اعزائي المستمعين

اهلا و سهلا بيكم في حلقة جديدة من برنامج كيف تقتلين زوجك....علي نار هادية :)

الحقيقة بفكر من فترة افتح توبيك عن ..."ازاي تغيري شريك حياتك"....و محدش يفهمني صح و يقولي قصدك يعني ان احنا نشيل السيد عبد المعطي ناظر المدرسةاللي قاعد بيتفرج ع التلفزيون دوت....و نحط مكان مثلا مثلا مثلا احمد عز.....او محمد حماقي.....او بلاش وائل جسار :closedeyes:

لا يا اخواننا اعلم الكثير من السيدات الصابرات الصامدات العاصرات علي انفسهم لمونة و مكملات

التوبيك هنا ببساطة....

ابتدي بجملة.....

الراجل ده هيجنني....و حطي بعديها اي تصرف فعلا بيضايقك من الشريك المخالف...قصدي شريك حياتك

اكتبي بحرية.....و محدش هيبص عليكي....(اياك حد يبص علي عدد الزوار في التوبيك...و اياك حد يدي لجوزه مكان المنتدي هنا.....عايزين حبة هوا و فضفضة)

و من ناحية تانية...احنا بنعمل معروف في اخوان البشرية.....ايون اخوان....(عشان يبقوا جماعة محظورة و يتقبض عليهم :P )

هيقروا حاجات كتير مبتعجبناش فيهم....و يا رب يحاولوا يتغيروا....لان احيانا الواحدة لسانها بينبري من كتر الكلام و مافيش فايدة

فلنبدأ علي بركة الله

فوتكم بعافية

الي الامام.....الي الامام.....(وش الجدافي)

[مصطفى يونس]

هوا الراجل هيلاقيها منين ولا منين

حتى فى البيت اللى المفروض يلاقى فيه راحته

يارب يحاول يتغيرو :

خلاص بقى اللى كان كان واللى حصل حصل

الى الامام الى الامام الحت دى بتاعت ملك ملوك افريقيا (العبيط )

[أيمن عبد العزيز]

اعزائك المستمعين رجالة يا فندم و دا معناه انك احتمال تلاقي الموضوع انقلب على الزوجات ( و هذا ما اتمناه )

انا طبعاً معاكي قلبا و قالباً إن لازم كل زوجة ( تتفك ) هنا شوية معاكي ، بس خايف ان زوجها يقرا كلامها و بعد الشر بعد الشر يطين عيشتها ( و هذا ما اتمناه )

و بعدين يعني لازم التفرقة العنصرية و يبقى الموضوع للزوجات فقط ؟

خلي صدرك واسع و استقبلي حكايات الأزواج و خليهم يتفكوا هما كمان هنا عشان هما و الله مساكين و مش بيلاقوا حد يفضفضوله .. خليكي انتي ملاك الرحمة و اسمعيهم

انا بهدي النفوس بس ..

[fatfouta]

اعزائك المستمعين رجالة يا فندم و دا معناه انك احتمال تلاقي الموضوع انقلب على الزوجات ( و هذا ما اتمناه )

احم احم

لو سمحت كده شوية يا اخواننا :protest:

نحن هنا يا لماضة يا بنتى ماتخافيش احنا معاكى بس ورانا شوية حاجات منزلية من طلبات الرجالة اللى مابتخلصش ذى كوباية شاى او هاتى لى أكل للمرة التالتة مثلا

او اعمليلنا حاجة حلوة....هنخلص ونرجعلك تانى

يووووووووه اوسكتى يا بنتى ده الواحد شايل على قلبه وساكت

هيييه فين ايام نون النسوة

ألا هى بوسبوس فين كانت دلت بدلوها فى الموضوع ده؟؟

جمع المذكر تطاع برا لو سمحتوا :closedeyes:

[لماضة مصرية جدا]

السلام عليكم و رحمة الله و بركاته

اعزائي المستعمين.....برضه اعزائي....(بالعند في استاذ ميمس :P ....وش اي واحدة بتجز علي سنانها)

الراجل ده هيجنني....لما نبقي قاعدين في الجونينة....و الهوا بيطس في قفانا....و العصافير تغرد...(لا مكنشي فيه عصافير...كان فيه شوية عيال بالعجل)....و بعدين الاقيه بقدرة قادرة افتكر الخناقة اللي عملها مع المدير....و الباركنج اللي ركن فيه غلط....يتطور الحوار لغاية ما يفتكر انه يتصل بالاهل في مصر عشان يفتحوا التربة بتاعت امه و يغيرولها الكفن....(انا اول مرة اسمع كده الحقيقة)

فاصل اعزائي المستمعين...و لينا عودة

اوعي تسيب المخدة.....عضعض فيها لغاية ماآجي

فوتكم بعافية

[pink rose]

مساء الخير

ينفع اشترك معاكم في البرنامج؟

بس انا مش هاقول الراجل دا هايجنني لاني مع الاسف مع الالم ما باشوفش الراجل دا غير و انا باصحيه الصبح عشان ينزل الشغل

لكن هاقولك حاجه و اغلب الستات هنا هاتشاركني فيها

كتير الست تحذر من حاجه معينة او تبدي رأيها في شئ معين و تتكلم و تتكلم و الراجل بعد كل هاذوها الحوار الطويل العريض يعمل اللي في دماغه

و بعد فترة تسمع الست الكلمة المعتادة تصدقي كان معاكي حق لما قولتيلي كذا

بس للاسف بيكون الكلام دا بعد الفاس ما وقعت في الراس و في وقت لا ينفع فيه الندم

المهم سؤال هو انا ينفع احور في التوبيك و اقول

البت دي هاتجنني؟؟؟؟؟؟؟؟؟؟؟؟؟؟؟

:Head: :Head:

bsh:) bsh:) bsh:) bsh:) bsh:)

[لماضة مصرية جدا]

اعزائي المستمعين....(انا تعبت من ايد الكبشة اللي انا ماسكها دي و دايرة بيها في المحاورات)

نزولا علي طلب المستمعين و المستمعات....المغيوظين و الغيوظات

ممكن تتكلم هنا في التوبيك

كده

الراجل ده هيجنني...........(و الست تحدف اللي غايظها من زوجها...من خطيبها...من اي حد مكتوب في البوطاقة راجل يعني)

الست دي هتجنني.........(و الرجالة ترزع بقي اللي هي عايزة تقوله....و الستات هتبقي بتشجعهم علي دماغتهم بغطيان الحلل.....وش واحدة وهي بتقول هجوووووووووووم)

و برضه

البت دي هتجنني....(مع اني مش عارفة يا رفيقة ريمو مين هتبقي البت....بس يجوز برضه)

و اخيرا لاني من محبي هذا الكائن فبرضه نقول

القوطة دي هتجنني.......(لخبطولي التوبيك....بس اتصدقوا....هستفيد منكم كتير...الهي ما يحرمني منكم....وش اي ام بتدعي لولادها في الفجر)

اعزائي المستمعين

هننزل باغنية ارخي الستارة اللي فريحنا احسن جيرانا بتجرحنا

و هنرجع تاني ان شاء الله

فوتكم بعافية

[لماضة مصرية جدا]

اعزائك المستمعين رجالة يا فندم و دا معناه انك احتمال تلاقي الموضوع انقلب على الزوجات ( و هذا ما اتمناه )

انا طبعاً معاكي قلبا و قالباً إن لازم كل زوجة ( تتفك ) هنا شوية معاكي ، بس خايف ان زوجها يقرا كلامها و بعد الشر بعد الشر يطين عيشتها ( و هذا ما اتمناه ).

جالنا رسالة...."مطينة" من مستمع البرنامج الدءوب استاذ ميمس

استاذنا الفاضل....انا بشوف اني دي حاجة صحية جدا

انك تعبر عن اللي مضايقك....غايظك....دي حاجة كويسة....اينعم هينتهي بيك الحال و انت بتقول....كتاكيت....(وش عبد الفتاح القصري و هو عامل مجنون)

بس مهم ان الناس تتكلم......و بعدين لما الطرف التاني يجي يشرفنا في التوبيك....يبقي يعمل نفسه عبيط....لمؤاخذة يعني.....دي فرصة ذهبية من عيار 22 انك اخيرا....اخيرا....اخيرا....تقدر تفك شفرة البرطمة اللي بتسمعها كل شوية و هتموت....بعد الشر طبعا و تعرف هي الستات بتبرطم بتقول ايه

و الله انا قلبي عليكو....و عليهم...و علينا كلنا....(وش اي واحد بتقيس الضغط....!!!)

عزيزتي الزوجة...الخطيبة....بائعة البطاطا

عزيز الزوج...الخطيب.....بائع الدرة

من حقنا كلنا نبرطم

دعونا نبرطم

*&^%#@$)(@##$*)!#%^&&*)#$%(

بس خلاص

[المهندسه]

انا بقه مفيش راجل مجننى لانى خلاص جتتى نحست ...ريمو مش بتشوف ابو مريم غير و هى بتصحيه علشان يروح الشغل

انا بقه ابو ليلى شغله فتره واحده من 8 الى 5 بيبقى هنا على 6 مثلا ...طبعا ياااااه حظى حلو اوى بيقعد معانا كتيييير يااااه

بس الحقيقه يا اخواتى انه ..يرجع الساعه 6 لازم طبعا يكون الاكل محطوط عقبال ما يغير هدومه

ياكل و الساعه 6 و ربع ما شوفوش.....

اصله مأجر عقبال عنكوا اوضه السفره يدخل يقعد على اللابتوب و يقولنا بصوت عالى "اخرجوا بره ...خدى العيال دى ...بيشدوا السلك بتاع النت...بررررررره"

و ما شوفوش غير تانى يوم فى نفس الميعاد لانى بنام الاول طبعا

كلام بالراحه ما نفعش ...كلام مش بالراحه برضه ما نفعش...مامته تكلمه مش نافع ...باباه يكلمه مش نافع

حدش عنده حاجه تنفع....

[arkan]

الراجل ده هيجننى لما بيتكلم في الموبايل وهو بيسوق وطبعا مكالمات طويلة وانا قلبي بيقع في رجلي

يارب يحسوا بنا وربنا يسلم

[م تيمور المراغي]

وعند جهينة الخبر اليقين !

مسموح لي اشارك بخبراتي ؟

ولا التوبيك لنون النسوة فقط !!

[أيمن عبد العزيز]

جالنا رسالة...."مطينة" من مستمع البرنامج الدءوب استاذ ميمس

استاذنا الفاضل....انا بشوف اني دي حاجة صحية جدا

أنا كمان الحقيقة شايف إنه لما يطين عيشتها بتكون حاجة صحية جدا جدا bsh:) .. و دا لإنه بيرد جزء بسيط من جمايلها الكبيرة جداً عليه .. و يا ريته يعرف يرد :closedeyes:

انك تعبر عن اللي مضايقك....غايظك....دي حاجة كويسة....اينعم هينتهي بيك الحال و انت بتقول....كتاكيت

يووووووووووووووووووووه .. إذا كان على اللي مضايقني و غايظني و مطلع عيني فدا محتاج مجلدات :sad:

بس مهم ان الناس تتكلم......و بعدين لما الطرف التاني يجي يشرفنا في التوبيك....يبقي يعمل نفسه عبيط

ما هو هيعمل نفسه عبيط في المنتدى لكن في البيت هيعمل مجزرة wst::

انا مش عارف ليه حاسس بالغربة في الموضوع دا خصوصاً إن مفيش راجل غيري بيرد و دا مش كويس على صحتي :ninja:

و خصوصاً مع وجود الثورة المضادة في البلد .. ما حدش عارف الزوجات ممكن تعمل ايه md2:

على فكرة انا معنديش حد افضفض منه .. بس حبيت أشترك معاكوا بصفتي النوعية بس

[Simba]

اهو ده بقي هو بعينه الثورة المضادة

احنا قولنا الاعلام المصري خلاص هيتحرر ويقولوا علي الملاء الراجل حتما ولابد يتجوز اربعة

واضح ان رجال مصر الاحرار هتعاني وقت طويل من باقي النظام

[م تيمور المراغي]

جررررررررر

وبعدين

انا شامم ريحة ثورة وشنشة اعرفها من اخزم

ززززززانـ.......

ولا بلاش

الطيب احسن ,,

[أبوعمار]

ألو.... ممكن أشارك في البرنامج يا أفندم؟ (وش واحد بيبص بربع وش وهو موارب الباب)

(إوعي يا لماضة تشخطي وتقولي :ما أنت شاركت أهوه ...قول وخلصنا)

بالنسبة لعنوان التوبيك أولا بادئ ذي بدء (أصل أنا بحب الترتيب)

عشان نفنّد بس أقوالكم واحدة واحدة

عنوان التوبيك يا حضرات المستشارين (الراجل ده هيجنني)

وعمركم ما سمعتكم عن راجل بيقول "الست دي هتجنني"

تفتكرو ليه؟! هاه

لأن أساسا الراجل ما بياخدش في ايد الست بتاعته غلوة... وبيكون اتجنن وشد شوية الشعر اللي فاضلين عنده (وده السبب الخفي لانتشار الصلع مؤخرا... أيوة صدقوني)

يعني ال هـ بتاعت هتجنني أصلا مابنلحقش نستخدمها

والدليل على ذلك قالوله ... قصدي التوبيك اللي فاتحينه ده

عموما قبل ما أقفل "لأني بأتكلم من موبيل وانتوا الدقيقة عندكم بجنيه ونص"

أحب أنصح كل ست وكل فتاء... لا تنحرفي

قصدي بوسي ايدك شعر ودقن

وكل يوم قبل ماتنامي جيبي ورقة وقلم واكتبي ليسته بمحاسن موتاكم

قصدي محاسن زوجك المحترم (وماحدش يسألني محاسن مين؟ ماتودونيش في داهية)

بعد ماتكتبي الليستة دي وليكن اسمها الwhite list ... لا تتخيلي الراحة والسعادة اللي هاتحسي بيها... وبعدين تشربي لك شوية مية وتنامي

وخليكوا فاكرين الرجالة شاحّين اليومين دول

وفي النهاية أحب أهديكم مثل سمعته من كم يوم على وزن "ضل راجل ولا ضل حيطة" و "اللي تعرفه أحسن من اللي ماتعرفوش"

المثل ده بقى سمعته من واحدة مخضرمة في الأمثال بتقول له لست جوزها هيجننها زي حالاتكم كده...أنا هأقول المثل وأجري قبل ما اتضرب

"خليك مع قردك ... لا يجيك الأقرد منه"

[لماضة مصرية جدا]

السلام عليكم و رحمة الله و بركاته

اعزائي المستمعين و المستمعات

اهلا و سهلا بيكو في حلقة اللية من برنامجكم...(غيظيني و صوتي عليا)

الراجل ده هيجنني

ليه مبتعرفشي تقول أنا آسف......و خصوصا لما بتبقي عارف انك غلطان....و الغلط راكبك من ساسك لراسك لمداسك....(ايون يعني محوطك من كل اتجاه...و اوعي تنكر المكان كله محاصر...وش اي واحدة بتطلب الامن المركزي)

احتياجي اني اسمع كلمة آسف.....عندي اجمل بكتير من اني اسمع قصيدة شعر...و لا نوكتة....و لا اي كلام عابر

آسف....نقطة و من اول السطر

و ساعتها هنقدر نبتدي الصفحة من الاول

بقولها و انا عارفة ان مافيش امل....و لا عمر....و لا حتي شااااااااااافيق يا راجل

ايه ده ازاي اتربيت انك متقولهاش طب.....الشعب اللي هنربيه نده.....هنعوده ازاي انه يقول آسف....و الناس الكبيرة مبتقولهاش

مش انتقاص لكرامتك....ما هي الكرامة مش بالونة سعادتك نفضل ننفخ فيها...و بعدين اللي بينفخ في حاجة....بتفضل تكبر و بعدين بتفرقع في وشه....قوووووووووووووووم ايه تروح تلسعه في مناخيره

طيب بمناشبة البلالين و كده

حد ينزلنا باغنية العيد فرحة بتاعت المطربة العاطفية سفاء ابو السعود....اغنية مليانة بلالين....يمكن ترضي غرور.....الراجل ده هيجنني

فاصل و نواصل

اوعي تعض في اي حاجة تانية....خليك هنا

مطوتك في جيبك.....دماغك ع كتفك

و هات معاك الايقون بتاعت الست...ايون الست (بس زلبطة)اللي بتضرب راسها في الحيط

[لماضة مصرية جدا]

حبايبي الحلوين....ايه ده

لا دي مش حلقة ابلة فضيلة

ابنائي الطلبة....يا ربي و لا ده كده حدفت علي عبد المعطي ناظر المضرسة

طب الناس اللي منورانا هنا

انا و انت....و اللي بيحبنا ميضربشي نار...(وش اي مطرب شعبي ماسك الماكرفون و حاطه جوه بوقه و بيقول الو الو...1...2...3)

الراجل ده هيجنني.....ليه لما يبقي فيه حوار...المفروض و ربنا درسناه كدهوت في الكوتاب بتاع سيدي الطشطوشي....يعني اخد و عطا....و واحد يسمع و التاني يتكلم

ازاي يا جدع...تتكلم....و تسال السؤال و ترد علي نفسك...و تصدر الفرمان...و انا قاعدة كده زي لمؤاخذة كوز الدرة....(لا و لمؤاخذة ليه....ع الاقل الكوز هيتشوشوح و يطلع منه اي رد فعل)

و لما ابتدي افتح بوقي.....الاقي الجملة اللطيفة الظريفة النضيفة.....ايه ده احنا هنتخانق....يالابقي احكيلنا حاجة حلوة

ده ع اعتبار اني مثلا حمادة سلطان بتاع تان تأأأأأأأأأأأاراران تن تن!!!

و لا اني عزب شو يعني

كده مش كويس ع فكرة........و انا كده لو فتحت بوقي.....هعمل زي التنين....هفح ناااااار...(وش اي عيل قاعد يتفرج ع قناة اسبيس تون)

فاصل برضه و نواصل

[مغتربة]

وكل يوم قبل ماتنامي جيبي ورقة وقلم واكتبي ليسته بمحاسن موتاكم

قصدي محاسن زوجك المحترم (وماحدش يسألني محاسن مين؟ ماتودونيش في داهية)

بعد ماتكتبي الليستة دي وليكن اسمها الwhite list ... لا تتخيلي الراحة والسعادة اللي هاتحسي بيها... وبعدين تشربي لك شوية مية وتنامي

مش عارفه حضرتك كاتبها كهزار و لا كلام بجد

لكن عايزه اقول انها فعلا طريقه فعاله جدا جدا

يا ريت يا ستات و يا رجاله تجربوها بجد هتفرق معاكم

هاتوا اجنده صغيره و اكتبوا فيها كل حاجه بتحبوها فى شريك حياتكم و احتفظوا بيها يعنى مثلا اعملوا فى صفحه لسته بصفاته الكويسه من وجهه نظركم فى صفحه و فى صفه تانيه موقف جميل عمله معاكم و فى صفحه تالته ذكرى حلوه جمعتكم سوا اكتبوا كل حاجه وصف الموقف او الصفه مشاعركم ساعتها كانت عامله ازاى وصف لحاله السعاده الى كنتم فيها او اى احاسيس ايجابيه تانيه حسيتوا بيها زى الامان المشاركه الحمايه و هكذا و حلوا الاجنده دى خاصه بيكم احتفظوا بيها لنفسكوا

ساعت لما يحصل خلاف مع شريك حياتك او تحس انك مخنوق منه او تحس باحاسيس ملل او زعل او غضب

طلعوا الاجنده دى و اقروا انتوا كتبتم فيها ايه ربع ساعه بس

و انا متاكده ان شعوركم بعدها ان مراحش نهائيا اكيد بعدها هيكون اهدا بكتير

جربوها و ادعولى

[باهى الطائر الحزين]

وهما لا قدر {الله}

كانوا عاقلين

لا سمح {الله} اصلا smk:

طيب ده السرايا الصفرا

اللى فى العباسيه مول

مليانه

من ضحايهم :P

تم تعديل 13 مارس 2011 بواسطة طائر الليل الحزين

[لماضة مصرية جدا]

اعزائي المستمعين....(كرهتني خلاص من كتر ما بقول الكلمة دي)

بنرحب بكل اللي بيشاركنا في حلقة اللية....و بنحب نبعت اهداء من بابا و ماما و تيتة و عمو الي الخال في البرازيل...(وش اي مذيعة كانت بتقدم اليوم المتوارب زمان)

حيث اني مبعرفشي اعمل اقتباس متعدد...(وش اي واحدة باصة ع الارض من الكسوف) اسمحولي....هنرد علي اقتراحات السادة المستمعين.....نااااااااافر....ناااااااااافر...(وش الضحية في المسرحية اللي هي كانت حاطة ملوخية فوق عينيها)

استعنا علي الشقا بالله....

يا قوي

(وش اي شيال شنطة في محطة رمسيس....اموت و اعرف بيعدي فوق القضبان ازي....و لا بيهمه)