اريد خبرة الاخوة الافاضل المعتادين على نزول الاجازات

[engmido]

الاخت الفاضلة ام نور

اول حاجة بالنسبة للوزن ادخلى عالنت دلوقتى اعملى سرش على موقع الفرسان التابع للخطوط السعودية واعملى عليه اكونت (ولو انتى نازلة خطوط مصرية فيه حاجة بردوا عليها نفس السيستم بس مش عارف اسمها ايه) الاكونت ده بيديكى على كل تذكرة 10 كجم زيادة ومش عارف بيدى عالاطفال كام يعنى انتى معاكى دلوقتى عالاقل 20 كجم زيادة ولو معاكى اكتر هيعدوها (ده بند الوزن) ولو نازلة على ناس يبقى خلى بالك كويس من شنطك عشان بتضيع ولو حبذا اخدتى الحجات اللى تهمك اوى على الشنطة اللى معاكى فى الطيارة

-------------------------------------------

بالنسبة لبند الهدايا (حاولى قدر المستطاع وبما لا يخل بالبند انك تسحبى منه لبند ميزانية الاجازة)

انتى مش مجبرة انك تجيبى هدايا لكل الناس وعالعموم لو فيه حد يهمك اوى (انا بحب الحاجة دى) اعرفى هو محتاج ايه وجيبهاله وبلاش تيجيبى حجات كتيرة عالفاضى وملهاش لازمة ولو سالتى المقربين ليكى فى التليفون مش عيب (انا بسال اخواتى هما عايزين ايه وبجيبلهم الحاجة اللى محتاجينها)

وزى ما لماضة قالت مصر فيها كل حاجة (عن نفسى كتير من حجاتى الشخصية بشتريها من مصر) ده حتى يبقى فيها وطنية وتعملى رواج فى البلد مصر بجد محتاجة كل قرش يتصرف فيها

بس عالعموم خدى خوطة الهدايا

جيبى ورقة وقلم واكتبى اسماء الناس اللى عايزة تجيبلهم هدايا بالتحديد وكل واحد يناسبه ايه بالظبط

مثلا حسام (برفيوم دانهل) :)

محمد مثلا (ساعة تيسو) وهكذا

طبعا اخوتنا اللى فى الرياض عارفين اماكن معينة بيشترى الحجات دى بجودة وسعر كويسين

------------------

نيجى للعملية انا ملييش فى القصص دى بس بفكر تكون فى الاسبوع رقم 6 وهقولك ليه كمان شوية

------------------

الفسحة بقى واللعب والمراجيح والحجات الحلوة دى

------------------

بصى خلينى اكون واقعى معاكى ميزانيتك مش كويسة خالص عشان شهرين اجازة ولعب وفسحة (عشان كدة بقولك حاولى تاخدى من بند الهدايا)

مبلغ قريب من ده فيه ناس بتصرفه مواصلات بس

بس خلينى معاكى واحدة واحدة

1- اسبوع فى مطروح

طب ليه مطروح

اهل الاسكندرية اعرف انهم بيحبوا مطروح - هادية - رخيصة وقريبة منك يعنى مش هتتكلفى كتير - اظن اهدا دلوقتى بعد مشاكل لبيا (بس اسالى هناك علاامن والامان دلوقتى عامل ايه)

2- تروحى دريم بارك مرتين او تلاتة عالاقل (هى قريبة منك اول طريق مصر اسكندرية الصحراوى جنب 6 اكتوبر) الولاد هيتبسطوا اوى:D (يارتنى كنت معاهم)

3- اسكندرية فيها اماكن كتيرة للفسح والزيارات (انتى ادرى بيها) وكمان الولاد ياخدوا فكرة كويسة عن بلدهم (عيب يبقوا اسكندرانية وميعرفوش كل خرم فيها) بس ده لو قبل شهر مايو لكن لو بعده هتتخنقوا من الزحمة (الاسكندرية صعبة اوى فى الصيف)

4- ميدان التحرير (لازم تروحى هناك وتقراى الفاتحة على روح الشهداء وبوسى ارضها لو قدرتى (انا اسف هتروحى فى كمية بكاء هستيرى غير عادى) بس مهم اوى ان ولادك يشوفوا ارض الثورة وتحكيلهم عن امجاد المصريين وياسلام بقى لو تروحوا تصلوا الجمعة هناك

بجد اوى مهم جدا ان ولادك يروحوا ميدان التحرير وتشرحولهم بالمفيد ايه اللى حصل ومصر رايحة فين واد ايه مصر غالية اوى

5- رشيد قريبة منكوا واظن فيها بلاد فلاحين لو تعرفى تاخدى العيال عند حد قريبك او معارفك وتقضى يوم فى الريف والاراضى الزراعة وتتنفسى الهوا المنعش النقى وتفرشوا عالارض وتاكلوا القشدة والفطير المشلتت (والله هتبقى احلى فسحة)

وده كان بند الفسحة

----------------------

نيجى بقى لشوية اعتبارات هامة

1- متتخنقيش من تصرف او لبس حد مهما كان او طريقة كلامه عشان انتى كنتى محبوسة فى الرياض سنتين وعايشة بشكل معين وهتتصدمى بالواقع فخدى حذرك وخلى الدنيا بيس

من الفاظ هتسمعيها وطريقة تعامل ونظرات من ناس وحجات كتيرة (انابقولك كدة عشان متنزعجيش وخدى الحياة بيس واضحكوا وهذروا وعيشوا حياتكوا)

لو معاكوا دهب او موبيلات غالية خلى بالكوا اوى

الدهب مش تبينيه عشان مازال الامن مش كويس وممكن تتسرقى بسهولة (وانصحك متلبسيش دهب الفترة دى خالص)

ومتحولوش تمشوا فى اماكن انتوا مش عارفينها او مش متامنة كويس

لو كان بند الفسحة يسمح ممكن تزودى الاقامة فى مطروح لحد 10 ايام

-----------------------

تنظيم الاجازة

الاسبوع الاول (هتلاقى جوزك محتاج يعمل شوية معاملات وتخليص ورق فى الحكومة ويخلصهم فى اول اسبوع مع الزيارات العائلية (بس يتاكد انه يخلصهم فى الاسبوع الاول عشان هيتزنق فى الوقت فى الاخر)

الاسبوع التانى (مطروح)

الاسبوع التالت والرابع والخامس (مابين تبادل الزيارات العائلة والخروجات ودريم بارك والفسح والحجات دى بقى ولفوا وهيصوا واتفسحوا وعيشوا حياتكوا)

ايام الجمعة صلاة مابين مسجد القائد ابراهيم فى اسكندرية والتحرير

الاسبوع السادس (العملية زى مقولتلك)

الاسبوع السابع راحة لزوجك فى البيت وربنا يشفيه ويعافيه ويقومه بالسلامة (ويحتسب العملية دى عند ربنا)

الاسبوع التامن محاولة لم الليلة بقى والفنشينج على احلى اجازة وتجهيز الشنط والتخطيط لسنة جديدة حلوة فى السعودية وناويين تحققوا ايه السنة الجاية

اتمنى لكم التوفيق واجازة سعيدة :)

حسام

الله طب مانت كويس اهه يا حسام امال بس عامللى لبط

هههههههههههههههه

مداخلة متميزة