أحمد عز هيدفع مليار و500 مليون جنيه للسماح عنه...إيه رأيكم؟؟

[fatfouta]

رجال الاعمال المتهمين فى قضايا جنائية عاوزين يخلصوا من القضايا بتاعتهم ويطلعوا براءة وبيعرضوا مبالغ كبيرة عشان يتم التحفظ على قضاياهم وعلى رأسهم حمادة عز اللى عاوز يدفع مليار و500 مليون جنيه ويجرى على برا بقى بلا وجع دماغ

وبعض رجال الاعمال المتهمين هما كمان بيعرضوا مبالغ

منير غبور وعرض سداد 85 مليون جنيه في قضية تخصيص أرض له بمدية ميراج سيتي

ومحمد أبو العينين عرض إعادة أرض الساحل الشمالي ومرسى مطروح التي تم تخصيها له من قبل وزارة السياحة

ومحمد عهدي فضلي رئيس مجلس إدارة أخبار اليوم السابق والذي عرض سداد 400 مليون جنيه في قضية

أيه رأيكم يا جماعة هل ممكن نسامح فى حقوقنا اللى اتنهبت بشوية فلوس؟؟؟

الخبر من جريدة الدستور

[mhamed]

لا لا لا

نترك القانون يأخذ مجراه والفايدة ان شاء الله 75 % من ثروة كل منهما

النهارده يدفع ويطلع بكره يعمله حزب بعده يترشح للرئاسه بفلوسه بقه

[التونسى]

حيدفع حيدفع ان شاء الله .. وكمان حيتعاقب بالسجن .. لازم يتعاقب بالسجن .. على الاقل عشان حياته حتبقى مهدده بالخطر فعلا لو خرج كده من غير عقاب مادى جسدى .. لان الشعب حيكون فى انتظاره للقصاص منه .. بل ان أسياده ذات نفسهم ((مبارك واتباعه واشياعه والموالين له)) ممكن يكون لهم رغبة عارمه ايضا فى الانتقام منه .. لانه هو بالبلدى كده ((هو اللى فتح عليهم الفتوحه دى)) بتزويره المقزز للانتخابات

الا اذا بقى دفع الفلوس وبعدين تم تأمينه ان يغادر مصر ويعيش فى أى ((منفى)) حتى يهلك.. وانا بعتقد ان نفيه بره مصر حيكون عقاب له أشد من عقاب حبسه فى مصر .. ويا سلام لو يتبع ده تجريده من الجنسيه المصريه كشرط لاطلاق صراحه .. ونشوفه ساعتها حيوافق والا لا

[se_ Elsyed]

ومن حدد هذا المبلغ ؟ .

يعني بالكيلو ولا بطن الحديد ولا بإيه بالظبط ؟

لأ طبعاً .. طالما الموضوع وصل للقضاء .. يبقى خلي القانون ياخد مجراه على قفاه .

كان من الأول يا حبيبي قبل ما تقع زي العجل

[crossfield]

عرض مش مغرى خالص يا عزعوزى

و بعدين التهم كتيرة و التقيل ورا زى ما بيقولوا و بدل المليار ناخد 20

[لونا]

لأ طبعًا هو كدة سارق و السارق له عقوبة في الإسلام .. و بما إن القانون استبدلها بالسجن (سواء كنا مع أو ضد ده )

فلا يمكن إحنا نيجي و نقول عايزين فلوسنا و عفا الله عما سلف

و الله نفسي ننفذ في الناس اللي سارقة بالمليارات دي الحد الشرعي للسرقة

تتقطع إيدهم .. عشان يبقوا عبرة للمسئولين و رجال الأعمال

و على فكرة الناس دي كدة ..إعترفت ضمنيًا إنها مذنبة

كمان في نقطة تانية الموضوع مش موضوع فلوس بس

ده فيه إفساد و تزوير و بلاوي كتيرة تانية

[سكر]

القانون يجب ان يطبق على الجميع

اذا كان طلعت مصطفى فى عز الفساد النظام لم يشفع له

احنا هنيجى نشفع لهم فى ذلك

بس بردة يعنى فى فكرة اخبس من كدة

احنا ناخد منهم كل فلوسهم ونجردهم من الجنسيه وننفيهم فى مدغشقر ;)

[fatfouta]

طب هو سؤال بس مش المفروض ان الناس دى النيابة اتحفظت على اموالهم ؟؟؟

هما هيجيبوا الفلوس دى منين؟؟ هيستلفوا يعنى :closedeyes:

وبعدين انتوا مركزين مع عز ليه يا جماعة طب ما ابو العينين كمان هيدفه وغبور وهيدفع وبتاع اخبار اليوم ده كمان هيدفع

انا رأيى انها مش فلوس ابوهم عشان يمنوا علينا بيها....ده بعدهم عشان دى فلوس الشعب المنهوبة اصلا

[se_ Elsyed]

القانون يجب ان يطبق على الجميع

اذا كان طلعت مصطفى فى عز الفساد النظام لم يشفع له

احنا هنيجى نشفع لهم فى ذلك

بس بردة يعنى فى فكرة اخبس من كدة

احنا ناخد منهم كل فلوسهم ونجردهم من الجنسيه وننفيهم فى مدغشقر ;)

طب عشان خاطري لو ليه خاطر عندك يا موعو ... إحنا نفوت له مليار ونص .. ويخلع براني .. وحلال علينا الحديد والسيراميك والبلاوي المتلتله اللي عنده ..

[جسار]

الصبر قليلا على لصوص الشعب وهم فى ليمان مزرعة طرة ، وبالرغم من أن هؤلاء لايتناولون طعام السجن

ويتم احضار الطعام الفاخر لهم يوميا فى الثلاث وجبات من أموالنا المنهوبة الا ان هذا يتم بمزاج

صاحب المخل أى مأمور السجن اللى لو كشر عن أنيابه ومنع الأكل الملكى سيضطروا حينها لتناول أكل

السجن وما ادراكم به ويمكن يموتوا فيها وكفاية الدود اللى فى العدس !

ولكن السجن ليس كله أكل وبس ، كفاية انهم يصطبحوا الصبح بوجوه المجرمين والسوابق ويسمعوا

شتيمتهم بودانهم عبر الزنازين المغلقة والتهديدات التى يتوعدهم بها هؤلاء ، فين ده من الجريب

فروت بتاع والفرنش كرواسون يعقبه المساج بالايدين الطرية الحلوة وفنجان الكابتشينو جنب اللاب توب

و أسعار أسهم شركات البورصة ، وعند الاستحمام مافيش الجاكوزى هى حنفية فى السقف وكوز فى دورة

المياه . ولا حكاية ان السجن مافيهوش تكييف وياسلام لو طال حبسهم لحد الصيف أضمن لكم أن 90 % من

الاموال المنهوبة ستعود باذن الله .

[أسد]

بالقانون ...

يتحدد المبلغ المفترض كتعويض .. أو كرد للحق

وأيضاً إذا كان يستحق السجن (وأعتقد أنهم يستحقون) فيتم تطبيق العقوبة

ولكن .. دون مساومات .. او مفاوضات ..

ولكن بالقانون

أرفض التعامل مع أي أمر بغير القانون ...

فقد مضى زمن المواءمات .. والمصالحات .. والطبطبة

[أيمن عبد العزيز]

عن نفسي لا أقبل المساومات في حق الوطن و حق المصريين ، و سأقبل بالقصاص العادل من كل رموز الفساد حتى لو وصلت للبراءة بحكم محكمة فسأقبل به

لكن مساومات لا

[engmido]

لا طبعا العدل ياخد مجراه

وحقوقنا نسلكها منهم بالقانون ( انا معرفش الاجراءات اللى نطلع بيها فلوسنا منهم)

لان دول المفروض انهم يبقوا عبرة لمن يعتبر بعد كده

ثم هما هيبقششوا علينا من فلوسنا ..صحيح اللى اختشوا ماتوا

[عطر الجنة]

الموضوع يا جماعة لازم يتنظر ليه نظرة تانية خالص

لان الحكاية مش بالعواطف ده قانون

لو على العواطف كنت حرقتهم كلهم فى ميدان عام

لكن المهم احنا لو حنحاكمهم على جريمة اهدار مال عام فممكن واحد يعرض السداد و غرامة و يخلع منها

لكن لو حيتحاكم بفساد سياسى يبقى حيلبسها

و مش حيجى محامى جهبذ يخرجه منهاو يبقى وقتها المليار و نص احسن

كمان لو ارض ابو العينين رجعت فحتتباع بتمن اعلى و تدخل لخزينة البلد كتير

لكن الناس دى لازم لها عقاب مثل منعهم من ممارسة الحياة السياسية و المساومة على مضاعفة المبالغ

تحياتى

[Alshiekh]

أولا هم لايحاكمون على جريمة واحدة ، بل عدة جرائم

فساد سياسى

استيلاء على مال عام ( اراضى وشركات اشتروها ببلاش )

تهرب ضريبى ( واعفاءات ضريبية لم يكونوا يستحقونها )

استخدام نفوذ ووساطة

رشوة فى الاتجاهين ( قبلوها او دفعوها وفى الحالتين هى افساد )

لذا يجب ان تتم محاسبة كل منهم على كل الجرائم التى اقترفوها

[عصام أبوالفتح]

^{مصادرة ممتلكاتهم بمصر بحكم قضائى امر مفروغ منه}

^{الحسابات الخارجية هى اللى لازم نتحرك دوليا لمصادرتها}

^{لانها الاكبر وهى اللى تضخمت .. فى مصر بيسيبوا الفكة وسيولة ورا الستائر}

^{---------------------------------------------------------------------------------------------------------}

^{مادة 29}

^{تخضع الملكية لرقابة الشعب وتحميها الدولة، وهي ثلاثة أنواع : الملكية العامة، والملكية التعاونية والملكية الخاصة.}

^{مادة 30}

^{الملكية العامة هي ملكية الشعب‏،‏ وتتمثل في ملكية الدولة والأشخاص الاعتبارية العامة‏.‏}

^{مادة 31}

^{الملكية التعاونية هي ملكية الجمعيات التعاونية، ويكفل القانون رعايتها ويضمن لها الإدارة الذاتية.}

^{مادة 32}

^{الملكية الخاصة تتمثل في رأس المال غير المستغل، وينظم القانون أداء وظيفتها الاجتماعية في خدمة الاقتصاد القومي وفي اطار خطة التنمية، دون انحراف أو استغلال، ولايجوز أن تتعارض في طرف اسخدامها مع الخير العام للشعب.}

^{مادة 33}

^{للملكية العامة حرمة‏،‏ وحمايتها ودعمها واجب على كل مواطن وفقا للقانون‏. ‏}

^{مادة 34}

^{الملكية الخاصة مصونة، ولا يجوز فرض الحراسة عليها إلا في الأحوال المبينة في القانون وبحكم قضائي، ولا تنزع الملكية إلا للمنفعة العامة ومقابل تعويض وفقا للقانون وحق الإرث فيها مكفول.}

^{مادة 35}

^{لا يجوز التأميم إلا لاعتبارات الصالح العام وبقانون، ومقابل تعويض.}

^{مادة 36}

^{المصادرة العامة للأموال محظورة، ولا تجوز المصادرة الخاصة إلا بحكم قضائي.}

^{---------------------------------------------------------------------------------------------}

^الصبر

[fatfouta]

عالجزيرة مباشر بيناقشوا الموضوع ده

وبيقولوا على احمد عز انه المفروض بعد كلامه ده يتحاكم على قضية جديدة وهى عرض الرشوة علنا كده

وبيقولوا كمان ان ده استمرار لسياسة انه عاوز يشترى كل حاجه بفلوسه

وفيه محامى بيقول هو منين هيجيب الفلوس وهى فلوس الشعب اصلا وتم تجميدها ياريت يقولنا هيجيبهم منين!!

[رضوي]

ماهو احنا لو اخدنا حتى كل فلوسهم وخرجناهم من غير عقوبة رادعة ......... هييجي اي حد بعدهم يسرق وينهب ويفسد وماعندوش مشاكل

ماهو لو وقع هيدفع ويطلع وكأن شيئاً لم يكن

العقوبة لازم تكون رادعة علشان اي فاسد يفكر في يوم من الايام ينشر فساده ........... يفكر مليون مرة في العقوبة الرادعة اللي حصلت لعز والمغربي وغبور وابو العنين ............ الخ

ويعرفوا ان الفلوس والجاه والسلطة والنفوذ .......... لاتشفع لهم امام حكم العدل

[ذهبية]

دة بقى ترخيص و لا جواز عبور و لا طوق نجاة و لا مثال يحتذى بية

يعنى اللى يسرق يدفع شوية من اللى سرقة و يخرج منها و لا اكنة عمل حاجة

بيتهايلى احنا بنبدا صفحة جديدة لا فسادو لا رشوة و لا سرقة

لو البداية كدة

يبقى لا ثورة و لا غيرة

احمد عز هو هو نفس لغة الحوار و الاسلوب

اشتريك بكام

اشتريك بكام علشان تدينى صوتك

تاخد كام و توصلنى

تدفع كام علشان توصل

دلوقتى تاخدوا كام و تحلوا من على قفيا

هو هو لا يعرف الا لغة المال والرشوة والفساد

[hOuSsAm]

أموت واشوف احمد عز (وزملاته) وهما بينضفوا الحمامات

انا مش فاهم هى الناس دى سحبوا منهم الدم قبل كدة واستبدلوه بسبرتو

لسه بردوا عايزين يشتروا الشعب بفلوسهم

لسه بردوا نظرة الاستعلاء

كل حاجة عندهم بالفلوس

لالالالالالالالالالالالالالالالالالالالالالالا

هتتسجن

وهناخد فلوسك كلها

ومصانعك

وفللك

وكله بالقانون اللى هتحترمه غصب عنك

وهيتطبق فوق رقابتك

ناس مقرفة صحيح