«الإخوان» تتهم رافضي تعديل الدستور بـ«تلقي تمويل أمريكي»

[jonathan]

صباح الخير جميعا و كلها ساعات النهاردة و يعلن عن نتيجة الاستفتاء و اللي مبدئيا المؤشرات تشير بان النتيجة هى نعم...طبعا كلنا حنحترم النتيجة حتي لو جات عكس ما يتمني كل واحد فينا ..لكن اسمحولي اعرض تحليلي الشخصى ان الثورة قامت على اكتاف شباب متعلمين و مثقفين للغاية و عندهم حس و ووعي سياسي عالي و باستخدام وسائل التواصل الحديثة و اللي نسبة 65% من الشعب المصري لا يعرف ماهيتها..فمن الطبيعي ان بعد نجاح الثورة ان تختلف مطالب الشباب الواعي عن مطالب الاغلبية من الشعب لان الشباب حقق نصر عن اجتهاداما الاغلبية فحصدت من دون تعب و لكن لا خلاف ان الكل سيتشارك النصر..الشباب بينظر للامام و يسعى للتغيير الكامل الشامل بما يتناسب مع تطلعات المستقبل من خلال دستور جديد و نظام سياسي جديد قائم على تعدد حزبي فعال..طبعا التكلفة هنا اعلى شوية من ناحية الاستقرار لان دي عملية محتاجة وقت و اعداد..اما الاغلبية من الشعب معلش سامحوني ماشية بنظام الجعان يحلم بسوق العيش..ليه بقول كدة..لانه شايف ان الرئيس مبارك هو السبب مش الدستور..لانه شايف الامن و الاستقرار في وجود رئيس جمهوريه مش في وجود مؤسسات وطنية مالهاش دعوة بشخص الرئيس..يعني لما تسال واحد عادي هو ليه مبارك كان الرئيس الاعلى للقوات المسلحة حيقولك اصله كان من الجيش و لما يكون فاهم شوية حيقولك اصله كان قائد الضربة الجوية..لكن كام واحد حيقولك ان الدستور هو اللي بيديه المنصب دة؟؟ الدليل ان اغلب الناس متعرفش ان الرئيس هو رئيس المجلس الاعلى للشرطة..و بالتالي الفراغ الامني اللي حصل غير الاسباب اللي كلنا عارفينها حصل كمان نتيجة خلو منصب رئيس المجلس الاعلى للشرطة اللي هو رئيس الجمهورية اللي الدستور بيديله الحق دة و حقوق تانية كتير..دي نقطة في بحر..ليه الكلام دة كله و ايه علاقته بالموضوع..دي بس مقدمة عشان نفهم اللي رافض تعديل الدستور رافضه ليه..لانه رافض الدستور من الاساس..بس عشان نوصل للحقيقة دي لازم نكون مثقفين وواعين جدا..لكن هل الشعب المصري على هذة الدرجة من الثقافة بما يسمح باتخاذ القرار الاصح و في ظل الفترة القصيرة دي..للاسف لا..مين بقي اللي بيلعب على النقطة دي..طرفين..الحزب الوطني بما يمثله من ثورة مضادة و الاخوان المسلمين و من ظهروا من خلفهم في الفترة دي..و عايز اقول حاجة يا ريت محدش يخلط بين منظور الاسلام في عيون الاخرين و الاخوان..ليه لان الاسلام دين و دة شان شخصي و من حق كل انسان ان يعبد الله حسب مفهومه ...ربنا اللي بيحاسب فى النهاية..لكن العيب انك تستغل الدين في مصالح شخصية..بالبرهان ..جماعة الاخوان لم يكن لها اي دور في الثورة بالعكس في الايام الاولي للثورة اعلنوا انهم غير مشاركين فيهالكن لما الثورة ابتدت تؤتي ثمارها ابتدتم بالتصريحات بتاعت احنا كنا وسط الناس و عشان كدة مرفعوش اي شعار ليهم حتى بعد نجاح الثورة في ميدان التحرير خوفا من الشباب اللي كان بيحافظ على النصر اللي بيحققه..طيب بس دي بالنسبة ليهم فرصة للوصول ..طب يعملوا ايه ..يحاولوا بقي يستميلوا الناس اللي مش فاهمة ..البرهان بردو..كل الدعاوي للاستفتاء بنعم كانت داخل جدران المساجد في خطبة الجمعة..يعني مش في ندوة مفتوحة مثلا..دة دليل على الخلط بالدين و الوتر الحساس و هو المادة التانية..ازاي؟ يقولك اصل لو الدستور اتغير حيشيلوا المادة التانية..طبعا اول ما الناس تسمع كدة يبقي لا عايزين الدستور دة..طب يا عم انت فاهم ان الدستور دة هو سبب الفساد اللي انت عمال تكتشفه و تندد بيه..طيب ان المادة التانية حتة فى ظل وجودها لم يعمل بيها كاملة لانك فائم على الاحكام المدنية.يعني ابسط حاجة انت مبتطبقش اغلب الحدود و في نفس الوقت عندك لائحة الاحوال الشخصية لمتحدي الطوائف و الملل..و عشان كدة وجود المادة التانية بالنسبة لى كمصري مسيحي مش هو محور القضية..لان دي مصر في الاخر مش ايران..ثانيا تعالى نشوف المنشورات و الاعلانات اللي حطوها في كل حتة..الدعوة السلفية ..الاخوان المسلمون ..نعم للتعديلات ..حتقولي طيب ما باقي القوي كانت بتوزع بردو..معاك حق طبعا بس في فرق..منشورات الاخوان اخرها كانت تقولك نعم للاستقرار..لكن باقي القوي ..المنشور مشروح فيه كافة التعديلات و ايه العيوب و السيناريو في حالة نعم او لا..طبعا لما حيبقي واحد مش فاهم حاجة حيميل لراي بتوع الدين علطول و يخلط الدين بالسياسة و مش فاهم ان اللي قدامه بيدور على المصلحة الشخصية..اسلوب الاخوان مش جديد ..دة نفس سيناريو مجلس الشعب 2005 شراء اصوات الناس في الاقاليم و اللعب على وتر الدين..لكن دة بيقابله غياب في الاماكن اللي الناس فيها عندها وعي سياسي كامل و مرتاحة ماديا..عشان كدة مخطئ اللي يفتكر ان التنافس امبارح كانت لا للدستور مسيحية و نعم للدستور اسلامية..و انما لا كانت من كل القوي الوطنية اللي بتططلع لدستور حديث يضع مصر بين الدول المتقدمة و نعم اللي عايزة تستفيد من صلاحيات الدستور الحالية..لو تم التصويت بنعم توقعوا مجلس شعب اغلبه اخوان و بالتالي قد تاتي انتخابات الرئاسة بشخصية اخوانية..و المفترض ان في خلال عام يتم عمل دستور جديد و بالتالي انتخابات مجلس شعب جديد و انتخابات رئاسية جديدة..هل من المفترض في ظل تعديل المادة 189 و الغير ملزمة للرئيس القادم ان يتنازل الاخوان عن ما ظلوا يحلموا به منذ ايام الرئيس عبد الناصر..تحياتي

مراكز حقوقية: نسبة المشاركة تتجاوز 80% والتصويت بنعم أكثر من 65% بفضل الريف

تم تعديل 20 مارس 2011 بواسطة jonathan

[ام سلمي]

اولا الحمد لله علي النعمة اللي احنا فيها اخيرا بقي للمصريين قرار في مصيرهم و انا سعيدة باختيار المصريين ايا كان ، وانا صحيح من المغتربين وما عرفتش اشارك بصوتي لكن انا اعرف اصدقاء في مصر وبالاخص في القاهرة من اللي كانوا بيروحوا المظاهرات واللي عمرهم ما اتأثروا بخطابات مبارك ووقفوا مع الثورة للنهاية منهم اللي قال لأ في الاستفتاء ومنهم اللي قال نعم

ده بالنسبة لي معناه ان الاختيارين المرة دي كانوا صح ، لو كان كلهم اجمعوا علي حاجة كنا قلنا اكيد في اختيار منهم سيئ لكن كوننا اختلفنا ده معناه اننا اتنقلنا بفضل الله من بديل سئ وبديل جيد لبديلين كلاهما جيد حتي لو كان في نظر البعض ان احدهم افضل من الاخر يظل البديلين جيدين

وبرغم حزني اني ما شاركتش امبارح بس بالنسبة لي كنت حابقي في حيرة لو كنت في مصر لأن كل رأي ليه مميزات وكان حيبقي اختيار صعب

نحمد ربنا ونفكر في الخطوة الجاية اللي حتبقي افضل بأذن الله

[مسافر]

..اما الاغلبية من الشعب معلش سامحوني ماشية بنظام الجعان يحلم بسوق العيش..ليه بقول كدة..لانه شايف ان الرئيس مبارك هو السبب مش الدستور..لانه شايف الامن و الاستقرار في وجود رئيس جمهوريه مش في وجود مؤسسات وطنية مالهاش دعوة بشخص الرئيس

معذرة اغلبية الشعب واعية وعارفة مصلحتها

واو اختارت نعم انها عايزه الاستقرار

ونعم تعني

برلمان منتخب

رئيس منتخب

دستور جديد

واظن ان البرمان المنتخب اولا

ملهاش دعوة بشخص الرئيس

[jonathan]

اخي الفاضل مسافر..اولا انا واحد من الشعب دة بردو و للاسف احنا في سنة 2011 و لسة بنعاني من مشكلة الجهل و الامية(متفتكرش دي حاجة تسعدني) و انا على دراية كافية بالنقطة دي بحكم طبيعة عملى..و طبعا انا حاحترم رائ الاغلبية كما اشرت امس لكن اسمحلى من يظن ان لا استقرار مع لا فهو مخطئ..لان مع نعم المفترض ان يخوض الشعب 8 او 7 عمليات انتخابية على الاقل في سنة واحدة تقريبا بما يعني تغير حكومتين و مجلسين شعب و مجلسين شوري و اتنين من الرؤساء..فين الاستقرار هنا بالظبط..خد بالك في فترة انتقالية بردو زي اللي كانت حتحصل بالظبط في حال تسليم السلطة من المجلس الاعلى للرئيس المنتخب بالدستور الجديد..دة بخلاف انك حتخوض الانتخابات مرة واحدة بعد الدستور الجديد..اما البرلمان اللي حينتخب في ظل الدستور(المعدل) فهو 50% عمال و فلاحين و كوتة مراة بنفس التشريعات القديمة و بالتالي رئيس منتخب باصوات 250 من المجلس و الدستور الجديدحيخرج من رحم لجنة مكونة من 100 عضو تقريبامن نفس المجلس بتاع ال50% و ال50% الباقيين طبعا احنا عارفين حيبقوا شكلهم ايه في ظل الاحزاب الغير مجهزة حاليااو الغير معلن عنها بصورة رسمية..تفتكر هى دي اهداف الثورة؟؟؟ اسال نفسك ليه يرفض اغلب المثقفين الدستور المعدل ...انا مش حاذكر اسماء قد نتفق او نختلف عليها لكنها دعوة للفكر..على فكرة الفارق بين نتيجة نعم و لا لا يتعدي 10% لحد دلوقتي..تغتكر النتيجة حتكون ايه في غياب الامية و الجهل و الفقر بردو.تحياتي

تم تعديل 20 مارس 2011 بواسطة jonathan

[عادل أبو عمر]

إذا كان كل طرف ( نعم و لا) يحاول و يجتهد أن ينتصر لرأيه فلا مانع فهذه هي الديموقراطية بشرط احترام آداب الاختلاف

لكن بداية الفساد أن تبدأ في قفل باب فولاذي على رأيك و بدلا من شرح وجهة نظرك تبدأ بالهجوم على آراء الطرف الآخر و محاولة الاستخفاف بها أو وضعها في قوالب لاستنتاج نتيجة سلبية و بالتالي تقلل من اهمية الرأي الآخر بما يجعلك تكتسب مؤيدين لرأيك ليس لسبب غير أنهم غير مقتنعين بالطرف الآخر و ليس اقتناعا بك أنت أو بما تمثله .

كلنا عارفين مين اللي قام بثورة 25 يناير و الموضوع لا يحتاج تفسيرات

السؤال أيهما أكثر صعوبة على من قاموا بالثورة : عمل دستور جديد أو بتعديله ... أم القيام بالثورة نفسها

فهل من صنعوا هذه الثورة و انتصروا بفضل الله مغيبوا العقول الآن أو أنهم قد دخلوا الكهف ؟؟؟

مطلوب أن نثق أكثر في بعضنا و في وطنية كل مصري

[مسافر]

..تغتكر النتيجة حتكون ايه في غياب الامية و الجهل و الفقر بردو.تحياتي

لكل من قال لا

دقت ساعة العمل

النزول للشارع ومعالجةالامية والفقر

تعريف الناس بحقوقهم

وضع برامج مفيدة للاغلبيةالموصوفة بالجعان يحلم بسوق العيش

وعند ادراك تلك الاغلبية انها تعلق كل كذاب ومنافق

أتى ببرنامج خدعها به ولم ينفذة

سيكون كل من قال لا أدى خدمة عظيمة في بناء صرح الديموقراطية

وفوت الفرصة على الاخرين بالسيطرة على الاغلبية الذكية التي تعرف مصلحتها