إيه اللي عاجبك في مصر

[disappointed]

الله يسامحك يا محبط... كلماتك ابكتني حتي ظن صديق اقامتي و عملي ان احد والدي توفي... اللة يسامحك...

مصــــــــــــــــــــــــــــــــــرعشقي الاول والاخير

نعمل ايه بس؟؟؟

كلّنا فى الهم شرق يا عزيزى

[kokowawa1979]

يعجبني في مصر ناسها في المقام الأول

ويعجبني جدا شهر رمضان في مصر ودي يحس بيها الإخوة المغتربين

فارق شاسع بين رمضان في مصر وأي بلد آخر ياسادة

كذلك الأعياد والمناسبات وحب شعب مصر لضيوفه التي لاتجدها في أي بلد آخر

مصر ياجماعة صعب تتكرر

نحن ننقد سلبياتها هنا نعم لأننا نريد أن تكون مصر هي أفضل بلد في العالم وفي رأيي بالرغم من سلبياتها فناسها ( الشعب الأصيل) يجعلها في نظري أحسن بلد في العالم .

[فنكوش]

انا بحب اتوه في الشوارع عن عمد :wink: :baaa: لسبب بسيط عشان محدشهايقولى فين الاقامه وجواز السفر في اي حته وممكن خمسين الف واحد يقف جنبي لو احتجت حد :inlove: :inlove:

[se_ Elsyed]

عرفتك يا فنكوش طالما بتقول إقامة يبقى أنت فى السعودية .... صح :oops:

[فنكوش]

عرفتك يا فنكوش طالما بتقول إقامة يبقى أنت فى السعودية .... صح :)

:oops: :oops: صح كنت وبعد 11 سنه لسه باتوه يا تري سمعت عن القصيم :sly: :yinyang: :w:

[se_ Elsyed]

طبعاً يا مان روحت القصيم كذا مره خاصة لما بأكون سافر المدينة المنورة ، مدينة ظريفة بس الجو مخنوق عندكم .. وانت عارف ليه :D

[ragab2]

أحب

مصر الولادة

مصر أحمد زويل ونجيب محفوظ وبطرس غالى وعمر الشريف ومحمد عبد الوهاب ومجدى يعقوب وذهنى فراج ومحمد البرادعى وكل من يرفع اسم مصر عاليا وعالميا

ومشاهدتهم على شاشات الاعلام العالمية يسرنى ويجعلنى فخورا بمصر والمصريين كل هؤلاء وغيرهم من المصريين العالميين يجعلونى فى غاية السعادة والاغتباط بمصر وبالمصريين

أما

ما يزعجنى هو الفساد خصوصا فى الكبار التى تصل مخصصاتهم ومرتباتهم الشهرية عشرات ومئات الآلاف ومع ذلك يختلسوا

مايزعجنى أيضا

الابقاء على الترام فى وسط القاهرة دون أى مبرر مع استهلاك للطاقة وقطع الغيار المستوردة له

ما يزعجنى هو

ممارسة الديموقراطية بطريقة روتينية وملأ الفراغ على نظام بتارين المعارض والاهتمام بالصور والمناظر ودولة المؤسسات التى تخضع لحكم الفرد فى نهاية المطاف وان اختلفت الأسماء والعناوين

[hope]

ياه ,كلامكم يا اعضاء المنتدى قلب علينا المواجع والذكريات والحنين لبلدنا الحلوة ز

واحشنى صحاب المدرسة وصحاب الجامعة وحفلات اعياد ميلادنا والدش بارتى وتجمعاتنا فى البيت وخروجاتنا من سينما ,مطعم ,شوبنج.... تخيلوا واحشانى الدروس الخصوصية

واكتر حاجتين تحديدا عاجبنى

1-الاقصر واسوان فعلا روعة و سحر وحضارة وعراقة وناس طيبين وهدوء جميل .وياسلام لو رحلة فى نايل كروز اسبوع فى الشتاء , تصحى وتنام على منظر النيل حواليك وعلى الضفتين جبال ونخيل ,بانصح كل اعضاء المنتدى بالرحلة دى ماحدش يفوتها

2-كوبر 6اكتوبر قلل زحام المرور ووفر الوقت والمسافة

[ali]

الله يلن الغربه

نفسي ابوس ايديك ورجلك يامه

دعوتي في الفجر يامه تسلمي من كل ضمه

نفسي اصلي الفجر جماعة

يا رب ماموت هنا ادعولي

نفسي ارجع بلدي نفسي اعمل حاجة للناس في بلدي

[Masrawy Abroad]

فاكهة مصر رغم انها مضروبة توكسافين للصبح ولكنها اطعم والذ فاكهة في العالم ...الفاكهة في امريكا وكندا والسعودية والامارات ليس لهم طعم...مناظر بس ولكن فشنك بدون اي طعم .....أي والله....

القعدة على قهوة ومتابعة ماتش بالليل على القهوة والهواء العليل شغال

التمشية في الشارع عادي....بدون استعدادات البرد والكلفتة كانك مومياء فرعونية عشان البرد والا ستفقد أصابعك أو تخلع اذنك بايدك بدون ما تاخذ بالك....جو مصر احسن جو شفته وخاصة الشتاء رائع....فقط عندنا مشكلة التراب اللي بيدخل البيوت ما تعرفش منين ويوسخ ياقات الهدوم في ثواني وده سببه جبل المقطم...

[elbana]

كل اللي قلتوه عاجبني ...

وأضيف عليه ركوب قطر الدرجة الثالثة في الدلتا بالليل وروايح الأفران الوالعة ، ومنظر البيوت اللي طالل من شبابيكها شعاع نور خافت ، وواحد قاعد في كرسي قدامك بينام ، وأنفاس غيطان الرز والقطن بتهفهف .

ولا لما تاخد فلوكة في أسوان بيجدف بيها راجل نوبي عجوز لافف العمة ومشمر دراعاته وعارف إنك تلميذ ومزوغ من المدرسة علشان تتفسح لك شوية في النيل .

ولا لما تمشي ف جنازة معدية من شارع ضيق وتلاقي اللي قاعدين قدام البيوت راحوا قايمين جري وجم يساعدوا في شيل الخشبة وهم بالبيجامات .

ولا لما تقعد تاكل في مطعم فول غلبان وكحيتي الساعة ستة الصبح ويبدأ طبق السلطة يخلص قدامك وتلاقي الراجل جه من نفسه وراح مالي لك الطبق تاني من غير مايزود ولا مليم وكأنه أبوك وعايزك تاكل لما تشبع .

ولا منظر التلامذة بالمرايل الصبحية في الشتا وهم بيمدوا عشان يلحقوا قبل الجرس ما يضرب ، وصوت غناهم السلام الجمهوري (والله زمان يا سلاحي) أو (بلادي بلادي) ، وتمارين الصباح ، ومدرسة صفا ، مدرسة انتباه ، وصوت الأكورديون اللي بتعزف عليه صوابع تلميذ صغير قدام ميكروفون المدرسة ، وفرقة الخطابة وهم عمالين يتحضروا علشان يفتتحوا الإذاعة المدرسية .

ولا أشرعة المراكب البيضا وهي قاطعة زرقة النيل في أسوان وعمالة ترفرف بفرحة ومن وراها الجبل برملته الصفرا وعند سفحه خط من الأشجار الخضرا يفصل بين صفرة الجبل وزرقة الميه .

ولا العربيات لما تكون بتزف عروسة وتلاقي عربيات مالهاش دعوة بالموضوع داخلة تزمر وتساعد في الزفة .

وبالمناسبة أنا كنت سايق العربية مرة على الدائري ولقيت قدامي عربية نص نقل شايلة شوار عروسة (يعني جهاز عروسة بالفلاحي) واللحافات الساتان الحمرا المزهزهة والمخدات البيضا الجميلة وكده يعني ، وكنا وقت العصر ، ولقيت جنب العربية النص نقل عربيتين ثلاثة ميكروباص وفيهم ناس استنتجت بذكائي الحاد :) :) إنهم أصحاب الشوار (يعني جهاز العروسة بالفلاحي) :D :D المهم ما اطولش عليكم .. قولوا طوِّل ، كانوا ماشيين ساكتين خالص ، رحت دايس بنزين وداخل وسطهم وكانت معايا الحاجة والدتي ، وجيت مزمر زمارة الزفة (بيب بيب بيب .. بيب بيب) ، بصيت لقيت اللي في العربيات كلهم بصوا ناحيتي ، وهاتك يا زغاريد ، وزمامير ، وراحوا مطلعين طبلة كانت معاهم ، وهاتك يا غنا وسقف ، وقعدوا يطبلوا على صاج العربيات ، وأخوكو كان ح يموت م السعادة ، وفضلنا كده ييجي خمس دقايق في زفة متواصلة وكأني واحد من العيلة صاحبة الشوار (يعني جهاز العروسة بالفلاحي) .

الله يسامحكوا مين اللي قلب علينا المواجع ، ما احنا قاعدين في الغربة وراضيين باللي احنا فيه ..... :lol: :) :) ياللا .

[Farida]

مش ممكن كلام البنا جميل بشكل انا عايشه فى مصر و عارفه كل اللى بتقوله يا اللى متغربين و لو انى ساعات باحس بغربه فى بلدى بس فعلا احسن حاجه فى مصر ناسها الأصيله الطيبه مش الفالصو تعرفوا ان المصرى جواه حكمه و حضاره متراكمه تحت جلده و بتبان فى الأزمات ... أحلى حاجه لمتى انا و اخواتى فى الأعياد و ماما تقعد تعمل فى الأكل قبلها بيومين و لو يوم مش فاضيه تبعت لى الأكل مع اختى الصغيره .... و اليوم اللى تعمل فيه كشرى او محشى تبعت للعماره كلها ...و لا فى شم النسيم و الناس كلها طالعه من بيوتها و خارجه فى الشوارع و الكل بياكل نفس الأكل بيض و فسيخ (و لو انى مش باحبه) ,,, احلى حاجه رمضان و ليالى رمضان و التراويح و اللمه فى جامع عمرو بن العاص ليله القدر و لا الحسين و السهره صباحى على انغام واحد عواد مش مشهور ..و لا رحلات الكليه و و الواحد حاسس ان الدنيا كلها قدامه ... ولا الميكروباصات و جو الألفه لو صادف و ركبت ميكروباص تحس ان الناس كلها طالعه من حته واحده و نازله نفس الحته و لو اتفتح موضوع تلاقينا كلنا بنتكلم زى ما نكون نعرف بعض من زمان ... مرة نسيت الفلوس فى البيت لقيت اللى جانبى من هنا و هنا بيدفعوا لى من غير ما أعرفهم .....

[Katamando]

بصراحه العنوان خلاني أفتكر انه هجومي أونقدي فأحجمت عن المشاركة فيه لكن الحمد لله خاب ظني ولقيت الموضوع حب في مصر الل

يبقى لازم نغير اسم الموضوع ونسميه

هذه هى مصر التي أحبها

مش كده ولا ايه؟؟ :lol: :lol: :lol:

[elbana]

يا أخت فريدة واضح إن والدتي ووالدتك قرايب ، لأن الكشري والمحشي والسمك المشوي والمخللات كل ده كان لازم نوزع منه على الجيران ، وخصوصاً أقرب عائلة لنا وكانوا في الشقة اللي تحتنا وكانت والدتهم متوفية وعايشين مع مراة أبوهم ، وكانت والدتي تحرص على إنهم ياكلوا من معظم أكلنا مع إنهم كانوا كبار بس كانوا بيصعبوا عليها .

يا جماعة وجعتوا قلبنا بجد

[Spider]

أعشق سينـــــــــاء والبحر الأحمر

[BenNeal]

مصر بتاعتى هي:

الاذان

رمضان و العيدين

شوب عصير قصب مشبر في عز حر ىوليو

حمص الشام بالشطه علي شط المنىل

تمشيه علي كوبري الجامعه (لوحدى)

[BenNeal]

المذاكره لغاية صلاة الفجر ايام الامتحانات

اخد اصحابي بالحضن كل ما نتاقابل

برنامج على الناصيه يوم الجمعه

ايام الجمعه و الاعياد اجازه

[الطفشان]

فعلا موضوع مؤثر جدا

خاصة مداخلة البنا و فريدة، اللي خلوا الدموع تيجي في عيني

ليه الشجون دي بس

[freefreer]

فعلا .. تحية خاصة لمداخلة البنا :inlove:

[elbana]

طب ياريت تدوروا معايا على حبوب القلب لأني من ساعة ما قرأت الموضوع ده وأنا حالتي ما يعلم بيها إلا ربنا ، وأكيد ده شعور كل المغتربين ، ربنا يا جماعة يرجعنا لبلدنا بالسلامة ، ويرجّع بلدنا لينا بالسلامة .