إيه اللي عاجبك في مصر

[Elham]

ايه يا جماعه جمال الموضوع ده,انا ما كنتش فاكره انه عن كده خالص.

انا اكتر حاجه مفتقداها فى مصر حضن امى (ربنا يخليها و يديها الصحه)و منكفتى مع اخواتى و لما اكون زهقانه انزل اتمشى فى الشارع اللى مليان بالناس يضيع الزهق على طول قزقزه اللب و السودانى و الناس اللى ما تعرفهاش و حصلك اى حاجه فى الشارع تلاقيهم بيساعدوك و........................كفايه بقى انا مش قادره و الله مصر و حشتنى اوى.

[إبن مصر]

حرام عليك يا بنا انا فعلا والله مش شايف حروف الكلام من دموعى وانا الى عايش فيك يا مصر وباعشق كل ذرة تراب من ارضك...

وعلى فكره شكلك من اسوان .... نبقى قرايب لانى من دراو !!! تعرف دراو؟؟؟

حد هنا يعرف دراو؟؟؟؟

ابن مصر

[yasser6666]

اللي عاجبني في مصر بصراحة اكلها اللذيذ وده اكتر حاجة بافتقدها في الغربة.مش معني كده انني طفس لاسمح الله .لا والله ده حتي وزني لايزيد ابدا عن تمانين كيلو !!! ولكن مهما اكلتىفي ارقي المطاعم الغربية واشيكها اقول لنفسي وللي معايا ده كله كلام فاضي الاكل بنفس صحيح في مصر ...فين الحاتي (ابو اصبع-في شارع وكالة الليمون) فين (العربي بتاع الكبدة علي الترام في بحري)... فين السمك الطازة في حلقة السمك والميدان بدون تخزين وتلج وبلاوي...

فين الشوايات والدخان اللي يفتح النفس في كل مكان.... فين الفاكهة والخضار ذوات الطعم المميز والرائحة المميزة وليس فقط شكل و لون كما توجد هنا ...فين طبيخك يا امي...

غير كده بقي لمة العيلة ولعب الطاولة علي القهوة وشد المعسل والتمشية بالليل علي شط اسكندرية ويحلو الكلام.....

[ragab2]

البنا

كل اللي قلتوه عاجبني ... 

وأضيف عليه ركوب قطر الدرجة الثالثة في الدلتا بالليل وروايح الأفران الوالعة ، ومنظر البيوت اللي طالل من شبابيكها شعاع نور خافت ، وواحد قاعد في كرسي قدامك بينام ، وأنفاس غيطان الرز والقطن بتهفهف . 

ولا لما تاخد فلوكة في أسوان بيجدف بيها راجل نوبي عجوز لافف العمة ومشمر دراعاته وعارف إنك تلميذ ومزوغ من المدرسة علشان تتفسح لك شوية في النيل . 

ولا لما تمشي ف جنازة معدية من شارع ضيق وتلاقي اللي قاعدين قدام البيوت راحوا قايمين جري وجم يساعدوا في شيل الخشبة وهم بالبيجامات . 

ولا لما تقعد تاكل في مطعم فول غلبان وكحيتي الساعة ستة الصبح ويبدأ طبق السلطة يخلص قدامك وتلاقي الراجل جه من نفسه وراح مالي لك الطبق تاني من غير مايزود ولا مليم وكأنه أبوك وعايزك تاكل لما تشبع . 

ولا منظر التلامذة بالمرايل الصبحية في الشتا وهم بيمدوا عشان يلحقوا قبل الجرس ما يضرب ، وصوت غناهم السلام الجمهوري (والله زمان يا سلاحي) أو (بلادي بلادي) ، وتمارين الصباح ، ومدرسة صفا ، مدرسة انتباه ، وصوت الأكورديون اللي بتعزف عليه صوابع تلميذ صغير قدام ميكروفون المدرسة ، وفرقة الخطابة وهم عمالين يتحضروا علشان يفتتحوا الإذاعة المدرسية . 

ولا أشرعة المراكب البيضا وهي قاطعة زرقة النيل في أسوان وعمالة ترفرف بفرحة ومن وراها الجبل برملته الصفرا وعند سفحه خط من الأشجار الخضرا يفصل بين صفرة الجبل وزرقة الميه . 

ولا العربيات لما تكون بتزف عروسة وتلاقي عربيات مالهاش دعوة بالموضوع داخلة تزمر وتساعد في الزفة . 

وبالمناسبة أنا كنت سايق العربية مرة على الدائري ولقيت قدامي عربية نص نقل شايلة شوار عروسة (يعني جهاز عروسة بالفلاحي) واللحافات الساتان الحمرا المزهزهة والمخدات البيضا الجميلة وكده يعني ، وكنا وقت العصر ، ولقيت جنب العربية النص نقل عربيتين ثلاثة ميكروباص وفيهم ناس استنتجت بذكائي الحاد إنهم أصحاب الشوار (يعني جهاز العروسة بالفلاحي) المهم ما اطولش عليكم .. قولوا طوِّل ، كانوا ماشيين ساكتين خالص ، رحت دايس بنزين وداخل وسطهم وكانت معايا الحاجة والدتي ، وجيت مزمر زمارة الزفة (بيب بيب بيب .. بيب بيب) ، بصيت لقيت اللي في العربيات كلهم بصوا ناحيتي ، وهاتك يا زغاريد ، وزمامير ، وراحوا مطلعين طبلة كانت معاهم ، وهاتك يا غنا وسقف ، وقعدوا يطبلوا على صاج العربيات ، وأخوكو كان ح يموت م السعادة ، وفضلنا كده ييجي خمس دقايق في زفة متواصلة وكأني واحد من العيلة صاحبة الشوار (يعني جهاز العروسة بالفلاحي) . 

الله يسامحكوا مين اللي قلب علينا المواجع ، ما احنا قاعدين في الغربة وراضيين باللي احنا فيه .....    ياللا . 

 

فريدة

مش ممكن كلام البنا جميل بشكل انا عايشه فى مصر و عارفه كل اللى بتقوله يا اللى متغربين و لو انى ساعات باحس بغربه فى بلدى بس فعلا احسن حاجه فى مصر ناسها الأصيله الطيبه مش الفالصو تعرفوا ان المصرى جواه حكمه و حضاره متراكمه تحت جلده و بتبان فى الأزمات ... أحلى حاجه لمتى انا و اخواتى فى الأعياد و ماما تقعد تعمل فى الأكل قبلها بيومين و لو يوم مش فاضيه تبعت لى الأكل مع اختى الصغيره .... و اليوم اللى تعمل فيه كشرى او محشى تبعت للعماره كلها ...و لا فى شم النسيم و الناس كلها طالعه من بيوتها و خارجه فى الشوارع و الكل بياكل نفس الأكل بيض و فسيخ (و لو انى مش باحبه) ,,, احلى حاجه رمضان و ليالى رمضان و التراويح و اللمه فى جامع عمرو بن العاص ليله القدر و لا الحسين و السهره صباحى على انغام واحد عواد مش مشهور ..و لا رحلات الكليه و و الواحد حاسس ان الدنيا كلها قدامه ... ولا الميكروباصات و جو الألفه لو صادف و ركبت ميكروباص تحس ان الناس كلها طالعه من حته واحده و نازله نفس الحته و لو اتفتح موضوع تلاقينا كلنا بنتكلم زى ما نكون نعرف بعض من زمان ... مرة نسيت الفلوس فى البيت لقيت اللى جانبى من هنا و هنا بيدفعوا لى من غير ما أعرفهم .....

الحقيقة كلام البنا وفريدة كلام جميل

ويستاهل يتعمل له اقتباس .. كوت quote عشرات المرات

الله ينور

وتحياتى لكل من شارك فى هذا الموضوع

[ragab2]

حرام عليك يا بنا انا فعلا والله مش شايف حروف الكلام من دموعى وانا الى عايش فيك يا مصر وباعشق كل ذرة تراب من ارضك... 

وعلى فكره شكلك من اسوان .... نبقى قرايب لانى من دراو !!! تعرف دراو؟؟؟ 

حد هنا يعرف دراو؟؟؟؟ 

ابن مصر

 

طبعا

دراو أشهر بلد فى أسوان وأسمع عنها كتير بالخير

وقابلت ناس منها كانو فى منتهى الجدعنة والكياسة

ولكنى للأسف

لم أذهب الى ماوراء قنا وسوهاج وأسيوط التى نبع منهم جدودى

وأتمنى عمل جولة الى الأقصر وأسوان

ان شاء الله

[Faro]

وعلى فكره شكلك من اسوان .... نبقى قرايب لانى من دراو !!! تعرف دراو؟؟؟

حد هنا يعرف دراو؟؟؟؟

ابن مصر

قضيت جزأ من طفولتي فى أسوان وزرت جزيرة الملك / النباتات العديد من المرات, كتراكت و خزان أسوان ... كذلك دراو ولكن للأسف لا أذكر شيأ

[Salwa]

احبائى الكبار

تحياتى

قبل ما اقولكم ايه اللى عاجبنى فى مصر --اسمحولى احكىلكم حدوته قديمه --كان مره فيه طفل صغير عايش فى الشمال فى قريه صغيره مع امه--وفى يوم والام تعمل فى الحقل -مشى الولد وتاه ----قابله عمده القريه وساله انت مين وساكن فين --قال الطفل انا لااعرف غير امى ---وساله ومن هى امك --قال له ---امى اجمل واحده فى الدنيا --قال له -صفها لى --قال الطفل -امى جميله جميله عيونها ساحره انظر لها واشعر بالامان -شعرها يدفئنى حضنها يغطينى -انها اجمل امراه فى الوجود --وبحثوا عن الام ولم يجدوها ---وقال عمده القريه للطفل -لابد ان تبقى مع ام بديله وزهبوا به الى اغنى نساء القريه --وبكى الطفل -اريد امى

وبعد مرور ايام وعندما كان يتنزه مع الام البديله --فجاه ترك يدها وجرى سريعا نحو سيده مشعثه الشعر وترى بعين واحده وترتدى اثمال باليه وصرخ فرحا امى امى هزه هى امى --الم اقل لكم انها اجمل امراه فى الوجود -------------

وانا اقول لكم واقسم لكم بكل ماهو مقدس انى ايضا ارى بلدى اجمل بلد فى الوجود ---اسكندريه مريه وترابها زعفران -وناسها خلطه خاصه غير كل البشر --اتعملت لهم اسطنبه -واتلغت بعدها --الاسكندرانى مرح ولمض وطيب وخدوم ونشيط قوى وابن بلد عنده مبادىء وممكن يمشى وجيبه فاضى ولو قا بلك يصمم يعزمك ويقولك كرامتى ده انت ياعم ضيفنا --والا الشمس ساعه الغروب وهى كالكره الزهبيه وظلها يسطع فوق كثبان الرمال-مره تشوف المل احمر ومره زهبى --وتنسى همومك والدنيا وتسال نفسك ----انا سبت كل ده ليه ---مصر بالنسبه لى اسكندريه وبس -ابو العباس والمنتزه والعجمى والمنشيه وكل حبه رمل فى بحرها --احلى سيمفونيه تعزفها شواطئها واحلى زفه الزفه الاسكندرانى --منتهى الرقى المغلف بالبساطه -ناسها --اللى كل واحد فيهم زى شهور السنه فيه الصيف والربيع والشتاء والخريف --وعمار يا اسكندريه وعمار ياجنه الله على الارض

[حشيش]

مصر...محمد رفعت وعبد الباسط ومتولى الشعراوي

مصر...أم كلثوم وعبد الوهاب وعبد الحليم

مصر...مبارك :shock: :shock: :shock:

مصر...حشيش :) :cry: :)

[Cleo]

مصر...مبارك

هى خلاص بقت رسمى.....؟؟؟؟!!!!!!!!! :shock: :shock: :shock:

[se_ Elsyed]

مصر...حشيش

حشيش أيه وبانجو أيه ، ده أنت شطحت شطحه جامدة قوي ... ومساء الخيــــــــــــــــــــــــــــــــر وكلامك بصراحة يحرك الحجر :cry: :cry:

[se_ Elsyed]

بمناسبة الأكل ، فعلاً مصر فيها ميزة غريبة جداً وهى انك تشعر بلذة وطعم وحلاوة الأكل أي كان ولو فول على عربية فى الشارع أو جبنة وطماطم وجرجير وعيش مفقع من الفرن البلدي ، ومهما الواحد أكل فى أرقى وأفخم مطاعم العالم فبرضوا مازلت أشبهه بأكل المستشفيات صحي ومفيد ولكن لا طعم له .

[ragab2]

حشيش

مصر...حشيش 

السيد

حشيش أيه وبانجو أيه ، ده أنت شطحت شطحه جامدة قوي ... ومساء الخيــــــــــــــــــــــــــــــــر وكلامك بصراحة يحرك الحجر ويعدل المزاج

بصراحة

كلام يسطل العقل ويعدل المزاج

[se_ Elsyed]

نسينا حاجة مهمه جداً وهي صلاة العيد والتكبير اللى بيهز مصر كلها ساعة الصلاة فى الساحات وفى المساجد واللى ماتلاقهوش فى أى بلد فى الدنيا كلها حتى هنا فى السعودية ، وكان منظر الناس وهي رايحة تصلي يــــــــــــــــــــــــاه حاجة تفرح .

[Spider]

ايه اللى عاجبك فى مصر?

طبق كشرى متغرق بالدقة والشطة من الخديوى

وبعديه حمص شام ملهلب ومشطشط

والله نفسى فيهم دلوقتى حالآ :?

[elbana]

أعذروني يا جماعة لعدم مشاركتي من عدة أيام .

الأخ ابن مصر أنا فعلاً عشت معظم عمري في أسوان ومتعصب لها أكتر من أهلها ،و طبعاً أعرف دراو ، وأعرف الجعافرة والخطارة ، والأعقاب ونجع العجباب ، وأعرف كل كل الخط ، وباشم ريحة النخل اللي طارح وأنا باكلمك دلوقتي . كنت زمان وأنا راجع من الكلية علشان أقضي أجازة نص السنة ولا آخر السنة في أسوان ألزق وشي في قزاز القطر وأفضل أبص على النخل والنيل وراه وهو عمال يقرب من القطر شوية ويبعد شوية زي ما يكون بيرحب بيّا ، والبيوت النوبية بألوانها البيضا سارحة ع الجبل أو مستخبية وسط الخضرة ، وعربيات الكبوت شايلة الناس اللي خارجة تسعى ، والزيار المليان ميه تحت الشجر العتيق مستنية اللي يشرب ، وأبوقردان في الغيطان المخنوقة بين الجبل والميه بيبص بطرف عينه على القطر اللي عامل دوشة وينقر في الطين . أنا ف أسوان اتعلمت كل حاجة تقريباً ، وحأحاول في أقرب فرصة أعمل وصف لأجمل الأماكن فيها إن شاء الله .

[elbana]

تعجبني ظاهرة المحافظين الجادين أمثال عبد السلام المحجوب في الإسكندرية الذي أطلق شرارة التنافس وفضح الكثير من المحافظين الذي كانوا يتربعون على عرش امباطوريات أسسوها في محافظاتهم ويعزون انهيار الأحوال فيها إلى نقص الإمكانات فضرب الرجل لهم مثلاً عملياُ في كيفية التغلب على الصعاب وتوفير الإمكانات على طريقة الشاطرة تعزل برجل حمار ، وهناك محافظ قنا الذي علمت أنه بذل مجهودات رائعة في تلك المحافظة التي تحتاج إلى الكثير جداً من الجهد والعمل ، وهناك أيضاً محافظ القليوبية ومحافظ المنيا ، وأتمنى أن يظهر المزيد من المحافظين الجادين ليعيدوا إلى مدن مصر جمالها ويوقفوا جالة الانهيار التي طالت معظم مرافق الدولة في كل المحافظات .

[علي بابا]

بصراحة أنا قررت اشترك في التوبك دا لما عرفت انه مش نقد

:cool:

ياااااا ه....... مصـــر

اعتقد المتغربين اللي زي خارج مصر هما اللي ممكن يقولوا ايه الحلو في مصر

مصــر.... النيل ساعة المغربية عندما تتلألأ مياهه بشعاع الغروب

مصــر.... الهرم والاثار اللي بتعكس حضارة 7000 آلاف سنة

مصــر.... الأزهر الشريف منارة الاسلام

مصــر.... الناس الطيبين اللي عايشيين اليوم بيومه ما بيضروش حد

مصــر.... اسكندرية عروس البحر الابيض المتوسط

مصــر.... صوت الآذان مختلط بأجراس الكنائس يقولان نحن شعب واحد

مصــر.... نجيب محفوظ وأحمد زويل ومجدي يعقوب وفاروق الباز

مصــر.... الفلاح البسيط اللي بيدي الأرض حب فبتطرحله خير

مصــر.... عربية الفول الصبح والناس ملمومه حواليها بيفطروا

مصــر.... مكتبة الاسكندرية

مصــر.... اجمل الشواطىء واحلى مياه للغوص في البحر الأحمر

مصــر.... آثار فرعونية وقبطية ورومانية واسلامية

مصــر.... السد العالي

مصــر.... قناة السويس وربط الشرق بالغرب

مصــر.... خير جند الأرض - صدقت يا حبيبي يا رسول الله

مصــر.... شهامة ولاد البلد ورجولة الجدعان

مصــر.... الاطفال الصبح وهما رايحين المدارس

مصــر.... الراجل اللي شايل فقصين عيش فوق راسه وهو راكب العجله

مصــر.... كلها حاجات حلوة وجميلة بس اللي يشوف

كل ده.....بارك الله فيك يا حماده....

[Cleo]

و أنا براجع مداخلات الأخوة غصب عنى افتكرت مشهد صغير ولكن معانيه كبيرة جدا فى فيلم "بين القصرين" كان الابن الشقى ياسين (عبد المنعم ابراهيم) ماشى مع أخوه بيبكى ظلم أبوه لهم و إنه بيكرهه و إنه و إنه.... و هم ماشيين قاموا شافوا العساكر الانجليز بيهينوا أبوهم سى السيد و رموا طربوشه على الأض و ضربوه و أجبروه إنه يشيل بعض المخالى للعساكر الانجليز... فى البداية من كتر غضبه الابن شمت فى أبوه و قال "خليه يدوق الظلم" و بعدين و هو عمال يتفرج على أبوه مذلول مهان... غصب عنه لقى نفسه بيصرخ "يا حبيبى يابابا"... و جرى مع أخوه لنصرة أبوهم...

يا ترى... "ياسين" إيه اللى عاجبه فى "سى السيد" ؟؟ :)

[se_ Elsyed]

يا ترى... "ياسين" إيه اللى عاجبه فى "سى السيد" ؟؟ :)

مين اللى بينادى :!:

[ســيد مرزوق]

بصراحة يا جماعة الموضوع ده تعبني جدا وأبكاني جدا كلامكم كلكم وخاصة كلام البنا ... فعلا الكلام كله خلاني مش شايف من كتر وسخونة دموعي .. موضوع حساس جدا .. وحقيقي عمال أفكر من فترة في العودة النهائية والواحد بشوية صحة قبل ما يحصل أي حاجة تانية لا سمح الله .. كل حاجة في بلدي وحشتني .. تصوروا لما باسافر مصر .. أول ما يلمس عجل الطائرة أرض المطار أشعر أن قلبي هو اللي بيلمس ويحضن الأرض مباشرة وبكل الشوق وتنزل دمعه ساخنة من عيني ممزوجة بفرحة إستعدادا لاستنشاق أول نسمة من هواء بلدي أول ما يفتح باب الطائرة ... وأقف لثواني على الباب قبل إستئناف السير آخذ نفس عمييييييق من هوا بلدي ... وأنزل بهدوء ورهبة وشوق على السلالم وأشعر برغبة عارمة في إحتضان كل من أقابله من أهل بلدي ... مصر يا خواننا .. حاجة تانية خالص بالرغم من كل صور الفساد والتعفن السياسي اللي قاموا بيه ( السادة ) ... مصر هاتفضل مصر وسوف تنقشع الغمة وتعودي يا بلدي نقية عفية تقية طاهرة وشريفة وصالبة طولك في وش الريح ... مش هاتتطاطي تاني لحد مهما كان ... شدي حيلك برجالك وشبابك يا حبيبتي ...

دا أكتر موضوع أثر في ... وبكاني كما أبكاكم جميعا ...

أدعو الله أن يعيدنا إلى حضنها سالمين غانمين آمنين مجبورين الخاطر ونلقى أهلنا وأحبابنا في كل خير وسعادة .