إيه اللي عاجبك في مصر

[ســيد مرزوق]

معظم الموضوعات والمداخلات نتحدث فيها عن الفساد والسلبيات المنتشرة في بلدنا ونهاجم فيها كل شيء حتى أنفسنا... إلى أن أصيب معظمنا إن لم يكن كلنا بإكتئاب وفقدان الأمل والشعور باليأس من الخروج من تلك المآسي التي تكتنف بلدنا الحبيب والذي في بعض الأحيان يتحول إلى عدو يهاجمنا ويطفشنا ويشتتنا في شتى بقاع الأرض ونعاني ما نعاني وأيضا في أحيان كثيرة نحن إلى هذه الأرض التي نشأنا عليها والأهل الذين تربينا بينهم وشربنا من أفكارهم وتطبعنا بسلوكهم ....

فلنأخذ هدنة مما سبق ..

وليبدأ كل منا الحديث عن الجوانب الإيجابية والأسياء التي تعجبه في مصر وننسى ولو مؤقتا ما أفنينا وقتنا فيه من نقد وتعرية للمفاسد وهجوم على السلبيات .

فلننظر الآن إلى النصف الملآن من الكوب ... ولنأخذ نفسا عميقا من الأمل والإيجابية ونزفر الأحزان والسلبيات ...

هيا يا أعزائي ... شمروا عن سواعدكم وابدؤا الآن ...

مين قال أنا ؟؟؟؟؟

[Cleo]

لا زلت أعتقد أن مصر على رغم مساوئها الكثير هى أفضل مكان لبناء أسرة...

يعنى أيام الخطوبة كنت أفكر فى أفضل طريقة للحياة... وفكرت بالطبع فى الهجرة أو العيشة فى بلد عربى... وجدت أن أفضل مكان هو مصر..

فالبلد الأوروبى قد يوفر مستوى اجتماعى وقلفى و معيشى معقول... ق يشعر الإنسان هناك بأدميته... إلا أنه من الصعب أن يحافظ فيه على دين أولاده... صعب أن تبرى أولادك على التدين منذ صغرهم فى مجتمهات تتحرر من الدين.

أما الحياة فى الدول العربية... فصب أن تستمتع فيها بمذاق "البلد" فكل البلاد النفطية تقريبا توفر رفاهيات لا حدود لها... ومستوى دخل عال... واحترام للقانون وخلافه... لكن لا طعم لها

أكثر شىء أحبه فى مصر أبى وأمى و شقيقتى وبناتها ولانيل ومسجد السلطان حسن... لا أتخيل أن أشعر يوما أننى أفتقد هذه العناصر.. وعشانهم "كلله" يهون

[فــيــروز]

انا بجد مش باهرج يعنى ..

اكتر حاجه بتعجبنى فى مصر المصريين طبعا :unsure:

اينعم الناس بقى لها حركات نص كم كتيييييييره .. بس كل ده ممكن يتنسى امام قفشه ذكيه من انسان بسيط ..

يعنى مره كنت راكبه تاكسى ورايحه الشغل .. بيتنا فى المهندزين و الشغل فى الزمالك فلازم نطلع الكوبرى ..

لقيت السواق بيقول لى : احنا هنطلع الكوبرى .. ماشى؟

هو مش بياخد رايى هو بس بيدينى خبر

فانا ماكنتش لسه صحيت من النوم فبصيت له كده باستغراب و قلت له:

امال هنروح الزمالك ازاى من غير ما نطلع الكوبرى يا ريس؟

قام قال اصل ركب معايا زبون قبل كده راسه والف ... اننا نروح الزمالك من ايها طريق غير طلوع الكوبرى .. وغلبت افهمه ان الزمالك دى "جزينه" ولازم عشان نوصل لها نعدى كوبرى ابدا ..

الحقيقه يعنى انا قلت السواق ده اكيد شارب حاجه عالصبح .. او انا اللى مش شاربه ..

[فــيــروز]

رغم كل ما نسمعه عن الانانيه و اللامبالاه التى تميز المصريين لكن بردو لا يمكن انكار الشهامه التى يتحلى بها كثير منهم ..

كفايه جدا ان الواحد يمشى فى شارع ما ويبقى مطمئن انه يقدر يتركن على جدعنة الناس اللى فيها لو اصابه مكروه ..

والحقيقه انا لست بحاجه لذكر اى مواقف شخصيه تؤكد ده لانه مؤكد ان لدى كل الاعضاء عشرات المواقف التى تؤكد هذه الصفه ..

[فــيــروز]

الرضا بالقليل

ودى ممكن تكون ميزه و ممكن تكون عيب :blink: .. اظن مش محتاجه اوضح امتى بتبقى الصفه دى عيب :unsure:

بس الانسان المصرى قنوع و ابسط الاشياء ترضيه لو قدمت له بنفس صافيه وبطريقه تحترم آدميته و تشعره انه بنى آدم ..

الكرم ..

من ايام قليله فوجئت ان الناس بتوع البوفيه فى الشغل بيوزعوا ليمون علينا كده فى وسط النهار .. فسالت واحد منهم هو ايه المناسبه يا محمد؟ قام قال من غير مناسبه .. احنا فى البوفيه طقت فى دماغنا -دى كانت كلمته شخصيا- اننا نعزمكم على ليمون .. بجد انا اتاثرت جدا باللفته دى .. اصلها ماطلعتش مننا .. حاجه تكسف ..

[emmyyy]

في مثل بيقول الجنه من غير ناس متنداس انا معاكي يافيروز ان احلى حاجه في مصر ناسها و حاجه كمان كورنيش اسكندريه

[مونتانا]

انا بصراحة يا جماعة لسة ما اتغربتش برة مصر

بس احساسى ان مصر دى ف دمى ف روحى بعشق ترابها

طبعا ناسها احلى ما فيها وان كان غالب عليهم الطبع اللى مش طبعهم الايام دى لكن انا متفاءلة ان الخير قادم والناس هيفوقو

عارفين احلى حاجة ف شعبنا اية انو شعب بسيط مش بيحمل هم حاجة يعنى تلاقى الشخص الفقير يضحك من قلبة وهو ما معاة الا قوت يومة فقط

التلقاءية الشهامة خفة الدم دى صفات محتكرها المصرى دون غيرة :unsure:

[Seafood]

يعجبني في مصر أنه مهما بلغ الفساد فيها مبلغه, فإنه يظل هناك فئة من الشعب , قلوا أو كثروا , عاضون على دينهم بالنواجذ , لا يبالون في سبيل الدفاع عنه بأي أذىً, لا يثنيهم عن التمسك به إستهزاء المستهزئين أو تثبيط المثبطين, قد ربط الله على قلوبهم , فهان عليهم كل عزيز , لا يعرفون اليأس ولا الخذلان , العزة عندهم في الإيمان لا في كثرة المال ولا في التقرب من فلان ..

بهم رفعة وإن عاشوا في غرفة تحت الأرض لا ترى النور , ولهم شموخ وإن كانوا لا يملكون قوت يومهم , ويعلو وجوههم سعادة لا يفهمها ويحتار فيها من ملك الدنيا, المساجد قصورهم , والقرآن وسيلة ترفيههم , والصلاة رياضتهم .. لا يستهينون بأنفسهم , ولا بدينهم , تذوب قلوبهم ذلةً لإخوانهم في الله , لا تفتنهم الأهوال ولا الأموال ولا قوة عدو .. صابرون محتسبون متوكلون ..

لا يتنازلون عن مبادئ وأصول دينهم مهما كانت المغريات أو المبررات والأعذار .. يسميهم المنافقون متشددين , ويطلق عليهم الكفار إرهابيين , ويقول عنهم المفرطون متطرفين .. أما المقصرون من أمثالنا فيغبطونهم ويتمنوا أن يكونوا مثلهم في رباطة جأشهم وقوة إيمانهم ..

لو لم يبقى منهم غير واحد فقط بين الشعب , لظل الأمل معقوداً على إمكانية الإصلاح . الواحد منهم بأمة , والبضع منهم أساس لجيش لا يقهر , هم منارات في وقت الأزمات , وهم الأمل في أوقات اليأس , وهم النواة التي سينطلق الإصلاح من عندهم ..

[فــيــروز]

الحكمه

فان يكون لك وجهة نظر فى الحياه و راى -حتى لو كان خطا- و حكمه تتبادلها مع الآخرين من الصفات المميزه للانسان المصرى مهما تواضعت ثقافته او قل علمه .. اتذكر مره فى رحله نيليه كان المراكبى اسمه الاسمرانى او سماره .. وكنا بنتكلم عن مشاكل الاسره وجه حظى انى كنت قاعده جنبه فكنت سامعه كلامه .. لقيته بيقول ان الست هى "نور البيت" فعلا ده كان لفظه "مع حفظ كافة الحقوق للايت هاوس رغم اختلاف الترجمه" :unsure: .. و انشرحت اوى بالتعبير ده لانى حسيت ان الراجل ده بيقدر قيمة الست كويس وعارف لها وضعها .. :blink:

وكمان عم فتحى اللى كان فى بوفيه الشغل اللى فات .. كان راجل نوبى صامت معظم الوقت بس اما يتكلم .. كله لابد ينصت لهذا الذكاء الذى لا يعلن عن نفسه الا فى اوقات معينه ..

[Tamsite]

يااااااااااااااااااااااااااه

أخيرا ، يوجد هنا حديث عن الايجابيات في مصر !!!!!

تصدق؟؟؟ انا كنت ابتديت أتعمي عن أي ايجابيات في مصر كلها، من كتر ما دماغي كانت مزدحمة باخبار وأفكار الفسد والأضاع المايلة والسلبيات التي غزت واحتلت مجتمعنا

ومخبيش عليك ، انا فعلا أدت وقت شوية في محاولة اني أفتكر ان فيه ايجابيات في مصر......

فعلا فيه ايجابيات، بس هنا انا هقول اللي أنا فاكره بس في اللحظة دي........

الأمان:

اني مثلا اتخنقت ونفسي انزل الساعة 12 بالليل أتمشي شوية على كورنيش النيل أو البحر ، أو أي مكان بارتاح فيه، من غير مبقى خايف يطلع عليا شوية لمامة يشرحوني ويرموني على جانب الطريق لما ياخدوا كل اللي معايا

ممكن ده يحصل على أرض الواقع، بس قليل قوي مقارنة بباقي دول العالم

قليل لدرجة اني ممكن أتغاضى عنه وأنساه وأنا بفكر أنزل أتمشى شوية عشان أفك الخنقة

دي حاجة.............

طبعا ، بعض الأصدقاء ذكروا موضوع جدعنة رجل الشارع المصري ، مفيش داعي اني أكرر اللي اتقال........

الروح العالية للمواطن المصري:

آخر تريقة وتهريج و احلى نكت على أحلك المواقف، مش شرط ده يكون لامبالاة وانهزامية وسلبية، ليه منقولش عليه محاولة جادة لتقبل وابتلاع الأحزان والصدمات وتنفيس للكبت بطريقة سلمية، و ممكن كمان تكون سخرية هادفة.

الريف المصري:

اني أقعد أشرب كباية شاي حطب صعيدي ساعة العصاري في الغيط تحت تكعيبة عنب ، ويكون التوقيت مثلا في شهر أكتوبر ( الخريف ) ، انا باحس ساعتها اني في الجنة ( مع اعتذاري للمبالغة في التشبيه)

لأني بأكون ساعتها في قمة الراحة النفسية اللي في الدنيا

وللحديث بقية................

[ALsangry]

لقيت السواق بيقول لى : احنا هنطلع الكوبرى .. ماشى؟

هو مش بياخد رايى هو بس بيدينى خبر

هو بيقصد انك تربطى الحزاااااااااااااااام :unsure:

[METALLICA]

الأخوة المصريون الأعزاء . . .

تحية طيبة وبعد ؛

مصر

احب في مصر الكثير . . . أحب في مصر . . الوطن . . البيت . . الأم . . الأب . . الأخ . . الأخت . . المصريين الذين يحبونك لمجرد أنك تبتسم في وجوههم إبتسامة صافية من قلبك . . المصريين الذين يحبون الوطن ويغارون عليه و ينتقدون مساؤه من أجل النهوض به . . المصريين الذين تتحول إبتسامتهم العزبة إلى صرخات وحوش ضارية إذا مس وطنهم خطر ما . .

أحب المصريين الذين هم في رباط إلى يوم الدين . . . .

تم تعديل 17 أغسطس 2004 بواسطة METALLICA

[ســيد مرزوق]

جميل جدا.. وأكيد هناك الكثير الكثير من الإيجابيات ..

وعلينا أن نفرق بين مشاعرنا تجاه بلدنا وأهلنا والناس كلهم وبين رأينا في الأنظمة التي تحكمنا والتي أحالت حياتنا إلى سواد , فالإنسان المصري له طبيعته الخاصة جدا , فيكفي مثلا أنه لو في خناقة أو زعل وحد قال ( ياجماعة طب صلوا عالنبي كده وإخزوا الشيطان ) تلاقي الكل قال في نفس واحد ( اللهم صلى عليك يانبي ) وتبدأ النفوس تهدا ... الإنسان المصري قلبه أبيض بالفطرة وبداخله خير كثير مهما بدا غير ذلك , ونحن عندما نتحدث عن الإيجابيات نلاحظ أن معظم الكلام كان عن الإنسان المصري , ثم عن البيئة الطبيعية التي نشأنا فيها ولنا في كل شبر منها ذكريات وذكريات .

من منا لا يحن إلى البيت أو الحارة أو الشارع أو حتى الحي الذي نشأ فيه , والمدرسة الإبتدائية ورائحة الأقلام الرصاص والطباشير وصوت المدرس أو المدرسة وشخصياتهم ... من منا لا يحن إلى رائحة الفول عالصبح وهو واقف ماسك الطبق ومستني عم فلان يدب المغرفة جوة القدرة ويحط له الفول ... ويقول له إتوصي ياعم شوية داحنا زباينك !!!

من منا لايحن إلى اللعب بالكورة الشراب .. ساعة العصاري ... أو الأستغماية .... وتريك تراك ... ياااااااااه فكرتوني بحاجات عجيبة كنت قربت أنساها !!!

مصر هي أمنا فعلا حتى لو قسيت علينا شوية غصب عنها من اللي كاتمين على نفسها من أول التاريخ ..

لو دورتوا كمان هاتلاقوا كتير كتير من الإيجابيات في هذا الشعب العظيم وتلك البقعة العزيزة على قلوبنا جميعا والتي من شدة حبنا فيها نقسو على أنفسنا وعليها أحيانا بالنقد حبا لها وغيرة عليها وأملا بأن تصبح أفضل مكان للعيش على وجه الأرض حتى تغنينا عن غيرها الذي مهما بدا طيبا فيكفي أنه غريب غريب غريب عنا شكلا ومضمونا .

ياللا كملوا ... بكل الحب والحنان والأمل والشوق والحنين .

[Tafshan]

قبل ما ابدأ عاوزكم تشوفوا اخواتكم المصرين الي اتغربوا - و انا منهم :

http://www.egyptiantalks.org/invb/index.php?showtopic=11817

انا ح اتكلم علي حاجات غريبة شوفتها هنا في الامارات و انتم تحكموا :

1- واحد هندي قال لي مرة : " علي فكرة انت جواك راجل اسود !! " قلت له : ليه ؟؟!! قالي : اصل لونك ابيض لكن قلبك طيب مش بيفرق بين ابيض و اسود "

طبعاً ده مش وصفي انا ، ده وصف كل المصرين ...كلنا ما بيفرقش معنا موضوع اللون او الدين ، متربين على كدة

2 - واحدة لبنانية مرة كانت بتتفرج علي وليد توفيق في برنامج رغي في التلفزيون قالت لي : "عم بيعرف يتكلم منيح - يعني لسانة حلو في الكلام - اصله كان عايش طول عمرة بمصر !!!"

مش هي بس ، ده كل العرب بيقولوا كدة ، محدش بيعرف يتكلم ذي المصرين !!

3 - في صلاة الجمعة لقيت في حاجة غريبة جدا ً بتحصل : كل واحد من كل الجنسيات بيدخل الجامع و مش في دماغه اي حد ممكن يكون عاوز يقعد و لا في دماغة درجة حرارة الشارع الي بتوصل ل 50 هنا في الامارات ، و يفضل الامام كل اسبوع يفهم الناس توسع ، ولا هما هنا ... و ده في الجامع ما بالك في اي مكان تاني !!!

طبعا في مصر احنا بنقول نقعده نأخذ ثواب !! هم هنا مش عايزين موضوع الثواب ده !!

ده بالنسبة للمصرين - احنا يعني .. احسن ناس

[دكتور عادل الليثي]

مصر لا تحتاج لإيجابيات حتى نحبها ...

لأن الوطن هو قدر ... ليس محلا للاختيار

زي الأب والأم والدين ......

أو زي الـ DNA ... أو زي رجلك أو زراعك .. أو قلبك

ورغم أنه أصبح في الإمكان زرع القلب أو الكلية ...

ولكن يظل التحايل على الجسم طول العمر أن يقبلها ............

فبالإضافة لشريط الذكريات المشترك الذي لا يمكن استبداله أو الاستغناء عنه ......

فأنت عندما تسمع اللهجة المصرية ... أو الصوت المميز للمصريين .. رجالا أو نساء ..

تشعر أنك عملت كونكشن معاه أوتوماتيك

أو تسمع تعبيرات معينة نستخدمها نحن المصريين ..

تدخل مكان لها في نفسك معمول على المقاس بالضبط

فتشعرك بالراحة

وما حدش بيقعد يقول لأمه طول النهار .. هو بيحبها ليه

ولكنه بيتخانق معاها طول الوقت ..

إنها مش واخدا بالها من نفسها ... وإذا كانت راحت للدكتور والا لأ

وده دكتور تروحيله ... ده حمار

ويتخانق معاها عشان مش مواظبة على أخد الدواء .... وشغالة على الوصفات البلدي

وازاي تعمل مع الناس الغجر دول .. وازاي تكون علاقتها مع التانيين .......

إلخ إلخ إلخ ..........................................................

[Farida]

و النبى يا جماعه كان فيه موضوع مشابه زمان فى المناقشات العامه و كان كاتب فيه ناس كتير و منهم البنا ...ياريت الناس الحريفه فى البحث و التنقيب يحاولوا يطلعوه و يضعوا الوصله هنا ..الله يكرمكم و شكرا

[الأفوكاتو]

يجب أن نفصل بين الشعب المصرى, و الحكومة المصرية,

و يبدوا أن الحكومة المصرية تعيش فى برج عاجى لا ينتمى للشعب بصلة, لذا, لا يجب أن نحاسب الشعب المصرى على سلبيات و خطايا الحكومة.

فالمصرى كريم, و متسامح, و طيب( وهذه إحدى مشاكله) و يقدس السلطة( مرة أخرى , أحدى مشاكله) و متدين, سواء ذهب الى الجامع أو الكنأم لم يذهب.

و المصرى يقدس الأسرة, و يلتزم بالتقاليد, و يحترم الكبير, و يعطف على الفقير.

إذا, فالمصرى هو شخص مظلوم, لأن القدر جعله يعيش تحت حكم ديكتاتورى, سلطوى, بشع.

كان الله فى عون الشعب المصرى, و لعن الله الأبالسة الذين يريدون للشعب المصرى أن يخضع للطغيان.

[ALsangry]

انا شايف ان معظم الردود اغلبها مظاهره فى حب مصر

وهناك خلط بين الحنين الى البلد وايجابياتها

ياريت نقدر نفرق بين المشاعر والنقاط الايجابيه فى البلد

وواضح ان فى ناس كتير متغربه ( انا اولهم ) عشان كده مشاعر الحب والحنين بتطغى على رؤيه الايجابيات

[الأفوكاتو]

السيد سنجرى,

أنت جديد هنا, و مرحبا بك, و لكن, عليك أن تقرأ الكم الهئل من النقد الذاتى الذى يقوم به الأعضاء.

و لكن الأمانة تستلزم أن نتوقف أحيانا, لكى نتذكر الإيجابيات, فليس كل شيئ أبيض, و أسود.

نحن نعلم أن هناك سلبيات, و نناقشها, و نرفضها, و نقدم حلول, و لكن أن نتغاضى عن الإيجابيات, فهذا خطأ لا يغتفر,

تقبل تحياتنا , و سرورنا بانضمامك الى المحاورت.

[Handicraft]

مصر ... النيل والطيبة والناس الغلابا ... مفيش حد يموت من الجوع ... البيوت بتحضن بعضها ... مصر الصبر ... مصر العرق ... مصر ستاتها ارجل من رجالة كتير ... وقت الشدة كله بيتلم ... مصر شيخ عجوز رايح الجامع يصلى الفجر ... شاب قاعد يذاكر على الكورنيش ... مصر قله فى ضل شجره فى عز الحر ... مصر ... بناسها ومن غيرهم متبقاش مصر.

اجمل ما فيكى يا مصر ناسك ...

----

الأخت/ فريده

اعتقد انه هذا الموضوع

هوة احنا لية بنحب مصر؟؟؟؟