اذا كنت مغترب اتفضل فضفض معان عن استفتاء غدا

[مغتربة]

حضرتك مغترب ........زحضرتك مغتربه

يا اهلا يا اهلا

برفقاء العجز القسرى عن التصويت فى الاستفتاء غدا :protest:

بصراحه كدا مش هقدر اوصف مقدار حزنى للاقصاء الغريب دا الى اتعرضنا ليه

اعداد المصريين المغتربين حقيقى مهوله و بالملايين و بيمثلوا نسبه معتبره من سكان مصر الاجماليين و الاستغناء عن اصواتهم بالسهوله دى هتخلى نتيجه الاستفتاء لا تعبر بشكل حقيقى عن الراى المصرى العام بشكل دقيق

مش مقتنعه بتبريرات ضيق الوقت و لا بوعود المشاركه فى الاستفتاءات او الانتخابات اللاحقه

حاسه ان فى حد حط ايده على بقى و كتم مش صوتى لا كتم نفسى

حاسه ان فى حد بيقولى لسه برضه صوتك ملوش قيمه و بيعاملنى بحقوق مواطنه منقوصه

بجد على اد ما انا فرحانه حقيقى ان بكره ان شاء الله فى تجربه ديموقراطيه حقيقيه هتحصل فى مصر لكن ان حزينه برضه لانى مش هقدر اشارك فيها

بفرح جدا لما اسمع او اعرف اخبار من مصر عن ناس عمرهم ما اتكلموا فى السياسه قبل كدا و لا كانوا حتى بيعرفوا الانتخابات بتتعمل امتى فضلا عن المشاركه فيها انهم فعلا متحمسين جدا انهم يروحوا بكره يوصلوا صوتهم و يشاركوا و انهم بقالهم فتره بيسالوا و يقروا و يحاولوا يعرفوا علشان يكونوا الراى الخاص بيهم النابع منهم و دا ممك يخلى نص الاسره مثلا هتقول نعم و نصها هيقول لا و هكذا

بجد كان نفسى اشارك بصوتى لكن عزائى انى بحاول اشارك بالتوعيه و الشرح للى بيطلب منى دا دلوقتى

معلش مساحه فضفضه لينا احنا المنبوذين قصدى المغتربين

يا ترى احاسيسكم ايه و يا ترى شايفين دور تانى بخلاف التصويت و قومتم بيه و لا لسه

:give_rose:

[م تيمور المراغي]

عن نفسي عوضني ربنا سبحانه و جاهدت بقلمي بكل اخلاص ,,

ولله الحمد ناس كتير بتراسلني و اتاثروا ايجابيا بكلامي ,,

غير صوحابي هناك ,, فهمت كل واحد منهم اني حزين جدا لعدم وجودي في مصر ,,

فخدمتي انه يعوض غيابي وياخد معاه وهو رايح 5 ,,

ان شا ءالله بعد ما اسلم مشروع الحرم ,,

حقدم نزول نهائي واتفرغ لخدمة البلد ,,

[لونا]

إحساسي إني مقهووورة

أول مرة يبقى لي فرصة إني أعبر عن رأيي في حاجة تخص بلدي ..

و أنا عارفة إن صوتي حيفرق

و مش قادرة آخد الحق اللي كان مسلوب مني

اللي مضايقني بجد هو إني راجعة مصر إن آجلًا أو عاجلًا

و في الغالب عاجلًا

يعني أنا مش مقيمة في دولة غربية و واخدة جنسية تانية

و في الغالب الناس دي بالرغم من إن عينها على البلد و مصر بتفضل في قلبهم

إلا إنهم مش بيقدروا لأسباب كتير إنهم يرجعوا يعيشوا في مصر بصفة مستديمة

لكن مغتربي الخليج ... كلهم كلهم راجعين

يعني الشأن الداخلي المصري مش بس بيهمنا زي المقيمين في الغرب .. لأ و كمان بيمسنا بطريقة مباشرة

و بيأثر علينا و لازم يكون لينا رأي

و اللي واجعني أوي إن دي مش بدعة .. أو حاجة ما حصلتش قبل كدة..

طيب ما السودانيين راحوا و أدلوا باصواتهم في سفاراتهم أيام الاستفتاء على الانفصال

في الانتخابات القادمة ( سواء رياسة أو برلمان )

إن شاء الله نشارك فيها إما في السفارات ..أو نكون في بلدنا و نشارك في اللجان الانتخابية

تم تعديل 18 مارس 2011 بواسطة لونا

[fatfouta]

إحساسي إني مقهووورة

وانا كمان واضيف على كده عاجزة

امبارح كانوا بيقولوا ان احنا 20% من المصريين واذاى قانونا الاستفتاء ده يؤخد بيه بعد استبعاد النسبة دى كلها من المصريين من الاستفتاء

احنا بنشارك فى الدخل القومى بتحويلات المصريين فى الخارج

طب اذاى مايبقالناش صوت فى الاستفتاء على التعديلات وليه مصرين على تجاهلنا؟؟؟

وهل هيتم تجاهلنا ايضا فى الانتخابات البرلمانية والرئاسية ؟؟

تم تعديل 18 مارس 2011 بواسطة fatfouta

[م تيمور المراغي]

إحساسي إني مقهووورة

وانا كمان واضيف على كده عاجزة

لو تنقلوا كلامكم ده لصوحابكم اللي بيحبوكم في مصر ,,

وكل واحد منهم تحلفوه انه ياخد معاه وهو رايح 5 ,,

ممكن تلاقوهم بقوا 200 صوت بدل صوتكم الواحد فقط ده ,,

تقدروا تحولوا الحزن ده لامر ايجابي جدا جدا ان شاء الله ,,

دعواتي الصالحات لكم وللبلد ,,

[مغتربة]

يعنى كلنا فى الهم سواااااااااااااا :sad:

طيب انا نسيت اساللكم لو كنت فى مصر و هتصوتوا او لو اسمح لينا بالتصويت فى السفارات فى بلدان اغترابنا كنتم هتصوتوا بنعم او لا

عن نفسى خلينى ابدا

عن نفسى كنت هصوت بنعم

[fatfouta]

لا

[ssmaly]

لا

انا كمان شاعر بنفس المشاعر من قهر واقصاء وانتقاص لمصريتى بعد ان بدأنا كلنا الافتخار بمصريتنا بعد ثورة 25 يناير والشعور الدافق التى اشعلته فينا

كان عندى ثقة فى اننا بعد 25 يناير سوف يلبى طلبنا فى الاشتراك فى التصويت ولكن كنت واهم

ممكن هنا فى المنتدى ان نعمل تصويت خاص بنا ونعلن نتيجته

اهو نوع من فشه خلق على راى الشوام

بالنسبة لرأى فى الاستفتاء

بالطبع لا

لان هناك سؤال لابد من الأجابة عنه قبل كل شىء

هل تؤمن بان ماقام به الشعب يوم25 يناير ثورة كاملة بكل مقوامات الثورات الحقيقة ولا انها مجرد مظاهرة حادة شوية على راى صاحب البلوفر ؟

اذا كانت الاجابة بنعم انها ثورة كاملة

يبقى لازم الشرعية الثورية تاخذ مجراها

1- تعطيل الدستور واعلان دستورى

2-مجلس رئاسى

3-مجلس تشريعى يصدر دستور جديد يستفتى عليه من الشعب

4-انتخابات مجلس الشعب تحدد بعد فترة كافية لتكوين احزاب جديد ومباشرة عملها

5-انتخاب رئيس جديد

[Alrefaey]

لا

بالظبط كدة لا

[م تيمور المراغي]

لا

زي فتفت واقتبست مشاركتها المستفيضة دي لاني مكسل اكتب ( لا ):closedeyes:

[لونا]

نعم

تم تعديل 18 مارس 2011 بواسطة لونا

[لماضة مصرية جدا]

السلام عليكم و رحمة الله و بركاته

طييييييييييييييييييب يا مغتربة.....خوديني جنبك ع الكنبة

اصل زي ما طلع حزب الكنبة ايام ثورة يناير

اكيد احنا حزب ما وراء الكنبة...و ما وراء الكواليس

اللي بيجي في دماغي

التعديلات الدستورية مهمة...و التصويت عليها مهم

و دورنا.....مش هنتكلم عليه....يا ريت تخطفوا رجليكم لتوبيك استاذ عصام ابو الفتوح عشان نعمل..."تصويت موازي"...و يبقي برضه اسمنا عملنا حاجة

انا قاعدة و حاسة اني بحس بالغربة بشكل مضاعف....و خصوصا لما مرة عملوا استفتاء تقريبا ع المادة بتاعت 77 وساعتها كنت واخدة الموضوع علي مراوحي اوي....و فضلت اقول لزمايلي ان احنا لازم نصوت....و آد ايه كنت مبسوطة لما نزلنا كلنا....كووووولنا.....مع ان كنا متاكدين مافيش فايدة في وقتها و النتيجة راح تتزور....بس كنا عايزين نحس ان احنا موجودين

دلوقتي....الاستفتاء مش راح يتزور

دلوقتي...مصر راح تتبني....من جديد

دلوقتي..حالة استثنائية...تاريخية

و ناس كتير...اللي ليه في السياسة و اللي مالهوش هينزل....كوووولهم هينزلوا....بيبحوها...و بيحرموني من الحب ده

فيه دايرة اترسمت....و احنا اتحطينا براها...و مش لاقيالها سبب

اتصلت علي المكتب الثقافي هنا و كنت زعلانة جدا....و لقيت ردود تخليني اخبط راسي في الحيط....احيانا بحس ان "مبارك"...ده مكنشي مجرد شخص....ده كان شبكة عنكبوت عششت علي الافكار

ردود خايبة.....و مواقف باردة.....و حالة استغباء غير عادية

وانا ماشية في الشارع...لقيت اتنين فلبينين بيوزعوا ورقة صغيرة....بيوزعوها بس ع الفلبينين....طبعا افتكرت ده كوبون مثلا سمن و لا سكر ....اتاريهم كاتبين فيه حاجة ليه علاقة بتغيير بيحصل في بلادهم

اقول احبطت...اقول...اتخنقت....اقول ايه

مش عارفة

بس كده مش هينفع و سكاتنا كده برضه مش راح ينفع

===============================

لو انا في مصر

كنت هقول

لعم

و الله محتارة.....هو لازم يبقي فيه اختيارين...يا ابيض يا اسود

يعني ايوة....لاسباب....و لا برضه لاسباب

و لقيت نفسي...ماااااااسك الهوا بايديا

ع هامش الهوا

لعم.....اقتباس من مقال رائع جدا لبلال فضل كتبه في الدستور...و بيقولنا هو انتو فاكرين الديمقراطية سهلة!!!

بس خلاص

فوتكم....بغربة....يا مغتربين... :P

[hOuSsAm]

لا

سيم سيم صديق

نو

يوووووووووووووووووه سورى يا جماعى ثقافتى فرنش :)

لا

[عادل أبو عمر]

نعم

[ozoozo]

انا كل ما اقوله أه

يقولي هو لأ

لأ

لأ

لأ

تم تعديل 18 مارس 2011 بواسطة ozoozo

[aimen]

بكل لغات العالم

لأ

يعنى لأ

[عصام أبوالفتح]

ارفع صوتك فوق .. انت مصرى

الله يسامحكم يا تيمور وانتى يا

فتفوتة مش عيب تبقوا اعضاء فى الحملة المصرية للمغتربين للمطالبة بحقوقهم السياسية وفيها استفتاء للمغتربين

ومتجيبوش سيرة للناس !!

حملة المصريين المغتربين للمطالبة بحقوقهم السياسية

ttp://www.facebook.com/group.php?gid=392715355914&ref=ts

وده لنك الاستفتاء

http://www.facebook.com/event.php?eid=184076174971159&ref=ts

اخر موعد للتصويت 19-3- 2011 الساعة 5 م بتوقيت القاهرة هاننشر النتيجة الساعة 8 م بتوقيت القاهرة

البيانات المطلوبة الاسم والدولة والراى موافق غيرموافق ولماذا

ونتمنى تكون دى اخر مرة نعمل فيها استفتاء غير رسمى

وان احنا ناخد الحق ده زينا زى مصرييى الداخل

تم تعديل 18 مارس 2011 بواسطة عصام أبوالفتح

[fatfouta]

فتفوتة مش عيب تبقوا اعضاء فى الحملة المصرية للمغتربين للمطالبة بحقوقهم السياسية وفيها استفتاء للمغتربين

طب والله انا قولت لبركة وراحت صوتت وكمان انا صوتت

وبعدين انا سألتك يا باشمهندس هناك سؤال وانت ماردتش اكسفت بصراحة اسألك تانى وقولت يمكن سؤال ساذج ولا حاجة

وبصراحة مارضتش ارفع الموضوع وعمالة أسأل نفسى اقول هو الباشمهندس عصام راح فين وسابنا احنا نصوت لوحدنا

بجد والله هو ده الى حصل

[عصام أبوالفتح]

فتفوتة مش عيب تبقوا اعضاء فى الحملة المصرية للمغتربين للمطالبة بحقوقهم السياسية وفيها استفتاء للمغتربين

طب والله انا قولت لبركة وراحت صوتت وكمان انا صوتت

وبعدين انا سألتك يا باشمهندس هناك سؤال وانت ماردتش اكسفت بصراحة اسألك تانى وقولت يمكن سؤال ساذج ولا حاجة

وبصراحة مارضتش ارفع الموضوع وعمالة أسأل نفسى اقول هو الباشمهندس عصام راح فين وسابنا احنا نصوت لوحدنا

بجد والله هو ده الى حصل

يا سيدتى السؤال مكنش موجه ليا زى ما شفت دلوقتى ولظروف الوقت مرجعتش للموضوع غير النهاردة

انا معظم وقتى على الفيسبوك ونظرة على الحائط عندى هاتعرفى انا مشغول ليه؟

مش راح فين ؟ .. انا حطيت الصندوق ومشيت عشان احط صناديق فى اماكن تانية

فى النهاية هو جهد تطوعى كل واحد يعمل فيه بقدر طاقته ووقته

تحياتى

[محمد عبدالعزيز]

قلبى عندكم يا جماعة

أنا عملت حسابى من سنة 2005 وقررت الرجوع نهائى عشان ربنا يكتب لى الشرف ده وأكون فى مصر فى الأيام اللى زى دى, والحمد لله نلتها.

بس أنا معاكم فى طلباتكم, لازم يكون لكم حق التصويت, زى كل الدول المحترمة فى العالم.