اذا كنت مغترب اتفضل فضفض معان عن استفتاء غدا

[Simba]

يايلا

عزائنا ان الاستفتاء مش هيكون 99 في المية ويطلعوا بعده اغنية اختارناك اختارناك

كان نفسي يكون لنا حق التصويت

وعن نفسي كنت هاقول زي ما قال اسماعيل ياسين بالظبط

نوءه نوءه يااا دهوتي

تم تعديل 18 مارس 2011 بواسطة سمبا

[م تيمور المراغي]

الاستفتاء ده فكرني بايام مبارك ,,

يا سلااام ,, ليه وحشه ,,

كان مريحنا ومستتنا بدل الطوابير والبهدله وحنقول نعم ولا نقول لأ ونزعل من بعض وكيت وكيت وكيت ,,

منكوا لله يا ظلمه

[م تيمور المراغي]

نعم

نعم

نعم

ياه الكلمه دي وحشتنا بشكل !!

[se_ Elsyed]

الحمد لله أنا لا أعرف اليأس

وزي ما كان عندي ثقة بالله في إزاحة الديكتاتور الظالم ..

أنا عندي ثقة إن المغتربين سيتمكنوا من المشاركة في الحياة السياسية وقريباً بإذن الله

وعوضت ده برضوا بالإتصال بكل اللي أعرفهم عشان أحثهم على المشاركة وأوضح لهم ليه لأ وليه نعم ...

وكمان بأتابع مع زملائي بالشركة في مصر موضوع الإنتخاب الإلكتروني ... ولسه كنا بنتكلم أمس بالليل في الموضوع ده وتم تهديد وزير الإتصالات بشكل علني لإنه عمل حركة غبية وغريبة جداً ..

فكنت قد تحدثت معكم من أيام قليلة إن في 6 شركات في مصر تقدمت بدراسة وافية كافية لنظام الإنتخاب الإلكتروني هايريح الجميع بره وجوه منها شركات تابعةلنجيب ساويرس على فكرة ... وقدموا في الدراسة أيضاً طريقة التمويل .. وعملوا ورش عمل وبرزينتيشن

عاوزكم تقرأوا ملحق شباب التحرير في جريدة الأهرام يوم 3 مارس وتشوفوا الحوار اللي أجروه مع الدكتور علي والي ... وده شغال معانا على فكرة وإتكلمنا معاه بالأمس ونقلت له خبر إجتماع ماجد عثمان وزير الإتصالات مع السفير الهندي الأسبوع الماضي لإستقدام خبراء هنود لتنفيذ مشروع الإنتخاب الألكتروني ... وقال لي إن ده هايبقى أخر يوم في عمرة بالوزارة ولو فكر بس في حاجه زي كده هايتبهدل .. لإن شركات تكنولوجيا المعلومات إتخرب بيتها الأيام اللي فاتت .. فأقل واجب إنك تشجع شركات بلدك وتفتح مجال شغل لمئات الشباب خصوصاً إن المشروع هايبقى ضخم جداً و هايتكلف حوالي 150 مليون دولار .. يبقى مين أولى بهم ؟ ... وكمان الإنتخابات شأن مصري خالص وموضوع حساس وتعتبر أمن قومي ... يبقى ليه تجيب أجانب يعرفوا أسرارنا ومعلوماتنا وبياناتنا طالما المصريين ما فشلوش ؟ .. وكمان عندنا عقليات في غاية الإحترام وناس عباقرة بصراحة ومنتظرة فرصتها

[se_ Elsyed]

أنا طبعاً هاقول

لأ للترقيع

[لماضة مصرية جدا]

السلام عليكم و رحمة الله و بركاته

صباح الورد و الفل و الياسمين علي كل المغتربين

امبارح كنت مكتئبة جدا....او محبطة بمعني اصح و انا بتصل باخواتي في مصر...و حاسة اني بره اللعبة

النهاردة....لما شفت الناس في التلفزيون...و هي واقفة في طوابير...منظمة جدا....و اعداد ما شاء الله كبيرة جدا

و الله العظيم قلبي فرح

فرح اوي

لان الرهان الحقيقي...علي الناس الحلوة اوي دي

يقولوا ايون

يقولوا لا

المهم الناس بتنزل

و بتشارك

و شايلة هم....هم مصر

بقي الكل بيفكر...و بيسال....و بينزل

ايه نتمني تاني

و الله الايام الجاية هتبقي احلي باذن الله

هتخيل نفسي في الشارع...دلوقتي....و واقفة في الطابور...و طبعا قاعدة ارغي مع اللي قدامي و اللي ورايا

و هقول

لا

عشان من حقنا نبتدي بداية جديدة....في كل حاجة....

عشان خلاص مبقناش خايفين...عشان مبقا ش فيه فوضي اكتر من اللي كنا عايشينها قبل كده....و انضحك علينا بيها طول الوقت ده

الفوضي...انك متقدرشي تختار...و تحس انك غير كفء

لا

خلاص

كفاية

و اذا محدش فهمها

تبجي

لع

صباحكم...مصري اوي

[م تيمور المراغي]

ريهام يا بنتي

نرمين يا اختي

تفضلي دي

[م تيمور المراغي]

مقال عجبني تمت صياغته باسلوب جميل حبيت اني اضعه هنا

والكاتب اكيد عارفينه وحقوق الملكية ليه عشان ماخدتش رايه ,,

عنبو الاعانيب 19 مارس 09:58 صباحاً

يعنى ايه مش عارف بجد ؟

حد فيكم عارف طيب اليى يعرف يقول اليى مش عارف علشان اعرف

طيب لو حد فيكم عارف وساكت يتكلم لازم يقولنا علشان كلنا نعرف مهو مش معقول هو يبقى عارف واحنا منبقاش عارفين ؟

طيب يقول اول كلمه واحنا هنكمل على طول

الكلام اليى فوق ده هرتله اصل الواحد بقى يهرتل من كتر اليى بيشوفه اليومين دول

المفروض فيه تصويت على التعديل الدستورى والمفروض الناس هتصوت بنعم او لا

والمفروض كل واحد يقول رايه بناءه على اقتناعه هو هل مقتنع بالتعديل الدستور او لاء مستخدما لذلك عقله فى التميز

ولكن اليى حصل مش كده تيجى ناس تقولك صوت بنعم طيب ياعم مافيش اى مشاكل انا مستعد اقول نعم بس اقنعنى اقول نعم ليه ؟

تلاقيه جايبلك فتوى من الشيخ فلانى الفلانى ربنا يزود كرشه كمان وكمان بيقول فيها ان التصويت على التعديلات الدستوريه بنعم واجب شرعى نعم !!!!!!!يا روح ماما

معلش يعنى مهو لازم الواحد بعد لما يسمع الكلام ده يهرتل يعنى

يعنى ايه واجب شرعى يعنى انا لو صوت بلا حرام عليا هدخل جهنم ؟طيب ليه ؟

وانتوا كنتوا فين اساسا ايام مبارك مكنش حد فيكم بيقول لا واجب شرعى ولا نيله كنتوا بتسحبوا بحمده وتشكروا كثيراً على نعمة الامن والامان ؟

من اقذر الطرق استعمال الدين كسيف لاخماد الناس ؟

من حق كل انسان ان يدعو الى رايه زى ما هو عاوز ولكن ان تعين نفسك وصى على الناس من خلال الدين وتقول ان الموافقه على التعديل الدستورى واجب شرعى يبقى كلام هرتله اقنع الناس بواحد اتنين تلاته لان اليى هيقول لاء خايف على البلد واليى هيقول نعم ايضاً خايف على البلد

ياريت بلاش تلبس رأيك الشخصى لابس الدين لان مافيش اسهل من ده

انت هتصوت بنعم علشان خايف من احتمالات ممكن تحدث وانا هصوت بلاء علشان خايف ايضاً من احتمالات ممكن تحدث اذا رأينا احنا الاتنين مبنى على احتمالات ليه بقى اخدت الدين فى احتمالك وخدتش الدين فى احتمالى

ياريت الناس ترحمنا شويه علشان قرفنا بجد من الاسلوب العقيم ده

بطلوا بقى استخدام سلطان الدين وخلى الناس تختار اليى هى مقتنعه به طالما الموضوع كله مبنى على احتمالات ومفيهوش اى مخالفه شرعيه

وحسبى الله ونعم الوكيل

ومش عاجبنى

عنب

[م تيمور المراغي]

[لماضة مصرية جدا]

ريهام يا بنتي

نرمين يا اختي

تفضلي دي

مش عارفة....ده اهداء لليوم المفتوح و لا ايه

طب بابا و ماما و خالتو و تيتة نزاكة اخبارهم ايه...(وش المذيعة و هي بتقول...تحبوا تسمعوا اغنية...يا ست انا عايز ابني)

صباح مصري اوي يا باشمهندس....

شكرا جدا ع الايقونة....(ايقونة واحدة مكسوفة و كده يعني)

بس بابا قالي متاخديش حاجة من حد...و متشربيش العصير اللي لونه اصفرا :P

سؤال علي هامش الاجرام و كده

دي مش مقال سعادتك....دي مداخلة لعنبوف....و المفروض بقي انك تروح تمسكه من ياقة الزوكتة و تقوله ارتجع يا عنبو....بدل ما انت بتكتب هنا و هونيك

و بمناسبة الايقونات و كده

اديله....الحتة دي

bsh:)

صباح حضرتك.....دعاء ان احنا نفضل متجمعين دااااااايما

[م تيمور المراغي]

آمين يا ,,

لماضة ;)

[عصام أبوالفتح]

مش تكرار لكن دى فضفضة

358 مغترب

من 27 دولة

معظمهم قالو لأ

على فكرة انا حطيت التصويت الالكترونى فى دماغى

تم تعديل 20 مارس 2011 بواسطة عصام أبوالفتح