أول لقاء لي مع الصندوق ...افرح يا قلبي

[سقراط المصري]

مش عايز أغسل صباعي.... عاوز ألفه بشاش زي عادل امام في فيلم الواد محروس بتاع الوزير

[masraweya]

بروفيسور سقراط

رحت وأدليت بصوتي في الاستفتاء لأول مره في حياتي

أصلا انا معملتش بطاقة انتخابية

أنا صوت بنعم......... هذا رايي وأنا حر فيه

ابن عمي كان معي وصوت بلا.......عادي

الناس كانت مبسوطه..... قمة الحيادية.....النساء كانوا عددهم يقارب عدد الرجال

كل الفئات العمرية والثقافية شوفتها

لا استطيع نهائياً توقع النتيجة........ النجاح او النتيجة هتكون 51% لنعم او لا

حيااااااااااااااد تام في اللجنة وقمة الاحترام

سقراط

[masraweya]

زهرة

لسه رجعه من الاستفتاء طوابير كبيره جدا بس الناس مبسوطه فيه ناس عارفه حتختار ايه سواء نعم او لا و فيه ناس بتسأل اختار ايه

و الشباب واقف ينظم المرور امام اللجان

حقيقى شعور جميل جدا

و اخترت لا

ربنا يحمى مصر

[أبو محمد]

أنا ما كنتش عاوز ادخل الموضوع ده .. لأن النهارده ما كانش أول لقاء لى مع الصندوق .. فقلت بلاش تتطفل على الجماعة اللى أول مرة يقابلوا سيادة الصندوق

بس بعد اللى شفته النهارده .. مش حقول إن ده كان أول لقاء لى مع الصندوق .. حقول

اليوم 19 مارس 2011 كان أول استفتاء أراه فى مصر

[عادل أبو عمر]

ألف مبروك يا دكتورة

كلامك حاسس منه كأنه فرح مش انتخابات ... بجد حق المصريين يفرحوا بيوم زي النهاردة

ربنا يكمل فرحتنا و يوفقنا لخير بلدنا و يعيد علينا نعمة الأمن

[masraweya]

حبيبتي الحالمة دريم

اهه.. المحاورات مليانة ناس ادلت بصوتها

انا شخصيا ده مش اول لقاء مع الصندوق

كنت عادة بروح حتى و انا عارفة ان النتيجة معروفة مسبقا

بس اول مرة اروح و انا عارفة انه هيتحسب بجد

هطمن أكثر لما اشوف الفرز و التجميع

بس الاقبال الجميل من الناس .. و اغلبهم واخد قراره و كل واحد معتز بنفسه و بصوته

يا رب .. احمِ مصر و اصلح حالنا

يا رب ول أمورنا خيارنا

[masraweya]

التونسي

شاركت والحمد لله .. المشاركه من قبل الناس كانت فوق المتوقع .. عملت استطلاع عشوائى لعشر اشخاص .. سبعه قالوا نعم وتلاته قالوا لا

على فكره انا وصلت لقناعه ان نعم او لا مش فارقه كتير .. والدليل هو تقارب الاراء .. وان شاء الله كده او كده خير .. ولن تجتمع امتنا على باطل باذن الله

اتنين من صحابى كانوا مقتنعين جدا ب لا رغم انهم تقدر تقول عليهم من زمرة السلفيين ... لكن فوجئت بهم بيغيروا رايهم الى نعم بعد ان نما الى علمهم حشد الكنيسه للاقباط انهم يصوتوا ب لا .. ووصفوا هذا بانه طائفيه .. وبتدخل للدين فى التوجيه السياسى للناس ... ومن هذا المنطلق غيروا رايهم .. اكيد ده له دلاله لكل لبيب

[Dreamwithme]

أخواني أخواتي .....في هذا اليوم التاريخي أحب أشكركم من كل قلبي لكل اللي شاركنا فرحته

خايفة أذكر اسم وانسي اسم حد يزعل بس كل الكلام ودش المشاعر كان جميييييييييييييييييييييييل وفوق الوصف

حبيبتي مصراوية مش عارفة أشكرك أزاي إنك جمعتي لنا كل المشاركات دي ونقلتيها لنا مخصوص هنا

أنا أول ما دخلت المحاورات النهاردة أعتقدت إن موضوع متابعة الاستفتاء خاص بمتابعة الأخبار

وبصراحة انكسفت أحط مشاركتي فيه لأنها مش خبر هو يمكن يكون كلام مش منمق ومرتب بس مشاعر في قلبي وحبيت أصرخ بها بعلو صوتي

معاكم لأني بجد بحبكم كلكم قوي قوي أنا كتبت مشاركتي هنا قبل ما اكتب أي حاجة علي الفايسبوك أو تويتر حيث يسكن أصدقائي من العالم الواقعي

وبالرغم من إني مدمنة للفايسبوك وتويتر إلا أني حسيت إن أول ناس عايز أشاركهم فرحتي وهبلي وأنا فرحانة ومزقططة هم أهل المحاورات لأنهم بجد بيحتلوا جزء كبير من قلبي

بالنسبة لسؤال فتفوتة علي موضوع الصورة وإحنا فين في الصورة أنا طبعا اتصورت مع صباعي لأنها لحظة تاريخية يا جماعة

بس حاولت جاهدة أني أخلي الصورة بتاعتي تبقي أنجلينا جولي أو ديمي مور الفوتوشوب طلع يجري وهرب من الكمبيوتر خالص وعمل ثورة

وطبعا حفاظا علي مشاعركم ياجماعة وعلي صورتي في أذهانكم مقدرش خالص أحط صورتي ممكن أحط صورة الصوباع لوحده

تصدقي يافتفوتة أني اتصورت أنا وماما مع بعض بصوابعنا ومع علم مصر وأخي العزيز الرزل رفض يتصور وحسسني أني انسانة تافهه (أنا أكبر منه ب7 سنين)

أستاذي الفاضل جدا أبو محمد لو أعرف أن عنوان الموضوع هيمنع مشاركة حضرتك كنت خليته أنا والصندوق وبس وماكنتش كتبت أول لقاء دي

أنا استمتعت جدا بالحوار مع حضرتك في موضوع مناقشة التعديلات وفهمتني حاجات مكنتش فاهمها وأنا سعيدة إن حضرتك شايف النهاردة يوم استثنائي بالرغم من أنه مكنش أول لقاء مع الصندوق

بصوا يا جماعة مع ختام اليوم وخلاص اللجان اتقفلت والفرز بدء عايزين إحنا كمان نعمل حاجة لطيفة جدا

ننسي كل واحد كان مؤيد لإيه ونفكر هنبني مصر بكرة إزاي؟ أيا كانت النتيجة اللي كان مغير صورة البروفايل بتاعته هنا أو في الفيسبوك لنعم أو لا

يشيلها بقي ونرجع لصورنا أو لعلم مصر وهنا في المحاورات اللي كان حاطط في توقيعه نعم أو لا للتعديلات خلاص مفيش داعي نتفرق

نشيلها خالص ونحط علم مصر ونفكر إننا كلنا نحلم ببكرة اللي أنا متأكدة أنه جميل

بالرغم من إن المؤشرات الأولية للاستفتاء بتقول إن النتيجة هتطلع عكس ما أنا صوت لكن هي دي الديمقراطية

وسواء اللي قال نعم أو اللي قال لا قالها من باب حب مصر وليس مصلحة شخصية

فهيا نبدء في الالتفات إلي الحب الحقيقي لمصر ونوحد صفوفنا تاني بعد ما اتقسمنا مع الثورة وضد الثورة ومع التعديلات وضد التعديلات

خلااااااااااااااااااااااااص إحنا مصرين والنهاردة أثبتنا ملكيتنا لهذا البلد فيلا نبني فيها ومش هنعرف نبني إلا وإحنا بنحب بعض

بحبكم كلكم

وختاما أحب أطلب منكم الفاتحة علي أرواح الشهداء ودعاء لأهلهم بالصبر

سألوا الشهيد توصينا بإيه قال ماتنسوش أنا مت ليه

http://www.youtube.com/watch?v=btXZMh5tHDA

تم تعديل 19 مارس 2011 بواسطة Dreamwithme

[الســـاري]

دريم وززززززززززز مي ..

يارب يسعد قلبك زي ما انتي دايما بتسعدينا

وان شاء الله دائما اشوفك مبسوطة ومزأقططة كده ..

مع اجمل امنياتي بان يصبح اصبعك بنفسجي دائما .. طالما هذه رغبتكم المشروعة

[fatfouta]

دريم وززززززززززز مي ..

يارب يسعد قلبك زي ما انتي دايما بتسعدينا

وان شاء الله دائما اشوفك مبسوطة ومزأقططة كده ..

مع اجمل امنياتي بان يصبح اصبعك بنفسجي دائما .. طالما هذه رغبتكم المشروعة

لا يا خووويا احنا الحبر بتاعنا بمبى بمبى

والشباب رافعين شعار....انا مش سلبى وصباعى بمبى

ماتيجوا نشوف

[Dreamwithme]

ماشي يا ساري متشكرين يا أفندم

وماله الصباع لما يبقي فوشيا ولا بمبي ؟! صدقني هتبقي موضة وقول دريم قالت لي

ومبرووووووووووووووووووووووووووووك لينا جميعا مصر رجعت حرة لينا ولما ترجع حرة ده مكسب للمصريين ولجميع العرب

وقالك أيه قال لك النهاردة أخيرا الختم اتنقل من علي قفانا إلي صباعنا

[Howayda Ismail]

صباح الخير والحرية والسعادة وكل حاجة حلوة .....النهاردة عيد ياجماعة

قعدت ألف في المحاورات مش عارفة أصرخ من الفرحة فين

والفرحة أكبر من أن تعبر عنها كلمات ....

حبيبتى دريم

احب اهديكى الاغنية اللى سمعتها اول مارجعت من اللجنة

http://www.youtube.com/watch?v=tvVe2hGGdgA&feature=related

[ذهبية]

صباح الخير عليكم كلكم بجد كان نفسى ادخل امبارح احكى فرحتى بمصر بس النت مكنش تمام

بجد بجد مصر كانت فى عيد امبارح

المنصورة عندى هنا كانت كرنفال بجد كل اسرة واخدها شبابها و بناتها وواقفين بالعربيات امام كل اللجان

والله العظيم لو شوفت حجم المشاركة و العدد و الطوابير لازم تبكى و جسمك تسرى فية رعشة غريبة فرحة غامرة

وكل كل شوية تردد دى مصر

الله عليكى يا مصر الله

روحت وقف فى طابور لا يقل طولة عن 600 متر فى حوش مدرسة كبير الطابور بيزيد كل شوية فى فرحة من كل الناس

الستات كلها بتدعى دعاء واحد

يارب يكون الثورة وشها خير على مصر

كل الناس بتدعى ربنا يحمى مصر

كل الستات و البنات واقفين يدعوا على النظام السابق و يقولوا منك الله كنت حرمنا من فرحتنا دى

الاحلى

ان فية ست بتكلم صحبتها و بتقولها خلينى اقف قدامك انا تعبت و الطابور طويل

قالت لااااااااااااا الزمن دة انتهى

احنا فى حرية و ديمقراطية

روحى اقفى و خدى صفك

كل واحد ياخد حقة انتى فاكرة اننا زى زمان

العدل و المساواة

وفعلا رجعت وقفت فى الطابور

بجد انا فرحانة جدااا

الاحلى فى الفلاحين و الله كل الناس

حتى المريض و العجوز و الله فى ناس متشالة على كراسى و مدخلها تصوت برايها

الكل بيقول دة حق الشهيد علينا

يارب كملها على خير يارب

يارب تفضلى يا مصر رافعة راسك

و نفضل كلنا نقول

ارفع راسك فوق انت مصرىىىى

[se_ Elsyed]

والدتي برضوا أول مره في حياتها تروح إستفتاء أو إنتخاب أو حتى تخرج للبيت عشسان تقضي مصلحة غير الخضار واللحمة والعيش

بالصدفة بقى والدتي مواليد 48 ... وإنتو عارفين الذكرى الأليمة دي ... لدرجة ساعات أنكشها واوقولها : يعني حبكت تيجي في السنة دي .. ما عندك سنين ربنا كتير ؟

المهم إنها عبرت مرحلة الإنكسار بعد أكثر من 60 عاماص .. ويوم ما خرجت من البيت كان يوم نصر لمصر وهو 19 مارس .....

أعتقد الست دي تستاهل هدية عيد الأُم بتاعت بُكره

برضوا هي قزازة الريحة الي مش عارف متعبية منين ... والمنديل القماش المصنوع من القطن طويل التيلة جيزة 90 .. وكل ده مربوط في بعضه ومتعود أشتريهم من السبعينات بـ 35 قرش ...

[لونا]

شكرًا يا دريم ..

( طريقة وصفك حسستني إني كنت معاكي .. ربنا يسعدك)

شكرًا يا هند

شكرًا يا مصراوية ..

( ضحكت من قلبي على موقف جوناثان اللي نقلتيه .. ربنا يفرح قلوب المصريين كلهم )

شكرًا يا أ/ أبو محمد

شكرًا يا فتفوتة ..

( مع إنك من المغتربين المغضوب عليهم .. بس ميرسي على النقل .. و المجهود الجبار اللي بتعمليه )

شكرًا يا أ/ سقراط المصري

شكرًا يا ذهبية

شكرًا يا engmido

أنا أصريت إني أكتب شكر لكل واحد بإسمه في التوبيك ده

لأني و أنا باقرأه ..

كان على وشي إبتسامة من الودن دي للودن دي

و كان جوايا إحساس جميل ..

خليط كدة من الفرحة و الفخر و العزة ..

و النصرة على رأي هند..

و شوية غيظ ..

إنه تم إستثنائي و المغتربين من الاستفتاء..

على كمية كبيرة جدًا تفاؤل ..

و الحمد لله رب العالمين

تم تعديل 20 مارس 2011 بواسطة لونا

[Dreamwithme]

أحب أكتب مشاركة قبل ظهور نتيجة الاستفتاء اللي بقيت حاسة إن بعض الناس واخداها ثانوية عامة

بصوا ياجماعة أنا قلت لأ لكن بالرغم من كده مجهزة نفسي أن لو النتيجة طلعت نعم هأكتئب شوية طبعا لأني مش ملاك

ولأني وده الأهم اتربيت 32 سنة أتعصب لرأيي ومحدش بيسمع رأيي ولا بيناقشني فيه فكنت هتعلم ديمقراطية فين

25 يناير مش سحر قلب من شعب عنده بعض المشاكل لشعب ملائكي

لكن الأكيد أني بعد ما اكتئب ساعة واحدة بس هأقوم وأشمر وأشتغل تاني

ماهي نعم أو لا هتوصلنا لمصر حرة الفارق كان الفترة الزمنية اللي هنأخدها والخطوات اللي هتتعمل مستقبلا

أهم حاجة عايزة أقولها إن إمبارح الشعب المصري نجح بجدارة في الامتحان

مكانش في تواجد أمني ملحوظ بالرغم من كده الناس نفسهم كانوا منظمين جدا بيحترموا بعض جدا وصدق أولا تصدق كانوا بيبتسموا في وجه بعض

في اللجنة بتاعتي جه شاب كان عايز يتخطي الطابور شباب تانيين جيران له كانوا في الطابور زعقوا له

وقالوا له تعالي هنا يابني .....بضحك.....ماهي الثورة قامت علشان أمثالك .....في طابور وهتحترمه وتقف فيه

الناس كانت بتوزع ماء وعصير وحلويات علي بعض

حتي المختلفين في الرأي كانوا مبتسمين في وجه بعض

فبصراحة أنا شايفة إن هذه هي أهم حاجة ......ياجماعة إحنا كان بيتقلنا وبيتقال عننا بره مصر

إننا شعب غير متحضر وهمجي ومعندوش أخلاق .....وإحنا صدقناهم وبدأنا نتصرف علي هذا الأساس

لكن في لحظة الحقيقة أهو طلع الناس من نفسها منظمة وعندها أخلاق

ودي مشاهدات شخصية من لجان أخري في مناطق شعبية جدا جدا وبالرغم من كده الناس فعلا في منتهي الأخلاق والتحضر

ومفيش ولد ضايق بنت والشباب الصغير محترمين الكبار

والباشا وقف في الطابور ورا بواب عمارته عادي يعني

يبقي تحيا مصر وتحيا المصرييين

http://www.youtube.com/watch?v=SFXgsP2rfew

[se_ Elsyed]

الناس كانت بتوزع ماء وعصير وحلويات علي بعض

بسسسسسسسسسسسسسسسسس

أومال فين الكنتاكي ؟

[Alattar]

الناس كانت بتوزع ماء وعصير وحلويات علي بعض

بسسسسسسسسسسسسسسسسس

أومال فين الكنتاكي ؟

عفوا

كنتاكي مش بتاع استفتاءات................كنتاكي بتاع ثورات

[Dreamwithme]

بالنوسبة للسادة المواطنين سي السيد والعطار (مع حفظ الألقاب)

أوعدكم أنا المواطنة دريم إن في الانتخابات الجاية ليكم عندي عزومة جامدة جدا جدا :closedeyes:

بالنسبة لموضوع كنتاكي يا جماعة أنا عندي سر خطير أنا ما بحبش كنتاكي :protest: ينفع كوك دور؟! أو بون أبيتي؟! :wub:

عموما أنا عند وعدي ......والله الموفق