يوميات مصرية فى سبع لجان انتخابية

[crossfield]

اليوم بدأ متأخر شوية على الساعة واحدة تقريباً نزلنا- انا و زوجى العزيز- لأقرب لجنة استفتاء و المفاجأة كانت كم البشر المهول اللى جاى يصوت و بالتالى الواحد قال ياخدها من قاصرها و يشوف مدرسة تانية فى حتة أهدى و فضلنا بعون الله من لجنة للجنة و من شارع لشارع لحد ما بقت الساعة 3 و نص و برضو مفيش أمل فى التصويت . المشكلة كانت فى الولا حبظلم ابنى اللى فرهد و استوى من الحر و اللف فى عز الشمس و فى عز الزحمة و بدون جدوى و بالتالى قررنا العودة للبيت و احنا محبطين. على الساعة5 قررت النزول تانى لوحدى و الزحمة تضاعفت . المهم يئست برضو و رجعت البيت...محدش يتريق علشان أنا باتخنق بصراحة من الطوابير و الانتظار عموماً و برضو رحعت البيت صفر اليدين . الساعة 9 الا ربع كانت آخر محاولة و دى كانت اللجنة الثامنة بعون الله و الله فعلاً لا يأس مع الحياة و المرة دى كنت انا و زوجى مش مصدقين نفسنالأن حوالى الساعة 8 و ربع عدينا على لجنتين قفلوا خلاص و مرضيوش يدخلوا حد و قالوا الورق خلص و التالتة دى بقى اللى ردت فينا الروح فى الوقت الضايع...الساعة كانت 9 الا ربع مساء و قدام المدرسة رايييييييييييق و الباب كان خلاص بيتقفل و واحد عسكرى ابن حلال تقولش قرا على وشنا اننا بنشحت لجنة شاور لنا يالا بسرعة 10 دقايق و هنقفل و طيرااااااااااااان هجمنا على اللجنة و صوتنا و بصمت بصوابعى الاتنين فى الحبر الفسفورى و انا مش مصدقة نفسى .....أخيرا

المهم فى ده كله بعض الملحوظات اللى هاقولها لحضراتكم و هاسيبلكم التعليق:مً

ناس كتيرة واقفة قدام اللجان و لسه مش عارفة هتدخل تقول آه أو لأ

ناس كتير سألتهم هتقولوا ايه؟ و ليه؟؟ و الرد كان آه طبعأ علشان آه ليها مستقبل لكن لا ملهاش مستقبل... و الحمد لله ان محدش قاللى علشان اللى هيقول لأ هيخش النار- لأن انا بصراحة من اللى هيدخلوا النار

ناس داخل مدرسة من المدارس كانوا بيسألوا بعض قولتوا ايه و لو حد قال أنا قلت لأ كان بيتشتم من اصحابه أو معارفه و يتقال عليه يهودى

ناس كتير زى حالاتنا زهقوا م الانتظار و الله أعلم يا روحوا و باعوا القضية يا صمدوا و راحوا على أماكن تانية

نسبة المشاركة من السيدات كانت عالية جدا

قعدت ابص فى آخر اليوم بلؤم كده على ايدين الناس فى الشارع و فى السوبر ماركت و خلافه وادور على أى أثر للحبر الفوسفورى... فيه ناس كتيرة جداً ما راحتش الاستفتاء

الشرطة و الناس الموجودة داخل اللجنة كانوا فى منتهى الذوق و التعاون و الحياد...امسك الخشب احسن الشرطة تتحسد

ً

ً

تم تعديل 20 مارس 2011 بواسطة crossfield

[se_ Elsyed]

إنتي من الأحرار يا كروسايه

و فضلنا بعون الله من لجنة للجنة و من شارع لشارع

مش عارف ليه كنت متوقع تكملي وتقولي : زنجا زنجا .. حاره حاره

بس برافو عليكي .. ويارب نبارك لك يوم الليلة الكبيرة بتاعت إنتخاب الريس ...

بس تكون الإنتخابات ساعتها توماتيكي توماتيكي

يعني وانتي قاعدة قدام جهازك الحديث البنيتوم فور ... تطلع لك صفحة جوجل .... تعملي شيرش على " إنتخابات مصر دوت كوم " وتطلع لك شوية صور للمرشحين كلهم

ولكي مُطلق الحرية تختاري مين .. واخده بالك ...

وتسيبي مين

[crossfield]

ماشى يا عم سين سين اتريق يا اخويا اتريق ما انت قاعد حاطط رجل على رجل طبعاً و لا حفيت و رجلك شققت من اللف على اللجان و مش بعيد تكون بتدعى لمبارك اللى ريح المغتربين من المسئولية دى

بس مين قال لك انى صوت فى زنجة؟؟؟؟؟؟؟

أهو ده عيب الديموقراطية مفيش حاجة بتستخبى