لماذا لم يعبر تصويت محاورات المصريين عن رأى شعب مصر؟؟

[التونسى]

جاءت نتيجة التصويت على إستفتاء التعديلات الدستوريه الذى انتهى الى غالبية نعم ..مخالفه لنتيجة تصويت الاستفتاء بمحاورات المصريين الذى انتهى الى غالبية لا .. رغم انها تجمع نخبة متميزه من المثقفين والمتعلمين وذوى الرؤى الثاقبه

سؤالان قادمان قد يكونا صادمان .. ولكن ارجو ان تسامحونى .. من منطلق الشفافيه والمكاشفه والمصارحه

لماذا لم يعبر تصويت محاورات المصريين الالكترونى عن رأى شعب مصر الواقعى؟؟

هل صدق نظيف وعمر سليمان..باننا لم ننضج ديموقراطيا بعد؟؟

[ComingSoon]

تحليلي الشحصي وقد اصيب او اخطأ

اعتقد السبب ان نسبة كبيرة من اعضاء المحاورات مغتربين يتلقون معلوماتهم فقط من الاعلام والصحف والاثنين كانوا مع التصويت بـ (لا)

ثانياً نسبة من الذين كانوا ينون التصويت بـ (لا) عندما ذهبوا بأنفسهم وجدوا بعض القوي حشدت ناس بطريقة مستفزة وكأنها معركة حياة او موت

ففهموا بوعيهم البسيط الصادق مالم يفهمه المثقفين!

فلا كانت كارثة ليست بسبب (لا) في حد ذاتها لكن بسبب من يقف وراء الـ (لا) ومن كان سيدعي النصر لنفسه

ثالثاً المثقفين في مصر لاعلاقة لهم بالشارع ولاعلاقة للشارع بهم اصلاُ

[سقراط المصري]

سؤالك في الجون.... أحب الأسئلة اللي من النوع ده وتفسيري هو:

في مصر على الواقع:

1- الكل شارك في الانتخابات (مسلم مسيحي اخواني عادي مثقف غيرمتعلم....).... وده بنقول عليه عينه غير متجانسة (أي ليست محصورة في عمر معين او ثقافة او بعد مكاني وهكذا)

2- لو سنك كان تقريباً من 19 وحتى 29 فغالباً كان التصويت بلا

3- فئة العمر 29-39 لو صاحب عمل حرفي او خاص ومتزوج غالباً صوت بنعم اما لو كان شغال في الحكومة او غير متزوج فغالباً اختار لا

4- من سن 40 وحتى 60 لو ذكر فغالباً بنعم سواء متزوج او غير، حكومي او خاص....... لو انثى 60% قالوا نعم

5- 60 فيما فوق وبيصرف معاش يادوب يكفي........ نعم.......... اما المرتاح نوعاً ما مادياً ......... فلا

................. ماسبق مجرد تحليل وقد اكون خاطئاً جزئياً او حتى كلياً

اما في المحاورات:

1- معظم المتحاورين ينطبق عليهم وصف العينة المتجانسة (مشتركين معظمهم في الغربة..... ذو ثقافة.... بيعرفو إنترنت ودي متغير مهم..... لديهم وقت كبيييييييير للقراءة والفهم....... )

2- والتجانس ده بيخليه عنده وقت عشان يقرر ويقول.................. لا

تطبيق عملي:

أنا اتغربت وعارف شعور الغربة..... لو كنت لسه بره مصر كنت هقول ....لا

اما الان انا صوت بنعم...... بالرغم من عدم افتناعي التام بها

تحياتي

سقراط

[رضوي]

تحيتي يافندم علي طرحك السؤال القيم دة ؟؟؟

اعتقد ان اجابة السؤال دة بمنتهي البساطة ........ ان فكر اعضاء المحاورات من المثقفين اللي صعب السيطرة علي قنعاتهم وايدولوجياتهم

لكن الناس حارج المحاورات مش كلهم مثقين ........ مابقولش ان كل المصريين مغيبين ....... بس فيه ماس كتيرة شاركت كانت متأثرة بأراء ناس معينة

لسة النهاردة كنت بتكلم مع اصدقاء ليا ........ زاكتشفت ان احد الزملاء صوت بنعم علشان الشيخ محمد حسان قال انه هيصوت بنعم

مع احترامي الشديد جدا للشيخ محمد حسان ......... بس انا لو عيانة والدكتور قالي لازم تعملي عملية جراحية مش هروح أسأل عالم دين ؟؟؟؟؟؟

وانا لما صوت بلا ماصوتش علشان حد انا مقتنعة بيه وبأراءه قال لأ

بس للاسف فيه ناس كتير عملت كدة ......... ناس قالت لأ علشان عمرو خالد او احمد حلمي او عمرو موسى او البرادعي ......... او او او

وناس صوتت بلأ علشان فلان وفلان وفلان .......الخ

وناس كان صوتها نابع من خوفها علي او من المادة التانية

وناس حالها وقف وعايزة البلد تمشي بأي شكل وخلاص

وناس مش فاهمة ايه المقصود من التعديلات

وناس بتبص تحت رجليها

وناس

وناس

وناس

وكل يبكي علي ليلاه

بس خلاص

[مسافر]

كثير من كبار السن

عاشو ثورة يوليو

وفقدوا الامل بعدها

خافوا من رجوع الجيش للحكم

قالو نعم لعودة الجيش

[Om Zayd]

ممكن اضيف سؤال كمان

نسبة المشاركة في الواقع اكثر بكثيييييييييييييييير من المشاركة هنا

ليه؟

68 عضو فقط صوتوا

مش عارفة الباقي ما صوتوش ليه

[مغتربة]

ممكن اضيف سؤال كمان

نسبة المشاركة في الواقع اكثر بكثيييييييييييييييير من المشاركة هنا

ليه؟

68 عضو فقط صوتوا

مش عارفة الباقي ما صوتوش ليه

لان اغلبيه الاعضاء فى المنتدى من المغتربيين يا ام زيد

لذلك لم يتمكنوا من المشاركه الفعليه رغم تصويتهم هنا

[مغتربة]

بالنسبه لاجابه السؤال استاذ تونسى

فانا اتفق مع ما قاله الفاضل سقراط

العينه هنا فى محاورات المصريين ليست عينه ممثله للواقع المصرى ككل لعوامل مختلفه و بالتالى كان من الطبيعى ان تختلف النتائج ما بينهما

تحياتى

[عصام أبوالفتح]

دى نتيجة تصويت استفتاء المغتربين فى حملة المصريين المغتربين للمطالبة بحقوقهم السياسية على الفيسبوك

ولا تعليق

[Mohammad Abouzied]

نسبة الحضور كان 41% يعني اكثر من لهم حق التصويت لم يذهبو وقاطعو الانتخابات بالاضافة الى الحشد الديني الذي ظهر تماما في المناطق الشعبية والقرى والنجوع الداخلية

ولاحظ اختلاف النتيجة في الاسكندرية مثلا

بالاضافة انا فيه فئة كثيرة حياتها وعملها مرتبط بالاستقرار وعوزين يخلصو مثل العاملين في السياحة تقريبا بيتهم اتخرب من التوقف عن العمل

بالاضافة يوم السبت كان قبله الجمعة وما بالك من خطب الجمعة والافتاء فيها بشرعية التصويت بنعم

ثم اكثر من نصف شعب لا يعرف الفيس بوك ولا النت ولا حتى محاورات المصريين

[محمد عبدالعزيز]

أعتقد لأن أغلب اللى صوتوا فى الاستفتاء الحقيقى, لا يدخلون على الإنترنت.

[باهى الطائر الحزين]

اذا كنا ندعى الديمقراطيه

فعلينا تقبل النتيجه ايا كانت

ولو ان الاستفتاء جاء فى ظروف غير ملاءمه

لكل ما سبق وتفضل بإيضاحه المحترمين عاليه.

لينا رب

[Om Zayd]

نقاط سريعة

This topic has been visited by 124 user(s)

من صوت منهم 68

بنسبة 54.8 %

مش فارقة كثير عن النسبة على ارض الواقع

مع الفارق ان التصويت هنا في المحاورات مكنش محنتاج لف على اللجان و لا وقفة في الطابور زي ما حصل مع اغلبنا

و لا حتى انه ينزل مصر مخصوص

كثير من اللي ما شاركوش بين امرين

اما لم يستطيعوا حسم أمرهم

او راحوا لقوا زحمة و معندهمش وقت يستنوا و يلفوا على اللجان

نيجي بقى لموضوع التجييش من الجوامع

يا ريت ما نديهوش اكبر من حجمه

شيوخ كثير قالوا انهم بيقفضلوا التصويت بنعم

لكن ما قالوش ان اللي يقول لا "ّهيروح النار

يا ريت ما نكررش كلام الحكومات السابقة ان الشعب المصري غير جاهز للديموقراطية

في البيت الواحد ناس اختارت نعم و ناس لا

و التنين هدفهم حماية مصر و عمل دستور جديد

فرق بين مناقشة دستور جديد حيث الشرعية للمديدان و التظاهر

و بين مناقشتها في برلمان منتخب

[التونسى]

أشكر الاخوة والاخوات الاعزاء الذين واللائى أثروا الموضوع باجابتهم المفندة الشافية الشبه وافيه عن السؤال الاول :give_rose:

ولكن لماذا تحاشى الجميع الاجابة على السؤال الثانى:protest: الذى أطرحه ثانية.. ملتمسا فكركم المستنير وجراءتكم المعهوده:wub:

هل صدق نظيف وعمر سليمان عندما قالوا بان المصريين لم ينضجوا ديموقراطيا بعد؟:unsure:

ملحوظه: لن أرضى بأى اجابات دبلوماسيه تتوخى الحذر او تؤثر السلامه:)

[مغتربة]

هل صدق نظيف وعمر سليمان عندما قالوا بان المصريين لم ينضجوا ديموقراطيا بعد؟

ملحوظه: لن أرضى بأى اجابات دبلوماسيه تتوخى الحذر او تؤثر السلامه

ليه بس يا استاذ التونسى الاحراج دا ما الديبلوماسيه حلوه برضه :wub: :wub:

طيب لو عايزين نتكلم بجد الكلام فيه شيىء من الصحه مش هنقدر ننكر بالطبع ليس كل المصريين لكن فى قطاع منهم

لكن انا شايفه فى سياقها الزمنى و الحدثى الى اتقالت فيه انها كانت كلمه حق نسبيا اريد بها باطل

لان حتى ان كانت هناك شرائح غير ناضجه ديموقراطيا بعد فدا كان نتاج التغييب السياسى المنظم الى كان النظام بيمارسوا بالقوه على الناس و بالتالى فان علاج المشكله دى لن يكون ابدا بزياده اقصاؤهم او استبعادهم بحجه عدم نضوجهم و لكن باخراطهم فى العمل الديموقراطى لان الممارسه الفعليه للديموقراطيه هى الكفيله بانضاجهم فيها

الديموقراطيه لا يطلح ان تعلم نظرى ليتشربها الانسان لكن يجب ان يخوض غمارها بنفسه و حتى و ان حدثت اخطاء فى البدايه فهى تصحح نفسها بنفسها على طول الطريق

باختصار حتى و ان كان هناك عدم نضوج معالجته بالاغماس و ليس الاقصاء

تحياتى

[fatfouta]

بص يا تونسى يا خويا انا هقول وأجرى على الله

بالنسبة للاخ عمر سليمان ونظيف وان المصريين لسه مش مستعدين للديمقراطية وبمنتهى الصدق بقول....احنا فعلا ماكناش نعرف الديمقراطية بقالنا 60 سنة كشعب مش بنتعامل بمديمقراطية

وبنسمعها كلمه بس كده بتعدى علينا....لكن اللى شوفته امبارح ده فى الاستفتاء من :

اقبال الشعب على اللجان الانتخابية

الطوابير الطويلة جدااااا

اى مسئول ييجى يحاول يخترق الصف يرجعوه ورا

كبار السن اللى نزلوا عشان حاسوا بقيمة صوتهم

الشعب اللى عرف ان مصر امانه فى ايديه

بعد ده كله احب اقولك اننا الديمقراطية كانت جوانا بس كانت خايفة ومن يوم 25 يناير كسرنا الخوف ونفضنا التراب عن الديمقراطية ونزلنا نعطى مصر حقها فى اصواتنا

يبقى فلتذهب كلمات عمر سليمان الى الجحيم ونضعها احنا فى الاجندة بتاعتنا عشان ماننساش وتفضل ادامنا ونحاول نقوى الديمقراطية عندنا اكتر وتحفزنا اكتر واكتر

اما عن سؤالك عن المحاورات هقولك وبمنتهى الصراحة

محاورات المصريين" هي صالون سياسى ثقافى إجتماعى يجمع المصريين للحوار الراقى حول شئون مصر و المصريين

:clappingrose:

[التونسى]

هل صدق نظيف وعمر سليمان عندما قالوا بان المصريين لم ينضجوا ديموقراطيا بعد؟

ملحوظه: لن أرضى بأى اجابات دبلوماسيه تتوخى الحذر او تؤثر السلامه

لو عايزين نتكلم بجد الكلام فيه شيىء من الصحه مش هنقدر ننكر بالطبع ليس كل المصريين لكن فى قطاع منهم

الديموقراطيه لا يصلح ان تُعَلَم نظرى ليتشربها الانسان لكن يجب ان يخوض غمارها بنفسه و حتى و ان حدثت اخطاء فى البدايه فهى تصحح نفسها بنفسها على طول الطريق

باختصار حتى و ان كان هناك عدم نضوج معالجته بالاغماس و ليس الاقصاء

تحياتى

وانا أضيف على كلامك القيم والواقعى ان هذا القطاع((الغير ناضج سياسيا )) كبير جدا ومؤثر .. وهو من رجح كفة الاستفتاء لتكون بــ نعم

ومعكى قلبا وقالبا بان عدم النضوج هذا ليس سببا للاقصاء .. ولكن فى نفس الوقت علينا ان ننتبه ونعى ونتفهم بان ذلك الاستفتاء وما سيتبعه من انتخابات قريبه هو بمثابة تجارب عمليه لممارسة الديموقراطيه .. قد تخطئ كثيرا وتصيب قليلا .. ولكنها يجب ان تلقى قبولنا واحترامنا مهما كانت

شكرا لمداخلتك القيمه

تم تعديل 21 مارس 2011 بواسطة التونسى

[شرف الدين]

شوف يا أخ تونسي

في فارق بين اني اقول ان الشعب المصري لم ينضح ديمقراطيا بعد ... يعني أقرر الحقيقة دي .. عشان أغيرها

وبين إني أقول أنه لم ينضج ديمقراطيا بعد .. عشان أبرر لنفسي الديكتاتورية اللي بحكم بيها ..

وأنا قلتها من قبل ... تعلم الديمقراطية يشبه تعلم المشي

لما الطفل بيبتدي يمشي غالبا بيقع

هل معنى ده اني امنعه من المشي عشان ما يقعش ؟

لا طبعا هخليه يمشي بس هاخد بالي منه ...

لو النظام السابق كان جاد فعلا في محاولة نشر ثقافة الديمقراطية ... كان بدأ بعمل انتخابات حرة في الدوائر السياسية السفلى

زي انتخابات المحليات مثلا ...

انتخابات اتحاد الطلاب مثلا

دي انتخابات مش هتأثر على مصير البلد في حاجة ...

ممكن لو عايزين نعلم الناس الديمقراطية صح ... كنا نبدأ بيها ...

مرة والتانية الناس هتبتدي تعرف على أي أساس تختار

ومين هو الأصلح ...

وشوية شوية نرتقي لحد ما تبقى في نتخابات حرة لمجلس الشورى

وبعدها بشوية انتخابات مجلس الشعب

ثم الرئاسة

وهكذا ...

لكن النظام القديم لأنه لا يؤمن أصلا بالديمقراطية كان بيزور كل الانتخابات

لأنه نظام ديكتاتوري لا يؤمن إلا باحتكار الحكم

والديكتاتوريين هما أعدى أعداء الديمقراطية...

مفيش شعب من شعوب العالم تعلم الديمقراطية مرة واحدة يا تونسي.

التعلم دايما بييجي بالخطأ.

اغلط ومن ثم اتعلم من غلطي

وللعلم كتير من الشعب المصري كان مرتاح للحكم الديكتاتوري

لأن الحكم الديكتاتوري بيشيل عن كاهل الشعب مسؤولية التفكير في مصير البلاد

فالناس تريح نفسها وتقولك احنا مالنا ... دي بلدهم هما ...

يعني باختصار الرضا بالحكم الديكتاتوري هو حيلة نفسية للتهرب من مسؤولية المشاركة في مصير البلاد ...

لأن فعلا دي مسؤولية .. مسؤولية كبيرة جدا

أنا اعرف ناس قبل ما يروحوا الاستفتاء ... صلوا صلاة استخارة

جميع شعوب الأرض يمكن أن تعيش في شورى و ديمقراطية

فقط

إذا الشعب يوما أراد الحياة

تم تعديل 21 مارس 2011 بواسطة شرف الدين

[ComingSoon]

هل صدق نظيف وعمر سليمان عندما قالوا بان المصريين لم ينضجوا ديموقراطيا بعد؟

ملحوظه: لن أرضى بأى اجابات دبلوماسيه تتوخى الحذر او تؤثر السلامه

لو عايزين نتكلم بجد الكلام فيه شيىء من الصحه مش هنقدر ننكر بالطبع ليس كل المصريين لكن فى قطاع منهم

الديموقراطيه لا يصلح ان تُعَلَم نظرى ليتشربها الانسان لكن يجب ان يخوض غمارها بنفسه و حتى و ان حدثت اخطاء فى البدايه فهى تصحح نفسها بنفسها على طول الطريق

باختصار حتى و ان كان هناك عدم نضوج معالجته بالاغماس و ليس الاقصاء

تحياتى

وانا أضيف على كلامك القيم والواقعى ان هذا القطاع((الغير ناضج سياسيا )) كبير جدا ومؤثر .. وهو من رجح كفة الاستفتاء لتكون بــ نعم

ومعكى قلبا وقالبا بان عدم النضوج هذا ليس سببا للاقصاء .. ولكن فى نفس الوقت علينا ان ننتبه ونعى ونتفهم بان ذلك الاستفتاء وما سيتبعه من انتخابات قريبه هو بمثابة تجارب عمليه لممارسة الديموقراطيه .. قد تخطئ كثيرا وتصيب قليلا .. ولكنها يجب ان تلقى قبولنا واحترامنا مهما كانت

شكرا لمداخلتك القيمه

يااستاذ تونسي

ازاي بس تقول ان (الغير ناضج سياسيا) هما اللي رجحوا كفة نعم

ده في فرق بين نعم ولا عشره مليون صوت يعني لايوجد مقارنة اصلاً بين الكفتين ولايمكن لشخص ان يحكم علي 14 مليون شخص لم يعرفهم ولاعمره قابلهم بأنهم غير ناضجين سياسياً لمجرد انهم مختلفين معك في الرأي

بالاضافة ان فريق لا اصلاً نصفة علي الاقل مدفوع بدافع ديني وكثير منه من المذعورين من وصول الاسلاميين للحكم لا اكثر

يعني بتحليل بسيط تجد ان فريق (لا) علي الاقل 3/4 منه صوتوا لاسباب غير موضوعية او من (الغير ناضجين سياسياً) سواء من المدفوعين بدافع ديني او الخائفين من حكم الاخوان

تم تعديل 21 مارس 2011 بواسطة ComingSoon

[التونسى]

بص يا تونسى يا خويا انا هقول اللى شوفته امبارح ده فى الاستفتاء من :

اقبال الشعب على اللجان الانتخابية

الطوابير الطويلة جدااااا

اى مسئول ييجى يحاول يخترق الصف يرجعوه ورا

كبار السن اللى نزلوا عشان حاسوا بقيمة صوتهم

الشعب اللى عرف ان مصر امانه فى ايديه

اما عن سؤالك عن المحاورات هقولك وبمنتهى الصراحة

محاورات المصريين" هي صالون سياسى ثقافى إجتماعى يجمع المصريين للحوار الراقى حول شئون مصر و المصريين

:clappingrose:

نعم نجحنا بجدارة بشكل شبه إجماعى في ما قد أسميه ((أخلاقيات وأدبيات وشكليات الديموقراطيه)) النابع من ((عِرق)) الحضاره الذى يكمن فينا عندما تأتينا الفرصة لنبرزه .. ولكن كان تحفظى .. ولعله تحفظك انتى ايضا .. وتحفظ الكثيرون على المضمون وليس الشكل .. فالكثيرون ((على الطرفين مؤيد ورافض)) لم يدلى بصوته عن اقتناع .. بل عن طريق حشد ..وتوجيه ..وللاسف طائفيه .. وكان هؤلاء الكثيرين من لهم الغلبة فى التصويت

أما عن محاورات المصريين فهى غنية عن التعريف.. ولا يوفيها عندى أى بيان كى أصف مقدار تأثيرها الايجابى على تكوينى الانسانى.. منذ ان صرت أحد مريديها .. ولعله شعور كثيرين ..ممن يحملون مثلى نفس الفضل والعرفان ..لهذا المكان.. المتميز بكوكبة من الاعضاء ..المختلفين فى الوجهات السياسيه والايدلوجيه .. والمتفقين باذن الله ((الغالبية العظمى)) على حب مصر وتمنى الخير لها

مع خالص تقديرى لشخصك المجتهد الدؤوب