لماذا لم يعبر تصويت محاورات المصريين عن رأى شعب مصر؟؟

[عادل أبو عمر]

أستاذي الفاضل التونسي

شكرا على هذا الموضوع الجميل

رأيي ... نعم المصريون غير ناضجون سياسيا

وهذا ليس عيبا نخجل منه و لكن العيب أن نتجاهله أو نكابر

لسنا ناضجين سياسيا ... أيوة يا جماعة ماهو إزاي يعني هيكون المصريين ناضجين سياسيا بعد هذا العمر منذ ثورة يوليو المجيدة و اعتياد مؤشر لم تعرفه انتخابات الدنيا و هو الفوز بنسبة الـ 99.9 %

يعني إزاي ابنك تفضل مكسحه في البيت أكتر من خمسين سنة و فجأة تحطه على التراك و تمسك له ستوب ووتش وعينك على أرقام كارل لويس مثلا ..

إزاي فجأة رجل الشارع البسيط ( وهي ليست إهانة فأنا هذا الرجل ) فجأة أصبح مطلوبا منه أن يمارس التفكير السياسي ويكون ندا يحاجج المستشار طارق البشري و الدكتور أحمد كمال أبو المجد وغيرهما قامات قانونية كبيرة كان الجميع يستمع لها و يتغنى بها قبل أيام ... كيف يستطيع هذا الرجل البسيط ممارسة السياسة في نفس المكان مع مثل هذه الخبرات بدون إملاءات تملى عليه و أقول إملاءات لأنه بيتحدث بالزبد أو الخلاصة أو العناوين لأنه مستحيل أن يتعمق في تأصيل آرائه السياسية خلال هذه الفترة القصيرة فقط . حديثي عن نفسي عن الرجل البسيط و ليس عن أي من حضراتكم .

عدم النضوج واصل حتى لواضعي قواعد العملية السياسية من الخبراء المخلصين وهو ما اتضح في الاستعجال وعدم توقع رد الفعل وعدم القدره على توقع أعداد الناخبين وترتيب عدد أكبر من اللجان أو حتى مد فترة الاستفتاء ليومين و هو ماكان سيزيد من أعداد الناخبين و استمتاع المصريين بيوم آخر من هذا النصر لثورة 25 يناير.

حاجة أخيرة و عذرا للإطالة ... أنا مش فاهم ليه كل واحد بيقول أنا مش عاوز نعم و مش عايز لا و مش عايز إخوان و مش عايز سلفيين و مش عايز إسلام و مش عايز مسيحيين و مش عايز شيوعيين و مش عايز علمانيين و مش عايز حد يضايقني ...

طب مش دي في حد ذاتها ديكتاتورية على صغير .. أو ديكتاتورية مواطن لم ينضج سياسيا ؟؟؟

تم تعديل 21 مارس 2011 بواسطة عادل أبو عمر

[عبد الله غريب]

جاءت نتيجة التصويت على إستفتاء التعديلات الدستوريه الذى انتهى الى غالبية نعم ..مخالفه لنتيجة تصويت الاستفتاء بمحاورات المصريين الذى انتهى الى غالبية لا .. رغم انها تجمع نخبة متميزه من المثقفين والمتعلمين وذوى الرؤى الثاقبه

سؤالان قادمان قد يكونا صادمان .. ولكن ارجو ان تسامحونى .. من منطلق الشفافيه والمكاشفه والمصارحه

لماذا لم يعبر تصويت محاورات المصريين الالكترونى عن رأى شعب مصر الواقعى؟؟

هل صدق نظيف وعمر سليمان..باننا لم ننضج ديموقراطيا بعد؟؟

نتيجة الاستفتاء في المحاورات كانت الأغلبية من العدد القليل اللي صوت و يقدر بالعشرات مع "لا"

نتيجة الاستفتاء في مصر كانت الأغلبية من العدد الكبير اللي صوت و يقدر بالملاين مع "نعم"

السؤال التالي يحتاج لتوضيح من المقصود بكلمة "باننا"

هل صدق نظيف وعمر سليمان..باننا لم ننضج ديموقراطيا بعد؟؟

هل "باننا" في المحاورات التي صوتت لـ "لا"؟

هل "باننا" في مصر التي صوتت بـ "نعم"؟

عموماً مش فارقة لأن في كل الأحوال المفروض الفريق الذي لم ينل الأغلبية سواءً هنا في المحاورات، أو في مصر يرضى بحكم الأغلبية فيما يتعلق بالتعاون بينه و بين الفريق الآخر، بل المفروض عدم وضع فرق و تقسيم الشعب (في المحاورات و في مصر) إلى فريقين أصلاً، تخيل انت في فريق ، و أبوك أو أخوك في الفريق التاني علشان قولتوه غير بعض في الاستفتاء ، هل تتخيل إنك حتكون ضده و تعاديه !! طبعاً لأ ... نفس الكلام ينسحب على الشعب كله .. كل الشعب فريق واحد .. مش بالكلام لكن بالفعل .. بنفس منطق عدم إمكانية التفريق بينك و بين أخوك أو أبوك .. مفهومة طبعاً.

هي دي الديمقرطية،

أما بخصوص التساؤل : "هل صدق نظيف وعمر سليمان..باننا لم ننضج ديموقراطيا بعد؟؟"

فمش مهم صدقوا أو لأ .

ليه؟

لأنهم لما قالو كدا كانوا يقصدوا الإيحاء للعالم بإن الشعب المصري غير قادر على العمل الديمقراطي و تحمل مسؤليات الديمقراطية، علشان يثبتوا إن عدم منح الشعب حقوقه الديمقراطية ده من باب الحفاظ على مصلحته لأن الشعب مش عارف مصلحة نفسه،

طيب خلاص عرفنا غرضهم من التساؤل ده و بالتأكيد مش مهم نتعمق في تحليل أغراضهم من المقولة لأن هدفها وضح الأن، بس نيجي لتساؤل حضرتك بهل هما صدقوا في مقولتهم دي؟

طيب أسأل حضرتك هو أيه الغرض من سؤالك الأن عن هل الشعب لمصري نضج أم لا (ديمقراطياً) بعد أن صوت بـ "نعم" في مصر، و صوت بـ "لا" في المحاورات؟

كأنه نفس الكلام اللي هما قالوه على الشعب المصري .. بس في التوبيك داه الكلام مش محدد لانه لم يصرح هل فريق "نعم" هما الناضجين ديمقراطياً و عليه ففريق "لا" هما اللي لم ينضجوا ديمقراطياً،

أم أن فريق "لا" هم الناضجين ديمقراطياً و عليه ففريق "نعم" هما اللي غير ناضجين ديمقراطياً.

أنا شايف إن مش مفروض نوصف أي من الفريقين بأي صفة لا يرتضيها بسبب اختلافه في الراي مع الفريق الآخر .... هو داه النضج الديمقراطي ..

و مش حقعد أقول إن شعبنا ناضج ديمقراطياً و عارف مصلحة نفسه و و لكن حقول إن أول خطوة في النضج الديمقراطي هي أن نعي أننا لسنا وحدنا و أن هناك الآخر ، و أن رأي الآخر يجب أن يحترم بدون اتهام له بأنه لا يعرف مصلحته أو تلميح بأن اتخاذه لموقفه هذا او رأيه هذا كان لمصالح خاصة به دون النظر لمصالح الشعب.. كل هذه الاتهامات تنافي الديمقراطية .. لأن كل فريق شايف إن رأيه هو الأحق بالاتباع و إنه في مصلحة الشعب، فمش ممكن نجعل من أي فريق حكماً على الفريق الآخر (بأي منطق يعني) .. فالديمقراطية هي إطار يحكم العمل الجماعي بحيث لا يحدث بين أفراد الجماعة أي مشاحنات بسبب اختلاف آرائهم .. و على الجميع في النهاية الرضا بحكم الأغلبية .. غير كدا نبقى مش ناضجين ديمقراطياً، و نبقى رجعنا للماضي و أثبتنا إننا فعلاً معماناش حاجةً،

ما ينفعشي يتعمل استفتاء و بعده يطلع الفريق الذي لم ينل الأغلبية علشان ينعت الفريق التاني بضحالة الفكر أو بأي تهمة تانية !؟ دي هي اللي تبقى عدم نضج ديمقراطي و يبقى معملناش حاجة .. الديمقراطية إطار حكم يجب على الجميع أن يحترمه .. الجميع يرضى في النهاية بحكم الأغلبية دون تلميحات من فريق (لم ينل رأيه التأييد) ضد الفريق الآخر(الذي نال رأيه التأييد) .. كدا نبقى فعلاً متحملين لمسؤولية الديمقراطية .. و كدا المركب تمشي بالجميع .. و خلاف كدا .. تغرق بالجميع.

أول مبادئ الديمقراطية هو إن احنا نبقى عارفين إزاي نرضى بوجود الرأي الآخر دون إلصاق التهم به مثل تهمة عدم النضج الديمقراطي.

[مروان]

لان الواقع الحقيقي يختلف عن العالم الافتراضي وهو النت

لان الناس في مصر شايفة اكترمننا وعارفة مين عاوز نعم ومين عاوز لا

لانه مهما دخلنا ع النت وتواصلنا وكتبنا وعبرنا فلن نكون مثل من تحرك وشارك وراح وجه وشاف بعينيه

الحزب الوطني اللي كان بيقول نعم فجاة انقلب وحشد للا

وراح يدعو لها بهيستيرية مما جعل الناس تمشي عكسه

لان الصحف الاسرائيلية-وده اللي محيرني-نادت بلا

عموما الايام القادمة حبلى بالكثير

[fatfouta]

تسمحلى اقولكم ان حصل تزييف فى الاستفتاء وارجوكم قبل هجوم اى حد هاحاول انزل الفيديو اللى على اليوتيوب اللى بياكد كلامى

بس انا بقى اللى نفسى اسال سوال نسبة الاستفتاء ان 33% بس هما اللى قالوا لا يعنى 4 مليون هل ده يعقل

طب تعالوا نحسبها لو المسيحين زى ماكل الناس عارفه قالت لا ودول مش قليلين اوى يعدوا ال10 مليون لو قلنا 3 مليون بس منهم قالوا لا مافيش غير مليون بس من 80% مليون قالوا لا برضه انا مش عارفه انا بفكر معاكم

اما سوال الشعب غير مستعد للديموقراطيه فاللاسف جزء كبير جدا منه الغير متعلمين والبلطجيه والعمال البسطاء غير مستعدين للديموقراطيه حتى الان واتفرجوا للى حصل مع دكتور البرادعى هل الديموقراطيه تقول اننا نضرب واحد حتى لو مش متفقين معاه ولا الشعب المصرى الغلبان سهل يتشحن

ياريت اللى مايعجبوش كلامى يكتفى انه يدوس على علامة ناقص جنب موضوعى وساعتها هامتنع عن الكلام فى هذا التوبك مره اخرى

ايه الدليل الدامغ ان الفيديو ده حقيقى .. ولو حقيقى .. ايه يثبت انه تم فى الاستفتاء الحالى .. مش يمكن بتاع استفتاء 2007 :unsure:

نسبة اللى قالوا لا 22 %بس مش 33 % .. والاخوه الاقباط اللى من حقهم يصوتوا اللى فوق 18 سنه ..من العشره مليون ((على حد قولك )).. لو 3 مليون لهم الحق مش معقول كلهم حيروحوا ينتخبوا ..واكيد منهم ناس مغتربين خارج مصر يعنى .. وكمان مش كلهم قالوا لا يعنى ..رغم توجيه الكنائس ..

شكرا على تواجدك ومشاركتك bv:-

ويا ستى اهلا وسهلا بيكى فى التوبيك وفى اى توبيك :) .. والاختلاف فى الاستفتاء لا يفسد للوطن قضيه

الردعلى فيديو التزوير واذاى قدروا يلفقوا الفيديو...إسمعوا كويس

بس رأيى انا بقى ان ده محتمل وده محتمل برضو للاسف مش قادرة اعرف الحقيقة فين

http://www.youtube.com/watch?v=U_mfEswQAN8&feature=player_embedded

تم تعديل 21 مارس 2011 بواسطة fatfouta

[الغريب]

أسوأ دعاية لمن قالوا "لا" هى وصفهم لمن قالوا "نعم" بأنهم غير ناضجين سياسيا .. أو جهلة .. أو متخلفين ..

http://www.youtube.com/watch?v=fZDPBtH5aec&feature=player_embedded

وأسوأ دعاية لمن قالوا "نعم" هى اعتبارهم أن "كل" من قالوا "لا" هم إما فقاقيع من الشباب المغرور .. أو أنهم من فلول العلمانية والليبرالية واليساريين .. أو أنهم قطيع تسوقهم الكنيسة .. أو أنهم من أصحاب الجحيم المخالفين للشريعة الإسلامية

أنا أرفض منطق كل من يتهم أغلبية شعب مصر بالعبط والتخلف والانقياد وراء الإخوان أو السلفيين أو فلول الحزب الوطنى

يا عالم حرام عليكم .. مستكترين علينا الثقة فى النفس التى كانت مرسومة على الوجوه يوم الاستفتاء العظيم ؟ .. إنها وجوه الذين قالوا "نعم" ، والذين قالوا "لا" مدفوعين بالأمل وبحب الوطن ، المقبلين على التجربة الديموقراطية بحماس المحروم

للأمانة هذا رد من الأخ أركتكت

من اركتيكت :

محمد عادل قال بالحرف احترم كل من صوت بنعم او بلا

لكن لا احترم من قال لا او نعم (بغير فهم) الا الاسائة للطرف الاخر

والاسلام نفسه انتقد من يتصرف بغير علم ولا هدى ولا كتاب منير ,,

شرف الخصومة واخلاق الفرسان تحتم ان يترك للخصم حق الرد ,,

و من حق فريق المدرعات ان يرد على فريق المدرجات ,,

انتهى .

[president]

استاذ "تونسي"

ممكن تفهمنا ماذا يعني مصطلح (غير ناضجين سياسيا) من وجهة نظرك ؟

لأنني اشعر ان كل شخص يتكلم عنه بطريقة غير الاخر وكل منا يقصد به شئ مختلف

ببساطه .. ال ((غير ناضجين سياسيا)) هم من قاموا بالتصويت ((سواء بــ نعم أو لا)) من منطلق غير سياسى.. وعدم اقتناع كامل وواعى بالراى السياسى الذى قاموا بالتصويت له ..متأثرين بعوامل اخرى محيطه ..اجتماعيه ودينيه واقتصاديه ..وذلك بشكل بعيد كل البعد عن العامل السياسى.. ذو الاولويه فى الاختيار

أنفع منظر سياسى smk:

استاذ التونسى اختلف معك في هذا التعريف للنضج السياسى . فى رأيى لا يمكن فصل الرأى السياسى عن الظروف المحيطه به من ظروف اجتماعيه

أو اقتصاديه أو دينيه بمعنى لايوجد هناك رأى سياسى مجرد بمعزل عن الظروف المحيطه به .

لأننا لو اتخذنا هذا الأتجاه فستكون السياسه واحده على مستوى العالم !! وهذا غير منطقى بالمره .

فالعومل السابقه هى التى تحدد الراى السياسى والمطالبه بفصلها به نوع من النضج الغير سياسى .

السياسه في مفهومها العام على الأقل بالنسبه للدوله تراعى بين قرارات الدوله والصالح العام للدوله سواء صالح اجتماعى او دينى او اقتصادى .

لذلك عدم النضج السياسى هو مايجعلنى أتبنى رأى او قرار بغض النظر عن عواقبه الذى قد تضر بالمصالح الأقتصاديه اوالأجتماعيه مثلا .

ولذلك الفرق بين السياسى الناضج وغير الناضج - في رأيى – يتمثل في النتائج المترتبه نتيجة اتخاذ القرار وتأثيره على مصالح الدوله .

تلخيصا دعنى نرى تأثير نعم على مصر في مختلف النواحى لنحدد هل كان لدينا وعى سياسى ام لا .

اما الآن فمن الصعب ومن غير العدل ان نحكم على آراء بعدم نضجها دون انتظار النتائج الناتجه عن هذا الرأى .

تحياتى

[سكر]

الاخوة الاعضاء

انا ليا قراءة اخرى مختلفه خاصه بالنسب المعلنه

اذا كان هناك 60 % لم يشارك فى الاستفتاء اذا نحن مازلنافى مصطلح الاغلبيه الصامته

ويجب ان يكون السوال لماذا ؟

لماذا 60 % من المصريين لم يشاركوا الاستفتاء سواء بنعم او لا

هل بسب الزحمة ام عدم الاهتمام ام عدم توافر الاليه (المغتربين)

هذة النسبه وحدها كافيه بان تقلب اى نتيجة فى الانتخابات راسا على عقب سواء بنعم او لا

مما يوضح اهميه التصويت الالكترونى فى دوله مثل مصر

هذا اولا

ثانيا من ضمن عيوب الديمقراطيه

ان نسبه 51% هى النسبه الرابحة وان 49% هى الخاسرة (وهى ليست نسبه قليله)

ان صوت المواطن واحد مهما اختلفت الثقافه و الدرجة العلميه

[جويرية]

لأن معظم المنتدي ليبرالين و يساريين

وده طبعا غير معظم الشعب المصري

[Emy eldery]

انا مش داخله التوبك تانى اجادل لانى عارفه انى مش هاقنع الناس اللى بتحلم ان مصر بقت ديموقراطيه واتحررت ان حصل فيها تزوير لكن انا بالصدفه وقع تحت عينى الفيديو ده قلت اجيبهولكم يمكن حد فيكم يفكر بموضوعيه وحياديه بدون تشدد لعدم التزوير ويقولى ايه رايه وانا بقول انى بحترم اللى يقول الفيديو ده صحيح ولازم النائب العام يعرف وبحترم برضه اللى بيقول متفبرك رغم انه موكد جدا بالاختام والبراهين الكتير يعنى مش مكن يتفبرك واتمنى بجد ان دم الشهدا اللى نادت بالديموقراطيه مايروحش هدر ونفكر كويس قبل مانرد

رجاء شوفوا الفيديو كويس وادونى رايك وانا عارفه انى هنا بكلم فئه ناس متعلمه وفاهمه كويس ومفكره

http://www.youtube.com/watch?v=FWeGt-B1LZc

[التونسى]

انا مش داخله التوبك تانى اجادل لانى عارفه انى مش هاقنع الناس اللى بتحلم ان مصر بقت ديموقراطيه واتحررت ان حصل فيها تزوير لكن انا بالصدفه وقع تحت عينى الفيديو ده قلت اجيبهولكم يمكن حد فيكم يفكر بموضوعيه وحياديه بدون تشدد لعدم التزوير ويقولى ايه رايه وانا بقول انى بحترم اللى يقول الفيديو ده صحيح ولازم النائب العام يعرف وبحترم برضه اللى بيقول متفبرك رغم انه موكد جدا بالاختام والبراهين الكتير يعنى مش مكن يتفبرك واتمنى بجد ان دم الشهدا اللى نادت بالديموقراطيه مايروحش هدر ونفكر كويس قبل مانرد

رجاء شوفوا الفيديو كويس وادونى رايك وانا عارفه انى هنا بكلم فئه ناس متعلمه وفاهمه كويس ومفكره

http://www.youtube.c...h?v=FWeGt-B1LZc

أختى الفاضله .. الفيديو يبدو صحيحا .. ولكن لا يثبت اى تزوير من نوع ما .. ولكن له دلاله خطيره جدا من وجهة نظرى .. أخطر من فكرة التزوير .. أنه الاهمال.. الاهمال ..الاهمال .. كيف يقع فى يد العامه من الناس مثل تلك الكشوفات التى تحتوى على بيانات شخصيه.. وكذلك توقيعات شخصيه للقائمين بالاستفتاء .. انه انتهاك صاااااااااااااااااارخ لحرمة وخصوصيات الشعب .. ينم عن اهمال بشع وعوره كبيره .. بل وعار فى جبين من قاموا بتنظيم هذا الاستفتاء .. وعليهم تلافى هذا فى المستقبل القريب ابان الانتخابات البرلمانيه .. حتى لا يحدث ما لا يحمد عقباه

شكرا على الفيديو وان كان لدى تحفظات كبيره على تعليقك حوله

[ComingSoon]

رجاء شوفوا الفيديو كويس وادونى رايك وانا عارفه انى هنا بكلم فئه ناس متعلمه وفاهمه كويس ومفكره

الناس الفاهمة لازم تطرح اسئلة مش تصدق اي فديو لانعرف صاحبة ولانعرف دوافعة

1- الفديو لاعلاقة له بالتزوير اصلاً بل لو ثبت مافية فهو اهمال

2- لماذا لايذهب صاحب الفديو للنائب العام ان كان متأكد من الدليل

3- الفديو وضع علي النت بتاريخ 21/3 اي اليوم وبعد صدور النتائج والمفروض انه وجده يوم الاستفتاء 19/3 - فلماذا صاحب الفديو لم يضعة إلا بعد خروج النتائج ؟!!

4- طباعة مثل هذا الملف ليس بالامر الصعب بل يمكن لأي مطبعة عادية طباعة مثله

5- سرقة هذا الملف من الموظف امر محتمل في ظل وجود 60 الف لجنة فرعية علي مستوي الجمهورية

[جويرية]

انا مش داخله التوبك تانى اجادل لانى عارفه انى مش هاقنع الناس اللى بتحلم ان مصر بقت ديموقراطيه واتحررت ان حصل فيها تزوير لكن انا بالصدفه وقع تحت عينى الفيديو ده قلت اجيبهولكم يمكن حد فيكم يفكر بموضوعيه وحياديه بدون تشدد لعدم التزوير ويقولى ايه رايه وانا بقول انى بحترم اللى يقول الفيديو ده صحيح ولازم النائب العام يعرف وبحترم برضه اللى بيقول متفبرك رغم انه موكد جدا بالاختام والبراهين الكتير يعنى مش مكن يتفبرك واتمنى بجد ان دم الشهدا اللى نادت بالديموقراطيه مايروحش هدر ونفكر كويس قبل مانرد

رجاء شوفوا الفيديو كويس وادونى رايك وانا عارفه انى هنا بكلم فئه ناس متعلمه وفاهمه كويس ومفكره

http://www.youtube.com/watch?v=FWeGt-B1LZc

حتي لو فيه تزوير ، التزوير مش حيعمل فرق 54 % بي نعم ولا

[pink rose]

الفيديو دا شوفته و حطيته هنا في توبيك تاني

و قولت لو الكلام اللي فيه دا صحيح لازم يتقدم بيه بلاغ للنائب العام

بس برضو مش معنى ان حاجه زي دي حصلت انها ممكن تكون هاتقلب النتيجة

نااااااااااااااس كتيررررررررررررررر جدا فعلا صوتت بنعم للتعديلات

فا لو حصل تزوير او اهمال فا انا متأكدة ان النسبة بسيطة جدا ما تؤديش لقلب النتائج

و رأيي اننا دلوقتي ننسى الاستفتاء لانه خلاص واقع بالفعل و الشعب قال

نعم

يبقى دلوقتي بقى احنا نبص لقدام مش هانفضل طول عمرنا نبص لورا

اذا كان اصلا شباب الثورة نفسهم قالوا كده

الناس اللي كانت في التحرير و باقي المحافظات بين الحيا و الموت قالوا متقبلين النتيجة و هانغير مسار تفكيرنا و هانرتب على الواقع على الارض

و هو دا الصح من وجهة نظري

خلاص احنا بدأنا اولى خطوات الديموقراطية و لازم نلتزم بيها

كلنا دلوقتي

نعم

(سواء اللي قال نعم او لأ) كلنا نعم عشان مصر

[أبو محمد]

أسوأ دعاية لمن قالوا "لا" هى وصفهم لمن قالوا "نعم" بأنهم غير ناضجين سياسيا .. أو جهلة .. أو متخلفين ..

[

وأسوأ دعاية لمن قالوا "نعم" هى اعتبارهم أن "كل" من قالوا "لا" هم إما فقاقيع من الشباب المغرور .. أو أنهم من فلول العلمانية والليبرالية واليساريين .. أو أنهم قطيع تسوقهم الكنيسة .. أو أنهم من أصحاب الجحيم المخالفين للشريعة الإسلامية

أنا أرفض منطق كل من يتهم أغلبية شعب مصر بالعبط والتخلف والانقياد وراء الإخوان أو السلفيين أو فلول الحزب الوطنى

يا عالم حرام عليكم .. مستكترين علينا الثقة فى النفس التى كانت مرسومة على الوجوه يوم الاستفتاء العظيم ؟ .. إنها وجوه الذين قالوا "نعم" ، والذين قالوا "لا" مدفوعين بالأمل وبحب الوطن ، المقبلين على التجربة الديموقراطية بحماس المحروم

عن نفسى قمت بالتصويت ب نعــــــــــــــــــــــــــــــــــم .. ومع ذلك رأيى ((مع الاحترام لرأيكم)) أن كثيرين جدا لم يكن لديهم وعى سياسى ((من الجانبين)).. الى جانب الطائفيه التى ظهرت ((من الجانبين))

انا لم أتهم أغلبية شعب مصر بالعبط والتخلف والانقياد وراء الإخوان أو السلفيين أو فلول الحزب الوطنى:protest: .. بل اكررها .. هو شعب عظيم عظيم عظيم .. ما قلته فقط انه يفتقد الى النضوج السياسى ..أخمن أنك تقصد أحد غيرى اخى الفاضل ابو محمد

لاجدال ان يوم الاستفتاء كان عرس للحريه ومتنفس لها .. وسعدنا به جميعا واستبشرنا خير .. ((ومش مستكترين الفرحه دى علينا او على غيرنا)).. فقط .. نحاول تحليل المشهد بعد أن ذهبت السكره وجاءت الفكره:unsure:

مع خالص تقديرى لحضرتك

حاشا لله لا يمكن أن أقصدك بأى سوء يا أستاذ "تونسى" .. وأنا لا أقصد أى أحد بعينه .. ولو راجعت حضرتك مداخلتى ستجدنى قد قلت :

أنا أرفض منطق كل من يتهم أغلبية شعب مصر بالعبط والتخلف والانقياد وراء الإخوان أو السلفيين أو فلول الحزب الوطنى

فأنا كما ترى انتقد منطق "من قال" ، ولا أنتقد "من قال" .. وأنا أعرف أنك لم تتهم الشعب المصرى بالعبط أو بالتخلف أو .... ولا أستطيع أن أختلف معك فى انتشار عدم النضج السياسى .. ولكنه حقيقة يجب أن نتعامل معها لا أن نجلد أنفسنا بسببها

تحياتى لك ولقلمك المحترم

[شرف الدين]

تسمحولى اشارك معاكم فى هذا الحوار واللى دفعنى انى اكتب هنا لانى لقيت ناس كتير واعيه وفاهمه صح ومتحضره

انا مسيحيه تمام وقلت فى الاستفتاء لا مش عشان ناس كتير حواليا قالت لا ولا عشان ساويرس او البرادعى او عمر موسى او كتيييير قالوا برضه لا لكن عشان بعد 25 يناير كنت بحلم بمصر جديده وجميله بدستور جديد وشعب ديموقراطى جديد وحياه جديده بعيد عن خداع النظام اللى فات اللى ضحك علينا كلنا مسيحى مسلم ضحك بجد على كل المصريين كنت بحلم بديموقراطيه بجد بدون تزيف او خداع كنت بحلم انى ابطل احلم انى اهاجر بره لكن العكس ان اللى بره يحلم يهاجر لهنا

الأخت الفاضلة / EMY ELDERY

معلش آسف أنا اعترض ...

عذرا فأنا أحتج إذن انا موجود

ووجه احتجاجي على مداخلتك ... ليس بسبب الفيديو أو بسبب رأيك أنه قد حدث تزوير أو أو ..........

ولكن وجه اعتراضي هو تساؤل دار بخاطري

لماذا بدأت مشاركتك بالإشارة إلى هويتك الدينية ؟

إذا كنتِ تحلمين بالوطن الذي ذهبت للاستفتاء من أجله ...

فعليكِ أن تتركي الحديث عن هويتك الدينية عندما تناقشين المسائل السياسية.

لأن المسائل السياسية لا يهمنا فيها معرفة الهويات الدينية ... فكل من يحب مصر سيعمل لأجل مصر بغض النظر عن انتمائه الديني.

تقبلي تحياتي واحترامي وتقديري.

[Damo]

أسوأ دعاية لمن قالوا "لا" هى وصفهم لمن قالوا "نعم" بأنهم غير ناضجين سياسيا .. أو جهلة .. أو متخلفين ..

http://www.youtube.com/watch?v=fZDPBtH5aec&feature=player_embedded

وأسوأ دعاية لمن قالوا "نعم" هى اعتبارهم أن "كل" من قالوا "لا" هم إما فقاقيع من الشباب المغرور .. أو أنهم من فلول العلمانية والليبرالية واليساريين .. أو أنهم قطيع تسوقهم الكنيسة .. أو أنهم من أصحاب الجحيم المخالفين للشريعة الإسلامية

أنا أرفض منطق كل من يتهم أغلبية شعب مصر بالعبط والتخلف والانقياد وراء الإخوان أو السلفيين أو فلول الحزب الوطنى

يا عالم حرام عليكم .. مستكترين علينا الثقة فى النفس التى كانت مرسومة على الوجوه يوم الاستفتاء العظيم ؟ .. إنها وجوه الذين قالوا "نعم" ، والذين قالوا "لا" مدفوعين بالأمل وبحب الوطن ، المقبلين على التجربة الديموقراطية بحماس المحروم

الفاضل أبو محمد..

والله لقد أوجزت نفس مادار بخلدي حول هذا الفيديو

لا يزال البعض يصف الأغلبية بالتخلف والإنقياد والجهل و و و

لذلك كان أوفى جزاء لهؤلاء أنهم لن يكسبوا ثقة هذه الأغلبية إلا بعد إحترام عقليتها

السلام عليكم

استاذ أبومحمد

أنا كنت متفقة على كل كلمة في مداخلة حضرتك لحد ماشفت الفيديو!

أولا الفيديو ده مش دعاية "احنا كنا موافقين مع الجيش ومعملناش دعاية انتخابية للا أو لنعم يوم السبت" . ده معمول بعد الإستفتاء والشخص اللي بيتكلم بيحلل وينتقد الطريقة اللي بعض الناس اختاروا بيها نعم أو لا.

ثانيا إيه من اللي قاله حضرتك شايفه دعاية للا أو اتهام لآه انهم متخلفين ؟

"أنا بحترم كل واحد نزل وهو فاهم رايح يصوت على إيه واقتنع بآه نقدر نمشي على التعديلات الجديدة أو لأ احنا محتاجين دستور جديد"

يعني الراجل كلامه واضح! واعتقد الكلام ده كلنا متفقين عليه.

"لكن مبحترمش اللي راح وهو مش فاهم اللي رايح يصوت عليه"

برده كلامه واضح. هو بيناقش فئة معينة من الناس وبينتقدهم في تصويتهم سواء في نعم أو لا

"مفيش حاجة اسمها نعم يعني استقرار ولا يعني فوضى ومفيش حاجة اسمها نعم يعني فوضى ولا يعني استقرار."

"رايح يقول لأ لحسن الإخوان قالوا آه أو رايح يقول نعم لحسن البرادعي أو عمرو موسي قالوا لا. ده قمة الجهل والتخلف"

" في تضليل للناس. في ناس فاكره إنها حرب دينية مش سياسية."

"احنا رايحين نقول لأ عشان نشيل المادة التانية"

"قالولنا المسيحين هيقولوا لأ عشان يشيلوا المادة التانية فحنا هنقول آه عشان نخلي المادة التانية"

"فين يا قساوسة ويا شيوخ المادة التانية في التعديلات اللي بتقوله إنا رايحين نصوت عليها ؟! "

"لما حد يجي يقولي حصوت عشان البرادعي ميترشحش. ده جهل وسطحية"

حضرتك مش متفق ان كل ده " غير ناضجين سياسيا .. أو جهلة .. أو متخلفين .. " ؟

"احنا كلنا اخوات سواء نعم أو لا"

"اللي مش فاهم في السياسة يسأل ويسمع الطرفين وبعدين يختار آه أو لأ"

"الديمقراطية يعني ناقشني واناقشك لكن ملكش حق تسألني أنا هختار إيه"

"رسالتي للناس متحجروش على رأي غيركو"

مش كلنا متفقين على ده ؟ ومش كلنا متفقين إن هي دي الديمقراطية ؟

فين الدعاية للا؟ فين في كلامه كان فيه حتى تلميح ان اللي صوت لنعم متخلف ؟ فين عدم الحياديه في كل الكلام اللي اتقال ؟

أنا في رأيي الفيديو ده بيتكلم عن عدم النضج السياسي اللي احنا بناقشه بالظبط و بيقول نفس وجهة نظرنا.

عدم النضج السياسي يبـطء الtransition للديمقراطية.

تحياتي

دامو

تم تعديل 22 مارس 2011 بواسطة Damo

[Alshiekh]

جاءت نتيجة التصويت على إستفتاء التعديلات الدستوريه الذى انتهى الى غالبية نعم ..مخالفه لنتيجة تصويت الاستفتاء بمحاورات المصريين الذى انتهى الى غالبية لا .. رغم انها تجمع نخبة متميزه من المثقفين والمتعلمين وذوى الرؤى الثاقبه

سؤالان قادمان قد يكونا صادمان .. ولكن ارجو ان تسامحونى .. من منطلق الشفافيه والمكاشفه والمصارحه

لماذا لم يعبر تصويت محاورات المصريين الالكترونى عن رأى شعب مصر الواقعى؟؟

هل صدق نظيف وعمر سليمان..باننا لم ننضج ديموقراطيا بعد؟؟

أرجوك إستمع وشاهد هذا الفيديو وانت تعرف الاجابة على سؤالك

http://www.youtube.com/watch?v=qz7OH_dEzXg

[التونسى]

جاءت نتيجة التصويت على إستفتاء التعديلات الدستوريه الذى انتهى الى غالبية نعم ..مخالفه لنتيجة تصويت الاستفتاء بمحاورات المصريين الذى انتهى الى غالبية لا .. رغم انها تجمع نخبة متميزه من المثقفين والمتعلمين وذوى الرؤى الثاقبه

سؤالان قادمان قد يكونا صادمان .. ولكن ارجو ان تسامحونى .. من منطلق الشفافيه والمكاشفه والمصارحه

لماذا لم يعبر تصويت محاورات المصريين الالكترونى عن رأى شعب مصر الواقعى؟؟

هل صدق نظيف وعمر سليمان..باننا لم ننضج ديموقراطيا بعد؟؟

أرجوك إستمع وشاهد هذا الفيديو وانت تعرف الاجابة على سؤالك

http://www.youtube.com/watch?v=qz7OH_dEzXg

سمعته يا استاذ محمد :) .. مش دا اللى فى موضوع تقسيم الناس للباشمهندس ياسر :unsure: .. لى عوده ان شاء الله للتعليق عليه ..مدام حضرتك وضعتنى قدام الامر الواقع :closedeyes: .. فقط أؤجل التعليق عليه حاليا.. لانه مازالت بعض المدخلات السابقه تحتاج منى الى الرد والتعليق

[se_ Elsyed]

رأي محترم للكاتب الساخر عُمر طاهر

أؤمن تماما بأن الإخوان لم يتجاوزوا، وده جواب نهائى، أنت لو رايح الصين مضطر تتكلم صينى، والإخوان تكلموا مع الناس باللغة التى يفهمونها، الإخوان تكلموا مع الناس أصلاً.

أما معظم المثقفين المعارضين بتوع لأ، فقد «اتكلموا مع بعض» فى ندوات ومناظرات ومقالات أكثر مما تكلموا مع الناس مباشرة.

إذا كنت مطرباً وهناك مطرب آخر أنت لا تؤمن به لكنه يحقق نجاحات تفوقك فلا يصح أن تتهمه بالتجاوز، بل الواجب أن تعرف لماذا يهتم به الجمهور أكثر منك، وأخطر ما فى الأمر أن تتعالى وترى أن المطرب منافسك كسب هذا الجمهور لأن الجمهور جاهل وظروفه صعبة.

بلاش..

عندك شخص يمكن أن تكسبه بحقيبة مواد تموينية، ظهر منافسك فقدمها له، هل ستلوم منافسك؟ على الأقل هو سد احتياج هذا الرجل وقدم له خدمة حقيقية دون أن يضمن ولاءه كاملا (لم يمنحها له بوصل أمانة مثلا)، هل ستلوم الشخص المستفيد؟ لن يسمعك لأنك تبيع له كلاما فقط، طيب.. ما المانع أن الحقيبة التى يقدمها المسجد يقدمها الحزب أيضا؟، هو إحنا ليه هنتعالى على احتياجات الناس؟

بلاش..

عندك شخص يسهل على إمام مسجد قريته أن يقنعه بأن التصويت بـ«نعم» هو تصويت للإسلام بإمارة الدائرة الخضراء والتصويت بـ«لا» هو تصويت للمسيحية، بإمارة الدائرة السوداء رمز ملابس القس، هل فكرت أن تذهب يوما لهذه القرية فى صحبة عالم دين مستنير، هل بذلت جهدا – غير الجهد الشفوى – فى تقريب وجهات النظر بين الطرفين؟!

المهم..

قد تعتقد أننى «مش مبسوط» لأننى كنت أقول لأ، صدقنى أنا مبسوط بخطوة للأمام، لكننى أكره المبالغة، انتهى عصر الزيطة والزفة الدمياطى، فرحتى بالاستفتاء تشبه فرحتى بطفل ينطق حروفه الأولى بكل ما فيها من «لعثمة وتفافه» .. فرحان بيه لكننى سأرقع زغروطة عندما يبدأ هذا الطفل فى تكوين جملة مفيدة.

خُد بالك أن ٦٠% من الشعب كان يعتقد أن ما يجرى فى البلد هو حلقة جديدة من «إدينى عقلك» فلم يشارك فى الاستفتاء، ودول أمرهم سهل، المصيبة أنه فى لحظة اختيار سهلة جدا (نعم أو لا) ببطاقة رقم قومى كان فيه أكثر من مائة وعشرين ألف مواطن أصواتهم باطلة.. يعنى إدينى عقلك فعلاً!!

الخلاصة ..

لا خوف على الثورة من أى فصيل سياسى، فالثورة اختارت رمزا لها (الميدان) الذى تصب فيه شوارع كثيرة، أتحداك أن تجد شارعا واحداً يستطيع أن يحتوى كل هذا الزخم بمفرده، وإذا كنت تشعر فى قرارة نفسك بأن الجيش ربما يكون ميالا لطرف بعينه.. أهو الجيش ماشى يا سيدى خلاص، وما كنت تحلم بتغييره فى فترة طويلة صرت ملزما بتغييره فى ٦ أشهر فقط، الأمر الذى يجعل العمل شيقاً ومثيراً للتحدى، لكن قبلها يجب أن نعترف بأن القاعدة التى تقول: (المذاكرة وبعدين الامتحان) حطمها الاستفتاء، حيث إننا خضنا الامتحان أولاً.. ودلوقتى المفروض إننا نبتدى نذاكر.

[se_ Elsyed]

أرجوك إستمع وشاهد هذا الفيديو وانت تعرف الاجابة على سؤالك

http://www.youtube.com/watch?v=qz7OH_dEzXg

ده إجرام والله العظيم

حرام حرام التضليل والتخندق ده

يعني الإدلاء بنعم كان غزوة ؟

وكل اللي قالوا نعم مجاهدين وبالتالي اللي قالوا لا كانوا من الناس التانيين ؟

أنا خايف إن في إنتخابات مجلس الشعب هاينزل برضوا المشايخ دول يقولوا " اللي مش هاينتخب الحج فلان هايروح جهنم وبئس المصير "

بس برضوا العيب على المثقفين والناس المتقعرة اللي قاعدة في الفضائيات وداخل الغرف المغلقة وما بتنزلش توسخ هدومهاوتختلط بالناس تفهمهم وتوعيهم الصح من الغلط بدون تاثير على ارائهم