صفحة تجميع التوقيعات من أجل حقوق الإنسان المصري

[aimen]

اطلق نشطاء حملة توقيعات تطالب المجلس الأعلى للقوات المسلحة ود.عصام شرف رئيس الوزرء والنائب العام باستبعاد كافة أعضاء جهاز أمن الدولة من المشاركة في أية وظائف لها علاقة بالعمل الشرطي، وإشراف القضاء ومنظمات المجتمع المدني المستقلة على جهاز الأمن الوطني، والتحفظ علي كافة أعضاء هذا الجهاز بلا استثناء هؤلاء الذين لم يألو جهدا في انزال كافة ألوان العذاب بالمصريين، والتحفظ علي كل من رئيس مجلس الشعب السابق فتحي سرور ورئيس مجلس الشوري السابق صفوت الشريف ورئيس ديوان رئيس الجمهورية زكريا عزمي:باعتبارهم المسئولين الرئيسيين عن إفساد الحياة السياسية والحياة البرلمانية في البلاد ومساهمين بشكل رئيسي في حماية رؤوس النظام الفاسد إن لم يكونوا منهم بالأساس.

صفحة تجميع التوقيعات من أجل حقوق الإنسان المصري

[Dreamwithme]

ياجماعة ياتري دخلتم شفتم البيان ووقعتم عليه؟

إلي الآن التوقيعات ستة ألاف واحد بس .....معقولة؟

البيان ده سيقدم للمجلس العسكري للمطالبة بمحاكمة سرور وعزمي والشريف

والاشراف القضائي علي جهاز الأمن الوطني الذي شكل حديثا

صيغة البيان:

لقد عانينا نحن المصريين علي مدي سنوات عدة من فساد النظام الحاكم في مصر وعانينا من الانتقائية في تطبيق القوانين

ومورس علي المواطنين أبشع وسائل القهر التي أدت إلي تكميم الأفواه ونشر الرعب بين المواطنين البسطاء والسيطرة علي كافة وسائل الإعلام المرئي

والمسموع والمقروء وسيطرة حفنة من رجال أعمال النظام الفاسد علي مقدرات هذا الوطن ،

وبقاء عدد كبير من المسئولين المشهورين بفسادهم والذين لا يخشون في الباطل وتجميل النظام الفاسد لومة لائم مستغلين في ذلك كافة وسائل التضليل والخداع

ومعتمدين علي آلة النظام القمعية التي أذاقت المصريين كافة صنوف العذاب وهي جهاز أمن الدولة الذي طالت يداه غالبية المواطنين المصريين بلا استثناء

واشبعونا اعتقالا وتعذيبا وقتلا مما جعل المطالبة بمحاكمة الفاسدين وحل جهاز مباحث أمن الدولة علي رأس مطالب ثورة 25 يناير

وبالتالي فإننا نطالب من جديد بالآتي :

أولا :استبعاد كافة أعضاء جهاز أمن الدولة من المشاركة في أية وظائف لها علاقة بالعمل الشرطي،

وإشراف القضاء ومنظمات المجتمع المدني المستقلة على جهاز الأمن الوطني لضمان عدم منح أية فرصة لعودة السياسات البائدة في التعامل مع المواطن

المصري، ولضمان تطبيق أحكام الدستور المصري وعلي وجه التحديد المواد : 40 ، 41 ،42 ،44، 45

والتي تنص علي : - المواطنون لدي القانون سواء وهم متساوون في الحقوق والواجبات العامة لا تمييز بينهم في ذلك بسبب الجنس أو الأصل

أو اللغة أو الدين أو العقيدة - الحرية الشخصية حق طبيعي وهي مصونة لا تمس وفيما عدا حالة التلبس

لا يجوز القبض علي أحد أو تفتيشه أو حبسه أو تقييد حريته باي قيد أو منعه من التنقل إلا بأمر تستلزمه ضرورة التحقيق

وصيانة أمن المجتمع ويصدر هذا الأمر من القاضي المختص أو النيابة العامة وذلك وفقا لأحكام القانون ويحدد القانون مدة الحبس الاحتياطي

- كل مواطن يقبض عليه أو يحبس أو تقيد حريته باي قيد تجب معاملته بما يحفظ عليه كرامة الإنسان ولا يجوز إيذاؤه بدنيا أو معنويا

كما لا يجوز حجزه او حبسه في غير الأماكن الخاضعة للقوانين الصادرة بتنظيم السجون - للمساكن حرمة فلا يجوز دخولها ولا تفتيشها إلا بأمر قضائي مسبب

وفقا لأحكام القانون - لحياة المواطنين الخاصة حرمة يحميها القانون وللمراسلات البريديه والبرقية والمحادثات التليفونية

وغيرها من وسائل الاتصال حرمة وسريتها مكفولة ولا تجوز مصادرتها أو الاطلاع عليها أو رقابتها إلا بأمر قضائي مسبب ولمدة محددة ووفقا لأحكام القانون

ولا شك أن مخالفة تلك الأحكام الواردة بالدستور المصري يضع كافة المسئولين عنه تحت طائلة قانون العقوبات

بقائمة من التهالم تتضمن علي الأقل ارتكابهم جرائم الاحتجاز بدون وجه حق ، والتعذيب ، وتعطيل تنفيذ القوانين واللوائح ،وهتك العرض ،

والقتل ، وإخفاء الأدلة عن العدالة ،وتعريض السلام الجتماعي والوحدة الوطنية للخطر ....... إلخ

إن جرائم جهاز أمن الدولة جميعها تستوجب فتح تحقيق جدي فيها والتحفظ علي كافة أعضاء هذا الجهاز بلا استثناء هؤلاء الذين لم يألو جهدا في انزال كافة ألوان

العذاب بالمصريين الذين أوقعهم حظهم العثر تحت ايديهم ولم يثبت يوما اعتراضهم علي ما يكلفون به بل وعزلهم جميعا من وظائفهم

وعدم توليتهم أية وظائف لها علاقة بأمن وأمان الوطن والمواطنين لثبوت أنهم أخلوا بواجبات وظائفهم وعطلوا تنفيذ القوانين واللوائح

وخانوا الأمانة التي كان منوطا بهم أدائها وليس الاكتفاء فقط بحل جهاز مباحث أمن الدولة

أو تغيير مسماه بل نريد القضاء نهائيا علي هذا الجهاز واستبعاد كافة أعضائه من المشاركة مستقبلا في أية وظائف لها علاقة بالعمل الشرطي

ذلك الجهاز الذي أقل ما يوصف به أنه تنظيم إرهابي وليس مؤسسة وطنية .

ثانيا : التحفظ علي كل من رئيس مجلس الشعب السابق فتحي سرور ورئيس مجلس الشوري السابق صفوت الشريف

ورئيس ديوان رئيس الجمهورية زكريا عزمي: باعتبارهم المسئولين الرئيسيين عن إفساد الحياة السياسية والحياة البرلمانية

في البلاد ومساهمين بشكل رئيسي في حماية رؤوس النظام الفاسد إن لم يكونو منهم بالأساس والذين يشكل تركهم طلقاء خطرا حقيقيا علي استقرار الوطن

وأمن المواطنين ولثبوت ضلوعهم في جرائم ضد المواطنين المصريين، خاصة ضد الثوار في يوم 2 فبراير المعروف بالأربعاء الأسود أو "معركة الجمل"

هؤلاء الثلاثة الذين ساهموا بشكل أو بآخر في التستر علي الآلاف من وقائع الفساد وعدم احترام أحكام القضاء

ومساعدة المفسدين علي الإفلات من العقاب والذينم تشير إليهم اصابع الاتهام في العديد من الحوادث التي تم تدبيرها لإجهاض ثورة 25 يناير

والمسئولين لسنوات عديدة عن ثلاثة من أهم المؤسسات في جمهورية مصر العربية ومسئولين سياسيا وإداريا وجنائيا عن كافة وقائع الفساد

والاستيلاء علي المال العام التي تمت بداخل تلك المؤسسات ولهم دور لا يخفي علي أحد في افساد الحياة السياسية

وااحزبية والبرلمانية في مصر وبناء علي ذلك فإننا نطالب بسرعة التحفظ علي هؤلاء الثلاثة وتكليف الجهات الرقابية بالتحري عن ثرواتهم

ومصادر تلك الثروات وفتح الباب للتحقيق في كافة وقائع الفساد التي شاركوا فيها إما مباشرة أو بالتستر علي مرتكبيها.

من الممكن طباعته وجمع التوقيعات ثم إرساله لمركز هشام مبارك لحقوق الانسان

أو لأفراد الحملة

لازم يكون مطلب شعبي عشان يتنفذ والمطالب الشعبية مش 6ألاف واحد فقط

اللي لم تتح له الظروف أن ينزل ميدان التحرير أمامه فرصة في المشاركة

معلومات أكثر عن الحملة من مدونة نوارة نجم أحد أفراد الحملة:

احنا قلنا ان الجيش بشكل عام، والمشير بشكل خاص، ما بيسمعش غير المطالب الشعبية

والمطلب الشعبي بالنسبة له - واظن بالنسبة للناس كلها - ان الاعداد تبقى كبيرة

لما يبقى الموقعين على مطلب محاكمة الثلاثي المرح واشراف قضائي على الامن الوطني ستلاف واحد بس يبقى ده مش مطلب شعبي ولا حاجة، وانا فعلا لو مكانه، ايه اللي يخليني ارفد واحد من شغله واقدمه لمحاكمة، واجيب صفوت الشريف وفتحي سرور في سنهم ده وابهدلهم؟ اذا كان على الفساد فالبلد كلها فاسدة، وهم نفسهم - اقصد الجيش والمشير - لما مسكوا البلد اكتشفوا فساد كتير قوي في صفوف المعارضة وربنا حليم ستار، ها، يجيبوهم هم كمان؟ مش حيخلصوا بقى، وفكرتهم في ان الزمن اللي فات كان زمن فساد ونبتدي من اول وجديد

اللهم الا اذا الشعب هو اللي الح على محاكمة ناس بعينها، لو قريتوا كلام اللواء ممدوح شاهين حتلاقوه بيقول احنا استلمنا البلد وعايزين نرجعها قدر الامكان زي ما استلمناها

وانا فاهمة الكلام ده، هم مش عايزين يحدثوا تغييرات كتير لأن هم بيعتبروا نفسهم كوبري يعدي عليه الشعب ويعمل هو تغيراته الديمقراطية بايده بدل ما يتقال الجيش فرض علينا حاجة

والمطالب لا تجاب الا اذا احنا قلنا: الشعب يريد

والشعب يريد دي لازم تبقى بعدد محترم عشان يصدقوا ان الشعب هو اللي يريد، مش يعملوا حاجة يلاقوا ناس طالعة تانية تقولهم مين اللي قالكم تعملوا كده

الثورة مش بتاعتهم، هم ما ادعوش ان الثورة بتاعتهم، هم اللي يهمهم كمؤسسة عسكرية انهم يلتزموا بالقسم: أن احافظ على تراب الوطن

احنا عايزين حاجة يبقى الغاوي ينقط بطاقيته

ومش كل ما نعوز مطلب نقول: يالا التحرير

ده عقم في التفكير، فيه وسائل اخرى كتير نوصل لهم بيها ان ده مطلب شعبي من غير ما ننزل التحرير، منها التوقيعات، والله ما اجابوش المطلب بالتوقيعات يبقى ننزل ساعتها وينفع بقى نحشد والناس ترضى تنزل، بس ما تنزلش التحرير ميت واحد وترجع تقول انا انضربت

لو جالهم 100 الف توقيع بيقولهم هاتوا لنا دول حيجيبوهم، اعملوا لنا اشراف قضائي على الامن الوطني حيعملوا

غير كده مش حيعملوا حاجة خارج خطة الحفاظ على تراب الوطن وحماية الامن لحين تسليم البلاد لسلطة مدنية والشعب والسلطة المدنية بقى يصطفلوا مع بعض وهم يرجعوا يشوفوا شغلهم

الموضوع آز سيمبل آز ذات، لا هم بيتآمروا على الثورة.. ولا هم كمان بيدعوا ان الثورة دي بتاعتهم، هم عايزين يعملوا شغلهم، وشغلهم انهم يحافظوا على البلد وحدودها وامنها زي ما هي، والباقي شغل الشعب مش شغلهم

فيه ناس وعدتني انها طبعت النموذج ده

وانهم بيجمعوا عليه توقيعات

وفيه ناس قالت انها بتجمع توقيعات من اسكندرية وانا حطيت الرقم ده للي بيجمعوا توقيعات من اسكندرية

0111860593

وفيه ناس وعدت انها تجمع توقيعات من المحافظات ويا اما تتصل بمالك تبعتها له يا اما تاخدها سكان وتبعتها لنا على الميل وعملوا لنا البحر طحينة ومافيش حاجة وصلت

وحطيت نمرة مالك عدلي

0101044264

واكلتوا دماغه اتصالات.. وجاله اتصال تهديد

لكن لحد دلوقت ما وصلوش توقيعات

وحطيت العنوان اللي يتبعت عليه التوقيعات

1 ش سوق التوفيقية - مركز هشام مبارك

وحطيت الميل

fegypt20@yahoo.com

واللي بيوصلنا على الميل واحد باعت توقيعه

ماهو لو انت واحد وباعت توقيعك بتبعته على الميل ليه ما توقع هنا

احنا آخرنا ليوم الجمعة

والله جات توقيعات محترمة حنسلمها للمجلس العسكري ورئاسة الوزرا والنائب العام وحيتعمل اللي الناس عايزاه ان شاء الله

لكن احنا مش حنسلم توقيعات هفأ للناس، هم مش فاضيين لنا كمان.. كفاية عليهم سوزان مبارك واللي هي عمالة تعمله وتخطط له

لو ما جاتش توقيعات باعداد محترمة ما حدش يفتح بقه تاني ويقول فين صفوت الشريف فين فتحي سرور ليه زكريا عزمي بيشتغل في الرئاسة ليه جبتوا بتوع امن الدولة شغلتوهم في الامن الوطني؟

وعلى رأي مالك عدلي.. احنا كان قصدنا خير والامر في ايد الشعب

والسلام ختام

[لماضة مصرية جدا]

السلام عليكم و رحمة الله و بركاته

ممكن اقول رايي في حاجة

انا بخاف من البيانات المجمعة دي

لانها ببساطة بتفكرني باستفتاء الدستور.....يعني لوكشة تعديلات يا تاخدها باكيدج واحد يا لا

و بالتالي انا بسال و بفكر معاكم في شوية حاجات:

1- فكرة اقصاء ظباط امن الدولة من غير تقديم حل بديل....مش موافقة عليها....محاكمة المنحرفين منهم في محاكمات شعبية اتفق...كان بلال فضل مرة قال ان المفروض ان يتم توظيفهم و الا هنبقي بنصنع جيش من المرتزقة...يعني اتدرب علي القتل و هي دي صنعته و مش هيلاقي حاجة يعملها...المفروض اعادة توظيفهم او تاهيلهم.

2- هو كل تعاوننا مع حكومة دكتور شرف هتبقي وسيلتنا فيها الضغط و جمع التوقيعات....؟؟؟ ليه المراكز الحقوقية في مصر زي مركز النديم و هشام مبارك....ميجمعوش ما لديهم من وثائق و انتهاكات و يقدموا بهيا بلاغات للنائب العام عشان يتم التحقيق فيها...لازم نمشي القنوات الشرعية في المطالبة بالحقوق

بفكر معاكم...و يمكن انا غلط

بس كمية الصفحات اللي دخلتها...و بتمثل حركات ضاغطة...كانت رهيبة الفترة اللي فاتت...و قولت لنفسي....هو دكتور شرف هيلحق يشتغل امتي؟؟؟

تحياتي