قصـــة المحـــــــاوراتيين ,, والصنـــــدوق ..

[الســـاري]

صباح الخير

يحكى انه في يوم من الايام .. قرر الادفايزر الهمام .. راعي الذمام .. ان يجمع المحاوراتيين والمحاوراتيات .. ومن منهم قد مضى ومن هو آت .. ووقف فيهم خطيبا .. وقال

اننا قد جمعنا امرنا .. واستشرنا اهل الحل والعقد من المشرفين والمشرفات .. واصحاب اليد الطولى في المشاركات .. والحاصلين على اعلى التقييمات .. واتفقنا على اصدار ام المفاجآت .. كتاب يضم خلاصة المشاركات .. سابقة ما سبقنا بها منتدى في العالمين .. يحمل اسم محاورات المصريين

لكن قبل ان نطرح الكتاب في الاسواق .. وقبل ان نوقع على طبع الاوراق .. طرأ لنا أمر لم نحسب له حساب .. أخر كما ترون نشر الكتاب

لمن يعود ريع النشر ؟ .. ومن يتحمل هذا الامر ؟ .. ان اصطفيتها لنفسي قلتم .. قد آثر نفسه علينا ونحن من سود الصفحات .. وان قصرته على المشرفين قلتم باي حق هذه الامتيازات ؟؟ .. ولماذا استفردهم بالعطية .. ونحن نعيش اجواء الديموقراطية ؟؟

وان وزعتها عليكم جميعا .. قال احدكم اتتساوى حصتي انا .. الذي بلغت مشاركاتي قرابة الالفين .. بمثل من هو في المنتدى ابن يومين ؟

والحق اقول لكم .. اننا بمركز الاشراف لم نستقر على حال .. ولا عرفنا اجابة هذا السؤال .. فقال لنا ابو الاسيان .. وهو الحكيم المفوه اليقظان .. من قال ان المحاوراتيين يرفضون ان يقتسم الاشراف الغنائم ؟؟ .. فوالله ما عرفناهم الا كراما عن فتات الولائم .. فاطرح يا سيدي الادفايز بهذا المنتدى الاستفتاء .. ليقل نعم من رضى لنا بالغنيمة .. وليقل لا من يرى انها ظليمة .. وهكذا يستقر بنا الحال .. وتنهي هذا الجدال

ايها المحاوراتيين الاشاوس .. دونكم وصندوق الاستفتاء .. اهجموا عليه هجمة من لا يرى صندوق بعده .. وليقل كل رأيه

صفق الحضور طويلا .. واخذوا يهنؤون بعضهم البعض بأن قيض الله لهم مثل هذا الادفايزر .. الذي يستشيرهم بكل صغيرة وكبيرة .. وكل قضية خطيرة

هنا قال الباشمهندس تيمور ..

هي دي الديموقراطية .. هي دي الحرية

:happy:

اللي شفته بعيني النهاردة مش هايصدقوه اصدقائي في منتدى احباب الفوركس ..

ولا اصدقائي في منتدى حركة 6 ابريل

ولا اصدقائي في منتدى المعماريون

ولا اصدقائي في منتدى صناع الحياة

وهاقول لاصدقائنا وائل غنيم وانجي و اسماء محفوظ :happy:

وقالت فتفوتة :

صورت كل اللي اتقال وسجلته .. وهانشره في كل مكان ..

في الفيس بوك .. تويتر .. شبكة رصد .. شبكة جن ازرق .. المهم انشره

وقال تامر مصطفى :

وانا هانتج افلام عن الخطبة دي .. اخيرا يا مصر .. اخيرا هتشوفي اولادك يعملوا ايه

وقالت دامو :

i am happy

وقال سكوب وهو يغالب دمعة تأثر :

يا سلام .. وانا اللي كنت اقول محاورات تايهة يا ولاد الحلال .. لقينا المحاورات خلاص

اما ضحى فقد قالت بواقعيتها المعروفة .. وبتجردها الصريح :

طيب دلوقتي خلونا من اجواء الزغاريط والزفة البلدي .. وخلونا نفكر .. هنقول ايه .. نعم ولا لا ؟

قالت اغابي :

يا سلام يا استاذة ضحى .. بقى دي عايزة سؤال

طبعا هنقول لا .. مش من حقهم طبعا يحتكروا الارباح ليهم .. ياما تعبت وسهرت وانا اكتب مشاركات .. قسم الصحة والنفساويات يشهد على كده .. واخرتها يوزعوها بينهم ؟

ياما حرمت نفسي من الغطا عشان يستغطوا .. ياما حرمت نفسي من العشا عشان يستعشوا

قالت لماضة :

والله مش عارفة انا اقول لا ولا آه .. يعني لو قلنا نعم مثلا .. يجرى ايه ؟ هما ياما تعبوا وما تنسوش انهم يشتغلوا من دون اجر .. زي ما بيقولوا دايما ( وش اي واحد من فريق الادارة

صباحك .. حيرة .. ما تعرفيش تقولي معاها .. آه ولا لأ

قال حسام .. حسام عبدالفتاح سابقا :

حيرة ايه يا لمضة انتي .. هي دي فيها حيرة .. طبعا هنقول نعم .. مش عايز احصل صاحبي عنبي ومن خاف سلم .. انتي عارفة معناها ايه قولة لأ ؟ يعني هنخليهم يتفرسوا مننا .. ويقولوا بصوا .. اعطيناهم ديموقراطية واول ما جربوها جات على راسنا احنا .. انا من ناحيتي متنازل ياختي

وهاقول نعم

صرخ اركتكت :

نعم مين يا روح والدك ؟ ؟؟ نعامة ترفس بمصارينك ..

لا تنازل

:happy:

لا استسلام

:happy:

انا مجاهد .. مناضل .. ثائر .. من الخيمة

قال التونسي :

يا عمي ريحنا شوية من الشعارات الحنجورية بتاعتك .. انا هاقول نعم باة .. مش ناقصين وجع دماغ

قالت مغتربة :

لنعرض الامر على لغة الارقام .. المتخوفين من نعم يمكن يشكلوا نسبة تزيد او تنقص قليلا عن 50 بالمئة .. في هذه الحالة سيقف الاشراف عاجزا عن الحاق الاذى باللي صوتوا بلأ .. لان نسبتهم كبيرة .. يختلف الامر في حال الاغلبية الكاسحة .. وبلغة الاحصائيات .. فان المصوتين بلأ سيشكلون نسبة كبيرة لو كان الفوز لصالحهم .. يختلف الامر جذريا في حالة فوز المصوتين بنعم .. .. لان استقصاد المشرفين سينتفي بانتفاء العلة .. هذا اذا ما اخذنا بعين الاعتبار العامل المحفز لتصويت من قالوا بنعم وهو في حالتنا الراهنة الخوف من ملاحقة المشرفين وترصدهم لمن صوت ضد قرار انتفاعهم بريع الكتاب .. في كل الاحوال فإن المنطق البراجماتي النفعي للمصوتين بنعم قد لا يسعفهم بالضرورة .. لأن

اوزاوز مقاطعا :

يا ست بالراحة شوية الله يخليكي .. معاكي بصمجية بالمنتدى .. يعني الخلاصة ها تقولي آه ولا لأ ؟

مغتربة :

سأقول لأ طبعا .. لكني ضد مبدأ استغلال الخوف من المشرفين للتصويت الديموقراطي .. التصويت الحر ينبع من قناعة بلا مؤثرات او ضغوط

قالت هند علي :

يارب نجتاز هذه الغمة .. وترجع لنا مصر زي ما كانت واحسن

قال سمبا :

ترجع مصر ازاي زي ما كانت يا مدام هند ؟ .. واحنا كنا عاملين ثورة ليه ؟

قالت هند علي :

والله مش عارفة يا بني .. التصويت ده شكله مش هيجيبها لبر

قالت لماضة :

حبة تفائل كدا يا مدام هند .. هو التفائل ايه غير شوية مشاعر صايعة .. بتبص لقدام .. وتخلي لكل ضحكاية من قلب كل واحد مننا .. انشودة فرح تزغرط على بلكونة الامل .. لما يشعشع ..

صباحك .. تفائل قد السما .. مغموس بالزيت الحار

قال ايمن :

عن نفسي هاقول نعم .. بس ليه تتخانقوا على حاجة لسه ما بينتش .. كل واحد يروح للصندوق ويقول رايهه اللي هو حر فيه

قالت مصرية متغربة :

مش فاهمة ليه فزاعة الاشراف والمشرفين .. عاملين زي الاولاد اللي هيشتروا كفن لابوهم وهو لسه عايش ..

الاشراف مسؤولية .. حضارة ..

الاشراف .. قوة ..

الاشراف .. هو اني ادافع عن افكارك وانظمهالك .. مش اني اصادرها لأ ..

وبعدين هاينوبنا كم ملطوش يعني .. ؟ هو احنا بنبيع كتاب لا تحزن ؟

يا ريت ما كنا عرضنا الكتاب من اصلو ..

حزني والمي .. كبير .. مش عشان ان فيه ناس قالت بوشنا لأ ..

بس لاني للاسف اكتشفت ان فيه ناس بعد كل تعبنا منهم .. يبصوا لنا بصات .. غريبة

انا مذهولة .. مصدومة

اغابي :

ما تعيطيش يا اختي .. بس هيا دي الديموقراطية ..

لازم تتحمليها

وما يصحش تقولي اننا بنبنص بصات غريبة

:angry2:

رؤوف :

هاقول نعم نعم نعم .. واللي مش عاجبه بقى يهوينا

مصرية متغربة :

اصيل والله يارؤوف..

:blush:

دريم وذ مي :

ممكن اقول حاجة يا ابلة مصرية متغربة بس بليز ماتخاصمينيش .. ينفع اقول لأ .. ؟

مصرية متغربة :

دي حريتك الشخصية يا بنتي ..القرار لازم ينبع من ذاتك .. بس مستعدة تتحملي القرار ده ؟

دريم وذ مي :

في الحقيقة .. أ .. أ ..

مصرية متغربة :

ماشي يا ستي .. قولي لأ .. بس خليكي فاكراها

:glare:

سمبا :

ايه هو الارهاب الفكري ده .. يعني لو مش عايزينا نصوت بتاخدوا راينا ليه بالاول ؟؟؟

ابو محمد :

اهدأ يا حاج .. مافيش حاجة للصوت العالي .. وبعدين صوتك بينرفزني ..

سمبا :

فيها حاجة يا سيد الناس لو قلت لأ ؟؟ انا هاقول لأ .. هاقول لأ

ابو محمد :

من حقك تقول لا بس مش من حقك ترفع صوتك كده .. عندنا بنات بالمنتدى

سمبا :

وايه دخل البنات برفع الصوت .. ؟ ايه الاستفزاز ده بأة

ابو محمد :

اهو انت كده بتشوشر على المصوتين .. وبتعطيهم ايحاءات ان اللي هيقول نعم ياعيني يبقى مسكين وضعيف وغلبان .. وان اللي صوته عالي هو البطل والثائر والافلام بتاعتكو دي

سمبا :

!! اناقلت كل ده .. ؟؟ امتى .. ؟ وبعدين ايه دخل ده بوجود بنات معانا بالمنتدى ..

ابو محمد :

اهو انت كده بتشتت الموضوع .. معليش .. الحوار كده ما ينفعش ..

جويرية :

انا هاقول نعم .. كبر راسك يا استاذ ابو محمد .. صوتي هيوصلك واقول نعم

اما دول اللي بيقولوا لأ .. لهم يوم ان شاء الله

شرف الدين :

يا جماعة ما تستهدوا بالله بأة .. اللي عايز يقول نعم هو حر

واللي عايز يقول لأ هو حر

واللي مش عايز يصوت برضو هو حر

ها تقلبوها غم ليه ..

كومنق سوون :

انى ارى رؤوسا قد اينعت .. وحان قطافها .. واني بأذن الله لمقتطفهامن جذورها

سي السيد :

ما تهدي اللعب يا كابتن .. جذور ايه .. وتقتطف ايه .. ؟؟ هو بردقان ؟ ده تصويت

كومنق سوون :

بردقان .. يوسف افندي .. مشمش .. زر بطاطا .. هذا لن يغير من الحقيقة شيئا

سي السيد :

حقيقة ايه ؟؟

كومنق سوون :

ستعلم قريبا يا كبيرهم .. عن اذنك .. سأذهب للتصويت

----------------------------------

قال طائر الليل الحزين :

اليها .. تلك التي ترنو بعينها في هدأة الليل

لن انساكي .. ولاجلك .. واحتراما لمواثيق سجلتها خطانا حين كنا في سن الصبا

سأظل وفيا للحظ عينك الشفاف في لغتي ..

وسأسطر لكي .. يا أمة الله .. ابياتا اسكبها في اذنيكي ذات القرط المتدلي

واقول لك ..

وحدك ..

سأصوت بلا .. فأنتي قراري ..

----------------------------------------------

غني الابيات السالفة زوهيري .. تحت عنوان ( من وحي الصندوق ) .. على عوده الرنان .. وعملت فتفوتة لها شير بالفيس بوك

يتبع ..

تم تعديل 25 مارس 2011 بواسطة الســـاري

[arkan]

ماشاء على حضرتك يا استاذ ساري

جميلة

متابعة

[raouf]

رائعة سارى فى انتظار التكملة

[Dreamwithme]

تسجيل اعجاب شديد ومتابعة....

فنان والله ياساري ولو أنك مش مديني دور كبير في الفيلم ده :happy:

لكن الحق حق لازم الواحد يقول اللي له واللي عليه

ربنا يسعدك زي ما بتسعدني دائما يا ساري :cheer:

ع جنب بقي (وش عيل غلس) هو أنت بتكشف عن مواهبك في كتابة السيناريو عشان تفك عقد الشراكة بينك وبين لماضة وتستفرد بالايراد ولا أيه؟!

أنا بس عايزة أهدي النفوس.....فينك يالماضة تشوفي (وش عيل بيصرخ) :waving:

[م تيمور المراغي]

روعة يا ساري انت اثبت ان المنبع مادام مبدع و فاير فيقينا لا يهم مسرى المصب ,,

نفتح ملف هيئة محلفين ( لجنة حكماء ) محاورات المصريين دلوقتي والا ايه ؟؟ :happy:

فاكرين حاجه اسمها ( لجنة الحكماء ) !! ;)

[hOuSsAm]

هههههههههههههههههههههههههههههههههههههههههههه

انت حكاية يا سارى

ايه الابداع ده

صوتى جاب لاخر الشارع من الضحك

كنت هموت النهاردة بسببك

تسجيل متابعة واعجاب

[أبوعمار]

نسيت رأي واحد مهم:

قال الساري:

انتوا بتستفزّوا روح الإخراج اللي قاعدة تتنطط قدامي... شكلي هأقلب الموضوع من كتابة بس لفيلم يصوّر الصراع بين "نعم "و "لا" . شكلي هأتصل بلماضة ونشتغل في الفيلم الجاي فورا.... لأن الوضع جاد وزاد.. بس خللوا بالكم

لا ولن ولم نسمح بتصدير ولا حتى استيراد هذه البلبلة ولا طوابير الاستفتاءات للسعودية ولا للشعب الخليجي ....أنا أحذركم

انت حكاية .... تقبّلي احتراماتي يا محاواراتي

[عبير يونس]

شوف يا ساري يا بني

مش عارفة ليه حاسة ان نهايتك معانا قربت

و أيامك بقت معدودة

( وش واحد متأمل ينظر إلى المستقبل بحكمة)

انت يا بني للأسف مغرر بيك

و فاهم الديموقراطية غلط

فينك يا اونكل محمر

و فين تعريفاتك الملهمة

ديموكراسيا أي بني

هي كلمة من مقطعين

ديمو= دوام

كراسيا= الكراسي

قال ديموقراطية قال

يا بني فوق واصحى للون

التغيير يبدأ من الداخل

و أنا بجد مصدومة ومذهولة ( مش عارفة ليه الحقيقة)

و بعدين مين قال ان انا حآخد حاجة من ريع الكتاب

الفلوس عمرها ما كانت غايتي

الفلوس ليست إلا وسيلة لتحقيق الغايات

و عشان كده

و عشان البؤين بتوعك دول

قررت ان اللي حيطلع لي من الكتاب اني حأتبرع بيه لضحايا السيول في جدة :closedeyes:

حطلي رقم حسابك ع الخاص

أما بقى بالنسبة لأغابي و دريم

فهم في قلبي

:wub:

(وش محمد صبحي في مسرحية تخاريف في مشهد الديكتاتور)

:egyflag:

[تامر مصطفى]

لما قلت عليك فااااضي محدش صدقني

كمل يا ريس "مستنظرينك" حاول متتأخرش

[رضوي]

ينصر دينك يااستاذ خليفة ( مش فاكرة بقي اسم المسرحية )

الي المبدع الساري

أكمل ....... لاتتوقف

مازال هناك الكثير لتبهرنا به

بس بالراحة علينا شوية علشان عيونا دمعت من الضحك ......

تسلم

[fatfouta]

وقالت فتفوتة :

صورت كل اللي اتقال وسجلته .. وهانشره في كل مكان ..

في الفيس بوك .. تويتر .. شبكة رصد .. شبكة جن ازرق .. المهم انشره

لا يا سارى اسمها.....المهم انشرووووووووووا :closedeyes:

بجد مبدع وتسلم ايدك ضحكتنى والله

[م تيمور المراغي]

قول ياساري وعلي الصوت

اكتب بنسايم الحرية الوف الكلم ,,

وان نفذ منك مداد القلم ,,

فكلنا قلم ,,

( واخد لي بالك انت يا حج محمد ) :happy:

[عبير يونس]

قول ياساري وعلي الصوت

اكتب بنسايم الحرية الوف الكلم ,,

وان نفذ منك مداد القلم ,,

فكلنا قلم ,,

( واخد لي بالك انت يا حج محمد ) :happy:

مين الحج محمد ده :blink:

هو انت اسمك الحقيقي محمد يا ساري؟

انا برضه كل اخواتي اسمهم محمد

ماعدا أخويا الكبير شريف اسمه حسين :closedeyes:

[م تيمور المراغي]

س

ك

ر

يا ساري :P ههههه

[دودو هانم]

خلصوا فيك كل الكلام احترت اقول فيك ايه ؟؟؟وانا اساسا مش بعرف اقول كتير انما بجد

تسلم

تسلم

تسلم

[م تيمور المراغي]

ساري لا تكونش البتاعة الزرقا دي اللي انت ماسكها صندوق الدنيا !

طب ما تجيب لفه ,,!

[الســـاري]

قال الراوي

وبعد ان تم نصب الصندوق في وسط ميدان المحاورات .. وبعد ان استعد الجميع لقول ما يراه في غنيمة الدولارات .. اجتمع الادفايزر بمجموعة المشرفين ... وقال لهم اني لكم ناصح امين .. دعوا التصويت يأخذ مسراه دون تدخلات .. وارفعوا الينا دائما بكل التجاوزات .. يمنع التحريض واستخدام المنابر للتأثير .. فليس هذا ما تعلمناه من ميدان التحرير .. فأما الغلة فأني بريء منها براءة الذئب من دم ابن يعقوب .. بل هي لكم يا سين سين ويا ابا محمد ويا فلانة ويا سكوب .. ويا محمد ويا سلوى ويا مصرية ويا اسد .. فكونوا في كلمتكم متوحدين كالجسد .. ولا تنسوا رفع نصيب محمد يوسف لحين عودته بالسلامة .. ولا تنسوا ان تجنبوني واياكم الملامة .. اقول قولي هذا واودعكم الى حين عودة من جزر البهامس

..

وما ان خلت القاعة من الادفايزر حتى انتظم الشهيق والزفير .. وتنفس الصعداء منهم من كان يشعر انه كالاسير .. وبعد الضحك والمجاملات .. علت الجدية الوجوه والنبرات .. وبرزت التساؤلات .. ان ماذا نحن فاعلون ؟ وعلى ماذا نحن مقدمون ؟

قالت فلانة وهي ترشف الكابتشينو الاثير .. ان لا تجزعوا ولا تخافوا من الاستفتاء المثير .. فالنتيجة تقريبا محسومة .. و الغلة واضحة ومرسومة .. وما تكفلت بنفقات الكتاب مع الفاضل اسد .. الا لقرب جني الدنانير فاللهم لا حسد .. افرحوا وارقصوا وغنوا

قال ابو محمد بهدوءه المعتاد .. وهل ضمنتي يا فاضلتي اننا سنجني الايراد ؟ .. وما ادراك عن نتيجة الاستفتاء .. وهل ضمنتي من المصوتين الولاء ؟ ..

قال اسد بحذر شديد .. ارقب نغمة لا تنقص ولا تزيد .. عن اننا سنحابي من يقول نعم ونصطفيه .. ونحاسب في صمت من قال لا ونزدريه ..

قال سين سين .. ما جلوسنا هنا في الصالات المغلقة .. تاركين لمنابرهم الحرية المطلقة ؟ .. انصرفوا وارقبوا رد فعل كل الاعضاء .. واتركوا الكلام عن ضمان الاستفتاء .. فإن غالبيتهم قالوا نعم فبها ورحبت .. وان غالبيتهم قالوا لا فالخطورة قد وجبت ..

----

بعدها

ساد الصمت في القاعة ..

------------------------------------------------

امام الصندوق ..

طابور طويل له اول وليس له آخر .. في منتصف الطابور .. ام زيد تتجاذب اطراف الحديث مع رضوي

قالت ام زيد :

كانت ايام وعشناها في بلاد الضباب .. ودلوقتي بقينا في طابور العذاب

قالت رضوي :

خلاص يا ام زيد ,,..

دي حرية واتفرضت علينا

وبعدين هيا بلاد الضباب دي ..........مافيهاش طوابير ..؟؟

ولا عندهم نتحمل الطوابير وهنا نتنرفز !!

ام زيد :

باقول لك ايه يا رضوي .. كلامك اتغير معايا من يوم قلت اني هاصوت بلا .. طب بصي بأة .. هاصوت بلأ .. بلأ .. مش بس انا .. حتى زيد وابوه .. دي مسؤولية وامانة .. دي مش بس رسالة زيد .. دي رسالة زيد واي طفل اخر

..

رضوي :

يا ستي مالك بتتكلمي كده وانتي محسساني انك بنظير بوتو ........ ؟؟ ما تقولي لأ براحتك ........... انا اللي عليا خلصت ضميري من ناحيتك ..

ام زيد :

.. طب خلاص يا ستي انتي ولون الخط بتاعك ده اللي حول عينيا ... ما كنتي تكتبي بالابيض مرة واحدة

هتفضلي بغيبوبة كدا لحد امتى بس .. !! مش كفاية الجو الحار ده ؟

اركتيكت :

من ناحية الجو ما تخافوش

ريمو هتيجي كمان شوية .. والدنيا هتمطر ان شاء الله

ذهبية :

يا سنة سوخا .. ومريومة معاها ؟

اركتكت :

يظهر كده يافندم .. قال ايه .. عايزة توزع كيك ريمو البريمو بمبالغ رمزية للي يقول لأ .. ومجانا للي قالوا نعم .. عشان تشجع مريومة على الطبيخ ..

ذهبية :

طب انا قلت لأ ..

العطار :

يبقى تدفعي يا ستي .. بس لو مالكيش في الحلو .. انا عامل مشاوي ملهلبة للي بيقولوا لأ .. وبأسعار رمزية للي يقول نعم ..

بس الله يعيننا على الحر ده .. سي السيد اكل 600 ريال من لحمنا الحي عشان موضوع التبريد ده .. مش عايزه يتهنى فيها ..

الغريب :

الا على فكرة يا ابو عمار .. هتقول نعم انتا طبعا .. مش كدة ؟

ابو عمار :

لا يا عم .. ماما قلب ابيض وصتنا اننا كلنا- بتوع الكويت - نقول لأ .. مش هنخرج عن رأيها

الغريب :

يا عم مش ناقصين بلاوي تتحدف علينا .. قول نعم ..

ابو عمار :

باقول لك قلب ابيض قالت لنا نصوت بلأ .. فاهمني انتا .. ؟ مش هاخرج عن طوعها

الغريب :

يا عم واحنا عملنا الثورة عشان نمشي ورا كل اللي تقوله ماما قلب ابيض ..؟ فين رأيك

تامر مصطفى :

فيه ايه يا غريب .. ؟ مش عاجباك ماما قلب ابيض .. ؟ ياما اكلت طواجن من صنايع ايديهاوما خلتش لقمة لحد .. ناسي اول ما جيت الكويت لما كنت تلقح جتتك علينا باوقات الوجبات ؟ .. وجاي دلوقتي تستكبر ع النعمة .. ؟

الغريب :

طول ما احنا متفقين مش مهم مين يقول نعم ومين يقول لا .. مش كده برضو ؟

تامر مصطفى :

رأيك ده لما تكون فرداني يا اخويا .. بس انتا هنا عود في حزمة .. بعدين .. احنا متفقين كل واحد فينا يقول لأ ..

الغريب :

بس ده الغاء للذات .. هاقول نعم ..

بوسي :

سيبه يا تمووورة .. يظهر الطابور الطويل أثر عليه حبتين .. ايه الغاء الذات دي .. غريب .. انت تشتكي من حاجة .. ؟

اغابي :

الحالة اللي معاه انا عارفاها كويس .. دي حالة استبحس نفساوي ..

غريب يا ابني .. ردد ورايا .. انا مش قصير قزعة .. انا طويل واهبل

غريب :

يا حاجة ام محمود الله يستر عليكي مش ناقصك انتي كمان .. امتى هايخلص الطابور ده ؟

اركتكت :

مالهم بتوع الاتوبيس

مش متفقين ولا ايه ؟؟

كومنق سون :

هي والله بوادر الأزمة .. وبواعث الانشقاق

ثبت الله قلب الغريب .. ونصره على اعدائه

بالذات على هذا الدعي تامر مصطفى الفاسق

اركتكت :

اعداء مين يا حاج .. انت خليت فيها اعداء ؟؟

كومنق سوون :

نعم .. وما احسبك الا واحدا منهم

اركتكت :

انا ... ؟ انا يتقال عليا كده ؟ انا الثائر المناضل ؟؟

كومنق سون :

ما انت الا ثعبان .. في مسوح الرهبان ..

طارق حسن :

يا عم الله يكرمك .. عارفين انك ثائر مناضل .. بس لازم نقول نعم.. الجماعة بمكتب الاشراف قالوا لنا كده

اركتكت :

مشرفين عليك يا اخويا .. اما انا لا .. انا صخرة صماء ..

دامو :

ايه الصماء دي يا

architect ??

اوزاوز :

دي بيتدزا سوبريم يا ولية .. اسئليني انا

المهندسة :

يالهوي .. ولية مين يا راجل انتا .. حد يقول ولية بيوم جميل ز ي ده

دريم وذ مي :

يا جماعة روقوا ما يصحش كده .. لازم كلنا نكون فرحانين بالاستفتاء .. انا فرحانة وهاطير من الفرح .. من كتر مانا فرحانة حاسة اني عايزة ابوس السما .. حاسة ان الارض مش شايلاني .. حاسة انه هيغمى عليا

زوهيري :

فرحانة ليه يا بت انتي ؟؟ :closedeyes:

دريم وذ مي :

اهلا وسهلا عمو زوهيري .. فرحانة اني باصوت

زوهيري :

وتصوتي ليه .. وانتي مين ؟ انتي معانا بالمحاورات .. ؟

:closedeyes:

دريم وذ مي :

آه والله معاكم يا عمو زوهيري .. الكارنيه بتاعي اهو .. العضوة رقم 43545454545 بالمنتدى ..

زوهيري :

ما شفتكيش قبل كده .. :closedeyes: ..

اصلي مهم اوي .. جنتل اوي .. كتلة من الفن الرفيع هبطت عليكم

:closedeyes:

الباشمهندس ياسر :

هاتصوت بايه يا عم زوهيري ..

زوهيري :

وانتا يا استاذ انتا شايفني واقف عشان حتة الصندوق ده .. ؟

الباشمهندس ياسر :

ليه لا .. مهو كلنا جايين للصندوق ..

زوهيري :

لا يا سيدي .. انا الصندوق هو اللي يجيني ..

:closedeyes:

الباشمهندس ياسر :

امال واقف معانا ليه .. ومزود الزحمة ليه .. ؟؟

زوهيري :

مجرد احتكاك بالبوليتاريا .. تجربة نيرفانا روحية لكسر الاعتداد الشديد بالذات :closedeyes:

اوز اوز :

ايه الاحتكاك البولتاري ده .. تسلخات يعني .. ؟

باشمهندس ياسر :

حد يوقف بالطابور ده بمزاجه .. ايه العالم الرايقة دي ..

المشرف محمد :

انت يا باشمهندس .. هتصوت بايه .. ؟

الباشمهندس ياسر :

انا لا نعم .. ولا لأ .. انا وسط

انا من الناس اللي تشوفها باي مكان بالشارع

انا من الناس اللي تشجع الكورة ..

انا من الناس اللي تشرب المية .. وتاكل كبدة من محلات الكبدة

انا لو كنت لاعب .. كنت لاعب خط وسط

ولو كنت ملابس .. كنت هابقى حزام

ولو كنت بيضة .. كنت هابقى اللي بنص الطبق

ولو كنت خط عرض .. كنت هابقى خط الاستواء

انا الوسط ..

المشرف محمد :

طيب هتصوت بايه يا عم الوسطاني انتا .. هتصوت وسط ؟.

الباشمهندس ياسر :

لسه ما قررتش .. مرة اقول آه .. ومرة اقول لأ

مرة آه .. ومرة لأ

اركتكت :

وسط .. سلام يا وسط .. انا ماعرفش هز الوسط ده .. الاستفتاء ده يا ابيض .. يا اسود

المشرف محمد :

ايه قصتك يا مراغي انتا ؟؟ .. بكل حتة تطلع بالطابور زي عفريت العلبة .. ؟؟ مرة بوسط الطابور ومرة بنصه .. ومرة بآخره .. ما تهمد بقى ..

الباشمهندس ياسر :

مش بعيد يطلع لك من شباك اوضتك .. او من قزازة البيبسي .. او تلاقيه جوة براد الشاي

اركتكت :

دي روح الثورة .. اصلي بادور عن اللي لسه ما باركوش ليا بتوبيك الطوارق

لماضة :

يادي ام الطوارق اللي ذليت اهلنا فيه يا شيخ .. ايه دا يا اخواتي ؟؟ ( وش واحدة مفروسة آخر حاجة وهتخبط تيمور بالكسرولة على دماغه تجيب اجل الطوارق اللي بيلعبوا فيه

اركتكيت :

ويادي الوشوش اللي تطلع لك وذليتي الشعب فيها حتى بقى كل واحد يطلع وش ..

مسافر زاده الخيال :

أي نعم .. تبا لتلك الوشوش .. حتى انا بكل وقاري بقيت اتكلم بالوشوش دي .. حاقة تقرف .. ( وش أي قندي تشريفة ماسك مكانو وقرف الدنيا بوشو

لماضة :

مش لايقة عليك حكاية الوشوش دي خالص يا مسافر ..

فتفوتة :

انتم قاعدين ترغوا وما تنشروش ؟؟

النتائج المبدئية لاستطلاعات التصويت .. 70 % نعم .. 30 % لأ

انشروووووووووووووووووووووا

شيكو :

مش هانشر حاجة .. وسيبوني اتفرس النواحيدي لوحدي

اللهى يشيل منى ويحط عليك يا دكتور :كونجينسنتى

يجعلك فى كل امتحان لومباجو ....

لماضة :

نعم .. فيه ايه يا اوختشي .. بتبرطمي تقولي ايه . . ؟؟

شيكو :

اهي برطمة وخلاص ..

--------------------------------

وقال طائر الليل الحزين :

عندما تترددين .. و تتحيري

قولي ما تشائي .. لكن تذكري

من حقك ان تنتشي

ان تغضبي

لكن .. بعد قرارك فاتنتي

اياكي ان تتحسري

او حتى .. تتذكري

------------------------------------------

قالها الطائر .. وغناها زوهيري .. نشرت صورتها لماضة في ( الحياة صورة بتعرفنا يعني ايه حياة ) .. ودونتها بوسي في مذكراتها

يتبع ،،

[م تيمور المراغي]

يابني كفاية بقى ربنا يهديك قلبي وجعني من الضحك :happy:

انت مشعننه معاك اوي يا ساري بس لو تفلفلها شوية كده بالشطة الحمرا وانت عارف بقى

زانجا زانجا

إديها ,, :happy:

[الباشمهندس ياسر]

و الله كويس انها رسيت علي حزام

بس انا قلت لا

من اول لحظة

و حاربت عشانها

صالي علي رايي نا يا بدوي انت :blink:

[المهندسه]

يالهوى بجد يا سارى ..روعه روعه روعه

روح جديده جداا...مفاجأه كنت داخله و متوقعه اشوف فيلم ...لكن شوفت رائعه من روائعك

تحفه ...بجد موهوب ...وبجد انت ضيفت للمنتدى روح مختلفه و جديده و عملت حركه فى المنتدى و جمعتنا كلنا بعقلنا و قلبنا

ربنا يخلينا لك علشان تبدع اكتر و اكتر ..علشان احنا اعضاء المحاورات ملهمينك يا فنان...

بس بما انى بطله على طول فى افلامك و اعمالك الفنيه ..احب اعترض المره دى علشان دورى صغير ...ههههه

فنان يا ابنى و الله