اتجاه لتأجيل «الرئاسة» إلى يونيو 2012.. ولجنة ثالثة لحل خلافات «الإعلان الدستوري

[jasmin hamed]

قالت مصادر مطلعة إن تأخر المجلس الأعلى للقوات المسلحة في إصدار الإعلان الدستوري يرجع إلى حرص المجلس على صدوره بإجماع وتوافق كل القوى السياسية وطوائف المجتمع.

وقالت المصادر لـ«المصري اليوم» إن المجلس طلب من لجنة تعديل المواد الدستورية، التي جرى عليها الاستفتاء يوم 19 مارس الماضي، ترجمة التعديلات في صورة إعلان دستوري.

وأضافت أن اللجنة اجتمعت ووضعت تصورا مبدئيا، وقرر المجلس مراجعته بواسطة لجنة أخرى للتأكد من قبوله لدى المجتمع، إلا أن اللجنة الثانية اختلفت مع تصور اللجنة الأولى وعدلت فيه وأضافت إليه بعض المواد، وعلى إثر ذلك قرر المجلس العسكري تشكيل لجنة ثالثة مكونة من أعضاء اللجنتين وعدد من شخصيات المجتمع لوضع تصور نهائي للإعلان الدستوري.

من ناحية أخرى علمت «المصري اليوم» من مصادر مطلعة أن هناك اتجاها قوياً داخل المجلس الأعلى للقوات المسلحة لإجراء انتخابات مجلس الشعب في سبتمبر المقبل مع تأجيل انتخابات الرئاسة إلى يونيو من عام 2012 لحين الانتهاء من وضع مواد الدستور الجديد قبل انتخابات الرئاسة.

كان العديد من القوى السياسية طالب بتأجيل إجراء إنتخابات مجلس الشعب والرئاسة لحين الانتهاء من وضع الدستور بواسطة لجنة تأسيسية يشكلها المجلس الأعلى للقوات المسلحة. وهو ما عبر عنه الكثير من الآراء والتحليلات المحذرة من ترك مهمة وضع دستور جديد لبرلمان قائم على دستور 1971 المعطل.

ومن بين هؤلاء الدكتور محمد البرادعي الذي أكد في تصريحات له أنه ضد الدستور السابق شكلا ومضمونا حتى بعد تعديله، وأن الأفضل لمصر في هذه المرحلة وضع دستور جديد قبل إجراء انتخابات الرئاسة والبرلمان

http://www.almasryalyoum.com/node/375150

[jasmin hamed]

انا مش مطمنه و حاسه الجيش مستفيد من فرقتنا و ابتدا يفتكس

[se_ Elsyed]

ده عند ماما هناك ...

يبقى كده كرفنا على ثورة 52 وشويه شويه نلاقي طنطاوهي فوق راسنا أو سامي عنان

وده شخصياً على جثتي ...

[arkan]

نتمنى من الجيش تفسير واضح للي بيحصل

الجيش مكانه حودنا ليه ؤيفضلوا معانا لغاية 2012 والدنيا ملتهبة خارجيا

هل نضمن اسرائيلا تعمل اي حاجة

الدولة مدنية دى لازم يبقى اول شعار يوم الجمعة

[Dreamwithme]

بصراحة ياجماعة أنا لما قريت الخبر ده بصراحة قعدت أضحك لغاية مااتشقلبت علي ظهري

دي مفاجأة الجيش للشعب المصري بعد الاستفتاء العظيم

إن بالرغم من إن الأحداث اللي بتحصل دلوقتي وهي للتذكير :

1-الفراغ الدستوري نتيجة لتأخر الاعلان الدستوري

2-ازدياد الفوضي وعدم الاستقرار (راجع ثورة الماس الكهربائي في أنحاء ربوع مصر)

3-تأخر الانتخابات الرئاسية وتأخر تسليم السلطة لرئيس مدني منتخب

كل هذا وأكثر كان كوووووووووووووووووووووووول الناس بما فيهم سيادة اللواء ممدوح شاهين من المجلس العسكري بيقولنا إن ده هيحصل ياولاد لو قلتوا لأ علي الاستفتاء

وتمر الأيام يا ولاد ويعدي الاستفتاء ويثبت شعب مصر العظيم إنه علي قدر المسئولية وتطلع نتيجة الاستفتاء بنعم

ثم .......أن أننن أننن (موسيقي تصويرية)

إذ فجأتن كده السيناريو اللي يحصل هو بتاع لأ مش بتاع نعم خالص

ونعم المفاجأت بصراحة .......يعني الشيخ محمد حسين يعقوب يطلع يقول إنه كان بيهزر والجيش يثبت لنا إن الاستفتاء مكانش له أي لزمة

يعني برضه كان بيهزر مع الشعب .....إنها حقا الثورة الضاحكة

[fatfouta]

1-الفراغ الدستوري نتيجة لتأخر الاعلان الدستوري

هو كله الا الفراغ الدستورى اللى احنا عايشين فيه ده

http://www.youtube.com/watch?v=VyhUFvRhtdo&feature=player_embedded

[se_ Elsyed]

نتمنى من الجيش تفسير واضح للي بيحصل

الجيش مكانه حودنا ليه ؤيفضلوا معانا لغاية 2012 والدنيا ملتهبة خارجيا

هل نضمن اسرائيلا تعمل اي حاجة

الدولة مدنية دى لازم يبقى اول شعار يوم الجمعة

طب لو نتنياهو طلع وحلف بالطلاق إنه ما عاوز حاجه من مصر وإن إسرائيل هاتنسحب إلى خطوط ما قبل حرب 76 ..... إيه كده الجيش هايطمئن ويفضل معانا ؟

أسف ...

فلو الشيطان وز أي حد في المجلس العسكري وفكر في كده .. يبقى فعلاً هاتبقى دي هي الثورة المضادة والخيانة العُظمى لشعب وثق في جيشه

لكن

وأه من لكن

زي ما بقى لنا سنين طويلة بنراهن على الشعب المصري

فمازال الرهان قائماً ...

لكن للأسف .... ثورة الشعب هذه المرة ستكون أكثر عنفاً ... فما أصعب الشعور بالطعن في الظهر ...

وإذا كان المجلس العسكري يشعر بفراغ عاطفي كما يُمكن أن يتصور أحد ..

فالحل بسيط جداً ويتمثل في مجلس رئاسي يضم مدنيين ... وجميع أعضاءه لا يترشحون في الإنتخابات الرئاسية المقبلة

[arkan]

ياستاذ سي السيد

أكيد مش قصدي انا الجيش ينصرف حالا ويسيب البلد في وضع اللا نظام ده

انماشغل الجيش الاساسي الدفاع عن البلد والتاهب لذلك

امال قلنا نعم ليه

علشان سرعة تسلببم البلد لحومة من الشعب وماتحلاش السلطة في عينه

بس برضه في الاخر لازم التاكد ان ده هو فعلا توجه الجيش

وربنا يستر

ومش خايفة الناس لسة صاحية

[Ahmed Anwer]

هوا كده الجيش أخذ اسوأ شئ من كل سيناريو ،،،

ميزة نعم ،،، كانت إنها أسرع في الإنتقال لحكم مدني منتخب

و ميزة لأ ،،، كانت إنها أسرع في وضع دستور جديد

كده كله بيتأخر

و الحكم العسكري بس اللي بيطول !!!

حد فاهم حاجة !!!

عموما ده لسه توقع و من المصري اليوم بتاعت المؤتمر و ال 90% لأ

[أبوعمار]

هي دي اللي هاتبقى كوكاكولا زيرو بجد:

إن الشعب يقوم بالثورة ... ونمجّد في الجيش لنزاهته

وفي الآخر نشرب المقلب والجيش يحكمنا

يعني حتى ما حصلناش ثورة 52

لأن كده الجيش أخدها بيضة مقشرة ... من غير تخطيط ولا تكتيك ولا ثورة ولا وجع قلب

يا حلالالالالالالالالالالالالاوة

[se_ Elsyed]

أقسم بالله ده يبقى حتة قفا .. إنما إيه .. من النوع اللي بيطرقع

قال و 77 % نعمين عشان الجيش زهق وعاوز ينقل الحكم لسُلطة مدنية بسرعة ... ونحط الكريم شانيتة ولا نعمل الكيكه الأول ... يعني إنتخابات مجلس شعب ولا إنتخابات رئاسية ... ها .. تختاروا إيه ؟ وفي الأخر لا طولنا ده ولا داهوت

وها هي بالونة إختبار أخرى يطلقوها ... وكأنهم لم يتعلموا من الثورة ولم يتعلموا إن الشعب المصري خلاص صحي ولن يرجع إلى ثباته العميق مرة أخرى ...

بقى هما عاوزينها كده ؟

موت يا حمار بقى لحد يونيو 2012 .. وتكون ناس ماتت وناس عاشت وبلاد تشيلنا وبلاد تحطنا ... وبمبه تنضرب هنا ولا هنا وهووووووب تطلع مطالب شعبوية تقدمية بوجوب وجود الجيش في السُلطة لحمايتنا

وخلوا بالكم .. في سيناريو أخر موازي لهذا .. وهو إن زيد عند عبيد... واللي في السجن في السجن .. واللي في شرم في شرم ... وتأجيلات وتسويفات و و و و و و ...

مش ملاحظين حاجه غريبة ؟

إن لا جريدة ولا مسئول ولا برنامج إعلامي وضع في إعتبارة الثروات المنهوبة من مصر ولا إتكلم على إنها ممكن أن تنتشلنا من حالة الضياع اللي بقى لنا فيها 30 سنة وزادتها الثورة الي بالتألي كان لها تأثير سلبي على الإقتصاد .. تفتكروا ليه ؟؟ إيه .. دي فلوس مش مضمونة ولا عليها نزاع معقد ولا مشكوك إنها ممكن ترجع اساساً ؟

طبعاً ده سيناريو مسخره ... لإن كان من الأولى بقى إننا نخلي مبارك لحد أغسطس على ما يسلم السُلطة وأهو كان مننا وعلينا وكنا عارفينه .. وما كانش المئات دي ماتت ولا ناس ضحت وإتخرب بيوتها ...

لكن لأ

أقسم بالله لأخر نفس .. سنظل ننتزع حريتنا بإدينا ....

وسنظل نقول كلمة الحق ولو على رقابنا ...

[Simba]

كفاية علينا عناوين اخبار الجرايد :closedeyes:

كل يوم تجميد ثروة كذا

كل يوم بلاغات للنائب العام

كل يوم تحقيقات

واللي قتلوا المتظاهرين شوية كده يتحاكموا قدام الجنح مش الجنايات ويقولوا لهم تؤ تؤ عيب ما تعملوش كده تاني ولما يبقي فيه مظاهرة ابقوا العبوا مع بعض

البرادعي قال نعمل مجلس رئاسي

قالوا عليه جاي علشان يسرق الثورة وخليه قاعد مطرح ما جه

الجماعة بتوع انا اسف يا ريس بقوا شغالين زي النحل

وشباب الثورة بقي خلافات وائتلافات

لا الحزب الوطني اتحل

ولا صفوت وسرور اتحاكموا بتهم الفساد السياسي

وجمال بيصيف في شرم

ولا الاعلام اتطهر

واسامة سرايا بيقول الشعب يمشي انا مش هامشي

ولسه مشرفين المحاورات هما هما ما اتغيرووش :P

[مسافر زاده الخيال]

بعد السلام والتحية,,,,

لاشك ان اعداء الامة يريدون (الشر) بمصر و كل العالم العربي واعني كله (من المحيط الى الخليج).....وما يحاط بمصر والسعودية اكبر واكثر,,,,,,,,,,,واخشى ان خطة اعداء الامة (و انا من المؤمنين بنظرية المؤامرة لابعد الحدود) ستلعب على الوقيعة بين الشعب والجيش(الامل الباقي لحفظ تماسك الامة)....فمصر الان تواجه تهديدا حقيقيا تهون تجاهه كافة الاصلاحات (الانية) فشمالا تهديد الصهيونية و جنوبا (دولو جنوب السودان العضو الدولي الجديد)مما يعني عمليا ضغطا على مصر في موضوع اتفاقية النيل وغربا (بعض سقوط ليبيا المرتقب) ستكون الدولة الجديدة رهنا لقوى الاستعمار لا محالة....و غربا ستكون ساحة البحر الاحمر و مياهه الاقليمية ممرا يستحيل السيطرة عليه....(اضافة للتغلغل الايراني الصفوي الذي اصبح حقيقة ماثلة لكل ذي عين)كل تلكم تنذر باخطار قادمة ورياح عاتية .....مما يجب ان نفتح عيوننا جيدا ولا نصبح اداة للخارج لتخريب البقية الباقية من المؤسسات الفاعلة

حمى الله كافة بلاد العرب من الاخطار القادمة

[jasmin hamed]

مش ملاحظين حاجه غريبة ؟

إن لا جريدة ولا مسئول ولا برنامج إعلامي وضع في إعتبارة الثروات المنهوبة من مصر ولا إتكلم على إنها ممكن أن تنتشلنا من حالة الضياع اللي بقى لنا فيها 30 سنة وزادتها الثورة الي بالتألي كان لها تأثير سلبي على الإقتصاد .. تفتكروا ليه ؟؟ إيه .. دي فلوس مش مضمونة ولا عليها نزاع معقد ولا مشكوك إنها ممكن ترجع اساساً ؟

...

هو ده مربط الفرس

مبارك لازم ياقبض عليه و لازم نصادر كل ممتلكاته دلوقت و حالا و فورا

يعنى ياربى ابقى مسروقه و ابنى هيموت من الجوع و انا عارفه الحرامى فين ماقبضش عليه

احا بنتسرق بقالنا ٣٠ سنه لو رجعنا عشر الفلوس ديه هتتحل نص مشاكلنا

اتفرج ياسيدى على المليارات الى اتباعت بملاليم

يعنى الى باع و الى اشترى يستحقو الشنق يا ربى فيه فجر كده

http://www.youtube.com/watch?v=u9KM95YT_B4

[ام سلمي]

جبهة التهييس الشعبية

وده خبر برضه من مصادر مطلعة بس انا ظني انه جس نبض، لأني عارفة ان المثقفين والسياسيين والنخبة لهم مصلحة في ان الجيش يقعد، وامريكا كمان لها مصلحة في ان الجيش يقعد لحد ما تحضر البديل، وعشان تلحق كمان تخترق بقى كل الاحزاب اللي حتتعمل جديد، ما احنا اخدناها على خوانة

وانا شخصيا صوت بنعم على الجدول الزمني اللي حطه الجيش، وباطالب الجيش انه يلتزم بالجدول الزمني اللي احنا صوتنا عليه، مش ممكن نصوت بنعم يقوم يتعامل معانا على اننا صوتنا بلا ويقعد برضه

اصلا مافيش فرق كبير بين لا ونعم ولولا اننا مش فاضيين كنت طلبت تحقيق في مين اللي ورا هلولة نعم ولا، وليه اللي قالوا للناس نعم فهموهم ان لا كارثة وليه اللي قالوا للناس قولوا لا فهموهم ان نعم كارثة.. ليه الكدب والتدليس ده؟

الاتنين اعلان دستوري، واحد بمواد كنا عارفينها، والتاني بمواد ما نعرفهاش وغالبا كانت حتبقى هي المواد اللي اتعدلت برضه، لأن ما عندهمش وقت يكتبوا اعلان دستوري جديد

في الحالتين ما يقدروش يرجعوا لدستور 71

في الحالتين ما يقدروش يكتبوا الدستور الجديد لوحدهم

وانا اخترت نعم عشان لو اعلان دستوري يبقى اصوت على المواد اللي اعرفها بدل ما يفرضوا عليا مواد ما اعرفهاش، والاهم عشان الجيش كان حاطط جدول زمني، لأن ما كانش حيحصل ابدا ان حد حيعمل جمعية تأسيسية ومجلس رئاسي وكل الخيالات اللي اتصورت في حالة ما صوتنا بلا، كنا برضه حنستنى البرلمان والرئيس عشان يعملوا لنا الدستور الجديد بس المفروض كنا حنقعد مدة اطول

يبقى ليه بقى يستفتونا في حاجة وبعدين يرجعوا يسمعوا كلام عمرو حمزاوي وضياء رشوان برضه اللي عمالين يقولوا لهم اقعدوا سنتين تلاتة؟ هم بيسألونا احنا ولا بيسألوا عمرو حمزاوي وضياء رشوان؟ وبعدين يحيى الجمل هو اللي معطل الاعلان الدستوري دلوقت، طب يحيى الجمل ايه اللي حشره في حياتنا اساسا؟ اذا كان هو اللي عامل دستور 71 اللي احنا محتاسين فيه ده، واشتغل مع السادات، واشتغل مع مبارك، واشتغل مع شفيق، وكمان مفروض علينا دلوقت في حكومة شرف؟ ويعني ايه نائب رئيس الوزرا؟ ايه اهميته يعني بيعمل ايه غير انه طالع لوحده كده يقول مش عايزين نحاكم مبارك، وعفا الله عما سلف، وعمال يعطل في الدستور ويقول نشيل الالف واللام، هو ايه صفته اساسا؟ ايه شغلته من الاصل؟ بيعمل ايه في حياتنا يعني غير ان زكريا عزمي هو اللي فارضه؟

اعتقد ان المجلس العسكري محتاج يعرف رأينا عشان كده نزل الخبر ده، وانا شخصيا باقول اني مش موافقة على الكلام ده، انا ما صوتش على نعم عشان برضه الجيش يقعد، والا الاستفتاء ما كانش له لازمة من اساسه، مصروف على الفاضي

واحنا عايزين من المجلس العسكري انه يوجد الية يعرف بيها راي الشارع المصري بدل ما يقعد يجتمع بالنخب.. النخب دي مش كويسة، ولهم مصالح شخصية ومتعودين على الصفقات، وحملاتهم كلها في الاستفتاء كانت مبنية على المصالح الشخصية، وعشان مصالح شخصية قعدوا يخوفونا من الخيارات اللي تخالف مصالحهم زي سيف الاسلام القذافي ما قعد يخوف الليبيين، اللي حياخد مقاعد في البرلمان قال لو صوتوا بلا حتموتوا بالحصبة، واللي مرشح للرئاسة قعد يقول لو صوتوا بنعم رغيف العيش حيبقى بألف جنيه، كل ده عشان كل واحد فيهم مستعجل على السلطة

طب احنا كشعب يعني.. الشعب ده اللي لا حيبقى عنده مقعد في البرلمان ولا هو مرشح للرئاسة وهو اللي عمل الثورة، ماحدش بيحاول يسأله ليه؟ حتى الاستفتاء اللي اتسألنا فيه طلعت النتيجتين زي بعض كانوا بيخلونا نلعب ديمقراطية عشان ننبسط

على الاقل عشان تبقى النصيحة مخلصة يسألوا ناس مالهاش مصالح، ومافيش حد مالوش مصالح غير الشعب.. طب على الاقل اسألوا اللي شارك في الثورة يعني مش اللي كان قاعد طول الثورة بيقترح اقتراحات زي الطين عشان "يحل الازمة" وفضلوا يقولوا على الثورة "الازمة" طول التمنتاشر يوم

على اي حال المصري اليوم عاملة استطلاع رأي هنا يمكن يكونوا عاملينه عشان يساعدوا المجلس العسكري في استبيان الرأي العام على الاقل على النت

انا مش حاقول لكم اخترت ايه، عشان هم كتر خيرهم منزلين دستور 54 والدستور الالماني عشان تحملوه وتقروه، كده احسن.. عشان نقرا احنا ونفهم بدل ما الناس لعبت بينا الكورة في الاستفتاء اللي فات وكل واحد فيهم قعد يهوبص وفي الاخر طلع الفريقين اللي كانوا بيروحوا لنعم وللا بيضحكوا علينا والنتيجة هي هي

-----

[Ahmed Anwer]

الصفحة الرسمية لحكومة عصام شرف

المجلس الاعلى للقوات المسلحة: يؤكد انه لا صحة للانباء التى تناقلتها وسائل الاعلام المختلفة عن تأجيل الانتخابات الرئاسية لعام (2012), كما يؤكد المجلس أن القوات المسلحة تسعى لانهاء مهمتها فى اسرع وقت ممكن وتسليم الدولة إلى السلطة المدنية التى سيتم انتخابها بواسطة هذا الشعب العظيم .

[fatfouta]

الصفحة الرسمية لحكومة عصام شرف

المجلس الاعلى للقوات المسلحة: يؤكد انه لا صحة للانباء التى تناقلتها وسائل الاعلام المختلفة عن تأجيل الانتخابات الرئاسية لعام (2012), كما يؤكد المجلس أن القوات المسلحة تسعى لانهاء مهمتها فى اسرع وقت ممكن وتسليم الدولة إلى السلطة المدنية التى سيتم انتخابها بواسطة هذا الشعب العظيم .

[ذهبية]

ماهو بطىء الاجراءات فى كل حاجة هى الىل بتخلى الاشاعات تطلع

و يخلى اللى يصطاد فى المية العكرة يضرب كرسى فى الكلوب و يقعد يتفرج

اية البطىءءء دة

كل حاجة فيها تخبط و تردد و خمسين راى فى كل قناة افتح اى قناة هتلاقى كل ضيف عمال يتكلم على مزاجة

و شغال بلبلة فى دماغ لناس بسبب البطىءءء بسبب التعتميم بسبب عدم وضوح الرؤية

اية الحال المايل دة

تصدقوا فعلا لما كنا بنطلع كل جمعة بثورة فى التحرير تلاقى قبلها بيوم القرارات تطلع ترف

التنفيذ على ودنة

لما الثورات هديت الكل نام

طيب نرجع نصيحهم تانى بقى ازاىىىىىىى

[Alshiekh]

بعد تكذيب المجلس العسكري للخبر ، اصبح الاستمرار فى الموضوع غير ذى فائدة

سيتم غلق الموضوع