نداء إلى المشرفين..أين أنتم من الترتييب لندوة نقابة الصحفيين

[المدهش]

السيدات والسادة الأفاضل المشرفين على أبواب محاورات المصريين..أرجوكم المشاركة معنا في الترتيب لندوة كتاب محاورات المصريين المزمع إقامتها يوم الثلاثاء القادم 5/4 بنقابة الصحفيين ولم يتم شئ بشأنها حتى الآن..وأنا قلق للغاية من نقص الحضور، وأخشى ألا تخرج بالشكل الذي يليق بكم وبمنتداكم الراقي..أرجو الاتصال بي للتنسيق

محمد رفعت 0113004566

[se_ Elsyed]

شكراُ لمجهودك يا محمد وربنا يكرمك يارب

للأسف الحمل تقيل على الاستاذ عادل .. وهو الوحيد اللي في القاهرة .. وعم أبو محمد في إسكندرية .. وباقي المشرفين إما سيدات أفاضل وقتهم مش ملكهم والباقي يعملون خارج مصر

عشان كده أرجو أن نخرج من نطاق المشرفين فقط ... وبالتالي يُشاركنا الأعضاء الافاضل أفكارهم وحماسهم في الحضور

أنا من ناحيتي هاكلم كل أصدقائي في مصر عشان يحضروا ...

قول لي بقى ... التعديلات اللي تمت في الصحف القومية اخبارها إيه معاك ؟

[المدهش]

شكرا لاهتمامك يا استاذ جابر..لكن أنا قلقان فعلا من عدم حضور عدد كاف، خصوصا أنني أحاول الاتفاق مع بعض برامج التليفزيون لتصويرها..وأقدر وجودكم بالخارج وترجعوا لنا بألف خير وسلامة..لكن أرجو مشاركتنا في لفت نظر الأعضاء لأهمية المشاركة والحضور..أما التغييرات الصحفية فقد شاركنا والحمد لله في إقرارها، وفكرة اختيار رؤساء التحرير بالانتخاب كنا والحمد لله أول من طرحها..ويكفي أن هذه التغييرات خلصتنا من وجوه كريهة مثل مجدي الدقاق وعبدالله كلام والقط والفار وبقية البرتيتة الفاسدة التي أساءت إلينا جميعا وإلى صورتنا كصحفيين.

[se_ Elsyed]

شكرا لاهتمامك يا استاذ جابر..

جابر ؟؟؟؟؟!!!!

طيب .. على العموم مش وحس جابر برضوا

وأهو جبر الخواطر على الله

ربنا يجبر خاطرك يا مدهش هههههههه

[ابو محمد بن مصطفي]

شكرا لاهتمامك يا استاذ جابر..

جابر ؟؟؟؟؟!!!!

طيب .. على العموم مش وحس جابر برضوا

وأهو جبر الخواطر على الله

ربنا يجبر خاطرك يا مدهش هههههههه

صحيح مين جابر ده

[Alattar]

شكرا لاهتمامك يا استاذ جابر..

جابر ؟؟؟؟؟!!!!

طيب .. على العموم مش وحس جابر برضوا

وأهو جبر الخواطر على الله

ربنا يجبر خاطرك يا مدهش هههههههه

علي فكره يا سين سين

انت مرة فعلا قلت في مداخلة ليك..حاجة كده زي أنا جابر الشرقاوي و ما ينضحكش عليا أبدا

مش فاكر طبعا الموضوع ده لأنه كان تقريبا من سنتين..تقريبا كان عن تشطيب الشقق و المكاتب اللي بتشطب و كده

حتي أنا يومها افتكرت ان اسمك جابر برضه

[Ahmed Anwer]

طيب يا ريت الإدارة تدمج كل المواضيع اللي بتتكلم عن الندوة في موضوع واحد ،،

عشان نقدر نتابع و الأفكار كلها تبقي في مكان واحد ،،

أنا رديت في موضوع الأستاذ عادل أبو زيد و اقترحت إقتراح

[المدهش]

الله ينور عليك يا عطار..فعلا سي السيد قال أنا جابر الشرقاوي في موضوع حكاياتي مع ديكوراتي وهو ضمن كتاب المحاورات..يعني العتب على الموضوع..برافو عليك يا صديقي..لكن برضه ما قلتوش مين هييجي الندوة ومين هيتكلم..واتفق مع التليفزيون ولا ما حدش هييجي وتبقى مصيبة؟!!!

[عبير يونس]

كان نفسي فعلا أكون في مصر

و كنت أتمنى أن أتواجد في الندوة

و أكيد كنت حأرتب وقتي و ألاقي لها وقت

هو احنا كل يوم عندنا كتاب عن المحاورات:wub:

لكنني بكل أسف مقيمة خارج مصر

ما أنصحش بالتلفزيون دي إلا لما تكون حضرتك متأكد تماما من عدد المشاركين

و استعدادهم للكشف عن شخصياتهم الحقيقية

متخافش من فلول أمن الدولة يا أستاذ تونسي

ما همة كده كده عارفين كل حاجة عن حضرتك :closedeyes:

[الباشمهندس ياسر]

مساء الورد

ما هو لو حد كان عبرني ف موضوع بفكر ارشح نفسي لمجلس الشعب و حاول انه ياخد بايدي و يقولي حتي بيقدموا ع العضوية ازاي و يحجزوا الشعار ازاي

كنت هشارككم و اجيبلكم معايا عشرة اتناشر نفر حتي

بس يلا المسامح كريم

ادونا التفاصيل و شوفوا ايه احتياجاتكم و معاكم بأمر الله

[أسد]

كتاب محاورات المصريين ليس ملكاً للمشرفين ..

بينما هو ملك لك اعضاء المحاورات ... وهم على قدر تلك المسئولية

فمن هنا

ندعوا جميع الأخوة الموجودين في القاهرة بذل أقصى مجهود للتواجد وحضور الندوة

الموضوع عظيم .. ومحاورات المصريين من أقدم المنتديات الجادة في مصر .. وقد تكون في الوطن العربي ..

واستمراريتها دليل على جديتها وأهميتها

أكم من مواقع بدأت وانتشرت ثم إختفت وتلاشت

محاورات المصريين ثروة يجب الحفاظ عليها

للأسف لو كنت موجوداً في مصر .. لكان من دواعي شرفي أن أكون موجوداً هناك

[Alshiekh]

للأسف

لست موجودا بمصر

الغربة حرمتنا من كل الاشياء الحلوة

[عطر الجنة]

يعنى انا ممكن احضر

و انا مش مشرفة ولا اى شئ

عادى يعنى

[أبو محمد]

يعنى انا ممكن احضر

و انا مش مشرفة ولا اى شئ

عادى يعنى

طبعا يا فندم .. فالندوة لجميع الأعضاء وغير الأعضاء

الدعوة لكل من يهتم بما يتحاور حوله المصريون

[AbkaReno]

تم حجز التذاكر يوم 5 وهكون معاكم ان شاء الله

مصر وحشتنا

[tarek hassan]

من ناحية الأستاذ محمد رفعت فحضرتك عرضت بعض أجزاء من الكتاب تتحدث عن شخصيات بعض المشرفين والأعضاء وهؤلاء طبعا إما مغتربون أو سيدات أو ليسوا بالمنتدى الآن لأي سبب وبعضها موضوعات قديمة وكان من الأفضل من وجهة نظري المتواضعة إن حضرتك تعرض نموذج من الموضوعات الجادة الساخنة وما أكثرها من التي ذكرتها في الكتاب أو وضع عناوين للندوة لتكون دافعا أقوى للحضور ومن أجل تكوين صورة في الأذهان للمضمون الذي سيكون في الندوة

ومن ناحية الأستاذ : عادل نفس الشيء إعلام المتواجدين في المنتدى فقط ليس كافيا ( لنفس الأسباب ) بل أرى إرسال رسائل عبر الإميل للكثير من الأعضاء ليتسنى لهم العلم بتلك الندوة فضلا عن علمهم بصدور الكتاب عن محاورات المصريين

[لماضة مصرية جدا]

السلام عليكم و رحمة الله و بركاته

استاذ محمد....المدهش

جزي الله حضرتك كل خير علي ترتيباتك و مجهودك...و ربنا يوفقك

ع فكرة انا مش متخوفة من حكاية عدد الحضور...و بضم صوتي لاستاذ طارق حسن...المحاورات مذاقها الخاص انها وطن المغتربين....و بالتالي خلي الناس اللي في مصر تعرف ان المغترب لما سافر و شال شنطة سفره...مخدش بس معاه هدومه و كتبه....شال جوه ضلوعه حلم العودة....و ده اللي لاقاه في المحاورات

فطبيعي جدا.....ان وطن الاغتراب....مواطنيه....لن يتواجدوا....(بحاول اني مزعلشي....و بحاول افكر في فوكيرة لوذعية...قمة الجنون....بس ربنا ييسر)

ممكن اقترح اقتراح خاص بالتنظيم

ليه ميكونشي فيه عرض باور بوينت عن المحاورات

هي صحيح ندوة حوارية...لكن احنا بنتكلم عن ازاي عالم افتراضي...و منتدي قدر يصمد لمدة 8 سنوات....و قدر انه يقدم صورة الوطن للمغتربين عن طريق التواصل الانترنتي

يبقي ندخل حتة تكنولوجيابقي

و اقتراحي العرض التقديمي يغطي النقط التالية:

1- ازاي المنتدي ابتدي....تاريخه و نشأته.

2- ازاي المنتدي....الوطن.....و الوطن اللي مغبشي عن عينينا و بنشتاقله من خلال كتابتنا في المنتدي

3- و ده الاهم من وجهة نظري....ازاي المنتدي....كان بيعالج قضايا الوطن مش بس وقت الثورة و متابعة لام التوبيكات....متهيالي استاذ عادل و الاعضاء القدامي عندهم خبرة اكتر بالتوبيكات دي

4- لازم يكون فيه استعراض برضه سريع للجانب الشخصي....اللي بيطرحه المنتدي...صحيح بنكتب باسماء مستعارة...لكن احنا بنتشارك تاملات في حياتنا الشخصية يمكن القريبين في الحقيقة ميعرفوهاش

و ازاي ان الثراء الحقيقي للمنتدي....هو بتنوع خلفيات اعضاءه و ثقافاتهم و الدول اللي بيقيموا فيها.

5- نرسم صورة للمنتدي عن اللي هيبقي عليه في 3 سنين قدام

صحيح.....احنا حزب "مع الاسف"....ايون اصلي لقيت كل مغترب دخل و قال مع الاسف مش هقدر احضر.... ;)

بس ممكن في جملة واحدة نبعت احساسنا و رؤيتنا للمنتدي

و برضه ممكن نساعد في ان احنا نصمم و نجهز الباور بوينت

و انا عليا فرعين النور....و شاشة المونتير....و الفراشة و كافة شيء

بس خلاص

كان معكم

لماضة

متعهد افراح :)

صباحكم.........وطن...حتي و لو كان افتراضي

[ابو محمود]

اتمنى ان الكتاب يعرض نبذة عن مواضيع مختلفة وتيارات فكرية مختلفة لاننا هنا فى المحاورات الرآي والرآي الأخر يعنى مش يكون للمغتربين فقط لانة ببساطة سيكون غير جاذب لان الموجودين فى مصر بيكون تفاعلهم فى التحاور واسراء المواضيع سلس ونشر المحاورات بين المصريين فى الداخل مهم جدآ فى العهد السابق كما هو الان فالطريق مازال طويل ومصر تحتاج الى من بالداخل لتغيير ثوبها وتعديل مسارها وكما ان المحاورات هى متنفس للمغتربين فهى ايضآ متنفس صحى لمن فى داخل القطر المصري لانها تعمل على تخفيف ضغط الحياة لما تقدمة من تنفيس عن ما بصدور اعضائها بالداخل من هموم ومشاكل تخص جميع المصريين وليس من خرج منها طلبآ للرزق او هربآ من أمن او بلوغآ الى مكان يليق بة لان بالداخل من يقف شامخآ يكافح ويجابة بنفس قوية كل مآسى الفساد بمصر

اذآ لابد من ارسال دعوات من خلال الميل لكل الأعضاء كى يتم التنسيق والتفعيل بينهم حتى تكون الندوة حدث يليق بالمحاورات التى تعتبر قاعدة للعقول الافتراضية التى تبحث عن رفعة مصر وتجميل وجهها العمل على محاربة السلبيات والبحث عن الايجابيات وأبرازها لكل المصريين

تمنياتى بالنجاح لكل مايمت الى محاورات المصريين

ربما اكون مشغول بالعمل لكن هذا لا يمنعنى من ان ابذل جهدى لأنجاح اى شيء ينفع المحاورات ويرفع من شأنها

انا فى الخدمة .. محمود مصطفى

[Advisor]

تم وضع banner يشاهده كل من يتصفح محاورات المصريين سواء كان ضيف أو عضو (عدا فريق الإشراف) يحمل الدعوة لحضور الندوة ، كما تم إرسال رسالة إليكترونية لجميع أعضاء محاورات المصريين بما فيهم قدامى الأعضاء الذين تركوا محاورات المصريين.

ما سبق كان إستهلالا لابد منه

الندوة و الكتاب عبارة عن حدث مهم فى تاريخ الإعلام التفاعلى فى مصر .... و اللقاء بين أعضاء محاورات المصريين يعتبر حدثا جيدا لكل أعضاء محاورات المصريين.

لا أعرف إذا كان سيتوفر projector لإستخدامه أثناء الندوة ؟

الفاضل محمد رفعت متردد فى دعوة التليفزيون لتسجيل الندوة و سبب التردد هو عدم معرفة عدد الجمهور المتوقع حضوره.

و للعلم إمكانية عقد ندوة فى نقابة الصحفيين يعتبر إنجازا مهما نشكر الفاضل محمد رفعت عليه و معلومة بسيطة إيجار القاعة وحده فى حالة توافر موافقة النقابة عبارة عن مبلغ 1500 جنيه و كما ذكرت موافقة النقابة وحدها تمثل إنجازا جيدا.

[لماضة مصرية جدا]

تم وضع banner يشاهده كل من يتصفح محاورات المصريين سواء كان ضيف أو عضو (عدا فريق الإشراف) يحمل الدعوة لحضور الندوة ، كما تم إرسال رسالة إليكترونية لجميع أعضاء محاورات المصريين بما فيهم قدامى الأعضاء الذين تركوا محاورات المصريين.

ما سبق كان إستهلالا لابد منه

الندوة و الكتاب عبارة عن حدث مهم فى تاريخ الإعلام التفاعلى فى مصر .... و اللقاء بين أعضاء محاورات المصريين يعتبر حدثا جيدا لكل أعضاء محاورات المصريين.

لا أعرف إذا كان سيتوفر projector لإستخدامه أثناء الندوة ؟

الفاضل محمد رفعت متردد فى دعوة التليفزيون لتسجيل الندوة و سبب التردد هو عدم معرفة عدد الجمهور المتوقع حضوره.

و للعلم إمكانية عقد ندوة فى نقابة الصحفيين يعتبر إنجازا مهما نشكر الفاضل محمد رفعت عليه و معلومة بسيطة إيجار القاعة وحده فى حالة توافر موافقة النقابة عبارة عن مبلغ 1500 جنيه و كما ذكرت موافقة النقابة وحدها تمثل إنجازا جيدا.

السلام عليكم و رحمة الله و بركاته

لما كنا بناجر بروجكتر حوالي 150 جنيه ...(من سنتين تقريبا...دلوقتي مش عارفة الاسعار ايه في مصر)

رايي الشخصي.....ان تغطية التلفزيون برضه مهمة و ع فكرة ملهاش اي علاقة بعدد الحضور لان ده تسويق اعلامي للفكرة

لو في اسوا الظروف حصل ان فيه عدد قليل....ده بيعتمد علي كادر الكاميرا و الصورة بتتلقط ازاي

سؤال بقي...و ارجو ان حضرتك تعتبرنا فعلا كلنا مشاركين في الموضوع ده

ايجار القاعة مين راح يتحمله....انا مش شايفة ان لا استاذ محمد و لا المشرفين مسئوليتهم خالص

المنتدي ده بتاعنا كلنا....يعني اهل المحاورات كلهم مسئولين عنه....من فضلك خلي يبقي عندنا فرصة ان احنا نشارك معاكم

ليه منعملشي فكرة كده زي صندوق المحاورات عشان ندعم فكرة الكتاب و فكرة التسويق ليه كمان

انا معاكم....باذن الله و اللي يتولي مسئوليته اي حد من الثقاة و كلكم نحسبكم علي خير

ايه راي حضرتك بقي؟؟؟

ربنا يوفقكم وييسر الامور و يذلل كل عسير

سؤال جانبي هو الدخول بدعوات....و لا الدعوة عامة؟؟؟؟