يوميات مواطن مصرى عادى فى الثورة

[raouf]

طبعا انا ناقل القصة مش انا اللى كاتبها

اسلوب الكاتب اكثر من رائع واتحى ان حد مايضحك ويموت من الضحك كمان

انا وعدت حبيبى سين سين انى هاجيب كاتب يتحداه فى الكتابة الساخرة ( شرير باسخن سين سين علشان يورينا ابداعاته اللى مخبيها )النهم اليكم القصة

ده الاجزء الاول لو عجبكم هانشر الثانى والثالث كمان

تبدأ هذه الأحداث كلها يوم 25 يناير ..

وكان آخر يوم لدي في عملي ودراستي وكل حاجة ولله الحمد وخلصت كل حاجة وزميلي حسن في العمل أكد عليا عشان فرح اخوه يوم السبت 29 يناير فطبعا قبلت العزومة لأنه فرح واحد من اخو واحد من اعز اصدقائي والعريس نفسه من اصدقائي انا كمان .. المهم توكلت على الله وروحت وكان فيه شوية مظاهرات يوم 25 يناير منشرة في ارجاء البلد ولكن لم اعرها اهتماما مش عشان هية كانت تافهة لا حاشا لله ولكن لأني مش من الشخصيات اللي بتهتم بما يدور حولها خالص زي ما بيقولوا كده انا بمشي جوة الحيط مش خوفا من حاجة ولكن من حيث اني مش بحب نهائيا اكون محط الأنظار خالص :D

ولكن حصل التالي يوم الجمعة يوم 28 يناير ..

كعادتي بصحى بدري شوية واقعد اقرأ الجرنان وبعدين انزل على طول على الصلاة عشان عقبال عندكم جميعا الجامع في البيت تحت ربنا يخليلنا صاحب الفكرة دي يا رب هوة الثواب فظيع طبعا في السبعة ادوار ولكن برضوا الجامع تحت البيت تحس بفرق تاني ..نزلت اصلي وانا مش واخد بالي نهائيا انه في انقطاع في اجهزة الإتصال في البلد كلها ومركزتش في كده نهائيا المهم صلينا الجمعة جميعا ودعينا انه ربنا يسلم مصر وشوية ولقيت شاب كده ايدو متجبسة وخرج بعد الصلاة بيقول يسقد النظام الفاسد .. يسقط حسني مبارك ... رددها بتاع 10 – 15 مرة انه فيه حد يردد وراه جملة !!!!!!! مفيــــــــــــــــــــــــش !!! وأخوكم طبعا ولا هوا هنا ولا اعرف اصلا حتى الراجل ده مدايق من ايه ولا ايه اللي مزعلوا كده ... ملقاش رجاء من الجامع بتاعنا راح قايل خليكم كده ....... ها تفضلوا طول عمركم ......... ها تخليهم يركبوا عليكم و ...... يا شارع مجابش راجل يا شارع ..... راحوا الحقيقة رجالة الشارع ربنا يديهم الصحة اجمعين انتا اصلا مين ياد انتا وراحوا قايمين عليه بالواجب من حيث الضرب المبرح اللي تلقاه اقدر اقولكم انه الواد ها يفك جبس ايدوا ولدكتور ها ينقعوا كلو على بعضوا في الجبس !!!! وده انا اقدر وبشهادة رسمية مني انا سيد اقدر اقول انه المسكين ده اول ضحية من ضحايا ثورة 25 يناير :D بس مش من الحومة ده من الشعب والى الشعب هوة اصلو بصراحة الثورة والحماس كانوا واخدين حدهم معاه شوية .. جت طبعا عربية الإسعاف داست عليه :D وبعدين نقلوه على الإنعاش ده ان كان فضل فيه نفس يتلحق طبعا ...

وطلعت البيت وبقول هوة كان متضايق قوي كده ليـــــــــــــه قولت اما ادخل اشوف نايل موتورز ولا الفيس بوك الناس بقالها يومين بتتظاهر على ايه وليه وعايزين فين .. افتح الراوتر واجي اقعد على الاب الاقي مفيش نت !! الله طيب منا لسة فاتحوا حالا اهوه اقوم ابص ملقيش اي حاجة فيه والنت ما يزال فاصل .. رحت ماسك الموبايل وقولت اطلع نمرة سمعة (اسماعيل ده فني التركيبات اللي ركب الفلم الهندي ده) وبطلع نمرتوا ولسة بطلبوا لقيت مفيش شبكة .. يادي النيلة .. هوة اليوم ده مالو عامل كده من اولوا ها ابتدي اتشاءم وانا لما بتشاءم بدخل انام على طول .. المهم روحت جايب نمرتوا وبتصل بيه من تلفون البيت في الشركة ايوا الو .. الأستاذ اسماعيل موجود ( هوة ولا استاذ ولا بتاع ده بس عشان انا ليا عنده طلبات والنهاردة يوم الجمعة)

الآنسة على الطرف الآخر من الخط : اسماعيل مجاش النهاردة

انا:طيب في مين عند حضرتك من الفنين يجي البيت يشوف القصة دي لأنو دي حاجة غريبة

الآنسة : في رد حازم وصامت (انتا عبيط ولا شكلك كده .. الله يخربيت اللي بتشربوه ده البلد بتولع برة وانتا عايز حد يصلحلك النت غور يلعن ........... وراحت شاتمة كده بكام كلمة وهب تيت تيت تيت قفلت السكة ) لكن والله انا عارف صوتها وها اجيبها عشان عيب قوي كده هوة انا عملت حاجة ولا هوة انا مكتوب عليا التهزيق في كل حتة والله هاا اجيبها هيا ها تروح فين يعني ....

ما علينا فتحت الجزيرة اشوف الدنيا فيها ايه .. الاقي فيديوهات وصور وناس بتدبح في بعض !!!!!!!!!!! يا ساتر يا رب ..

افتح العربية الاقي الدنيا برده متنيلة !!!!!!!!!! (اعذروني على اللفظ ده ولكن مش لاقي كلمة معبرة عن الوضع غير الكلمة دي )

افتح الـالاقي الدنيا اسخن كمان ..

قولت بس صنع بلادي هوة اللي ها يكسب افتح ياد القناة الأولى ..

الفنانة شادية بتغني اغنية ( يا حبيبتي يا مصر يا مصر .. آآآآآآآآآآه يا حبيبتي يا مصر ) بالمناسبة ليا تعليق على الأغنية دي عشان انا كرهت .... الأغنية دي من كتر ما سمعتها اليومين اللي فاتو افتح الراديو الاقيها افتح التلفزيون الاقيها افتح الموبايل الناس حاطاها كول تون افتح النت الاقي الناس حاطينها الله هوة مقرر ولا ايه !!!!!

المهم قولت ياد سيب الشعب نازل يهيص مهم بينزلوا دايما وبيروحوا آخر الليل المهم جبت شوية افلام وقولت اقعد ضيع يومك في الفرجة على التلفزيون ..

ده طبعا ما فهمت كل حاجة مقطوعة ليه ....

وجبت فلم دعاء الكروان ... مع اني مش بطيقوا واللللللللللللللللله ولكن هو الحاجةالوحيدة الي كانت لسة بتبتدي في التلفزيون ... وعمري ما فهمت الفلم ده عايز ايه وفين اصلا قولت بس النهاردة وقتوا البلد بتولع انا اقعد اتفرج عليه وافهم فاتن حمامة كانت عايزة ايه من شكري سرحان ..

متابع الفلم واندمجت فيه بشدة كيرة جدا والفلم آثر فيا بقوة والله وحبيتوا جدا وحبيت جدا الأستاذ محمود المليجي !!!!!!!!!! الفلم ده بجد جبار ... وحتة هنادي راحت فييــــــــــــــــــــــــــــــــــــن يا اماي ... هنادي ما ينبكي عليها !!!!!!!!!!!!! ووصلت بقى لحتة لما الأستاذ رشدي اباظة آخد السيدة فاتن حمامة على ضفاف النيل ونزلت هيا تغسل البطيخة وهوة بيتفرج عليها وبعد كده حاول ان يقبلها ... قولت بس اخيرا الفلم سخن ..... ولسة ها يتكلموا وفوقت على صوت امام المسجد وهوة بيزعق في المايكرفون يا شباب المنطقة انزلوا احموا نفسكم الحقوا ساعة الجهاز جت انزلوا الحقوا بلدكم بتضيـــــــــــــع

انا بيني وبين نفسي !!!!!!!!!!!! البلد بتضيع !! يا خبر ... !!!!!!!!! البلد بتضيع !!! وطبعا روحت جاري لابس الجزمة وآخدت الشومة بتاعت الحج القديمة ونزلت جري على الشارع وانا مش فاهم اصلا فيه ايه والله العظيم !! واقف في وسط الشارع بهدوم خفيفة جدا في عز التلج اللي كنا فيه وفجأة !!!!!!! جآني نداء الطبيعة !!! ولمضرى السكر اللي زي حالاتي رنبا يشفينا جميعا ها يفهم انا بتكلم عن ايه في الحمام كل 10 دقايق .. لكن ده مش وقته خالص انا عمال اسمع ستات بتزعق وناس بتقول يا لهوي وناس بتجري في كل حتة واللي بيعمل متاريس واللي بيقفل الشارع وانا وسط ده كلو عايزيني ادور على حمام ده حتى يبقى شكلها وحش قوي في حقي واكيد مش ها اسيب الشارع يقولوا عليا ايه بس ده انا ساكن في السابع ومفيش مصعد يعني عقبال ما اطلع ها اكون خلصت !!!!!! يا دي الليلة اللي مش ها تفوت .. يا جدعان انا حتى لو مت مش طريقة خالص الواحد يموت مزنوق دي حتى شكلها مش حلو ...

المهم ترجيت واحد من جيراني انه يفك كربتي عشان منظري بس قدام الناس وهوة ساكن في الدور الأول الحقيقة وقام بالواجب ..

المهم نزلت ووقفنا في الشارع وانا مش فاهم اي حاجة وكل شوية واحد يطلع يقولك ( الكلمة دي بقت بالنسبالي زي الشتيمة كلمة بيقولك دي ) دول جين من ناحية مش عارف ايه .. والحق ده مش عارف فيه ايه .. وامسك مش عارف فيه ايه .. انا زهقت وقولت ده لعب عيال .. المهم لقيت راجل عجوووووووووز جدا الحقيقة دائما بشوفوا قاعد عندنا بس عمري ما فكرت احتك بيــــــه

المهم قعدت جمبوا وقولتلوا اخبارك ايه يا حج قالي الحمد لله تمام قولتلوا ينفع اللي بيحصل ده يا حج !!!

راح باصصلي بقرف قوي قوي قوي وقالي يا عم دول شوية عيال ..... عايزين يـ....... وانا بنفسي اللي ها انزل .... قولتلوا يا حج ممكن اسئلك سؤال ومتفتكرنيش بتريق والله ؟ قالي اسئل يا خويا منا ناقصك ( ساعتها ندمت اني فكرت اروح اكلموا من اصلوا ) ده قرفان مني قرف سبحان الله ..

المهم قولتلوا يا حج ونبي انا كنت بتفرج على فلم دعاء الكروان وها اموت واعرف الأستاذة فاتن حمامة ها تعمل ايه مع الأستاذ فريد شوقي ..

وياريتني ما سئلت عاللي حصل .... ده انا كنت متلخبط في الفلم شوية ده جه وكمل على المعلومتين اللي عندي .. ومش عارف الأستاذة هدى سلطان ها تضرب الأستاذ شكري سرحان بالقلم ها يروح راميها على الطاحونة ويروح الزابط رابط الأستاذ عبد المنعم ابراهيم في الحصان ويجري يجروا في البلد كلها !!!!!!!!!!!

لا اله الا الله مين الناس دي !!!!!! انا معرفش حد خالص من الناس دي ...

طيب والفكرة اني عايش في مصر لوحدي ومفيش حد يحكيلي بقية الفلم ايه بالزبط ومليش اي احتكاك في الشارع مع حد والناس كلها محدش يعرف مين ده اصلا ... فالمهم بنتكلم انا والحج الله اللي مش عارف ليــه ساعته الزمنية كانت فيها مشكلة مع انه والله راجل زي العسل وصادق جدا .. مصمم انه الثورة اللي بتقوم دي عبد الناصر اهوة اللي بيقوم بيها !!!!!!!!!!!!!!!! انا سمعت كلمة البيكباشي انور السادات ها يلقي النبأ علينا مان شوية اكيد وروحت سايب الحج وقايم .. هوة انا ناقص لخبطة يا حج انا لوحدي بتوه مع نفسي ..

الناس كلها وصلت التلفزيونات في الشار وبتتابع الأنباء وانا قاعد براقب الشارع .. وكل شوية نسمع صوت ضرب نار وناس بتجري ناحية حتت تانية وناس خايفة وانا متمالك اعصابي بشدة لحد هذه اللحظة .. المهم طلع في التلفزيون بيان بيقول التالي يا جماعة خدوا بالكوا من العربيات الميكروباص بشدة لأنهم خطب وبيهددوا الأمن لأنهم هما دول اللي اللي معاهم السلاح ... تمام وجميل جدا الكلام ده ..

نسيت اقولكم انه اخوكم بيلبس نضارة لأنه نظروا من على بعد .... خالص الله يرحمه مفيش خالص بقى ..

]المهم الناس كلها قاعدة مركزة مع خطاب السيد باراك اوباما اللي اتبع خطاب السيد الرئيس السابق محمد حسني مبارك وقال فيه انه فيه حظر تجول ونزول للجيش والأستاذ اوباما عمال بيتكلم اللي على التلفزيون وانا شايف الكميل اللي قبلنا على طول فيه عربية ميكروباص ماركة ( الترامكو) شايفوا عدى من الكميل اللي قبلينا بسرعة موقفش لأنه ببساطة محدش وقفوا وشايف حد واقف فوق الميكروباص وشايفه شايل رشاش آلي لأنه شكله مميز جدا من على بعد انا شفت السلاح وقولت الحقوا يا رجالللللللللللللللللللللللللله سلالالالالالالاح استخبوا وطبعا الرجالة اصلا قاعدة ركبها بتخبط على بعض .. وسامعين المكالمات الهاتفية عاملة ازاي على التلفزيون فمصدقوا سمعوا تنبيه انا كل اللي قولتوا اصحوا عشان فيه سلاح جي مقولتش ابدا اضربوا :D وفجأة السيدات اللي في البيوت كلهم بدأو يحدفوا العربية بقزايز بيبسي فاضية واي حاجة مؤذية وخلاص .. وكان الحدف ايه والله لو كانوا عاملين مسابقة للإصابة في الهدف كنا كسبنها الراجل اللي فوق الميكروباص انتهى .. وكل اللي سامعه انه عمال يزعق وفيه ناس جوا الميكروباص بتزعق برضوا والناس لقيت واحد تاني جوة معاه سلاح .. فضلوا يضربوا في الميكروباص ككل .. واللي يسحب السواق من البربريز الأمامي وفجأة الشخص اللي فوق الميكروباص عمل غلطة عمروا وضرب طلقتين في الهواء لتفريق الجماهير الحاشدة التي جاءت لإستقباله .... ونقدر نقول دي كانت آخر حاجة عملها .... الناس كملت عليه ضرب اكثر من الأول وبالذات لما لقوه لابس لبس الجيش وعمال يقول انا زابط انا زابط ... الناس الله ... ولا بلاش خلينا نقول يهديهم فاكرينوا سارق الزي العسكري وبيعمل فلم هندي يضربوا فيه .. والراجل التاني اللي جوة الميكروباص عمال يقول انا مباحث ويضربوا فيه طيب نتفاهم مفيش طيب نتحاور برضوا مفيش الناس متفاهمتش خالص ..

في النهاية طلع انه زابط مباحث قابض على اتنين حرامية .. ومكتفهم جوة الميكروباص (احنا افتكرناهم رهائن في الأول ) "محدش يسألني ايه الفلم الأمريكي اللي خلانا نفتكر انهم واخدين رهائن كمان " وواخد الميكروباص رايخ يسلمهم لنقطة الجيش وزابط الجيش واقف فوق الميكروباص عشان الناس تشوف جيش يفتحوا الطريق على طول .. ولكن انا ها اعرض لحضراتكم صور اللي فضل من الميكروباص بعد ما التفت حوله الجماهير المؤيدة ولكن الحمد لله مفيش حد مات ولكن الزابط نقدر نقول قدامه شوية عقبال ما يقدر يعي اللي حواليه وزابط المباحث سبحان الله مفيش فيه الهوا مع انه اكل ضرب مش طبيعي وطبعاالحرامية همة الي في الليلة دي اللي محدش لمسهم ..ولكن للأسف لقيت بعد ربع ساعة واحد بيبيع خزنة سلاح زابط الجيش بـ 40 جنيه :D والناس راحت قايمة معاه بالواجب واختفى جهاز مش عارف اسمه سي دي ام او حاجة كده بس هوة مش لاسلكي هوة حاجة بيقول انها شبه الموبايل وليه شاشة وهو مخصص للإتصال بالقيادة ولكن هوة مصمم انه مش لاسلكي ..

اعتقد كفاية كده بقى النهاردة عليكم عشان مزهقوش واعتقد 2000 كلمة في الموضوع مملة جدا وكل يوم ها احط فصل لما حدث بالضبط .. بكرة ها تعرفوا الكلب اللي عضني في وشي ايه اللي جراله وبالنسبة لفرح احمد ايه اللي حصلوا []:D

والسلام مسك الختام وتحياتي لكم جميعا يا اخواني وارجوا ان اكون وفقت في رسم البهجة على محياكم وتحياتي لكم ..

ملحوظة : الميكروباص معادش فيه فتفوتة زجاج صالحة للإستخدام الأدمي بعد كده نهائيا والفكرة اني لقيت فيه ناس خلعت الكنب وخدتوا يقعدوا عليه في الشارع والطنابير بقى نفسياعرف خدوها يعملوا بيها ايه ولما تقلوهم ايه ده يا جماعة يقولك دي غنائم الحرب هوة احنا مش كنا في معركة !!!!!!!!!!!!!!!!!!!!

تم تعديل 1 أبريل 2011 بواسطة raouf

[raouf]

يوم السبت 29\1\2011

بعد موقعة الميكروباص واللي قيدت ضد مجهول ولله الحمد عشان مش طالبة خالص حد يسيح في المنطقة انو السبب كان انذار خاطئ اودى بحياة 4 افراد الى الإنعاش وخليها مستورة احسن:D

المهم صحيت يوم السبت بدري وطبعا احساس انعدام المسؤولية احساس والله العظيم رائع رائع رائع رائع بكل ما تحمل الكلمة من معنى (مع الإعتذار للإخوة المتزوجين) احساس انك تصحى الصبح موركش اي حاجة تعملها ولا اي حد منتظر منك اي حاجة مجرد صاحي من النوم ملكش لازمة في اي حتة !!!!!!!!! وكافية كده عشان المنتدى متراقب والإخوة اللي بيصحوا على المسؤوليات ها يبتدوا يكرهوني :D

المهم صحيت من النوم وانا عارف انه عندي فرح ولكن الساعة كام مش عارف .. قولت اكلم سعد اتصل بيه واسئلوا الفرح ها يكون امتى ..

]انا :الو ايوه يا ...

هو: انتا فين يا ... يا ... يا ....

انا : مفيش انا موجود ها اروح فين يعني بس كنت بسألك هوة الفرح فين ولا امتى ياد ولا ايه الكلام ..

هو:يا عم فرح ايه انا حما اخويا عندنا دلوقتي واخويا قاعد معاه وشوية وها يضربوا بعض

انا:ليه فيه ايه ان شاء الله

هو:لما تيجي ها تفهم تعالا بس وانزل

المهم لبست ونزلت قولت يادوب الحق بقا اشوف المصيبة الجديدة .. نازل جري وركبت العربية وماشي في الشوارعفجأة بقيت حاسس اني ماشي في (بغداد-كابول-مقدونيا-الجبل الأسود)ومحدش يسأل مين آخر اتنين دول ..المهم وصلت لحد البيت عند صاحبي ولقيت التالي :

البواب ماسك خشبة طويلة وحاطط فيها بتاع 6 كيلو مسامير :D

بتعمل ايه يا عبده .. بعمل كمين يا استاذ سيد عشان اللي يهرب نفرقعله عجل عربيته .

ولقيت

العريس ماسك في حماه وبيتخانقوا مع بعض والناس حايشينهم عن بعض بالعافية .. حلينا الموقف واخدناهم ودخلنا على جوة .. اني الاقي حد يفهمني الموضوع ايه مفيش حد وطبعا صديقي ده ساكن في شارع جمال عبد الناصر .. :D انا شايف كمية سلاح فيه ترسانة اسلحة متحركة .. المهم قعدنا نفهم الموضوع فيه ايه المشكلة جاية من عند مين .. والد العروسة رافض اي فرح دلوقتي وبيقول ده مش وقتوا والمعازيم ها يتقتلوا وهمة جايين والموضوع مش ممكن السيطرة عليه وده تهريج اللي بيحصل وانعدام للمسؤولية انه العريس عايز يتجوز .. وطبعا احمد (العريس)ماسك في زمارة رقبة الحج انا ها اتجوز يعني ها اتجوز الواد تقريبا حاسس انه ها يموت وعايز يكمل نص دينه .. المهم من هنا لهنا لهنا رسينا على كلمة عدالة من بق العريس طلعت وقال (انا ها اكتب كتابي النهاردة عشان اضمن انك مش ها ترجع في كلامك ولا ها تخلع )!!!! الكلمة دي خرجت من هنا والناس كلها وقعت على الأرض من الدحك ههههه العريش مخاون حماه من اولها المهم من هنا لهنا نقنع في والد العروسة اتفقنا على كتب الكتاب النهاردة عشان الولد حاسس انه لو مكتبش الكتاب ها يبقى فشل وانه الوضع الراهن ملوش علاقة بيه والولد بيقول انه ملوش دعوة بأي حاجة واللي طالع عليه كلمة واحدة انا عايز اتجوز عايز اتجوز .. المهم اتفقنا في النهاية على انه كتب الكتاب ها يكون في مسجد الرحمن الرحيم اللي في صلاح سالم على اساس انه الحجز كان فيه وانه المتفق عليه .. طبعا ساعتها كان انا على ما اعتقد الحظر كان بقى من الساعة 5 والساعة وقتها كانت 1.30 ووالد العروسة كل اللي طالع عليه (حسبي الله ونعمل وكيل) الولد يسمع الحسبنة من هنا ويقول بس امسك الورقة في ايدي وان شوفتها تاني ها يحلها الف حلال ساعتها .. والمصيبة انه الإتنين شخصيتين محترمتين جدا جدا جدا وذو مكانة اجتماعية مرموقة جدا يعني اللي بيعملوه ده انا مشوفتوش قبل كده المهم اتفقنا على انه الموكب ها يتحرك من المنطقة بإتجاه المسجد في تمام الساعة 2 بالضبط ..

الساعة بقت 2 يالله بينا توكلنا على الله ... كل اللي شايفه اكثر من 12 عربية محملين بالسلاح وناس طالعة من الشبابيك محملة بسلاح آلي وستات تقريبا بتعيط وستات بتصوت ... ومنظر غريب .. واخوكم بيبص في المرايا اللي في الأصانصير ويانهار اسود !!!!!!!!!!!!!!!!!!!! انا نزلت بتي شيرت وبنطلون !!!!!!!!!!!!!!!!!!!!(الله يكسفك يا بعيد) الحاجة وكل من عرفت من سيدات كبار كانت الكلمة دي على طول موجهة ليا ليه مش عارف المهم نزلنا وحاسس انه رئيس مجلس الوزراء رايح المجلس .. المهم راحت هبة قايمة خناقة تانية .... طبعا اي عريس وعروسة بيركبوا في عربية واحدة .. الا هنا والد العروسة اصر على انه العريس يركب عريته والعروسة تركب مع والدها مش عشان حاجة ولكن عشان الأوضاع الأمنية .. والعريس يقول لأ ده ها ياخدها ويمشي وده ها يخلي منظرنا قدام الناس .... عريس في عربية وعروسة في عربية المهم من هنا لهنا الناس اقنعتوا انه الثلاثة يركبوا في عربية واحدة ولا انا اللي كنت ها اخلص منهم في اللحظة دي .. و لأول مرة في حياتي اشوف فرح يخلى من الآتي (فساتين – اولاد صغيرة رخمة بيفضلوا رايحين جيين في كل حتة – آنسات او حتى سيدات نهائيا غير كام سيدة همة اللي عتبوا قلبهم ميت يعني انهم نزلوا وانا مش قادر امسك نفسي من الدحك وفاكر فلم (عسكر في المعسكر ) وهما بيزفوا الأستاذ محمد هنيدي بالسلاح والتفتيش على كل بني آدم داخل وخارج .. المهم تحرك الموكب وطلعنا صلاح سالم .. والله العظيم انا كنت مش قادر ابطل دحك من اللي بيحصل .. قرأن في كل السيارات بصوت عالي جدا وسرعة عالية جدا في الطريق تكاد تجعلك تشعر بأن العريس بيهرب من المعازيم على الطريق ....المهم وصلنا للمسجد على حوالي الساعة 2.30 المهم على الباب مفيش اي حد نهائيا وخالص بقى وتقريبا القاهرة في المنطقة دي كانت قد تحولت الى مدينة الأشباح .. لقينا فرد الأمن قولنالو بعد اذنك لو سمحت احنا معادنا انهاردة باليل وعايزين نقدم المعاد نخليه دلوقتي عشان زي ما انتا شايف البلد عاملة ازاي .. الراجل بيبصلنا بكمية استغراب مش طبيعية .. ويكأننا مجانين (حلوة ويكأننا دي) يا حج يا والدي من هنا لهنا قالنا فلنفترض دخلتكم اصلا مفيش ولا مأذين ولا مصورين ولا مفيش اي حاجة .. العريس هنا بقا تدخل ... هاتولي مأذون دلوقتي حالا ومش عايز ولا صور ولا اي حاجة انا عايز اتجوز ( انا بصراحة هنا بدأت اشك في الإصرار اللي مش طبيعي للعريس هوة الحب يعمل كده !!!)الله واعلم .. المهم من هنا لهنا جبنا المأذون وكتبوا الكتاب في الشارع ياعالم ههههههه والله من كمية الإستغراب اللي على الناس تقريبا مكانوش مصدقين .. والناس كلها بتبص لبعضها في نظرة تهكم وضحك .. وقطع هذا صوت آذان العصر .. فكلوا قالك يالله بينا نلحق العصر عشان برضوا ربنا يباركلنا في المصيبة اللي احنا عملناها دي فرسي القرار على انه النص ها يدخلوا يصلوا والنص يستنى بره وبعد كده ها يتبادلوا الأماكن لحماية السيارات والـ 3 – 4 سيدات اللي موجودين اللي مش عارف مين دول اصلا .. المهم كلو قالك عيب ندخل بالسلاح المسجد حرام طبعا .. المهم قالوا نسيب السلاح مع النص اللي برة .. اانا بقيت واقف متنح زي الشخص ده بالضبط ..

انا واخد من مواطن واحد بــــــــــــــــس

]عدد:واحد سكينة

واحد اليكتريك

واحد طبنجة ماركة اللي يحب النبي يزق

وبتاع 5-6 طلقات فرضاني نصهم انا حاسس لو ضربتهم بالمسدس ها يموتوك انتا ..

والمصيبة انه دكتور !!!!!!!!!!!!!!! طيب لما الدكتور ماشي كده يبقى البلطجي يمشي ازاي بقا !!!!!!!!! قولت انتا يا ابو السيد ابو القتال كده اشوف نفسي انا مسلح بإيه بقى ........ كرت موبينيل بعشرة وجزمة في شنطة العربية !!!!!!!!!! وبقيت مصمم انه اللي شايل السلاح ضره اكثر من نفعه لأنه في الأيام دي انا لو مشيت شايل سلاح فأنا فعلا اثبتت اني خايف ومحتاج حتة حديدة تحميني ولكن سيبوها على الله ده النملة بترزق في بطن البقر ...

معلش اعذروني الأيام دي مخلية الواحد مش بيجمع كلمتين على بعض ...

المهم صلينا العصر وعدنا ثانية متوجهين الى البيت وفي نص الطريق وكنوع من الدعابة رحت مشغل في العربية اغنية (فدائي فدائي فدائي )للأستاذ الفنان عبد الحليم حافظ .. ومرة واحدة العريس اجهش في البكاء !!!(اجهش = بدأ )لغة عربية مفيش بعد كده والله جايبها لسة الصبح من القاموس بعد 3 ساعات من البحث

المهم مالك يا احمد ...

احمد: انا حاسس اني اتورطت يا سيد

]انا : متقلقش انتا مش اول واحد يتورط ومش ها تكون آخر واحد وسيبها على الله اهم حاجة انك ضمت حقك ونقلتها بإسمك ... وفضلنا ندحك ونهزر مع بعض بقية الطريق لحد ما وصلنا المنطقة كان خلاص باقي على حظر التجول بتاع نص ساعة وانا لسة مروحتش ..

قولت انزل الناس وطيران على البيت ..

]المهم وصلنا تحت بيت العريس والعروسة روحت على بيتها وانفض المولد وبقا العريس مزقطط بأنه ماسك الورقة في ايدوا وعمال يقول من بكرة الصبح ها اروح اغير البطاقة واخليها متزوج هاهاهاهااي ... (يا ابن الـ....) بقا ممرمط اللي ..... المرمطة السودة دي عشان عايز تغير بطاقتك وتبقى متزوج .... عليا النعمة انا ها انزل ادبحك .. وركزوا بقا في التالي ..

بفتح باب العربية وبنزل رجلي ..

وبدوس في الأرض ونازل متحمس اني ها اضربوا بقى ..

وفجأة حسيت اني لزقت في الأرض ..

مركزتش ومشيت لقيتالجو برد فجأة !!!!!!!!!!!!!

وناس بتجري عليا

اقعد اقعد اقعد

يا عالم فيه ايه ..

ابص ناحية رجلي ...

نافورة من الدماء !!!!!!!!!!!!!!!!!

ينهار اسود ومش فايت !!!!!!!!!!!!!!

]ايه اللي حصل ..

عبده الغبي حط الخشبة اللي فيها المسامير بتاعت الصبح قدام الباب وانسان فطن زي حالاتي نازل من غير ما يبص راح غارز في الكمين ..

وطبعا انا اشوف الدم بينزل من رجلي واحس ان النهاية قربت .. وراح واحد غبي ابن ... اقترح انه يرفعوا رجلي في الهواء عشان الدم ميخرج منها (ها يعلقوني من رجليا زي الدبيحة ) بهايـــــــــــــــــــــــــــــــــــــــم يا ربي راح واحد طالع فوق العربية ومسك رجلي وبيعلقني منها زي الفرخة الله يخريبيتك يا عم نزلني ومحدش سامعني من اساسوا كلو بيقترح اللي يقولك ودول المستشفى وللي يقولك هاتولي ابرة وفتلة وانا ها الحقوا .. هنا انا ايقنت اني رايح في داهية رايح في داهية .. وببص شايف عبدو واقف بقيت عمال اشتم فيه بطريقة هيسيترية والناس عمالة صوتها يعلى .. كانت اللجان الشعربية بدأت تتكون سمعوا الناس صوتها عالي ..قالك بس دول مسكوا حرامي اجري ياض اجري ... لقوا واحد متعلق من رجلوا .. وابتدت الإقتراحات تتوالا اللي يقولك بينا على المستوصف واللي يقولك ده مالو ده ومحدش اصلا معرني اي نوع من انواع الإهتمام باللي جرالي .. المهم رسيوا ها يودوني المستوصف عشان الجرح ..

راحوا جريين بيا على المستوصف وانا كل ده والله وعندي احساس انه كل ده تهريج في تهريج وواحد ها يطلع دلوقتي يقول بينا على الشوت اللي بعدوا ..

لكن مكنش فيه حد بيطلع .. وصلنا المستوصف الناس راحوا راميني على الطربيزة اللي بعجل دي زي الفرخة والله العظيم والممرض جري بيا على الدكتور عشان شايف كمية دم مش طبيعية اتاريها عشان كنت متعلق فالدم كان بيطلع على فوق مش بينزل على تحت:D

المهم الدكتور راح قايم باصص على الجرح وقال دخلوه على قوضة العمليات ...

انا سمعت كلمة عمليات وحسيت اني هالك لا محالة عمليات ايه يا عم الحج عمليات ايه يابا ده انا بخاف من الإبرة ها تدخلني قوضة عمليات ايه بس

انا سمعت كلمة عمليات دي من هنا وركبي بتاع 4836 عفريت وبقى كل اللي طالع عليا انا عايز اروح عايز اروح .. وروحت ناطط من على الطربيزة وبقيت عمال انط على رجل واحدة بس وعمال اتنطط زي الضفدع عايز اجري وكل اللي طالع عليا عمليات لأ عمليات لأ

الدكتور راح شاخط فيا شخطة انتا يلا

تعالا هنا اترمي على الطربيزة مفيش مرواح وانا حاسس بتنميل فظيع في رجلي مش ممكن حاسس رجلي دي مربوط فيها حجر مثلا وزنه 50 كيلوا بيسحبني لتحت راحوا شيليني وحاطيني على الطربيزة والدكتور فهمني انه اسمها قوضة عمليات عشان معقمة بس ولكن مفيش فيها اي حاجة ومتخفش امال .. وقال انا ها ابص على الجرح بس .. بيبص لقا رجلي فيها بتاع 4- 5 جروح (بسبب كثر المسامير )الله يخبيتك يا عبدو .. واحمد عمال يقولوا يا دكتور يعني ايه ها يجرالوا ايه .. الدكتور راح قايل للممرض خد بياناته عقبال ما اروح البس جوانتي اجهز نفسي .. في اللحظة دي دخلوني قوضة العمليات ..

ببص لقيتها زي الأفلام بالضبط يا عالم الطربيزة اللي الناس بتموت عليها على طول وانبوبة الغاز على يمينوا وبتاع 4 – 5 مكبعات كبار قوي وفيه طربيزة عليها عدة السلخ والتقطيع وانا فقدت النطق ..

والممرض يسألني اسمك ايه .. وانا مفيش ... اللحظة دي بقا احمد اتجنن هههههه

سيد مش بيتكلم يبقى بيموت .. ههههههههه مش فاهم جاب الفكرة دي منين واحد متعور في رجلوا ها يفقد النطق ازاي مش فاهم انا كان كل اللي فيا اني مصدوم ومش مسدق بس والله ..

الممرض يقولي طيب فيه حد نكلموا نطمنوا عليك احمد يقولوا لأ ده عايش لوحدوا في مصر ملوش حد انا السبب انا السبب

الممرض بقا بيهدي فيه وسايبني انا ..

وفجأة طلع احمد بجملة خلتني خرجت عن صمتي .. يا دكتور انا عايز اتبرعلوا بدمي .. انا سمعت الكلمة دي من هنا وبقيت على كلمة واحدة .. طلعوه من هنا قبل ما اعمل فيه حاجة انتا ليه محسسني اني ها اتوفى .. وبقا يقولي اطمن يا سيد اهلك في رقبتي ومتخفش وسيبها على الله ... زي مسلسل جمعة الوان بالضبط قبل ما يروح يجيب الجهاز .. والدكتور لبسلي بقى عدة الشغل الكمامة ومسكلي المشرط قولتلوا لألألألألألألألألألألألأ انا عايز بنج دلوقتي حالا ... قبل ما تعمل اي حاجة انا عايز بنج ..

والله العظيم انا كل اللي فاكروه انه كان التمرجي جي جايب حقنة بتاع 12 سم بيقولي دي حقنة كزاز انا شوفتها من هنا واغمى عليا اصلا قبل البنج ما يجي :D :D :D :D

ها اسيب اللي حصل بقا بعد العملية للحلقة الجية بكرة عشان شكلكم زهقتوا وكمان لأن الحلقة دي كات طويلة جدا ولكن كفاية اني اقول مستقبلي في الملاعب المصرية انتهى بهذه الحادثة (مقطعوش رجلي اطمئنوا ) ولكن مستقبلي المهني ادمر كرياضي .. والاقكم ان شاء الله في الحلقة القادمة بإذن الله ..

[arkan]

القصة فظيعة .. في فرح تحت القصف بالشكل ده.. ولا واقعة الميكروباص

ان شاء الله اتاذ سس قبل التحدي وهنشوف

[بيبو كندا]

متابع جدا جدا جدا

الف سلامه للإستاذ سيد

[raouf]

شكرا للى ردوا واعجبوا بالقصة

اليوم مساءا فيه جزء كمان ان شاء الله بس الظاهر ان مش كل الناس عاجباها المذكرات

[Om Zayd]

السلام عليكم

مقدرتش ابطل ضحك

بجد بجد.. مش ممكن الاستاذ و لا العريس و لا صاحبه و لا ابو العروسة

موقعة الميكروباس دي فكرتني بموقف حصل مع زوجي في اللجان الشعبية

لمحوا واحد ماشي لوحده بيتكلم في الموبايل.. قالوا بس.. أكيد باعتينه البلطجية يستطلع المنطقة

ينادوا عليه.. مبيردش ... و الدنيا ليل

راحوا طالعين عليه

بالسلاح طبعا و قبل ما يضربوه واحد منهم قال انه يعرفه

طبعا خد اللي فيه النصيب برده

:closedeyes:

عشان يبقى يركز و هوا ماشي

"كنا هنموتك يا

*******"

متابعة

[raouf]

انا هاجهز الجزء الثانى وانزله الان واعتذر عن التاخير لان التنسيق بياخد وقت شوية

وعلى فكرة الحلقات القادمة اكثر سخونة

واثارة ايضا

تم تعديل 2 أبريل 2011 بواسطة raouf

[raouf]

السبت 29\1\2011 الساعة السادسة مساءا

بدأت افتح عنيا وانا حاسس بثقل رهيــــــــــــــــــــــب فيهم حاسس كأني مش برفع جفنايا ولكن دانا برفع حديد بطريقة او اخرى !!! ومش ممكن حاسس انه راسي ثقيل جدا جدا وصحيت وانا ببص على الدكتور بيقولي صح النوم يا ابو الأبطال .معلش يا سيد احنا اطرينا نضحي برجلك عشان تعيش يا ابني !!!! انا سمعت الكلمة دي وكنت ها اروح في غيبوبة !! وهوة يقولي اصل المسمار كان مسمم !!! وانا مش قادر ارفع راسي حتة عشان ابص على رجلي .. وفي الآخر يقولي عليك واحد هع هع هع هع هع !!!. انا مش قادر ارد مجرد اومئت له براسي .. قالي انتا اذكى مريض جالي لحد دلوقتي .. احمد طلع صوتوا من الناحية التانية بيقول : يعني كده خلاص يا دكتور الواد رجع يشتغل تاني !!! (مش فاهم بيديني احساس اني محرك 6 سلندر وكان بيتعمر ) الدكتور بيقولي انتا ليه مقولتش انك عندك حساسية من (........)هوة قال اسم مركب كده معنديش حتى ريحتة الأمل اني افتكر اسم المركب ده ايه .. قولتلوا منا معرفش .. قالي انا اديتلك الحقنة من هنا ولقيت منطقة الحقن انتفخت ساعتها انا على طول افتكرت محفظتي .. من قواعد اي طبيب بيجيلوا مصاب في حالة خارجية زيي لو حصل معاه رد فعل ضد دواء معين او اثآر جانبية المتبع على طول انه يدور مع المريض على اي حاجة تثبت هوة عنده امراض معينة او حاجة .. وانا ساعة ما كنت في لاجوارديا كانوا عاملنلي تحليل ومعايا حاجة زي البطاقة الشخصية مكتوب فيها الأدوية والمركبات الكيميائية اللي انا بعاني منها + فصيلة دمي (من الآخر الكارنيه ده كل حاجة عنك ضغطك سكر قلبك سلطاتك كل حاجة )وانا كنت بصراحة مستهيفوا جدا ولكن شئ زي ده له القدرة على انقاذ حياة مريض صدقوني .. وعلى فكرة الكارنيه ده اعتقد موجود في احد المعامل الموجودة في القاهرة بس ايه مش عارف وساعتها بدأت اتكلم واحكيلوا عن الكارنيه ده ومرة واحدة راح مزعق فيا .. يبني انتوا ايه اللي حدفكم علينا .. مظاهرات ايه يبني روح يابابا روح يا حبيبي هوة كل واحد قرالوا كلمتين جي يتنطط بيهم علينا .. !!!!!!!! يا عم الحاج انا اصلا معرفش الناس زعلانة من نفسها ليه مظاهرات ايه دنا لما بشوف انتين بيزعقوا اعصابي بتتشد !!! ... المهم ببص كده لقيت رجلي متعلقة في الهواء الطلق .. يادي النيلة !!ايه ده كمان .. قالي اصل انا عملت جبس على قاعدة القدم عشان الخياطة واضمن انك متودسش على الجرح .. سليم الكلام ده وكتبلي على خروج على طول لأنه اصلا دي مش مستشفى ده مستوصف ودي غرفة كده وربنا سترها والحمد لله المهم قبل ما اقوم فوجئت من احمد برد فعل غريب جدا !!!! بيشد التي شيرت من عليا وعمال يقلب فيا ويدوس في كل حتة في جسمي !!!!! وبعدين راح شادد الـ....... وبرضوا بيعمل حاجات غريبة وفي الآخر بيبص على (اصابع قدمي)!!!!!!!!!!!!!!!!!!!!!!!!!! بتعمل ايه يا احمد !!!! اسكت انتا يا سيد اصلك انتا غلبان وعلى ونياتك ... النهاردة بيسرقوا الأعضاء البشرية تدخل عندك صداع يخرجوك من غير كلية والجو الرخيص ده !!! ايوا بس يبني انا مفيش فيا حاجة صالحة للإستهلاك الآدمي يا حبيبي والدكتور راجل طيب جدا ومفيش داعي للي بيحصل ده صدقني انا سليم وكويس .. المهم خارج بقا من المستوصف قابلتني اول مشكلة !!!!!!!!!!!!!!!!!!!!!!!!!!!!!!! الدكتور قالي لازم تتحرك كتير عشان تعمل مش عارف ايه في ايه !! حاضر يا دوك ... قاعد على الكرسي المتحرك ورجلي ممدودة قدامي !!!!! وابواب المستوصف من النواع الغالق الأوتوماتيكي اللي هيا و فتحتوا يرجع يقفل تاني بسوستة من فوق !!!!!!!! وهوة عمال بيزقني بالكرسي المتحرك وبيحكلي قد ايه انه كان مخضوض عليا هوووووووب انا حسيت بألم فظيييييييع في رجلي !!! آآآآآآآآآآآآآآآآآآآآآآآآآآآآآآآآآآآآآآآآآآآآآآآآه

ببص قدامي !!! الشخصية العبقرية بيفتح الباب برجلي يا عالم !!!!!!!!! ايه يا عم احمد !!!!!

احمد: ايه ياد يا ..... منتا مجبسها يعني هوة انتا حاسس !!!

انا:تعالا عشان اجبسلك ...... يا ابن ال.........

واتاري احنا الإتنين اغبى من بعض والباب مكتوب عليه (Pull) واحنا عمالين نزق !!!!!!!!

المهم توصلنا لفتح الباب والحمد لله بعد ما ولاد الحلال دلونا

المهم دلوقتي المشكلة في التالي !!!! اانا رجلي قدامي بتاع 50 سم !!! اركب ازاي بقى انا !!!!!!!!!

ودي الحقيقة سؤال كان عمال بيدور في بالي هوة اكيد فيه ناس جبست رجلها قبلي !!! كانوا بيركبوا ازي بقى !!! المهم طبعا توصلنا لحل غاية وقمة في العبقرية اني ها اركب ورا وها نخلع الكرسي الأمامي لفتح مسافة كافية امام قدمي .. طبعا سعد صاحب السيارة رفض الفكرة قالك عربية passat 2010 اخلع كرسيها عشان اركب سيد !! اعذرني يا سيد انتا صاحبي آه ولكن عربيتي لأ:D انا بصراحة عذرتوا ده لو انا اللي ها اخلع لنفسي والله ما انا بخالع ... المهم قدمنا الكرسي لحد الآخر وعرفت أقعد بس وانا مادد رجلي بين الكرسيين الأماميين يعني في المسن الوسطي ها تلاقي رجل كده طالعة فوق الفتيس مباشرة ..

المهم تحركنا من المستوصف .. وسعد بيقولنا معلش يا جماعة والله فيه مشوار ضروري جدا جدا جدا لازم اعملوا لأنه لو معملتوش ها اترفد في الأيام السودة اللي احنا فيها دي ..

ها ها تعمل ايه .. قالك فيه خبراء اجانب 2 امريكان وواحد هولندي ها يجيوا مصر ومطلوب مني اني آخدهم من المطار واوصلهم فندق موفنبيك اللي في قلب المطار ومن بكرة اعمل معاهم جولة سياحية ..!!!! مع انه الكلام انا مبلعتوش لأنه كل الدول ساعتها كانت اصلا علقت الطيران والرحلات القادمة لمصر !! ولكن انا مالي !!! وعمال احمد يتخانق مع سعد !! بالذمة انتا عندك دم انتا صاحبك كان ها يريح مننا وانتا تقولي مشوار ومش عارف ايه !!!

المهم رحنا جبنا العربية التانية وتحركنا ناحية المطار !!

والله لو تشوفوا منظر وكمية الضباط الواقفين امام المطار وكم التفتيشاللي تعرضنا له ها تقولوا احنا دخلية ثكنة عسكرية !!! وكل ما الضابط يشوف واحد بس قاعد ورا وفي النص ومادد رجليه في البربريز الأمامي !!! يفضل يدحك بطريقة هستيرية !!!! هههههههههههههههههه

ونيجي عند كل نقطة !! بعد اذنكم يا شباب انزلوا عشان العربيات ها تتفتش !! يا عم طيب وانا وضعي يه !!! قالي خليك قاعد جوز عساكر عباقرة يدخلوا يفتشوا العربية حتة حتة وانا ما زلت قاعد جوة والكلب يدخل يشم جوة العربية من هنا وانا اصلا مش بحب الكلاب كمان فكانت بتبقى ليلة سوداء كل ما كلب يدخل انا اقعد اقولوا هش وهوة يـ....... يالله ما علينا اللي شاف الحلقة الأولى ها يعرف كانت ايه مشكلتي مع الكلاب .. المهم رجعولنا حاجتنا والضابط يقولي ايه اللي جابرك على كده يبني مكانت سلمية ومكنش فيها اي حاجة ليــه تأذي نفسك كده واكيد اذيت حد تاني معاك !!!!!!!! انا طبعا مليش خلق لسة ها اشرح وجهة نظري والكلام ده !! رد واحد وبسيط !!! حماس الشباب يا فندم وبعدين كل ثورة ليها خسايرها !! وانا اصلا لا مع دول ولا مع دول !!! انا مع نفسي !!!

وصلنا المطار وركنا العربيات ونزل احمد وسعد يجيبوا الضيوف ... بالمناسبة احمد مهندس ميكاترونكس وسعد هوة صديقي وبندرس وبنشتغل سوا ..

المهم غابوا بتاع ثلث ساعة فبكلمهم !! لقيتهم الإتنين بيتخانقوا مع بعض (كالعادة) فيه ايه يبني !!! اصل البيه يا عم سيد مش عارف هوة جي يجيب مين هوة عارف انهم 3 انفار !!! 3 انفار يبني انتا رايح تجيب عمك من ليبيا !! فيه ايه متعرفش اساميهم قالي لأ !!!! بسيطة يا عم اكتب اسم الشركة على اليافطة ساعتها ها يجولك همة !!! شفت بسيطة ازاي !!!

آه والله بسيطة المهم علموا كده ووقفوا مستنين لحد ما زهقوا وانا زهقت !!! طلبت منهم انزل امشي رجلي شوية واقف معاهم ... وجم بالفعل نزلوني وادوني العكاكيز اللي الحقيقة الموضوع طلع صعب جدا والله ومش بالسهولة اللي الواحد بيشوف الناس بتمشي بيه كده !!! المهم اخذت العكاكيز وبدأت اتنطط على رجل والتانية عمال زي الكلب اللي خبطتوا عربية بيبقا ماشي بيعرج نفس العرجة السوداء دي .. (ربنا ما يوريكوا انك تعرف انهي رجل اللي تتنقل وبعدين العكاز ازاي صدقوني الموضوع صعب جدا ومش بالتفاهة اللي باين عليها ) وصلنا للقاعة واخرينا في الإذاعة الداخلية اعلنوا انه الرحلة وصلت .. يا فرج الله ... وبعدين واقفين بنهرج مع بعض وبنتكلم !!! ولقينا شاب في حوالي 32 – 36 جاي بيقول انه مستر آدفيلنر !!! وانه الخبير الهولندي وزميليه ها يخلصوا ورقهم وطالعين حالا .. وبصراحة انا صدمت انا كنت متوقع كلمة خبير دي زي عندنا واحد شاب بيلعب في الـ 86 سنة كده يعني اشبال !! وده لسة في الـعقد الثالث .. وفضل يقولنا انا مش قلقان خالص ومصر بلد حلوة وفلة وانا سعيد ومش عارف ايه وهـــــــــــــــــــــــــــــــــــــــب سيدتان فاضلتان من دولة امريكا العربية الشقيقة !!!! وراح مشاور عليهم وقال (There they are finnaly !! what took you so long )

اعمارهم بأي حال من الأحوال لن تتجاوز الـ 30 عام على اسوء تقدير !!!!!!!!

ولكم ان تتخيلوا احنا الثلاثة واقفين جنب بعض وكلنا فاتحين بقنا !!!!! وبالنسبة ليا انا فضلت متنح !!!!! وسعد كذلك الى ان كسر الأستاذ احمد الصمت قائلا " هوة مش ده الأسباني بتاع ثمانية وربع" !!!!!!!! اسباني ايه يا عم انتا !!! دول خبراء اجانب !!!! لا همة فعلا خبراء !!!! ومش ها اقدر اوصف حاجة معلش عشان الإيقاف اليومين دول بيقولوا شغال ايه وانا عمالة تطرأ عليا جملة واحدة بس الا وهي " الله يمسيكي بالخير ياماه دنا كنت بحب صندل في مصر " وطبعا دي الجملة الشهيرة للأستاذ محمد هنيدي من فيلم همام في امستيردام ..

المهم تعارفنا وطبعا خلعنا من الحج آدفيلنر وشيل شنطلك بنفسك يا عم آدفلنر انما السيدات مفيش شيال يجي امال احمد وسعد بيعملوا ايهوالحقيقة تقريبا احمد نسي خالص انه لسة كاتب كتابوا من حوالي 6 – 7 ساعات نسي خالص الكلام ده بس بقا مرسوم على ووجهه ابتسامة مش طبيعية كفاية اني اقول مبتسمهاش لخطيبتوا من ساعة ما عرفها وانا واثق من الكلام ده واي حد هنا متزوج ها يفهم انا اقصد ايه ( ربنا يعينكوا على المسؤولية والله ) المهم حطينا الشنط والحج سعد والحج آدفيلنر في العربية التانية عشان يادوبك على قد الحاجة والعربية التانية انا واحمد والخبــــــــــــــــــراء الأجانب .. وطبعا اصبحت هنا المعضلة مرة أخرى في الركوب اكيد مش ها اركب ورا وامد رجليا بنفس الوضع عشان حتى منظرنا قدام العالم .. والغريب بقا اني بقيت ماشي زي القرد بالضبط ولا عكاكيز ولا اي حاجة وبقيت ماشي بتنطط زي حسام حسن في عز مجدوا في الملاعب ومن غير عكاكيز كمان .. المهم رسينا اني ها اركب قدام جمب السواق (سعد ) وها نفتح الشباك واطلع رجلي بالجبس بره لأني اكيد مش ها امدها على التابلوه عشان عيب برضوا حتى .... ومش قادر اوصفلكوا اني كنت محط سخرية المطار كلو عشان بنرجع الكرسي للخلف وبعدين بنزل الشباك واطلع جزء صغير جدا جدا من قدمي من الشباك بالزبط يبقى قدام المراية الجانبية !!!!! وتوكلنا على الله تحركنا .. وفجأة رئيسنا في الشركة بيتصل .. الو

انا:ايوة يا ريس

هو: ايوا يا سعد

انا: لأ يا ريس انا سيد مش سعد

هو: غلطنا في البخاري يا سيدي

انا:ولا يهمك يا ريس تحت امرك ..

هو:روحتوا المطار ولا لسة كعادتكوا ها تتأخروا وتعرونا قدام الناس .

في اللحظة دي سعد سرق التلفون من على ودني وقال : ربنا يخليك ليا يا ريس ويعلي مراكبك كمان وكمان واجيلك المطار كده وانتا جي من الحجاز يا ريس ..

يا ريس كلو تمام حسب تعليماتك وانا متبرع اي حد خبير بعد كده او اجنبي انا اللي ها اطلع اجيبوا يا ريس احنا كلنا هنا فدا خدمتك يا ريس ..

مع اني عمري ما شفت سعد بيحترم المدير بالطريقة دي !!!!! صحيح الـ ..... تغير النفوس ...

المدير : انا اخترتك مش عشان حاجة عشان انتا ساكن في جمال عبدالناصر وسواق الشركة قال للأسباب الأمنية مش ها يعرف يروح وانتا اقرب موظف للمطار فبعتك ويارب متكسفنيش قدامهم لا انتا والـ .......... (وشتمني انا هنا بصفة حيوانية ولكن يالله هوة ها يروح من ربنا فين )

وفي اللحظة دي بدأت احس ببرد شديد جدا جدا جدا ..

الجو برة العربية تلج وانا مطلع رجلي برة وسعد بيجري كمان فحاسس اني حاطط رجلي قدام التكيف .. براحة شوية يا عم سعد .. وفعلا الراجل احترم نفسه وهدا شوية عشان انا كت بدأت افقد الإحساس برجلي فعلا والله ..

وصلنا الفندق وعملنا check in وزبطنا الدنيا واتفقنا انه احنا ها نكون بكرة الصبح ان شاء الله في تمام الساعة 7 عندهم ( مع اننا مش بنصحا 7 دي اصلا ) ولكن لأجل بلدي يهونالصحيان بدري :D ومش عارف منين جه كم النشاط ده كلو .. نزلنا الناس وتحركنا على البيت ..

فسعد قالي معلش بقا يا سيد انتا ها تقعد عندي الكام يوم دول مدام معندكش حد ياخد بالوا منك على الأقل لما تقعد عندي ها ابقى مطئمن عليك هوة انا ها اغيب عنك كل يوم بس بتاع 5 – 6 ساعات مع الخبراء وها ارجعلك آخر النهار ...

انا وفي نفس واحد وغير ومتردد بالمرة .. وليه يا خويا !! هوة انا كانت رجلي اتشلت انا قادر امشي ورجلي على رجلك .. دي سمعة مصر اللي بين ادينا دي ..

وفي نظرة من الغيظ منه قال ماشي يا عم بالراحة بس .. وفي طريقنا للبيت معدين على النزهة والسندباد ووصلنا لحتة بتاعت الكبري الخاص بالحرفيين اللي مش بتطلعوا وبتعدي من تحتوا شمال ..

لقينا احد اللجان الشعبية اللي مولعة نار وقاعدة بتتدفأ جنب النار .. ومدججين بأسحلة ثقيلة ( مدججين دي لسة سامعها في التلفزيون والله ) وبيشيروا لنا بالتوقف ..

انا مش ها اوصفلكم اشكالهم ولكن هوة اصغر واحد فيهم كان بالحجم ده .

وهما كانوا حوالي بتاع 5 – 8 افراد بس اللهم صلي على النبي صحة ايه ...

طلبوا يشوفوا الرخص والبطايق .. وشافوها وفتشوا العربية

ملحوظة :- كان فيهم واحد رابط كلب بلدي بحبل وبيشمموا العربية مع ان الكلب اصلا شكلوا .... (املأ مكان النقاط بالكلمة المناسبة)

وبعدين بيقولولنا مش فيه حظر تجول ولا انتاو ايه بايعين نفسكوا وعايزين حد يعلمكوا الأدب ماشيين بعد الحظر ليــــــــــه انا عايز افهم .. واخوكم (اللي هوة انا ) ركبي اصلا بتخبط في بعض من الرعب .... طيب لو حد عمل اي حركة سعد او احمد فيه في ايديهم انهم يجروا عشان برجلين طيب بالنسبة ليا انا :D ها اتاخد على اني اسرى حرب والجو ده ..

رحت ناده لسعد .. يا سعد متكترش معاهم في الكلام لحسن شكلهم شاربين انتا مش شايف كبيرهم شكلوا عامل ازاي ... ده شكلوا مخلوق بيتغذى على العجينة الإسمنتية !!!!!!!!!!!!!!

راح سعد مزعق .. وقايل ..

يا عم آه انا عارف انه فيه حظر وفيه قلة ادب حاصلة وانا ماشي بعد الحظر حد فيكم له شوق في حاجة .. والحقيقة انا كنت قاعد في العربية جوة عامل فيها من بروكينا فاسو .... ولا كأن سعد ده حد أعرفوا .. وانا اقولوا يا سعد يالله يا بابا يالله .. لحد ما الراجل كبيرهم راح قايل خلاص يا رجالة فضوها سيرة اتكلوا على الله احن بس خايفين عليكم في طريق زي ده اتكلوا على الله ....

هنا بقا اخوكم راح نافخ صدروا وقايل عالم متجيش غير بالعين الحمرة !!!!!!!!!!!

متشكرين قوي يا رجالة ربنا يقويكم ...

ههههههههههههه انا عارف انكم بقيتوا واخدين عني فكرة منيلة بستين ........ بس اهو للضرورة احكام .. والحمد لله وصلنا تحت البيت وركنا وكلو تمام .. وبفتح الباب ولسة ها انزل ....

نكمل في الحلقة القادمة بقا ان شاء الله هشان تعرفوا لقيت ايه اول ما نزلت :D :D

ملحوظة انا اكتشفت اني مطالب اني آخد اكثر من 4 حقن في اليوم بس عشان ام المسامير دي !!!!! يالله ....

واي ملحوظة يا جماعة انا برحب بيهم جدا وانا فعلا والله سعيد انه السلسلة شديت انتباه بعض الناس واخرجت من الجو الكئيب اللي احنا عايشين فيه ده واهو تغيير وخروج عن الواقع وتملص منه :D

[raouf]

امممممممممم كده الموضوغ مش هايكمل

109مشاهدة

3 ردود

الظاهر ان ماحدش عجبته القصة

ولا الاسلوب فى الكتابة

رغم انى كل ما اقراها لا استطيع ان اكتم الضحكات

[MohamadOmar]

الموضوع ده جامد أوى على فكره

أنا عضو جديد معاكوا وده أول موضوع أقراه لللأخر ....ياريت بجد تكمل الموضوع يارؤوف :)

[MohamadOmar]

الموضوع ده جامد أوى على فكره

أنا عضو جديد معاكوا وده أول موضوع أقراه لللأخر ....ياريت بجد تكمل الموضوع يارؤوف :)

[MohamadOmar]

الموضوع ده جامد أوى على فكره

أنا عضو جديد معاكوا وده أول موضوع أقراه لللأخر ....ياريت بجد تكمل الموضوع يارؤوف :)

[Dreamwithme]

تسجيل متابعة واعجاب

جزاك الله خيرا يا أستاذ رؤوف

[raouf]

شكرا ليكم يا شباب

بس يا ريت حد من المشرفين ينقل الموضوع الى باب دعوة للابتسام اول مرة اخد بالى انى فتحته فى هذا الباب

والحلقة القادمة غدا وهتكون حلقة ممتعة جدا جدا جدا

[raouf]

حد لسه عايز يكمل الموضوع ولا نقفله بالضية والمفتاح