صوص المشروم....بيتعمل ازاى؟؟

[وليد صفوت]

السلام عليكم،..

انا قولت اللى عاوز اقوله فى العنوان

:closedeyes:

بس حابب اضيف انى اشتريت مشروم و فتحته و جربت احط عليه ميا و اسيبه على النار.... و لا الدموع!! طلع كأنه ما نيئ! اعمل ايه؟

[مغتربة]

لا يا استاذ صفوت كدا عمره ما هيطلع معاك صوص مشروم

مبدئيا صوص المشروم مبيتعملش بالفطر بس

ازاى

يعنى دايما لو تلاحظ يقولك مثلا ستيك بصوص المشروم او بيكاتا بالمشروم او او

يعنى المشروم بيعتمد على مكونات تانيه علشان يطلع منه الصوص

لكن المشروم لوحده مش هيديلك صوص حلو ابد

يعنى مثلا البيكاتابالمشرم بيحصل ايه

الاول بتحط زبده فى الطاسه و بعدين بتشوح فيها قطع الستيك المتبله ملح و فلفل بس تحطها و الطاسه سخنه جدا جدا علشان متنزلش ميتها لكن تتحمر

و تحمرها من كل جهه حوال من 3 الى 4 دقايق على حسب ما تديلك لون بنى حلو بس خلى بالك انها متتحرقش منك

بعد كدا بتنشلها و فى نفس الزبده الى باقيه فى الطاسه بتحط بصل مقطع جوليان ( الى هو تقطعه حلقات بس مش رفيعه و بعدين كل حلقه تقسمها هلاللين)

اوكيه لغايه كدا اول ما البصل يدبل مش لونه يغير خد بالك تضيف عليه المشروم و برضه دققتين كدا وتتبلهم بالملح و الفلفل فى ناس بتحب تحط بهارات تانيه لكن خليك فى المضمون احسن

بعد كدا عندك اختيار من اتنين يا اما بتزود ميه على الخليط دا (البصل و المشروم الى على النار ) و بعدين تحمر معلقتين دقيق بره و تضيفهم عليه و تحرك بسرعه علشان الدقيق ميكلكعش اوبقى الفكره الالذ و الاسهل بس الاكثر دسامه انك بضيف كريمه طبخ

اوكيه بتستنى لما الخليط يبدا يغلى و بعدين بترجع قطع اللحمه فيه تانى و تغطى الحله لغايه ما الحاجات تستوى

تحمير الفراخ او اللحمه الاول فى الزبده الى بنستخدمها بعد كدا فى عمل صوص المشروم هو الى بيدى الصوص طعمه الجميل و الكريمه او معلقتين الدقيق هما الى بيدولوا الكثافه

ممكن من غير لحمه او فراخ تبدا من اول خطوه تدبيل البصل فى زبده على طول و ممكن ساعتها تضيف مع البصل و الماشروم اى خضراوات تانيه فلفل رومى مقطع بازلا جزر ذره اى خضار تحبه لكن مش هيكون فيه نكهه التحمير الى بيديها تحمير اللحم الاول و نمشى باقى الخطوات زى الطريقه الاولى

لكن استحاله يطلع معاك صوص مشروم من غير حاجه تكثفه زى الكريمه او ممكن السور كريم او الطريقه القديمه معلقتين الدقيق

و اى استفسار انا حاضره

تحياتى

تم تعديل 4 أبريل 2011 بواسطة مغتربة

[وليد صفوت]

استاذه مغتربة... انا بشكرك جدا على الافاده......انا مبدئياً لازم اخد الكلام ده معايا علامطبخ طالما ماحدش فى البيت عاوز يساعدنى فى المشروم ده :unsure: كلهم بيقولولى مش بنحبه و مش بنطبخه

:happy:

بس بما انى فاشل مطبخ...فهسأل سؤال فاشل برضو: ايه الفرق بين ان البصل يدبل و بين انه ياخد لون احمر فى اثناء القلى؟؟ انا اللى فهمته دلوقتى من طريقة القلى انى استنى لما يدبل مش بس ياخد لون احمر؟؟ صح؟

و ميرسى على المساعدات القيمة دى يا استاذة مغتربة

[مغتربة]

المقصود ان البصل يدبل انه يلين يعنى اول ما يصفر على خفيف قوى يعنى انت اول ما بتحطه فى الطاسه بيكون متماسك لكن مع التقليب على النار شويه شويه بتحس بيه لان تحت الحاجه الى بتقلب بيها معدش فى نفس الحاله الى اول ما حطيتوا على النار فيا يعنى هو بياخد حوالى دقيقتين على النار بس علشان يوصل للحاله دى

و بعدين احنا مش بنحمر البصل احنا بنشوحه

خلينى اقولك على مقادير كويسه علشان الاكله تظبط معاك

يعنى نقول مثلا انك هتعمل نص كيلو لحمه يبقى هتشوح اللحمه (الى هى شرايح بتلو مش لحمه الطبيخ العاديه المكعبات )فى حته زبده حلوه يعنى تقريبا ما تعادل معلقتين كبار سمن و ممكن لو تحب تستبدل السمنه بدل الزبده لكن طبعا الطعم بالزبده لا يعلى عليه

اوكيه بعد ما لون اللحمه يتحول للون البنى الى انت عاوزة من كل ناحيه تنشل اللحمه و فى نفس الزبده الى باقيه تحط مثلا بصله كبيره تدبل زى ما قولنا و بعدين تحط مقدار من المشروم المقطع مثلا ممكن تاخد منك حوالى نص العلبه او اكتر شويه براحتك عايز مقدار الفطر اد ايه بعد ما لون الفطر يغير للون حلو برضه تتبل بملح و فلفل و بعدين تضيف ما مقدارة حوالى كوب من الاكواب متوسطه الحجم من كريمه الطبخ و دى تلاقيها فى كارفور فى التلاجات المفتوحه عند الزبادى و الحاجات دى لازم تختار الى مكتوب عليها انها تصلح للطبخ اوكيه مش عايز كريمه هنحمر معلقتين دقيق زى ما قلنا هنحطهم على الخليط الى على النار و بعدين نزود مايه او لو فيه شوربه يكون افضل لو معندكش شوربه لحمه ممكن مايه و مكعب شوربه و برضه المايه او الشوربه مقدار كوب متوسط او اكتر قليلا نستنى لما الخليط دا يبدا يغلى نرجع قطع اللحمه تانى و نغطيه عشر دقايق بالكتير او لغايه ما نلاقى كل الحاجات استوت و بالهنا و الشفا مقدما

ملحوظه نفس الخطوات بالضبط ممكن بصدور فراخ و برضه المقادير هتكون نص كيلو صدور فراخ لكن الفراخ مبنستناش لونها يقلب بنى غامق و الا هتتحرق لا يعنى يتغير لونها كويس بس طبعا عمرها ما لونها هيوصل للون اللحمه

ملحوظه اخيره ممكن لو انت ناوى تعملها بالدقيق مش بالكريمه انك تعفر اللحمه فى الدقيق زى بالظبط ما تكون هتقلى سمك و بعدين تحط اللحمه فى الزبده و فى الحاله دى مش هتحتاج تحط دقيق تانى لان اللحمه و هى بتتحمر هينزل منها الدقيق يدوب فى الزبده الى هنستخدمها بعد كدا و دا حل اسهل للناس الى ممكن متعرفش تضيف الدقيق بشكل منفصل لانها لو مقلبتش الدقيق بسرعه هيكلكع منها لكن بالطريقه دى كل الى عليها انها تبقى تضيف الشوربه او المايه بس

و اى سؤال انا برضه حاضره

تحياتى

تم تعديل 4 أبريل 2011 بواسطة مغتربة

[وليد صفوت]

ربنا يخليكى يا استاذه و الله انا كده فهمت انا هعمل ايه بالضبط....

و طريقة تقليب شرائح اللحمة فى الدقيق دى اسهل بكتير.... انا هعمل كده يوم الجمعة ان شاء الل عشان ابقى فاضى و براحتى بقى احتل المطبخ و اعمل التجربة دى

art:)

و اجى اقولك ايه اللى حصل..... بس بما انى فتحت علبة المشروم اصلا.... ينفع اشيلها فى الثلاجة فى علبة بلاستيك لحاة لما أجى استخدمها و لا تبوظ؟؟

[مغتربة]

ربنا يخليكى يا استاذه و الله انا كده فهمت انا هعمل ايه بالضبط....

و طريقة تقليب شرائح اللحمة فى الدقيق دى اسهل بكتير.... انا هعمل كده يوم الجمعة ان شاء الل عشان ابقى فاضى و براحتى بقى احتل المطبخ و اعمل التجربة دى

art:)

و اجى اقولك ايه اللى حصل..... بس بما انى فتحت علبة المشروم اصلا.... ينفع اشيلها فى الثلاجة فى علبة بلاستيك لحاة لما أجى استخدمها و لا تبوظ؟؟

بالنسبه للفطر متخفش مش هيحصل له حاجه لو احكمت الغطاء عليه من هنا ليوم الجمعه

لو هو فطر معلب شوف تاريخ انتهاء الصلاحيه لو هو فطر فريش دا بيقعد فتره كويسه فى التلاجه ممكن اسبوع مبيحصلوش حاجه

لكن للامانه انا عايزه اقولك ان افضل نتيجه و احلى صوص مشروم هو الى بالكريمه يليله الى بالشوربه و فى الاخير خالص الى بالماء فقط فحاول انك تجربها احلى بالطرق الاول

بالنسبه للدقيق لو انت هتعفر اللحمه برضه خليك مجهز نفسك يمكن تحتاج منك معلقه دقيق اضافيه متحمره بره زى ما قلنا دا بيعتمد بصراحه على كثافه الصوص انت عاوزة ازاى و دا بيختلف من شخص لاخر

كمان و هى بتستوى لو لقيت ان الصوص قل قوى و اللحمه لسه مستويتش كويس نزود ميه او شوربه حبه صغير فى حبه صغير لغايه ما اللحمه تستوى كويس و فى نفس الوقت يكون عندنا صوص كثيف لا غليظ و لا خفيف

تحياتى

[لونا]

تسلم الأيادي يا مغتربة .. شرح مفصل و تمام التمام :)

أنا باعمل صدور الفراخ بالمشروم زيك مع بعض الاختلافات البسيطة

1) المشروم الطازة بيفرق جدًا في الطعم عن المعلب ..

و هو على فكرة مش بيتغسل .. يا دوب بنضفه بمنديل ورق .. و إلا يمتص الماء مثل الإسفنج

2) قبل أي حاجة باسخن الزبدة شوية و أحط عليها المشروم المتقطع الأول ..

و لا أقلبه غير لما ياخد لون خفيف ..

و باحط عليه رشة فلفل أسود بعد ما ياخد لون من الجنبين ..

و بعد كدة أنشله .. و أكمل باقي الخطوات زي مغتربة

يعني في نفس الزبدة أحط البصل الجوانح و بعدين الفراخ .........

و قبل ما نحط الكريمة أو القشطة بنحط المشروم تاني

3) على فكرة أنا مش باستعمل كريمة الطبخ.. باستعمل قشطة المراعي أو القيمر ..

و بتدي نتيجة ممتازة bv:-

جربوا تحمير المشروم في الزبدة الأول بيفرق كتير في الطعم ..

و ابقوا إدعوا لي

تم تعديل 6 أبريل 2011 بواسطة لونا

[fatfouta]

طب عاوزة اسالكم سؤال فاهيتا الفراخ بتتعمل بنفس الطريقة؟؟؟

[لونا]

شوفي يا فتفوتة قعدت أدور لك على طريقة الفاهيتا

و لقيت إن طريقتها قريبة من طريقة شاورما الفراخ اللي باعملها .. و بتطلع روعة

قلت أقولك على الشاورما و خلاص :closedeyes:

المكونات

* صدور دجاج مقطعة شرائح 1 سم في 3سم تقريبًا

* فلفل أخضر و ألوان مقطع شرائح

* بصل مقطع شرائح

* طماطم مقطعة مكعبات

* زيت زيتون

* ملح - فلفل - قرفة

* 2 ملعقة طعام خل

الطريقة:

* نضع الدجاج في زيت الزيتون الساخن ..ونتركه حتى يأخذ لون ذهبي من كل جانب ..و لا نقلبه كثيرًا

* نضع التوابل و الخل و الملح .. و نترك الدجاج حتي ينضج

طبعًا الدجاج مقطع شرائح و ينضج بسرعة

* نضيف الخضروات و نقلبها مع الدجاج ..و لكن لا نتركها كثيرًا على النار

فقط حتى تتشرب النكهة .. لأننا نريد الخضروات مقرمشة

ممكن تعمليها سندوتشات مع سلطة طحينة وخيار مخلل في عيش شامي

و بالهنا و الشفا

تم تعديل 7 أبريل 2011 بواسطة لونا

[وليد صفوت]

استاذة مغتربة.... انا عملت الماشروم بالفراخ زى ما قولتيلى بالضبط...و بصراحة انا زودت شوية مقدار الماشروم و زودت كمان من كثافة الصوص عن طريق انى زودت برضو من مقدار الدقيق.....

هو طلع كثيف بزيادة بس طبعاً طعمه كان رائع و خصوصا بعد ما ضيفت الكريمة.... انا مش شايف اى فرق بينه و بين الماشروم اللى كنت بشتريه جاهز و كانت العلبة الصغيرة منه بحوالى 3 جنيه.... يعنى انا وفرت و مافيش فرق تقريبا فى الطعم...المرة اللى جاية هبقى اخفف الصوص شوية

:partytime:

الف شكر ليكى يا استاذة مغتربة على النصائح المطبخية دى و بجد برافو عليكى

ملحوظة بسيطة بس: اول تجربة بتاعت العلبة اللى كنت فتحتها قبل كده فشلت فشل ذريع :blush2: بس انا ما استسلمتش و لم اعلن الهزيمة، و خطفت رجلى على اقرب سوبر ماركت و جبت علبة تانى و دخلت المطبخ و اعلنت الحرب... و الحمد لله زى ما قولتلك انتصرت لما التزمت بالتعليمات بتاعتك يا استاذة مغتربة

شكراً جزيلاً