ميدالية ثالثة لمصر بالملاكمة

[gegi]

عن الجزيره:

أكد الملاكمون المصريون مجددا أنهم الأفضل بين باقي أعضاء البعثة المصرية المشاركة في أولمبياد أثينا، حيث تمكنوا من ضمان ميدالية برونزية ثالثة على الأقل بينما فشل ممثلو باقي اللعبات في تحقيق أي إنجاز حتى الآن.

وستكون هذه الميدالية في وزن أقل من 81 كلغ بعد أن نجح الملاكم أحمد إسماعيل في التغلب على منافسه اليوناني إلياس بافليديس، بقرار من الحكم في الجولة الثالثة من اللقاء الذي جمع بينهما مساء الثلاثاء ضمن الدور ربع النهائي للمسابقة، وشهد مؤازرة جماهيرية كبيرة للملاكم اليوناني.

والمثير أن إسماعيل تخلف 6-9 في الجولة الأولى و6-9 أيضا في الثانية لكنه أصاب منافسه بجرح عميق قرب العين اليسرى مما أدى إلى تدفق

.....

.....

وفي حالة فوز إسماعيل في مباراته المقبلة سيلعب على الذهبية أو الفضية، أما خسارته فتعني فوزه ببرونزية. وهو نفس الحال بالنسبة لمواطنه محمد علي في وزن فوق 91 كلغ. أما الملاكم المصري محمد السيد فقد ضمن البرونزية في وزن 91 كلغ رغم إعلان انسحابه رسميا من مباراته المقبلة

[hamo90]

المرة دي سبقتني بعد ما حطيت خبر الميدالية الاولي والتانية ... ماشي

عشان كده بقي هديللك الميدالية البرونزية وأحتفظ لنفسي بالدهب والفضة

hamo

[Farida]

حاجه تفرح و الله المرة دى سمعونى أغنيه "المصريين أهمه حيويه و عزم و همه"

يعنى ياربى فى الموضوعات اللى بننتقد فيها احوال البلد تلاقي المشاركات نازله ترف و الموضوعات اللى بترفع روحنا المعنويه و لا حس و لا خبر

ع العموم مبروك لينا و على رأى المذيع الغلس اللى مالوش حل "مبروك يا ريس مبروك يا ريس ولادك يا ريس " طب و الباقيين ايه ولاد الدادة

[ahmous_25]

"مبروك يا ريس مبروك يا ريس ولادك يا ريس " طب و الباقيين ايه ولاد الدادة

الي بيكسبوا بس بيبقوا ولاد الريس اما الخسرانين فا الريس متبري منهم ليوم القيامة ;)

الف مبروك لمصر و بس علي الميدالية الثالثة

[Tamsite]

أنا لما قريت الجرنان النهاردة ، لقيت فيه :

أحد ابطال الملاكمة الحائزين على ميدالية اوليمبية بكى لما استلم المكافأة الفورية اللي اتصرفت له وقدرها 5000 دولار ، وقال في وسط ما كان بيعيط من الفرحة ، ان ده أكبر مبلغ مسكته ايديه في حياته

انا الدمعة كانت هتفر من عيني والله عشان الشاب المكافح ده لقى ثمرة نجاحه cbyb:

وحسيت قد إيه فيه ناس غلابة ، وشغالة من سكات ولا حد حاسس بيها ولا اعلام ولا اعلانات تليفزبون ، ولا كلام فاضي وهلس

وفي الآخر نفاجأ ان هم دول اللي رفعوا راسنا في المحافل الدولية

أما اخواننا البعدا بتوع الكورا خليهم في الهيافات بتاعتهم و اخفاقاتهم المدوية نتيجة لدلعهم ورعونتهم ، وتحويلهم الرياضة إلى بزنس وأعمال ومصالح

بس انا عندي امنية نفسي تتحقق ، عشان انا قربت أتخنق خلاص ;) :

مش لازم نحشر سيادة الريس في أي نجاح يحرزه أحد أبناء البلد في المحافل الدولية ، واهداء الميداليات والكئوس اللي اولادنا الرياضيين الحقيقيين حصلوا عليها بكفاحهم لسعادته عشان يرميها في مكتبة خاصة عنده من غير ما يحس بقيمتها

وبعدين انا عايز أسأل ماسحي الجوخ من المذيعين والمعلقيين الرياضييين ، فين بقى الكلام عن الرئيس والانجازات والعصر الذهبي لما حد من اولادنا بيفشل بره

ولا المثل كان صح لما قال:

النصر له ألف أب ، والهزيمة ابنة سفاح

والألف أب دول كلهم سيادة الرئيس

معلش يا جماعة انا آسف اني خرجت عن موضوع الانجازات شوية ، ودخلت في السياسة

أصلي نفسي الرياضة الجميلة الحقيقية ، تبعد عن السياسة والأوضاع البايظة اللي في البلد من لسلبية والنفاق والرياء ، عشان مقفلش من الرياضة كمان و الفرجة عليها وأي انتصارات نحققها فيها كمصريين

على العموم ، الف مبروك لأولادنا اللي شرفونا ، وده كان أملنا فيهم

تحياتي و تقديري ...........