هنا نتكلم عن الأحداث الأخيرة في يوم الجمعة 8 إبريل

[Abu Reem]

حبس 45 ناشطا 15 يوما في أحداث التحرير بينهم نجل حسين عبد الغني

السبت, 9-04-2011 - 7:28

ألقي القبض على 45 ناشطا خلال الأحداث التي وقعت فجر السبت في ميدان التحرير وصدرت ضدهم أحكاما عسكرية بالسجن 15 يوما ومن ضمن هؤلاء كريم محيي الدين، أحمد رفعت، مصطفى علاء، جو إلبير، وآسر حسين عبد الغني نجل الإعلامي المعروف حسين عبد الغني المدير السابق لمكتب قناة الجزيرة بالقاهرة.

جريدة الدستور

أبو ريم

خد دي ...

في المؤتمر بتاع الشئون المعنوية صرحوا إنهم أستولوا مقرات الحزب والوطني بالكامل تمهيداً لحله ...

وإنهم بيبحثوا دلوقت حل كل المجالس المحلية

مش ده كلامنا من أول الثورة ما قامت ؟

وليه سياسة ردود الأفعال دي ؟

هات يابوعمر ولا يهمك

طب خذ انت دي واتوقع تعجبك

ليه ما تقولش ان تنفيذ الطلبات بعد المظاهرات المليونية والمواجهات الدامية هي تصرف ذكي من المجلس العسكري لرفع الحرج عنهم امام مبارك وكبار اعوانه بحجة ان المجلس يقع تحت ضغط شعبي قوي وخطير وبالتالي لا مفر من تحقيق مطالبه

يعني انت لازم برده تحط نفسك مكانهم هو انت عاوز كده علي طول بعد ما الراجل يمشي وقد يكون ماسك عليهم ما لا نعرفه ، عاوزهم كده علي طول يضربوه في ظهره

ياراجل ده الواحد فينا لو مديره اللي مطلع عينه وعارف انه فاسد. وابن ستين تيت لما بجي يستقيل او يقال حتي ، بتيجي الناس بتعمله حفله وبيجيبوا له هدية وهما عارفين انه ما يستهالش الا ضرب النار

فما بالك برئيس دولة له جيش جرار من الامن الخاص والمستفيدين والمتورطين ايضا الذين سيفتضحوا اذا ما جاءت رجله

يعني يا جماعة لازم بس نعذر شوية المجلس العسكري رغم اخطاؤه الا انه تدريجيا يحقق الطلبات واخرها الخبر اللي اةرده سين سين

- يعني بالعربي بيقول لكم انتم بس انزلوا بالمليونية وانا انفذ عاوزين ايه تاني

[se_ Elsyed]

أقسم بالله ..وده قسم أنا مسئول عنه

لم تكن لتكون لا ثورة مضادة ولا مضاد حيوي .. لو كان صفوت الشريف او العادلي أو أي كلب من دول إتعدم في أول الثورة بتهمة قتل شعب باكملة ..

إنما تسويف .. ولكلكه .... وقلة أدب

بالله عليكم ... ألم نذكر بإن 120 كلب إتقبض عليهم في يوم موقعة الجحش واخدوا 6 سنين سجن سوكيتي بوكيتي وفي الخباثة

يا حلاوه ؟

ولا عرفنا مين وراهم ولا مين حرضهم وحاجه تجيب الشلل

[se_ Elsyed]

أنا هاعتبر ده رأي أبو ريم فقط

ليه ما تقولش ان تنفيذ الطلبات بعد المظاهرات المليونية والمواجهات الدامية هي تصرف ذكي من المجلس العسكري لرفع الحرج عنهم امام مبارك وكبار اعوانه بحجة ان المجلس يقع تحت ضغط شعبي قوي وخطير وبالتالي لا مفر من تحقيق مطالبه

حرج ... وكسوف ...

يا نهار مش فايت ...

طب ليه يقعد في شرم الشيخ .. ما نجيب له كرسي وشيشة ويرجع لقصر العروبة .. اسف يابوريم .. مش صحيح

يعني انت لازم برده تحط نفسك مكانهم هو انت عاوز كده علي طول بعد ما الراجل يمشي وقد يكون ماسك عليهم ما لا نعرفه

ماحنا قولنا كده على صدام حسين برضوا ...

أسف برضوا ....

كانت إتعدم وخلصنا وأسرارة ماتت معاه

طب خد دي .. اللوا بتاع المجلس بيقول دلوقت إن السياحة بتخسر مليار دولار كل شهر

هههههههههههههه يا حلولي.. يا حلولي .... زاهي بيه المحتاس من حوالي ساعة أمر بإغلاق المتحف المصري ومتحفين أخرين إلى اجل غير مسمى كإغجراء إحترازي ...

تخيل ؟

ياراجل ده الواحد فينا لو مديره اللي مطلع عينه وعارف انه فاسد. وابن ستين تيت لما بجي يستقيل او يقال حتي ، بتيجي الناس بتعمله حفله وبيجيبوا له هدية وهما عارفين انه ما يستهالش الا ضرب النار

لأ معليش ... لو كان مجرم وقاتل ويده ملطخه بالدماء زي مبارك .. يبقى الإعدام عليه شويه

- يعني بالعربي بيقول لكم انتم بس انزلوا بالمليونية وانا انفذ عاوزين ايه تاني

عارف لو هو ده المبدأ

والله العظيم ما تبقى ثورة .. دي تبقى رز بلبن

[fatfouta]

لم تطلق طلقة من عناصر القولت المسلحة الموجودة فى ميدان التحريررررر

طب مين اللى اطلق يا عاااااااالم....ارجوكم ماتكلموناش على اننا اطفااااااال حراااام كده

[أحمد سيف]

المبدأ العسكري الشهير الذي أنا متأكد أن لواءات المجلس العسكري يعرفونه هو: هاجم العدو في أقوى نقاطه

يعني لما تمسك مبارك وجمال وصفوت وشرور والعادلي ومعاهم الكام ملياردير بتوع الحزب الوطني وتحاكمهم بصورة عاجلة وتصادر أموالهم وتضعهم في السجن يبقى انت كده قضيت على 90% من المشكلة ... وممكن بعدها تقعد تتسلى على صغار الفاسدين اللي هيكونوا فقدوا مصادر قوتهم وتمويلهم والأهم فقدوا ثقتهم بالنظام البائد

انما تترك رؤوس الفساد حرة طليقة ومعاها الفلوس والأسلحة والبلطجية والعلاقات وتمسك في شوية بلطجية ومأجورين وصغار اللصوص يبقى انت كده ماعندكش جديه في المواجهة

الناس من أول يوم بتصرخ بأعلى صوتها وتقول للمجلس العسكري الخطوات المطلوبة من أجل إنقاذ البلد وتحقيق الاستقرار ... والمجلس مديهم الطرشة ... ودلوقت ببطء شديد بينفذ الخطوات اللي قالوا عليها زي إقالة المحافظين وحل الحزب الوطني والمحليات والقبض على رؤوس الفساد

ده مالوش عندي غير تفسير واحد وهو أن هناك قوى مضادة للثورة داخل المجلس كانت تريد منح فرصة للنظام السابق لإعادة ترتيب أوضاعه كي يتمكن من السيطرة من جديد ... ومن هنا كان الإصرار على بقاء شفيق وبعض الوزراء ومسؤولي الإعلام والحكم المحلي والأمن ليستكملوا مهمة إجهاد وإجهاض الثورة

ولكن إصرار الشعب على استكمال ثورته يجبرهم تدريجيا على التخلي عن النظام القديم وتحقيق ما يطلبه الناس ... وإن بتكلفة عالية يدفعها الوطن والشعب من استقراره واقتصاده.

[fatfouta]

إسمعوا اسماعيل عتمان

المتظاهرين هما اللى ضربوا علينا طوب وحجارة كانت معاهم واحنا لم نطلق رصاصة واحدة على المتظاهرين

انا مش بشكك فى اى حد بقى بس عاوزة الجيش يقولنا مين اللى اطلق الرصاص؟؟؟؟؟؟؟؟

[aimen]

ملخص المؤتمر الصحفي:‏ الجيش بيكذب..‏ ولازم نعلمه إن كده عيب

باتفرج ع المؤتمر الصحفي للجيش وكأني باسمع صفوت الشريف أو علي الدين هلال .. بس هما بيقولوا الساعة ألف وتلتمية وألف

عيب جدا

رفعناهم السما لكنهم اصروا على البقاء على الأرض

خيبة الله عليكم

[fatfouta]

التليفزيون المصرى بيذيع اعادة لاحد حلقات مسلسل

العار :closedeyes:

[Abu Reem]

يابو عمر با خويا حاول بس تركز معايا

انت قلت

--------111111---------------------------

يرضي ربنا إني احكم على حد شايل مطوة بخمسة وعشرين سنة ... والحرامي اللي سرقني 30 سنة وقلتنا بالسرطان والقطارات المحروقة والعبارات الغارقة .. أطبطب عليه وأسيبه في شرم الشيخ أو أسمح لاعوانه بالحصول على سيجار كوبي في السجن حيث هم الان يقضون امتع الاوقات ... يرضي ربنا ده ؟

-------------------/////////////////----------------------

انت لسه ضارب مثل من شوية بان المجلس العسكري مطلع قرارات تخليهم يقبضوا علي واحد مثير شغب او بلطجي بمطوة ويطسوه ب 25 سنة واللي سارقنا وقاتلنا بقاله 30 سنة سايبينه

اقول لك ليه رغم ان الاجابة في نفس كلامك بس انت مش شايفها

ياحج سين سين مبارك مش شايل مطوة مبارك كان له 2 مليون فرد بيحموه تحت مسميات مختلفة ، امن دولة امن مركزي ، حرس جمهوري ، شرطة عسكرية ، وحتي الجيش كانت قياداته الكيري تاخذ مكافات ولاء شهرية

مبارك كان له حزب وطني وله قادة وله اعضاء كبار حيتان يملكون المال والنفوذ والسلطة

مبارك كان له مؤيدين مستفيدين من هذا الفساد كما تستفيد السمكة من الماء

ولذلك مبارك واعوانه ليسوا كالغلبان ابو مطوة

- انا قلت من شوية احنا عاوزين نعمل زي محلل الكرة اللي عمال يقول احنا ليه مهمناش وليه ما جبناش اجوان اكتر وكان لازم يحصل كذا وكان يجب يحصل كذا وناسيين ان فيه خصم قوي جدا في الناحية التانية

المجلس العسكري لازم هنسمع منه تصريحات متناقضة ولازم هنسمع كلام لن نقتنع بيه لانهم في موقف صعب جدا وزي ما قلت محاكمة مبارك الان قد يضر كبارهم والمسألة ليست سهله وقد تكون قوى كبرى خارجية تجعل من مسألة محاكمة مبارك خط احمر لا يجب تجاوزه وقد يصل الامر الي تهديدات لا نعلمها فمحاكمة مبارك قد تجعله يقول كلام ويفضح اسرار لا ترضي القوى الكبري فهو ايضا سيبحث عن شماعة

وصلت كده ياجماعة

خلونا في اهم مطالب الان وهي الفاسدين في الهيئات والمجالس المحلية والنقابات والمحافظات

والاولوية الاخري هي الانتهاء من انتخابات البرلمان ثم انتخابات الرئاسة

تم تعديل 9 أبريل 2011 بواسطة Abu Reem

[se_ Elsyed]

ملخص المؤتمر الصحفي:‏ الجيش بيكذب..‏ ولازم نعلمه إن كده عيب

باتفرج ع المؤتمر الصحفي للجيش وكأني باسمع صفوت الشريف أو علي الدين هلال .. بس هما بيقولوا الساعة ألف وتلتمية وألف

عيب جدا

رفعناهم السما لكنهم اصروا على البقاء على الأرض

خيبة الله عليكم

ما هو ده اللي غايظني ...

الدنيا كلها كانت شايفة وسامعه وبتصور .. وبيقولوا ضرب ناري هيستيري من الجيش على المتظاهرين

ثواني ..

إذا كان المتكلم عاقل يبقى المستمع مجنون

مين إبن مجنونة مهما وصل إجرامه يجرؤ إنه يشيل سلاح ويروح ميدان التحرير عشان يضرب على جحافل الجيش والشرطة اللي هناك ؟

ده لما يكون سوبر هيرو يعني مش هايعملها

لسه سامع إسماعيل عتمان قال حته إفتكاسة مالهاش حل .. من نوعية الفيل أبو زلومه اللي بيطير مستخدماً ودانه الكبيرة كجناحات

بيقول إن لما إقتربت عناصر الجيش من ميدان التحرير وتحديداً في الدائرة اللي في النص .. لمحنا واحد مهم هو اللي كان بيحرض البلطجية .. المفاجاة بقى إن الشخص ده هو المُحرض على أحداث موقعة البغال والحمير

ههههههههههههههههههههه .. قول وكتاب الله ؟

[aimen]

http://www.youtube.com/watch?v=cjFbcRlCgXQ

دا حوار مع احد القيادات العسكرية فى المنطقة الشمالية العسكرية بالأسكندرية

تم تعديل 9 أبريل 2011 بواسطة aimen

[se_ Elsyed]

التليفزيون المصرى بيذيع اعادة لاحد حلقات مسلسل

العار :closedeyes:

ميرسي يا فتفوته ... كان نفسي أشوف الحلقة دي فعلاً

وهابعت لطنط نهال كمال تذيع الجزء التاني من حلقة " الحياة البرية لطائر اللقلق اللي كانوا بيذيعوها أيام ثورة يناير

[fatfouta]

القوات المسلحة اللى فى التحرير هى قوات غير مسلحة......طب إذااااى i*:

انا تعبت قوى من التفكير والله

[tarek hassan]

القوات المسلحة اللى فى التحرير هى قوات غير مسلحة......طب إذااااى i*:

انا تعبت قوى من التفكير والله

يمكن القول أن هناك من لا يريد الخير للبلد

هناك من ارتدوا زي الجيش وهناك محاولات مستميتة للوقيعة بين الشعب والجيش والمشهد معلوم ومتكرر في بلاد كثيرة

وقد كانت تفعل ذلك أمريكا في فنزويلا للإيقاع بشافيز وكادت تنجح

مش بعيد إنه يندس ناس كتير من أعداء الوطن لغرض

تم تعديل 9 أبريل 2011 بواسطة tarek hassan

[se_ Elsyed]

ولذلك مبارك واعوانه ليسوا كالغلبان ابو مطوة

ممتاز جداً

بس بديهياً .. الحية تموت بقطع رأسها .. مش زغزغيتها في ذيلها وزعانفها

صدقني يا أبو ريم .... من غير حلفان ...

لن نخطو خطوة واحدة للامام ... ولن يتم بناء طوبة واحدة في مصر .. طول ما الحيه واعوانها احرار طلقاء ....

ما ينفعش بأي حال من الأحوال ده يتم

انا قلت من شوية احنا عاوزين نعمل زي محلل الكرة اللي عمال يقول احنا ليه مهمناش وليه ما جبناش اجوان اكتر وكان لازم يحصل كذا وكان يجب يحصل كذا وناسيين ان فيه خصم قوي جدا في الناحية التانية

تخل بقى إن في يمعظم الأحيان كلام الناس ده اللي بيطلع صح في الاخر

فاكر موضوع حسام البدري ؟ هههههههههه

الشيء المهم .. إنت شايف ولامس حقائق .. وإذ كنا بنفتي وبنحلل وإحنا قاعدين على الشلتة .. يطلعوا يقولوا لا .. إنتوا غلطانين وإحنا زي الفل ومبارك بيتحقق معاه والمحافظين زي الفل ورؤسء الجامعات اللي أقل واحد فيهم مرتبه بيصل 70 الف جنيه هم سبب النهضة التعليمية الجامعية

و

أقول لك حاجه ؟

ههههههههه . أخبار الأرصدة والفلوس المتلتله اللي متحوله بره مصر إيه ؟ صباح الفل وأبقى قابلني

مره أخرى .. عارف إن سويسرا بتصادر 50 % من فلوس أي حرامي يموت حتى لو كان في احكام ضده ؟

عارف إن خلال الـ 3 شهور الماضية .. زمان زكريا عزمي المحبوس دلوقت .. وصفوت الشريف والاشكال الزبالة دي كلها كل واحد صرف له ييجي 100 مليون على أجدعها طقم محاميين من عينة فريد الديب وجميل سعيد ومرتضى منصور .. على طقم محاسبين قانونيين عشان يستفوا له أحلى أوراق ومستندات براءه ومش بعيد إن ما رفع علينا قضايا رد شرف .. وهايكسبها من أول جلسة لإن إحنا جرحنا أحاسيسهم

اه صح .. هو فين يوسف بطرس غالي ... وحسين سالم .. ورشيد محمد رشيد ... ومدي راخ وفين الشفيق أحمد فريق اللي سمح لهم بالسفر وراح باسهم من هنا ومن هنا وهو بيودعهم في يالمطار مش بس كده ده بيلطع لنا لسانه وانطلقت حملة اليوم لجمع توقيعات لترشيحة رئيساً لجمهورية مصر العالمية

[Dreamwithme]

المؤتمر الصحفي للقوات المسلحة فكرني خالص بخطابات مبارك

لازلت عندي نفس الحالة من عدم اتزان ومش قادرة أفهم كويس أي حاجة

يعني عايزني أصدق المؤتمر الصحفي للجيش؟ طب إزاي؟

وليه التضارب في الأقوال؟ ومين مصلحته اللي بيحصل دلوقتي

بلاش طب النهاردة بالليل هيعملوا أيه في العيال اللي في التحرير؟!

سيتم التعامل معهم بقوة وحزم :blink: طب إزاي مش هم دول الشعب اللي لماثار الجيش أخد صفهم

وعمال يذل أهلنا بأنه معملش زي ليبيا واليمن.....أم أن الجيش نسي أنه جه بشرعية ثورية

وأن استمراره في السلطة هو نتيجة لهذه الشرعية وليس لشرعية دستورية

[ozoozo]

اوووووووووووووووووووووووووووووووووفففففففففففففففففففففففففففففففففففففففففففففف

انا زهقت

طيب ايه الهدف ان بتوع الوطني يضرب الجيش في الشعب

ايه اللي هايحصل

استعاده النظام السابق مستحيل

هل هو فقط الانتقام

طيب لما البلد تولع هما هايروحوا فين؟

الملخص لمداخلتي

ماهو هدف الثوره المضاده؟

[fatfouta]

بلاش طب النهاردة بالليل هيعملوا أيه في العيال اللي في التحرير؟!

يا دريمى هما حذروا وقالوا قوة وحزم يبقى المعتصمين لو استمروا فى الاعتصام ساعة حظر التجول هيفضوا اعتصامهم بالقوة

[se_ Elsyed]

القوات المسلحة اللى فى التحرير هى قوات غير مسلحة......طب إذااااى i*:

انا تعبت قوى من التفكير والله

يمكن القول أن هناك من لا يريد الخير للبلد

هناك من ارتدوا زي الجيش وهناك محاولات مستميتة للوقيعة بين الشعب والجيش والمشهد معلوم ومتكرر في بلاد كثيرة

وقد كانت تفعل ذلك أمريكا في فنزويلا للإيقاع بشافيز وكادت تنجح

مش بعيد إنه يندس ناس كتير من أعداء الوطن لغرض

السيناريو ده مش بيفكرك بعساكر الأمن المركزي وامن الدولة اللي مسكوهم يوم موقعة الحمار ... ولقوا معاهم كارنيهات سليمة مليون الميه .. وطلع تكذيب من الشرطة وقالوا : ما حصلش ودول مدسوسين ؟

سيدي الفاضل ..

الـ 120 بلطجي اللي إتقبض عليهم يوم الموقعة الشهيرة ... هل العسكري الميري ده اللي أندس في وسطهم وضربوا المتظاهرين وقتلوهم بالرصاص الحي والمولوتوف والقناصة ... مش يستحقوا محاكمة عسكرية والإعدام رمياً بالرصاص ؟

----------

طب أجيب لكم من الأخر

المجلس العسكري في موقف حرج .. ولازم يقول إن الظباط بتوع الجيش اللي طلعوا بملابس ميري دول شاريين البدل دي من وكالة البلح وإنهم مش ظباط

وده كذب طبعاً

لإن الجيش عاوز يقول لنا : أنا زي الفل ... وظباطي كلهم معايا ... والدنيا حلوه وبمبي وإحنا في فصل الربيع حيث الزهور اليانعة والورود المتفتحة

وبعدين إستنوا .. حد يقول لي هايشوف فين ظباط الجيش دول فين تاني بعد ما أتمسكوا عشان يعرفوا دول تايواني ولا أصلي ؟

[Abu Reem]

ده مالوش عندي غير تفسير واحد وهو أن هناك قوى مضادة للثورة داخل المجلس كانت تريد منح فرصة للنظام السابق لإعادة ترتيب أوضاعه كي يتمكن من السيطرة من جديد ... ومن هنا كان الإصرار على بقاء شفيق وبعض الوزراء ومسؤولي الإعلام والحكم المحلي والأمن ليستكملوا مهمة إجهاد وإجهاض الثورة

ايوه كده برافو عليك انت جبتها علي بلاطة ، وده اللي عمال اقوله من الصبح المسألة عندما تتعلق بمحاكمة مبارك فهذا سيتسبب في توريط بعض او حتي كل قيادات المجلس

لكن في نفس الوقت هم يقومون بتنفيذ مطالب الثورة. طالما هي بعيد عن مبارك

ولا ننكر ان طلبات مهمة كثيرة تم تنفيذها ، وايضا وزراء سابقين تتم محاكمتهم الان ولكن الوصول للكبار جدا امر ليس سهل ولا نعرف من من القوى الخارجية تقف ورائهم ، ولا يجب ان نغفل هذا ابدا او ننساه

لذلك كل الاخبار والتصريحات الغريبة التي نسمعها الان والتي لا نصدقها هي نتيجة لان هناك كما قلت خوف من التورط وكشف الملفات لو تم نقض ما تم الاتفاق عليه عند تنحي مبارك فهل نتوقع مثلا ان يخرج علينا المجلس العسكري ليقول لنا الحقيقة؟؟

فهناك اشياء تمت اثناء تنحي مبارك تمت في الخفاء ومثل هذه الاشياء قد لا نعرف حقيقتها الا بعد مرور سنين طويلة

- اما ان المجلس العسكري يريد عودة النظام السابق للحكم او احد تابعيه فهذا صعب جدا وغير منطقي ولكن كل ما في الامر اننا نضغط عليهم لجعل محاكمة مبارك هي اول الاولويات وهذا الامر يحرجهم الان ويجعلهم تحت ضغط لان هذا الامر لم يكن ضمن اولويات المجلس العسكري