شئ في صدري - سؤال برئ - ليه كل الحراميه الكبار في سجن واحد؟

[masrymasry]

ليه كل الحراميه الكبار في سجن واحد؟

مش ممكن يعملوا أي حاجه ويهربوا من السجن لأن زي ماشايفيين كل يوم والتاني يحصل أن مساجين بتهرب أو يعملوا تخريب أو أي شئ لأن كلهم متجمعين في مكان واحد ومش عارفين هم بيفكروا إزاي - يعني مسموح لأحمد عز أنه يعمل خمس إتصالات في اليوم يعني ممكن يتصل بشوية بلطجيه يجيوا يخرجوهم من السجن ويهربوا على بره

أنا بصراحه قلقان على وجود الحراميه والفاسدين دول في مكان واحد هل ممكن يكون هناك سبب للقلق ده؟

بس إللي عاوز أعرفه ليه ميكونش كل مجموعه منهم في سجن بعيد عن الآخرين علشان ميحلصش أي إتصال بينهم ويعملوا أي تخريب عن طريق بلطجية الحزب الوطني الموجودين بين الشعب

دا مجرد سؤال ودعوه للمناقشه

تم تعديل 10 أبريل 2011 بواسطة masrymasry

[Dreamwithme]

أولا انتشرت أكثر من مرة إن هناك محاولات هروب تمت من طرة والله أعلم كان مين بيحاول يهرب

وكانت إشاعات فعلا أم لا

ثانيا إجابة سؤال حضرتك لأن كل الكبار دول محبوسين علي ذمة التحقيق وليس حكم نهائي

ففي طرة هناك سجن يسمي سجن التحقيقات ....يعني بيتسجن فيه الناس المحبوسة علي ذمة التحقيق إلي أن يتم الحكم عليهم

ياريت حد يصحح لي لو أنا فاهمة غلط

[Damo]

أنا على حد علمي ان سجن طره ده للمجرمين اللي لسة تحت التحقيق وبعدين لما يصدر الحكم يبتدوا يتوزعوا على السجون.

بس أنا مع حضرتك انهم على الاقل ينفصلوا عن بعض ميكنش بينهم أي وسائل اتصال.

مش ده بردو اللي بيعملوه لما يقبضوا على أي عصابة؟ يفصلوهم عن بعض عشان ميعرفوش ينسقوا اقوالهم و ولا يتفقوا على سيناريو ؟!

تم تعديل 10 أبريل 2011 بواسطة Damo

[Alattar]

الموضوع ده بيفكرني بالقصة الحقيقية لريا و سكينة

لما جابوا وكيل نيابة يحقق معاهم..و الراجل ياعيني قعد فترة كبيرة مش عارف ياخد منهم لا حق ولا باطل..عشان كانوا بيتفقوا مع بعض جوه هيقولوا ايه..و يوزعوا الأدوار عليهم..لحد ما صدرت أوامر بتغييره

وجابوا وكيل نيابة جديد..كان أول حاجة عملها..انه فصل بينهم..و حط كل واحد منهم في زنزانة منفردة..لحد ما عرف يوقعهم في الكلام

وبما إن التاريخ بيعيد نفسه...يبقي لازم فعلا نستفيد من الحتة دي و نفصل بينهم..عشان ما يتفقوش علي حاجة

[التونسى]

أعتقد ان السبب لده هو سبب ((أمنى)) فى المقام الاول .. من السهل تكثيف الامن وتشديده على مكان واحد .. أفضل من توزيعهم على اماكن متفرقه .. وده فيه ارهاق أمنى ...منعا لهروب الشخصيات دى... او تعرضها للاغتيال بفعل خطورتهم وكل ما يجرى حولهم من اتهامات .. وكمان ممكن تواجدهم مع بعض يفيد فى التجسس على حواراتهم مع بعضهم البعض والخروج بمعلومات تفيد

يعنى راى وتحليل شخصى

[Ahmed Anwer]

ممكن عشان يشكلوا حكومة طره المستقلة

[rewsha]

أعتقد ان السبب لده هو سبب ((أمنى)) فى المقام الاول .. من السهل تكثيف الامن وتشديده على مكان واحد .. أفضل من توزيعهم على اماكن متفرقه .. وده فيه ارهاق أمنى ...منعا لهروب الشخصيات دى... او تعرضها للاغتيال بفعل خطورتهم وكل ما يجرى حولهم من اتهامات .. وكمان ممكن تواجدهم مع بعض يفيد فى التجسس على حواراتهم مع بعضهم البعض والخروج بمعلومات تفيد

سبحان الله يا استاذ تونسي .في توارد افكار بين راْي حضرتك وراْيي دايما

حتى ايام الثوره برضو

انا مع راْي حضرتم مليون الميه .يعني بدل ما يقعدوا يوزعوا على كل سجن افراد امن (عساكر وكده ) لا يبقى سجن واحد عليه عدد كبير من افراد الامن

وبعدين ده وجود كل واحد لوحده في مكان غير التاني هايخلي فرصة اتفاقه مع بلطجيه او حد يهربه هاتبقى اسهل اصله هايبقى واحد انما لو 5_6 وجه حد يهربهم يبقى اصعب

ولو فرضنا عمليه هروب جماعي لكل اللي في السجن . اعتقد اننا هانلاقي مساجين هاتفضل انها تمسك في الشخصيه المعروفه دي وتمنع تهريبها احسن لهم من انهم يهربوا

[rewsha]

احب اضيف معلومه

ان الناس دي لو هربت اصلا او حد منهم هرب .الشعب هايعمل مش هاقول مليونيه دي هاتبقى ثمانينيه

الترجمه (80 مليون يعني)

يعني ال80 مليون مصري هايطلعوا كلهم في مظاهره

:egyflag:

[se_ Elsyed]

هناك فرق بين سجن طُره .. وسجن مزرعة طُره

سجن طُره هو اللي هرب منه السجناء في أثناء الفراغ الأمني

والامن لحق يرحل كتير من المساجين المشاهير مثل هشام طلعت مصطفى وغيرهم إلى سجن مزرعة طُره المشدد الحراسة ..

وهو ده اللي فيه الحبايب هناك

وتقريباً كلهم دلوقت في حبس إنفرادي في غرفة لا تزيد مساحتها عن 2 * 2

والمساجين ما بيقابلوش بعض إلا ساعة يومياً تُسمى ساعة التريض ..

بيمشوا رجليهم يعني فيها

[masrymasry]

بصراحه الواحد مش هيستريح إلا لما الناس دي تتحاسب

[rewsha]

رصد | مصر | نبه وزير الداخلية على قوات الحراسة خارج طرة بالاستعداد الدائم لصد أي محاولات لاقتحام السجن وتهريب المساجين #RNN

8 hours ago

ياترى الخبر ده وراه ايه؟

[شيدوان]

اعتقد ان وجودهم فى مكان واحد سسببه التخفيف عنهم بوضعهم فى ظروف توفر لهم بعض ما كان لهم خارج السجن ..يعنى المكان كما يقولون عنه هو فندق 5 نجوم بالنسبه للاماكن الاخرى التى لها نفس الغرض ..والاهم من ذلك اجتماع شلة الانس كلها مع بعضها دون حدود او قيود لدرجة ان البعض قال ان سجن طره اصبح دولة طره ..ففيه كل رءوس الدولة فى كل المجالات وتستطيع ان تدير الدوله من مكانها

وانا لا اعتقد انهم يفكرون فى الهرب من السجن ، لان فرصتهم فى الهرب قبل دخوله كانت اكبر وافضل واسهل من فرصتهم الآن بعد دخوله ، ومع ذلك لم يهربوا.. ثم ان الكثيرين الذين علقوا على الحدث ومنهم رجال قانون يرون ان شلة الحراميه سوف تأخذ براءه لانها قبل دخولها السجن ، ونتيجة للتباطؤ او التواطؤ ، اخذت وقتها لتخفى معالم جرائمها دون مشاكل واصبحت نظيفه شريف لدرجة ان الرئيس السابق يهدد فى نهاية كلامه بملاحقة الذين اتهموه ظلما وبهتانا بانه واسرته حراميه وخربوا البلد .

المشكلة ليست فى وجودهم فى سجن واحد ، انما فى قدرتهم على الاتصال بالأخرين خارج السجن واعطائهم التعليمات لمحاولة تخريب كل ما تحاول الثوره اصلاحه ..لذك لابد من اخلاء المكان من وسائل الاتصال كلها سواء عن طريق المحمول او النت ، لانه كما سمعنا فقد مرر مبارك كلمته الى قناة العربية عن طريق النت

شكرى وتحياتى

[Dreamwithme]

المشكلة ليست فى وجودهم فى سجن واحد ، انما فى قدرتهم على الاتصال بالأخرين خارج السجن واعطائهم التعليمات لمحاولة تخريب كل ما تحاول الثوره اصلاحه ..لذك لابد من اخلاء المكان من وسائل الاتصال كلها سواء عن طريق المحمول او النت ، لانه كما سمعنا فقد مرر مبارك كلمته الى قناة العربية عن طريق النت

شكرى وتحياتى

ياريت بجد يكونوا واخدين بالهم من النقطة دي ...

لأن الأيام الماضية كانت خير شاهد لما كان يحدث في مصر بسبب اتصالات الثلاثي الشرير من حرائق واعتصامات وقلق في البلد