ما هذه المسخرة ؟؟؟ طلعت السادات رئيساً للحزب الوطنى.. وتغيير اسمه لـ "الوطنى الجديد"

[se_ Elsyed]

دي كلمة مسخرة قُليلة على البيه اللي كان عامل فيها معارض ووطني ... واهو ركب الموجه مع أول هوجه

وعشان كده إتنازل لأخوه الوطني في اخر إنتخابات وكسبوه بإكتساح

وعشان كده كان مبهدلنا أثناء الثورة وعيب يا ولاد ومبارك كبير عيله .. وإن ما شالتوش الأرض يبقى ميت أبو الكوم ومضيفة الرئيس السادات تساعه وتشيله

وكان عامل فيها قُمع

قولي كده يا خفيف

أعلن الحزب الوطنى اختيار طلعت السادات رئيساً للحزب، ليكون خليفة الرئيس المخلوع محمد حسنى مبارك، بعد اجتماع عقده اليوم الاثنين، الدكتور محمد رجب الأمين العام للحزب.

وقال الدكتور نبيل لوقا بباوى عضو الحزب الوطنى والمتحدث باسمه فى تصريحات خاصة لـ "اليوم السابع" إن الحزب سوف يعقد مؤتمراً صحفياً لرئيسه الجديد بعد غد الأربعاء بمقر الحزب بمصر الجديدة.

وأضاف بباوى أنه تم تغيير اسم الحزب الوطنى الديمقراطى إلى الحزب الوطنى الجديد.

[se_ Elsyed]

إزاي واحد بيحترم نفسه وعامل فيها معارض يجتمع في مكان مع الكائن المُسمى " نبيل لوقا باباوي " بتاع ( الجنين في بطن أمه يقول نعم لمبارك ) .. أخبار الجنين إيه دلوقت يا لوقا ؟

اعتقد إن الجيش لازم يحسم الموضوع ده مثلما إتحسم في تونس وهو حل الحزب الفاشي اللي أذاقنا الويل لمدة 30 عاماص ودخلنا في مصايب هانفضل 100 سنة نعاني منها ..

وصدر قرار طازه اليوم في تونس بمنع أي عضو منتمي للحزب الحاكم السابق لزين الهاربين بن علي بالترشح لأي منصب برلماني ...

أنا مع القرار ده مليون المية ... وعشان نقفل الموضوع ده ... وده يعتبر أقل عقاب لكل المنتفعين والمطبلاتية والمرآين والأفاقين والمزورين واللي كانوا كالشياطين حوالين أبليس الكبير ..

[fatfouta]

والنبى لو عملتوا وطنى جديد ولا وطنى قديم حتى.....أحب اقولكم

:waf:

[الباشمهندس ياسر]

والنبى لو عملتوا وطنى جديد ولا وطنى قديم حتى.....أحب اقولكم

:waf:

شوية الايقونات اكلت دماغك يا فتفوتة

[عصام أبوالفتح]

ده واضح انه اتظبط على الاخر فى السجن ومكنش طالع مبسوط اوىىىىىىى من فراغ

[Alattar]

أنا كنت فاكرك بتهزر لحد ما شفت الموضوع في باب محاربة الفساد

الوطني الجديد؟

هما بيضحكوا علي مين بالظبط؟

[se_ Elsyed]

لو الحياة السياسية واحشاه قوي ... ما أسسش حزب جديد ليه وأهي بقت إجراءات سهلة زي سلامو عليكم ؟

ولا حياة مصر الجديدة حيث مقر الحزب عجبته وهاينط على كرسي الحزب اللي كان قاعد عليه مبارك لمدة 30 سنة عشان يرضي غروره وشهوة السُلطة عنده ؟

[mamdowh]

كلمة الوطنى للاسف بتجيب لى ارتكاريا ضيف عليها كمان عم طلعت يجيلك مع الارتكاريا لومباجو وبعدين حط عليهم بقية أعضاء الجرب الوطنى كده بقى هايجيلى شلل رعاش وانا لما بارعش ماباشوفش قدامى ......... انا باحذركم يا بتوع الحزب ماليش دعوة من اللى هايحصل لكم...........ايه النطاعة دى ايه الاستهبال ده ............ هاتوا الدوا بتاع الضغط والا اقولكم هاتوا كل الادويه اللى فى البيت خلينى أرتاح

[arkan]

بجد ايه العك ده

خليه يبقى حزب فاشل زي القديم واهو اساء لنفسه

[Alshiekh]

ومــــــــــــــــــــــــــــــــــان

لما كنا لسه عيال صغيرين فى ابتدائي مثلا

كنا نحب نلعب كورة

احنا يادوبك خمس عيال

نقوم عاملين جون مشترك

والجون المشترك يصد كور الفريقين ، يعنى بيلعب للفريقين

ساعات تانية نبقى بنلعب 3 ضد 3 ، وفريق منهم معاه واحد احتياطى ، يقوم لما واحد يتكسر من الفريق التانى ، مفيش مشكلة ، الاحتياطى ينزل يلعب شوية للفريق المنافس ، كده يعنى علشان الماتش يمشى والعيال ماتزعلش.

مستغربين ليه ان طلعت يلعب على وشين او ثلاثة؟ اهو كله لعب ، وسيبوا الناس تسترزق ، ولو ليهم مؤيدين ، يشبعوا بيهم.

[se_ Elsyed]

ومــــــــــــــــــــــــــــــــــان

لما كنا لسه عيال صغيرين فى ابتدائي مثلا

كنا نحب نلعب كورة

احنا يادوبك خمس عيال

نقوم عاملين جون مشترك

والجون المشترك يصد كور الفريقين ، يعنى بيلعب للفريقين

ساعات تانية نبقى بنلعب 3 ضد 3 ، وفريق منهم معاه واحد احتياطى ، يقوم لما واحد يتكسر من الفريق التانى ، مفيش مشكلة ، الاحتياطى ينزل يلعب شوية للفريق المنافس ، كده يعنى علشان الماتش يمشى والعيال ماتزعلش.

مستغربين ليه ان طلعت يلعب على وشين او ثلاثة؟ اهو كله لعب ، وسيبوا الناس تسترزق ، ولو ليهم مؤيدين ، يشبعوا بيهم.

لأ معليش ...

دي تبقى مكافأة من الثورة لهم ... إنهم يكملوا عادي وكأن شيء لم يكن

أومال ثورة إيه بقى ؟

لما كمان إسبوع نلا قي الحزب اعلن عن إسم مرشح الرئاسة بتاعه .. يبقى إيه شعورنا إحنا ؟

هذا ليس إقصاءً .. لكنه أقل عقاب لهذا الكيان السرطاني ...

والعقاب الأكثر إن يتم منع أي حد حزب زفت ينزل الإنتخابات تاني .. لإنهم محترفين تزوير وكلام معسول وبيعرفوا يوصلوا للغلابة إزاي ويأكلوا بعقلهم حلاوه وكفايه بقى 30 سنة

[محمد حامد الغنام]

ياجماعه انا شايف ان الحزب الوطنى بقيادة طلعت السادات

هيكون اتغير خلاص

وانا يعنى شايف الى بيعارض الحزب

خلاص الوجوة الكريهة الى هيا ليست لها قابلية فى الشارع انتهت خلاص

اذا

احنا امامنا حزب جديد وبقيادة جديدة

كمان حاجة لازم نعرفها

ان الرئيس السادات

هو الى أنشا الحزب الوطنى

انا من راى ندية الفرصة ونشوفوا هل هيصدقوا فى كلامهم ولا مش هيصدقوا ونشوفوا اية القرارت الجديدة

التى ممكن تكون محل رضى من الشعب

كلة

[se_ Elsyed]

ياجماعه انا شايف ان الحزب الوطنى بقيادة طلعت السادات

هيكون اتغير خلاص

وانا يعنى شايف الى بيعارض الحزب

خلاص الوجوة الكريهة الى هيا ليست لها قابلية فى الشارع انتهت خلاص

اذا

احنا امامنا حزب جديد وبقيادة جديدة

كمان حاجة لازم نعرفها

ان الرئيس السادات

هو الى أنشا الحزب الوطنى

انا من راى ندية الفرصة ونشوفوا هل هيصدقوا فى كلامهم ولا مش هيصدقوا ونشوفوا اية القرارت الجديدة

التى ممكن تكون محل رضى من الشعب

كلة

سؤال يا محمد

سوري يعني

لما يكون قدامك حتت لحمة منتنة وكلها دود ....

وأخرى طازه وطيبة وحلال

تسيب الطيب وتروح على المنتنة وتنفضها وتحاول تطبخها وتقول أهي كلها لحمها ؟

ندي فرصة لمين ؟؟؟؟

للي خربوها لمدة 30 سنة ؟

ما هو خيار تأسيس حزب جديد مازال قائماً ... تفتكر طلعت بيه ما أسسش حزب في 5 دقايق ليه ؟

ونزل على الوطني الجديد ببراشوت ؟

اللهم إلانتهازية المقيتة وحب الشهرة ولو على حساب البلد ومصلحتها

[محمد حامد الغنام]

وجهة نظرك محترمة ياستاذ سيد الا اننى ارى

لا توجد بين قطعه اللحم التى انت قولتها

وبين الحزب الوطنى من جهة اخرى وهذة وجهة نظرى

فانا افضل ان يخرج كل الوجوة التى لا تلقى ان ترحيب شعبى من الحزب

ويتم تطهير الحزب ممن كانوا سبب هذة الأحداث

الماضية

وهذا راى

[capitshino]

مجرد استمرار وجود هذا الحزب هيفكرنا دائما بايام سوده

استغفر الله العظيم

[أبو محمد]

إزاي واحد بيحترم نفسه وعامل فيها معارض يجتمع في مكان مع الكائن المُسمى " نبيل لوقا باباوي " بتاع ( الجنين في بطن أمه يقول نعم لمبارك ) .. أخبار الجنين إيه دلوقت يا لوقا ؟

اعتقد إن الجيش لازم يحسم الموضوع ده مثلما إتحسم في تونس وهو حل الحزب الفاشي اللي أذاقنا الويل لمدة 30 عاماص ودخلنا في مصايب هانفضل 100 سنة نعاني منها ..

وصدر قرار طازه اليوم في تونس بمنع أي عضو منتمي للحزب الحاكم السابق لزين الهاربين بن علي بالترشح لأي منصب برلماني ...

أنا مع القرار ده مليون المية ... وعشان نقفل الموضوع ده ... وده يعتبر أقل عقاب لكل المنتفعين والمطبلاتية والمرآين والأفاقين والمزورين واللي كانوا كالشياطين حوالين أبليس الكبير ..

فيه دعاوى مرفوعة يا س س لحل الحزب الوطنى ..

هى الثورة قامت ليه يا س س ؟ مش علشان الديموقراطية وترسيخ دولة القانون بدلا من دولة قانون ساكسونيا اللى كان بيتيح للحكومة إنها تضرب عرض الحائط بأحكام القضاء عندما لا تكون على هوى "الكبير" ؟ .. طيب ازاى بقى تقوم ثورة علشان تعمل حاجة (وترفع لها الشعارات) ثم يأتى عملها وسلوكها ليكون عكس ما طالبت به ورفعت من أجله الشعارات ؟

أنا - فى الحقيقة - محتار فى موقف طلعت السادات .. وفشلت إلى الآن فى فهمه .. وأرجو ألا يطول الوقت بهذه الحيرة وعدم الفهم

ولكن

لا أتفق معك يا صديقى فى أنها "الانتهازية" كما قلت فى مداخلتك الأخيرة .. فالحزب الوطنى ليس فرصة لكى ينتهزها أى شخص عادى الذكاء .. ولا أظن أن ذكاء طلعت السادات أقل من العادى .. أنظر إلى جميع المداخلات السابقة التى تبين بوضوح موقف الحزب الوطنى على الساحة ..

فلننتظر لنرى

1) الحكم فى الدعاوى المرفوعة لحل الحزب الوطنى

2) تفسير معقول لإقدام طلعت السادات على خطوة مثل هذه

[Om Zayd]

قراءتي الشخصية ان طلعت السادات يعتبر نفسه "الوريث" الشرعي للحزب الوطني عن عمه أنور السادات

:closedeyes:

يعني الراجل بيرجع ورثه اللي كان مبارك و ابنه مغتصبينه

متضايقوش نفسكم خااااااااااالص يا جماعة.. كده كده محدش هينتخبهم

دول كانوا بينجحوا بالتزوير بالعافية

;) :happy:

[Simba]

النهاردة النظر في دعوي حل الحزب الوطني

دعواتكم يا جماعة ان القاضي تكون مفقوعة مرارته من الحزب ورجالة الحزب

[se_ Elsyed]

أي هرتلة في اي محشي ..

وشكله كان حزب وطني ومتنكر لإنه بيتكلم بنفس الأسلوب وإن الإخوان والسلفيين هايضيعوا البلد وإن لازم الجميع يقف ضدهم ..

ده على إفتراض إن زمان كان الحزب الوطني معييشنا في فلل وشاليهات

طلعت السادات فى أول تصريح بعد رئاسة "الوطنى الجديد" لـ "اليوم السابع": أول قراراتى فصل مبارك وتطهير الحزب من جميع القيادات الفاسدة..وأدعو شباب الثورة للانضمام للحزب لمواجهة الإخوان والسلفيين

الثلاثاء، 12 أبريل 2011 - 00:13

أعلن طلعت السادات المحامى وعضو مجلس الشعب السابق، أن أول قرار سيتخذه بعد قبوله رئاسة الحزب الوطنى الجديد، هو فصل جميع فلول الحزب الوطنى وقياداته، الذين أفسدوا الحياة السياسية ونهبوا الشعب، بداية من الرئيس السابق محمد حسنى مبارك وأتباعه مثل صفوت الشريف وفتحى سرور وزكريا عزمى، ومن على شاكلتهم.

وقال السادات فى أول تصريحات له لـ "اليوم السابع" بعد توليه منصب رئيس الحزب الوطنى الجديد، إن اسم الحزب الوطنى الجديد يقوم على روح أكتوبر وثورة الشباب، داعيا شباب ثورة 25 يناير للالتفات حول الحزب الوطنى الجديد بعد تطهيره من كل الحرامية والنصابين والفاسدين لمعالجة الخلل فى المناخ السياسى المصرى، ومواجهة قوة الإخوان المسلمين والسلفيين، وحتى لا تضيع مصر.

ودعا السادات جميع أعضاء القوات المسلحة والشرطة المتقاعدين منهم للانضمام للحزب، وكذلك العمال والفلاحين، وقال إنه سيعقد مؤتمرا صحفيا بعد غد الأربعاء بمقر الحزب الوطنى بمصر الجديدة لإعلان ملامح سياسته وخطوات تطهيره للحزب وتنظيفه من أى فاسد.

وقال السادات: "أدعو شباب ثورة 25 يناير للالتفاف حولى حتى نستطيع معالجة الخلل السياسى، والقضاء على فلول الحزب الوطنى الجديد وأعداء الثورة الذين نهبونا وسرقونا على مدى 30 عاما"، مشيرا إلى أن المؤتمر العام للحزب سيعقد يوم 25 من هذا الشهر عند قبر السادات، موجها دعوة لجميع الأحزاب المعارضة والإخوان المسلمين والقوى السياسية للحضور، ليتأكدوا أن الحزب الوطنى القديم لم يعد له وجود وأنه لم يعد مكان إلا للشرفاء بالحزب الوطنى الجديد.

[reda hamza]

هو فعلا قرار غير موفق من السادات

و لكن السؤال لو اردنا اصدار قرار مثل تونس بخصوص الحزب الوطني هل سيكون ذلك في مصلحة مصر ؟ نخسر 3 مليون شخص و لا نحاول نرجع ليهم وطنيتهم بان يمسك الحزب ناس كويسين و نخلي ولاء الناس دول لمصر بدلا من ولائهم للنظام السابق

و هل قامت الثورة لمنع شخص من المشاركة في الحياة الساسية بالعكس نحن لابد ان نلغي فكرة معاملة الحزب الوطني بالمثل و الا سنكون اولا غير منصفين و ثانيا سنكون علي اعتاب ثورة مضادة لاننا منعنا مواطنين مصرين من حقوقهم السياسية

تم تعديل 12 أبريل 2011 بواسطة reda hamza