أخيراً.... آخر أعمالى الفنية (أغنية لثورة مصر)

[وليد صفوت]

بعد ما وقفت لحظة التنحى قدام شاشة العرض فى ميدان التحرير و صرخنا كلنا أخيراً....ـ

الكل رقص و غنّى و صرخ بأعلى صوته فرحـــــــة... شوفت المعنى المتجسد للفرحة.... حتى الناس المسؤولين عن الامن على مداخل الميدان ماكانوش مصدقين، و مش عارفين ينطلقوا فى الميدان و يصرخوا فى الناس و لا يحافظوا على اماكنهم.... الكل انطلق يجرى فى الميدان و يقول "تنحــــى" "تنحــــى".... اللى كانوا بعيد عن الشاشة الكبيرة ماكانوش سامعين.... ماصدقوش.... الكل جرى فى كل مكان..... فرحة ماتتوصفش..... فرحة ما ينفعش تتقارن بأى فرحة تانية... غير فرحة طفل بريئ برؤية والدته بعد غياب....

فرحة الطفل اللى مافيهاش اى تحفظ او وعى باللى بيعمله.... الطفل اللى بيتنطنط بلا قيود و بيغنى بأعلى صوته.... دى كانت لحظة التنحى...ـ

شاء الله تعالى ان الاغنية دى تخلص بعد يوم واحد من قرار النائب العام حبس مبارك و عائلته.... و أحمد ربنا ان الناس استعادت روح الميدان بعد القرار ده....ـ

بحلم ان روح الميدان تفضل عايشة جوانا.... طول حياتنا... و لو ماكانش... يبقى على الاقل نعيشها عدد دقائق الاغنية.ـ

فرحة ... بلا قيود... أخيراً

الاغنية بصوت: محمود عامر

كلمات: أحمد الشاذلى

ألحان بسام صلاح

توزيع و مكساج: وليد صفوت

اسيبكم مع الاغنية و يارب تعجبكم

تحياتى

http://www.youtube.com/watch?v=Bp2TTf80ElU

[Folana]

السلام عليكم ورحمة الله...

الله..الله..الله..

جميلة جدا ياوليد ...فنان بجد

وفعلا الناس استعادت روح الميدان بعد قرار محاكمة اللامبارك...وان شاء الله يتحقق حلمك وتظل الروح الجميلة دى جوانا تدفعنا دايما للتقدم والنجاح...

بأشكرك يا وييل على الاغنية الجميلة اللى اسعدتنا بها...تسلم لنا

[وليد صفوت]

و عليكم السلام يا مدام فلانة.... ميرسى لذوق حضرتك و اتمنى تكون عجبتك و يارب الناس تفضل دايماً بروح الميدان اللى بجد و حقيقى وحشتنى جداً ايامه و ايام البيات فيه مع احلى و احسن و انقى ناس فى الدنيا....ـ

كل التحية

[Salwa]

ايوة كدة ياوليد .

تصدق انى وانا بسمع الأغنية وقلت لابنى دى بقى توزيع ومكساج صاحبك ...فرح جداا وبيبعتلك كل التهنئة وطلبها منى ..

شفت ازاى ..؟؟

يعنى اغنيتك حاتتسمع فين وفين وفين ؟؟

ياعالم دلوقت مين بيسمعها ؟؟

مبروك ومليون مبروك ياوليد ويارب من نجاح لنجاح..

الصراحة عندك حق ..فيه مشاعر بنحس بيها بدون مقدمات ومش بنعرف نعبر عنها ولا بنعرف نوصفها .

احنا بنحس بيها ف وقتها بس.

ومن المشاعر اللى محدش وصفها قبل كدة ....مشاعر المصريين بعد يوم الخطاب المشهور .

احساس فك القيود احساس رائع .

احساس الانتصار احساس اروع..

احساس النقاء دلوقت بعد ازاحة كل بؤر التلوث اللى كانت مالية البلد ..احساس لايعادله اى احساس ممكن شرحه..

شئ فعلا حصل لنا ....فيه نفحة الهية .

حالة تصالح مع الكون كله وترفع عن اى صغائر ...كل الناس بقت بتحب بعض وبتفرح لفرح بعض .

شوية شوية كل شئ حايرجع لحالته الطبيعية الاولانية ..حاتلاقى الناس مش بتسكت على اى ظلم .

الاشجار حايرجع خضارها..وحاتبقى جذورها ف الأرض مش حاتبقى هياكل تتشال وتتحط بس للزوار والأجانب ؟؟ .

والشمس حاترجع تشرق بفرحة وضحكة للصغار والكبار .

كل حاجة حاتبقى حلوة ولها طعم جميل .

دلوقت احنا عرفنا فعلا فعلا معنى كلمة ...بكرة احلى من انهاردة ..

والحمدلله..بقينا بكرة .

مبروك ياوليد ..

مبروك عليكم ثورتكم الراقية جدااا والسلمية جداا والمصرية جدااا ..

مبروك عليكم ثورتكم..

مبروك علينا...انتم...الجيل الجديد الجميل الصاحى . :clappingrose:

[fatfouta]

تسلم ايدك يا استاذ وليد الاغنية جميلة بجد

:clappingrose:

[الباشمهندس ياسر]

عشنا و شفنا اليوم اللي ضحكت فيه بلادي

كلمات رائعة

عقبال ما تضحك بلادنا بجد

و احنا بنرفع رايتها ف كل مكان

[التونسى]

دخلة الاغنيه جميله جدا ومعبره .. وتهز المشاعر هزا .. والله فكرتنا يا استاذ وليد بيوم جميل جدا جدا .. فعلا اخيرا عشنا وشفنا اليوم اللى بتضحك فيه بلادنا .. ممكن نطلق عليه ((يوم من عمرنا)) مع الاعتذار حليم ... الاغنيه موفقة جدا فى كافة عناصرها .. شكرا لك على اعطاءنا تلك الفرصة الطيبه للاستمتاع بإبداعكم

مع خالص تقديرى واحترامى

[م تيمور المراغي]

بسم الله ماشا ءالله

ايه المواهب الجميله دي ,,

تحيتي لابداع حضرتك وليد بك ,,

[أبو محمد]

برافو يا وليد .. وألف مبروك .. ذوق راقى جدا .. كان نفسى يكون صوت عود ظاهر مع أكورات الجيتار .. فينالة الكمنجات رائعة .. ياترى بتعبر عن روح الميدان أم عن ضرورة العودة للهدوء والروقان ؟ :)

[وليد صفوت]

السلام عليكم جميعاً

ماما سلوى..... مش هقدر اعبر عن فرحتى بإعجابك للأغنية.. ربنا يجعل كل ايامك فرحة و سعادة... و دى ثورة المستقبل... ثورة هتنقل مصر من عصر الظلام و الجهل و الفساد و التآمر و الرجعية، إلى النور و العلم و الاخلاق الرفيعة و التحضّر و التنوير بالمفهوم السليم...ـ

الثورة المصرية ربنا معاها فى كل خطواتها و لله الحمد...و آخر لمسات التوفيق اللى من عند ربنا سقوط طلعت السادات بعد طمعه فى الحزب الوطنى على أساس انه شقة مفروشة و جاهزة و مفتاحه للرئاسة، ثم حل الحزب الوطنى.... يعنى ربنا و لله الحمد أراد ان الثورة تبقى نضيفة إلى آخر لحظة...ـ

ربنا يحفظك يا ماما سلوى و كل الاسرة الكريمة و انا ليا الشرف و سعيد جداً جداً انها عجبت حضرتك و ان شاء الله الفن كله فى مصر يتغير بعد الثورة إلى فن راقى يحترم أذن و عين و ذوق الجمهور...ـ

أرق تحياتى لأرق أم فى المحاورات

---

استاذة فتفوتة، ربنا يخليكى انا سعيد جداً انا عجبت حضرتك.... و فرحان اكتر ان الرسالة اللى فى الاغنية وصلت للناس... ربنا يحفظ مصر بأهلها

---

باشمهندس ياسر bv:-

طول ما كل الشرفاء و اللى عندهم ارادة حقيقية لبناء مصر واقفين ورا البلد... بيبنوا و يدفعوا القافلة للأمام.... هنعيش اليوم ده إلى الأبد...ـ

و على فكرة، انسى لحظة حزن تكسر قلب مات يجى ألف مرة..... يعنى مافيش فايدة من أى حد بيحاول يكسر عزيمتنا أو يلتف أو يسرق ثورتنا... كرة الثلج تدحرج و تكبر مع الايام نحو التقدم، و لا وسيلة لإيقافها... بارك الله فى مصر :wub:

---

استاذ التونسى.... انا اللى بشكر حضرتك على مرورك و على رأيك و كل ما يسعدنى هى ان تسعد الاغنية الناس لأنى كان نفسى اسعد الناس فى وقت بدأ القلق يتسلل ليهم بعد فترة انتصار....ـ

فعلا يا استاذ التونسى اليوم ده كنت ماشى فى الشارع و معايا اصدقائى مذهولين و مش مصدقين اننا ماشيين فى مصر... لدرجة اننا لفينا وسط البلد مرتين و طلعنا فوق كوبرى اكتوبر و كل الناس فى الشوارع بتتكلم معانا كأننا نعرف بعض من سنين و الفرحة فى عيون كل الناس... و كل العربيات اطلقت كلاكسات الفرح الشهيرة و الاعلام المصرية اغرقت الشوارع.... بجد احنا مش هنشوف زى اليوم ده تانى فى عمرنا...ـ

الف شكر لحضرتك يا استاذ التونسى و اتمنى ان الاغنية تكون نقلت لحضرتك و لو جزء من احساس اللحظة دى... دمت بكل حب

---

استاذ اركيتكت....ـ

انا بشكر حضرتك على مرورك و اتمنى انها تكون عجبتك... احنا كفريق عمل بداناها فى ميدان التحرير و بجد عملناها بقلوبنا فأتمنى توصل للناس بنفس الصدق اللى اتعملت بيه... و دمت بكل حب

[وليد صفوت]

برافو يا وليد .. وألف مبروك .. ذوق راقى جدا .. كان نفسى يكون صوت عود ظاهر مع أكورات الجيتار .. فينالة الكمنجات رائعة .. ياترى بتعبر عن روح الميدان أم عن ضرورة العودة للهدوء والروقان ؟ :)

ميرسى يا باشمهندس أبو محمد انا اللى بشكر حضرتك على كلامك و ذوقك الراقى.... العود ماكانش متوفر الحقيقة و لو كان موجود كان احتل جزء كبير فى الاغنية... انا عوضت عن العود بألة الاكسليفون لأظهار روح الطفولة و الفرحة بتاعت الطفل البريئة اللى مافيهاش اى حسابات و فطرية... و اخترت الخروج من الاغنية بالوتريات وحيدة و بدون ايقاع لأن كان تصورى ان فى اللحظة دى هنتخيل الناس بفرحتهم اشبه بالافلام العربى القديمة لما البطل بيتجوز البطلة و بيتنهى الفيلم النهاية السعيدة اللى مافيهاش اى نوع من القلق او أى "منغصات" ...فقط يمسك بيد البطلة ليسير معها فى طريق تصتف فيه الاشجار على الجانبين و يبتعدوا عن الصورة لتعلوا صوت الوتريات معلنة ان حياتهم ظلت سعيدة هادئة إلى الأبد... أو هذا ما أتمناه....ـ

دمت بكل خير و حب

[وليد صفوت]

النسخة الصوتية من الاغنية اذا ارادتم الاحتفاظ بها على الموبايل او mp3

[وليد صفوت]

و دى نسخة تانية من الاغنية بدون ايقاعات (فلامنكو)