الاقتباس من المحاورات

[Damo]

السلام عليكم

أنا عندي سؤال بسيط عن الاقتباس من المحاورات.

دلوقتي أنا كذا مرة يعجبني توقيع أو مشاركة من حد وأبقى عايزة اخدها زي ماهي واحوطها في مكان تاني. بس دايما مشعرفة انسبها لصاحبهـا إزاي؟؟

احط مثلا الاسم الحركي بعديها ؟؟؟ مفتكرش لان ساعات الاسم الحركي مينفعش خالص مع الاقتباس

احط لينك موضوع المداخلة مثلا؟ بردو مش فكرة عملية عشان لو توقيع كده بيبقى في أي مداخلة لنفس العضو وكمان أول ماهو هيغير التوقيع كلو هيتغير معاه وهيبقى اللينك ملوش لازمة لان بردو معرفناش من اللي قالها .

هل كفاية إني احطها مابين "------" وبس ؟

[عادل أبوزيد]

أسفل المشاركة التى تريدين إقتباسها أو إقتباس جزء منها ... أسفل المشاركة فى أقصى اليسار توجد أيقونة مكتوب عليها إقتباس متعدد إضغطى عليها سيتغير لونها إلى اللون الأحمر.

بعد ذلك أول كتابة لكى ستكون عبارة عن صورة من المشاركة التى إخترتيها و فى أولها بيان عن المشاركة الأصلية و إسم صاحب المشاركة.

فى مشاركتى التالية سأقتبس مشاركتك كمثال لعملية الإقتباس.

[عادل أبوزيد]

السلام عليكم

أنا عندي سؤال بسيط عن الاقتباس من المحاورات.

دلوقتي أنا كذا مرة يعجبني توقيع أو مشاركة من حد وأبقى عايزة اخدها زي ماهي واحوطها في مكان تاني. بس دايما مشعرفة انسبها لصاحبهـا إزاي؟؟

احط مثلا الاسم الحركي بعديها ؟؟؟ مفتكرش لان ساعات الاسم الحركي مينفعش خالص مع الاقتباس

احط لينك موضوع المداخلة مثلا؟ بردو مش فكرة عملية عشان لو توقيع كده بيبقى في أي مداخلة لنفس العضو وكمان أول ماهو هيغير التوقيع كلو هيتغير معاه وهيبقى اللينك ملوش لازمة لان بردو معرفناش من اللي قالها .

هل كفاية إني احطها مابين "------" وبس ؟

كل ما فعلته أن إخترت زر "إقتباس متعدد" و تغير اللون إلى الأخضر ثم إخترت أن أضيف مشاركة لهذا الموضوع و كانت مشاركتك بعاليه

[Damo]

السلام عليكم

اشكرك أستاذ عادل على الرد.

بس أنا كان قصدي اقتبسها في مواقع اخرى غير المحاورات. ازاي يبقى في فرق بين إني بقتبس كلام حد تاني وإني بدعي إني أنا اللي قايله الكلام ده.

تم تعديل 17 أبريل 2011 بواسطة Damo

[hOuSsAm]

الفاضلة دامو

والاستاذ عادل

موضوع مهم جدا جدا جدا

لانه بيناقش ببساطة حقوق الملكية

اللى فهمته من دامو انها عايزة تقتبس مشاركة احد الاعضاء او توقيعه الى منتدى اخر او موقع او فيس بوك (الخ)

وده يثير سؤال هى حقوق المليكة للنشر فى المنتدى هل هى ملك المنتدى وبالتالى تؤؤل لصاحب المنتدى الشرعى ام هى ملك لكل عضو بما يخص مشاركاته

وماهى اجراءات الاقتباس او النقل الى مكان اخر

يعنى نمضى استاذ عادل على ورقة ولا الادارة ولا نتصل بصاحب المشاركة مباشرة نقوله بعد ازنك عجبى موضوعك هتكلم فيه فى منتدى اخر او مدونة

من يومين بس اتشتمت ويمكن دعى عليا كمان واحد كان عايز يصور منى كتاب عليه حقوق ملكية ومكتوب بالنص ممنوع التصوير او الاقتباس او النقل او التاجير او التسليف الا بورقة كتابية من المؤلف - ساعتها الشخص ده قالى انت درويش وشوية كلام ملهوش لازمة :(

هستاذن دامو اننا نحول النقاش فى موضوع حقوق الملكية وازاى نطبقها فى مجتمعنا؟

عشان بناخد سيئات للصبح بسبب الموضوع ده وناس كتيرة بتقتبس وبتاخد ومش فاهمة واللى بيصور كتب واللى بينشر وكله بقى مهلبية

دعوة للنقاش

[Damo]

قوي قوي اتفضل أستاذ حسام

ده بالظبط اللي أنا بسأل عليه فعلا

حد يقولي أنا أعمل إيه بالظبط وبعد كده الموضوع كلو بتاعكو اتفضلوه ميغلاش عليكو

[Alshiekh]

قوي قوي اتفضل أستاذ حسام

ده بالظبط اللي أنا بسأل عليه فعلا

حد يقولي أنا أعمل إيه بالظبط وبعد كده الموضوع كلو بتاعكو اتفضلوه ميغلاش عليكو

بالنسبة للمداخلات ،

اقتبسى المداخلة ، وفي اسفلها اكتبى منقول واكتبى عنوان الرابط.

بالنسلة للتوقيع ، لو كان التوقيع قول مأثور لواحد من المشاهير فى السياسة او الاجتماع او العلم مثلا ، قومي بنقله ونوهى عن اسم صاحب المقولة الاصلي

يعنى مثلا شفتي توقيع بيقول "

" نصحتك يابني لما حسي اتنبح

متخافش من جن ولا شبح

وان هب فيك عفريت قتيل اساله

مدافعش عن نفسه ليه يوم ما اندبح "

فى آخر التوقيع تكتبى ( صلاح جاهين )

[Om Zayd]

السلام عليكم و رحمة الله و بركاته

يارب تكوني بخير يا دامو

متفقة مع راي ا. محمد.. المهم الاشارة للمصدر

بالنسبة لاخونا حسام .. موضوع الملكية الفكرية و تاثير الانترنت عليها كان اتناقش هنا

http://www.egyptiantalks.org/invb/index.php?showtopic=82112

رايي الشخصي هبقى اقوله بعدين

[Diab]

علي النت مفيش حاجة اسمها ملكية فكرية لان النت عبارة عن بيوت منفدة علي بعض

كل واحد وضميره

لو اقتباس لنتاج أدبي ممكن ذكر المصدر

ولو الموضوع فيه تكلفة ممكن تشتريها

ده من الأخر بالنسبة لي علي الأقل

تم تعديل 18 أبريل 2011 بواسطة Diab

[عادل أبوزيد]

أتفق مع الفاضل Diab و خاصة بالنسبة لمحاورات المصريين.

كل ما هو موجود على الموقع هو ملكية عامة public domain و بالنسبة للملكية الفكرية فوجود المادة بتاريخ معين بإسمك فى محاورات المصريين هو دليل قاطع على أنك فعلا صاحب الموضوع و لذلك طلبت من الشعراء و الأدباء إستخدام الإسم الحقيقى فى محاورات المصريين كنوع من تسجيل الملكية الفكرية لهم.

هذه المعلومة معروفة و بديهية منذ شارك كل منا فى محاورات المصريين.

و لكن أدبيا عند النقل من محاورات المصريين أو حتى من أى موقع آخر إلى محاورات المصريين أو حتى دفترك الخاص يجب وضع بيان بالمصدر الأصلى.