على خلفية سعي مصر لإقتراض 10 مليار دولار

[se_ Elsyed]

مش عارف الخبر مر علينا مرور الكرام سواء على مستوى المثقفين أو الإعلام ولا أنا اللي مهول الموضوع ؟

دي تصريحات للدكتور سمير رضوان اللي قال منذ أيام قليلة إن مصر بتسعى الأن لإقتراض مبلغ 10 مليار دولار لدعم الإقتصاد المصري في هذه المرحلة

وهو مبلغ ضخم جداً جداً مقارنةً بديون مصر الخارجية كلها التي لا تتجاوز 35 مليار دولار

وإذا كنا هانستخدم المبلغ ده في الدعم فقط .. فما بالنا بالتنمية والمشروعات المتستقبلية ؟

وهانسدد إزاي فوايد المبلغ بالإضافة إلى الفوايد السابقة للـ 35 مليار ؟

طبعاً ده شغل إقتصادي بحت ونحن نثق في قدرة الدكتور عصام شرف والدكتور سمير رضوان

لكن هناك حلول أخرى سريعة وغير مكلفة .. ومن اهمها سُرعة البت العادل في قضايا تخضم ثروات المسئولين الفاسدين اللي نهبوا البلد

وعلى رأسهم مبارك واولاده ومعهم أحمد عز ..

وما حدش يقول لي إن أمبراطورية عز شغالة دلوقت زي الأول .... طبعاً لأ ... بل كان في تهديدات قريبة ومبطنة منه شخصياً بإنه هايعقد جمعية عمومية لشركاته ويخليهم ياخدوا قرار بغلق المصانع وتسريح 10 الاف عامل في الشارع ويلبس الحكومة في الحيط ويقول لهم عشان تحرموا ...

ولما قرأت الخبر التالي النهادرة

وتلقى المستشار عاصم الجوهري مساعد وزير العدل لشؤون جهاز الكسب غير المشروع، ، تقارير من الرقابة الإدارية عن ثروات وممتلكات الرئيس السابق مبارك وزوجته سوزان ثابت، ونجليهما علاء وجمال مبارك، وأفادت التقارير تضخم الثروات بطريقة غير مشروعة، وأنهم يمتلكون حسابات في البنوك في الداخل والخارج وأنهم يملكون 27 حساباً بنكياً، تحتوي على مليارات الجنيهات، واستدعى المستشار خالد سليم، رئيس هيئة الفحص والتحقيق، ضابطي الرقابة الإدارية وقام بمناقشتهما في التحريات

أنا أستغربت .... لإن الوقت بيجري .. وأنا خايف مبارك يموت وما نطولش حاجه

وبالتالي نريد لجان مختصة فقط بمثل هذه الأمور

يعني المستشار عاصم الجوهري بالتأكيد أمامه الاف البلاغات والقضايا اللي من النوع ده . فليه ؟

ليه ما نفرغش ناس محترفة ومتخصصة ونخليهم يحققوا في القضايا الكبيرة والتقيلة اللي من النوع ده

لإن 10 مليار معناها إن البلد بتغرق

وبالمناسبة .... الاجانب المستثمرين في البورصة المصرية والمتسثمرين بشكل عام لديهم نظرة مختلفة عننا

يعني هما تهمهم قوي المؤشرات الإقتصادية للبلد .. مش لسهم معين أو لشركة ..

وكمان السياسة تهمهم جداً ... والاكثر من ذلك اللي ماحدش واخد باله منه ... المؤشرات الأمنية وأنتشار البلطجة والغياب الأمني اللي مازال متعمد

وبالتالي على سبيل المثال لما سمعوا خبر زي بتاع الإقتراض ده .. لقيناهم النهاردة وامبارح بيبيعوا اسهمهم في البورصة بهيستيريا ز برخص التراب وبيخلعوا من البلد ... لإن هما عارفين إن خبر زي ده بيدل على مدى هشاشة حالة البلد الإقتصادية بل والسياسية

اللي بيزيد ويغطي بقى إن في ظروف الثورات والحروب مستوى أو حالة الإئتمان عند البلد بتبقى سيئة جداً .. وما حدش بيرضى يسلفك لإن ظروفك غير مستقرة ... وحتى على مستوى الديون الفعلية .. بتزيد عليها الفوائد لإن نسبة التأمين على الديون بتزيد هي كمان لإن بيبقى في إحتمالات لا قدر الله إن البلد تتعسر أو حتى تفلس ... والناس المُقرضين يدخلوا بقى في دوامة تحصيل فلوسهم وجدولتها و و و و

فياريت نتحرك بسرعة ونحسم تلك الامور عشان كل واحد ياخد حقه بالعدل والقسط ..

[se_ Elsyed]

البنك الأهلي لوحده أكد إن جمال عنده حساب واحد به 100 مليون جنيه

وعلاء مبارك عنده حساب أخر بـ 300 مليون جنيه

وإذا افترضنا صعوبة الحصول على معلومات دقيقة من بنوك الخارج .. فما بالنا وبنوكد الداخل تحت إيدينا ولن يستغرق الأمر ثواني معدودة ؟

كمان إحنا إتفقنا على الشفافية والثورة كانت قايمة عشان كده ... لماذا لم يخرج علينا أي مسئول في وزراة المالية ويقول لنا حساب 25/1/2011 وصل كام لحد دلوقت والتحويلات اللي عليه كام ؟

[se_ Elsyed]

لسه ما قفلتش الموضوع ده .. إلا واٌقرأ هذه الخبر

أقر أنس الفقي وزير الإعلام السابق، في التحقيقات التي يجريها معه جهاز الكسب غير المشروع، امتلاكه حساباً سرياً في أحد بنوك سويسرا بقيمة 2 مليون دولار، وقرر المحقق إعادته إلى محبسه بسجن مزرعة طرة، ، ومنعه من التصرف في أمواله والكشف عن سرية حساباته.

كانت النيابة، قد واجهت الفقي صباح الاثنين، بتقارير وحدة غسيل الأموال في الرقابة الإدارية، حول الفساد المالي الإداري باتحاد الإذاعة والتليفزيون، بالإضافة إلى تضخم ثروته بما لا يتناسب مع دخله كوزير سابق، وأقر الفقي في التحقيقات التي أجراها معه المستشار خالد سليم، رئيس هيئة الفحص والتحقيق بالنيابة العامة، بالوقائع السابق الإشارة إليها.

هههههههههههه ضحكت والله

ده عند ماما يا فقي

ده الأتنين مليون دولار دول ما يجوش مصاريف فُسحة في سويسرا على باكوين شوكلاوته

ولا ده طُعم وجزره بترميها لنا نتلاهى فيها ؟

ههههههههههههههههه فكرني بموقف لن انساه حصل قدامي في لجنة الثانوية العامة ..

بالصلاتو عالنبي من وأنا في إبتدائي بتبقى لجنتي كلها أحمدات ... وكنت في الجامعة اللهم لا حسد ... 200 واحد إسمهم احمد بس

ونعم الرجالة

المهم كنا في إمتحان العربي في الثانوي وفي الصف اللي جنبي واد روش وكان معروف إنه بليد ... لسه فاكر إسمه .. المهم مافيش نص ساعة إلا ولقيناه بيعيط وفاحم نفسه من العيط .. المراقب جه .. في إيه يابني ؟

قال له سامحني يا أستاذ .. انا معايا برشام ومش عاوز أغش وأنا اسف عاوز اسلمه ... وراح سوري خالع الجزمة ومخرج كمية ورق رهيبة

الراجل قال له بارك الله فيك وإنت شخص محترم و و و

شويه وألمح الندل مخرج الورق الحقيقي ونازل غش بعد ما المراقب وثق فيه وخلاص بقى منهم وعليهم

سألته بسذاجة بعد اللجنة إنت عملت كده ليه وسلمت نفسك ؟

فلسان حالة قال : إبقى اسأل أبيه أنس الفقي وهو يقول لك ههههههههه

[rewsha]

لكن هناك حلول أخرى سريعة وغير مكلفة .. ومن اهمها سُرعة البت العادل في قضايا تخضم ثروات المسئولين الفاسدين اللي نهبوا البلد

اللي فهمته من الكلام الكتير اللي بنسمعه في التلفزيون عن موضوع استرجاع الاموال دي

ان حتى علشان نسترجعها هاتاخد وقت طويل شويه.ده بفرض ان الحكم طلع النهارده باستردادها

لاْن المحاكم حبالها طويله .وتاْجيلات واستئنافات وطعون .

ولازم الحكم يا خد وقته علشان يبقى مافيش ثغرات .لان الكروته ممكن تخلي الاجراءات فيها ثغرات لصالح العدو

واخدين بالكوا من العدو ...دي

[rewsha]

الحاجه اللي هاتجنني بقى

كل يوم نسمعخبر تجميد اموال ..(.س).... من الناس

وبعدها بيوم .التحفظ عل اموال (ص)

وهكذا ....

وبعدين بعد شهر ونص من الخبر بتاع التجميد ده

نلاقي خبر طالع ...ان الاموال ماحدش جمدها .وماحدش طلب تجميدها من اصله كمان

ثم ان المسؤلين مش عارفين ان لو نص الفلوس المنهوبه دي لو رجعت

يبقى احنا مش محتاجين نستلف ولا مليار حتى

الغريبه ان بعد الثوره .كلمه( مليار) دي الواحد بق يقولها كئنه بيتكلم عن 10 جنيه مثلا

[aimen]

ضريبة تصاعدية على الثروة وخصوصا الحرامية والحيتان الثقيلة

ومحاولة استرداد كل ما يمكن من اموال مصر المنهوبة

لا وانكت حاجه اليوم

ان لجنة استعادة الثروات مخصصة فقط لثروات مبارك وآله

وليس الحرامية اجمعين

هناك مقال على الوفد بيتكلم فى النقطة دى

[عنبو]

طيب هما ليه مش يخلوا الاقتراض ده اخر الحلول

يعنى ممكن يحصوا المغتربين كام واحد ويفرضوا على كل واحد يدفع مرتب شهر

ورجال الاعمال اليى فى مصر برده يدفعوا كمان

وناخد فلوس الحراميه بتوع طره اليى موجوده فى مصر

ولو احتجنا حاجه بعد كده نبقى نقترض

تحياتى

عنبو

[rewsha]

يعنى ممكن يحصوا المغتربين كام واحد ويفرضوا على كل واحد يدفع مرتب شهر

ورجال الاعمال اليى فى مصر برده يدفعوا كمان

تفتكر ممكن يا عنبوا ده يحصل ؟

يعني هل من المنطق انهم يحصوا المغتربين ويفرضوا عليهم مرتب شهر ؟؟

وهل المغتربيين كلهم هايوافقوا ؟

وله ده هايبقى غصب عنهم ؟

ولو غصب عنهم ..يبق الاول انهم ياخدوا فلوس الحراميه الكبار غصب عنهم .

اعتقد ان ممكن يعملوا حاجه كده بمعنى انهم يقترضوا من المغتربين بدل ما يقترضوا من الدول

ويبق في فوايد على القرض ده

يعني بدل ما يقترضوا من بره وبفوايد .يبقى يقترضوا من المغتربين وبفوايد برضوا

اعتقد كده ممكن .

لاْن مش كل الناس زي بعضيها

:egyflag:

[abdulmuttaleb]

لدي اعتقاد أن تضخيم الإعلام للثروات كان بهدف استفزاز الناس وتحفيزهم للثورة استغلالا لحالة الغلاء والبؤس المنتشرة في مصر

وده خلى ناس كتير كانوا فاكرين أن برحيل مبارك الفلوس ح تنزل علينا زي المطر

على كل حال، وإلى أن يقول التاريخ، ومن قبل القضاء، كلمتيهما ، أتصور أن التفكير في استرجاع الفلوس هو غير عملي، لأن المطلوب من جهات التحقيق حاليا حسبما هو منشور أن تثبت أولا وجودها، ثم إن ثبتت فعليها فحص مشروعية مصادرها، ثم إن ثبتت يتم تجميدها، ولحين ذلك فالاقتصاد سيكون بكل تأكيد في حاجة إلى ضخ استثمارات وأموال والأهم:

إعادة ثقة

بصراحة فكرة حبس رجال الأعمال (وتصوير الأمر وكأن كل رجل أعمال لازم يشرف في طرة) والمظاهرات ضد أصحاب المصانع ونغمة هم بيكسبوا احنا لازم ننبسط بين بعض العمال، دي كلها حاجات تقلق أي رجل أعمال عربي أو أجنبي

أنا شايف أن لازم قوانين تنتسف وتعاد هيكلتها عشان الاستثمار يكون آمن في البلد

لأن كمان لازم نعترف ان فيه رجال اعمال كانوا بيلجؤوا للمسؤولين من عشان فساد احد الطرفين، ولكن لتلافي عراقيل روتينية أحيانا بقوانين من أيام الملك، وطبعا في الحالات دي بتكون فرصة للفساد كبيرة حتى لو لم تكن من الطرفين (مثلا الوليد بن طلال ومبارك) ولكن مع الشلة المحيطة وضعاف النفوس من موظفين ورجال بنوك وخلافه.

تم تعديل 18 أبريل 2011 بواسطة abdulmuttaleb

[jasmin hamed]

هو مش جودت الملط قال ديون مصر ١٠٨٠ مليار يعنى ال١٠ مليار دولار

حقيقة مش كتير قوى

ولا ده غير ده الواحد فى الاقتصاد مش قوى يعنى

موضوع ان مبارك يموت وزير العدل قال ده اسهل هنورثه

الحقيقه ان قضية مبارك لازم تكون بتأنى و تاخد قتها استئناف ونقض عشان بتوع

اوربا مايتحججوش

بس بردو لو فيه احكام اتصور انهم مش هيرجعوا الفلوس من غير ديل يعنى فيها لاخفيها

http://www.alwatanvoice.com/arabic/news/2011/03/11/170962.html

[الباشمهندس ياسر]

هو احنا معندناش كروت ضغط خاااااااااالص

يعني مفيش ايدينتا حاجة نضغط بيها ع الدول اللي فيها الارصدة اللي بالمليارات دي

يا الفلوس ترجه يا اما .... هيطلع عين ابوكم ف كذا و مصالحكم الفلانية هيحصل فيها كذا و الموضوع الفلاني مش هيمشي

شوية حاجات من بتوع الناس الرجالة دي

[se_ Elsyed]

هو مش جودت الملط قال ديون مصر ١٠٨٠ مليار يعنى ال١٠ مليار دولار

حقيقة مش كتير قوى

لأ يا جاسمين .. المبلغ بتاع 1080 ده يشمل الدين الداخلي والخارجي معاً ...

الدين الداخلي مننا فينا .. وممكن نتدلع على البنوك والشركات اللي بتداين الدولة ...

ولكن الدين الخارجي ما فيهوش هزار ... ومجرد الإمتناع او عدم المقدرة على دفع الفوائد ... بتحصل كوارث لا حصر لها ... منها إعلان إفلاس الدولة

---------------

هو احنا معندناش كروت ضغط خاااااااااالص

تصدق بالله ؟؟؟

فكرت في الموضوع ده النهاردة ... لكن بعد الأحكام النهائية بسجن الفاسدين طبقاً للقانون ... ولو إتسجنوا وما ردوش الفلوس بتاعت الشعب ... يبقى نشتغل لهم في شغل العربجية .. وأنا مش شايفه عيب مع اللصوص اللي زي دول

يعني نماذج مثل "علي علوطه وأشرف كوخه وسعيد سرايفو " .... عندنا منهم كتير في السجن ..

وكفاية كام نموذج من دول نخليهم في نفس الزنزانة مع احمد عز ... وعلاء مبارك و و ...

وإنت عارف الباقي بقى

ومتأكد إنهم خلال يومين هايعترفوا على كل مليم عندهم وعند غيرهم

[الباشمهندس ياسر]

---------------

هو احنا معندناش كروت ضغط خاااااااااالص

تصدق بالله ؟؟؟

فكرت في الموضوع ده النهاردة ... لكن بعد الأحكام النهائية بسجن الفاسدين طبقاً للقانون ... ولو إتسجنوا وما ردوش الفلوس بتاعت الشعب ... يبقى نشتغل لهم في شغل العربجية .. وأنا مش شايفه عيب مع اللصوص اللي زي دول

يعني نماذج مثل "علي علوطه وأشرف كوخه وسعيد سرايفو " .... عندنا منهم كتير في السجن ..

وكفاية كام نموذج من دول نخليهم في نفس الزنزانة مع احمد عز ... وعلاء مبارك و و ...

وإنت عارف الباقي بقى

ومتأكد إنهم خلال يومين هايعترفوا على كل مليم عندهم وعند غيرهم

لا اله الا الله

انت طيب اوي يا س س

انا قصدي اننا نضغط ع الدول اللي بره

معظم الفلوس اتجمدت خلاص يعني الحرامية اللي عندنا مبقاش ليهم حق التصرف فيها

و طبعا ده ميمنعش اننا نعمل فيهم حاجات وحشة خاااااااالص .. يا مامي

[امير مجروح]

هو احنا معندناش كروت ضغط خاااااااااالص

يعني مفيش ايدينتا حاجة نضغط بيها ع الدول اللي فيها الارصدة اللي بالمليارات دي

يا الفلوس ترجه يا اما .... هيطلع عين ابوكم ف كذا و مصالحكم الفلانية هيحصل فيها كذا و الموضوع الفلاني مش هيمشي

شوية حاجات من بتوع الناس الرجالة دي

عندنا اقوى نقطة ضغط وهى قناة السويس

[وطني حر]

باختصار اعتقد لما نسمع عن ثروه عز او جمال او اي حد من نزلاء طره .

الثروه مش مبالغ نقديه سيوله بنكيه اغلبها عباره عن اراضي علي البحر وشاليهات وفيلات . . . وشركات الخ

فلما تسيل هذه الاصول بوقت سريع صعب جدا السوق يمتصها وخصوصا في ظل الاوضاع الحاليه في مصر . فممكن تتسيل وتتباع بثمن بخس زيها زي الاصول العامه الي تم تخصيصها .